အခန်း ၅၅၁

အခန်း (၅၅၁) - မုန်တိုင်းအောက်မှ ဆိတ်ငြိမ်ရာ မြေအောက်ကမ္ဘာ

အပြင်လောက၌ ကမ္ဘာပျက်မတတ် ဆူညံနေစဉ် နဝမတောင်တန်း၏ အောက်ခြေ နက်ရှိုင်းလှသော လျှို့ဝှက်နယ်မြေထဲတွင်မူ ဆိတ်ငြိမ်လျက် ရှိနေပေသည်။

ထိုနေရာတွင် မြူနှင်းများ ဝေမှိုင်းနေပြီး မိုးကြိုးလျှပ်စီးများ တဖိတ်ဖိတ် လက်နေသည့် ခမ်းနားထည်ဝါသော မြေအောက်နန်းတော်ကျယ်ကြီးတစ်ခုရှိသည်။ ထိုနန်းတော်ထဲ၌ အမျိုးသားတစ်ဦး ထိုင်နေလျက် ရှိ၏။ သူသည် မျက်လုံးများကို မှိတ်ထားပြီး ခန္ဓာကိုယ်မှာမူ အနည်းငယ် တုန်ရင်နေသည်။ ရံဖန်ရံခါတွင် လျှပ်စီးအလင်းတန်းများသည် သူ၏ အရေပြားထက်၌ ကူးလူးကစားနေကြပြီး သေးသွယ်သော လျှပ်စီးမျှင်တန်းလေးများသည် စီးဆင်းနေသော ရေအလျင်ကဲ့သို့ သူ၏ ခန္ဓာကိုယ်အတွင်းအပြင် မရပ်မနား ဖြတ်သန်းစီးဆင်းနေကြပေသည်။

သူ၏ ခြေရင်းတွင်မူ ပစ္စည်းမျိုးစုံ ပြန့်ကျဲနေသည်။

အစုလိုက်အပုံလိုက်ဖြစ်နေသော မှော်လက်နက်များ၊ မှော်ရတနာများ၊ မှော်စာရွက်များ၊ ရုပ်သေးရုပ်များ၊ ဓားအမြုတေများ၊ သတ္တုရိုင်းများ၊ အစီအရင်အလံများနှင့် ပျက်စီးသွားသော သိုလှောင်အိတ် အပိုင်းအစများစွာ ပြန့်ကျဲနေ၏။ မည်သည့်အရာကမျှ အစီအစဉ်တကျ မရှိသဖြင့် ဤမျှ ရှုပ်ထွေးပွေလီလှသော ပစ္စည်းပစ္စယများကို ပိုင်ဆိုင်ထားသည့် ကျင့်ကြံသူမှာ မည်ကဲ့သို့သော လူမျိုးဖြစ်သည်ကို ခန့်မှန်းရန် အလွန်ပင် ခက်ခဲလှပေ၏။

လွန်ခဲ့သော ခြောက်လတာ ကာလအတွင်း သူ မည်မျှအထိ ခါးသီးပင်ပန်းစွာ အံတုရင်ဆိုင်ခဲ့ရသည်ကို လော့ချန် တစ်ဦးတည်းသာ အသိဆုံး ဖြစ်ပေသည်။

သူ ကပ်ဘေးမိုးသက်မုန်တိုင်းကို ဆင့်ခေါ်ခဲ့သည့် ထိုနေ့က အရာအားလုံး ပြောင်းလဲသွားခဲ့ရ၏။ ကောင်းကင်ယံမှ ကျရောက်လာမည့် မိုးကြိုး၏ အရှိန်အဝါ ထိုမျှ ပြင်းထန်လိမ့်မည်ဟု သူ လုံးဝ မထင်မှတ်ထားခဲ့မိချေ။ မော်ကွန်းဝင်အစီအရင်အိမ်မြှောင်၏ မိုးကြိုးခုခံနိုင်စွမ်းသည် ထိုကောင်းကင်မိုးကြိုး၏ ပြင်းထန်လှသော ဒေါသဒဏ်ကို အပြည့်အဝ ခုခံရန် လုံးဝ မလုံလောက်ခဲ့ပေ။

တီဝမ်ယွင် တစ်ခဏအတွင်း သေဆုံးသွားသည်ကို မြင်လိုက်ရသည့်အခါ သူ့တွင် နောက်ဆုံး အရန်အစီအစဉ်ကို အသုံးပြုရန်မှတစ်ပါး အခြားရွေးချယ်စရာ မရှိတော့ချေ။ ထို့ကြောင့် သေရေးရှင်ရေး လောင်းကြေးထပ်သည့်အနေဖြင့် မည်သည့်နောက်ဆက်တွဲ ရလဒ်မျိုး ဖြစ်လာမည်၊ မည်သူ နောက်ကလိုက်လာမည်ကိုပင် ဂရုမစိုက်နိုင်တော့ဘဲ ထိုကောင်းကင်မိုးကြိုး၏ စွမ်းအားကို အသုံးပြုကာ ရှေးဟောင်းတံခါးကို ဖွင့်လိုက်သည်။ ကံကောင်းထောက်မစွာ သူ အောင်မြင်ခဲ့ပြီး လျှို့ဝှက်နယ်မြေထဲသို့ ဝင်ရောက်သွားနိုင်ခဲ့သည်။

သို့သော် သေမင်းတမန်လက်မှ သီသီလေး လွတ်မြောက်ခဲ့ရသော်လည်း ပေးဆပ်မှုကမူ ကြီးမားလှပေသည်။ မိုးသက်မုန်တိုင်း၏ မိုးကြိုးစွမ်းအင် အစိတ်အပိုင်းအချို့သည် သူ့နောက်သို့ လိုက်ပါလာပြီး သူ၏ ခန္ဓာကိုယ်အတွင်းသို့ အလုံးအရင်းဖြင့် ဝင်ရောက်သွားခဲ့သောကြောင့် ဖြစ်သည်။

အကယ်၍ သာမန်မိုးကြိုးစွမ်းအင်သာ ဖြစ်ပါက သူ ကြံ့ကြံ့ခံနိုင်ကောင်း ခံနိုင်လိမ့်မည်။ အခြေတည် ကျင့်ကြံသူတစ်ဦးအဖို့ ထိုနာကျင်မှုကို အံကြိတ်ခံနိုင်ရည် ရှိပေသည်။ သို့သော် ထိုမိုးကြိုးစွမ်းအင်၏ သိပ်သည်းဆနှင့် ပြင်းထန်မှုသည် အလွန်ပြင်းထန်လှ၏။ ထို့ကြောင့်ပင် ထိုအချိန်မှစ၍ သူ၏ ခန္ဓာကိုယ်မှာ ပြိုလဲပျက်စီးလုနီးပါး အန္တရာယ်ရှိသော အခြေအနေနှင့် အမြဲ ရင်ဆိုင်နေခဲ့ရသည်။ သူသည် သန့်စင်ခြင်းမှော်အတတ်ကို အသုံးပြု၍ ခန္ဓာကိုယ်ထဲမှ ပြင်ပမိုးကြိုးစွမ်းအင်များကို မောင်းထုတ်ရန် ကြိုးစားခဲ့သော်လည်း ၎င်းမှာ သမုဒ္ဒရာထဲသို့ ရေတစ်စက် ချလိုက်သကဲ့သို့သာ ရှိခဲ့ပေသည်။

