အခန်း ၆၉

အခန်း (၆၉) အင်မော်တယ် ချည်နှောင်ခြင်း အဆောင်လက်ဖွဲ့က စွမ်းအားပြသပြီး နက်နဲသိမ်မွေ့ ချောက်နက် ရေနဂါးကို အောင်နိုင်ခြင်း

အချိန်များ လျင်မြန်စွာ ကုန်လွန်သွားပြီး မကြာမီ သုံးရက် ကုန်ဆုံးသွားခဲ့လေ၏။

ဤသုံးရက်အတွင်း လင်းရှောင်သည် တာအိုလမ်းစဉ်လျှောက်လှမ်းခြင်းနယ်ပယ် ကျင့်ကြံသူများအတွက် အန္တရာယ်များသော နေရာများကို အထူးရွေးချယ်ကာ လှည့်လည်စူးစမ်းလေ့လာခဲ့သည်။

ထိုနေရာများတွင် များသောအားဖြင့် အန္တရာယ်များဖြင့် ပြည့်နှက်နေပြီး ယခင်က လျှို့ဝှက်နယ်မြေသို့ ဝင်ရောက်ခဲ့ဖူးသော ကျင့်ကြံသူများ သွားလာခဲလှကာ ကျန်ရစ်ခဲ့သော ရတနာများမှာလည်း နှိုင်းယှဉ်ချက်အရ ပို၍အဖိုးတန်သည်။

ထိုနေရာများကို စောင့်ကြပ်နေသော အဋ္ဌမအဆင့်နှင့် နဝမအဆင့် ယောင်သားရဲ အများအပြားအပြင် အစွမ်းထက် ရုပ်သေးရုပ် ယန္တရားအများအပြားကို အနိုင်ယူပြီးနောက် လင်းရှောင်သည် ပေါကြွယ်ဝသော ရိတ်သိမ်းမှုကြီးကို ရရှိခဲ့လေ၏။

သူသည် သူတော်စင်အဆင့်နှင့် အထက် ရတနာ အများအပြားကို ရရှိခဲ့ပြီး သူတော်စင်ဘုရင်နယ်ပယ် အဆင့် ပစ္စည်းတချို့ပင် ပါဝင်သည်။

ဤသည်က လင်းရှောင်အား လျှို့ဝှက်နယ်မြေ၏ ရှုပ်ထွေးမှုကို ပို၍သိမြင်လာစေပြီး သူ၏စူးစမ်းလိုစိတ်ကို များစွာမြင့်တက်လာစေခဲ့သည်။

နောက်ထပ် စူးစမ်းလေ့လာမှု တစ်ကြိမ် အပြီးတွင် လင်းရှောင်သည် လျှို့ဝှက်နယ်မြေ၏ အနက်ရှိုင်းဆုံး အပိုင်းသို့ ဝင်ရောက်သွားပြီး ခမ်းနားထည်ဝါသော နန်းတော်တစ်ခုရှေ့သို့ ရောက်ရှိလာသည်။

နန်းတော်သည် ကောင်းကင်ယံတွင် မြင့်မားစွာ လွင့်မျောနေပြီး ထိုအရာ၏နံဘေးပတ်လည်တွင် ရေများ စီးကျနေကာ ကောင်းကင်ဘုံရှိ အင်မော်တယ် နန်းတော်တစ်ခုအလားပင်။

နန်းတော်၏ ပင်မတံခါးပေါ်ရှိ ဆိုင်းဘုတ်တွင် ကြီးမားသော ရွှေရောင်စာလုံးတချို့ကို ထင်ရှားစွာ ရေးထွင်းထားသည်။

'ရွှမ်ထျန်း ရတနာခန်းမဆောင်'

"ရွှမ်ထျန်း ရတနာခန်းမဆောင်..."

"ရွှမ်ထျန်းသူတော်စင်ဂိုဏ်းရဲ့ ဘဏ္ဍာတိုက်များ ဖြစ်နေမလား..."

