အခန်း ၄၁

🌱 Chapter 41

ဟန်ချင်းမဏ္ဍပ်တွင် ပိုင်ချောင်ရှီသည် ချောမောသော တောင်ပေါ်စံအိမ်ပိုင်ရှင်နှင့် ပထမဆုံးအကြိမ် တွေ့ဆုံခဲ့သည်။

'နေပါဦး၊ ဒီလောက် ပြိုင်ဘက်ကင်းတဲ့ ကျက်သရေမျိုးနှင့်ဆိုရင် မူလဝတ္ထုထဲမှာ သူ့ကို ခပ်ရေးရေးလောက်ပဲ ဖော်ပြထားတာမျိုး မဖြစ်သင့်ဘူး၊ ငါ တကယ်ကို ဘာမှ မှတ်မိမနေဘူး '

တကယ်တော့ ပိုင်ချောင်ရှီ စာအုပ်ကို ပထမဆုံး ဖတ်ခဲ့စဉ်က ခပ်မြန်မြန်သာ ဖတ်သွားခဲ့သည်။ အဘယ်ကြောင့်ဆိုသော် ခေတ်သစ် အွန်လိုင်းဝတ္ထုများသည် အနည်းငယ် အောင်မြင်မှုရသွားပါက အဘွားအိုတစ်ဦး ခြေကျပ်ဝတ်စုံကဲ့သို့ နံစော်ပြီး ရှည်လျားကာ မလိုအပ်ဘဲ အလွန်အမင်း ဆွဲဆန့်ရေးသားထားတတ်သောကြောင့် ဖြစ်သည်။

သူမသည် ဇာတ်ပို့အမျိုးသမီးဇာတ်ကောင်နှင့် နာမည်တူညီနေသောကြောင့် အနည်းငယ် ပိုမို အာရုံစိုက်ခဲ့မိရာ ယင်းကျစ်ဖုန်း ဇာတ်သိမ်းကို အလွန်ရှင်းလင်းစွာ သိထားသော်လည်း ဤတောင်ပေါ်စံအိမ်ပိုင်ရှင်နှင့် ပတ်သက်ပြီးတော့မူ လုံးဝကို မသိရှိခဲ့ပေ။

စောင်းတီးသံသည် ပုံမှန်အတိုင်း ပြန်ဖြစ်သွားခဲ့ပြီး နှောင့်ယှက်ခံလိုက်ရမှုမှာ လုံးဝ မဖြစ်ခဲ့သကဲ့သို့ ခံစားလိုက်ရသည်။

ယင်းကျစ်ဖုန်းသည် သစ်သားကုလားထိုင်ပေါ်တွင် ထိုင်လိုက်ပြီး ဟွမ်ယမ် ဖျော်စပ်ထားသော ကျင်းရှန်းယင်ဟောင် လက်ဖက်ရည်ကို ကောက်ကိုင်လိုက်သည်။

ယင်းကျစ်ဖုန်း "ယွမ်ထောင်ကျူး၊ တကယ့်ကို သန့်စင်မွန်မြတ်တဲ့ အကြိုက်ပဲ၊ ကောင်းမွန်တဲ့ လက်ဖက်ရည်နဲ့ ကောင်းမွန်တဲ့ ဂီတ၊ ငါ့အိမ်ကိုတောင် မေ့သွားနိုင်လောက်တဲ့အထိ ငါ အရမ်းပျော်ရွှင်နေပြီ "

ယွမ်ရှန်းသည် တည်ငြိမ်စွာ ပြုံးလိုက်သည်။

ယွမ်ရှန်း "ဒါဆိုရင်လည်း နောက်ထပ် ရက်အနည်းငယ်လောက် နေသွားပါဦး၊ တောင်ပေါ်စံအိမ်က သခင်လေးယင်းကို အမြဲတမ်း ကြိုဆိုပါတယ်၊ ဟွမ်ယမ်၊ မိန်းကလေးပိုင်ကို လက်ဖက်ရည် ငှဲ့ပေးလိုက်ပါ "

သူတို့ ပထမဆုံးအကြိမ် တွေ့ဆုံမှုဖြစ်သော်လည်း ပိုင်ချောင်ရှီ မည်သူမည်ဝါဖြစ်ကြောင်းမှာ ချက်ချင်းပင် သိသာထင်ရှားနေခဲ့သည်။ ယွမ်ရှန်းသည် သူမအား ဂုဏ်သရေရှိ ဧည့်သည်တစ်ဦးအဖြစ် ဆက်ဆံနေခဲ့သည်။

