အခန်း ၅၁၁

Vol. 52 Ch. 511

အခန်း (၅၁၁) အကြောင်းကြားစာ ရောက်ရှိခြင်း

ရယူလိုသော်လည်း ပွင့်ပွင့်လင်းလင်း ပြောရန် ရှက်ရွံ့နေသည့် သူ၏ မျက်နှာအမူအရာကို ကြည့်ကာ ကျန်းယဲ့မှာ မနေနိုင်ဘဲ ရယ်မောလိုက်မိသည်။

သူက မတ်တတ်ရပ်ကာ လင်ရှောင်ထံသို့ လျှောက်သွားပြီး သူ၏ပခုံးကို လက်ဖြင့် ခပ်ပြင်းပြင်း ပုတ်လိုက်ကာ သေချာရေရာသော အဖြေတစ်ခုကို ပေးလိုက်လေသည်။

"ကဲပါ... ဟန်ဆောင်နေတာကို ရပ်လိုက်တော့။ ဒီတစ်ကြိမ်မှာ နေရာဆယ်နေရာ ရှိတယ်..."

လင်ရှောင်၏ အေးခဲသွားသော မျက်နှာအမူအရာကို သူ ကြည့်လိုက်ပြီး ဆက်ပြောလိုက်၏။ "ဒီဆယ်နေရာထဲက တစ်နေရာက မင်းအတွက်ပဲ..."

"..."

လင်ရှောင်မှာ ချက်ချင်း အေးခဲသွားပြီး သူ၏ မျက်လုံးများက ပန်းကန်ပြားများအလား ပြူးကျယ်သွားကာ ပါးစပ်က အနည်းငယ် ဟနေခဲ့သည်။ ထိုဗလာကျင်းနေသော အမူအရာကို ငါးစက္ကန့် သို့မဟုတ် ခြောက်စက္ကန့်ခန့်မျှ မည်သည့် တုန့်ပြန်မှုမှမရှိဘဲ ထိန်းသိမ်းထားခဲ့လေသည်။

အချိန်အတော်ကြာပြီးနောက် သူက တုန့်ပြန်လာပုံရကာ မျက်တောင်များကို အလွန်နှေးကွေးစွာ ခတ်လိုက်ပြီး သူ၏ လည်စေ့က အထက်အောက် လှုပ်ရှားသွားကာ အသံမှာ အလွန်အမင်း တုန်လှုပ်မှု၊ မယုံကြည်နိုင်မှုတို့ကြောင့် တဆတ်ဆတ် တုန်ယင်နေ၏။

"တကယ်ကြီးလား... ဒါရိုက်တာကျန်း... ကျွန်တော့်ကို လိမ်နေတာတော့ မဟုတ်ဘူးမလား။ ကျွန်တော်... ကျွန်တော် တကယ်ပဲ ပါတယ်ပေါ့လေ..."

ကျန်းယဲ့သည် သူ၏ ပုံမှန်မဟုတ်ဘဲ ပြာယာခတ်နေသော အခြေအနေကို အတော်လေး ရယ်စရာကောင်းသည်ဟု ထင်လိုက်ပြီး ခိုင်မာပြတ်သားစွာ ခေါင်းညိတ်ကာ ပြုံးလျက် ပြောလိုက်သည်။ "တကယ်ပေါ့... ဘာလို့ ဒီလောက် အရေးကြီးတဲ့ကိစ္စကို မင်းကို လိမ်ရမှာလဲ။ ရီယဲ့ခရီးသွားအေဂျင်စီရဲ့ ခရီးသွားလမ်းညွှန်အဖွဲ့ကနေ ကြိုဆိုပါတယ် ရဲဘော်လင်ရှောင်.."

