အခန်း ၂၀၂၃

အခန်း (၂၀၂၃) သေဖို့လောနေတယ်ပေါ့လေ၊ ဆန္ဒဖြည့်ဆည်းပေးရတာပေါ့

“မင်းပြောမှပဲ ငါလည်း မှတ်မိတော့တယ်။ အခု တိုက်ခိုက်နေတဲ့ ဝတ်စုံနီနဲ့လူက အရင်ပါရမီရှင်စာရင်းတုန်းက သွေးနတ်ဆိုးဂိုဏ်းရဲ့ ထိပ်တန်းပါရမီရှင် ဝမ်ရွှယ်ယီပဲ”

“အဲဒီ ဝတ်စုံနက်နဲ့လူကိုလည်း ငါ မှတ်မိပြီ။ သူက နတ်ဆိုးမျိုးနွယ်စုထဲက ကောင်းကင်ဝါးမျိုကြွက်မျိုးနွယ်စုရဲ့ အစွမ်းထက်ဆုံး ပါရမီရှင် ကျန်းရှုရှုမဟုတ်လား”

“ဒါဆို... ဟို မုတ်ဆိတ်မွှေးနဲ့ လူငယ်က မဟာခွန်အားနတ်ဆိုးဂိုဏ်းရဲ့ လုဇီယွီပေါ့လေ”

လူအများ ဝိုင်းဝန်းပြောဆို ဆွေးနွေးကြရင်းဖြင့် ထိုပါရမီရှင်ဟောင်း သုံးဦး၏ စစ်မှန်သော မည်သူမည်ဝါဖြစ်ကြောင်း သရုပ်မှန်များမှာ တဖြည်းဖြည်း ပေါ်ထွက်လာခဲ့တော့သည်။ ၎င်းတို့၏ အမည်နာမများကို ပိုမိုသိရှိလာရလေလေ၊ လူတိုင်း၏ ရင်ထဲ၌ ထိတ်လန့်ကြောက်ရွံ့မှုများ ပိုမိုကြီးစိုးလာလေလေ ဖြစ်၏။ အကြောင်းမှာ ဤသုံးဦးစလုံးသည် လွန်ခဲ့သော နှစ်များစွာကတည်းကပင် လောကအနှံ့ နာမည်ကျော်ကြားခဲ့ကြသူများ ဖြစ်သောကြောင့်ပင်။

နတ်ဆိုးလမ်းစဉ်မှ ပါရမီရှင်နှစ်ဦးဖြစ်စေ၊ ကောင်းကင်ဝါးမျိုကြွက်မျိုးနွယ်မှ ပါရမီရှင်ဖြစ်စေ သူတို့အားလုံးသည် များစွာသော စစ်တလင်းပြင်များတွင် တရှ၏ ထိပ်တန်းပညာရှင် အမြောက်အမြားကို ရက်ရက်စက်စက် သတ်ဖြတ်ခဲ့ကြသူများ ဖြစ်သည်။ ယခုအချိန်တိုင်အောင်ပင် သူတို့၏ အမည်များကို ကြားလိုက်ရုံဖြင့် မရေမတွက်နိုင်သော လူပေါင်းများစွာက နာကျည်းဒေါသထွက်ကာ သွားကြိတ်မိကြဆဲ ဖြစ်၏။

တရှအင်ပါယာသည်လည်း ဤသုံးဦးစလုံး၏ ခေါင်းများအတွက် မတန်တဆ များပြားလှသော ဆုငွေများကို ထုတ်ပြန်ကြေညာထားခဲ့သည်။ သူတို့၏ အရိပ်အယောင် ပေါ်ထွက်လာသည်နှင့်တစ်ပြိုင်နက် တရှဘက်မှ အထူးလိုက်လံနှိမ်နင်းရေးအဖွဲ့များကို စေလွှတ်ကာ သုတ်သင်မည် ဖြစ်သည်။

