အခန်း (၁၂၀၆)

Chapter 1206

ကမ္ဘာကြီးပြိုကွဲခြင်း (၁)

ကမ္ဘာကြီးသည် ကမ္ဘာကြီးမဟုတ်တော့ချေ။

မြေမျက်နှာပြင်သည်လည်း မြေမျက်နှာပြင်မဟုတ်တော့ပေ။

ပေါင်းစည်းယာဉ်တန်းသည် တောင်အမေရိကတိုက်ရှိ အမေဇုန်တောနက်အတွင်း ဖြတ်သန်းမောင်းနှင်နေစဉ် မြေပြင်သည် အလွန်အမင်းမတည်မငြိမ်ဖြစ်လာသည်။

မြေပြင်များ ပြိုကွဲပျက်စီးကာ သဲများနှင့် ရေငွေ့များသည် ကောင်းကင်ယံသို့ ပျံတက်နေကြသည်။

ကုန်းမြေကြီးတစ်ခုလုံးသည် ပြိုကျပျက်စီးနေခြင်းဖြစ်သည်။

အရှိန်ပြင်းပြင်းဖြင့် မောင်းနှင်နေသော ပေါင်းစည်းယာဉ်တန်းသည် ယခုအခါတွင် ဆူပွက်နေသော ဖုန်မှုန့်များကြားထဲသို့ ရူးသွပ်စွာ တိုးဝင်မောင်းနှင်နေသည့် နဂါးနက်ကြီးတစ်ကောင်နှင့်တူလှသည်။

မြေပြင်က လှိုင်းထကာ ကောင်းကင်နှင့် မြေကြီးက တိမ်းစောင်းလျက်ရှိသည်။ မူလကဖြောင့်တန်းနေသော ရထားလမ်းသည်လည်း ရိုလာကိုစတာစီးလမ်းကဲ့သို့ ခရုပတ်ပုံစံလိမ်တွန့်သွားရာ ပေါင်းစည်းယာဉ်တန်းပေါ်ရှိ အသက်ရှင်ကျန်ရစ်သူများ ဟန်ချက်ပျက်ကာ မတ်တပ်ပင် မရပ်နိုင်တော့ချေ။

ရထား၏ ကာကွယ်ရေးစနစ်အားလုံးကို ပြန်လည်ရုပ်သိမ်းထားရပြီး ယခုအချိန်တွင် အသက်ရှင်ကျန်ရစ်သူများလည်း ထိခိုက်ဒဏ်ရာမရစေရန် ရထားတွဲတစ်ခုချင်းစီ၏ ချိတ်ဆက်နေရာများကို တင်းကျပ်စွာ ဆုပ်ကိုင်ထားကြရသည်။

အချို့က ပျံသန်းလာသော အပျက်အစီးများဖြင့် တိုက်မိကာ သွေးအန်နေကြပြီး အချို့က ရထားတွဲအတွင်း လိမ့်ကျနေကြသည်။ အချို့မှာ အော့အန်နေကြပြီး အချို့မှာမူ စူးစူးဝါးဝါးအော်ဟစ်နေကြသည်။

ဤရထားကြီးသည် ငရဲဘုံထဲသို့ မောင်းနှင်နေသကဲ့သို့ရှိသော်လည်း ရထားတွဲအောက်ရှိ သံဘီးများသည် ပြင်းထန်စွာ ဆက်လက်လည်ပတ်နေဆဲဖြစ်ပြီး တွန့်ခေါက်နေသော ရထားလမ်းပေါ်တွင် မီးပွားများထွက်သည်အထိ အားကုန်ထုတ်၍ ရှေ့သို့ပြေးလွှားနေသည်။

ရထားတွဲအပြင်ဘက်တွင်မူ ကောင်းကင်တစ်ခွင်လုံး၌ ကျောက်တုံးကြီးများနှင့် သဲများဖုံးလွှမ်းနေပြီး ရေငွေ့များနှင့် ဖုန်မှုန့်များပြည့်နှက်နေသည်။

ထို့ပြင် လေထဲတွင်မျောပါနေသော ဖုတ်ကောင်များလည်းရှိနေသည်။

ရှေ့တည့်တည့်တွင် ပြိုကျပျက်စီးနေသော မြို့ငယ်လေးမှ အိမ်အပျက်အစီးများ၊ လွင့်မျောနေသော လမ်းမီးတိုင်များနှင့် ပျက်စီးနေသောကားများသည် ရထားဆီသို့ အဆက်မပြတ်လွင့်စင်လာပြီး သံချပ်ကာပြားများကို ပြင်းထန်စွာတိုက်မိနေသောအသံများထွက်ပေါ်နေသည်။