သေချာရေရာသော အဖြေတစ်ခုကို ရရှိပြီးနောက် လင်ရှောင်၏ မျက်နှာပေါ်ရှိ ဗလာကျင်းနေသော အမူအရာမှာ ချက်ချင်းပင် အလွန်အမင်း ဝမ်းသာမှုအဖြစ်သို့ ပြောင်းလဲသွားခဲ့ချေပြီ။

သူက ထိုင်ခုံမှ ရုတ်တရက် ခုန်ထလိုက်ပြီး အလွန်အမင်း စိတ်လှုပ်ရှားလွန်းသဖြင့် သူ၏ လက်များနှင့် ခြေထောက်များကိုပင် အတူတကွ လှုပ်ရှားမိမတတ် ဖြစ်သွားရသည်။ သူ၏ မျက်နှာမှာ စိတ်လှုပ်ရှားမှုကြောင့် နီမြန်းနေပြီး သူ၏ ယခင် နာကြည်းနေတဲ့ လင်ယောကျ်ားအမူအရာနှင့် လုံးဝ ကွဲပြားသွားခဲ့သည်။

လင်ရှောင်၏ ဝမ်းသာလုံးဆို့နေသော အမူအရာကို ကြည့်ကာ ကျန်းယဲ့က ပြုံးပြီး ညွှန်ကြားလိုက်၏။ "မင်း အထက်လူကြီးတွေကိုလည်း ဆက်သွယ်ပြီး အခြေအနေကို ရှင်းပြသင့်တယ်...."

"နားလည်ပါပြီ... နားလည်ပါပြီ။ အခုချက်ချင်း ပြန်သွားပြီး အစီရင်ခံလိုက်ပါ့မယ်..." လင်ရှောင်က ခေါင်းကို တဆတ်ဆတ် ညိတ်ပြလိုက်ပြီး သူ၏ အပြုံးများမှာ ပြည့်လျှံကျလုမတတ် ဖြစ်နေခဲ့သည်။ သူက "ဟီးဟီး... အရမ်းကောင်းတာပဲ.... ချန်ချင်းဆိုတဲ့ကောင် ကျွန်တော့်ရှေ့မှာ လာကြွားနေတာကို ထပ်ကြည့်စရာ မလိုတော့ဘူး" ဟု ရယ်မောလိုက်သည်။

ကျန်းယဲ့က ခေတ္တမျှ စဉ်းစားလိုက်ပြီး ထပ်ပြောလိုက်သည်။ "ဒီ အများပြည်သူဆီကနေ အလုပ်ခေါ်ယူမယ့် တစ်နေရာနဲ့ ပတ်သက်လို့ကတော့... ဒီနေရာက အခြားနိုင်ငံတွေက အရာရှိတွေရဲ့ လက်ထဲကို နောက်ဆုံးမှာ ရောက်သွားမှာ မဟုတ်ဘူးလို့ အထက်လူကြီးတွေကို မင်း အာမခံနိုင်ပါတယ်...."

လင်ရှောင်၏ အမူအရာမှာ တည်ကြည်လေးနက်သွားပြီး ကျန်းယဲ့၏ ပိုမိုနက်ရှိုင်းသော အဓိပ္ပာယ်ကို ချက်ချင်း သဘောပေါက်သွားခဲ့၏။

နိုင်ငံတော်အဆင့်တွင် မည်သည့်အရာကို စိုးရိမ်နေကြသည်ကို သူ ကောင်းစွာ သိရှိထားပြီး ကျန်းယဲ့ကလည်း ၎င်းကို နားလည်ထားချေသည်။

တစ်စုံတစ်ယောက်သည် လုံးဝလွှမ်းမိုးနိုင်သော အဆင့်တစ်ခုအထိ ဖွံ့ဖြိုးတိုးတက်လာခြင်း မရှိသေးမီ အလားအလာရှိသော ပြိုင်ဘက်ကို အင်အားတောင့်တင်းလာစေနိုင်သည့် မည်သည့်လုပ်ရပ်ကိုမဆို သတိထား၍ ချဉ်းကပ်သင့်ချေသည်။

၎င်းမှာ အတွေးသေးလွန်းခြင်းကြောင့် မဟုတ်ဘဲ အခြေခံအကျဆုံး မဟာဗျူဟာမြောက် စဉ်းစားသုံးသပ်မှုများကြောင့် ဖြစ်သည်။

ကျန်းယဲ့သည် သူ၏ လူမျိုးများ၏ မယိမ်းယိုင်သော စိတ်ဓာတ်နှင့် မဆုတ်မနစ်သော ကြိုးပမ်းအားထုတ်မှုများကို အခိုင်အမာ ယုံကြည်ထားပြီး သူတို့က ယာယီ နောက်ကျကျန်နေခဲ့လျှင်ပင် နောက်ဆုံး၌ သေချာပေါက် ပြန်လည် ဦးမော့လာမည်ဟု ယုံကြည်ထားသော်ငြားလည်း...