ပုံမှန်အားဖြင့်ဆိုလျှင် ၎င်းတို့သည် တရှအင်ပါယာ နယ်နိမိတ်အတွင်းသို့ ရဲရဲတင်းတင်း ခြေမချရဲကြချေ။ သို့သော် ယခုအခါတွင်မူ သူတို့သည် ဤမျှ ဗြောင်ကျကျပေါ်လာကြသည်။ ဤအချက်ကို ကြည့်ခြင်းဖြင့် သူတို့သည် သေချာပေါက် မကောင်းသောအကြံအစည်၊ မရိုးသားသော ရည်ရွယ်ချက်များဖြင့် လာရောက်ခြင်းဖြစ်ကြောင်း ထင်ရှားလှပေသည်။

လူအများအပြားသည် ဤအရေးကြီးသော သတင်းကို ပြင်ပသို့ လှမ်း၍ အကြောင်းကြားရန် ကြိုးပမ်းခဲ့ကြသော်လည်း မကြာခင်ပင် ၎င်းတို့၏ ဆက်သွယ်ရေးနည်းလမ်းများအားလုံး လုံးဝအသုံးမဝင်တော့ကြောင်း သိလိုက်ကြရသည်။ ဤနယ်မြေတစ်ခုလုံး၏ ဟင်းလင်းပြင်ကို စွမ်းအားများဖြင့် ပိတ်ဆို့ထားပြီးဖြစ်ရာ သတင်းစကားများ ပြင်ပသို့ ပျံသန်းသွားခွင့် မရှိတော့ချေ။ ဤသည်ကို ကြည့်ခြင်းဖြင့် ထိုသုံးဦးစလုံးသည် ဤတိုက်ခိုက်မှုအတွက် ကြိုတင်ပြင်ဆင်မှုများကို အကွက်စေ့စေ့ လုပ်ဆောင်ခဲ့ကြကြောင်း သိသာလှသည်။ သတင်းများကို အချိန်ခပ်ကြာကြာ ပိတ်ဆို့ထားနိုင်မည်မဟုတ်စေကာမူ သူတို့ လိုချင်သော ကိစ္စရပ်များကို အဆုံးသတ်နိုင်ရန်အတွက်မူ ဤအချိန်ကာလက လုံလောက်သည်ထက်ပင် ပိုနေခဲ့ပြီ ဖြစ်သည်။

လူတိုင်း ထိတ်လန့်တုန်လှုပ်စွာဖြင့် ဝိုင်းဝန်းဆွေးနွေးနေကြစဉ်မှာပင် ချူးယွင်ဖန်း၏ စွမ်းအားများဖြင့် ပြန်လည်ဖွဲ့စည်းထားသော ဧရာမ စစ်တပ်ဝိညာဉ်ကြီးက စတင်လှုပ်ရှားလာခဲ့တော့သည်။ ၎င်း၏ လက်ထဲရှိ လှံရှည်ကြီးသည် မည်သူမျှ မခန့်မှန်းနိုင်လောက်သည့် ဆန်းပြားဆိုးသွမ်းသော ထောင့်ချိုးတစ်ခုမှနေ၍ ထိုပါရမီရှင်ဟောင်းသုံးဦးထံသို့ လျှပ်စီးလက်သဖွယ် အဟုန်ဖြင့် ထိုးစိုက်ချလိုက်လေတော့သည်။