တီ တီ တီ တီ၊၊

ငွေကြယ်ရထား၏ ထိန်းချုပ်ခန်းအတွင်း၌ သတိပေးသံအမျိုးမျိုးက စူးရှစွာမြည်ဟီးနေသည်။ စွမ်းအားဝတ်စုံကို ဝတ်ဆင်ထားသော ကျန်းရှု့ဝေလည်း ဟန်ချက်ညီစေရန် တွန်းကန်စနစ်ကို ဆက်တိုက်အသုံးပြုနေရင်း ဆက်သွယ်ရေးကိရိယာမှတစ်ဆင့်ပြောလိုက်သည်။

“မြေမျက်နှာပြင် ပြိုကွဲတာပိုဆိုးလာနေပြီ။ ဒီအတိုင်းသာဆက်သွားရင် ငါတို့ပျက်စီးကုန်လိမ့်မယ်”

“လင်းရှန် မင်းရဲ့ အစီအစဉ်ကို အကောင်အထည်ဖော်ချင်ရင် မြန်မြန်လုပ်တာပိုကောင်းလိမ့်မယ်” ရှောကလည်း ထိုအချိန်တွင် ပြောလိုက်သည်။

“ရထားရဲ့ကြံ့ခိုင်မှုက ဒီလောက်ပြင်းထန်တဲ့ ရိုက်ခတ်မှုဒဏ်ကို မခံနိုင်ဘူး”

“ဒါပေမဲ့...” မားကပ်စ်က ထိုအချိန်တွင် စိုးရိမ်တကြီးဖြင့် ပြောလိုက်သည်။

“ငါတို့ စောစောစီးစီးအပေါ်တက်သွားရင် ဆွဲငင်အားကြောင့် ရထားတွဲတွေပြတ်ထွက်ကုန်လိမ့်မယ်”

“ဆွဲငင်အားလုံးဝမရှိတော့တဲ့အထိ စောင့်နေလို့မရဘူး”

ရှောက ပြောလိုက်သည်။

“အခု ကမ္ဘာ့အပေါ်ယံလွှာတစ်ခုလုံး ပြိုကျနေပြီ။ ငါတို့မှာ အချိန်မရှိဘူး”

“လင်းရှန်”

အနန္တရထား၏ ထိန်းချုပ်ခန်းထဲတွင် ရှိနေသော ကီကီက ထိုအချိန်တွင် အနန္တရထားရှေ့ရှိ အတားအဆီးများကို ဖယ်ရှားရန်အတွက် သူမ၏ စိတ်စွမ်းအားကို အဆက်မြတ်အသုံးပြုနေရင်း ပြောလိုက်သည်။

“ရထားလမ်းပေါ်ကနေပျံတက်ဖို့ ကျွန်မ လမ်းညွှန်ပေးမယ်”

“မလုပ်နဲ့ဦး”

လင်းရှန်သည် အံတင်းတင်းကြိတ်ကာ ဗိုင်အိုလာကို ကြည့်ပြီး မေးလိုက်သည်။

“တွက်ချက်ပေးစမ်း… ပျံတက်ဖို့ အကောင်းဆုံးစိုးရိမ်အမှတ်က ဘယ်လောက်လဲ”

ဗိုင်အိုလာက ချက်ချင်း ပြန်ဖြေသည်။

[လက်ရှိ အရှိန်နဲ့ ဆွဲငင်အားလျော့နည်းသွားမှုအပေါ် အခြေခံပြီး တွက်ချက်ရရင် တစ်နာရီကို ၅.၃ ရာခိုင်နှုန်းလောက် ရှိပါတယ်။ လက်ရှိဆွဲငင်အားဟာ မူလရဲ့ ၃၄.၁၃ ရာခိုင်နှုန်းပဲ ရှိပါတော့တယ်။ အနန္တရထားရဲ့ ဖွဲ့စည်းပုံကြံ့ခိုင်မှုအရ တွက်ချက်မယ်ဆိုရင် ရထားတွဲချိတ်ဆက်မှုရဲ့ ဆွဲအားဟာ တန်ချိန် ၃၀၀၀ ထက် ကျော်လွန်လို့မရပါဘူး။ အခု ချက်ချင်း ပျံတက်မယ်ဆိုရင် ရထားတွဲ ၂၀၀ ကနေ ၂၆၀ ကြားမှာ ပြတ်တောက်မှုဖြစ်ပေါ်ပါလိမ့်မယ်]

