အခန်း ၄၅

အခန်း (၄၅) ယင်သရဲဂိုဏ်းက လှုပ်ရှားလာပြီး ၃သန်းအထိ မြင့်မားတဲ့ဈေးကို ပေးလိုက်ခြင်း

နောက်ထပ်တစ်ခုကမူ ပဉ္စမအဆင့်နိမ့် ခြေလှမ်းသိုင်းပညာနည်းစနစ်ဖြစ်သည့် အရိပ်ဖမ်းဆီးခြင်းခြေလှမ်းပင်။

တူညီသောအဆင့်များတွင် ခြေလှမ်းသိုင်းပညာနည်းစနစ်များသည် တိုက်ခိုက်ရေး သိုင်းပညာနည်းစနစ်များထက် များစွာပို၍ ရှားပါးလှသည်။

သာမန် သီးသန့်ခန်း ထောင်ပေါင်းများစွာမှ ဧည့်သည်များသည် ပြိုင်ဆိုင်မှုတွင် ပါဝင်လာကြ၏။

အတော်လေး ပြင်းထန်သော ပြိုင်ဆိုင်မှုအပြီးတွင်...

ထိုအရာသည် အဆင့်နိမ့် စိတ်ဝိညာဉ်ကျောက်တုံး ၆၅၀၀၀၀ ဖြင့် လျင်မြန်စွာ ရောင်းချခံလိုက်ရသည်။

【အဆ ၅၀၀၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... အဋ္ဌမ အထွတ်အထိပ်အဆင့် သိုင်းပညာနည်းစနစ်ဖြစ်တဲ့ လွင့်မျောနဂါးခြေလှမ်းကို ရရှိပါတယ်...】

"နောက်တစ်ခုကတော့ ပဉ္စမ အဆင့်မြင့် သွေးဖြည့်တင်းခြင်းဆေးလုံးဖြစ်ပြီးတော့ ဒဏ်ရာတွေကို ကုသဖို့အတွက် အရမ်းကောင်းမွန်တဲ့ ဆေးလုံးတစ်လုံးပါ..."

"စတင်လေလံဈေး... အဆင့်နိမ့် စိတ်ဝိညာဉ်ကျောက်တုံး ၄၀၀၀၀၀..."

"အဆင့်နိမ့် စိတ်ဝိညာဉ်ကျောက်တုံး ၆၈၀၀၀၀..."

စုရှီယုသည် အမြင့်ဆုံးလေလံဆွဲခဲ့သော ကြယ်ရောင်အလင်းတန်းတစ်ခုကို ကြည့်ကာ ကျယ်လောင်စွာ ကြေညာလိုက်၏။

"ဒီပစ္စည်းကို အောင်မြင်စွာ ရရှိသွားတဲ့ သီးသန့်ခန်း ၁၀၀၈၆က ဧည့်သည်ကို ဂုဏ်ပြုပါတယ်..."

【အဆ ၁၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... ဆဋ္ဌမ အထွတ်အထိပ်အဆင့် ဆေးလုံးဖြစ်တဲ့ သွေးဖန်တီးခြင်း မူလအစဆေးလုံးကို ရရှိပါတယ်...】

ထို့နောက်...

စုရှီယုသည် နောက်ထပ် လေလံပစ္စည်းဖြစ်သည့် အနက်ရောင် စိတ်ဝိညာဉ်အဆောင်လက်ဖွဲ့နှစ်ခုကို ကျွမ်းကျင်စွာ ထုတ်ယူလိုက်သည်။

သူမက ပြုံးကာ မိတ်ဆက်ပေးလိုက်၏။

"ဒီစိတ်ဝိညာဉ် အဆောင်လက်ဖွဲ့နှစ်ခုကို ယင်မီးတောက် မရဏအဆောင်လက်ဖွဲ့လို့ ခေါ်ပြီးတော့ စိတ်ဝိညာဉ်ကို တိုက်ခိုက်နိုင်တဲ့ အရမ်းရှားပါးတဲ့ စိတ်ဝိညာဉ် အဆောင်လက်ဖွဲ့ အမျိုးအစားဖြစ်သလို... အဲ့ဒီအရာတွေရဲ့ အဆင့်ကလည်း ဆဋ္ဌမ အထွတ်အထိပ်အဆင့်အထိ မြင့်မားတယ်..."

