အခန်း ၄၆

အခန်း (၄၆) နဝမအဆင့် အမွေအနှစ် ကျောက်စိမ်းအရိုးများ... သန်းဆယ်နှင့်ချီသော တုံ့ပြန်မှု အမှတ်များ

ထို့နောက် မရေမတွက်နိုင်သောလူများ၏ အကြည့်များအောက်တွင် စုရှီယုက ကျောက်စိမ်းရောင် အရိုးတစ်ခုကို ထုတ်ယူလိုက်သည်။

သူမသည် ထိုအရာကို လေလံစားပွဲပေါ်တွင် ညင်သာစွာ တင်လိုက်၏။

လခြမ်းကွေးကဲ့သို့ အပြုံးတစ်ခုက သူမ၏မျက်နှာပေါ်တွင် နောက်တစ်ကြိမ် ထွက်ပေါ်လာသည်။

သူမက ဖြည်းညှင်းစွာ စတင်၍ ပြောဆိုသည်။

"ဒီလေလံပစ္စည်းက နည်းနည်းထူးခြားတယ်..."

"ရှင်တို့အားလုံး အမွေအနှစ် အမှတ်အသားတွေ အကြောင်းကို သိကြမှာပါ... ဒီကျောက်စိမ်းအရိုးက ဆဋ္ဌမအဆင့် အထွတ်အထိပ် ကျင့်ကြံသူဖြစ်တဲ့ ဆောင်းရာသီအရှင် ချန်ရစ်ခဲ့တဲ့ အမွေအနှစ် အမှတ်အသားတစ်ခုပါ..."

"အဲ့ဒီအထဲမှာ အစွမ်းထက်ပုဂ္ဂိုလ်ရဲ့ ပြီးပြည့်စုံတဲ့ အမွေအနှစ် ပါဝင်တယ်... အမွေအနှစ်ကို လက်ခံပြီးတဲ့နောက်မှာ... ဆဋ္ဌမ အလယ်အလတ်အဆင့် ကျင့်ကြံခြင်းအပြင်... ဒီအစွမ်းထက်ပုဂ္ဂိုလ်ရဲ့ သိုင်းပညာနည်းစနစ် ထိုးထွင်းသိမြင်မှုတွေကိုပါ ရရှိနိုင်မှာပါ..."

"ဒါပေမဲ့ ဒီလို ကောင်းကင်ကို အန်တုတဲ့ ပစ္စည်းမျိုးမှာ သဘာဝကျကျ ကန့်သတ်ချက်တစ်ခု ရှိနေတယ်... အဲ့ဒါကတော့ ဒါကို အသုံးပြုပြီးတဲ့နောက်မှာ... လူတစ်ယောက်က ကျင့်ကြံခြင်းကတဆင့် သူတို့ရဲ့ ကျင့်ကြံခြင်းကို ဆက်ပြီးမတိုးတက်နိုင်တော့တာပါပဲ..."

"စတင်လေလံဈေး... အဆင့်နိမ့် စိတ်ဝိညာဉ်ကျောက်တုံး ၂ သန်း..."

သူမ စကားပြောဆိုပြီးသည်နှင့် တပြိုင်နက်...

အလတ်စားနှင့် အသေးစား အင်အားစု အများအပြားက လျှင်မြန်စွာ စတင်၍ လေလံဆွဲကြတော့သည်။

ဤအမွေအနှစ် ကျောက်စိမ်းအရိုးတွင် ကြီးမားသော ကန့်သတ်ချက်တစ်ခု ရှိသော်လည်း စွမ်းအားနည်းပါးသော အင်အားစုများအတွက်မူ...

အကယ်၍ ၂ သန်းကျော်သော ဈေးနှုန်းဖြင့် မြေကမ္ဘာခွဲထွက်ခြင်းနယ်ပယ် ကျင့်ကြံသူ တစ်ယောက်ကို အလိုအလျောက် ပေါင်းထည့်နိုင်မည်ဆိုပါက ဤသည်က အလွန်တန်ဖိုးရှိပေလိမ့်မည်။

ဤသို့ဖြင့် ထောင်ပေါင်းများစွာသော ကြယ်ရောင်များ တလက်လက် တောက်ပနေခဲ့လေ၏။

"၂.၃ သန်း..."

"..."

"၃.၈ သန်း..."

ပြင်းထန်သော လေလံတိုက်ပွဲတစ်ခု အပြီးတွင်...

