အခန်း ၅၂၇

Vol. 53 Ch. 527

အခန်း (၅၂၇) အင်တာနက် အသုံးပြုသူများ၏ ဒေါသနှင့် ဝမ်းနည်းမှု

"ကျွန်တော် ဘီလူးကြီးများကမ္ဘာကို သွားမယ်" ကာရီယာက ပြောလိုက်သည်။

စကားပြောပြီးနောက် သူတို့နှစ်ဦးမှာ မနေနိုင်ဘဲ တစ်ယောက်ကိုတစ်ယောက် ကြည့်လိုက်ကြ၏။

ကာရီယာ၏ တည်ငြိမ်ပြီး လေးနက်နေသော အပြာနုရောင် မျက်လုံးများကို ကြည့်ရင်း ကျန်းဟွိုင်မင်က ခေတ္တမျှ စဉ်းစားလိုက်ပြီးနောက် သူ၏ မျက်နှာပေါ်တွင် နားလည်မှုရှိသော အပြုံးတစ်ခု ပေါ်လာခဲ့သည်။

သူက လွယ်ကူစွာပင် သဘောတူလိုက်သည်။ "ကာရီယာက သွားချင်တယ်ဆိုရင်တော့... ဘီလူးကြီးများကမ္ဘာက မင်းအတွက်ပဲ..."

ကာရီယာက အနည်းငယ် ဦးညွှတ်လိုက်ပြီး ကျက်သရေရှိစွာ ပြန်လည်ဖြေကြားလိုက်၏။ "ခင်ဗျားရဲ့ သဘောထားကြီးမှုအတွက် ကျေးဇူးတင်ပါတယ် မစ္စတာကျန်း..."

ဘီလူးကြီးများကမ္ဘာအပေါ် သူ၏ ရွေးချယ်မှုမှာ စိတ်လိုက်မာန်ပါ ရွေးချယ်လိုက်ခြင်း မဟုတ်ဘဲ သေချာစွာ စဉ်းစားပြီးမှ ရွေးချယ်လိုက်ခြင်း ဖြစ်သည်။

အဆိုပါ လောကတွင် ကြီးမားသော အတိုင်းအတာဖြင့် ဖွံ့ဖြိုးတိုးတက်စေနိုင်ပြီး အသုံးချနိုင်သည့် အထူးသယံဇာတများကို ရှာမတွေ့သေးချေ။ ထို့ကြောင့် ၎င်းက အာရုံစိုက်ခံရမှု အတော်လေး နည်းပါးပြီး အကျိုးစီးပွားဆိုင်ရာ ပါဝင်ပတ်သက်မှုများလည်း နည်းပါးသည်။

ကျင့်ကြံခြင်းကမ္ဘာနှင့် ကြယ်တာရာကမ္ဘာတို့တွင်မူ ကြီးမားသော တန်ဖိုးများနှင့် ပိုမို နက်ရှိုင်းသော အကျိုးကျေးဇူးများ ပါဝင်နေကြောင်း ရှင်းလင်းလှသည်။

ကာရီယာက သူ၏ အထောက်အထားကို ကောင်းစွာ သတိပြုမိထား၏။

လက်ရှိတွင် သူသည် တရုတ်နိုင်ငံသား မဟုတ်သော တစ်ဦးတည်းသော ခရီးသွားလမ်းညွှန် ဖြစ်သည်။ ထို့ကြောင့် သူ့အနေဖြင့် အလွန်အမင်းထင်ရှားပေါ်လွင်စွာဖြင့် သယံဇာတ အကြွယ်ဝဆုံးသော နေရာများကို ယူထားခြင်းက ပညာရှိရာ မရောက်သလို... မလိုအပ်သော ပြဿနာများကိုပင် ဖိတ်ခေါ်သလို ဖြစ်သွားနိုင်ချေသည်။

သမိုင်းဝင် အချိန်ကာလများအတွက် ပြောရလျှင် နိုင်ငံခြားသားတစ်ဦးဖြစ်သည့် သူ့အနေဖြင့် တရုတ်နိုင်ငံ၏ ကျယ်ပြန့်လှသော သမိုင်းကြောင်းအပေါ် နားလည်သဘောပေါက်မှုက သူ၏ တရုတ်လူမျိုး လုပ်ဖော်ကိုင်ဖက်များလောက် နက်ရှိုင်းမှုမရှိသည်မှာ သဘာဝကျပြီး အဖွဲ့ကို ဦးဆောင်ရမည့်နေရာတွင် သူ၏ အားနည်းချက်တစ်ခု ဖြစ်နေပေသည်။