လက်ဖက်ခြောက်များသည် လက်ဖက်ရည်ခွက်ထဲတွင် ပေါလောပေါ်နေသော ငွေရောင်အပ်လေးများနှင့် တူပြီး ထို သိမ်မွေ့သော မွှေးရနံ့မှာ လေထုထဲတွင် ပြည့်နှက်နေသည်။

အပြန်အလှန် လေးစားတန်ဖိုးထားမှုကြောင့် ဖြစ်နိုင်သည်၊ ယွမ်ရှန်းသည် ပိုင်ချောင်ရှီ ထင်မြင်ချက်ကို အမှန်တကယ် ကြားချင်နေခဲ့သည်။

ယွမ်ရှန်း "မိန်းကလေး၊ ဒီလက်ဖက်ရည်ကို ဘယ်လိုထင်လဲ "

ပိုင်ချောင်ရှီသည် တစ်ငုံသောက်လိုက်ပြီး နောက်ထပ်တစ်ငုံ ထပ်သောက်လိုက်ရာ ၎င်းမှာ ရိုးရှင်းစွာပင် အရသာရှိလှသည်။

ပိုင်ချောင်ရှီ "တောင်ပေါ်စံအိမ်ပိုင်ရှင်၊ ဂိုဂျီဘယ်ရီ ဂန္ဓမာလက်ဖက်ရည်ကလွဲရင် လက်ဖက်ရည်လမ်းစဉ်နဲ့ ပတ်သက်ပြီး ကျွန်မ ဘာမှနီးပါးကို မသိပါဘူး၊ ရှင်က နွားရှေ့ စောင်းတီးပြနေသလို ဖြစ်နေပြီ "

ပိုင်ချောင်ရှီက မိမိကိုယ်ကိုယ် နွားတစ်ကောင်ဟု ခေါ်လိုက်ခြင်းမှာ ကိစ္စမရှိပေ။ သူ ဝတ်ဆင်ထားသော နီမြန်းသည့် ဝတ်စုံအရ ကြည့်မည်ဆိုလျှင် သူမ ဘေးတွင် နွားနီကြီးတစ်ကောင်လည်း ရှိနေသေးသည်။

ဟွမ်ယမ်သည် ခပ်ဖွဖွပြုံးလိုက်သော်လည်း ယင်းကျစ်ဖုန်း မျက်နှာမှာ ဝမ်းချုပ်နေသူတစ်ဦးကဲ့သို့ အလွန်အမင်းကြည့်ရဆိုးနေခဲ့သည်။

ယွမ်ရှန်းသည် ကြီးမားသော စိတ်ဝင်စားမှုကိုပြသလိုက်သည်။

ယွမ်ရှန်း "ဂိုဂျီဘယ်ရီ ဂန္ဓမာ လက်ဖက်ရည် "

ဂိုဂျီဘယ်ရီ ဂန္ဓမာလက်ဖက်ရည်သည် ခေတ်ပြိုင် လူငယ်များအတွက် နံပါတ်တစ် ကျန်းမာရေး အချိုရည်ဖြစ်ပြီး သီချင်းများxJတွင်ပင် ဓာတ်ဘူးထဲတွင် ဂိုဂျီဘယ်ရီများစိမ်ထားခြင်း အကြောင်းကို သီဆိုထားကြသည်။

ပိုင်ချောင်ရှီ မျက်လုံးများမှာ တောက်ပစွာ အရောင်လက်သွားခဲ့သည်။

ပိုင်ချောင်ရှီ "မှန်ပါတယ်၊ ဂန္ဓမာပန်း အသေးလေးတွေကို သုံးတာ အကောင်းဆုံးပဲ၊ ပြီးတော့ ပေါ်ဂန္ဓမာရှိမယ်ဆိုရင် ပိုတောင်ကောင်းသေးတယ် "

ပေါ်ဂန္ဓမာသည် တရုတ်နိုင်ငံ အဓိကဆေးဝါးမြို့တော်လေးခုအနက်မှ တစ်ခုဖြစ်သော ပေါ်ကျိုးဒေသထွက်ကုန်တစ်ခုဖြစ်ကြောင်းကို သိထားရမည် ဖြစ်သည်။ ထို့အပြင် ပေါ်ဂန္ဓမာကို အမြင့်မားဆုံးဆေးဖက်ဝင်တန်ဖိုး ပိုင်ဆိုင်ထားသော ဂန္ဓမာပန်းများ၏ ဘုရင်အဖြစ် သတ်မှတ်ထားကြသည်။

