အခန်း ၂၀၇

အခန်း။ ၂၀၇

လူတိုင်းက ဂူချန် ဒီအမှုမှာ အလွန်တရာ အခြေအနေဆိုးနေပြီး ရှုံးနိမ့်တော့မည်ဟု ထင်မှတ်နေကြသည်။

တိုက်ရိုက်ထုတ်လွှင့်မှုကို ကြည့်ရှုနေကြသော ပရိသတ်များဖြစ်စေ ဤအမှုကို စောင့်ကြည့်နေကြသော အမျိုးမျိုးသော ရှေ့နေများဖြစ်စေ အလားတူပင် တွေးထင်နေကြသည်။

ဂူချန်က ဘယ်လိုလုပ်ပြီး ဒီအမှုကို အနိုင်ရနိုင်မှာလဲ။

ကျောင်းဘက်မှ ရှေ့နေက သူတို့၏ အဓိက အကောင်းဆုံး လက်နက်ကို ထုတ်သုံးပြီးသွားပြီ ဖြစ်သည်။

ဒီအမှုကို နောက်ထပ် ဘယ်လိုမျိုး ဆက်ပြီး ရင်ဆိုင်တိုက်ခိုက်ကြဦးမှာလဲ။

ထိုအချိန်တွင် ဂူချန်က မတ်တတ်ရပ်လိုက်သည်။

ဂူချန်က "တရားသူကြီးမင်း ကျွန်တော်တို့ဘက်မှာ တင်ပြစရာ အထောက်အထား ရှိပါတယ်" ဟု ပြောလိုက်သည်။

ယန်ရှောင်ဒုန်းက ဂူချန်ကို တစ်ချက်ကြည့်ကာ ခေါင်းခါယမ်းလိုက်သည်။

ဂူချန် တစ်ယောက် ဤအခြေအနေကို မည်သို့ ပြောင်းလဲလှန်ပစ်မည်ကို သူ စဉ်းစားမရနိုင် ဖြစ်နေသည်။

မည်သို့ပင်ဆိုစေ ကျောင်းဘက်က ပညာသင်ဆု ချီးမြှင့်မှုနှင့် ပတ်သက်ပြီး မှားယွင်းလုပ်ဆောင်ခဲ့ခြင်း မရှိပေ။

ငွေကြေးကျပ်တည်းသော ကျောင်းသားတစ်ဦးအဖြစ် သတ်မှတ်ရန် ပထမဦးစွာ ငွေကြေးချို့တဲ့မှု ရှိရမည်ဖြစ်ပြီး ဒုတိယအချက်အနေဖြင့် ကျောင်းသား၏ သုံးစွဲမှုများသည်လည်း ထိုကျပ်တည်းသည့် စံနှုန်းများနှင့် ကိုက်ညီရပေမည်။

"ယွမ် ၈,၀၀၀ တန် ကွန်ပျူတာတစ်လုံး ဝယ်သုံးနေတာရယ်... Apple ဖုန်းနဲ့ iPad ကို သုံးနေတာတွေက ငွေကြေးကျပ်တည်းတဲ့ ကျောင်းသားတစ်ယောက်ရဲ့ ပုံစံလို့ ပြောလို့ရပါ့မလား..."

"ကျန်းထောင်က ငွေကြေးကျပ်တည်းတဲ့သူပါဆိုတာ သက်သေပြဖို့ ဂူချန် ဘာအထောက်အထားတွေများ ထုတ်ပြနိုင်မှာမို့လို့လဲ..."

"တကယ်လို့ သက်သေ မပြနိုင်ခဲ့ဘူးဆိုရင်တော့... သူတို့ ဒီအမှုကို သေချာပေါက် အနိုင်ရသွားတော့မှာပဲ..."