တရုတ်နိုင်ငံ၏ နှစ်ထောင်ပေါင်းများစွာ ကြာမြင့်သော သမိုင်းတစ်လျှောက်... အထူးသဖြင့် ထန်မင်းဆက် ရွှေခေတ်ကာလများတွင် နိုင်ငံခြားသားများ သို့မဟုတ် နိုင်ငံခြား ကုန်သည်များဟု သတ်မှတ်ခံရသည့် သူတို့ကဲ့သို့ လူများ၏ အဆင့်အတန်းကို သူ ကောင်းစွာ သိရှိထား၏။

ထို့ကြောင့် သူက သူ့ကိုယ်သူ အလွန်အမင်း သတိပြုမိထားပြီး သမိုင်းဝင်နှင့် ယဉ်ကျေးမှုဆိုင်ရာ လမ်းကြောင်းများကို ရွေးချယ်မည် မဟုတ်ချေ။

ဒုတိယနှင့် တတိယအဆင့် ယဉ်ကျေးမှုများအကြားတွင် သူ၏ လက်ရှိအခြေအနေနှင့် အသင့်တော်ဆုံးမှာ ဒုတိယအဆင့် ဖြစ်ကြောင်း ရှင်းလင်းလှသည်။

အင်မော်တယ်ရာချီမြို့တော်နှင့် ဇွန်ဘီကမ္ဘာတို့ကို အခြားသူများက ရွေးချယ်သွားပြီးဖြစ်ရာ ဘီလူးကြီးများကမ္ဘာမှာ သူ၏ အသင့်တော်ဆုံးသော ရွေးချယ်စရာ ဖြစ်လာခဲ့ရသည်။

ကျန်းဟွိုင်မင်က ဤအချက်ကို ချက်ချင်းပင် နားလည်သဘောပေါက်သွားခဲ့ပြီး ထို့ကြောင့်ပင် သူက ဦးဆောင်၍ နောက်ဆုတ်ပေးလိုက်ခြင်း ဖြစ်သည်။

၎င်းက လူမှုဆက်ဆံရေးကိစ္စတစ်ခု ဖြစ်သလို အဖွဲ့လိုက် အလုပ်လုပ်ခြင်းကိစ္စလည်း ဖြစ်ချေသည်။

ယခုအခါ ကျန်းဟွိုင်မင်နှင့် ကောရွှိုက်နှစ်ဦးသာ ကျန်ရှိတော့ပြီး ရွှမ်ဝူတိုက်ကြီးနှင့် ကြယ်တာရာကမ္ဘာ ဟူသော နောက်ဆုံး လောကနှစ်ခုသာ ကျန်ရှိတော့၏။

ကျန်းဟွိုင်မင်က ကောရွှိုက်ကို ကြည့်ကာ ပြုံးလျက် မေးလိုက်သည်။ "ရှောင်ရွှိုက်... ကျန်တဲ့ နှစ်ခုထဲက မင်း ဘယ်ဟာကို သွားချင်လဲ...."

ကောရွှိုက်က ရယ်မောလိုက်ပြီး ပြောလိုက်၏။ "ကျွန်တော် ရွှမ်ဝူတိုက်ကြီးကို ရွေးတယ်... ကျင့်ကြံခြင်းယဉ်ကျေးမှုလေ... တွေးကြည့်ရုံနဲ့တင် စိတ်လှုပ်ရှားဖို့ ကောင်းနေပြီဗျ..."

အင်မော်တယ်ဖြစ်ဖို့ ကျင့်ကြံနိုင်ပြီး ဓားပျံစီးနိုင်သော ထိုကမ္ဘာကို သူ တောင့်တနေခဲ့သည်မှာ ကြာပြီ ဖြစ်သည်။

ကျန်းဟွိုင်မင်က နားလည်စွာဖြင့် ခေါင်းညိတ်လိုက်ပြီး လွယ်ကူစွာပင် သဘောတူလိုက်သည်။ "ကောင်းပြီ... ဒါဆို ကြယ်တာရာကမ္ဘာကို ငါ တာဝန်ယူလိုက်မယ်..."