အကယ်၍ ဤတောင်ပေါ်စံအိမ်ပိုင်ရှင်က သူမအား ပေါ်ဂန္ဓမာ ရှာဖွေရာတွင် ကူညီပေးနိုင်ပါက ၎င်းသည် သူမအတွက် အမှတ်များစွာကိုသေချာပေါက် ရရှိစေမည်ဖြစ်သည်။

ပိုင်ချောင်ရှီ ရင်ထဲတွင် သူသည် အခမဲ့လုပ်သားတစ်ဦးအဖြစ်၊ အတည်ပြုထားသော ကိရိယာတစ်ခုအဖြစ် ရောက်ရှိသွားပြီဖြစ်ကြောင်းကိုမူ ယွမ်ရှန်း မသိခဲ့ပေ။

ယွမ်ရှန်း "ဟွမ်ယမ်၊ အောက်ကလူတွေကို မျက်ခြည်မပြတ် စောင့်ကြည့်ဖို့ ညွှန်ကြားလိုက်ပါ၊ ပေါ်ဂန္ဓမာ အရိပ်အယောင်တစ်ခုခု ရှိခဲ့ရင် မိန်းကလေးပိုင်ဆီကိုလည်း နည်းနည်းလောက် ပို့ပေးလိုက်ပါ "

သူမသာ ထူးဆန်းသောသူတစ်ဦးအဖြစ် ဆက်ဆံခံရမည်ကို မကြောက်ခဲ့ပါက ပိုင်ချောင်ရှီသည် 'V' ပုံစံ လက်ဟန်ကို အမှန်တကယ်ပင် ပြသချင်ခဲ့သည်။ တောင်ပေါ်စံအိမ်ပိုင်ရှင်သည် သူမအတွက် အရာရာကို အလွန်လွယ်ကူသွားစေခဲ့သည် မဟုတ်ပါလား။

ပိုင်ချောင်ရှီ "ဒါဆိုရင်လည်း တောင်ပေါ်စံအိမ်ပိုင်ရှင် ယွမ်ကို အများကြီး ကျေးဇူးတင်ပါတယ်၊ နောက်မှ ကျွန်မ ဟွမ်ယမ်မိန်းကလေးအတွက် ပေါ်ဂန္ဓမာ ပုံတစ်ပုံ ဆွဲပေးပါ့မယ် "

သူတို့နှစ်ဦးသည် ပျော်ရွှင်စွာစကားပြောဆိုနေကြသောကြောင့် ယင်းကျစ်ဖုန်းအား ပြင်ပလူတစ်ဦးကဲ့သို့ ခံစားသွားရစေသည်။ သူ လက်ဖက်ရည် တစ်ငုံကြီးကို သောက်လိုက်သည်။

ယင်းကျစ်ဖုန်း "ဒါဆိုရင်လည်း ယွမ်ထောင်ကျူး မြန်မြန်လုပ်ရလိမ့်မယ်၊ ဘာလို့လဲဆိုတော့ မိန်းကလေးပိုင်က မကြာခင် ငါနဲ့အတူ ယန်မြို့တော်ကို လိုက်ခဲ့တော့မှာမို့လို့ပဲ "

ပိုင်ချောင်ရှီ "..."

'ငါက သဘောတူခဲ့လို့လား၊ အတင်းအဓမ္မ ခူးဆွတ်တဲ့ သခွားမွှေးသီးက မချိုဘူးလေ'

အစောပိုင်း ပျော်ရွှင်နေခဲ့သောမျက်နှာသည် ယခုအခါတွင် ရေခဲများဖြင့် ဖုံးလွှမ်းသွားခဲ့ပြီး ပိုင်ချောင်ရှီသည် ယင်းကျစ်ဖုန်းအား သူမ ရင်ထဲတွင် အကြိမ်တစ်ရာမက ကျိန်ဆဲလိုက်သည်။

ယွမ်ရှန်းကမူ “အို” ဟု ပြောလိုက်ပြီးနောက် ဆက်ပြောခဲ့သည်။

ယွမ်ရှန်း "ဒါဆိုရင် ငါက မိန်းကလေးပိုင် ဖန်တီးထားတဲ့ အရသာရှိတဲ့ အစားအစာတွေ မြည်းစမ်းရမယ့်ကံကြမ္မာကို ထပ်ပြီးဆုံးရှုံးရတော့မှာပေါ့၊ ကြည့်ရတာ မိန်းကလေးပိုင်က ဒေသခံတစ်ယောက်ဖြစ်ပုံရတယ်၊ ဒီမှာ မိသားစုတွေ ရှိသေးလား၊ အဝေးကြီးမှာရှိတဲ့ ယန်မြို့တော်ကို သွားရမှာဆိုတော့ သူမ မိသားစုကို ဘယ်တော့မှ ပြန်တွေ့ရမယ်ဆိုတာ ဘယ်သူသိမှာလဲ "