လင်းရှောင်၏မျက်လုံးများ တောက်ပသွားပေ၏။

ရွှမ်ထျန်းသူတော်စင်ဂိုဏ်း အပျက်အစီးများ၏ တခြား နေရာများတွင် သူတော်စင်အဆင့် ရတနာများ ဤမျှထိ အများအပြား ရှိနေလျှင် ဤဂိုဏ်း၏ ဘဏ္ဍာတိုက် အတွင်း၌ မည်မျှထိ အဖိုးတန်သော ပစ္စည်းများ ရှိနေမည်နည်း။

ဤအကြောင်းကို တွေးတောမိကာ လင်းရှောင်သည် နန်းတော်ဆီသို့ ပျံသန်းရန် သူ၏ခြေဖျားများကို ညင်သာစွာ ထောက်လိုက်သည်။

သို့သော် ထိုအချိန်မှာပင် အလွန်အမင်း အားကောင်းသော အရှိန်အဝါတစ်ခုက သူ့ထံသို့ ရုတ်တရက် ပြေးဝင်လာသည်။

လင်းရှောင်၏ မျက်နှာအမူအရာ ပြင်းပြင်းထန်ထန် ပြောင်းလဲသွားပြီး သူ၏ပုံရိပ်သည် မီတာရာနှင့်ချီ၍ လျှင်မြန်စွာ နောက်ဆုတ်သွားလေ၏။

"ဘယ်သူလဲ..."

လင်းရှောင်က မျက်ခုံးအနည်းငယ်ပင့်ကာ မေးလိုက်သည်။

အစောပိုင်းက ထွက်ပေါ်လာသော အရှိန်အဝါသည် အလွန်အမင်း ကြောက်မက်ဖွယ်ကောင်းပြီး ဒီတာ၏ အရှိန်အဝါထက်ပင် မနိမ့်ကျသဖြင့် လင်းရှောင်ကို အနည်းငယ် ပို၍သတိထားသွားစေသည်။

"ပြင်ပက လူသားမျိုးနွယ်... မင်းက တာအိုလမ်းစဉ်လျှောက်လှမ်းခြင်းနယ်ပယ် ကျင့်ကြံဆင့်နဲ့ ဒီနေရာကို ဘယ်လို ရောက်လာလဲဆိုတာ ငါ မသိပေမဲ့...ဒီနေရာက မင်း ခြေချဖို့ ထိုက်တန်တဲ့နေရာ မဟုတ်ဘူး..."

နက်ရှိုင်းသော အသံတစ်သံက အရပ်မျက်နှာ အသီးသီး၌ ပဲ့တင်ထပ်သွားသည်။

တစ်ချိန်တည်းမှာပင် ဧရာမ အနက်ရောင်ပုံရိပ်ကြီး တစ်ခုက နန်းတော်၏နောက်မှ ဖြည်းညှင်းစွာ ထွက်ပေါ်လာပေ၏။

ထိုပုံရိပ်ထံတွင် ကြောက်မက်ဖွယ်ကောင်းသော ဦးချိုရှည်တစ်စုံ၊ ဧရာမ ခန္ဓာကိုယ်နှင့် ရွှေရောင်ဒေါင်လိုက်မျက်ဆန်များရှိပြီး နန်းတော်၏အထက်တွင် ရစ်ခွေနေသည်။

လင်းရှောင်ပင်လျှင် သူ၏စိတ်နှလုံးသားထဲတွင် အံ့အားသင့်မှု လှိုင်းတံပိုးတစ်ခုကို ခံစားလိုက်ရ၏။

"အစစ်အမှန် နဂါးလား..."

"မဟုတ်ဘူး... ရေနဂါး တစ်ကောင် ဖြစ်ရမယ်... ဒီဘဏ္ဍာတိုက်ကို ရေနဂါး တစ်ကောင်က စောင့်ကြပ်နေလိမ့်မယ်လို့ ငါ ထင်မထားခဲ့ဘူး..."