သီးသန့်ခန်းတစ်ခုရှိ အင်အားစုငယ်တစ်ခုသည် အစွမ်းကုန် ကြိုးစားကာ ၃.၈ သန်းဟူသော မြင့်မားသည့် ဈေးနှုန်းဖြင့် လေလံဆွဲခဲ့သည်။

မျှော်လင့်ထားသည့်အတိုင်း ထိုအရာကို လိုချင်သူ အများအပြားသည် ဈေးနှုန်းကြောင့် နောက်တွန့်သွားကြပြီး မည်သူမျှ ဆက်လက်၍ လေလံမဆွဲတော့ချေ။

"ဒီအမွေအနှစ်ကို အောင်မြင်စွာ ရရှိသွားတဲ့ သီးသန့်ခန်း ၈၈၄၈ က ဧည့်သည်ကို ဂုဏ်ပြုပါတယ်..."

"နောက်ထပ် လေလံပစ္စည်းကို ဆက်သွားကြရအောင်..."

【အဆ၂၀၀၀ တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... နဝမ အဆင့်နိမ့် အမွေအနှစ်ဖြစ်တဲ့ တာအိုကျင့်ကြံသူမန်ရှန်းရဲ့ အမွေအနှစ် ကျောက်စိမ်းအရိုးကို ရရှိပါတယ်...】

ထို့နောက် ချက်ချင်းဆိုသလိုပင်...

စုရှီယုသည် သူမ၏ သိုလှောင်လက်စွပ်ထဲမှ နောက်ဆုံး လေလံပစ္စည်းကို ထုတ်ယူလိုက်၏။

ဤသည်မှာ အနက်ရောင်နှင့် အနီရောင် ရောယှက်နေသော ဓားရှည်တစ်လက်ပင်။

သူမက ဓားရှည်ကို လေလံစင်မြင့်ပေါ်တွင် ပြသရန်အတွက် တင်လိုက်သည်။

ထို့နောက် သူမက ပြုံးကာ မိတ်ဆက်ပေးလေသည်။

"နောက်ထပ် လေလံပစ္စည်းကတော့ ဒီလက်နက်ဖြစ်တဲ့ ...သွေးငိုကြွေးခြင်းမိစ္ဆာဓားပဲ... ပြီးတော့ အဲ့ဒါက လေလံမှူး တစ်ယောက်အနေနဲ့ ကျွန်မ မိတ်ဆက်ပေးမယ့် နောက်ဆုံး လေလံပစ္စည်းလည်း ဖြစ်ပါတယ်..."

"သွေးငိုကြွေးခြင်းမိစ္ဆာဓားကို တိုက်ပွဲအတွက် အထူးပြုလုပ်ထားတာပါ... သတ်ဖြတ်မှု တစ်ခုစီတိုင်းနဲ့အတူ အသုံးပြုသူရဲ့ ခွန်အားကို ယာယီ မြှင့်တင်ပေးနိုင်ပြီးတော့... အဲ့ဒီအရာရဲ့အဆင့်က သတ္တမ အဆင့်နိမ့်အထိ မြင့်မားတာကြောင့်... အရမ်းကောင်းမွန်တဲ့ တိုက်ခိုက်ရေး လက်နက်တစ်ခု ဖြစ်ပါတယ်..."

"စတင်လေလံဈေး... အဆင့်နိမ့် စိတ်ဝိညာဉ်ကျောက်တုံး ၃ သန်း..."

"ဓား အသုံးပြုတဲ့ ဧည့်သည်တော်တွေ... လက်လွတ်မခံကြပါနဲ့..."

လူများ လျင်မြန်စွာ လေလံဆွဲခဲ့သော ယခင်အချိန်များနှင့် မတူဘဲ...

ဤတစ်ကြိမ်တွင် လေလံတင်မည့် ရတနာမှာ သတ္တမအဆင့်အထိ မြင့်မားသဖြင့် စတင်လေလံဈေးမှာ နိမ့်ကျမနေခဲ့ချေ။

လက်ရှိနေရာတွင် ရှိနေသော ကျင့်ကြံသူ အများစုတွင် လေလံဆွဲရန် အရည်အချင်း မရှိကြပေ။

အသက်ရှူချိန် အနည်းငယ်အကြာတွင်...

လူများက နောက်ဆုံး၌ စတင်၍ လေလံဆွဲကြတော့သည်။

"၃.၁ သန်း..."

"၃.၁၅ သန်း..."