အခြားရွေးချယ်စရာ လမ်းမရှိတော့သည့်အဆုံး သူ၏ နောက်ဆုံးလက်နက်ဖြစ်သော သက်စောင့်ရေခဲကျောက်စိမ်းကို ထုတ်သုံးလိုက်ရတော့သည်။ တစ်ခဏအတွင်းမှာပင် သူ၏ တစ်ကိုယ်လုံးမှာ ရေခဲထူထူကြီးဖြင့် ပိတ်ဆို့ခြင်း ခံလိုက်ရ၏။ သူသည် ကရုဏာမဲ့နတ်သမီး ရောက်ရှိလာမည့်အချိန်အထိ တောင့်ခံထားနိုင်ရန် မျှော်လင့်ခဲ့ခြင်း ဖြစ်ပေသည်။ သို့သော် ရေခဲပိတ်ဆို့ခံရပြီးနောက် တစ်ခုခု မှားယွင်းနေသည်ကို သူ ချက်ချင်း သတိပြုမိလိုက်သည်။ အကြောင်းမှာ မိုးကြိုးစွမ်းအင်များသည် သူ၏ ခန္ဓာကိုယ်အတွင်း၌ ငြိမ်သက်မသွားဘဲ ဆက်လက် သောင်းကျန်းနေဆဲ ဖြစ်သောကြောင့်ပင်။ အေးခဲနေသော ရေခဲပြင်ကြီးသည် တစ်လက်မချင်းစီ အက်ကွဲလာခဲ့ရ၏။ တစ်ရက်အတွင်းမှာပင် ၎င်းသည် အစိတ်စိတ်အမွှာမွှာ ပျက်စီးသွားတော့မည်ဖြစ်ပြီး ထိုမိုးကြိုးစွမ်းအင်များသည် သူ၏ ခန္ဓာကိုယ်ကို တစ်ဖန် ပြန်လည် ဖျက်ဆီးပေလိမ့်မည်။

သေခြင်းနှင့် ရှင်ခြင်း လမ်းဆုံတွင် လော့ချန် စိတ်ကို အတင်းအကြပ် တည်ငြိမ်အောင် ထိန်းသိမ်းလိုက်သည်။ အကယ်၍ သူ့တွင် မိုးကြိုးဝိညာဉ်အမြစ်သာ ရှိပါက ထိုစွမ်းအင်ကို စုပ်ယူပြီး ကျင့်ကြံမှုအဆင့်ကို မြှင့်တင်နိုင်လိမ့်မည် ဖြစ်သော်လည်း သူ့တွင် မရှိချေ။ သို့သော် သူသည် ယခင်က ခန္ဓာကိုယ်ကြံ့ခိုင်မှုအတွက် မိုးကြိုးစွမ်းအင်ကို အသုံးပြု၍ လေ့ကျင့်ခဲ့ဖူးသည်။

"ငါသာ မိုးကြိုးစွမ်းအင်ကို သုံးပြီး အာရုံခံပေါက်တွေ ဖွင့်မယ်ဆိုရင် အဲ့ဒါကို လောင်ကျွမ်းပစ်နိုင်မလား.... မဖြစ်နိုင်ဘူး၊ စွမ်းအင်က များလွန်းတယ်၊ ငါ အစိတ်အပိုင်းတစ်ခုကိုပဲ သုံးနိုင်ရင်တောင် ကျန်တဲ့စွမ်းအင်တွေက ငါ့ခန္ဓာကိုယ်ကို အပိုင်းပိုင်း ဆွဲဖြဲပစ်လိမ့်မယ်၊ ငါ တခြားနည်းလမ်း ရှာရမယ်၊ ဒီစွမ်းအင်တွေကို ခန္ဓာကိုယ်အပြင်ဘက်ကို လမ်းကြောင်းလွှဲထုတ်ပစ်ရမယ် ဒါမှမဟုတ် အပြည့်အဝ စုပ်ယူပစ်ရမယ်...."

ထို့နောက် တတိယအဆင့် ခန္ဓာကိုယ်ကြံ့ခိုင်မှုကျင့်စဉ်ဖြစ်သော ဟင်္သာအသွင်ပြောင်းကျင့်စဉ်ကို သတိရလိုက်သည်။ အကယ်၍ ထိုကျင့်စဉ်ကို အောင်မြင်စွာ ကျင့်ကြံနိုင်ပါက သားရဲတစ်ကောင်ကဲ့သို့ အသွင်ပြောင်းလဲခြင်းကို ဖြစ်ပေါ်စေလိမ့်မည် ဖြစ်သည်။ ထိုအကြောင်းကြောင့်ပင် ဝမ်ယွမ်က ဤကျင့်စဉ်ကို လှောင်ပြောင်ခဲ့ခြင်းဖြစ်ပြီး လော့ချန်ကိုယ်တိုင်လည်း ၎င်းကို သဘောမကျခဲ့ပေ။ သို့သော် ဟင်္သာအသွင်ပြောင်းကျင့်စဉ်သည် တိုက်ခိုက်ရေးအတွက် သားရဲအသွင်ပြောင်းသည့် နည်းလမ်းသက်သက်မျှသာ မဟုတ်ချေ။ ၎င်း၏ အနှစ်သာရမှာ ရှေးဟောင်းသားရဲများ၏ ခန္ဓာကိုယ်ကို အတုယူခြင်း ဖြစ်၏။ တောင်ပင်လယ်လောကတွင် ရှေးဟောင်းသားရဲကြီးများသည် လူသားပုံသဏ္ဌာန်သို့ ပြောင်းလဲရန် ရွေးချယ်လေ့မရှိကြပေ။ ထိုအစား သူတို့သည် ချီစွမ်းအင် အမြောက်အမြားကို စုပ်ယူပြီး သူတို့၏ ခန္ဓာကိုယ်ကို မသေမျိုးအခြေအနေသို့ ရောက်ရှိအောင် ဖန်တီးကြသည်။