ကောင်းကင်ယံရှိ ဧရာမနဂါးကြီးကို ကြည့်ကာ လင်းရှောင်သည် အံ့အားတသင့် ရေရွတ်ခြင်း မပြုဘဲ မနေနိုင်တော့ချေ။

မြောက်ပိုင်းမရဏနယ်မြေတစ်ခုလုံးတွင် နဂါးအကောင်ရေ အနည်းငယ်သာရှိပြီး ရေနဂါးမျိုးနွယ်စုသည် အလွန်အမင်း ရှားပါးပေ၏။

ထို့ပြင် သူတို့၏ တိုက်ခိုက်ရေးစွမ်းအားသည် အလွန်အမင်း အားကောင်းပြီး အားအနည်းဆုံး ရေနဂါးပင်လျှင် သူတော်စင်ဘုရင်နယ်ပယ်ထက် မနိမ့်ကျသော ခွန်အားကို ပိုင်ဆိုင်ထားသည်။

ထို့ပြင် သူ၏ရှေ့ရှိ ရေနဂါး၏ပေါက်ကွဲထွက်နေသော အရှိန်အဝါကိုကြည့်ပြီး ထိုသားရဲသည် ရိုးရှင်းမည် မဟုတ်ကြောင်း သူ အတပ်ပြောနိုင်သည်။

"ရွှမ်ထျန်း ရတနာခန်းမဆောင်ကို စောင့်ကြပ်နေတဲ့ စိတ်ဝိညာဉ်သားရဲရဲ့ မျိုးဆက် တစ်ယောက်အနေနဲ့... ဒီအရှင်သခင်က မင်းကို တိုက်ရိုက်သတ်ပစ်သင့်တာ..."

"ဒါပေမဲ့ လူသား တစ်ယောက် ဒီနေရာကို ရောက်မလာတာ အတော်ကြာပြီဆိုတော့... ဒီအရှင်က အချိန်အကြာကြီး ပျင်းရိနေခဲ့တာ...ဒီလို လုပ်ရင်ရော ဘယ်လိုလဲ... ဒီအရှင်က မင်းကို ရွေးချယ်စရာ နှစ်ခု ပေးမယ်..."

"ပထမ တစ်ခုက... အခု ငါ့ရဲ့ သတ်ဖြတ်တာကို ခံမလား... ဒုတိယ တစ်ခုက... ဒီမှာ နေပြီး ဒီအရှင်နဲ့အတူ ဘဏ္ဍာတိုက်ကို နှစ်တစ်သောင်းကြာအောင် စောင့်ကြပ်မလား..."

"လူသား ကောင်လေး... တစ်ခု ရွေးလိုက်..."

ရေနဂါးက မောက်မာထောင်လွှားစွာ ပြောဆိုလိုက်၏။

ရေနဂါး၏ စကားများကို ကြားသောအခါ လင်းရှောင်သည် အလျင်စလို မဖြေကြားခဲ့ချေ။

ထိုအစား ကောင်းကင်ယံရှိ ရေနဂါးကို စူးစမ်းလေ့လာနေစဉ် သူ၏မျက်လုံးများ တောက်ပသွားသည်။ သူက အနည်းငယ် စိတ်လှုပ်ရှားစွာဖြင့် မေးလိုက်၏။

"မင်း ဆိုလိုတာက... မင်းက စိတ်ဝိညာဉ်သားရဲ တစ်ကောင်ပေါ့..."

သူ စကားပြောဆိုပြီးသည်နှင့် တပြိုင်နက် ရန်စခံလိုက်ရသည့်အလား ရေနဂါး၏မျက်လုံးများတွင် ဒေါသအရိပ်အယောင်တစ်ခု ထွက်ပေါ်လာပြီး ကျယ်လောင်စွာ ဟိန်းဟောက်လိုက်၏။

"လူသား... ဒီအရှင် စိတ်ဝိညာဉ်သားရဲ ဖြစ်နေတာက မင်းနဲ့ ဘာဆိုင်လို့လဲ..."