တရားသူကြီး ရှန်ကျားရွေက ခေါင်းညိတ်ပြလျက် "တရားလိုဘက်က အထောက်အထား တင်ပြနိုင်ပါတယ်" ဟု ပြောလိုက်သည်။

ဂူချန်က စာရွက်စာတမ်း အချို့ကို ထုတ်ယူလိုက်ပြီး "ဒါတွေကတော့ ကျန်းထောင် ဝယ်ယူခဲ့တဲ့ ပစ္စည်းသုံးခုနဲ့ ပတ်သက်တဲ့ အချက်အလက်တွေပါ ဟု ပြောလိုက်သည်။

"ကျန်းထောင် ဒီကွန်ပျူတာကို ဝယ်ခဲ့ရတဲ့ အကြောင်းရင်းကတော့... သူက ကွန်ပျူတာသိပ္ပံ ကျောင်းသားတစ်ယောက် ဖြစ်နေလို့ပါပဲ။ ဒီနယ်ပယ်က ကျောင်းသားတစ်ယောက်အနေနဲ့ ကွန်ပျူတာ မပါဘဲနဲ့ ဘယ်လိုလုပ် တက္ကသိုလ်စာတွေကို လေ့လာလို့ ရမှာလဲ၊ အဆိုင်းမန့်တွေကိုရော ဘယ်လို ပြီးအောင် လုပ်နိုင်မှာလဲ..."

"ဘာပဲပြောပြော ကွန်ပျူတာသိပ္ပံ ဘာသာရပ်က ကွန်ပျူတာရဲ့ စွမ်းဆောင်ရည် မြင့်ဖို့ လိုတာကြောင့် ကျန်းထောင်က သူ့ရဲ့ စာသင်ယူမှုအတွက် ဒီလက်ပ်တော့ပ်ကို အထူးပြုပြီး ဝယ်ခဲ့တာပါ..."

"ကျန်းထောင်မှာ ဒီလိုပစ္စည်း ဝယ်ဖို့ ပိုက်ဆံဘယ်က ရလာလဲဆိုတာ သိချင်နေကြတယ်ဆိုရင်... ကျွန်တော် ရှင်းပြပါမယ်..."

"ကျန်းထောင်က အထက်တန်းကျောင်းတက်ကတည်းက အချိန်ပိုင်းအလုပ်တွေ လုပ်ခဲ့တာပါ။ သူ့ရဲ့ အထက်တန်းကျောင်း သူငယ်ချင်းတွေနဲ့ ဆရာတွေ အားလုံးက ကျန်းထောင်ဟာ အရမ်း ကြိုးစားတဲ့သူ၊ ပိုက်ဆံရဖို့ အမြဲတမ်း ရိုးရိုးသားသား ကြိုးစားနေသူဆိုတာ သိကြပါတယ်..."

"ပြီးတော့ ဒီလက်ပ်တော့ပ်ကို အရစ်ကျစနစ်နဲ့ ဝယ်ခဲ့တာပါ၊ အတိုးမဲ့ ၂၄ ရစ်နဲ့ ဝယ်ခဲ့တာမို့လို့ တစ်လကို ယွမ် ၃၀၀ ကျော်လောက်ပဲ ကျသင့်တာပါ..."

"ကျန်းထောင်လို ကွန်ပျူတာသိပ္ပံ ကျောင်းသားတစ်ယောက်အတွက် သင့်လျော်တဲ့ ကွန်ပျူတာမရှိဘဲ သူ ဘယ်လို စာသင်ယူနိုင်မှာလဲ။ သူ့ရဲ့ တာဝန်တွေကိုရော ဘယ်လို ပြီးအောင် လုပ်ရမှာလဲ..."