ဟင်္သာအသွင်ပြောင်းကျင့်စဉ်ကိုလည်း ထိုသဘောတရားအတိုင်းပင် ဖန်တီးခဲ့ခြင်း ဖြစ်၏။ သို့သော် စိတ်မကောင်းစရာမှာ ဤကျင့်စဉ်သည် မပြည့်စုံဘဲ ရှိနေခြင်းပင်။ တိကျလှသော ခန္ဓာကိုယ်ကြံ့ခိုင်မှု နည်းလမ်းများ၏ အဓိက အစိတ်အပိုင်းအချို့မှာ ပျောက်ဆုံးနေခဲ့သည်။ လက်ရှိ ကျန်ရှိနေသည်မှာ သီးခြားစီဖြစ်သော မိစ္ဆာငှက်သုံးကောင်၏ အနှစ်သာရသွေးကို စုပ်ယူရန် တည်ဆောက်ထားသည့် လမ်းကြောင်းမျှသာ ဖြစ်ပြီး ၎င်းတို့သည် ခန္ဓာကိုယ်ကြံ့ခိုင်မှု၏ သီးခြားလမ်းကြောင်းသုံးခုကို ကိုယ်စားပြုနေကြသည်။ ၎င်းတို့မှာ မိုးကြိုးဟင်္သာ၊ ရွှေဟင်္သာနှင့် ကောင်းကင်ဟင်္သာ တို့ဖြစ်၏။

သူတို့၏ သက်ဆိုင်ရာ ဓာတ်သဘာဝများမှာ မိုးကြိုး၊ သတ္တုနှင့် မီးတို့ ဖြစ်ကြပြီး တိုက်ဆိုင်စွာပင် ဤဓာတ်သုံးပါးသည် ကျင့်ကြံသူများ၏ ဝိညာဉ်အမြစ်များထဲတွင် အင်အားအကြီးမားဆုံး ဓာတ်များ ဖြစ်နေကြသည်။ အကယ်၍ တစ်ဦးတစ်ယောက်သည် ဟင်္သာအသွင်ပြောင်းကျင့်စဉ်ကို တတ်မြောက်ပါက သူတို့၏ တိုက်ခိုက်နိုင်စွမ်းသည် အဆင့်တူ ကျင့်ကြံသူများထက် များစွာ သာလွန်ပေလိမ့်မည်။

လော့ချန်တွင် ဝိညာဉ်အမြစ် ငါးခုစလုံး ရှိသဖြင့် ရွှေဟင်္သာနှင့် ကောင်းကင်ဟင်္သာ လမ်းကြောင်း နှစ်ခုစလုံးကို လျှောက်လှမ်းနိုင်စွမ်း ရှိပေသည်။ ထို့ပြင် သူ အခြေတည်အဆင့်တက်လှမ်းစဉ်က တိမ်မီးလျှံဂဠုန််၏ ရုပ်အလောင်းမှ ဖော်စပ်ထားသော နတ်ဒေဝါပျားရည်ကို သောက်သုံးခဲ့ဖူးသည်။ တိကျစွာ ပြောရလျှင် သူသည် မီးဓာတ်ရှိသော မိစ္ဆာငှက်၏ အနှစ်သာရသွေးကို စုပ်ယူပြီးသား ဖြစ်ပေသည်။ ဓာတ်သဘာဝ အရည်အသွေးအရ သူသည် ကောင်းကင်ဟင်္သာနှင့် သက်ဆိုင်သော မီးလမ်းကြောင်း ခန္ဓာကိုယ်ကြံ့ခိုင်မှုပေါ်သို့ ခြေလှမ်းလှမ်းပြီးသား ဖြစ်နေ၍ တတိယအဆင့် ဟင်္သာအသွင်ပြောင်းကျင့်စဉ်ကို ပြည့်စုံစေရန် ထိုလမ်းကြောင်းအတိုင်း ဆက်လက် လျှောက်လှမ်းရုံသာ ရှိပေသည်။ သို့သော် ဝမ်းနည်းစရာမှာ ဤလောကတွင် မည်သည့်အရာမျှ ပြည့်စုံလှသည်တော့ မဟုတ်ချေ။

"ငါက အနှစ်သာရသွေး ထည့်သွင်းရမယ့် အခြေခံလိုအပ်ချက်ကို ဖြည့်ဆည်းပြီးသားပဲ၊ ဘာလို့ မီးဓာတ်ကို သုံးပြီး မိုးကြိုးကို မလေ့ကျင့်ရမှာလဲ၊ ပြီးတော့ ဘာလို့ မိုးကြိုးကို သုံးပြီး ခန္ဓာကိုယ်ကို အဆင့်မမြှင့်ရမှာလဲ၊ တကယ်လို့ ကျင့်စဉ်က မပြည့်စုံဘူးဆိုရင် ငါကိုယ်တိုင်ပဲ ပြည့်စုံအောင် ဖြည့်စွက်ရုံပေါ့"

အချိန်များက ကုန်ဆုံးလုနီးပြီ ဖြစ်၏။ သက်စောင့်ရေခဲကျောက်စိမ်း၏ အေးခဲနိုင်စွမ်းသည် တစ်ရက်ထက် ပို၍ ခံလိမ့်မည်မဟုတ်ပေ။ လော့ချန် မဆိုင်းမတွပင် သူ၏ အခြေအနေပြကြေးမုံပြင်ကို လှမ်း၍ ဆင့်ခေါ်လိုက်သည်။ အခြားကဏ္ဍများကို ကြည့်မနေတော့ဘဲ သူ၏ အောင်မြင်မှုအမှတ်များ ပြသထားသည့် အောက်ဆုံးအပိုင်းဆီသို့ တိုက်ရိုက် ရွှေ့လိုက်တော့၏။

‘အောင်မြင်မှုအမှတ် - ၆၅ မှတ်’

၎င်းမှာ သူ၏ တစ်ဘဝလုံး စုဆောင်းမိသမျှထဲတွင် အမှတ်အများဆုံး ဖြစ်ပေသည်။ သူ၏ အတွေ့အကြုံအရ အဆင့်များကို ဖြတ်ကျော်၍ ဆေးနည်းတစ်ခုကို ဖြည့်စွက်ရန်အတွက် အနည်းဆုံး အမှတ် တစ်ဒါဇင်ခန့် လိုအပ်လေ့ရှိသည်။ အမြင့်ဆုံး ကန့်သတ်ချက်မှာမူ အဆင့်မည်မျှအထိ ဖြတ်ကျော်ရမည်အပေါ် မူတည်ပြီး အဆင့်တစ်ခုအတွက် အမှတ် တစ်ရာအောက် လိုအပ်ကာ အဆင့်နှစ်ခု ဖြတ်ကျော်ရန်အတွက်မူ အမှတ်ရာဂဏန်း အနည်းငယ် လိုအပ်ကောင်း လိုအပ်နိုင်ပေသည်။

သူ၏ ခန္ဓာကိုယ်ကြံ့ခိုင်မှုအဆင့်မှာ သွေးမြစ်အဆင့်၏ လမ်းတစ်ဝက်သို့ ရောက်ရှိနေပြီဖြစ်ရာ ကွာဟချက်မှာ ထင်သလောက် မကြီးမားလှချေ။ ထို့ပြင် ကျင့်ကြံသူတစ်ဦး၏ နည်းစနစ်အခြေခံ ခိုင်မာလေလေ၊ အောင်မြင်မှုအမှတ် ကုန်ဆုံးမှု နည်းပါးလေလေ ဖြစ်သည်။ ဤသဘောတရားသည် ဆေးနည်းများတွင် အလုပ်ဖြစ်ခဲ့သဖြင့် ကျင့်စဉ်များတွင်လည်း အလုပ်ဖြစ်မည်မှာ အသေအချာပင်။