လူတိုင်း သူတို့၏ ရွေးချယ်မှုများ ပြုလုပ်ပြီးသွားသည်ကို မြင်သောအခါ ကျန်းယဲ့က ဝေ့ကြည့်လိုက်ပြီး နောက်တစ်ကြိမ် အတည်ပြုလိုက်၏။ "အားလုံး ဆုံးဖြတ်ပြီးပြီလား။ တစ်ခါ ဆုံးဖြတ်ပြီးရင် ပြင်လို့ မရတော့ဘူးနော်...."

လူတိုင်း၏ အမူအရာများမှာ တင်းမာသွားပြီး အားလုံးက သဘောတူကြောင်း ခေါင်းညိတ်ပြလိုက်ကြသည်။

"ကောင်းပြီ..." ကျန်းယဲ့က ဆုံးဖြတ်ချက်ချလိုက်လေသည်။ "အခု အားလုံး အတည်ပြုပြီးပြီဆိုတော့ လူတိုင်း ကိုယ့်လမ်းကြောင်းအတွက် ကိုယ် စတင်ပြင်ဆင်လို့ ရပြီ။ ပရိုမိုးရှင်း ဗီဒီယိုတွေ၊ ခရီးစဉ် အစီအစဉ်တွေနဲ့ အရေးပေါ် အစီအစဉ်တွေ အားလုံးကို ဂရုတစိုက် စဉ်းစားပြင်ဆင်ဖို့ လိုမယ်..."

"အဲဒါ့အပြင် ခင်ဗျားတို့ ဘယ်လိုခရီးသွားမျိုးကို ဆွဲဆောင်ချင်တယ်ဆိုတာနဲ့ ဘယ်လို အထူးသတိထားစရာတွေ ရှိသင့်တယ်ဆိုတာကို ရှင်းရှင်းလင်းလင်း တွေးတောထားဖို့ လိုပြီး ပရိုမိုးရှင်းဗီဒီယိုတွေမှာ အဲဒါတွေကို ရှင်းရှင်းလင်းလင်း အသိပေးဖို့ သေချာအောင် လုပ်ပါ။ ဒါကလည်း ခင်ဗျားတို့ရဲ့ စွမ်းဆောင်ရည်တွေကို စမ်းသပ်မှုတစ်ခု ဖြစ်ပါလိမ့်မယ်..."

ထိုစကားကို ကြားသောအခါ လူတိုင်းက တညီတညွတ်တည်း ပြန်လည်ဖြေကြားလိုက်ကြ၏။ "နားလည်ပါပြီ...."

လမ်းကြောင်း ဆယ့်နှစ်ခုအတွက် တာဝန်များကို အောင်မြင်စွာ ခွဲဝေချထားပြီးနောက် ကျန်းယဲ့က လူတိုင်းအား ပြောလိုက်ပြန်သည်။ "ကောင်းပြီ... သက်ဆိုင်ရာ တာဝန်တွေက အခု ခင်ဗျားတို့ လက်ထဲမှာပဲ။ သွားပြီး ပြင်ဆင်ကြတော့။ အရင်ဆုံး ပရိုမိုးရှင်းဗီဒီယိုတွေကို တည်းဖြတ်ပြီး ပြီးသွားရင် ကျွန်တော့်ဆီ ပို့ပေးကြပါ..."

သူက ထပ်ပေါင်းပြောလိုက်၏။ "ဗီဒီယို အားလုံး အဆင်သင့်ဖြစ်ပြီဆိုတာနဲ့ ကျွန်တော်က ကြိုတင်မိတ်ဆက်ပရိုမိုးရှင်းအနေနဲ့ ရီယဲ့ခရီးသွားအေဂျင်စီရဲ့ တရားဝင် အကောင့်ကနေ တင်ပေးသွားပါ့မယ်..."

တာဝန်များ ရရှိပြီးနောက် လူတိုင်း မတ်တတ်ထရပ်လိုက်ကြပြီး မည်သည့် အချိန်ဆွဲမှုမျှမရှိဘဲ ထွက်ခွာသွားကြကာ သူတို့၏ သက်ဆိုင်ရာ လမ်းကြောင်းများအတွက် ပရိုမိုးရှင်း ဗီဒီယိုများကို စတင်ရေးဆွဲ ဖန်တီးကြတော့သည်။

ထိုနေ့ညနေပိုင်းတွင် ကျန်းယဲ့သည် တည်းဖြတ်ထားသော ပရိုမိုးရှင်းဗီဒီယိုများကို လူတိုင်းထံမှ တစ်ခုပြီးတစ်ခု လက်ခံရရှိခဲ့လေသည်။