ဂူချန်က ဆက်ပြီး... "ဒီအိုင်ပတ်နဲ့ Apple ဖုန်းနဲ့ ပတ်သက်ပြီး ပြောရမယ်ဆိုရင်လည်း... ဒါတွေက ကျန်းထောင် ဝယ်ယူခဲ့တဲ့ မှတ်တမ်းတွေပါပဲ..." လို့ ပြောလိုက်တယ်။

"ဒီပစ္စည်းတွေက Apple ပစ္စည်းတွေ ဆိုပေမဲ့... ကျန်းထောင်က အွန်လိုင်း တစ်ပတ်ရစ်စျေးကွက်ပလက်ဖောင်းကနေ အလွန်ချိုသာတဲ့ ဈေးနဲ့ ဝယ်ခဲ့တာပါ။ ဒီအိုင်ပတ်က ယွမ် ၁,၅၀၀ ပဲ ကျသင့်ခဲ့ပြီး... ဒီတစ်ပတ်ရစ် ဖုန်းကလည်း ယွမ် ၁,၈၀၀ ပဲ ကျသင့်ခဲ့တာပါ..."

ကြည့်ရှုနေကြသော ပရိသတ်များလည်း ရုတ်တရက် သဘောပေါက်သွားကြသည်။

အကယ်၍ ဤအတိုင်းဆိုလျှင် အရာရာတိုင်းက ကျိုးကြောင်းဆီလျော်သွားပေပြီ။

ကျန်းထောင်က ကွန်ပျူတာကို အရစ်ကျစနစ်ဖြင့် ဝယ်ယူခဲ့ပြီး တန်ဖိုးပေါ့ပါးသော တစ်ပတ်ရစ်ဖုန်းနှင့် အိုင်ပက်များကိုသာ ဝယ်ယူခဲ့ခြင်းပင်။

ဂူချန်က ဆက်ပြောသည်။

"တက္ကသိုလ်ကျောင်းသားတစ်ယောက်အနေနဲ့ ယွမ် ၁,၀၀၀ ကျော်တန်ဖိုးရှိတဲ့ ဒုတိယလက်ကိုင် ဖုန်းနဲ့ တက်ဘလက်ကို သုံးတာက တော်တော်လေး ပုံမှန်ပါပဲ။ ဒီအချက်နဲ့တင် ကျန်းထောင်ကို ငွေကြေးကျပ်တည်းသူ မဟုတ်ဘူးလို့ ပယ်ချလို့ ရနိုင်ပါ့မလား..."

ယန်ရှောင်ဒုန်းက လက်ကိုမြှောက်လိုက်ပြီး "တရားလိုဘက်က ရှေ့နေက ကျန်းထောင်က ကွန်ပျူတာသိပ္ပံ မေဂျာဖြစ်လို့ ယွမ် ၈,၀၀၀ တန် ကွန်ပျူတာ ဝယ်ခဲ့တာကို နားလည်ပေးလို့ ရတယ်လို့ ဆိုပါတယ်။ ဒါပေမဲ့ ကျန်းထောင်က တက်ဘလက်ကို တကယ်ပဲ လိုအပ်လို့လား။ အိုင်ပတ်ဝယ်ရတဲ့ ရည်ရွယ်ချက်က ဘာလဲ။ ဒုတိယလက်ကိုင် ဖြစ်နေရင်တောင်မှ ကျန်းထောင်က Apple ပစ္စည်းကို ဝယ်ခဲ့တာပါပဲ။ တက်ဘလက်က ဘာအသုံးဝင်လို့လဲ။ အဲဒါက မလိုအပ်ဘဲ ပိုက်ဆံဖြုန်းလိုက်တာ မဟုတ်ဘူးလား။ ဒါက ကျန်းထောင်မှာ ပိုက်ဆံ မရှားပါဘူးဆိုတာကို ပြနေတာပါ။ တကယ်တမ်း ငွေကြေးကျပ်တည်းတဲ့ ကျောင်းသားတွေဆိုတာ အမြဲတမ်း ချွေတာ စုဆောင်းကြတာပါ..."