လော့ချန်သည် ဝမ်ယွမ်ကဲ့သို့ ခန္ဓာကိုယ်ကြံ့ခိုင်မှုတွင် ကျွမ်းကျင်သူတစ်ဦး မဟုတ်သော်လည်း ထိုကဏ္ဍ၌ သာမန် အဆင့်နိမ့်ကျင့်ကြံသူများထက်မူ များစွာ သာလွန်လှပေသည်။ နေ့စဉ် လေ့ကျင့်မှုတွင်ဖြစ်စေ၊ စာတွေ့လေ့လာမှုတွင်ဖြစ်စေ သူသည် ဘယ်သောအခါမျှ ပျင်းရိခြင်း မရှိခဲ့ချေ။ အထူးသဖြင့် ဟင်္သာအသွင်ပြောင်းကျင့်စဉ်ကိုမူ သူ အခြေတည်အဆင့်သို့ ရောက်ကတည်းက စူးစမ်းလေ့လာနေခဲ့ခြင်း ဖြစ်သည်။ တစ်နည်းအားဖြင့် ပြောရလျှင် ဤအစီအစဉ်သည် အမှန်တကယ် ဖြစ်နိုင်ခြေ ရှိပေသည်။

"အောင်မြင်မှုအမှတ် ၆၅ မှတ်နဲ့ဆိုရင် ငါ အဲ့ဒါကို ပြည့်စုံအောင် လုပ်နိုင်မယ်"

ကပ်ဘေးကြီးက ရှေ့မှောက်သို့ ရောက်ရှိနေပြီဖြစ်ရာ လော့ချန် တစ်စက္ကန့်မျှ တုံ့ဆိုင်းမနေဝံ့တော့ချေ။ သူသည် ဤကျင့်စဉ်ကို ပြည့်စုံစေမည့် ဖြစ်စဉ်ကို ချက်ချင်း စတင်လိုက်တော့သည်။

သူ၏ အောင်မြင်မှုအမှတ်များသည် စီးဆင်းနေသော ရေအလျင်ကဲ့သို့ လျင်မြန်စွာ လျော့နည်းသွားခဲ့ရ၏။

‘တစ်မှတ်၊ နှစ်မှတ်၊ သုံးမှတ်၊ လေးမှတ်.... တစ်ဆယ့်ငါးမှတ်၊ အမှတ်နှစ်ဆယ်.... အမှတ်လေးဆယ်....’

အမှတ် ၄၅ မှတ် ကုန်ဆုံးသွားသည့် အချိန်တွင် ထိုဖြစ်စဉ်မှာ တစ်ခဏအတွင်း ပြီးဆုံးသွားခဲ့လေပြီ။

ပြီးပြည့်စုံသွားသော ကျင့်စဉ်သစ်တစ်ခုသည် ဉာဏ်အလင်းပွင့်သွားသည်အလား သူ၏ စိတ်ထဲသို့ အလုံးအရင်းဖြင့် ဝင်ရောက်လာခဲ့၏။ ကျင့်စဉ်၏ အစပိုင်းမှာ သူ ရင်းနှီးပြီးသား ဖြစ်သည်။ အကြောင်းမှာ သူသည် ဟင်္သာအသွင်ပြောင်းကျင့်စဉ်၏ ရှေ့ပိုင်းကို အလွတ်ရနေခဲ့သည်မှာ ကြာပြီဖြစ်သောကြောင့်ပင်။ သို့သော် နောက်ပိုင်း အစိတ်အပိုင်းမှာမူ သူ တစ်ခါမျှ မမြင်ဖူးသော အရာများ ဖြစ်ကြပေသည်။

"မိုးကြိုးစွမ်းအင်သည် သွေးကြောပေါင်း တစ်ရာကို ဖြတ်သန်းစီးဆင်း၏၊ ၎င်းသည် ခန္ဓာကိုယ်ကို လွှမ်းမိုးထား၏။ ချီစွမ်းအင်ကို အာဟာရပြုပြီး အနှစ်သာရသွေးကို ပြန်လည် မွေးဖွားစေ၏....”

သူ၏ စိတ်ထဲတွင် အသေးစိတ် ရှင်းလင်းချက်များ ပေါ်ထွက်လာသည့်အခါ လော့ချန်သည် ပြန်လည်ဆန်းသစ်သွားသော တတိယအဆင့် ခန္ဓာကိုယ်ကျင့်စဉ်သည် သူ့အတွက် အထူးပင် သီးသန့် ဖန်တီးထားသကဲ့သို့ ဖြစ်နေသည်ကို အံ့သြစွာ တွေ့ရှိလိုက်ရသည်။ သူသည် ရိုးတွင်းခြင်ဆီ ဆေးကြောခြင်း၊ ကိုယ်တွင်းအင်္ဂါ သန့်စင်ခြင်း၊ သွေးကြောဖွင့်ခြင်းနှင့် အာရုံခံပေါက်ဖွင့်ခြင်းတို့ကို ဖြတ်သန်းခဲ့ပြီးသား ဖြစ်၏။ ယခုမူ သူသည် ထိုလမ်းကြောင်းကို မိုးကြိုးစွမ်းအင်၏ အကူအညီဖြင့် တစ်ဖန် ပြန်လည် လျှောက်လှမ်းရန်သာ လိုအပ်တော့သည်။

သူ၏ ချီစွမ်းအင်ကို အာဟာရပြုရန်နှင့် အနှစ်သာရသွေးသစ်များ ထုတ်လုပ်ရန် ဖော်ပြထားသည့် နောက်ဆက်တွဲအပိုင်းမှာမူ သူ၏ ဒုတိယအဆင့်ကျင့်စဉ်ဖြစ်သော ချီခန္ဓာမူလကျင့်စဉ်မှ ဆင်းသက်လာခြင်း ဖြစ်သည်မှာ ထင်ရှားလှပေသည်။ အာရုံခံပေါက် ဖွင့်သည့် နည်းလမ်းကိုမူ ဆဋ္ဌမတောင်တန်းတွင် တာဝန်ကျစဉ် ကာလအတွင်း သူကိုယ်တိုင် စူးစမ်းရှာဖွေတွေ့ရှိခဲ့ခြင်း ဖြစ်၏။ ၎င်းအပြင် အခြား ထူးခြားဆန်းကြယ်လှသော နည်းစနစ်အချို့လည်း တိုးပွားလာခဲ့သည်။