ထိုပါရမီရှင်ဟောင်းသုံးဦး၏ မျက်နှာအမူအရာများ ချက်ချင်း ပြောင်းလဲသွားခဲ့သည်။ မဟာခွန်အားနတ်ဆိုးဂိုဏ်း၏ တပည့်ဖြစ်သူ လုဇီယွီသည် အော်ဟစ်လိုက်ပြီးနောက် သူ၏ ခန္ဓာကိုယ်ကြီးမှာ တရွေ့ရွေ့နှင့် ပိုမိုကြီးမားလာပြီး ပေပေါင်းတစ်ထောင်ကျော်အထိ မြင့်မားသော ဧရာမဘီလူးကြီးတစ်ကောင်အသွင်သို့ ပြောင်းလဲသွားခဲ့တော့သည်။ ထို့နောက် သူသည် လင်းယုန်ငှက်ကြီးတစ်ကောင် အတောင်ပံဖြန့်ကာ ပျံသန်းလိုက်သည့်အလား ရုတ်တရက် အားကုန်ခုန်ပျံလိုက်ပြီး စစ်တပ်ဝိညာဉ်ကြီးထံသို့ တစ်ဟုန်ထိုး ပြေးဝင်သွားခဲ့၏။ ဤအရာသည် မဟာခွန်အားနတ်ဆိုးဂိုဏ်း၏ အမြင့်ဆုံး နတ်ဘုရားစွမ်းပကားဖြစ်သော ကောင်းကင်နတ်ဆိုးမဟာခွန်အားကျင့်စဉ်ပင် ဖြစ်သည်။

ဤနတ်ဘုရားစွမ်းပကားကို ထုတ်သုံးပြီးနောက် ကျင့်ကြံသူသည် မိမိ၏ ခန္ဓာကိုယ်ကို မယုံနိုင်လောက်အောင် ကြီးမားထွားကျိုင်းလာအောင် ပြုလုပ်နိုင်စွမ်း ရှိသည်။ ထို့ပြင် ၎င်းတို့၏ ခွန်အားများ ပိုမိုတိုးတက်လာသည်နှင့်အမျှ ခန္ဓာကိုယ်မှာလည်း ပို၍ပို၍ ကြီးမားလာမည် ဖြစ်၏။ သမိုင်းတစ်လျှောက် ကောလာဟလများအရဆိုလျှင် ကောင်းကင်နတ်ဆိုးဂိုဏ်းကို စတင်တည်ထောင်ခဲ့သည့် ဆရာသခင်ကြီးသည် ကောင်းကင်ဘုံကို ထောက်မထားသည့် တိုင်ကြီးတစ်တိုင်အလား ပေပေါင်းတစ်သောင်းကျော်အထိ မြင့်မားသော ဧရာမဘီလူးကြီးတစ်ဦးအဖြစ်အထိပင် ပြောင်းလဲနိုင်ခဲ့သည်ဟု ဆိုကြသည်။

ဝုန်း.....

ဧရာမဘီလူးကြီးနှစ်ကောင်သည် လေထုထဲတွင် ပြင်းထန်စွာ ထိပ်တိုက်ရင်ဆိုင်မိကြရာ စိတ်ကူးယဉ်၍ပင် မရနိုင်လောက်သော ကြောက်မက်ဖွယ် စွမ်းအားဒီရေလှိုင်းများ ပေါက်ကွဲထွက်ပေါ်လာခဲ့တော့သည်။ နှစ်ဦးစလုံးသည် အလွန်တရာ ထိတ်လန့်စရာကောင်းလှသော သိုင်းပညာကျင့်စဉ်အဆင့်အတန်းများကို ထုတ်ဖော်ပြသနေကြပြီး ၎င်းတို့ စိတ်အလိုရှိသလို ပစ်လွှတ်လိုက်သည့် ပြိုင်ဘက်ကင်း သိုင်းကွက်ဆန်းများကြောင့် ကမ္ဘာလောကကြီးတစ်ခုလုံးပင် ပြိုလဲပျက်စီးတော့မည့်အလား ခံစားရစေသည်။