"၃.၂ သန်း..."

အစောပိုင်းက လေလံဆွဲခဲ့သူများမှာ သာမန်သီးသန့်ခန်းများမှ ပို၍ချမ်းသာသော အင်အားစုများ ဖြစ်ကြ၏။

သူတို့အားလုံးသည် ဈေးပေါပေါဖြင့် ရနိုင်မလောဆိုသော စိတ်ထားဖြင့် လေလံဆွဲခဲ့ကြခြင်းပင်။

ထို့ကြောင့် လေလံဆွဲသူ အများအပြား မရှိခဲ့ဘဲ တိုးမြှင့်သော ပမာဏမှာလည်း နည်းပါးလှသည်။

သို့သော် ဤသည်က အပြင်လောကတွင် ၅ သန်းကျော်ဖြင့် ရောင်းချနိုင်သော သတ္တမအဆင့် ရတနာဓားတစ်လက် ဖြစ်နေဆဲပင်။ ဤအရာကို ဈေးပေါပေါဖြင့် အလွယ်တကူ လုယူ၍ မရနိုင်ချေ။

မကြာမီ ခန်းမဆောင်များမှ အထူးဧည့်သည်တော်များ စတင်၍ လှုပ်ရှားလာကြသည်။

ခန်းမဆောင် နံပါတ် ၈ ... "၃.၅ သန်း..."

ခန်းမဆောင် နံပါတ် ၇ ... "၃.၈ သန်း..."

ခန်းမဆောင် နံပါတ် ၉ ... "၄ သန်း..."

"..."

ခန်းမဆောင် နံပါတ် ၈ ... "၅.၂ သန်း..."

ခန်းမဆောင် နံပါတ် ၇ ... "၆ သန်း..."

နောက်ဆုံးတွင် အထူးဧည့်သည်တော် အခန်းအမှတ် ၇ သည် ၆ သန်းဟူသော ဈေးနှုန်းကို ပေးခဲ့ပြီး ဤသည်မှာ သာမန် သတ္တမအဆင့်နိမ့် ရတနာတစ်ခု၏ ဈေးနှုန်းနှင့် တူညီနေလေပြီ။

ခန်းမဆောင် နံပါတ် ၈ ရှိ အင်အားစုသည် အချိန်တခဏကြာမျှ ချိန်ဆပြီးနောက် လက်လွှတ်ရန် ပြတ်ပြတ်သားသား ရွေးချယ်လိုက်သည်။

【အဆ တစ်ထောင် တုံ့ပြန်မှုကို ဖြစ်ပေါ်စေတဲ့အတွက် အိမ်ရှင်ကို ဂုဏ်ပြုပါတယ်... နဝမ အလယ်အလတ်အဆင့် မြင့်မြတ်တဲ့ လက်နက်ဖြစ်တဲ့ သွေးဆာလောင်ခြင်း မိစ္ဆာချိတ်ပိတ်ဓားကို ရရှိပါတယ်...】

လေလံစင်မြင့်၏ အလယ်ဗဟိုတွင်...

စုရှီယုသည် ပတ်ဝန်းကျင်ရှိ ကြယ်ရောင်အလင်းတန်းများထံသို့ ဦးညွှတ်လိုက်၏။

သူမက နောက်ပြောင်သည့်အနေဖြင့် မျက်စတစ်ချက်ပစ်လိုက်သည်။

ထို့နောက် လျှို့ဝှက်ဆန်းကြယ်သော အမူအရာဖြင့် သူမက ပြောဆိုသည်။

"နောက်ထပ် ထွက်ပေါ်လာမယ့် အရာကတော့ ဒီလေလံရုံရဲ့ အဓိက နောက်ဆုံး ပိတ်ပွဲပစ္စည်းပဲ ဖြစ်ပါတယ်..."

"ဒီကောင်မလေးက အဲ့ဒါ ဘာလဲဆိုတာကို မသိပေမဲ့... လူတိုင်းကို စိတ်ပျက်စေမှာ မဟုတ်ဘူးလို့ ကျွန်မ သေချာပေါက် ပြောရဲပါတယ်..."

"ဥက္ကဋ္ဌလင်းကိုယ်တိုင် မကြာခင်မှာ စင်မြင့်ပေါ်တက်ပြီး လေလံတင်ပေးမှာမလို့... ကျေးဇူးပြုပြီး ခဏလောက် စောင့်ပေးကြပါ ချစ်ရတဲ့ ဧည့်သည်တော်တို့..."