အရိုးသွန်းလုပ်ခြင်း၊ သွေးကူးပြောင်းခြင်း၊ ဝိညာဉ်အနှစ်သာရထိန်းသိမ်းခြင်း၊ အမြုတေ စုစည်းခြင်း၊ ချီစွမ်းအင် စုပ်ယူခြင်း၊ ချပ်ဝတ်တန်ဆာ အသွင်ပြောင်းခြင်း....။

ကျင့်စဉ်၏ အဆုံးပိုင်းတွင်မူ ဤကျင့်စဉ်သည် အဆုံးသတ်သို့ လုံးဝ ရောက်ရှိသွားခြင်း မရှိသေးဘဲ ရှေ့ဆက်၍ တိုးတက်နိုင်စွမ်းရှိသည့် အလားအလာများကိုပင် အရိပ်အမြွက် ပြသထားသေးသည်။ ၎င်းက ဤနည်းစနစ်သည် နောင်တွင် ပိုမို ကောင်းမွန်အောင် ပြင်ဆင်ရန်နှင့် အဆင့်မြှင့်တင်ရန် နေရာကျန်ရှိသေးကြောင်း ညွှန်ပြနေခြင်း ဖြစ်၏။ ထိုနည်းစနစ်သစ်များကို ကြည့်ရင်း လော့ချန်သည် ၎င်းတို့အားလုံးမှာ သူ ယခုအချိန်အထိ ကျင့်ကြံအားထုတ်ခဲ့သမျှသော အသိပညာ၊ အတတ်ပညာများနှင့် ထပ်တူကျနေသည်ကို သတိပြုမိလိုက်သည်။

အရိုးသွန်းလုပ်ခြင်းနှင့် သွေးကူးပြောင်းခြင်းတို့မှာ မိစ္ဆာသားရဲတို့၏ သွေးသားမှ ထုတ်ယူထားသော နတ်ဒေဝါပျားရည်ကို အသုံးပြု၍ အခြေတည်အဆင့်ကို အောင်မြင်ခဲ့သည့် အတွေ့အကြုံမှ မြစ်ဖျားခံလာခြင်း ဖြစ်သည်။ ဝိညာဉ်အနှစ်သာရထိန်းသိမ်းခြင်းမှာမူ နတ်ဘုရားတို့မိစ္ဆာဖြိုခွင်းခြင်းအတတ်မှ ရရှိလာပုံရ၏။ အမြုတေ စုစည်းခြင်းကမူ နဂါးဖီးနစ်လျှို့ဝှက်နည်းနှင့် ချင်းယွမ်ဆေးကျမ်းတို့မှ ရရှိသော အတွေ့အကြုံများအပေါ် အခြေခံထားပုံရပေသည်။ ချီစွမ်းအင် စုပ်ယူခြင်းနှင့် ချပ်ဝတ်တန်ဆာ အသွင်ပြောင်းခြင်း တို့ကိုမူ လိပ်နတ်ဘုရားချပ်ဝတ်တန်ဆာအတတ်မှ ဆင်းသက်လာသည့်ပုံပင်။

ဤမျှအထိ လေးနက်ဆန်းကြယ်သော တိုးတက်မှုကို ရင်ဆိုင်လိုက်ရသည့်အခါ လော့ချန် ရင်ထဲ၌ အတိုင်းအဆမရှိ ဝမ်းမြောက်မိတော့သည်။ ဤသည်မှာ သူသည် စနစ်ကို အသုံးပြု၍ ဤမျှအထိ ကြီးမားလှသော ကျင့်စဉ်တစ်ခုကို ပထမဆုံးအကြိမ် တက်ကြွစွာ ဖြည့်စွက်ခဲ့ခြင်းဖြစ်ပြီး ရလဒ်မှာ ဤမျှအထိ နက်ရှိုင်းဆန်းကြယ်လိမ့်မည်ဟု သူ လုံးဝ မမျှော်လင့်ထားခဲ့မိချေ။ စနစ်က သူ့အား ပေးအပ်ခဲ့သော နည်းလမ်းမှာ ကာရန်မညီဘဲ ဖာထေးထားသည့် အရာမျိုး မဟုတ်ဘဲ သူ လေ့လာခဲ့သမျှသော အတတ်ပညာအားလုံးကို အကောင်းဆုံး ပေါင်းစပ်ပြီး သူ့အတွက် သီးသန့် ထုဆစ်ပေးထားသည့် ပြီးပြည့်စုံသော ပေါင်းစပ်မှုကြီး တစ်ခုပင် ဖြစ်ပေသည်။

အကယ်၍ သူသာ ဤလမ်းကြောင်းအတိုင်း ကျင့်ကြံသွားမည်ဆိုပါက သွေးချီအသွင်ပြောင်းခြင်းများကို နားမလည်ဘဲ သို့မဟုတ် ခန္ဓာကိုယ်ကြံ့ခိုင်မှု၏ ရိုးရာစည်းကမ်းများကို လုံးဝ မလိုက်နာဘဲ နေခဲ့လျှင်ပင် ရှေးဟောင်းသားရဲကြီးများနှင့် ရင်ပေါင်တန်းနိုင်မည့် ကြောက်မက်ဖွယ်ကောင်းသော ခန္ဓာကိုယ်တစ်ခုကို သွန်းလုပ်နိုင်လိမ့်မည် ဖြစ်သည်။

ဤအခြေအနေသို့ ရောက်ရှိလာသည့်အခါ ဤကျင့်စဉ်ကို ဟင်္သာအသွင်ပြောင်းကျင့်စဉ်ဟု ဆက်လက် ခေါ်ဆိုရန် မသင့်တော်တော့ချေ။ အချိန်က ကန့်သတ်ချက် ရှိနေသဖြင့် သူသည် ၎င်းကို မိုးကြိုးခန္ဓာကျင့်စဉ်ဟု ယာယီ အမည်ပေးလိုက်တော့သည်။ ဤအမည်ကို လောလောလောလော ရွေးချယ်လိုက်ခြင်း ဖြစ်ပြီး စာပေဆန်ဆန် သို့မဟုတ် လေးနက်စွာ စဉ်းစားနေရန် အချိန်မရှိတော့ချေ။

သက်စောင့်ရေခဲကျောက်စိမ်း အရည်ပျော်သွားသည်နှင့်အမျှ မိုးကြိုးစွမ်းအင်များသည် သူ၏ ခန္ဓာကိုယ်အတွင်း၌ ပိုမို ပြင်းထန်စွာ သောင်းကျန်းလာခဲ့၏။ သူသည် ၎င်းကို ဆက်လက် ထိန်းချုပ်ထားနိုင်စွမ်း မရှိတော့ချေ။ သို့သော် ယခုအခါတွင်မူ သူ ထိန်းချုပ်ထားရန် မလိုအပ်တော့ပေ။ လော့ချန် တုံ့ဆိုင်းမနေတော့ဘဲ သူ၏ တတိယအဆင့် ကျင့်စဉ်သစ်ကို စတင် လေ့ကျင့်လိုက်ပြီး ထိုသောင်းကျန်းနေသော မိုးကြိုးစွမ်းအင်များကို သူ၏ ခန္ဓာကိုယ်အား အဆင့်မြှင့်ရန် ဆွဲယူလိုက်တော့သည်။

ပထမဆုံး ခြေလှမ်းမှာ ရိုးတွင်းခြင်ဆီဆေးကြောခြင်း၊ ကိုယ်တွင်းအင်္ဂါ သန့်စင်ခြင်း၊ သွေးကြောဖွင့်ခြင်းနှင့် အာရုံခံပေါက်ဖွင့်ခြင်း ဟူသော အဆင့်လေးဆင့်ကို ပြန်လည် လုပ်ဆောင်ရန်ပင် ဖြစ်၏။

ဂျိန်းးး....