"တကယ်လို့ သတိမထားဘဲ ထိမှန်ခံရမယ်ဆိုရင်... ကောင်းကင်အက်ကွဲခြင်းနယ်ပယ် ကျွမ်းကျင်သူ တစ်ယောက်တောင်မှ ဒဏ်ရာရနိုင်တယ်..."

"မျိုးဆက်သစ်လူငယ်တွေအတွက် အသက်ကယ် ဝှက်ဖဲအနေနဲ့ပဲဖြစ်ဖြစ်... ခိုးကြောင်ခိုးဝှက် တိုက်ခိုက်ဖို့ပဲဖြစ်ဖြစ် အသုံးပြုရင် အရမ်းကောင်းမွန်တဲ့ အကျိုးသက်ရောက်မှုတွေ ရှိတယ်..."

စုရှီယုသည် ကြယ်ရောင်အလင်းတန်းအုပ်စုကြီးကို နောက်ပြောင်ကျီစယ်သည့်အနေဖြင့် မျက်စတစ်ချက် ပစ်လိုက်၏။

သူမက ကျယ်လောင်စွာ ကြေညာလိုက်သည်။

"ယင်မီးတောက် မရဏအဆောင်လက်ဖွဲ့ တစ်ခုစီတိုင်းအတွက် စတင်လေလံဈေးကတော့ အဆင့်နိမ့် စိတ်ဝိညာဉ်ကျောက်တုံး ၁၀၀၀၀၀၀ ပါ..."

သူမ စကားပြောဆိုပြီးသည်နှင့် တပြိုင်နက်...

သာမန် သီးသန့်ခန်း အသီးသီးရှိ ကျင့်ကြံသူများ ဆူညံပွက်လောရိုက်သွားကြသည်။

ယင်မီးတောက် မရဏအဆောင်လက်ဖွဲ့ကဲ့သို့ စိတ်ပိုင်းဆိုင်ရာကို တိုက်ခိုက်သော စိတ်ဝိညာဉ် အဆောင်လက်ဖွဲ့များသည် အလွန်အမင်း ရှားပါးပြီး ကာကွယ်ရန် ခက်ခဲလှ၏။

ထိပ်သီးအင်အားစုများတွင်ပင် အများအပြား ရှိမည်မဟုတ်ချေ။

အထူးသဖြင့် ဟင်းလင်းပြင်ခွဲထွက်ခြင်းနယ်ပယ်နှင့် မြေကမ္ဘာခွဲထွက်ခြင်းနယ်ပယ် ကျွမ်းကျင်သူများ၏ နှလုံးသားများထဲတွင် ပို၍ပင် လိုချင်တပ်မက်မှုများ ပြည့်နှက်နေခဲ့သည်။

သူတို့သည် ထိုအရာကို သေချာပေါက် ရယူမည်ဟု သီးသန့်ခန်းများအတွင်းမှ အော်ဟစ်နေကြ၏။

လေလံရုံ၏ မှော်ဆန်သော ကြယ်ရောင်အလင်းတန်းများက သူတို့ကို ခြားနားပေးမထားခဲ့လျှင်...

ထိုသို့မဟုတ်ပါက ဤမျှများပြားသော ကျင့်ကြံသူများ တစ်နေရာတည်းတွင် အော်ဟစ်နေခြင်းနှင့်အတူ...