သူက ကွန်ပျူတာရှေ့တွင် ထိုင်ကာ ဗီဒီယိုတစ်ခုစီကို ဂရုတစိုက် စစ်ဆေးကြည့်ရှုလိုက်၏။

ချန်ချင်း၏ နှောင်းပိုင်းကျင်းမင်းဆက် လမ်းကြောင်း ဗီဒီယိုတွင် လေးနက်သော လေသံရှိပြီး နောက်ခံတေးဂီတမှာ သမိုင်းဝင်အတက်အကျများနှင့် အကျပ်အတည်းများ၏ ခံစားချက်များကို သယ်ဆောင်ထားကာ ကမောက်ကမဖြစ်နေသော လောကကြီး၏ အန္တရာယ်များကို မီးမောင်းထိုးပြနေခဲ့သည်။

နဂါးပြာ၏ ချောင်ဝေ့လမ်းကြောင်း ဇာတ်လမ်းကို ကြည်လင်ပြတ်သားစွာ တည်းဖြတ်ထားပြီး တင်းမာမှုများ ပြည့်နှက်နေသော မြင်ကွင်းများနှင့်အတူ စစ်ပွဲနှင့် တိုက်ပွဲတို့၏ လေထုကို သိမ်မွေ့စွာ ပုံဖော်ပေးနေခဲ့၏။

ဖန်ဖန်၏ စုန့်မင်းဆက် လမ်းကြောင်းက ဆောင်းဦးမိုးဖွဲလေးထဲက ကျန်းနန်ဒေသ၏ နူးညံ့သိမ်မွေ့သော အလှတရားများကို ဖမ်းယူထားရုံသာမက တိုင်းပြည်၏ ထောင့်တစ်နေရာတွင် ကန့်သတ်ခံထားရခြင်း၏ စိုးရိမ်ပူပန်မှုများကိုပါ သိမ်မွေ့စွာ အရိပ်အမြွက် ပြသထားချေသည်။

ထိုက်ရွှီဆရာတော်၏ အင်မော်တယ်ရာချီမြို့တော် ဗီဒီယိုများတွင် လျှို့ဝှက်ဆန်းကြယ်ပြီး နားလည်ရခက်သော အရည်အသွေးများ ပါဝင်နေကာ လူများကို ဝင်ရောက်စူးစမ်းလေ့လာချင်စိတ် ပေါ်လာစေရန် ဆွဲဆောင်နေခဲ့၏။

ဗီဒီယိုတစ်ခုချင်းစီတွင် ၎င်းတို့၏ ကိုယ်ပိုင်ထူးခြားချက်များ အသီးသီးရှိနေကြပြီး အားလုံးက လမ်းကြောင်း၏ အဓိက ဝိသေသလက္ခဏာများနှင့် အန္တရာယ် သတိပေးချက်များကို တိကျစွာ ပုံဖော်ပေးနေခဲ့ကြသည်။

ကျန်းယဲ့က ဒေါင်းလုဒ်လုပ်ထားသည်များကို လျင်မြန်စွာ ဖြတ်ကြည့်လိုက်ပြီး ပြဿနာမရှိကြောင်း အတည်ပြုကာ ကျေနပ်စွာ ခေါင်းညိတ်လိုက်မိသည်။

ယခုအခါ ည ၁၀ နာရီပင် ကျော်လွန်နေပြီဖြစ်ပြီး သန်းခေါင်ယံအချိန်နီးပါး ဖြစ်နေပြီဆိုသည့် အချက်ကို လျစ်လျူရှုကာ သူက ရီယဲ့ခရီးသွားအေဂျင်စီ၏ တရားဝင်အကောင့်သို့ ဝင်ရောက်ပြီးနောက် ပရိုမိုးရှင်း ဗီဒီယိုဆယ့်နှစ်ခုစလုံးကို တစ်ပြိုင်နက်တည်း တင်လိုက်ကာ သတ်မှတ်ထားသော အချိန်ဇယားအတိုင်း ထုတ်လွှင့်ရန် ဆက်တင်ချထားလိုက်၏။

"ပြီးပြီ..." အောင်မြင်စွာ တင်ပြီးစီးကြောင်း အသိပေးချက်ကို မြင်လိုက်ရသောအခါ ကျန်းယဲ့သည် စိတ်သက်သာရာရစွာဖြင့် သက်ပြင်းရှည်ကြီး တစ်ချက် ချလိုက်လေသည်။