ရေခဲနက်များ အရည်ပျော်သွားသည့် တစ်ခဏအတွင်းမှာပင် ပြင်းထန်လှသော မိုးကြိုးလှိုင်းများသည် လော့ချန်၏ ခန္ဓာကိုယ်ကို ဆွဲဖြဲဖျက်ဆီးပစ်ရန် ထွက်ပေါ်လာသည်။ လော့ချန် အံကို တင်းတင်းကြိတ်ကာ ကုသခြင်းမှော်အတတ်နှင့် နွေဦးလေပြေ မိုးရေစက်မှော်အတတ်တို့ကို မနားတမ်း အသုံးပြုလိုက်၏။ ထိုကုသခြင်း မှော်အတတ် နှစ်ခုကို အလှည့်ကျ အသုံးပြုရင်း သူသည် ပျက်စီးနေသော သူ၏ ခန္ဓာကိုယ်ကို အမြဲမပြတ် ပြန်လည် ပြုပြင်နေခဲ့သည်။

ထိုတိုတောင်းလှသော သက်သာရာရသည့် အခိုက်အတန့်လေးများအတွင်း လော့ချန်သည် ခန္ဓာကိုယ်ကြံ့ခိုင်မှု လမ်းကြောင်းပေါ်သို့ တစ်ဖန် ပြန်လည် လျှောက်လှမ်းခဲ့၏။ သူ၏ သန်မာပြီးသား ခန္ဓာကိုယ်သည် အသစ်တစ်ဖန် ပြန်လည် သန့်စင်ခြင်းကို ခံခဲ့ရသည်။ သူ၏ ရင်ဘတ်ထဲမှ ကိုယ်တွင်းချီစွမ်းအင်ငါးခုသည် သောင်းကျန်းနေသော နဂါးကြီးများကဲ့သို့ ပေါက်ကွဲထွက်လာပြီး မိုးကြိုးစွမ်းအင်များနှင့် ရောယှက်ကာ ၎င်းတို့ကို ဆွဲဖြဲပစ်လိုက်တော့သည်။ ထိုဖြစ်စဉ်အတွင်း ချီစွမ်းအင်ငါးခုလုံး အားနည်းသွားခဲ့ရသော်လည်း ကျန်ရှိနေသော အစိတ်အပိုင်းများသည် ပိုမို စင်ကြယ်ကာ ပိုမို အားကောင်းလာခဲ့ပေသည်။

မိုးကြိုးစွမ်းအင်များသည် သွေးကြောပေါင်း တစ်ရာအတွင်းသို့ ချောမွေ့စွာ ဖြတ်သန်းစီးဆင်းသွားခဲ့၏။ ၎င်းကို အထောက်အကူပြုရန် လော့ချန်သည် သူ သိမ်းဆည်းထားသော ထိပ်တန်းအဆင့် သွေးမိစ္ဆာဆေးလုံးကို သောက်သုံးလိုက်သည်။ ထို့နောက်တွင်မူ သူ မပြီးဆုံးသေးသော အာရုံခံပေါက်ဖွင့်သည့် အဆင့်သို့ ရောက်ရှိလာခဲ့ပေသည်။

အချိန်များသည် တိတ်ဆိတ်စွာဖြင့် တရွေ့ရွေ့ ကုန်လွန်သွားခဲ့၏။ နောက်ဆုံးတွင်မူ အခြားသော ဘေးကျပ်နံကျပ် အခြေအနေတစ်ခု ထပ်မံ ပေါ်ပေါက်လာခဲ့ပြန်သည်။

သူ၏ ချီစွမ်းအင်များမှာ ကုန်ခမ်းလုနီးပါး ဖြစ်သွားခဲ့ရပြီ ဖြစ်၏။ ချီခန္ဓာမူလကျင့်စဉ်ကို သုံး၍ ခန္ဓာကိုယ်ကို အာဟာရပြုသည်ဖြစ်စေ၊ မိုးကြိုးစွမ်းအင်ကို ဆွဲယူပြီး ကုသခြင်းမှော်အတတ်များကို သုံး၍ ခန္ဓာကိုယ်ကို ပြုပြင်သည်ဖြစ်စေ ထိုအရာအားလုံးသည် ချီစွမ်းအင် အမြောက်အမြားကို ကုန်ဆုံးစေသောကြောင့်ပင်။ တစ်ချိန်က ကျယ်ပြောလှသော သူ၏ ချီပင်လယ်ကြီးသည် ယခုအခါတွင်မူ သေးငယ်သော ရေအိုင်ငယ်လေးတစ်ခုအဖြစ်သို့ လျော့နည်းသွားခဲ့ရရှာသည်။

လော့ချန် တွေဝေမနေတော့ဘဲ သူ၏ သိုလှောင်အိတ်ထဲမှ အဆင့်မြင့် နဂါးပျံဆေးလုံး အားလုံးကို သောက်သုံးလိုက်တော့သည်။ ထို့နောက် သူသည် သေဆုံးသွားခဲ့ကြသော အခြေတည်ကျင့်ကြံသူများ ချန်ထားခဲ့သည့် သိုလှောင်အိတ်အားလုံးကို အတင်းအကြပ် ရိုက်ခွဲဖွင့်လှစ်လိုက်၏။ အကယ်၍ ၎င်းတို့ အလိုအလျောက် ပွင့်လာပါက ကောင်း၏။ မပွင့်ပါက သူ အင်အားသုံး၍ ဖျက်ဆီးပစ်လိုက်သည်။ အတွင်းရှိ ပစ္စည်းအချို့ ပျက်စီးဆုံးရှုံးသွားခဲ့လျှင်ပင် သူ ဂရုမစိုက်နိုင်တော့ချေ။