[ဒါဟာ စိတ်ကူးယဉ်ဆန်တဲ့ အခြေအနေတစ်ခုဖြစ်ပေမဲ့ ရထားလမ်းကိုယ်တိုင်ရဲ့ လက်ရှိခံနိုင်ဝန်ကို တွက်ချက်ဖို့လိုအပ်ပါတယ်။ ဒါကြောင့် ရှေ့ကဆွဲငင်မောင်းနှင်တဲ့ ကိုယ်ထည်ရဲ့ စွမ်းအားနဲ့ ရထားလမ်းရဲ့ကြံ့ခိုင်မှုကိုလည်း တွက်ချက်မှုထဲမှာ ထည့်သွင်းရပါလိမ့်မယ်]

“မလိုဘူး။ ရထားရဲ့ တည်ဆောက်ပုံနဲ့ ရထားလမ်းရဲ့ ဝန်ကိုပဲ တွက်ချက်ပေး။ တခြားအရာတွေစိတ်မပူနဲ့” လင်းရှန်က အော်ပြောလိုက်သည်။

ဗိုင်အိုလာက ထိုအချိန်တွင် ပြန်ပြောသည်။

[ကျွန်မက ဆွဲငင်အားလျော့ကျမှုပုံစံငယ်တစ်ခုကို ယာယီတွက်ချက်ထားပါတယ်။ အကောင်းဆုံးအခြေအနေကတော့ ဆွဲငင်အား ၁၉.၆ ရာခိုင်နှုန်းအထိ လျော့ကျသွားတဲ့ စိုးရိမ်အမှတ်က ပျံတက်ဖို့နဲ့ လက်ရှိ ပျံတက်တဲ့ အရှိန်ကို ထိန်းထားဖို့ပါပဲ။ ဆွဲငင်အား ၀.၀၆၃၈ ရာခိုင်နှုန်းအထိ လျော့ကျသွားတဲ့အခါ ဘေးကင်းတဲ့ အကန့်အသတ်ကို ရောက်ရှိပါလိမ့်မယ်။ ရထားရဲ့ အလျားကို ထည့်သွင်းစဉ်းစားရင် ပျံတက်မှုလုပ်ငန်းစဉ်တစ်ခုလုံးဟာ ၁.၂ နာရီကြာမြင့်နိုင်ပါတယ်]

“ဒါ့အပြင် ဒီလုပ်ငန်းစဉ်အတွင်းမှာ ကူညီနိုင်တဲ့ စွမ်းအားရှင်တွေအားလုံး ပါဝင်ဆောင်ရွက်ကြတာ အကောင်းဆုံးပါပဲ။ ပထမအချက်က ရထားကို တည်ငြိမ်အောင် ထိန်းဖို့ဖြစ်ပြီး ဒုတိယအချက်ကတော့ ပြင်းထန်တဲ့ ရိုက်ခတ်မှုတွေကို ကာကွယ်ဖို့ပါပဲ” ချူယန်က ထိုအချိန်တွင် ပြောလိုက်သည်။

“ဒီတွက်ချက်မှုအရဆိုရင် ငါတို့မှာ အချိန် ၂နာရီလောက်ပဲ ကျန်တော့တယ်”

“လုံလောက်တယ်”

လင်းရှန်သည် တပ်ဖြန့်မှုကို ချက်ချင်းညှိနှိုင်းဆောင်ရွက်ပေးလိုက်သည်။ ရထားတွဲတစ်ခုချင်းစီရှိ စွမ်းအားရှင်များနှင့် သန်မာသော မျိုးဗီဇဆင့်ကဲပြောင်းလဲထားသူများအားလုံးပါဝင်ဆောင်ရွက်ရန် လိုအပ်ပြီး အထူးသဖြင့် ဒရုန်းများ သို့မဟုတ် ကိုယ်လုံးပြည့်စွမ်းအားဝတ်စုံရှိသူများသည် လက်ရှိအချိန်တွင် မိမိတို့ရထားတွဲ၏ ဘေးကင်းမှုကို သေချာပေါက်ကာကွယ်ရမည်ဖြစ်သည်။