မည်မျှထိ ဆူညံနေမည်ကို စိတ်ကူးယဉ်၍ပင် မရနိုင်ချေ။

မကြာမီ သီးသန့်ခန်းအုပ်စုတစ်စုမှ လူများသည် လျှင်မြန်စွာ စတင်၍ လေလံဆွဲကြတော့သည်။

သောင်းနှင့်ချီသော ကြယ်ရောင်အလင်းတန်းများကြားတွင် သူတို့၏လေလံဈေးနှုန်းများသည် တစ်ခုပြီးတစ်ခု ထွက်ပေါ်လာခဲ့လေ၏။

ကြယ်ရောင်အလင်းတန်းများထဲတွင် သိပ်သည်းသော ဂဏန်းများ တလက်လက် တောက်ပနေပြီး သူတို့၏ ရူးသွပ်မှုကို သက်သေပြရန် လုံလောက်သည်။

ကံကောင်းစွာဖြင့် သီးသန့်ခန်းတစ်ခုစီတိုင်းရှိ လေလံမျက်နှာပြင်များသည် လက်ရှိ အမြင့်ဆုံး လေလံဈေးနှင့် သီးသန့်ခန်းနံပါတ်တို့ကို ပြသနိုင်လောက်အောင် ဉာဏ်ရည်မြင့်မားပေ၏။

ထို့ကြောင့် သီးသန့်ခန်းတစ်ခုစီမှ လူများသည် လေလံပွဲတွင် သူတို့ဘာသာ ယှဉ်ပြိုင်နိုင်ကြသည်။

ထိုသို့မဟုတ်ဘဲ စုရှီယုသာ ဈေးနှုန်းများကို တစ်ခုပြီးတစ်ခု အော်ဟစ်ရမည်ဆိုပါက...

သူမသည် နောက်နှစ်အထိတောင် ပြီးဆုံးနိုင်မည် မဟုတ်ချေ။

ဤနည်းအတိုင်း...

ပြင်းထန်သော လေလံစစ်ပွဲတစ်ခု အပြီးတွင်...

ပထမဆုံး ယင်မီးတောက် မရဏအဆောင်လက်ဖွဲ့ကို သီးသန့်ခန်း ၄၃၉၉ မှ ဧည့်သည်က အဆင့်နိမ့် စိတ်ဝိညာဉ်ကျောက်တုံး ၂၈၀၀၀၀၀ ဟူသော မြင့်မားသည့် ဈေးနှုန်းဖြင့် အောင်မြင်စွာ ရယူသွားခဲ့လေ၏။

【အဆ ၁၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... သတ္တမ အထွတ်အထိပ်အဆင့် စိတ်ဝိညာဉ် အဆောင်လက်ဖွဲ့ဖြစ်တဲ့ စိတ်ဝိညာဉ်လောင်ကျွမ်းခြင်း အဆောင်လက်ဖွဲ့ကို ရရှိပါတယ်...】

ပထမတစ်ခုကို ရယူသွားပြီးသည်နှင့်တပြိုင်နက်...

ဒုတိယမြောက် ယင်မီးတောက် မရဏအဆောင်လက်ဖွဲ့အတွက် လေလံဆွဲမှုကို လျှင်မြန်စွာ စတင်ခဲ့သည်။

"၁၂၀၀၀၀၀..."

"၁၂၅၀၀၀၀..."

"..."

ခန်းမဆောင် နံပါတ် ၉ အတွင်း၌...

ယင်သရဲဂိုဏ်းမှ အကြီးအကဲနှစ်ဦး ထိုင်နေကြ၏။

ယင်သရဲဂိုဏ်းနှင့် ယင်နတ်ဆိုးဂိုဏ်းတို့သည် ယန်အောင်းတော်ဝင်နိုင်ငံအတွင်းရှိ ထိပ်တန်းမိစ္ဆာလမ်းစဉ် အင်အားစုများတွင် ပါဝင်ကြသည်။

ဂိုဏ်းနှစ်ခုကြားရှိ ဆက်ဆံရေးမှာ အတိအကျ ကောင်းမွန်လှသည် မဟုတ်သော်လည်း အချင်းချင်း သိကျွမ်းမှု အနည်းငယ် ရှိနေသည်။

ယင်သရဲဂိုဏ်း၏ အကြီးအကဲတစ်ဦးအနေဖြင့် သူသည် ယင်မီးတောက် မရဏအဆောင်လက်ဖွဲ့ကို လျင်မြန်စွာ မှတ်မိသွားခဲ့သည်။