သူ အဓိက ဂရုစိုက်သည်မှာ အတွင်း၌ ဆေးလုံးများ သို့မဟုတ် ဆေးဖက်ဝင် ပစ္စည်းများ ရှိမရှိဟူသော အချက်သာ ဖြစ်သည်။ မပြုပြင်ရသေးသော ဝိညာဉ်ဆေးပင်များ ဖြစ်နေပါစေဦး၊ ၎င်းတို့ထဲတွင် ချီစွမ်းအင် ပါရှိနေသရွေ့ သူ့အတွက် လုံလောက်လှပေပြီ။ ဤမျှအထိ အမျိုးစုံလှသော ဆေးလုံးများနှင့် ဆေးပင်များကို ခန္ဓာကိုယ်က တောင့်ခံနိုင်ပါ့မလားဟူသော အချက်ကိုမူ သူ အနည်းငယ်မျှပင် ပူပန်ခြင်း မရှိချေ။ သူ၏ ခန္ဓာကိုယ်ထဲတွင် ဤမျှအထိ များပြားလှသော မိုးကြိုးစွမ်းအင်များ ရှိနေသဖြင့် ထိုဒုတိယအဆင့် ဆေးလုံးများသည် ပြဿနာမရှိဘဲ အလွယ်တကူပင် ကြေညက်သွားမည် ဖြစ်သောကြောင့်ပင်။

ဤကဲ့သို့ ခါးသီးလှသော ကျင့်ကြံခြင်းဖြစ်စဉ်အတွင်း ခြောက်လတာ ကာလသည် မျက်စိတစ်မှိတ်အတွင်း ကုန်လွန်သွားခဲ့လေပြီ။

ရိုးတွင်းခြင်ဆီဆေးကြောခြင်း၊ ကိုယ်တွင်းအင်္ဂါ သန့်စင်ခြင်း၊ သွေးကြောဖွင့်ခြင်းနှင့် အာရုံခံပေါက်ဖွင့်ခြင်းဟူသော အခြေခံ ခြေလှမ်းလေးဆင့်စလုံးမှာ ပြီးဆုံးခဲ့သည်မှာ ကြာပြီ ဖြစ်၏။

ယခုအခါ သူ၏ ခန္ဓာကိုယ်ထဲရှိ အာရုံခံပေါက် ၇၂၀ စလုံးသည် ကောင်းကင်ယံမှ ကြယ်ပွင့်များကဲ့သို့ တောက်ပလင်းလက်နေကြပြီ ဖြစ်သည်။ ၎င်းတို့အတွင်း၌ ငွေဖြူရောင် အလင်းတန်းများ လင်းလက်နေကြပြီး ၎င်းတို့မှာ မိုးကြိုးစွမ်းအင်များ၏ ကျန်ရှိနေသော အကြွင်းအကျန် အာနိသင်များ ဖြစ်ကြ၏။ ထို့အပြင် လော့ချန်သည် သွေးကူးပြောင်းခြင်း ဖြစ်စဉ်ကိုလည်း အပြည့်အဝ ဖြတ်သန်းခဲ့ပြီး ဖြစ်သည်။ သူ၏ သွေးဟောင်းများ အားလုံးမှာ အသစ်တစ်ဖန် သွန်းလုပ်ထားသော သွေးသစ်များအဖြစ်သို့ လုံးဝ ပြောင်းလဲသွားခဲ့ပြီ ဖြစ်၏။

ပို၍ပင် အံ့သြစရာကောင်းသည်မှာ သူ၏ ကျောရိုးဆစ် အစိတ်အပိုင်းတစ်ခုသည် ယခုအခါတွင် ငွေဖြူရောင် အလင်းတန်းများ လင်းလက်နေပြီး ခွေလျက်အိပ်ပျော်နေသော နဂါးကြီးတစ်ကောင် နိုးထလာသကဲ့သို့ တုန်ခါနေခြင်းပင်။ ဤသည်မှာ အရိုးသွန်းလုပ်ခြင်းပင် ဖြစ်ပေသည်။ သူသည် တစ်ကိုယ်လုံးရှိ အရိုးစုကို အပြည့်အဝ ပြန်လည် မသွန်းလုပ်နိုင်သေးသဖြင့် အရေးကြီးဆုံး အစိတ်အပိုင်းဖြစ်သော ကျောရိုးဆစ်မှ စတင်ရန် ရွေးချယ်ခဲ့ခြင်း ဖြစ်၏။ လော့ချန်တွင် ပြင်းထန်သော ခံစားချက်တစ်ခု ရှိနေသည်။ ဤမပြည့်စုံသေးသော ပြောင်းလဲမှုဖြင့်ပင် သူ၏ တိုက်ခိုက်နိုင်စွမ်းသည် ကောင်းကင်သို့ ထိုးတက်သွားလိမ့်မည် ဖြစ်ကြောင်းပင်။ ၎င်းမှာ မိုးကြိုးအရိုးဆစ်ပင် ဖြစ်ပေသည်။ ခွေလျက်အိပ်ပျော်နေသော နဂါးတစ်ကောင်သည် ယခုအခါ သူ၏ ခန္ဓာကိုယ်ထဲ၌ ကိန်းအောင်းနေပြီဖြစ်ရာ ၎င်း နိုးထလှုပ်ရှားလာသည့်အခါ တစ်လောကလုံး တုန်ဟီးသွားပေလိမ့်မည်။

"အခြေတည်ကျင့်ကြံသူတွေရဲ့ သိုလှောင်အိတ် ၃၀ ကျော်က ရတဲ့ အရင်းအမြစ်တွေက ငါ့ကို ဒီအခြေအနေအထိ ရောက်အောင် ပို့ဆောင်ပေးခဲ့တာပဲ.... ဒါက တကယ့်ကို အံ့မခန်းဖွယ် အောင်မြင်မှုတစ်ခုလို့ ပြောရမယ်.... ဒါပေမဲ့ ငါ ရပ်တန့်လို့မဖြစ်ဘူး"

၎င်းမှာ သိုလှောင်အိတ် ၃၀ မျှသာဟု ထင်ရသော်လည်း ထိုအိတ်တစ်ခုချင်းစီမှာ နှစ်ပေါင်းများစွာ အဖိုးတန် အရင်းအမြစ်များကို စုဆောင်းထားခဲ့ကြသော အဆင့်မြင့် ကျင့်ကြံသူများ၏ ပိုင်ဆိုင်မှုများ ဖြစ်ကြပေသည်။ ၎င်းတို့ထဲတွင် ဤစစ်ပွဲအတွင်း၌ ဝယ်ယူထားသော သို့မဟုတ် ဂုဏ်ထူးဆောင်အမှတ်များနှင့် လဲလှယ်ထားသော ရတနာအမြောက်အမြား ပါရှိနေ၏။ အခြေတည်ဆေးလုံး သက်သက်ပင် တစ်ဒါဇင်ကျော်မျှ ရှိနေခဲ့သည်။