ယခု သူတို့က ပထမဆုံး အားသာချက်ကို ရရှိထားပြီဖြစ်ရာ ၎င်းကို ဘယ်လိုလုပ် အလွယ်တကူ လက်လွှတ်ခံနိုင်မည်နည်း။

လွန်ခဲ့သော ရာစုနှစ်များအတွင်း ဤမြေကြီးက အခက်အခဲပေါင်း များစွာကို ရင်ဆိုင်ခဲ့ရပြီး နောက်ဆုံးတွင် ဤကဲ့သို့ အချိန်ကာလကို ကျော်လွန်သော အခွင့်အရေးကြီးတစ်ခုကို ရရှိလာခဲ့ပြီ ဖြစ်သည်။

အများပြည်သူအတွက်ရော၊ ကိုယ်ပိုင်အတွက်ပါ... ကျန်းယဲ့သည် သူ၏ နိုင်ငံတော်ကြီးအနေဖြင့် ဤအခွင့်အရေးကို အသုံးပြုကာ ပိုမိုမြန်ဆန်စွာ၊ ပိုမိုဝေးကွာစွာနှင့် ပိုမိုတည်ငြိမ်စွာ တက်လှမ်းနိုင်မည်ဟု မျှော်လင့်ထားမိသည်။

ဤသည်က ကျယ်ကျယ်ပြန့်ပြန့် ပျံ့နှံ့နေသော ဆိုရိုးစကားတစ်ခုနှင့် တူညီချေသည်။ "သိပ္ပံပညာမှာ နယ်နိမိတ် မရှိပါဘူး... ဒါပေမဲ့ သိပ္ပံပညာရှင်တွေမှာတော့ နိုင်ငံသားခံယူချက် ရှိပါတယ်..."

စွမ်းရည်သည် လူသားအားလုံးအတွက် အကျိုးပြုနိုင်သော်လည်း ရပ်တည်ချက်နှင့် မူလရည်ရွယ်ချက်တို့တွင်မူ ရှင်းလင်းသော ဆက်နွယ်မှုတစ်ခု ရှိနေသည်။

သူသည် တရုတ်လူမျိုးဖြစ်ပြီး မည်မျှပင် အချိန်နှင့် ဟင်းလင်းပြင် ခရီးသွားလာမှုများ ပြုလုပ်ရပါစေ ၎င်းမှာ မည်သည့်အခါမျှ ပြောင်းလဲသွားမည် မဟုတ်ချေ။

လင်ရှောင်က တည်ကြည်လေးနက်စွာ ခေါင်းညိတ်လိုက်သည်။ "ကျွန်တော် နားလည်ပါပြီ ဒါရိုက်တာကျန်း။ ခင်ဗျားရဲ့ ရည်ရွယ်ချက်ကို ကျွန်တော့်ရဲ့ အထက်လူကြီးတွေဆီ ရှင်းလင်းပြည့်စုံစွာ အစီရင်ခံပေးပါ့မယ်..."

ထို့နောက် သူက သိချင်စိတ်ဖြင့် မေးလိုက်ပြန်၏။ "ဒါဆို... ကြိုတင်ရွေးချယ်ခံထားရတဲ့ ကျန်တဲ့ ရှစ်ယောက်က ဘယ်သူတွေများလဲ..."

