အခန်း ၂၀၁၉

အခန်း (၂၀၁၉) ခေါင်းအေးအေးထားသည့်ချူးယွင်ဖန်း

ခြောက်လိုင်းရွှေခရမ်းဆေးလုံး၏ အံ့မခန်းဆေးအာနိသင်ကိုသာ ထန်စစ်ယုထံသို့ အရောက်ပို့ပေးနိုင်ခဲ့လျှင် သူမ၏ ကျင့်စဉ်အဆင့်အတန်း တစ်ရှိန်ထိုး တိုးတက်လာရန်မှာ လက်တစ်ကမ်းအကွာမျှသာ လိုတော့သည်။

အခြားသောသူများကမူ ထန်စစ်ယုအနေဖြင့် ဖန်ဆင်းရှင်အဆင့်ကို ကျော်လွန်ရန် နှစ်ပေါင်းများစွာ အချိန်ယူရဦးမည်ဟု ထင်မှတ်နေကြသော်လည်း သူတို့အားလုံးသည် ဤဆေးလုံး၏ ဆေးစွမ်းကို အလွန်အမင်း လျှော့တွက်ထားကြခြင်း ဖြစ်၏။

သူမ၏ အခြေအနေက ချူးယွင်ဖန်းနှင့် လုံးဝကွာခြားသည်။ ချူးယွင်ဖန်းသည် ဤဆေးလုံးကို တိုက်ပွဲများအတွင်း သူ၏ နောက်ဆုံးဝှက်ဖဲအဖြစ်သာ သုံးခဲ့ရခြင်း ဖြစ်သည်။ ဆေးသောက်ပြီးတိုင်း အသက်လုရသည့် အကြိတ်အနယ်တိုက်ပွဲကြီးများနှင့် အမြဲတမ်း ရင်ဆိုင်ခဲ့ရသဖြင့် တိုက်ပွဲအပြီးတွင် ကျင့်စဉ်အဆင့် ခုန်ပျံတိုးတက်သွားတတ်သည်မှာ မှန်သော်လည်း ဆေးအာနိသင်အများစုကမူ တိုက်ပွဲအတွင်းမှာပင် ဟာလာဟင်းလင်း ဖြုန်းတီးပစ်လိုက်ရသကဲ့သို့ ဖြစ်ခဲ့ရသည်။ သူကိုယ်တိုင် ဆေးအာနိသင်၏ ဆယ်ပုံတစ်ပုံခန့်ကိုသာ စုပ်ယူနိုင်ခဲ့ခြင်းက ချူးယွင်ဖန်းအတွက် အကြီးမားဆုံးသော နောင်တတစ်ခု ဖြစ်ခဲ့ရ၏။

သို့သော် ထန်စစ်ယုကမူ ထိုသို့မဟုတ်ချေ။

သူမသည် ချူးယွင်ဖန်းကဲ့သို့ ကမ္ဘာပျက်မတတ် ပြင်းထန်လှသော တိုက်ပွဲကြီးများကို ထိပ်တိုက်ရင်ဆိုင်နေရခြင်းမျိုးမရှိသဖြင့် ခြောက်လိုင်းရွှေခရမ်းဆေးလုံး၏ ဆေးအာနိသင်အားလုံးကို တစ်စက်မကျန် အပြည့်အဝ ချေဖျက်စုပ်ယူနိုင်စွမ်း ရှိသည်။ ထို့ကြောင့် ဆေးလုံး၏ ထိရောက်မှုစွမ်းရည်မှာ ချူးယွင်ဖန်းရရှိခဲ့သည်နှင့် ဘယ်လိုမှ နှိုင်းယှဉ်၍ မရနိုင်လောက်အောင် ကွာခြားသွားမည် ဖြစ်သည်။

ချူးယွင်ဖန်း၏ တွက်ချက်မှုအရ ဤဆေးလုံးကို သောက်သုံးပြီးနောက် ထန်စစ်ယုသည် ဖန်ဆင်းရှင်အဆင့်၏သတ္တမအဆင့်သို့ ချိုးဖျက်ဝင်ရောက်သွားမည် ဖြစ်ပြီး အလွန်ဆုံးကြာမှ နှစ်လအတွင်းမှာပင် ဖန်ဆင်းရှင်အဆင့် အထွတ်အထိပ်အဆင့်သို့ တက်လှမ်းနိုင်တော့မည် ဖြစ်သည်။ ထိုအမြင့်ဆုံးအဆင့်တွင် သူမ၏ ကျင့်စဉ်အခြေခံကို တည်ငြိမ်အောင် ပြန်လည်ထိန်းညှိလိုက်သည်နှင့် နောက်ထပ် ရှေ့သို့တစ်လှမ်းတိုးကာ ဖန်ဆင်းရှင်အဆင့်ကို အောင်မြင်စွာ ကျော်လွန်သွားရန်မှာ အချိန်သိပ်ကြာတော့မည်မဟုတ်ချေ။