အကယ်၍ ကျန်းယွမ်မြို့၏ ကောင်းကင်ယံထက်တွင် အလိုအလျောက် ပေါ်ထွက်လာခဲ့သော ကာကွယ်ရေး အစီအရင်အတားအဆီးသာ မရှိခဲ့ပါက ဤပြင်းထန်လှသော တိုက်ကွက်များကြောင့် မြို့တော်ကြီးတစ်ခုလုံး မျက်စိရှေ့မှောက်မှာတင် မြေလှန်ချေမှုန်းခြင်း ခံရပေလိမ့်မည်။ မျက်တောင်တစ်ခတ်အတွင်းမှာတင် နှစ်ဖက်စလုံးသည် တိုက်ကွက်ပေါင်း ဒါဇင်ကျော်ခန့် အပြန်အလှန် လဲလှယ်ခဲ့ကြပြီးဖြစ်ရာ ကောင်းကင်နှင့်မြေကြီးပင်လျှင် အရောင်အသွေး ပြောင်းလဲသွားခဲ့ရတော့သည်။

“လုဇီယွီက သာမန် စစ်တပ်ဝိညာဉ်ရုပ်ကောင်တစ်ခုကိုတောင် အပြတ်မရှင်းနိုင်ဘူးလား”

ကျန်းရှုရှုက လှောင်ပြုံးပြုံးရင်း ကဲ့ရဲ့လိုက်သည်။

“ငါ မဟာခွန်အားနတ်ဆိုးဂိုဏ်းရဲ့ နတ်ဘုရားစွမ်းပကားအကြောင်း ကြားဖူးတာတော့ ကြာပါပြီ။ ဒါပေမဲ့လည်း နှမြောဖို့ကောင်းတာကတော့ ဒီလောက်ပဲ ရှိတာကိုး”

အခြားတစ်ဖက်တွင်မး ဝမ်ရွှယ်ယီ၏ မျက်နှာအမူအရာမှာ အနည်းငယ် လေးနက်တည်ကြည်နေခဲ့သည်။ သူသည် ကျန်းရှုရှု ဆိုလိုသည့်အဓိပ္ပာယ်ကို ကောင်းစွာနားလည်၏။ ပုံမှန်အားဖြင့် သာမန်သိုင်းပညာရှင်ကြီးများသည် အင်အားတောင့်တင်းလှသော စစ်တပ်တစ်ခု၏ ဝိညာဉ်စစ်တပ်နှင့် တွေ့ဆုံရသည့်အခါတွင် မိမိတို့၏ ကံကြမ္မာဆိုးနှင့် တိုးမိသကဲ့သို့ ဖြစ်ရလေ့ရှိသည်။ နတ်ဆိုးလမ်းစဉ်ဆိုင်ရာ နည်းဗျူဟာများကို ကျင့်ကြံထားကြသော ကျင့်ကြံသူအချို့မှာ အစွမ်းထက်လှသော စစ်တပ်ဝိညာဉ်နှင့် ရင်ဆိုင်ရသည့်အခါတွင် ထိုစစ်တပ်ဝိညာဉ်ထံမှ ထွက်ပေါ်လာသည့် ပြင်းထန်လှသော ချီသွေးစွမ်းအားများ၏ ရိုက်ခတ်မှုကြောင့် မိမိတို့၏ နတ်ဘုရားစွမ်းပကားများအားလုံး လုံးဝဥဿုံ ကုန်ဆုံးသွားရုံမျှမက အသက်ပါ ဆုံးရှုံးသွားကြရတတ်သည်။ ဤသည်မှာ သိုင်းလောကတွင် လွန်စွာရိုးရှင်းပြီး သဘာဝကျသော အချက်တစ်ခု ဖြစ်၏။