ဗီဒီယိုများကို တင်ပြီးနောက် ကျန်းယဲ့ဟာ ကြီးမားသော စိတ်သက်သာရာရမှုကို ခံစားလိုက်ရ၏။

ထို့နောက် သူက စိတ်ကျေနပ်စွာ အကြောဆန့်လိုက်ပြီး ကောင်းမွန်သော စိတ်ခံစားချက်ဖြင့် ဒုတိယထပ်ရှိ လေဟာပြင် ဝရန်တာဆီသို့ ပျော်ရွှင်စွာ တက်သွားလိုက်သည်။

ညလေပြေက အေးမြနေပြီး ကြယ်တာရာ ကောင်းကင်ယံကြီးမှာ ကျယ်ပြောလှသည်။

ကျန်းယဲ့သည် ကူရှင်ပေါ်တွင် တင်ပျဉ်ခွေထိုင်လိုက်ပြီး သူ၏ စိတ်ထဲမှ အနှောင့်အယှက်များကို လျင်မြန်စွာ ဖယ်ရှားကာ စိတ်ကို တည်ငြိမ်စေလိုက်၏။ သူက အမည်မဲ့ကျင့်စဉ်၏ ကျင့်ကြံခြင်းအခြေအနေသို့ ဝင်ရောက်သွားပြီး ရင်းနှီးကျွမ်းဝင်နေသော ထိုအေးမြသည့် စွမ်းအင်များကို သူ၏ ခန္ဓာကိုယ်အနှံ့ လည်ပတ်စေရန် လမ်းညွှန်ပေးနေခဲ့ချေသည်။

သူ တစ်ပြိုင်နက်တည်း ချပြလိုက်သော ထိုပေါက်ကွဲစေတတ်သည့် ကြေညာချက်ကြီး ဆယ့်နှစ်ခုနှင့် ပတ်သက်၍မူ... ၎င်းတို့က အင်တာနက်ပေါ်တွင် မည်သို့သော ရုတ်ရုတ်သဲသဲဖြစ်မှုနှင့် ဆူညံမှုမျိုးကို ဖြစ်ပေါ်စေမည်နည်း၊ လူမည်မျှက စိတ်အားထက်သန်စွာ စောင့်မျှော်နေကြပြီး ရူးသွပ်စွာ ခန့်မှန်းနေကြမည်နည်း ဆိုသည်ကတော့...

အိုး... ဒါက သူနဲ့ ဘာမှမဆိုင်ဘူးလေ....

သူက သူ၏ အောင်မြင်မှုများနှင့် ဂုဏ်သတင်းများကို ဖုံးကွယ်ထားကာ အင်မော်တယ်ကျင့်ကြံခြင်း၌သာ မြှုပ်နှံထားလိုက်တော့သည်။

မျှော်လင့်ထားသည့်အတိုင်း ညဉ့်နက်ပိုင်းတွင် ထုတ်ပြန်လိုက်သော ကျန်းယဲ့၏ အမြည်းဗီဒီယိုဆယ့်နှစ်ခု အစုအဝေးကြီးမှာ တည်ငြိမ်နေသော အင်တာနက် ရေပြင်ပေါ်တွင် ပေါက်ကွဲသွားသည့် ရေနက်ပိုင်းဗုံး အဆက်မပြတ် ဖောက်ခွဲလိုက်သကဲ့သို့ ဖြစ်သွားပြီး မကြုံစဖူးသော ကမောက်ကမဖြစ်မှုကြီးတစ်ခုကို ချက်ချင်းပင် ဖန်တီးလိုက်သည်။

သို့သော်ငြားလည်း ယခုတစ်ကြိမ် အင်တာနက်ပေါ်ရှိ အပူပြင်းဆုံး ဆွေးနွေးမှုမှာ မတူညီသော ယဉ်ကျေးမှုများအထိ လွှမ်းခြုံထားသည့် ထူးဆန်းပြီး စိတ်ကူးယဉ်ဆန်သော ခရီးသွားဆွဲဆောင်မှုများ အကြောင်း မဟုတ်ဘဲ... ရိုးရှင်းသော်လည်း အံ့အားသင့်စရာကောင်းသော ဂဏန်းလေးတစ်လုံးအကြောင်း ဖြစ်နေခဲ့၏။

ဆယ့်နှစ်...

စုစုပေါင်း ဆယ့်နှစ်ခု....