ဤကဲ့သို့သော ကျင့်ကြံမှုအရှိန်အဟုန်မျိုးသည် သာမန်လူသားများအတွက်မူ မယုံနိုင်စရာ ကောင်းသော အံ့ဖွယ်အမှုတစ်ခု ဖြစ်နေလိမ့်မည် ဖြစ်သော်လည်း ချူးယွင်ဖန်း၏ မျက်လုံးထဲတွင်မူ ဤအရာက ဖြစ်သင့်ဖြစ်ထိုက်သော သဘာဝတရားတစ်ခုသာ ဖြစ်၏။ အကယ်၍ သူမသာ ဤအဆင့်ကို မရောက်ရှိနိုင်ခဲ့လျှင်မှ ထူးဆန်းနေဦးမည် ဖြစ်သည်။

ထန်စစ်ယုသည် မွေးရာပါကတည်းကပင် ဧကရာဇ်ခန္ဓာကိုယ်ကို ပိုင်ဆိုင်ထားသူဖြစ်ရာ ပါရမီအထုံပိုင်းတွင် ပြောစရာမလိုအောင် ရှားပါးလှသော ပါရမီရှင်တစ်ဦး ဖြစ်သည်။ ထို့အပြင် မင်းသမီးကြီးကိုယ်တိုင်၏ ကျောထောက်နောက်ခံပံ့ပိုးမှုကြောင့် အဖိုးတန်လှသော ရတနာမျိုးစုံနှင့် ဆေးဝါးများအားလုံးကို ထန်စစ်ယုအနေဖြင့် လိုသလောက်သုံးစွဲခွင့် ရှိထားသည်။ သူမသည် ချူးယွင်ဖန်းကဲ့သို့ ကျင့်ကြံခြင်းဆိုင်ရာ ရိက္ခာအရင်းအမြစ်များကို ရရှိရန်အတွက် နေရာအနှံ့ လှည့်လည်ရှာဖွေနေရခြင်း၊ နည်းလမ်းအမျိုးမျိုးဖြင့် ရုန်းကန်နေရခြင်းမျိုး လုံးဝမလိုအပ်ချေ။

ထို့ကြောင့်ပင် ချူးယွင်ဖန်းသည် ထန်စစ်ယုအပေါ် မည်သည့်အရာကိုမျှ ဖုံးကွယ်ချန်လှပ်ထားခြင်းမရှိဘဲ လုံးဝပွင့်လင်းပေးထားခဲ့သည်။ ဤဆေးလုံးကို အောင်မြင်စွာ ဖော်စပ်ပြီးသည်နှင့်တစ်ပြိုင်နက် ၎င်းကို သူမထံသို့ ချက်ချင်း သွားရောက်ပို့ဆောင်ပေးရန် ရိုချူးယွင်ကို စေလွှတ်ညွှန်ကြားခဲ့တော့သည်။ ထိုဆေးလုံးနှင့်အတူ ချူးယွင်ဖန်းသည် မိမိ၏ စိတ်အာရုံထဲတွင် ရှိနေသော ဆေးဧကရာဇ်၏ မှတ်ဉာဏ်များကို အခြေခံ၍ ရေးသားထားသော ကျင့်ကြံခြင်းဆိုင်ရာ အရေးကြီး မှတ်စုမှတ်တမ်းများကိုပါ အတူတကွ ပေးပို့ခဲ့သည်။ ဤမှတ်စုများကတင် သူမအတွက် နှစ်ပေါင်းများစွာကြာအောင် ကိုယ်တိုင်တွေးတော နားလည်ခဲ့ရမည့် ကျင့်စဉ်အနှစ်ချုပ်များကို သက်သာစေမည် ဖြစ်သည်။