သို့သော်လည်း သူတို့သုံးဦးမှာမူ သာမန်လူများနှင့် လုံးဝမတူညီကြချေ။ သူတို့အားလုံးသည် မိမိတို့နှင့် ရွယ်တူချင်းများထဲတွင် ထူးချွန်ထက်မြက်လှသော ထိပ်တန်းပါရမီရှင်ကြီးများ ဖြစ်ကြပြီး ၎င်းတို့၏ ကျင့်စဉ်အဆင့်အတန်းမှာလည်း အတိုင်းအဆမရှိ နက်နဲလှပေသည်။ သာမန် ဖန်ဆင်းခြင်းအဆင့်၏ အမြင့်ဆုံးအထွတ်အထိပ် သိုင်းပညာရှင်ကြီးများပင်လျှင် သူတို့၏ ပြိုင်ဘက် မဟုတ်ကြချေ။ ထို့ကြောင့် ဤကဲ့သို့သော စစ်တပ်ဝိညာဉ်မျိုးသည် သူတို့အတွက် ဘယ်လိုမှ အတားအဆီး မဖြစ်သင့်ချေ။ စောစောပိုင်းက ဝမ်ရွှယ်ယီ ကိုယ်တိုင်ပင်လျှင် စစ်တပ်ဝိညာဉ်ကို တစ်ချက်တည်းနှင့် အလွယ်တကူ ချေမှုန်းပြခဲ့သည် မဟုတ်ပါလား။

သူတို့ကဲ့သို့သော ထိပ်တန်းပညာရှင်ကြီးများ စစ်တလင်းပြင်အတွင်းသို့ တစ်ကြိမ်မျှ ရုပ်လုံးထွက်ပြသည်ဆိုပါက ၎င်းတို့သည် ပြိုင်ဘက်ကင်းလှသော နတ်ဆိုးဘုရင်ကြီးများ သို့မဟုတ် သွေးဆာနေသည့် ဘီလူးသရဲကြီးများကဲ့သို့ ဖြစ်နေမည် ဖြစ်သည်။ သူတို့၏ ကြမ်းကြုတ်ရက်စက်မှုမှာ မိုးထိအောင် မြင့်မားလှသဖြင့် သာမန်စစ်တပ်ဝိညာဉ်တစ်ခုကို စိုးစဉ်းမျှ ဂရုစိုက်နေကြမည် မဟုတ်ပေ။

“ဒီစစ်တပ်ဝိညာဉ်ကို လျှော့မတွက်နဲ့… အကယ်၍ ၎င်းက သူ့ဘာသာ ပြန်လည်ဖွဲ့စည်းတာဆိုရင်တော့ ချေမှုန်းပစ်ဖို့ မခက်ခဲပါဘူး။ ဒါပေမဲ့ အခုအခြေအနေက ဒီစစ်တပ်ဝိညာဉ်ဟာ ချူးယွင်ဖန်းရဲ့ စွမ်းအားတွေနဲ့ တိုက်ရိုက်ထိန်းချုပ်ခံထားရတာ သိသာနေတယ်။ ဒါကြောင့်မလို့ သူ့ကို အပြတ်ဖြတ်ဖို့ကတော့ ဘယ်လိုမှ မလွယ်ကူလှဘူး”

ဝမ်ရွှယ်ယီက လေးနက်စွာ သတိပေးလိုက်တော့လေသည်။

ကျန်းရှုရှုသည် နှာခေါင်းရှုံ့လိုက်သော်လည်း ဘာမှ ဆက်မပြောတော့ပေ။ သူသည် မိမိကိုယ်မိမိ အထင်ကြီးတတ်သူဖြစ်သော်လည်း ဝမ်ရွှယ်ယီနှင့် လုဇီယွီတို့ထက် အများကြီး ပိုမိုအစွမ်းထက်သည်ဟုကား မပြောရဲချေ။ နယ်စပ်စောင့်တပ်၏ စစ်သည်တော်များ ထုတ်ဖော်ပြသလိုက်သည့် စွမ်းဆောင်ရည်မှာ စောစောပိုင်းကနှင့် လုံးဝကွာခြားလှပြီး လူနှစ်ယောက်အလား ဖြစ်နေခဲ့ရာ ဤအချက်ကပင် ရင်ဆိုင်ရမည်မှာ မည်မျှအထိ လက်ဝင်လှသည်ကို သူ ကောင်းစွာ သဘောပေါက်သွားစေခဲ့သည်။

