အခန်း ၅၂၂

Vol. 53 Ch. 522

အခန်း (၅၂၂) ခရစ်စတယ် စွမ်းအင်တုံးကို စုပ်ယူနိုင်ခြင်း

"ကျွန်တော်တို့... ခရစ်စတယ် စွမ်းအင်တုံးကို လူသားတွေ ဘေးကင်းစွာ အသုံးပြုနိုင်မယ့် နည်းလမ်းတစ်ခုကို ရှာတွေ့သွားပြီ...." ဒု-ညွှန်ကြားရေးမှူးချုပ်ကျိုးက ဖိနှိပ်ထားရသော စိတ်လှုပ်ရှားမှုများဖြင့် ဗုံးတစ်လုံး ဖောက်ချလိုက်သည်။

"ဘာဗျ..." ကျန်းယဲ့၏ မျက်လုံးများ ရုတ်တရက် ပြူးကျယ်သွားပြီး သူ၏ မျက်နှာပေါ်တွင် မယုံကြည်နိုင်မှုများဖြင့် ပြည့်နှက်သွား၏။ "ကျွန်တော်တို့ ကမ္ဘာက လူတွေက... ခရစ်စတယ် စွမ်းအင်တုံးတွေကို တိုက်ရိုက် အသုံးပြုလို့ ရပြီပေါ့..."

ဤအချက်ကြောင့် သူ အံ့အားသင့်သွားရုံမှလွဲ၍ အခြား ရွေးချယ်စရာ မရှိတော့ချေ။

ဇွန်ဘီကမ္ဘာတွင် လူသားတို့က ကမ္ဘာလုံးဆိုင်ရာ ဗိုင်းရပ်စ် ကူးစက်ခံရမှုကြီးကို ကြုံတွေ့ခဲ့ရပြီး အသက်ရှင်ကျန်ရစ်သူ အနည်းငယ်သာလျှင် စွမ်းအားရှင်များအဖြစ် ကံကောင်းစွာ နိုးထလာခဲ့ကြကာ ခရစ်စတယ် စွမ်းအင်တုံး၏ စွမ်းအင်ကို စုပ်ယူနိုင်စွမ်း ရှိလာခဲ့ကြခြင်း ဖြစ်သည်။

သို့သော် ကမ္ဘာမြေပေါ်တွင် ဗိုင်းရပ်စ်ကူးစက်မှုလည်း မရှိခဲ့သလို စွမ်းအားရှင်ဆိုသည့်သူများလည်း မရှိဘဲနဲ့ ဤကြီးမားလှသော ကွာဟချက်ကြီးကို ဘယ်လိုများ ပေါင်းကူးနိုင်ခဲ့ပါသနည်း။

ဒု-ညွှန်ကြားရေးမှူးချုပ်ကျိုးက ကျန်းယဲ့၏ တုန့်ပြန်မှုကို အလွန်သဘောကျနေခဲ့သည်။ အဘယ်ကြောင့်ဆိုသော် သူကလည်း ဤသတင်းကို ပထမဆုံး ကြားရစဉ်ကလည်း ထိုအတိုင်းပင် အံ့အားသင့်ခဲ့ရသောကြောင့်ပင်။

သူက ဘေးသို့ ဖယ်ပေးလိုက်ပြီး အရှေ့တွင် ရပ်နေသော ဆံပင်ဖြူနေပြီဖြစ်သော်လည်း တက်ကြွနေသေးသည့် သုတေသီတစ်ဦးအတွက် နေရာဖယ်ပေးလိုက်လေသည်။ "လောင်ကျန်း... ခင်ဗျားတို့ရဲ့ အောင်မြင်မှု လုပ်ငန်းစဉ်အကြောင်း ရဲဘော်ကျန်းယဲ့ကို အသေးစိတ် ရှင်းပြပေးလိုက်ပါဦး...."