မီးခိုးရောင်ဝတ်စုံဝတ် အကြီးအကဲတစ်ဦးက တီးတိုးရေရွတ်လိုက်၏။

"ယင်နတ်ဆိုးဂိုဏ်း အမြစ်ပြတ် သုတ်သင်ခံလိုက်ရပုံပဲ... မဟုတ်ရင် ယင်နတ်ဆိုးဂိုဏ်းက အထူးပြုလုပ်ထားတဲ့ ဒီယင်မီးတောက် မရဏအဆောင်လက်ဖွဲ့က အပြင်ကို လုံးဝထွက်ပေါ်လာမှာ မဟုတ်ဘူး..."

တခြား ထိပ်ပြောင်နေသော အကြီးအကဲက ခေါင်းညိတ်လိုက်သည်။

တည်ကြည်လေးနက်မှု အရိပ်အယောင်တစ်ခုက သူ၏မျက်နှာပေါ်တွင် ထွက်ပေါ်လာသည်။

သူက အေးအေးဆေးဆေး ပြောဆိုလိုက်သည်။

"ဘယ်အင်အားစုက ယင်နတ်ဆိုးဂိုဏ်းကို သုတ်သင်လိုက်တယ်ဆိုတာ ငါ မသိပေမဲ့... ယင်နတ်ဆိုးဂိုဏ်းရဲ့ ရတနာတွေကို ဒီနေရာမှာ လေလံတင်ဖို့ ယူလာရဲတာကိုကြည့်ရင် အဲ့ဒီအင်အားစုရဲ့ စွမ်းအားက သာမန်မဟုတ်တာ သေချာတယ်..."

သူ၏နံဘေးရှိ မီးခိုးရောင်ဝတ်စုံဝတ် အကြီးအကဲသည် တစ်ခုခုကို တွေးမိသွားပုံရပြီး ထိတ်လန့်တကြားဖြင့် ပြောလိုက်၏။

"ဒုတိယအကြီးအကဲ... ပန်းတစ်သောင်းတောင်ကြားက အဲ့ဒီမိန်းမအိုကြီးတွေများ လှုပ်ရှားလိုက်တာလား..."

"ပန်းတစ်သောင်းတောင်ကြားက ဒီနှစ်တွေ တလျှောက်လုံး ငါတို့ မိစ္ဆာလမ်းစဉ် အင်အားစုတွေကို အမြဲတမ်း မကျေမနပ် ဖြစ်နေတာလေ..."

ထိပ်ပြောင်နေသော အကြီးအကဲက ခေါင်းခါယမ်းလိုက်သည်။

သူက ဖြည်းညှင်းစွာ ပြောဆိုသည်။

"ဖြစ်နိုင်ခြေတော့ ရှိတယ်... ဒါပေမဲ့ သိပ်တော့ မသေချာဘူး..."

"ဘာပဲဖြစ်ဖြစ်... ယန်အောင်းတော်ဝင်နိုင်ငံက တော်ဝင်နန်းတွင်းရဲ့ ချိန်ခွင်လျှာညီမျှမှုအတွက် ပန်းတစ်သောင်းတောင်ကြားကို သတိလက်လွတ် မလှုပ်ရှားဖို့ အရင်က ညွှန်ကြားထားဖူးတယ်..."

"ဒါပေမဲ့... ဘေးကင်းဖို့အတွက်ကတော့..."

"ငါတို့ ပြန်ရောက်ရင် ဂိုဏ်းချုပ်နဲ့ တန်ပြန်အစီအစဉ်တွေကို ဆွေးနွေးသင့်တယ်..."

မီးခိုးရောင်ဝတ်စုံဝတ် အကြီးအကဲက ဖြည်းညှင်းစွာ ခေါင်းညိတ်လိုက်၏။

သူသည် လေလံစားပွဲပေါ်ရှိ ယင်မီးတောက် မရဏအဆောင်လက်ဖွဲ့ကို မော့ကြည့်လိုက်ပြီး အချိန်တခဏကြာမျှ တွေဝေတုံ့ဆိုင်းသွားကာ မေးမြန်းသည်။

"ဒီယင်မီးတောက် မရဏအဆောင်လက်ဖွဲ့ကို ငါတို့ လေလံဆွဲသင့်လား..."