"မင်းလို ပုရွက်ဆိတ် တစ်ကောင်က ဒီအရှင်ကို မေးခွန်းထုတ်ချင်သေးတာလား..."

"စကားလမ်းကြောင်း မလွှဲနဲ့... မင်းရဲ့ အဖြေကို မြန်မြန် ပြောစမ်း..."

ထိုသို့ ပြောဆိုပြီးနောက် ရေနဂါးသည် ဟိန်းဟောက်လိုက်ရာ လင်းရှောင်အား မြေကြီးပေါ်တွင် ခြေလှမ်းအနည်းငယ် ဆုတ်သွားစေခဲ့သည်။

လင်းရှောင်သည် မြေကြီးကို ခိုင်မာစွာ ဆောင့်နင်းလိုက်ပြီး သူ၏ ပုံရိပ်ကို တည်ငြိမ်စေလိုက်၏။

တစ်ချိန်တည်းမှာပင် အပြာရောင် အလင်းတန်းများက သူ၏မျက်လုံးများတွင် တလက်လက် တောက်ပသွားပြီး အချက်အလက် မျက်နှာပြင်တစ်ခု တဖြည်းဖြည်း ထွက်ပေါ်လာသည်။

"စိတ်ဝိညာဉ်သားရဲ... နက်နဲသိမ်မွေ့ ချောက်နက် ရေနဂါး"

"နယ်ပယ်... သူတော်စင်ဘုရင်နယ်ပယ် အထွတ်အထိပ်အဆင့်"

"ဖော်ပြချက်... ရွှမ်ထျန်းသူတော်စင်ဂိုဏ်းရဲ့ ဂိုဏ်းစောင့် စိတ်ဝိညာဉ်သားရဲဖြစ်တဲ့... နက်နဲသိမ်မွေ့ချောက်နက် အစစ်အမှန် နဂါးရဲ့ မျိုးဆက်တစ်ကောင် ဖြစ်တယ်... သူ့ရဲ့ စရိုက်က မောက်မာတယ်... ရွှမ်ထျန်းသူတော်စင်ဂိုဏ်း ဖျက်ဆီးခံရပြီးနောက်ပိုင်း ရွှမ်ထျန်း ရတနာခန်းမဆောင်ကို စောင့်ကြပ်ဖို့ တာဝန်ယူထားတယ်..."

"သူတော်စင်ဘုရင်နယ်ပယ် အထွတ်အထိပ်အဆင့် ပေါ့... ကြည့်ရတာ ငါ အနိုင်မယူနိုင်လောက်ဘူး ထင်တယ်..."

လင်းရှောင်သည် တံတွေးမျိုမချဘဲ မနေနိုင်တော့ချေ။

"ထားလိုက်တော့... လှိုင်းကြီးလေလေ... ငါးက ပိုဈေးကြီးလေလေပဲ... ဘာပဲဖြစ်ဖြစ် ကောင်းကင်ဘုံ မူလအစ ရွှေသံချပ်ကာက ငါ့ကို ကာကွယ်ပေးထားတာပဲ... ငါ အစွမ်းကုန် ကြိုးစားရမယ်..."

ဤအကြောင်းကို တွေးမိသောအခါ လင်းရှောင်သည် ကောင်းကင်ယံသို့ လျှင်မြန်စွာ ပျံသန်းသွားပြီး တည်ငြိမ်စွာ ပြောဆိုလိုက်သည်။

"တောင်းပန်ပါတယ်... မင်းပေးတဲ့ ရွေးချယ်စရာတွေကို ငါ မကြိုက်ဘူး..."

"ဒါကြောင့်... မင်းကို အနိုင်ယူဖို့ပဲ ငါ ရွေးချယ်လိုက်မယ်..."