ဤဂဏန်း၏ နောက်ကွယ်ရှိ အဓိပ္ပာယ်က ကမ္ဘာဂြိုဟ်တစ်ဝှမ်းရှိ အင်တာနက် အသုံးပြုသူများကို ရူးသွပ်သွားစေခဲ့သည်။

【အင်တာနက် အသုံးပြုသူ (A)】: ဘုရားရေ... လမ်းကြောင်းဆယ့်နှစ်ခုကို တစ်ပြိုင်နက်တည်း ဖွင့်လိုက်တာလား.... ဒါက ဘာကို ဆိုလိုတာလဲ။ အနည်းဆုံး အချိန်နှင့် ဟင်းလင်းပြင် ခရီးသွားလမ်းညွှန်ဆယ့်နှစ်ယောက် ရှိတယ်ဆိုတဲ့ သဘောပဲဟ...

【အင်တာနက် အသုံးပြုသူ (B)】: ချီးတဲ့မှပဲ... အရင်တုန်းက ဒါရိုက်တာကျန်း အပါအဝင် ခရီးသွားလမ်းညွှန်က အများဆုံးမှ သုံးယောက်လောက်ပဲ ရှိတာ မဟုတ်ဘူးလား။ အခုက ဆယ့်နှစ်ယောက်တောင်လား... ဒါက ခရီးသွားလမ်းညွှန်အဖွဲ့ကြီး ပေါက်ကွဲထွက်လာတာပဲကွ...

【အင်တာနက် အသုံးပြုသူ (C)】: ဒါက တွေးကြည့်ရုံနဲ့တင် ကြောက်စရာကောင်းတယ်။ အများပြည်သူဆီက အလုပ်ခေါ်ယူမှုမှာက ရှင်းရှင်းလင်းလင်း တစ်ယောက်ပဲ ခေါ်ထားတာလေ။ ကျန်တဲ့ ရှစ်နေရာက ဘယ်က ရောက်လာတာလဲ.... အဲဒါက ကြိုတင်စီစဉ်ထားတာ... လုံးဝကို ကြိုတင်စီစဉ်ထားတာပဲ။

【အင်တာနက် အသုံးပြုသူ (D)】: ကြိုတင်ရွေးချယ်ထားတဲ့ ရှစ်နေရာ.... ဘုရားရေ ... ဒါရိုက်တာကျန်း... ခင်ဗျားမှာ အားကစားသမား စိတ်ဓာတ်လုံးဝ မရှိဘူးပဲဗျ.... ခင်ဗျားက နေရာအများကြီးကို ကျွန်တော်တို့ဆီကနေ ဖုံးကွယ်ထားခဲ့တာပဲ။ ခင်ဗျားက နေရာတစ်နေရာတည်း ချပေးပြီးတော့ ကျွန်တော်တို့ကို အဲဒီနေရာလေးအတွက် သူသေကိုယ်သေ တိုက်ခိုက်ခိုင်းခဲ့တာပဲ....

【အင်တာနက် အသုံးပြုသူ (E)】: ဒါဆို အဲဒီ သူသေကိုယ်သေ တိုက်ခိုက်ခဲ့ရတာတွေ အားလုံးက ၁၂ ပုံ ၁ ပုံအတွက်လား... မဟုတ်သေးဘူး... မူလ ခရီးသွားလမ်းညွှန်သုံးယောက်ကို ဖယ်လိုက်ရင် ၉ ပုံ ၁ ပုံ... ပြီးတော့ အများပြည်သူဆီက ခေါ်ယူထားတဲ့ တစ်ယောက်ကို ထပ်နှုတ်လိုက်ရင် ၈ ပုံ ၁ ပုံအတွက်လား..... ဟူး... အလှည့်စားခံလိုက်ရတဲ့ သနားစရာ ကောင်လေးတစ်ယောက်လို ကျွန်တော် ခံစားနေရတယ်...

တစ်အင်တာနက်လုံးမှာ ဤဂဏန်းလေးကြောင့် အံ့အားသင့်၊ စိတ်လှုပ်ရှားပြီး အနည်းငယ် ဒေါသထွက်သွားခဲ့ကြသည်။

ပြိုင်ဆိုင်မှုမှာ သူတို့ စိတ်ကူးထားသည်ထက် များစွာ ပိုမို ပြင်းထန်နေသဖြင့် သူတို့အားလုံး လိမ်လည်ခံလိုက်ရသလို ခံစားလိုက်ကြရသည်။

အခန်း ၅၂၇ပြီး၏။