"ယင်နတ်ဆိုးဂိုဏ်းက အထူးပြုလုပ်ထားတဲ့ မိစ္ဆာအဆောင်လက်ဖွဲ့တစ်ခုအနေနဲ့... အဲ့ဒီအရာရဲ့ စွမ်းအားက အတော်လေး ကောင်းမွန်နေတုန်းပဲ..."

ထိပ်ပြောင်နေသော အကြီးအကဲက ပေါ့ပေါ့ပါးပါး ပြောလိုက်၏။

"လေလံဆွဲလိုက်ပါ... ဘယ်လိုပဲဖြစ်ဖြစ် ဈေးမကြီးပါဘူး...အရည်အသွေးက နည်းနည်း နိမ့်ကျနေပေမဲ့... အဲ့ဒါက စိတ်ဝိညာဉ်ကို တိုက်ခိုက်နိုင်တဲ့ စိတ်ဝိညာဉ် အဆောင်လက်ဖွဲ့ တစ်ခု ဖြစ်နေတုန်းပဲ..."

"ဂိုဏ်းက တပည့်တွေအတွက် ဝှက်ဖဲတစ်ခုအနေနဲ့ ဝယ်သွားတာကလည်း တော်တော်လေး ကောင်းပါတယ်..."

မီးခိုးရောင်ဝတ်စုံဝတ် အကြီးအကဲသည် ထိုအရာက အဓိပ္ပာယ်ရှိသည်ဟု ခံစားလိုက်ရသည်။

သူသည် သူ၏ပိန်လှီလှီလက်ကိုမြှောက်ကာ အလင်းမျက်နှာပြင်ပေါ်တွင် ဂဏန်းတစ်ခုကို ဖြည်းညှင်းစွာ ရိုက်ထည့်လိုက်၏။

လေလံစင်မြင့်ပေါ်တွင်...

ရွှေရောင်ကြယ်ရောင်အမျိုးမျိုး တလက်လက် တောက်ပနေချိန်မှာပင်...

ရှေ့ဆုံးရှိ နဝမမြောက် ခရမ်းရောင်ကြယ်အလင်းတန်းရုတ်တရက် လင်းလက်လာသည်။

အံ့အားသင့်ဖွယ်ကောင်းသော ဂဏန်းတစ်ခုက ထိုအရာပေါ်တွင် ထွက်ပေါ်လာသည်။

၃၀⁠၀၀⁠၀၀၀...

၃ သန်းဟူသော မြင့်မားသည့် ဈေးနှုန်းသည် တခြားဧည့်သည်များ၏ လေလံဆွဲမှုများကို အလွယ်တကူ လွှမ်းမိုးသွားခဲ့လေ၏။

တခြားသီးသန့်ခန်းများထဲရှိ လူများသည် ထိုးတက်သွားသော ဈေးနှုန်းကို မြင်တွေ့လိုက်ရပြီး လေလံဆွဲသူမှာ ခန်းမဆောင်မှ အထူးဧည့်သည်တော် အခန်း ၉ ဖြစ်ကြောင်း မြင်လိုက်ရသည်။

သူတို့သည် လေလံဆွဲခြင်းကို လက်လွှတ်ရန် လိမ္မာပါးနပ်စွာ ရွေးချယ်လိုက်ကြသည်။

"အဆင့်နိမ့် စိတ်ဝိညာဉ်ကျောက်တုံး ၃၀၀၀၀၀၀... လေလံဆွဲမယ့် တခြား ဧည့်သည်တွေ ရှိသေးလား..."