ကျန်းယဲ့က စကားအများကြီး မပြောတော့ဘဲ အံဆွဲထဲမှ မှတ်စုတစ်ခုကို ထုတ်ကာ ကမ်းပေးလိုက်သည်။

လင်ရှောင်က နှစ်လက်ဖြင့် လှမ်းယူလိုက်ပြီး သူ၏ မျက်လုံးများက ၎င်းပေါ်ရှိ နာမည်များကို လျင်မြန်စွာ ဖတ်ကြည့်လိုက်၏။ 'နဂါးပြာ၊ ကျန်းမင်ဟွေ့၊ ချောင်ရန်ကျိ၊ ကျန်းဟွိုင်မင်၊ ကျိုးရှင်းဖူ၊ ကောရွှိုက်၊ ကျန်းခိုင်၊ ထိုက်ရွှီကျောင်းထိုင်ဆရာတော်'

ဤစာရင်းကို မြင်လိုက်ရပြီးနောက် လင်ရှောင် သဘောပေါက်သွားရသည်။

စာရင်းတွင် အစိုးရအဖွဲ့အစည်းများအတွင်းမှ ထိပ်တန်း အထက်တန်းလွှာများ၊ အလွှာအသီးသီးမှ ထူးချွန်ထင်ရှားသူများ၊ အများပြည်သူများကြားမှ အထူးစွမ်းရည်ရှိသူများ နှင့် အလားအလာရှိသော လူငယ်ပါရမီရှင်များတို့ ပါဝင်နေလေသည်။

ဒါရိုက်တာကျန်းက စွမ်းရည်၊ နောက်ခံအခြေအနေ၊ အလားအလာနှင့် အဖွဲ့အစည်း ဖွဲ့စည်းပုံတို့၏ ကွဲပြားစုံလင်မှုကို ရှင်းလင်းစွာ ထည့်သွင်းစဉ်းစားထားပြီး ကဏ္ဍပေါင်းစုံကို ဂရုတစိုက် ကိုင်တွယ်ထားကြောင်း ထင်ရှားချေသည်။

သူက ခေါင်းညိတ်လိုက်ပြီး စာရင်းကို ဂရုတစိုက် သိမ်းဆည်းလိုက်ကာ သူ၏ မျက်နှာအမူအရာမှာ ပုံမှန် စွမ်းဆောင်ရည်ပြည့်ဝသော အသွင်အပြင်သို့ ပြန်လည်ရောက်ရှိသွားခဲ့၏။ "ကောင်းပါပြီ ဒါရိုက်တာကျန်း။ ဒီစာရင်းက ခင်ဗျားရဲ့ လိုအပ်ချက်တွေနဲ့ ကိုက်ညီပါတယ်။ ကျွန်တော် ပြန်သွားပြီး အထက်လူကြီးတွေကို အသေးစိတ် အစီရင်ခံလိုက်ပါ့မယ်..."

"ကောင်းပြီ... သွားတော့လေ" ကျန်းယဲ့က အနည်းငယ် ခေါင်းညိတ်ပြလိုက်သည်။

လင်ရှောင်သည် သူ၏ ကျောကို ပြန်လည်မတ်မတ်ထားလိုက်ပြီး သပ်ရပ်သော စစ်ရေးအလေးပြုမှုတစ်ခုကို ပြုလုပ်လိုက်ကာ နောက်သို့ လှည့်၍ ခရီးသွားအေဂျင်စီမှ ခပ်သုတ်သုတ် ထွက်ခွာသွားလိုက်သည်။ သူ၏ အသွင်အပြင်မှာ သူ ရောက်လာစဉ်က နာကြည်းနေတဲ့ လင်ယောကျ်ားနှင့် လုံးဝ ကွဲပြားနေခဲ့ချေပြီ။

ကျန်းယဲ့သည် လင်ရှောင်၏ ကိစ္စကို ဘေးဖယ်ထားလိုက်ပြီး သူ၏ နောက်ထပ်တာဝန်မှာ စာရင်းထဲမှ အခြားလူများကို အကြောင်းကြားရန် ဖြစ်သည်။