သုတေသီ ကျန်းဖူက မျက်မှန်ကို ချိန်ညှိလိုက်ပြီး စနစ်တကျ စတင်ရှင်းပြလိုက်သည်။

"ဒါရိုက်တာကျန်း... ကျွန်တော်တို့ အစပိုင်းမှာ ခရစ်စတယ် စွမ်းအင်တုံးကနေ တည်ငြိမ်တဲ့ စွမ်းအင်ကို အောင်မြင်စွာ ထုတ်ယူနိုင်ခဲ့ပေမဲ့ အဲ့တာကို လူ့ခန္ဓာကိုယ် ဒါမှမဟုတ် တခြားနယ်ပယ်တွေမှာ ထိရောက်စွာ အသုံးချနိုင်ခြင်း မရှိခဲ့ပါဘူး..."

"ဇွန်ဘီကမ္ဘာမှာ ခရစ်စတယ်စွမ်းအင်တုံးရဲ့ အနှစ်သာရက အချို့သော ဒဏ္ဍာရီတွေထဲက ဝိညာဉ်ကျောက်တုံးတွေနဲ့ ဆင်တူပြီး စွမ်းအားရှင်တွေက ကျင့်ကြံဖို့အတွက် စုပ်ယူအသုံးပြုကြတယ်ဆိုတဲ့ ကောက်ချက်တစ်ခုကို ကျွန်တော်တို့ ရရှိခဲ့ပါတယ်..."

"ဒါကြောင့် လူ့ခန္ဓာကိုယ်ကို ခရစ်စတယ် စွမ်းအင်တုံးရဲ့ စွမ်းအင်တွေကို တိုက်ရိုက်စုပ်ယူခိုင်းကြည့်ဖို့ ကျွန်တော်တို့ အကြံရခဲ့ပါတယ်။ သေချာတာပေါ့... အစောပိုင်း အဆင့်မှာတော့ လူသားတွေနဲ့ စမ်းသပ်ဖို့ လုံးဝ မရဲခဲ့ပါဘူး။ ကြွက်တွေကို နမူနာအနေနဲ့ အသုံးပြုခဲ့တာပါ။ ဒါပေမဲ့ ချွင်းချက်မရှိ အကုန်လုံး ကျရှုံးခဲ့ပါတယ်..."

"ခရစ်စတယ် စွမ်းအင်တုံးထဲမှာ ပါဝင်နေတဲ့ စွမ်းအင်က အလွန်အမင်းကြီးမားပြီး ကြမ်းတမ်းလွန်းပါတယ်။ ကြွက်တွေရဲ့ခန္ဓာကိုယ်က အဲဒါကို လုံးဝ မခံနိုင်ဘဲ ချက်ချင်းကို ပြိုကျပျက်စီးသွားတာပါ..." ကျန်းဖူ၏ စကားလုံးများတွင် ထိုအချိန်က သူ ခံစားခဲ့ရသော ကူကယ်ရာမဲ့မှုများ ပြည့်နှက်နေ၏။

"သုတေသနက တစ်ချိန်တုန်းက ရပ်တန့်နေခဲ့ပါတယ်။ စွမ်းအင်ကို အရှိန်လျှော့ချဖို့နဲ့ ပြင်းအားလျှော့ချဖို့ နည်းလမ်းအမျိုးမျိုးကို ကျွန်တော်တို့ ကြိုးစားကြည့်ခဲ့ပေမဲ့ ရလဒ်တွေက မျှော်လင့်ထားသလို ဖြစ်မလာခဲ့ပါဘူး..."

"ဒါပေမဲ့ အလှည့်အပြောင်းက ရှေးဟောင်း သိုင်းပညာ သုတေသန အင်စတီကျုနဲ့ ပူးတွဲကျင်းပတဲ့ ဆွေးနွေးပွဲတစ်ခုမှာ ပေါ်လာခဲ့တာပါ..." ကျန်းဖူက အကြောင်းအရာကို ပြောင်းလိုက်ပြီး သူ၏ မျက်ဝန်းများတွင် ဉာဏ်ပညာအလင်းများ တောက်ပနေခဲ့သည်။ "သူတို့က ရှေးဟောင်းစာအုပ်စာတမ်းတွေကို လေ့လာမှုနဲ့ လူသားတွေရဲ့ လျှို့ဝှက်စွမ်းရည် ဖွံ့ဖြိုးတိုးတက်မှု အပိုင်းမှာ တိုးတက်မှုအသစ်တွေ ရရှိခဲ့ပါတယ်..."