ထိုသို့ ပြောဆိုပြီးနောက် လင်းရှောင်သည် လက်တစ်ဖက်ကို မြှောက်ကာ ကျယ်လောင်စွာ အော်ဟစ်လိုက်သည်။

"နက်နဲသိမ်မွေ့ဧကရာဇ် လောကဖိနှိပ်ခြင်း စည်းတံဆိပ်..."

ရင်းနှီးကျွမ်းဝင်နေသော ဧရာမ အနက်ရောင် လက်ဝါးပုံရိပ်ယောင်ကြီးသည် ကောင်းကင်ယံမှ ဆင်းသက်လာပြီး ရေနဂါးပေါ်သို့ ဝုန်းခနဲ ရိုက်ချလိုက်၏။

သို့သော် နက်နဲသိမ်မွေ့ ချောက်နက် ရေနဂါးသည် လုံးဝအထိအခိုက်မရှိ ဖြစ်နေခဲ့သည်။

"ဟက် ဟက်... တာအိုလမ်းစဉ်လျှောက်လှမ်းခြင်းနယ်ပယ် ပုရွက်ဆိတ်... မင်းက ငါ့ကို ကလိလာထိုးနေတာလား..."

"ဒီလောက် စွမ်းအားလေးနဲ့...ဒီအရှင်ကို အနိုင်ယူချင်သေးတယ်ပေါ့... မင်းက အိပ်မက်မက်နေတာပဲ..."

"ဒီအရှင်ကို စော်ကားရဲမှတော့ မင်းကို အသက်ရှင်ခွင့် ပေးလို့ မရတော့ဘူး..."

နက်နဲသိမ်မွေ့ ချောက်နက်ရေနဂါး၏ လေသံတွင် မထီမဲ့မြင်ပြုမှုများ ထင်ဟပ်နေသည်။

တစ်ချိန်တည်းမှာပင် နက်နဲသိမ်မွေ့ ချောက်နက် ရေနဂါးသည် သူ၏ပါးစပ်မှ နဂါးချီတစ်ချက်ကို အလွန်အမင်း မြန်ဆန်သောအရှိန်ဖြင့် မှုတ်ထုတ်လိုက်သည်။

လင်းရှောင်သည် တုံ့ပြန်ရန် အချိန်မရှိလိုက်ဘဲ နဂါးချီ၏လွှမ်းခြုံခြင်းကို ချက်ချင်းခံလိုက်ရ၏။

ဤအချိန်တွင် ကောင်းကင်ဘုံ မူလအစ ရွှေသံချပ်ကာသည် မှေးမှိန်သော အလင်းတန်းတစ်ခုကို ထုတ်လွှတ်လိုက်ပြီး တိုက်ခိုက်မှုများအားလုံးကို ချက်ချင်း ပျက်ပြယ်သွားစေသည်။

လင်းရှောင်သည် ဆက်လက်၍ ထိန်းချုပ်မထားတော့ချေ။ သူ၏မျက်လုံးများ မှေးစင်းသွားပြီး စကားလုံး အနည်းငယ်ကို ဖြည်းညှင်းစွာ ရေရွတ်လိုက်၏။

"အင်မော်တယ် မြှုပ်နှံခြင်းစေတီ စည်းတံဆိပ်..."

ဝုန်း...

ကောင်းကင်ကြီးသည် ချက်ချင်းအက်ကွဲသွားပြီး စူးရှ တောက်ပသော အင်မော်တယ် အလင်းတန်းများ ထုတ်လွှတ်နေသည့် 'မြှုပ်နှံ' ဟူသော စာလုံးတစ်လုံး ရုတ်တရက် ထွက်ပေါ်လာသည်။

ထို့နောက် 'မြှုပ်နှံ' စာလုံးသည် လျှင်မြန်စွာ ကျဆင်းလာပြီး အရွယ်အစားက သိသိသာသာ ကြီးထွားလာကာ ကောင်းကင်ယံတစ်ခုလုံးကို ချက်ချင်းလွှမ်းခြုံသွားတော့သည်။

နက်နဲသိမ်မွေ့ ချောက်နက်ရေနဂါးသည် 'မြှုပ်နှံ' စာလုံး၏ ပုံရိပ်ယောင်ဖြင့် ပြင်းပြင်းထန်ထန် ရိုက်ခတ်ခံလိုက်ရပြီး မြေကြီးပေါ်သို့ ဝုန်းခနဲ ကျဆင်းသွားသည်။

ဝုန်း...