စုရှီယု စကားပြောဆိုပြီးနောက်...

သူမက နောက်သို့လှည့်ကာ ပျောက်ကွယ်သွားတော့သည်။

အနောက်ဘက်ခန်းမတွင်...

လင်းရှောင်က လက်ဖက်ရည်ထိုင်ခုံပေါ်တွင် ထိုင်ကာ သူ၏ လက်ဖက်ရည်ကို ဖြည်းညှင်းစွာ သောက်နေခဲ့၏။

သူ ကိုယ်တိုင်ကိုယ်ကျ ရှိမနေခဲ့သော်လည်း လေလံရုံ၏ ထိန်းချုပ်သူ တစ်ဦးအနေဖြင့် လေလံခန်းမတွင် ဖြစ်ပျက်နေသမျှ အရာအားလုံးကို သူ သိရှိနေခဲ့သည်။

"ငါ စင်မြင့်ပေါ် တက်ရမယ့် အလှည့် ရောက်ပြန်ပြီပဲ..."

"အဲ့ဒီ ခရမ်းရောင်ကြယ်အလင်းတန်း ၁၀ ခုထဲက ဧည့်သည်အများစုက လေလံမဆွဲကြသေးဘူးဆိုတော့... ကြည့်ရတာ သူတို့က အရင်ရတနာတွေကို စိတ်မဝင်စားကြတဲ့ပုံပဲ..."

"ဒါပေမဲ့ အဲ့ဒါက နားလည်ပေးလို့ ရပါတယ်... အခန်းထဲက ဧည့်သည်တွေက ကောင်းကင်အက်ကွဲခြင်းနယ်ပယ် အထက်က အစွမ်းထက် ပုဂ္ဂိုလ်တွေ ဖြစ်နိုင်တယ်ဆိုတော့... သူတို့က အဲ့ဒီရတနာတွေကို ဂရုမစိုက်တာ ပုံမှန်ပါပဲ..."

"ဟူး... ကလေးကို အဆုံးရှုံးမခံရဲရင်... ဝံပုလွေကို ဖမ်းမိမှာ မဟုတ်ဘူး... ကြည့်ရတာ နောက်ကျရင် ရတနာကောင်းတချို့ကို ငါ ထုတ်ယူရမယ့်ပုံပဲ..."

လင်းရှောင်က အကြောဆန့်ပြီးနောက် သူ မတ်တတ်ရပ်လိုက်သည်။

သူ၏ရှေ့ရှိ ဟင်းလင်းပြင်ဆီသို့ လက်တစ်ချက် ဝှေ့ယမ်းလိုက်သည်နှင့်...

လေလံတုံ့ပြန်မှုမှ ရတနာများသည် လေထဲမှ ချက်ချင်းထွက်ပေါ်လာခဲ့ပေ၏။

ထို့နောက် သူသည် သူ၏ ကောင်းကင်ဘုံမျက်လုံးကို တိတ်တဆိတ် အသက်သွင်းလိုက်ပြီး ထိုအရာများကို လျင်မြန်စွာ စတင်၍ စစ်ဆေးကြည့်လိုက်သည်။

မကြာမီမှာပင်...

လင်းရှောင်သည် တုံ့ပြန်မှု ရတနာများ အားလုံးကို အကြမ်းဖျင်း ကြည့်ရှုစစ်ဆေးပြီးသွားကာ သူ၏ မျက်လုံးများထဲရှိ အပြာရောင်အလင်းတန်း တဖြည်းဖြည်း မှေးမှိန်သွားသည်။

သူ နေရာတွင် မတ်တတ်ရပ်ကာ အချိန်တခဏကြာမျှ တွေးတောနေခဲ့လေ၏။

သူ၏မျက်မှောင်များ အနည်းငယ် တွန့်ကွေးသွားသည်။

အချိန်တခဏမျှ မည်သည့်ရတနာများကို လေလံတင်ရမည်အား သူ မသိခဲ့ချေ။

ထိုအချိန်မှာပင်...

လင်းရှောင်သည် တစ်ခုခုကို တွေးမိသွားပုံရပြီး ရုတ်တရက် မော့ကြည့်လိုက်သည်။

ထို့နောက်...

နောက်ထပ် စကားတစ်ခွန်းမျှ မပြောတော့ဘဲ သူသည် တုံ့ပြန်မှုစတိုးဆိုင်ကို အလျှင်အမြန် ဆင့်ခေါ်လိုက်၏။

【တုံ့ပြန်မှု စတိုးဆိုင်...