ဤအရာသည် ရိုးရိုးရှင်းရှင်းပင် တန်ဖိုးဖြတ်မရသည့် ရတနာကြီး ဖြစ်၏။ တန်ဖိုးအရဆိုလျှင် ခြောက်လိုင်းရွှေခရမ်းဆေးလုံးထက်ပင် သာလွန်နေခဲ့သည်။ ဤကျင့်ကြံခြင်းဆိုင်ရာ မှတ်စုများထဲတွင် လက်ရှိအဆင့်၌ ကျင့်ကြံရမည့် အဓိကသော့ချက်များနှင့် လျှို့ဝှက်ချက်မျိုးစုံ ပါဝင်နေသဖြင့် အင်အားကြီးမားလှသော ဂိုဏ်းကြီးအများစု၏ မျက်လုံးထဲတွင်မူ ဤမှတ်စုများ၏တန်ဖိုးသည် ခြောက်လိုင်းရွှေခရမ်းဆေးလုံး ဆယ်လုံးထက်ပင် ပိုမိုအဖိုးတန်နေပေလိမ့်မည်။

အကြောင်းမူကား ခြောက်လိုင်းရွှေခရမ်းဆေးလုံးသည် သောက်သုံးပြီးပါက ကုန်ဆုံးသွားမည့်အရာဖြစ်ပြီး ကျင့်ကြံသူတစ်ဦး၏အဆင့်ကို မြှင့်တင်ပေးနိုင်သည်ဆိုစေဦးတော့ တစ်ကြိမ်တည်းသာ သုံးစွဲ၍ရသော ပစ္စည်းမျိုး ဖြစ်သည်။ အခြားတစ်ဖက်တွင်မူ ဤကျင့်ကြံခြင်းဆိုင်ရာ မှတ်စုလက်စွဲစာအုပ်များကမူ ဖန်ဆင်းရှင်အဆင့် ကျင့်ကြံသူများနှင့် ၎င်းထက် မြင့်မားသောအဆင့်ရှိ ပါရမီရှင်များကို အစဉ်အဆက် စဉ်ဆက်မပြတ် မွေးထုတ်ပေးနိုင်စွမ်း ရှိသောကြောင့်ပင်။ ထို့ကြောင့် ၎င်း၏ တန်ဖိုးမှာ ဘယ်လိုမှ တိုင်းတာ၍ မရနိုင်လောက်အောင် ကြီးမားလှပေတော့သည်။

တစ်ချိန်တည်းတွင်ပင် ထိုမှတ်စုကို ထန်စစ်ယုလက်ထဲသို့ ပေးလိုက်သော်လိုက်‌သော်လည်း မင်းသမီးကြီး လက်ထဲရောက်သွားမည်ကို သိသဖြင့် ဖတ်ပြီးမှသာ မင်းသမီးကြီးကို ပေးရန် ချူးယွင်ဖန်းက မှာထားသည်။ မင်းသမီးကြီးလက်ထဲရောက်မှသာ ထိုမှတ်စု၏တန်ဖိုးက အမြင့်ဆုံးရောက်သွားမည်ဖြစ်သည်။ ထိုသို့အာဏာမျိုးက ချူးယွင်ဖန်းရော၊ ထန်စစ်ယုထံတွင်ပါ မရှိပေ။

ချူးယွင်ဖန်းသည် ဤအခွင့်အရေးကို အသုံးချကာ ထန်စစ်ယုအပေါ် အစစအရာရာ ဂရုစိုက်စောင့်ရှောက်ပေးခဲ့သည့် မင်းသမီးကြီးကို ကျေးဇူးတင်စကား ဆိုလိုက်သည်။ အမှန်တော့ ယခင်က ချူးယွင်ဖန်းသည် မင်းသမီးကြီးအပေါ် မကျေနပ်ချက်များစွာ ရှိခဲ့ဖူး၏။ အကြောင်းမှာ မင်းသမီးကြီးသည် ထန်စစ်ယုအတွက် ကြင်ယာတော်ရှာဖွေပေးရန် ကြံရွယ်ခဲ့ဖူးသောကြောင့် ချူးယွင်ဖန်းမှာ လီချန်းယွမ်၏ အငြိုးအတေးဖြင့် ပစ်မှတ်ထားခံခဲ့ရသည်။ ထိုစဉ်က သူသည် အသက်လုရသည့် သေရေးရှင်ရေး တိုက်ပွဲပေါင်းများစွာကို ရှေ့ဆင့်နောက်ဆင့် ဆင်နွှဲခဲ့ရပြီး မရေမတွက်နိုင်သော သေမင်းတွင်းဝမှ သီသီလေး လွတ်မြောက်ခဲ့ရခြင်း ဖြစ်သည်။