"ကျွန်တော်တို့ အဖွဲ့ထဲက တစ်ယောက်က ရဲရင့်တဲ့ ယူဆချက်တစ်ခုကို အဆိုပြုခဲ့ပါတယ်။ ကမ္ဘာ့အဆင့်အတန်းအရဆိုရင် ကျင့်ကြံခြင်းယဉ်ကျေးမှုက ဇွန်ဘီယဉ်ကျေးမှု ထက် သေချာပေါက် သာလွန်ပါတယ်။ ဇွန်ဘီယဉ်ကျေးမှုနဲ့ ကျွန်တော်တို့ရဲ့ ရှေးဟောင်း သိုင်းပညာ ယဉ်ကျေးမှုကတော့ အဆင့်တူလောက်မှာ ရှိနိုင်ပါတယ်..."

"ဒါဆို... ခရစ်စတယ်စွမ်းအင်တုံးရဲ့ စွမ်းအင်ရင်းမြစ်ကို ကျင့်ကြံနေတဲ့ သိုင်းပညာရှင်တွေက အသုံးချလို့ မရနိုင်ဘူးလား...."

"ဒီအကြံအစည်က ဖြစ်နိုင်ခြေနည်းတယ်လို့ ထင်ရပေမဲ့ သိပ္ပံနည်းကျ သုတေသနဆိုတာ ရဲရင့်တဲ့ ယူဆချက်တွေနဲ့ သေချာတဲ့ စစ်ဆေးအတည်ပြုမှုတွေ လိုအပ်ပါတယ်..."

"ဒါကြောင့် ကျွန်တော်တို့က ရှေးဟောင်းသိုင်းပညာ သုတေသန အင်စတီကျုနဲ့ ချက်ချင်း ပူးပေါင်းလိုက်ပြီး ကျွန်တော်တို့ရဲ့ အထူးစက်ကိရိယာတွေနဲ့ ပြုပြင်ထားလို့ အတော်လေးပျော့ပျောင်းတဲ့ စွမ်းအင်ထုတ်လွှတ်မှု ဖြစ်သွားပြီဖြစ်တဲ့ ခရစ်စတယ်စွမ်းအင်တုံးကို အဆင့်မြင့် အတွင်းအားရှိတဲ့ သိုင်းပညာရှင်အချို့ကို စမ်းသပ်စုပ်ယူကြည့်ဖို့ ဖိတ်ခေါ်ခဲ့ပါတယ်..."

"ရလဒ်ကတော့ အရမ်းကို စိတ်လှုပ်ရှားဖို့ ကောင်းပါတယ်..." ကျန်းဖူ၏ အသံက အနည်းငယ် ပိုကျယ်လာခဲ့သည်။ "သူတို့ အောင်မြင်ခဲ့တယ်... ကျင့်ကြံနေတဲ့ သိုင်းပညာရှင်တွေက သူတို့ရဲ့ ချီသွေးကြောတွေနဲ့ အတွင်းအားတွေကို သန်စွမ်းလာစေဖို့အတွက် ခရစ်စတယ် စွမ်းအင်တုံးထဲက စွမ်းအင်တွေကို အမှန်တကယ် စုပ်ယူပြီး အသွင်ပြောင်းနိုင်ခဲ့ကြတယ်.."

"ဒါပေမဲ့ ကန့်သတ်ချက်တွေတော့ ရှိပါတယ်.." ဟု သူက ထပ်ပေါင်းပြောလိုက်၏။ "ရှေးဟောင်း သိုင်းပညာရှင်တွေဟာ ဇွန်ဘီကမ္ဘာက စွမ်းအားရှင်တွေလို ခရစ်စတယ် စွမ်းအင်တုံးတွေကို တိုက်ရိုက် စုပ်ယူလို့ မရပါဘူး။ သူတို့က ခရစ်စတယ်စွမ်းအင်တုံးတွေရဲ့ စွမ်းအင်ကို ယဉ်ပါးသွားအောင်လုပ်ဖို့နဲ့ လမ်းညွှန်ပေးဖို့အတွက် ကျွန်တော်တို့ရဲ့ စက်ကိရိယာတွေကို ကြားခံအဖြစ် အားကိုးရပါတယ်။ အဲဒီလိုလုပ်ပြီးမှသာ သူတို့ ဘေးကင်းစွာ စုပ်ယူနိုင်တာပါ..."