၁... ရေစည်းချက်ဆေးလုံး (တတိယ အဆင့်မြင့်).. တုံ့ပြန်မှု အမှတ် ၁၀၀၊ ဝယ်ယူရန် ကန့်သတ်ချက်.. ၄၉၉လုံး

၂... ကောင်းကင်မီးတောက်အဆောင်လက်ဖွဲ့ (ပဉ္စမ အဆင့်နိမ့်) ...တုံ့ပြန်မှု အမှတ် ၁၅၀၀၊ ဝယ်ယူရန် ကန့်သတ်ချက် ...၁၀၀ ခု

၃... နက်နဲသိမ်မွေ့ မူလအစ စိတ်ဝိညာဉ်ကျောက်စိမ်း (ဆဋ္ဌမ အဆင့်နိမ့်)... တုံ့ပြန်မှု အမှတ် ၃၀၀၀၀၊ ဝယ်ယူရန် ကန့်သတ်ချက်...၉ ခု

၄... ခြင်ဆီသန့်စင် နဂါးတက်လှမ်းခြင်းသစ်သီး (သတ္တမ အဆင့်မြင့်) ...၆၆၀၀၀၀၊ ဝယ်ယူရန် ကန့်သတ်ချက် ...၃ ခု

၅... တာအိုသွေးကြာပန်း (သတ္တမ အထွတ်အထိပ်အဆင့်)... ၃၀၀၀၀၀၊ ဝယ်ယူရန် ကန့်သတ်ချက်.. ၁၀ ခု

၆... စိတ်ဝိညာဉ်ချေမှုန်းခြင်းနဲ့ ဖျက်ဆီးခြင်း အဆောင်လက်ဖွဲ့ (အဋ္ဌမ အထွတ်အထိပ်အဆင့်) - ၁.၂ သန်း၊ဝယ်ယူရန် ကန့်သတ်ချက်.. ၃ ခု

၇... စိတ်ဝိညာဉ်ပေါက်ကွဲမှု ချီတက်လှမ်းခြင်း ဆေးလုံး (အဋ္ဌမ အလယ်အလတ်အဆင့်)... ၉၉၀,၀၀၀၊ ဝယ်ယူရန် ကန့်သတ်ချက်...၃ ခု

၈... တာအိုကျင့်ကြံသူမန်ရှန်း၏ အမွေအနှစ် ကျောက်စိမ်းအရိုး (နဝမ အဆင့်နိမ့်)...၈ သန်း၊ ဝယ်ယူရန် ကန့်သတ်ချက်... ၃ ခု

၉... မရနိုင်သေးပါ...

【လက်ရှိ တုံ့ပြန်မှုအမှတ်များ....၁၁၂၅၀၀၀၀】

"ဟားဟားဟား... မျှော်လင့်ထားတဲ့အတိုင်း ရတနာအသစ်တွေ ရှိနေတာပဲ... နဝမအဆင့် အမွေအနှစ် တစ်ခုတောင် ဒီနေရာမှာ ရှိနေလိမ့်မယ်လို့ ငါ ထင်မထားခဲ့ဘူး..."

"ပြီးတော့ တုံ့ပြန်မှုအမှတ် ၁၀သန်းကျော်တောင် တကယ်ကြီး ရှိနေတယ်... ကောင်းကင်ဘုံက ငါ့ကို ကူညီနေတာပဲ..."

လင်းရှောင်၏ နှုတ်ခမ်းများ မြင့်မားစွာ ကွေးတက်သွားလေ၏။

သူ့အတွက် တုံ့ပြန်မှု စတိုးဆိုင်ရှိ ရတနာများသည် အခမဲ့ ရတနာသိုက်များပင်။

ယခုအချိန်၌ မည်သည့်အရာများကို လေလံတင်ရမည်အား သူ စိတ်ညစ်နေရန် မလိုတော့ချေ။

သူသည် တုံ့ပြန်မှု စတိုးဆိုင်မှ ထိုအရာများကို ရယူနိုင်လေပြီ။

အချိန်တခဏကြာမျှ စဉ်းစားပြီးနောက်...