သို့သော်လည်း မင်းသမီးကြီးသည် ထန်စစ်ယုအပေါ်တွင်မူ မည်သည့်အရာကိုမျှ ချန်လှပ်ထားခြင်းမရှိဘဲ အစွမ်းကုန် ပံ့ပိုးကူညီပေးခဲ့သည်။ ထန်စစ်ယုကို မိမိ၏ တကယ့်ဆက်ခံသူတစ်ဦးကဲ့သို့ စိတ်ရောကိုယ်ပါ မြေတောင်မြှောက်ပေးခဲ့သည်ဟု ဆိုရပေမည်။ ကမ္ဘာမြေ၏ အဖိုးတန်ရတနာမျိုးစုံကို ပေးကမ်းရာတွင်လည်း မင်းသမီးကြီးသည် မည်သည့်အခါမျှ လက်တွန့်မနေခဲ့ချေ။

ချူးယွင်ဖန်းအနေဖြင့် မင်းသမီးကြီးကို သဘောမကျသည်မှာ မှန်သော်လည်း ဤအချက်ကြောင့်ပင် သူ၏ ကျေးဇူးတင်ရှိမှုကိုမူ မဖြစ်မနေ ထုတ်ဖော်ပြသခဲ့ရခြင်း ဖြစ်သည်။ ဤကျင့်စဉ်လက်စွဲစာအုပ်ကို မင်းသမီးကြီးက ဆိတ်ငြိမ်နတ်ဘုရားတောင်တောင်မှ ပါရမီရှင်များကို မွေးထုတ်ရန်အတွက် ကိုယ်တိုင်သိမ်းဆည်းထားမလား သို့မဟုတ် တော်ဝင်မိသားစုထံ အပ်နှံမလားဆိုသည်ကိုမူ ချူးယွင်ဖန်းဂရုမစိုက်ချေ။ အခြားသူများအတွက် ဤအရာများက အလွန်တရာ အဖိုးတန်လှသော်လည်း ချူးယွင်ဖန်းအတွက်မူ ၎င်းတို့၏ တန်ဖိုးမှာ အဆမတန် လျော့နည်းနေခဲ့ပြီ ဖြစ်သည်။

အကြောင်းမူကား ချူးယွင်ဖန်းထံတွင် ဆေးဧကရာဇ်၏ အတိုင်းအဆမရှိသော မှတ်ဉာဏ်များနှင့် စွမ်းအားကြီးဧကရာဇ်၏ တိုက်ပွဲကျမ်းစာ’ (Mighty Emperor Battle Book) ကဲ့သို့သော ပြိုင်ဘက်ကင်း ကျင့်စဉ်ကျမ်းကြီး ရှိနေသောကြောင့်ပင်။ ထိုကျမ်းစာထဲ၌ ပါရှိသော ကျင့်စဉ်အဆင့်တစ်ခုချင်းစီ၏ အတွေးအမြင် အနှစ်ချုပ်များမှာ သာမန်လူသားတို့ စိတ်ကူးယဉ်၍ မရနိုင်လောက်အောင် ထူးကဲလှသည်။ အဆုံးစွန်၌မူ ၎င်းသည် ဧကရာဇ်အဆင့်ရှိ ပညာရှင်ကြီးတစ်ဦး၏ ကျင့်စဉ်အသိတရားများ မဟုတ်ပါလား။