"ဒါပေမဲ့ ကျန်းထောင်ကတော့ တက်ဘလက်တစ်ခုကို ရဲရဲဝံ့ဝံ့ ဝယ်ယူခဲ့ပါတယ်" ဟု တုံ့ပြန်ကာ ပြောလိုက်သည်။

ဂူချန်က ဆက်လက်၍ "ကျန်းထောင် ဒီတက်ဘလက်ကို ဝယ်ယူခဲ့ပြီးတဲ့နောက် သူ့ရဲ့ အချိန်အများစုကို စာကျက်ဖို့အတွက်ပဲ အသုံးပြုခဲ့ပါတယ်။ ဘာဖြစ်လို့လဲဆိုတော့ ပညာရေးစနစ်က အွန်လိုင်းစနစ်ကို ပြောင်းလဲလာပြီဖြစ်ပြီး အွန်လိုင်းမှာ လေ့လာစရာ ဗီဒီယိုတွေနဲ့ သင်ခန်းစာတွေ အများကြီး ရှိနေလို့ပါပဲ။ ကျန်းထောင်က ပိုမိုကောင်းမွန်စွာ လေ့လာနိုင်ဖို့၊ အမှတ်ကောင်းကောင်းတွေ ရရှိပြီး အကောင်းဆုံး ပညာသင်ဆုတွေကို ရယူနိုင်ဖို့အတွက် ဒုတိယလက်ကိုင် တက်ဘလက်ကို ဝယ်ယူခဲ့တာပါ" ဟု ပြောလိုက်သည်။

ဂူချန် စကားဆုံးသည်နှင့် တိုက်ရိုက်ထုတ်လွှင့်မှုကို ကြည့်ရှုနေကြသော ပရိသတ်များမှာ မှတ်ချက်များဖြင့် တရစပ် ရေးသားကြတော့သည်။

[ကျန်းထောင်က တကယ်ကို ငွေကြေးကျပ်တည်းတဲ့ ကျောင်းသားပါပဲ။ ဒီအချက်အလက်တွေကို ကြည့်လိုက်ရင် ငြင်းလို့မရတော့ဘူး။ အခုတော့ ဘာပြဿနာမှ မရှိတော့ပါဘူး]

[အစကတော့ ကျန်းထောင်က ဘယ်လိုမိသားစုကလဲလို့ တွေးမိတယ်။ Apple ဖုန်းသုံးတယ်၊ တက်ဘလက် ဝယ်တယ်၊ ယွမ် ၈,၀၀၀ တန် ကွန်ပျူတာ သုံးတယ်ပေါ့။ အခုတော့ အကုန်လုံး သဘောပေါက်သွားပါပြီ]

[မှန်ပါတယ်၊ ကျန်းထောင်မှာ မိဘတွေ မရှိတော့ဘူး... သူ ကိုယ့်အားကိုယ်ကိုးပြီး ရပ်တည်ရတာပါ။ ကွန်ပျူတာသိပ္ပံ ကျောင်းသားတစ်ယောက်အနေနဲ့ ဒီလိုကွန်ပျူတာမျိုး သုံးတာက သာမန်ပါပဲ၊ အထူးသဖြင့် နှစ်နှစ်အရစ်ကျစနစ်နဲ့ ဝယ်ထားတာဆိုတော့လေ]

[ဟာ... ဖုန်းနဲ့ တက်ဘလက်က တောင် ဒုတိယလက်ကိုင် တွေ ဖြစ်နေသေးတယ်။ ဒါပေမဲ့ စာကျက်ဖို့အတွက် တက်ဘလက် သုံးတာက တော်တော်လေး သာမန်ပါပဲ]

[ကျန်းထောင်ရဲ့ သုံးစွဲမှုက ဘယ်လိုမှ မဖြုန်းတီးပါဘူး။ ဒါက သာမန်ပါပဲ မဟုတ်ဘူးလား။ ကျန်းထောင်က ဆင်းရဲတုန်းပါပဲ။ သူ့မိသားစု အခြေအနေကလည်း အရမ်းဆင်းရဲပါတယ်] [တကယ်ကို ဆင်းရဲတာပါ။ ကျန်းထောင်မှာ ဘာမိသားစု အခြေအနေမှ ရှိလို့လဲ။ သူ့အဘိုးမှာလည်း ပင်စင် မရှိဘူး၊ သူကပဲ အဘိုးကို ပြုစုစောင့်ရှောက်ရဦးမှာ]