နတ်ဘုရားကဲ့သို့ ကူညီပံ့ပိုးမှုဆိုသည်မှာ အဘယ်နည်း။ ယွမ်ရှန်းကိုသာ ကြည့်လိုက်၊ ပိုင်ချောင်ရှီမှာ ကျေးဇူးတင်စိတ်များ ဖြစ်ပေါ်လာပြီး အရိပ်အကဲကို ချက်ချင်းဖမ်းဆုပ်လိုက်သည်။ သူမ အနည်းငယ် ဦးညွှတ်ကာ ပြောလိုက်သည်။

ပိုင်ချောင်ရှီ "လေးစားရတဲ့ သခင်ကြီးနဲ့ တောင်ပေါ်စံအိမ်ပိုင်ရှင်ကို ဖြေကြားရမယ်ဆိုရင် သာမန်အရပ်သူဖြစ်တဲ့ ကျွန်မမှာ အိုမင်းနေတဲ့ မိခင်နဲ့ မောင်လေး တစ်ယောက် အိမ်မှာရှိနေပါသေးတယ်၊ လေးစားရတဲ့ သခင်ကြီးနဲ့အတူ ယန်မြို့တော်ကို သွားရတာက ကြီးမားတဲ့ ကောင်းချီးတစ်ခုဖြစ်ပေမယ့် မိခင်သက်ရှိ ထင်ရှား ရှိနေချိန်မှာ သားသမီးက အဝေးကို ခရီးမထွက်သင့်ပါဘူး၊ သာမန်အရပ်သူဖြစ်တဲ့ ကျွန်မက မိဘအပေါ်သိတတ်တဲ့ ဒီမူဝါဒနဲ့ လူ့ကျင့်ဝတ်ကို အတိုင်း အတာတစ်ခုအထိ နားလည်ထားပါသေးတယ်၊ လေးစားရတဲ့ သခင်ကြီးက ကျွန်မကို ဒီအခွင့်အရေးလေး ပေးသနားဖို့တောင်းပန်ပါတယ် "

သူမ စကားပြောနေစဉ် ပိုင်ချောင်ရှီသည် သူမ ပြဇာတ်ဆန်သော ဇာတ်ကောင်တွင် အပြည့်အဝ ဝင်ရောက်သွားကာ တကယ်ပင် မျက်ရည်များကျလာခဲ့ပြီး သူမ၏ လေးနက်သောစကားများက ထိုနေရာရှိ လူများကို စိတ်လှုပ်ရှားသွားစေခဲ့သည်။

ယင်းကျစ်ဖုန်းမှာ အကျပ်ရိုက်သွားခဲ့သည်။ အမျိုးသမီးငယ်မှာ ဤမျှခေါင်းမာပြီး သူ့အား အတိအလင်းငြင်းဆန်လိမ့်မည်ဟု သူ မမျှော်လင့်ထားခဲ့ပေ။

ယင်းကျစ်ဖုန်း "မင်း ဆန္ဒရှိရင် မင်း မိခင်နဲ့မောင်လေးကိုပါ ယန်မြို့တော်ကို ခေါ်သွားလို့ရပါတယ် "

သူ အိမ်တော်တွင် အပိုပန်းကန်နှစ်လုံးနှင့် တူနှစ်ချောင်းအတွက် လိုလေသေးမရှိ ဖြစ်မည်မဟုတ်ပေ။

ပိုင်ချောင်ရှီ နောက်ထပ် တစ်စုံတစ်ရာပြောရန် ပြင်လိုက်စဉ် ယွမ်ရှန်း ညွှန်ကြားလိုက်သည်ကို သူမ ကြားလိုက်ရသည်။

ယွမ်ရှန်း "ဟွမ်ယမ်၊ သွားပြီးတော့ မိန်းကလေးပိုင်ကို ခဏလောက်နှစ်သိမ့်ပေးလိုက်ပါဦး၊ သခင်လေးယင်းနဲ့ ငါ ဆွေးနွေးစရာ အရေးကြီးကိစ္စတွေ ရှိသေးတယ်"

ပိုင်ချောင်ရှီသည် ယွမ်ရှန်းအား ကျေးဇူးတင်စွာဖြင့် ကြည့်လိုက်ပြီးနောက် ဟန်ချင်းမဏ္ဍပ်မှ လျင်မြန်စွာထွက်လာခဲ့သည်။