"နောက်ပိုင်း လေ့လာတွေ့ရှိချက်တွေအရ မတူညီတဲ့ ပါရမီရှိတဲ့ ရှေးဟောင်း သိုင်းပညာရှင်တွေဟာ ခရစ်စတယ် စွမ်းအင်တုံးကို စုပ်ယူနိုင်စွမ်းနဲ့ အသွင်ပြောင်းနိုင်စွမ်းမှာ သိသိသာသာ ကွာခြားမှုတွေ ရှိတာကိုလည်း တွေ့ရှိရပါတယ်..."

"ဒါဟာ သူတို့ရဲ့ တစ်ဦးချင်း ပါရမီနဲ့ရော သူတို့ရဲ့ ကျင့်စဉ်အရည်အသွေးနဲ့ပါ သက်ဆိုင်နေတယ်လို့ ကျွန်တော်တို့ ခန့်မှန်းထားပါတယ်..."

"တိကျတဲ့ လွှမ်းမိုးမှုအကြောင်းရင်းတွေနဲ့ အကောင်းဆုံးဖြစ်အောင် ပြုပြင်နိုင်မယ့် နည်းလမ်းတွေအတွက်တော့ ပိုမိုသိပ္ပံနည်းကျတဲ့ ကောက်ချက်တွေ ဆွဲနိုင်ဖို့ မတူညီတဲ့ ဂိုဏ်းတွေနဲ့ အဆင့်တွေက ရှေးဟောင်းသိုင်းပညာရှင်တွေကို ထပ်မံခေါ်ယူပြီး စမ်းသပ်ဖို့ လိုအပ်နေပါသေးတယ်..."

ကျန်းဖူ၏ အသေးစိတ် ရှင်းပြချက်ကို နားထောင်ပြီးနောက် ကျန်းယဲ့က ချီးကျူးလေးစားမှုမှလွဲ၍ အခြားမည်သည်ကိုမျှ မခံစားခဲ့ရချေ။

ဤကဲ့သို့ ရှုပ်ထွေးပြီး အန္တရာယ်များသော အခြားကမ္ဘာတစ်ခုမှ စွမ်းအင်အသုံးချမှု သုတေသနက ဤမျှ တိုတောင်းသော အချိန်အတွင်း အရေးကြီးသော အောင်မြင်မှုတစ်ခု ရရှိခဲ့ခြင်းမှာ သုတေသီများ၏ နေ့ရောညပါ မမောမပန်း စူးစမ်းလေ့လာမှုများနှင့် နိုင်ငံတော်၏ အားကောင်းသော သယံဇာတ ပေါင်းစပ်နိုင်စွမ်းတို့ကြောင့်သာ ဖြစ်ကြောင်း ရှင်းလင်းလှသည်။

ဤကဲ့သို့သော အခြေခံကျပြီး ကြီးမားသည့် သိပ္ပံနည်းကျ သုတေသနပရောဂျက်ကြီးများတွင် လူတစ်ဦးတစ်ယောက်၏ စွမ်းအားက ကန့်သတ်ချက်ရှိပြီး နိုင်ငံတော်၏ ခေတ်မီဆန်းပြားသော စက်ယန္တရားကြီးကို အားကိုးမှသာ ထိရောက်စွာ တိုးတက်မှု ရရှိနိုင်မည်ဖြစ်ကြောင်း သူ နောက်တစ်ကြိမ် နက်ရှိုင်းစွာ သဘောပေါက်သွားရသည်။

သူ၏ စကားကို အဆုံးသတ်ပြီးနောက် သုတေသီ ကျန်းဖူသည် ကျန်းယဲ့ကို မျှော်လင့်ချက်များ ပြည့်နှက်နေသော အကြည့်များဖြင့် ကြည့်ကာ ပြောလိုက်၏။ "ဒါရိုက်တာကျန်း... နောက်ထပ် နက်နက်ရှိုင်းရှိုင်း သုတေသနတွေ လုပ်ဖို့အတွက် ကျွန်တော်တို့ ခင်ဗျားအပေါ် အများကြီး အားကိုးရလိမ့်မယ်..."