အကယ်၍ သူသာ ဤကျမ်းစာကို ကူးယူပြီး အဆင့်ဆင့် စနစ်တကျ ကျင့်ကြံသွားမည်ဆိုပါက နှစ်ပေါင်းအနည်းငယ်မျှသော ရာစုနှစ်အတွင်းမှာပင် နတ်ဒေဝါဂိုဏ်းကဲ့သို့သော အင်အားကြီးမားလှသည့် အဖွဲ့အစည်းကြီးတစ်ခုကို ကိုယ်တိုင်တည်ဆောက်နိုင်မည်ဟု ချူးယွင်ဖန်းအပြည့်အဝ ယုံကြည်မှု ရှိနေသည်။ နတ်ဒေဝါဂိုဏ်းသည် နှစ်ပေါင်းသောင်းချီကြာအောင် အမြစ်တွယ် ဖွံ့ဖြိုးလာခဲ့ခြင်းဖြစ်သော်လည်း ချူးယွင်ဖန်းကမူ ၎င်းနှင့် တန်းတူရင်ဆိုင်နိုင်မည့် အင်အားစုတစ်ခုကို ဖန်တီးရန် နှစ်ပေါင်းရာဂဏန်းမျှသာ လိုအပ်မည် ဖြစ်သည်။ ဤကဲ့သို့သော ဖွံ့ဖြိုးမှုအရှိန်အဟုန်ကိုမူ ပျံသန်းနေသည့်အလား မြန်ဆန်လှသည်ဟု တင်စားရပေလိမ့်မည်။ သို့သော်လည်း ချူးယွင်ဖန်း၏ စိတ်ထဲတွင် ထိုကဲ့သို့သော အကြံအစည်များစွာ ရှိမနေခဲ့ပေ။ သူ၏ စစ်မှန်သော ရည်မှန်းချက်ပန်းတိုင်မှာ တစ်ခုတည်းသာ ရှိပြီး ၎င်းမှာ သိုင်းပညာ၏ အမြင့်ဆုံးအထွတ်အထိပ်သို့ ရောက်ရှိရန်ပင် ဖြစ်သည်။

ချူးယွင်ဖန်းသည် တောနက်တောင်ကုန်းထဲတွင် ပုန်းအောင်းနေခြင်းမဟုတ်သဖြင့် အပြင်လောကတွင် သူနှင့် ထန်စစ်ယုတို့၏ အစွမ်းအစအပေါ် အကြိတ်အနယ် ဆွေးနွေးငြင်းခုံနေကြသည်များကို သဘာဝအတိုင်း ကြားသိနေခဲ့ရသည်။ အစောပိုင်းက ပြင်ပလူများမှာ သူ့ကို အထင်ကြီး လေးစားခဲ့ကြသော်လည်း ယခုအခါတွင်မူ ထန်စစ်ယုကို ကမ္ဘာပေါ်တွင် အင်အားအကြီးဆုံး နံပါတ်တစ်အဖြစ် သတ်မှတ်လိုက်ကြပြီ ဖြစ်ရာ အခြေအနေများက များစွာ ပြောင်းလဲသွားခဲ့သည်ဟု ဆိုရမည်။

ထန်စစ်ယု၏ အစွမ်းထက်မှုမှာ အားလုံး၏ မျက်စိရှေ့မှောက်တွင် ထင်ရှားလှသော်လည်း ချူးယွင်ဖန်း၏ စွမ်းအားမှာမူ လွန်စွာ လျှို့ဝှက်လွန်းနေခဲ့သည်။ နှစ်ဝက်ကျော်ကြာသည့်တိုင်အောင် သူသည် မည်သည့်လှုပ်ရှားမှုမျှမလုပ်ဘဲ ကျန်းယွမ်မြို့တွင်သာ အေးအေးလူလူ ထိုင်ရင်း မြို့၏ စီးပွားရေးကိုသာ တိုးတက်အောင် ဦးဆောင်နေခဲ့သည်။

တစ်နှစ်တာဆိုသောအတောအတွင်းတွင် ကျန်းယွမ်မြို့၏ စီးပွားရေးမှာ ယခင်အခြေခံထက် များစွာ တိုးတက်ကောင်းမွန်လာခဲ့ပြီး နယ်စပ်ဒေသ၏ နံပါတ်တစ် အချက်အချာကျသော မြို့ကြီးတစ်မြို့ ဖြစ်လာခဲ့တော့သည်။ အဆုံးစွန်၌ ချူးယွင်ဖန်းသည် မဟာမိတ်အဖွဲ့ချုပ်မှလာသူဖြစ်ရာ သူ၏ စီးပွားရေးတွေးခေါ်မှုများနှင့် မြို့ပြစီမံခန့်ခွဲမှု နည်းဗျူဟာများမှာ တရှ၏ဒေသခံလူသားများ တွေးတောနိုင်စွမ်းရှိသည့် အတိုင်းအတာထက် များစွာ ကျော်လွန်နေခဲ့သည်။ တစ်နှစ်အတွင်းမှာပင် ကျန်းယွမ်မြို့ကြီးသည် လုံးဝဥဿုံ သစ်လွင်တောက်ပသော မြို့တော်ကြီးတစ်ခုအဖြစ်သို့ အံ့မခန်း အသွင်ပြောင်းလဲလာခဲ့လေတော့သည်။

--