စစ်တပ်ဝိညာဉ်ဟူသည် စစ်တပ်တစ်ခုလုံး၏ စိတ်ဓာတ်တက်ကြွမှုနှင့် သွေးစည်းမှုကို ကိုယ်စားပြုသည့် ရုပ်လုံးတစ်ခု ဖြစ်သော်လည်း ၎င်းသည် အားကောင်းမည်လား၊ အားနည်းမည်လား ဆိုသည်မှာလည်းကောင်း၊ စွမ်းအားကြီးမားလှသော သခင်တစ်ဦး၏ ထိန်းချုပ်မှုကို ရရှိထားသလား ဆိုသည်မှာလည်းကောင်း လုံးဝဥဿုံ ကွာခြားသွားစေသည့် အချက်ပင် မဟုတ်ပါလား။

“ရန်သူကို နှိမ်နင်းချင်ရင် အရင်ဆုံး ခေါင်းဆောင်ကို ဖမ်းရမယ်။ ငါတို့ ဒီမှာ အချိန်ခပ်ကြာကြာ ဖြုန်းနေလို့မဖြစ်ဘူး။ ကျန်းယောင်မြို့က ဒီနေရာနဲ့ အရမ်းနီးလွန်းတယ်”

ကျန်းရှုရှုက တည်ငြိမ်စွာ ဆိုလိုက်၏။

သူ ကျန်းယောင်မြို့အကြောင်းကို ပြောလိုက်သည့်အခါတွင်မူ… သူ၏ မျက်ဝန်းအစုံ၌ ကြောက်ရွံ့တုန်လှုပ်မှု အရိပ်အယောင်တစ်ခု မသိမသာ ဖြတ်ပြေးသွားခဲ့သည်။ ဤမြို့ကြီးသည် နတ်ဆိုးနယ်မြေမှ ထွက်ခွာလိုကြသော နတ်ဆိုးမျိုးနွယ်စုများ၏ မျှော်လင့်ချက်အားလုံးကို အစဉ်အဆက် ပိတ်ဆို့တားဆီးထားခဲ့သည့် အဓိကတံတိုင်းကြီး ဖြစ်သည်။ မရေမတွက်နိုင်သော နှစ်ပေါင်းများစွာတိုင်အောင် မရေမတွက်နိုင်သော နတ်ဆိုးပေါင်းများစွာသည် ကျန်းယောင်မြို့၏ ကာကွယ်ရေးတံတိုင်းကို ချိုးဖျက်ပြီး ကမ္ဘာလောကကြီးကို စိုးမိုးအုပ်ချုပ်ရန် မျှော်လင့်ခဲ့ကြဖူးသည်။ သို့သော်ငြားလည်း နှမြောဖို့ကောင်းသည်မှာ ယနေ့တိုင်အောင် ၎င်းတို့ နည်းလမ်းမရှာဖွေနိုင်ခဲ့ကြချေ။ သူကဲ့သို့သော ထိပ်တန်းပညာရှင်တစ်ဦးအနေဖြင့် တိတ်တဆိတ် ခိုးထွက်လာရန်မှာ ပြဿနာမဟုတ်သော်လည်း နတ်ဆိုးတပ်မတော်တစ်ခုလုံးအနေဖြင့်မူ ကျန်းယောင်မြို့၏ ကာကွယ်ရေးကို ချိုးဖျက်ရန်မှာ လုံးဝမဖြစ်နိုင်သောအရာပင်။