အကယ်၍ ရထားတွဲပေါင်း ၆၀၀၀ ကျော်ထဲမှ တစ်တွဲသာပြတ်တောက်သွားပါက နောက်ဘက်ရှိ ရထားတွဲအားလုံး ပျက်စီးဆုံးရှုံးသွားမည်ဖြစ်သည်။

ခဏချင်းတွင်ပင် တိကျသောအချိန်ကို ရရှိပြီးနောက် ရထားအားလုံး၏ ဆက်သွယ်ရေးလိုင်းများမှ ချက်ချင်းတုံ့ပြန်လာကြသည်။ စွမ်းအားရှင်များနှင့် စွမ်းအားဝတ်စုံဝတ်ဆင်ထားသူအများအပြားသည် ရထားတွဲများ၏ အပြင်ဘက်သို့ ထွက်လာကြသည်။ ဒရုန်းအမြောက်မြားပျံသန်းနေကြပြီး ပေါင်းစည်းယာဉ်တန်းတစ်ခုလုံးသည် ဖုန်မှုန့်များနှင့် အပျက်အစီးများကြားတွင် ဂြိုဟ်၏ ဥက္ကာခဲပတ်လမ်းထဲသို့ တိုးဝင်နေသကဲ့သို့ အရှိန်အဟုန်ဖြင့် ပြေးလွှားနေသည်။

အချိန် ၁ နာရီသာ ကျန်တော့သည်။

ကလန် ကလန်၊၊

သတ္တုချင်းပွတ်တိုက်သံများနှင့်အတူ အနန္တရထား၏ ရထားတွဲ ၄ရှိ စိုက်ပျိုးရေးစင်ကြီးသည် ရုတ်တရက်တိမ်းစောင်းသွားသည်။ မြောင်လုက လိမ့်ဆင်းနေသော ခရမ်းချဉ်နွယ်ပင်များဆီသို့ ပြေးသွားပြီး ရှောင်ယွမ်ကမူ ဆလတ်ရွက်သေတ္တာကို သတ္တုဗီရိုကြီးတိုက်မိခြင်းမှ ကာကွယ်ရန် သူမ၏ ခန္ဓာကိုယ်ဖြင့် ခုခံကာကွယ်ပေးလိုက်သည်။

“ဒီအပင်တွေကို အကုန်ကာကွယ်ထား”

“ပြီးတော့ ဒါရိုက်တာတင်းရဲ့ မျိုးစေ့တွေလည်း လုံးဝပျက်စီးသွားလို့ မဖြစ်ဘူး”

ခေါင်မိုးပေါ်မှ တာလို့၏ နဂါးနက်တိုက်ပွဲဝင်ဝတ်စုံမှ ပြင်းထန်သောယန္တရားသံထွက်ပေါ်လာသည်။ ကားတစ်စီးခန့်ရှိသော အေးခဲနေသည့် မြေခဲကြီးသုံးခဲသည် သံမဏိဓားကြီးဖြင့် အပိုင်းပိုင်းပိုင်းဖြတ်ခံလိုက်ရပြီး သံချပ်ကာပြားများပေါ်သို့ မိုးသီးမိုးပေါက်များကဲ့သို့ ကြွေကျလာသည်။

“ကျောက်တုံးတွေ အရမ်းများတယ်။ ဘေးဘက်တွေကို သတိထားဦး။ အဲဒါတွေက ရထားတွဲချက်ဆက်မှုကို အလွယ်လေးရိုက်ခွဲနိုင်တယ်”

လော့ယန်၏ လေဆာသည် ပျံသန်းလာသော ဆိုင်းဘုတ်တစ်ခုကို အရည်ပျော်စေရင်း စိုးရိမ်တကြီးအော်ဟစ်လိုက်သည်။

“နားလည်ပြီ”

လုချန်က သံလိုက်ချိတ်ကို နောက်ပြန်ပစ်ပြီး ပြုတ်ကျလာသော လမ်းမီးတိုင်ကို ဆွဲထုတ်ရင်း အလုပ်ရှုပ်နေသည်။

ရှုချင်းက စွမ်းအားဝတ်စုံတပ်ဖွဲ့ကို ဦးဆောင်ကာ ရထားနောက်ပိုင်းသို့ ဦးတည်သွားသည်။ ကီကီရှိနေသဖြင့် အနန္တရထားအပေါ်ရှိ ဖိအားမှာ သိပ်မကြီးမားသော်လည်း နောက်ဘက်ရှိ ရထားတွဲများက ပိုပြဿနာများနေသည်။ လင်းရှန်အနေဖြင့် ပျံတက်စဉ်အတွင်း အရှေ့ဘက်ရှိရထားများ ချောမွေ့စွာ ရှေ့ဆက်နိုင်ရန် သေချာစေရမည်ဖြစ်သည်။