"ပုရွက်ဆိတ်... မင်းက ဒီအရှင်ကို ဒေါသထွက်အောင် လုပ်လိုက်ပြီ..."

"ဒီအရှင်အတွက် သေလိုက်စမ်း..."

သွေးသံတရဲရဲဖြစ်နေသော နက်နဲသိမ်မွေ့ ချောက်နက် ရေနဂါးသည် လျှင်မြန်စွာ ထလာပြီး လင်းရှောင်ထံသို့ ရူးသွပ်စွာ ပြေးဝင်လာပေ၏။

အင်မော်တယ် မြှုပ်နှံခြင်းစေတီ စည်းတံဆိပ်၏ ကြီးမားသော စွမ်းအားသုံးစွဲမှုကြောင့် လင်းရှောင်သည်လည်း ဤအချိန်တွင် စိတ်ဝိညာဉ်စွမ်းအားများ ကုန်ခမ်းသွားခဲ့ပြီး သူ၏မျက်နှာ အနည်းငယ် ဖြူရော်သွားသည်။

ပြင်းပြင်းထန်ထန် ဒဏ်ရာရသွားသော နက်နဲသိမ်မွေ့ ချောက်နက် ရေနဂါးကို ကြည့်ကာ လင်းရှောင်သည် ထိတ်လန့်ခြင်းမရှိဘဲ တီးတိုးရေရွတ်လိုက်၏။

"တကယ်ပဲ မလုံလောက်သေးဘူး... နယ်ပယ် ကွာခြားချက်က ကြီးမားနေတုန်းပဲ..."

"ကြည့်ရတာ အဲ့ဒီ အင်မော်တယ် အဆောင်လက်ဖွဲ့ကို ငါ သုံးရတော့မယ့်ပုံပဲ... ဒီလောက် အစွမ်းထက်တဲ့ စိတ်ဝိညာဉ်သားရဲကို လေလံတင်လိုက်ရင်... တုံ့ပြန်မှုကနေ ရလာမယ့် စိတ်ဝိညာဉ်သားရဲက သေချာပေါက် ဆိုးရွားမှာ မဟုတ်ဘူး..."

ဤအကြောင်းကို တွေးမိသောအခါ လင်းရှောင်၏ အတွေး လှုပ်ရှားသွားပြီး စနစ်ဟင်းလင်းပြင်အတွင်းမှ အလင်းတန်းတစ်ခု ချက်ချင်းပျံ့လွင့်လာသည်။

မျက်စိတစ်မှိတ်အတွင်း အလင်းတန်းသည် နက်နဲသိမ်မွေ့ ချောက်နက် ရေနဂါးနှင့် တိုက်မိသွားလေ၏။

တစ်ချိန်တည်းမှာပင် ထိုအလင်းတန်းမှ မရေမတွက်နိုင်သော ရွှေရောင်သံကြိုးများကို ထုတ်လွှတ်လိုက်ပြီး နက်နဲသိမ်မွေ့ ချောက်နက် ရေနဂါးကို ချက်ချင်းဆိုသလိုပင် တင်းကြပ်စွာ ချည်နှောင်လိုက်သည်။

"အစစ်အမှန် အင်မော်တယ်အဆင့်ရှိတဲ့ အင်မော်တယ် ချည်နှောင်ခြင်း အဆောင်လက်ဖွဲ့က တကယ်ကို အားကောင်းတာပဲ... ငါ့ရဲ့ စိတ်ဝိညာဉ်သားရဲအိတ်ထဲကို လိမ်လိမ်မာမာ ဝင်လိုက်စမ်း..."