ရက်ကို မနက်ဖြန်ဟု သတ်မှတ်ထားလိုက်သည်။ အနည်းငယ် လောနေသော်လည်း ဤလူများ၏ စွမ်းရည်နှင့် ခွန်အားအရ သူတို့ အချိန်မီ ရောက်လာနိုင်လောက်ပေသည်။

သူက ဖုန်းကို ယူကာ မျက်နှာပြင်လော့ခ်ကို ဖွင့်လိုက်ရာ ဝီချက်အိုင်ကွန်ပေါ်ရှိ တောက်ပသော အနီရောင် 99+က အထူးသဖြင့် မျက်စိဖမ်းစားနေပြီး ထိုအထဲတွင် ရီယဲ့ ခရီးသွားအေဂျင်စီ ဖောက်သည်ဟောင်းများ ဂရုက ပို၍ သိသာနေလေသည်။

သူက ၎င်းကို ပေါ့ပေါ့ပါးပါး နှိပ်ဝင်လိုက်ရာ သေချာပေါက်ပင် အုပ်စုကြီးမှာ ဆူပွက်နေခဲ့ပြီဖြစ်ပြီး အများပြည်သူသို့ ကြေညာထားသော တစ်ခုတည်းသော အလုပ်နေရာနှင့် ပတ်သက်၍သာ အားလုံး ဝိုင်းဝန်းဆွေးနွေးနေကြ၏။

【ကျန်းထောင်】: @ကျန်းယဲ့ ဒါရိုက်တာကျန်း... ကျွန်တော့်ကို ကြည့်ပါဦး... ကျွန်တော့်ကို ကြည့်ပါဦး... ကျေးဇူးပြုပြီး အခွင့်အရေးလေး တစ်ခုလောက် ပေးပါဗျာ... ကြိုးလေး ဘာလေး နည်းနည်း ဆွဲပေးလို့ မရဘူးလားဟင်....

【ချန်ရွှဲလင်း】: နိုင်ငံတော်ရဲ့ အလှတရားတွေကို လူတိုင်းခံစားနိုင်ဖို့ လမ်းညွှန်ပေးရတဲ့ ခရီးသွားလမ်းညွှန် တစ်ယောက်ဖြစ်ဖို့ ကျွန်မ ငယ်ငယ်ကတည်းက အိပ်မက်မက်ခဲ့တာ။ ဒီခရီးသွားလမ်းညွှန်က အဲဒီလို ခရီးသွားလမ်းညွှန်မျိုးမဟုတ်ပေမဲ့လည်း ဒါက ကျွန်မရဲ့ တစ်သက်တာ အိပ်မက်ပါပဲ.... ညွှန်ကြားရေးမှူးကျန်း... ကျွန်မရဲ့ အိပ်မက်ကို တကယ်ဖြစ်လာအောင် လုပ်ပေးပါရှင်....

【ကောရွှိုက်】: ကဲပါ... ကဲပါ၊ ခင်ဗျားတို့ နောက်ပြောင်နေတာကို ရပ်လိုက်ကြတော့။ ဒီနေရာက ဘယ်လောက် တန်ဖိုးကြီးလဲဆိုတာ လူတိုင်း သိကြတာပဲ။ လေးနက်တဲ့ ကျွမ်းကျင်မှုတွေနဲ့ အထူးပါရမီတွေ မရှိဘဲနဲ့ ဒါရိုက်တာကျန်းက ဘယ်လိုလုပ် စိတ်ဝင်စားနိုင်မှာလဲ။ အကျိုးအကြောင်း သင့်တင့်အောင် တွေးကြစမ်းပါ။

【စုရှောင်ရှောင်】: ဘုရားရေ... သက်တမ်းတိုးဆေးလုံးသောက်ပြီး လူငယ်လေး ပြန်ဖြစ်သွားတယ်ဆိုတဲ့ အဘိုးအိုမြို့စားကြီးအပါအဝင် ဥရောပက ရှေးဟောင်း မိသားစုဝင် အတော်များများက လမ်းခုလတ်ကို ရောက်နေကြပြီလို့ ကျွန်မ အခုလေးတင် သတင်းရလိုက်တယ်...