"အကယ်၍ ကျွန်တော်တို့သာ အင်မော်တယ်ရာချီမြို့ကနေ မတူညီတဲ့ အဆင့်တွေရှိတဲ့ ရှေးဟောင်းသိုင်းပညာ ကျင့်စဉ်တွေကို ပိုပြီး ရရှိနိုင်မယ်ဆိုရင်.... ပြီးတော့ ဇွန်ဘီကမ္ဘာကနေ ခရစ်စတယ် စွမ်းအင်တုံး အများအပြားကို ရရှိနိုင်မယ်ဆိုရင်..."

"ကျွန်တော်တို့ သုတေသန အင်စတီကျုရဲ့ စွမ်းဆောင်ရည်နဲ့ဆိုရင် မကြာခင်မှာ ဒီပရောဂျက်ကို အပြည့်အဝ နားလည်နိုင်လိမ့်မယ်လို့ ကျွန်တော် ယုံကြည်ပါတယ်။ ပြီးတော့ ကျွန်တော်တို့ ကမ္ဘာမြေပေါ်က လူသားတွေနဲ့ သင့်တော်တဲ့ လုံးဝအသစ်ဖြစ်တဲ့ စွမ်းအင်မြှင့်တင်ရေး လမ်းကြောင်းတစ်ခုကိုတောင် ဖန်တီးနိုင်လိမ့်မယ်လို့ ယုံကြည်ပါတယ်..."

ပတ်ဝန်းကျင်ရှိ အခြားသုတေသီများကလည်း တူညီသော မျှော်လင့်ချက်များဖြင့် ကြည့်နေကြပြီး သူတို့၏ မျက်လုံးများက မြန်မြန်လေး ပစ္စည်းတွေ သွားရှာပေးပါ... ကျွန်တော်တို့ ထမင်းချက်ဖို့ ဆန်စောင့်နေတယ်ဟု ပြောနေသည့်အလား။

သိပ္ပံနည်းကျ သုတေသန စိတ်အားထက်သန်မှုများဖြင့် ပြည့်နှက်နေသော မျက်လုံးများစွာ၏ ဖိအားပေးမှုကို ခံလိုက်ရသဖြင့် ကျန်းယဲ့သည် ချောင်းဟန့်လိုက်ပြီး "အင်း... ကျွန်တော် အတတ်နိုင်ဆုံး ကြိုးစားပါ့မယ်။ စီစဉ်ပေးနိုင်ဖို့ အတတ်နိုင်ဆုံး ကြိုးစားပါ့မယ်.." ဟု တိုးတိုးလေး ရေရွတ်လိုက်သည်။

သူက အကြောင်းအရာကို လျင်မြန်စွာ ပြောင်းလိုက်ပြီး တောင်းဆိုမှုတစ်ခု ပြုလုပ်လိုက်၏။ "ဒါနဲ့... ခင်ဗျားတို့ရဲ့ စွမ်းအင်အသွင်ပြောင်းတဲ့ စက်ကိရိယာကို ကျွန်တော့် မျက်စိနဲ့တပ်အပ် ကြည့်ပါရစေ။ ပြီးတော့ ခရစ်စတယ်စွမ်းအင်တုံးကို စုပ်ယူနေတဲ့ ရှေးဟောင်းသိုင်းပညာရှင်ရဲ့ တိကျတဲ့ အခြေအနေကိုလည်း ကြည့်ချင်ပါတယ်..."

"ဒီဘက်ကို ကြွပါ..." ကျန်းဖူက ချက်ချင်း တုန့်ပြန်လိုက်ပြီး ကိုယ်တိုင်ကိုယ်ကျ လမ်းပြခေါ်ဆောင်သွားလိုက်သည်။

သူတို့အဖွဲ့က မကြာမီ သိုင်းကွင်းတစ်ခုနှင့် တူသော စမ်းသပ်ဧရိယာတစ်ခုသို့ ရောက်ရှိလာကြ၏။