သူသည် စစ်တလင်းပြင်တွင် အလွန်တရာ နာမည်ကျော်ကြားခဲ့သူ ဖြစ်သော်လည်း ဘာဖြစ်လဲ။

သူသည်လည်း ကျန်းယောင်မြို့၏ ခိုင်မာလှသော ကာကွယ်ရေးကို ချိုးဖျက်နိုင်စွမ်း မရှိခဲ့ချေ။ ထိုမြို့ကြီးအတွင်းဝယ် အစွမ်းထက်လှသော ပညာရှင်ကြီးများနှင့် ကြမ်းကြုတ်ခက်ထန်လှသော စစ်သူကြီးများစွာ ရှိနေခဲ့ကြသည်။ ဤအချက်ကြောင့်ပင် သူသည် ကျန်းယောင်မြို့ကို အလွန်အမင်း ကြောက်ရွံ့နေခဲ့ခြင်း ဖြစ်၏။ အကယ်၍ ချူးယွင်ဖန်း၏ ခေါင်းပေါ်တွင် တင်ထားသည့် မတန်တဆ များပြားလှသော ဆုငွေသာ မရှိခဲ့ပါက ဤကဲ့သို့သော စွန့်စားမှုကို သေချာပေါက် လုပ်ဆောင်လိမ့်မည်မဟုတ်ချေ။

“ချူးယွင်ဖန်းကို သတ်ပစ်ကြစို့”

ကျန်းရှုရှုက အော်ပြောလိုက်လေသည်။ မျက်ဝန်းအစုံက သွေးကဲ့သို့ ရဲရဲနီလာခဲ့ပြီး ဆန်းပြားဆိုးသွမ်းသော နတ်ဆိုးအငွေ့အသက်များကို ထုတ်လွှတ်နေခဲ့၏။

“ချူးယွင်ဖန်းမင်း အပြင်ကို ထွက်မလာသေးဘူးပေါ့လေ။ ဒါဆိုရင်တော့ ငါ ဒီမြို့ထဲမှာရှိတဲ့ လူတွေအားလုံးကို တစ်ယောက်မကျန် မျိုချပစ်မယ်”

ကျန်းရှုရှု စကားပြောလိုက်သည်နှင့်တစ်ပြိုင်နက် သူ့အနောက်ဘက် ကောင်းကင်ယံထက်တွင် ပေပေါင်း တစ်ထောင်ကျော်အထိ ကြီးမားလှသော ကြေးနီရောင် ဧရာမကြွက်ကြီးတစ်ကောင် ရုတ်တရက် ထွက်ပေါ်လာခဲ့သည်။ ဤဧရာမကြွက်ကြီးသည် သူ၏ သွေးဆာနေသော ပါးစပ်ကြီးကို ဟလိုက်ရာ ကောင်းကင်ဘုံကြီးတစ်ခုလုံးကိုပင် တစ်လုပ်တည်းနှင့် မျိုချပစ်နိုင်မည့်အလား ထင်ရစေသည်။ ဤအရာသည် ကျန်းရှုရှု၏ စစ်မှန်သော ရုပ်ကောင်ဖြစ်သည့် ကောင်းကင်ဝါးမျိုကြွက်၏ အသွင်သဏ္ဌာန်ပင် ဖြစ်၏။

မြို့ထဲရှိ လူအားလုံးမှာ ထိတ်လန့်တုန်လှုပ်ကာ ပျာယာခတ်သွားကြတော့သည်။ ပြည်တွင်းရှိ အခြားသောမြို့ကြီးများနှင့်မတူဘဲ ကျန်းယွမ်မြို့သည် နယ်စပ်ဒေသ မြို့တစ်မြို့ ဖြစ်သည်။ အတိတ်ကာလက ၎င်းသည် လူသားတို့နယ်မြေ၏ ပထမဆုံးသော ကာကွယ်ရေးတံတိုင်းကြီး ဖြစ်ခဲ့ဖူး၏။ ထို့ကြောင့် ဤနေရာရှိလူများသည် နတ်ဆိုးမျိုးနွယ်စုများအကြားရှိ ဆိုးသွမ်းလှသော နတ်ဆိုးသားရဲအမျိုးမျိုးတို့၏ ဒဏ္ဍာရီများကို သာမန်လူများထက် ပိုမို၍ အတွင်းကျကျ သိရှိထားကြခြင်း ဖြစ်သည်။