လော့ချန်၏ မျက်လုံးများထဲတွင် မိုးကြိုးလျှပ်စီး နှစ်စင်း ပေါက်ဖွားလာသကဲ့သို့ အလင်းတန်းများ ဝင်းလက်သွားခဲ့၏။ ယခုအချိန်တွင် သူသည် သူ၏ ခန္ဓာကိုယ်ထဲရှိ လွှမ်းမိုးနေသော မိုးကြိုးစွမ်းအင်များကို အပြည့်အဝ ပြုပြင် သန့်စင်ပြီးသား ဖြစ်ပေသည်

ခန်းမကျယ်ကြီးတစ်ခုလုံးအတွင်း တဖိတ်ဖိတ် တောက်လောင်နေသော မိုးကြိုးလျှပ်စီးများသည် ယခုအခါ ပြင်ပကမ္ဘာမှ စီးဝင်လာကြခြင်း ဖြစ်၏။

သူ ဆေးပုလင်း အနည်းငယ်ကို တစ်ပြိုင်နက် လှမ်းယူလိုက်ပြီး အတွင်းရှိ ကျန်ရှိနေသော ဆေးလုံးအားလုံးကို မော့သောက်လိုက်တော့သည်။ ထို့နောက် သက်ပြင်းအရှည်ကြီး တစ်ချက်ကို ချလိုက်၏။ ၎င်းမှာ သူ၏ ခန္ဓာကိုယ်ထဲတွင် ဟာလာဟင်းလင်းဖြစ်သွားသော စကြာဝဠာကြီးတစ်ခု ပွင့်လာသကဲ့သကဲ့သို့ပင် ဖြစ်၏။ ပတ်ဝန်းကျင် မိုင်အနည်းငယ်အတွင်းရှိ ချီစွမ်းအင်များသည် သူ၏ ခန္ဓာကိုယ်အတွင်းသို့ အလုံးအရင်းဖြင့် စီးဝင်လာကြတော့သည်။

ရောင်စုံ ချီနဂါးတစ်ကောင်သည် လေထုထဲတွင် ဝဲပျံကာ သူ၏ ခန္ဓာကိုယ်အတွင်းသို့ တိုးဝင်သွားခဲ့၏။ ဤသည်မှာ လိပ်နတ်ဘုရားချပ်ဝတ်တန်ဆာမှ ဆင်းသက်လာသော အတတ်ဖြစ်ပြီး ယခုအခါ ချီစွမ်းအင် စုပ်ယူခြင်း ခန္ဓာကိုယ်ကြံ့ခိုင်မှုကျင့်စဉ် အဖြစ်သို့ တိုးတက်ပြောင်းလဲသွားခဲ့ပြီ ဖြစ်ပေသည်။ ထိုချီနဂါး သူ၏ ခန္ဓာကိုယ်ထဲသို့ ဝင်ရောက်သွားသည့်အခါ လော့ချန် မျက်လုံးများကို ထပ်မံ ပိတ်လိုက်ပြန်သည်။

အံ့အားသင့်ဖွယ်ရာ အရာတစ်ခု ဖြစ်ပျက်လာခဲ့၏။ သူ၏ ဗလာဖြစ်နေသော အရေပြားထက်တွင် ဖြူစင်ဝင်းပသော ချပ်ဝတ်တန်ဆာ အချပ်အလွှာများသည် တဖြည်းဖြည်း စတင် ပုံပေါ်လာခဲ့ရသည်။ ၎င်းတို့သည် လိပ်နတ်ဘုရားချပ်ဝတ်တန်ဆာအတတ်မှ ဆင့်ခေါ်ထားသော ချပ်ဝတ်တန်ဆာနှင့် အလွန်ပင် ဆင်တူလှသော်လည်း သေသေချာချာ စစ်ဆေးကြည့်သည့်အခါ၌မူ ၎င်းတို့သည် အခြားအရာတစ်ခု ဖြစ်နေသည်ကို တွေ့ရှိရပေလိမ့်မည်။ ထိုဖြူစင်သော အချပ်အလွှာများသည် လိပ်ခွံပုံသဏ္ဌာန်နှင့်လည်း ဆင်တူသလို နဂါးအကြေးခွံများနှင့်လည်း တူညီနေကြပေသည်။ ၎င်းမှာ သံမဏိချပ်ဝတ်တန်ဆာကို ဝတ်ဆင်ထားသော သာမန်လူသား ခန္ဓာကိုယ်နှင့် လုံးဝ မတူဘဲ သားရဲကဲ့သို့၊ မိစ္ဆာကဲ့သို့သော ပုံသဏ္ဌာန်မျိုး ဖြစ်နေခဲ့သည်။

ဤကျင့်စဉ်နှင့် ပက်သက်၍ နှစ်ပေါင်းများစွာ လွဲမှားသော ကြိုးစားအားထုတ်မှုများကြောင့် ရှုပ်ထွေးပွေလီလှသော အခြေခံအုတ်မြစ်တစ်ခု ဖြစ်ပေါ်ခဲ့ရဖူးသည်။ သို့သော် ယခုအခါတွင်မူ စနစ်၏ အကူအညီဖြင့် ထိုအရာအားလုံးကို အပြည့်အဝ ပေါင်းစပ်နိုင်ခဲ့ပြီဖြစ်ရာ သူသည် နောက်ဆုံးတွင် သူကိုယ်တိုင်နှင့်သာ သက်ဆိုင်သော ခန္ဓာကိုယ်ကြံ့ခိုင်မှု လမ်းကြောင်းပေါ်သို့ အောင်မြင်စွာ ခြေချနိုင်ခဲ့ပြီ ဖြစ်ပေသည်။ သူ နိုးထလာမည့်အချိန်တွင် သူ၏ ခန္ဓာကိုယ် မည်မျှအထိ အစွမ်းထက်လာမည်ကို ခန့်မှန်းရန်ပင် ခက်ခဲလှပေတော့သည်။

ဆိတ်ငြိမ်လှသော မြေအောက်နန်းတော်ကျယ်ကြီးအတွင်း၌ လူတစ်ယောက်သည် အိပ်ပျော်နေသော လိပ်ကြီးတစ်ကောင်ကဲ့သို့ လှုပ်ရှားမှုမရှိဘဲ ငြိမ်သက်စွာ လဲလျောင်းနေလျက် ရှိ၏။ သူသည် အသက်ရှူခြင်း မရှိသလို အနည်းငယ်မျှပင် လှုပ်ရှားခြင်းလည်း မရှိချေ။ ရံဖန်ရံခါတွင် ငွေဖြူရောင် မိုးကြိုးလျှပ်စီးများသည် ပြင်ပကမ္ဘာမှ စီးဝင်လာကြပြီး ဆိတ်ငြိမ်မှုအားလုံးကို ဖျက်ဆီးပစ်တတ်ကြသော်လည်း ထိုအရာအားလုံးသည် သူ့အား အိပ်ပျော်နေရာမှ နိုးထအောင် ဘယ်သောအခါမျှ စွမ်းဆောင်နိုင်ခြင်း မရှိကြပေ။

လော့ချန်နှင့် သူ၏စွန့်စားခန်းများ