ကွင်းထဲတွင် ပိန်ပါးသော ရှေးဟောင်းသိုင်းပညာရှင်တစ်ဦးက မျက်လုံးမှိတ်ကာ အာရုံစူးစိုက်နေပြီး စွမ်းအင်ပိုက်လိုင်းများစွာဖြင့် ချိတ်ဆက်ထားသော အထူးသတ္တုစင်မြင့်တစ်ခုပေါ်တွင် သူ၏ လက်များကို တင်ထားချေသည်။ ထိုစင်မြင့်၏ အလယ်ဗဟိုတွင် မှိန်ဖျော့သော အလင်းရောင်ထုတ်လွှတ်နေသည့် ခရစ်စတယ် စွမ်းအင်တုံးတစ်ခုကို မြှုပ်နှံထား၏။

စက်ကိရိယာ လည်ပတ်နေစဉ် မြင်သာသော အပြာနုရောင် စွမ်းအင်စီးကြောင်းတစ်ခုက သိုင်းပညာရှင်၏ ခန္ဓာကိုယ်ထဲသို့ ဖြည်းညှင်းစွာ စီးဝင်သွားခဲ့သည်။

ရုတ်တရက် သိုင်းပညာရှင်က သူ၏ မျက်လုံးများကို ပြူးကျယ်စွာ ဖွင့်လိုက်ပြီး တိုးညှင်းစွာ အော်ဟစ်လိုက်ကာ သူ၏ ညာလက်ကို ရှေ့သို့ လွှဲယမ်းလိုက်လေသည်။

"ရွှစ်..."

ရုတ်တရက်ဆိုသလို အဖြူရောင်အလင်းတန်းများ လင်းလက်နေသော သေးငယ်သည့် လျှပ်စစ်မီးပွားတစ်ခုက သူ၏ လက်ချောင်းထိပ်များမှ မြွေတစ်ကောင်အလား ပစ်ထွက်သွားပြီး လေထဲတွင် အကြိမ်အနည်းငယ် ခုန်ပေါက်သွားကာ တိုးညှင်းသော ပေါက်ကွဲသံလေးတစ်ခု ထွက်ပေါ်လာပြီးနောက် ဖြည်းညှင်းစွာ ပျောက်ကွယ်သွား၏။

'ဘုရားရေ...'

ကျန်းယဲ့မှာ မှင်တက်သွားရသည်။

ဒါက ရှင်းရှင်းလင်းလင်းကို လျှပ်စီးစွမ်းအားပဲ....

အလွန်မှေးမှိန်နေပုံရသော်လည်း ၎င်းက စွမ်းအားရှင်တစ်ဦး၏ စွမ်းအားထုတ်ဖော်မှု အစစ်အမှန်ပင်။

ဤမြင်ကွင်းက ကျန်းယဲ့၏ သိချင်စိတ်ကိုလည်း နှိုးဆွပေးလိုက်သည်။ သူက အမည်မဲ့ ကျင့်စဉ်မှ ရရှိသော ဝိညာဉ်စွမ်းအား နှင့် ခရစ်စတယ်စွမ်းအင်တုံးမှ ထွက်ပေါ်လာသော ဤရှေးဟောင်း သိုင်းပညာ စွမ်းအားတို့တွင် မည်သည်က ပို၍ အစွမ်းထက်သလဲဆိုသည်ကို သိချင်သွား၏။

အတွေးတစ်ခုနှင့်အတူ သူက လေ့ကျင့်ရေးကွင်းထဲသို့ တန်းတန်းမတ်မတ် လျှောက်သွားလိုက်ပြီး လျှပ်စီးစွမ်းအားကို ယခုလေးတင် ပြသခဲ့သော ရှေးဟောင်း သိုင်းပညာရှင်အား ပြောလိုက်သည်။ "အစ်ကို... ကျွန်တော်တို့ စမ်းကြည့်ကြမလား..."

၎င်းကိုမြင်သောအခါ အတွင်းရေးမှူးလီ၏ မျက်နှာအမူအရာမှာ ပြောင်းလဲသွားပြီး သူ့ကို တားဆီးရန် အလျင်စလို ရှေ့သို့ ထွက်လာလိုက်သည်။ "ဒါရိုက်တာကျန်း... ဒါက အရမ်း အန္တရာယ်များတယ်..."