စိတ်ဝိညာဉ်သားရဲ တစ်ကောင်သည် စိတ်ဝိညာဉ်သားရဲအိတ်အတွင်းသို့ ဝင်ရောက်သွားသည်နှင့် သူ၏ အသက်သည် စိတ်ဝိညာဉ်သားရဲအိတ်ပိုင်ရှင်၏ ထိန်းချုပ်မှုအောက်သို့ ရောက်ရှိသွားပေမည်။ ထိုအချိန်ရောက်လျှင် သူ ထိုသားရဲကို လေလံရုံသို့ ယူသွား၍ ရလေပြီ။

ထို့နောက် လင်းရှောင်သည် ဟင်းလင်းပြင် သိုလှောင်အိတ်တစ်အိတ်ကို ထုတ်ယူလိုက်ပြီး နက်နဲသိမ်မွေ့ ချောက်နက် ရေနဂါးကို ထိုအထဲသို့ ချက်ချင်းသိမ်းဆည်းလိုက်၏။

အချိန်တခဏကြာပြီးနောက် လင်းရှောင်သည် ရွှမ်ထျန်း ရတနာခန်းမဆောင်အတွင်းသို့ ပျံသန်းဝင်ရောက်သွားပြီး အတွင်းရှိ ရတနာများအားလုံးကို ယူဆောင်လိုက်သည်။

"ပြန်ဖို့ အချိန်တန်ပြီ..."

ဗလာဟင်းလင်း ဖြစ်နေသော နန်းတော်ကို ကြည့်ကာ လင်းရှောင်သည် နောက်သို့လှည့်လိုက်ပြီး သူ လာခဲ့သော လမ်းအတိုင်း လျင်မြန်စွာ ပြန်သွားတော့သည်။

နောက်တစ်နေ့တွင် လင်းရှောင်က လေလံရုံသို့ ပြန်လည်ရောက်ရှိလာခဲ့သည်။

ထိုင်ခုံပေါ်တွင် ထိုင်ပြီးနောက် လင်းရှောင်သည် သူ၏ လက်ကို ဝှေ့ယမ်းလိုက်ရာ အပြာရောင် မျက်နှာပြင် တစ်ခု ထွက်ပေါ်လာပေ၏။

"အိမ်ရှင်... လင်းရှောင်"

"မျိုးနွယ်... လူသားမျိုးနွယ် / ကမ္ဘာခြားနတ်ဆိုး"

"နယ်ပယ်... တာအိုလမ်းစဉ်လျှောက်လှမ်းခြင်းနယ်ပယ် အစောပိုင်းအဆင့်"

"ရုပ်ခန္ဓာကိုယ်... ဖရိုဖရဲစိတ်ဝိညာဉ်ဘုရင် ရုပ်ခန္ဓာကိုယ် (ဘုရင်အဆင့်)"

"သိုင်းပညာ ကျွမ်းကျင်မှုများ... ကျောက်တုံးခွဲလက် (ပထမ အထွတ်အထိပ်အဆင့်)၊ ကျားနက်နှလုံးဖောက်လက်ဝါး (ပဉ္စမ အလယ်အလတ်အဆင့်)၊ စိတ်ဝိညာဉ်ဖုံးကွယ်ခြင်းနည်းစနစ် (အဆင့်မဲ့)၊ နတ်ဘုရားသတ်ဖြတ်ခြင်းဓား (သတ္တမ အထွတ်အထိပ်အဆင့်)၊ ယန်တစ်ပါး ကောင်းကင်လောင်ကျွမ်းခြင်း လက်ညှိုး (သူတော်စင်ဘုရင်အဆင့် အထွတ်အထိပ်အဆင့်)၊ နက်နဲသိမ်မွေ့ ဧကရာဇ် လောကဖိနှိပ်ခြင်း စည်းတံဆိပ် (သူတော်စင်အရှင်သခင်အဆင့် အထွတ်အထိပ်အဆင့်)၊ လောကပျက်သုဉ်းခြင်းလှံရှည် (သူတော်စင်ဘုရင်နယ်ပယ် အဆင့်မြင့်)၊ မလှုပ်မယှက် ဉာဏ်ပညာဘုရင် ရုပ်ခန္ဓာကိုယ် (သူတော်စင်အရှင်သခင်အဆင့် အထွတ်အထိပ်အဆင့်)..."