ငွေကြယ်ရထား၏ ကွပ်ကဲခန်းအတွင်းရှိ မိုဘိုင်းကွန်ပျူတာသည် ကျန်းရှု့ဝေ၏ ခြေထောက်နားသို့ ပြုတ်ကျပျက်စီးသွားသည်။ စွမ်းအားဝတ်စုံဝတ်ဆင်ထားသော စစ်သားအုပ်စုများသည် ရထားတွဲအပြင်တွင် တိုက်ပွဲဝင်နေကြပြီး ကျန်းရှု့ဝေကိုယ်တိုင်လည်း ရထားတွဲအတွင်းပိုင်း၌ အကောင်းဆုံးတည်ငြိမ်မှုရှိအောင် ကွပ်ကဲနေသည်။ သို့သော်လည်း များပြားလှသော ဆန်းကြယ်သည့်အသုံးအဆောင်ပစ္စည်းများမှာ ပျက်စီးဆုံးရှုံးသွားခဲ့ပြီ ဖြစ်သည်။

“အခန်းတွေထဲက အသုံးမဝင်တဲ့ပစ္စည်းတွေကို စိတ်ပူမနေနဲ့တော့။ အားလုံးပဲ ရထားရဲ့ ပင်မဖွဲ့စည်းပုံကို ကာကွယ်ကြ”

သူမ စကားပြော၍ မဆုံးသေးမီမှာပင် ဟိုလိုဂရမ်မြေပုံပေါ်ရှိ စွမ်းအားဝတ်စုံဝတ်ဆင်ထားသော စစ်သားအယောက် ၄၀ နီးပါးသည် လေထဲတွင် မျောပါနေသည့် မြို့ပျက်ကြီးတစ်ခု၏ အုတ်တံတိုင်းကြီးနှင့် တိုက်မိကာ လွင့်စင်သွားကြသည်။

နဂါးတောင် ၁ ရထားမှာ အခြေအနေအဆိုးဆုံးဖြစ်နေသည်။ အကြောင်းမှာ နှစ်ထပ်ရထားဖြစ်နေသောကြောင့် လူအများအပြားက အောက်သို့ပြုတ်ကျကုန်ကြပြီး ရထားတွဲအတွင်း၌လည်း အပျက်အစီးများမရေတွက်နိုင်အောင် လွင့်စင်နေကြသည်။ နန်ကျင်းက ရထားတွဲကို ဖောက်ထွက်ကာ လေထဲတွင် တွဲလောင်းပြုတ်ကျလာသော လူငယ်တစ်ဦးကို လက်ဗလာဖြင့် လှမ်းဖမ်းလိုက်သည်။

“သေချာကိုင်ထား”

ထို့နောက် သူမက တံခါးကိုဖွင့်ကာ ရထားအမိုးပေါ်သို့ တက်လိုက်သည်။ ဤအချိန်တွင် နဂါးတောင် ၁ ရထား၏ တိုက်ခိုက်ရေးသမားတစ်ဝက်ကျော်သည် ရထားအပြင်ဘက်သို့ ရောက်ရှိနေကြပြီး တွန်းကန်စနစ်မပါသော စွမ်းအားဝတ်စုံနှင့်လူအချို့မှာမူ ခန္ဓာကိုယ်တွင် သံမဏိကြိုးများဖြင့် တိုက်ရိုက်ချည်နှောင်ကာ လေထဲ၌ တိုက်ပွဲဝင်နေကြသည်။

ယူတိုးပီးယာရထားဘက်တွင်မူ ကာကွယ်ရေးက ပိုမိုသိပ်သည်းလှသည်။ လူများသည် ကျောက်တုံးကြီးများနှင့် တိုက်မိကာ ဆက်တိုက်လွင့်စင်နေကြပြီး ထိခိုက်ဒဏ်ရာရသူများရှိနေသော်လည်း အားလုံးက ရထားကို ကာကွယ်ရန်အတွက် အရာအားလုံးကို ရင်းနှီးထားကြသည်။

အချိန် မိနစ်သုံးဆယ်သာ ကျန်တော့သည်။