သို့သော် နောက်ဆုံး အန္တရာယ်များတယ်ဆိုသော စကားလုံးကို မပြောရသေးမီမှာပင် သူ၏ လည်ချောင်းတွင် တစ်ဆို့သွားရသည်။

အဘယ်ကြောင့်ဆိုသော် ထိုအခိုက်အတန့်၌... တည်ငြိမ်စွာ တောက်လောင်နေသော သေးငယ်သည့် လိမ္မော်နီရောင်မီးတောက်တစ်ခုက ဆန့်ထုတ်ထားသော ကျန်းယဲ့၏ လက်ဖဝါးထဲတွင် တိတ်ဆိတ်စွာ လွင့်မျောနေခဲ့ချေပြီ။

ပတ်ဝန်းကျင်ရှိ သုတေသီများက အစပိုင်းတွင် မှင်တက်သွားကြပြီး သူတို့၏ မျက်နှာများပေါ်တွင် အံ့အားသင့်မှုများ ပေါ်လာခဲ့သော်လည်း လျှင်မြန်စွာပင် ငါ သိပြီးသားပဲဟူသော အမူအရာများသို့ ပြောင်းလဲသွားကြသည်။

ဘာပဲဖြစ်ဖြစ် ကျန်းယဲ့ဆီမှာ ဖြစ်လာတဲ့ ဘယ်လို အံ့ဖွယ်ရာမဆို ယုတ္တိတန်ပုံရသည် မဟုတ်ပါလော။

အတွင်းရေးအကြောင်းများကို ပိုမို သိရှိထားသော ဒု-ညွှန်ကြားရေးမှူးချုပ်ကျိုးမှာမူ အမှန်တကယ် အံ့အားသင့်သွားခဲ့ပြီး သူ၏ နှလုံးသားထဲတွင် တုန်လှုပ်မှုနှင့် မယုံကြည်နိုင်မှုတို့ဖြင့် ပြည့်နှက်သွားရ၏။

ကျန်းယဲ့တွင် ဝိညာဉ်အမြစ်မရှိသလို ကျင့်စဉ်ကို ကျင့်ကြံရန်အတွက် မှော်ပညာရှင်လည်း မဟုတ်ကြောင်း သူ သိထားလေသည်။

'ဒါပေမဲ့ ဒီမီးထိန်းချုပ်တဲ့ ပညာက ဘယ်လိုလုပ် ဖြစ်လာတာလဲ....'

သို့သော်ငြားလည်း ဒု-ညွှန်ကြားရေးမှူးချုပ်ကျိုးက ထိုအရာကို လျင်မြန်စွာ နားလည်လက်ခံလိုက်လေသည်။

အမှန်ပင်... ကျန်းယဲ့သည် အချိန်ခရီးသွားခြင်းကဲ့သို့သော ကောင်းကင်ဘုံကို ဆန့်ကျင်သည့် နည်းပညာကို ကျွမ်းကျင်ပိုင်နိုင်ထားပြီးဖြစ်ရာ ရုတ်တရက် ကျင့်ကြံနိုင်လာခြင်းကဲ့သို့သော နောက်ထပ် လျှို့ဝှက်ချက် အနည်းငယ် ရှိနေမည်ဆိုလျှင်တောင် အံ့သြစရာ မဟုတ်ချေ။

ကွင်းထဲရှိ စွမ်းအားရှင် ရှေးဟောင်းသိုင်းပညာရှင်သည် ကျန်းယဲ့၏ လက်ဖဝါးထဲမှ မီးတောက်များကို မြင်လိုက်ရသောအခါ မည်သည့် အကြောက်တရားမျှ မပြသခဲ့ဘဲ သူ၏ မျက်ဝန်းများထဲတွင် ပြင်းထန်သော တိုက်ပွဲဝင်လိုစိတ်များသာ လောင်ကျွမ်းလာခဲ့၏။

ထို့နောက် သူက ပြုံးပြလိုက်ပြီး လွယ်ကူစွာ သဘောတူလိုက်သည်။ "ကောင်းပြီ... ကျေးဇူးပြုပြီး လမ်းညွှန်ပေးပါဦး ဒါရိုက်တာကျန်း.."

လေ့ကျင့်ရေးကွင်းထဲရှိ လေထုမှာ ချက်ချင်းပင် တင်းမာသွားပြီး စောင့်မျှော်မှုများဖြင့် ပြည့်နှက်သွားရသည်။

အခန်း ၅၂၂ပြီး၏။