"နတ်ဘုရားစွမ်းရည် / အင်မော်တယ်နည်းစနစ်... ချီတစ်စက သန့်စင်ခြင်းသုံးခုအဖြစ် ပြောင်းလဲခြင်း (ထိပ်တန်း နတ်ဘုရားစွမ်းရည်)"

"စနစ် ဟင်းလင်းပြင်... အိမ်ရှင် ကိုယ်ပွား၊ ပိုင်ကျဲ့ (စီးတော်ယာဉ်)၊ သွေးဆာလောင်ခြင်း မိစ္ဆာချိတ်ပိတ်ဓား (နဝမ အလယ်အလတ်အဆင့်)၊ သွေးဖန်တီးခြင်း မူလအစဆေးလုံး (ဆဋ္ဌမ အထွတ်အထိပ်အဆင့်)၊ ကောင်းကင်ဘုံ မူလအစ ရွှေသံချပ်ကာ (အလွန်လွန်ကဲကဲ ဧကရာဇ်အဆင့် အဆင့်မြင့်)၊ တာအိုနားလည်သဘောပေါက်ခြင်း စိတ်ဝိညာဉ် တက်လှမ်းခြင်း လက်ဖက်ပင်(သူတော်စင်အရှင်သခင်အဆင့် အထွတ်အထိပ်အဆင့်)၊ ဖီးနစ်ဘုရင် စိတ်ဝိညာဥ်သစ်သီး (သူတော်စင်ဘုရင်နယ်ပယ် အဆင့်မြင့်)၊ အလယ်အလတ်အဆင့် ဆင့်ခေါ်ခြင်းကတ် ၃ကတ်.."

"လေလံတုံ့ပြန်မှု အကြိမ်အရေအတွက်... ၀ (၂၂ ရက်အကြာတွင် ပြန်လည်ပြည့်တင်းမည်)"

"စနစ်တာဝန်... လောကတခွင် နာမည်ကျော်ကြားခြင်း"

"၁... အရောင်းအဝယ် ပမာဏ အဆင့်နိမ့် စိတ်ဝိညာဉ်ကျောက်တုံး ၁၀ဘီလီယံထက် မနည်းသော လေလံပွဲ တစ်ခုကို ကျင်းပပါ... လက်ရှိ တိုးတက်မှု... ၀ / ၁၀ဘီလီယံ"

"၂... နယ်နိမိတ်ပင်လယ်ကြီးရဲ့ အနက်ရှိုင်းဆုံး နေရာမှာ အကျဉ်းချခံထားရတဲ့ ချောက်နက်မိစ္ဆာ ရဲ့ အကြွင်းအကျန်ခန္ဓာကိုယ်ကို သုတ်သင်ရှင်းလင်းပါ..."

"ပြီးမြောက်ခြင်း ဆုလာဘ်... ကျပန်း ပစ္စည်းကတ် ၁ ကတ်၊ အဆင့်မြင့် ဆင့်ခေါ်ခြင်းကတ် ၁ ကတ်"

"နောက်တစ်ခုကတော့... တုံ့ပြန်မှု အကြိမ်အရေအတွက် ပြန်လည်ပြည့်တင်းလာဖို့ စောင့်ပြီးတော့ လေလံပွဲ ကျင်းပရုံပဲ..."

ထိုသို့ ပြောဆိုပြီးနောက် လင်းရှောင်သည် ကျင့်ကြံရန် သူ၏အခန်းသို့ ပြန်သွားလေ၏။