ကောင်းကင်ဝါးမျိုကြွက်မျိုးနွယ်စုသည် လူသားနှင့် နတ်ဆိုးတို့အကြားရှိ စစ်တလင်းပြင်တွင် လွန်စွာ အစွမ်းထက်ပြီး ကြောက်မက်ဖွယ်ကောင်းလှသည်။ အတိတ်ကာလ ကမ္ဘာစစ်ပွဲအတွင်း၌ ကောင်းကင်ဝါးမျိုကြွက်မျိုးနွယ်စုမှ ရှေးဟောင်း နတ်ဆိုးဘုရင်ကြီးတစ်ကောင် ပေါ်ထွက်လာခဲ့ပြီး လူသားတို့၏ ထိပ်တန်းစစ်သည်တော် အင်အားတစ်သိန်းခန့်ကို တစ်လုပ်တည်းနှင့် ရက်ရက်စက်စက် မျိုချပစ်ခဲ့ဖူးရာ တရှအင်ပါယာတစ်ခုလုံးကို တုန်လှုပ်ချောက်ချားသွားစေခဲ့သည်။

ထိုတိုက်ပွဲကြီးအတွင်းဝယ် ကောင်းကင်ဝါးမျိုကြွက် ဟူသောအမည်မှာ တစ်လောကလုံးကို တုန်ဟည်းသွားစေခဲ့၏။ ထို့နောက်တွင် တရှအင်ပါယာသည် အထပ်ထပ်သော ထောင်ချောက်များကို မဖြစ်မနေ ပြင်ဆင်ခဲ့ရတော့သည်။ မရေမတွက်နိုင်သော ထိပ်တန်းပညာရှင်ကြီးများစွာ ဝိုင်းဝန်းပိတ်ဆို့ တိုက်ခိုက်ခဲ့ကြပြီးနောက်မှသာ ထိုရှေးဟောင်းနတ်ဆိုးဘုရင်ကြီးကို အောင်မြင်စွာ သုတ်သင်နိုင်ခဲ့ခြင်း ဖြစ်သည်။ သို့သော်လည်း ထိုပညာရှင်ကြီးများ၏ ထက်ဝက်ကျော်ခန့်မှာ ဒဏ်ရာအပြင်းအထန် ရရှိခဲ့ကြပြီး အသက်များစွာ ဆုံးရှုံးခဲ့ကြရသည်။

ထို့ပြင် ကောင်းကင်ဝါးမျိုကြွက် မျိုးနွယ်စုဝင်တစ်ဦးသည် လူသားတို့၏ မြို့ငယ်လေးတစ်ခုလုံးကို တစ်လုပ်တည်းနှင့် မျိုချဖျက်ဆီးပစ်လိုက်သည်ဟူသော သွေးပျက်စရာ ကောလာဟလများနှင့် ကြောက်မက်ဖွယ် ဒဏ္ဍာရီမျိုးစုံကို လူများက ကြားဖူးထားကြ၏။

သူတို့အားလုံး စိုးရိမ်တုန်လှုပ်နေကြစဉ်မှာပင် ဟင်းလင်းပြင်ထဲမှနေ၍ ပြတ်သားပြီး အေးစက်လှသော စကားသံက ရုတ်တရက် ထွက်ပေါ်လာခဲ့တော့သည်။

“မင်းတို့က မင်းတို့အရည်အချင်းကို မသိဘဲ အထင်ကြီးနေကြတာပဲ။ ဒီလောက်တောင် သေချင်နေမှတော့ ငါကပဲ မင်းတို့ရဲ့ ဆန္ဒကို ဖြည့်ဆည်းပေးရတာပေါ့”

--