စုရှီယုက အလေ့အကျင့်အတိုင်း အော်ဟစ်လိုက်သည်။

အချိန်အတော်ကြာသည်အထိ မည်သူမျှ ဆက်လက်၍ လေလံမဆွဲတော့သည်ကို မြင်သောအခါ သူမသည် လေလံတူကို လေလံစားပွဲပေါ်သို့ လျှင်မြန်စွာ ရိုက်ချလိုက်၏။

"ဒါဆိုရင် ဒီစိတ်ဝိညာဉ် အဆောင်လက်ဖွဲ့ကို အောင်မြင်စွာ ရရှိသွားတဲ့ အထူးဧည့်သည်တော်အခန်းနံပါတ် ၉ က အထူးဧည့်သည်တော်ကို ဂုဏ်ပြုပါတယ်..."

【အဆ ၁၀၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... အဋ္ဌမ အထွတ်အထိပ်အဆင့် စိတ်ဝိညာဉ် အဆောင်လက်ဖွဲ့ဖြစ်တဲ့ စိတ်ဝိညာဉ်ချေမှုန်းခြင်းနဲ့ ဖျက်ဆီးခြင်း အဆောင်လက်ဖွဲ့ကို ရရှိပါတယ်...】

ထို့နောက် ချက်ချင်းဆိုသလိုပင်...

စုရှီယုက သူမ၏ သိုလှောင်လက်စွပ်ထဲမှ အနက်ရောင် ကြာပန်းတစ်ပွင့်ကို ထုတ်ယူလိုက်သည်။

သူမက စတင်၍ မိတ်ဆက်လိုက်၏။

"ဒီကြာပန်းကို မရဏကြာပန်းနက်လို့ ခေါ်ပြီးတော့... မရဏချီ သိပ်သည်းတဲ့ နေရာတွေမှာ ပေါက်ရောက်လေ့ရှိတယ်... မြေကမ္ဘာခွဲထွက်ခြင်းနယ်ပယ် အထွတ်အထိပ် ကျင့်ကြံသူတစ်ယောက်က ဒါကို တိုက်ရိုက် စားသုံးလိုက်ရင်... ကောင်းကင်အက်ကွဲခြင်းနယ်ပယ်ကို ချိုးဖျက်ဝင်ရောက်နိုင်တဲ့ ဖြစ်နိုင်ခြေကို အနည်းငယ် တိုးစေနိုင်တယ်..."

"အဲ့ဒါကို သတ္တမအဆင့် ဆေးလုံးဖြစ်တဲ့ ကောင်းကင်အက်ကွဲခြင်းဆေးလုံးအဖြစ် ဖော်စပ်ဖို့လည်း အသုံးပြုနိုင်ပြီး... အဲ့ဒီကနေ ချိုးဖျက်ဝင်ရောက်နိုင်တဲ့ ဖြစ်နိုင်ခြေကို အများကြီး မြှင့်တင်ပေးနိုင်တယ်..."

"စတင်လေလံဈေး... အဆင့်နိမ့် စိတ်ဝိညာဉ်ကျောက်တုံး ၁၅၀၀၀၀၀..."

သူမ စကားပြောဆိုပြီးသည်နှင့် တပြိုင်နက်...

မကြာမီမှာပင် ကျင့်ကြံသူ အများအပြား စတင်၍ လေလံဆွဲကြတော့သည်။

"၁၆၀၀၀၀၀..."

"၁၆၂၀၀၀၀..."

"..."

"၂၅၅၀၀၀၀..."

နောက်ဆုံးတွင် တခြားအထူးဧည့်သည်တော်တစ်ဦး ဖြစ်သည့် အထူးဧည့်သည်တော် အခန်းနံပါတ် ၆ မှ အထူးဧည့်သည်တော်သည် လေလံဆွဲခဲ့လေ၏။

သူမသည် ဤမရဏကြာပန်းနက်ကို အတော်အသင့် များပြားသော ဈေးနှုန်းဖြင့် အလွယ်တကူ ရယူသွားခဲ့သည်။

【အဆ ၁၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... သတ္တမ အထွတ်အထိပ်အဆင့် စိတ်ဝိညာဉ်ဆေးပင်ဖြစ်တဲ့ တာအိုသွေးကြာပန်းကို ရရှိပါတယ်...】

အထူးဧည့်သည်တော် အခန်းနံပါတ် ၆ အတွင်း၌...