လင်းရှောင်က သူ၏ရှေ့ရှိ စနစ်မျက်နှာပြင်ကို ညင်သာစွာ ပုတ်လိုက်သည်။

သူသည် တာအိုသွေးကြာပန်းတစ်ခု၊ စိတ်ဝိညာဉ်ချေမှုန်းခြင်းနှင့်ဖျက်ဆီးခြင်း အဆောင်လက်ဖွဲ့တစ်ခုနှင့် ခြင်ဆီသန့်စင် နဂါးတက်လှမ်းခြင်းသစ်သီးတစ်လုံးတို့ကို လဲလှယ်လိုက်၏။

ထို့နောက် ထိုပစ္စည်းသုံးခုက လင်းရှောင်၏ရှေ့သို့ ကျဆင်းလာသည်။

တာအိုသွေးကြာပန်း

【အဆင့်... သတ္တမ အထွတ်အထိပ်အဆင့်】

【ဖော်ပြချက်... ကောင်းကင်အက်ကွဲခြင်းနယ်ပယ် အထွတ်အထိပ် ကျင့်ကြံသူတစ်ယောက်ကို တာအိုလမ်းစဉ်လျှောက်လှမ်းခြင်းနယ်ပယ်ဆီ ချိုးဖျက်ဝင်ရောက်ရာမှာ ကူညီပေးနိုင်တဲ့ ရှားပါးတဲ့ အရန်စိတ်ဝိညာဉ်ဆေးပင် တစ်ပင်ဖြစ်တယ်...】

စိတ်ဝိညာဉ်ချေမှုန်းခြင်းနှင့်ဖျက်ဆီးခြင်း အဆောင်လက်ဖွဲ့

【အဆင့်... အဋ္ဌမ အထွတ်အထိပ်အဆင့်】

【ဖော်ပြချက်... မိစ္ဆာ ဝိညာဉ်အနှစ်သာရ ၁၀၀၀၀၀နဲ့ ဖန်တီးထားတဲ့ စိတ်ဝိညာဉ် အဆောင်လက်ဖွဲ့တစ်ခု ဖြစ်ပြီးတော့ စိတ်ဝိညာဉ်ကို တိုက်ခိုက်ရာမှာ အထူးပြုတယ်... အဲ့ဒီအရာရဲ့ စွမ်းအားက အရမ်းကို အားကောင်းပြီးတော့ သူတော်စင်နယ်ပယ်အောက်က ကျင့်ကြံသူတွေကို ချက်ချင်းသတ်ဖြတ်နိုင်စွမ်း ရှိတယ်...】

ခြင်ဆီသန့်စင် နဂါးတက်လှမ်းခြင်းသစ်သီး

【...】

လင်းရှောင်က စိတ်ကျေနပ်စွာဖြင့် ခေါင်းညိတ်လိုက်သည်။

ထို့နောက် သူသည် သူ၏ရှေ့ရှိ ရတနာများ အားလုံးကို သိမ်းဆည်းလိုက်၏။

အတွေးတစ်ချက်ဖြင့် သူသည် လေလံစင်မြင့်၏ အလယ်ဗဟိုတွင် ချက်ချင်းထွက်ပေါ်လာသည်။

လင်းရှောင်သည် စကားအပို မပြောခဲ့ချေ။

သူ၏လက်များကို နောက်ပစ်၍ မတ်တတ်ရပ်ကာ သူက ဖြည်းညှင်းစွာ စတင်၍ ပြောဆိုသည်။

"အဝေးကနေ ခရီးနှင်လာကြတဲ့ လေးစားအပ်တဲ့ ဧည့်သည်တော်တို့... ဒီလေလံပွဲကနေ ကြိုဆိုပါတယ်..."

"ကျွန်တော်က ဒီတိမ်တိုက်ကောင်းကင်လေလံရုံရဲ့ ပိုင်ရှင်ပါ... ခင်ဗျားတို့က ကျွန်တော့်ကို အခုကစပြီး ဥက္ကဋ္ဌလင်းလို့ ခေါ်လို့ရပါတယ်..."

"ခင်ဗျားတို့ထဲက အများစုက တိမ်တိုက်ကောင်းကင်လေလံရုံရဲ့ တည်ရှိမှုအကြောင်း သိချင်နေကြမယ်လို့ ကျွန်တော် ယူဆတယ်... ဒါပေမဲ့ ဒီလေလံပွဲ ပြီးရင်တော့... ခင်ဗျားတို့ သိလာပါလိမ့်မယ်..."

"ကဲ... ဒီလေလံပွဲရဲ့ အဓိက နောက်ဆုံး ပိတ်ပွဲကို စတင်ပါပြီ..."