【ဂန်ချန်】: အဲဒါတင် မကသေးဘူးဟ...နယူးယောက်က ဘဏ္ဍာရေး လုပ်ငန်းရှင်ကြီးတွေရဲ့ ကိုယ်ပိုင်လေယာဉ်တွေလည်း ထွက်ခွာသွားကြပြီတဲ့။ အရှေ့အလယ်ပိုင်းကဆို ပြောမနေနဲ့တော့... ရုတ်ရုတ်သဲသဲ ဖြစ်နေတာ အကြီးအကျယ်ပဲ။

【လင်းယုန်】: ဆိုလိုတာက တစ်ကမ္ဘာလုံးက လူဟောင်းတွေရော၊ သူဌေးသစ်တွေရောက ဒီအကျိုးအမြတ်များတဲ့ အခွင့်အရေးကြီးကို မျက်စိကျနေကြတာပဲ။

【ရှဲ့မင်တာ】: ဟူး... နတ်ဘုရားတွေရဲ့ တိုက်ပွဲကြီးပါပဲလား... သာမန်လူတွေကတော့ ကြည့်နေရုံပေါ့။ နောက်ဆုံးမှာ အဲဒီနေရာကို ဘယ်သူရသွားမလဲဆိုတာ သိချင်လိုက်တာ။

【လင်ဝမ်】: ဘယ်သူပဲဖြစ်ဖြစ် ဒီနေရာကို ရသွားတဲ့သူကို နတ်ဘုရားလို့ ကျွန်တော်ကတော့ ခေါ်မှာပဲ.... ဒါက ကမ္ဘာ့ထိပ်တန်း အထက်တန်းလွှာတွေကြားထဲကနေ ထွက်ပေါ်လာတဲ့ တစ်ဦးတည်းသော သူပဲလေ....

【ဇန်ရွှမ်】: +၁ ဒီအဆင့်အတန်းမျိုးကို ဘယ်သူမှ ယှဉ်နိုင်မှာ မဟုတ်ဘူး....

【စုပိုင်လော】: ခရီးသွားအေဂျင်စီက ဝန်ထမ်းတွေ ထပ်ပြီး ခေါ်ယူတဲ့အခါ ကျွန်တော်တို့ ဖောက်သည်ဟောင်းတွေရော ခရီးသွားလမ်းညွှန်ဖြစ်လာဖို့ အခွင့်အရေး ရနိုင်ပါဦးမလားလို့ တွေးနေမိတယ်။

ဤနေရာအထိ ဖတ်ပြီးနောက် ကျန်းယဲ့က ဆက်မကြည့်တော့ဘဲ ရပ်လိုက်သည်။

အုပ်စုထဲတွင် လေထုမှာ တက်ကြွနေသော်လည်း အလုပ်က ပိုအရေးကြီးချေသည်။

သူက အုပ်စုလိုက် စကားပြောဆိုမှုမှ ထွက်လိုက်ပြီး သူ၏ ဖုန်းနံပါတ်စာရင်းထဲမှ လူခုနစ်ယောက်ဖြစ်သော ကောရွှိုက်၊ ကျန်းဟွိုင်မင်၊ ကျန်းမင်ဟွေ့၊ ကျိုးရှင်းဖူ၊ ချောင်ရန်ကျိ၊ ကျန်းခိုင် နှင့် ထိုက်ရွှီ ကျောင်းထိုင်ဆရာတော်တို့ကို တိကျစွာ ရှာဖွေလိုက်လေသည်။

ထို့နောက် သူက စာကြောင်းတစ်ကြောင်း ရိုက်ထည့်လိုက်ပြီး ၎င်းကို ကူးယူကာ တစ်ယောက်ချင်းစီထံသို့ တစ်ခါတည်း ပေးပို့လိုက်၏။

【မနက်ဖြန် နေ့လယ် ဟန်ကျိုးကို လာခဲ့ပါ။ ကျွန်တော် ခင်ဗျားကို နေ့လယ်စာ ကျွေးမလို့...】

အခန်း ၅၁၁ပြီး၏။