အစိမ်းနုရောင် ဝတ်စုံကို ဝတ်ဆင်ထားသော လှပသည့် အမျိုးသမီးတစ်ဦး ထိုင်ခုံပေါ်တွင် ထိုင်နေသည်။

သူမက ခပ်ဖျော့ဖျော့ ပြုံးလိုက်သည်။

"ဒီလောက် အကြာကြီး စောင့်ကြည့်ပြီးတဲ့နောက်မှာ... ဒီကြာပန်းလေးကပဲ နည်းနည်းအသုံးဝင်တယ်..."

"၂၅၀၀၀၀၀ ဆိုတာ ဈေးမကြီးပါဘူး... တောင်ကြားသခင်အတွက် ဆေးလုံးအဖြစ် ဖော်စပ်ဖို့ ပြန်ယူသွားမယ်ဆိုရင်... ပန်းတစ်သောင်းတောင်ကြားမှာ ကောင်းကင်အက်ကွဲခြင်းနယ်ပယ် အကြီးအကဲ တစ်ယောက် ဒါမှမဟုတ် နှစ်ယောက်လောက် ထပ်တိုးလာနိုင်မှာပါ..."

ထိုသို့ပြောဆိုပြီးနောက်...

လှပသော အမျိုးသမီးသည် သူမ၏ ထိုင်ခုံတွင် နောက်သို့မှီကာ ပျင်းရိစွာ သမ်းဝေလိုက်လေ၏။

သူမက တီးတိုးရေရွတ်လိုက်သည်။

"အရမ်း ပျင်းစရာကောင်းတာပဲ... အဲ့ဒီ တာအိုလမ်းစဉ်လျှောက်လှမ်းခြင်းနယ်ပယ် ဓားကျင့်ကြံသူကို မျက်နှာသာ မပေးရဘူးဆိုရင်... စိတ်ဝိညာဉ်ချီ ဒီလောက်ထိ ပါးလျတဲ့ နတ်ဘုရားတွေ စွန့်ပစ်ထားတဲ့ နေရာကို ဒီအကြီးအကဲက လာချင်မှာ မဟုတ်ဘူး..."

"မဟာဓားဂိုဏ်းက ဘာတွေတွေးနေလဲဆိုတာ ငါ မသိဘူး... သူတို့ဂိုဏ်းရဲ့ အဆင့်မြင့် တိုက်ခိုက်ရေး စွမ်းအား တစ်ဝက်ကျော်လောက်တောင် ဒီကို ရောက်နေကြတာ..."

"ဒါပေမဲ့... ဒီလေလံပွဲက ရတနာတွေက သိပ်မကောင်းပေမဲ့လည်း... ဒီလေလံကျင်းပတဲ့ နေရာက တော်တော်လေး ကောင်းတယ်..."

"အဲ့ဒီဟင်းလင်းပြင်နည်းစနစ်က ဘယ်ကလာတာလဲဆိုတာ ငါ မသိဘူး... အဲ့ဒါက သူတော်စင် တစ်ယောက်ရဲ့ အမွေအနှစ်များလား..."

အချိန်တခဏကြာမျှ စဉ်းစားပြီးနောက် သူမက ခေါင်းခါယမ်းလိုက်၏။

"ထားလိုက်ပါတော့... အာရုံစိုက်နေစရာ မလိုပါဘူး... ကြည့်ရတာ လေလံပွဲက ပြီးတော့မယ့်ပုံပဲ... ပြီးတော့ ငါလည်း ပြန်ဖို့ ပြင်ဆင်သင့်ပြီ..."

ထိုသို့ပြောဆိုပြီးနောက်...

လှပသော အမျိုးသမီးသည် သူမ၏ ထိုင်ခုံတွင် နောက်သို့မှီကာ သူမ၏ မျက်လုံးများကို သက်သောင့်သက်သာဖြင့် စုံမှိတ်ထားလိုက်တော့သည်။