[ဒါဆိုရင်တော့ ကျန်းထောင်ကိုပဲ အားပေးတယ်]

ထိုအချိန်တွင် ယန်ရှောင်ဒုန်းက အေးစက်စက် ပြုံးလိုက်သည်။

ဂူချန် ဘယ်လိုပဲ ရှင်းပြနေပါစေ ဘာထူးခြားသွားလို့လဲ။

အသာစီးရနေတာက ငါ့ဘက်မှာပဲ…..

ယန်ရှောင်ဒုန်းက "အဲဒီလိုဆိုရင် တရားလိုဘက်ကို တစ်ခုလောက် မေးပါရစေ။ တက်ဘလက်ကလည်း စာကျက်ဖို့၊ ကွန်ပျူတာကလည်း စာကျက်ဖို့လို့ ခင်ဗျားတို့ ပြောခဲ့ကြတယ်။ ဒါဆိုရင် ဖြေပါဦး... ဘာလို့ လျှပ်စစ်စက်ဘီးကို ဝယ်ခဲ့တာလဲ။ ခင်ဗျားတို့ရဲ့ လျှပ်စစ်စက်ဘီးက ယွမ် ၂,၈၀၀ တန်ဖိုးရှိပြီး... သာမန်စက်ဘီးက ယွမ် ၁,၅၀၀ ပဲ ကျသင့်တာလေ..."

"ဒီစက်ဘီးကိုရော စာကျက်ဖို့အတွက် ဝယ်တာပါလို့တော့ မပြောနဲ့နော်။ ခင်ဗျားက တက္ကသိုလ် အိပ်ဆောင်မှာ နေတာပဲ။ စာသင်ခန်းကို သွားဖို့က ဘယ်လောက်တောင် ဝေးလို့လဲ။ တခြားကျောင်းသားတွေဆို စက်ဘီးစီးကြတယ်... ဒါမှမဟုတ် လမ်းလျှောက်သွားကြတာပါ။ ခင်ဗျားက လျှပ်စစ်စက်ဘီးနဲ့ ကျောင်းတက်တာလား..." လို့ ပြောလိုက်တယ်။

တကယ်လို့ သူသာ လျှပ်စစ်စက်ဘီး စီးနေတယ်ဆိုရင် ငွေကြေးကျပ်တည်းတဲ့ ကျောင်းသားတစ်ယောက်လို့ ဆက်ပြီး သတ်မှတ်လို့ ရဦးမလား။

ငွေကြေးကျပ်တည်းနေတဲ့သူက ဘယ်သူကများ လျှပ်စစ်စက်ဘီးနဲ့ ကျောင်းတက်ကြမှာလဲ။

ယန်ရှောင်ဒုန်းက အသာအယာ ရယ်မောလိုက်သည်။

ပွဲသိမ်းပြီ….

ဂူချန်က ဆက်လက်၍ "ကျန်းထောင် ဒီလျှပ်စစ်စက်ဘီးကို ဝယ်ခဲ့တာက စာကျက်ဖို့အတွက် မဟုတ်ပါဘူး" ဟု ရှင်းပြသည်။

ယန်ရှောင်ဒုန်းက ဂူချန်အနေဖြင့် ဤမျှအထိ ပြင်းပြင်းထန်ထန် ခုခံချေပနိုင်လိမ့်မည်ဟု လုံးဝ မမျှော်လင့်ထားပေ။

ဒီလိုပုံစံနဲ့ဆိုရင် ဂူချန် ရှုံးမှာ သေချာနေပြီ။

ဒါက တကယ်ရော ခုခံချေပချက် တစ်ခု ဟုတ်ရဲ့လား။

ဂူချန်က ကျန်းထောင်ဘက်သို့ လှည့်ကြည့်ကာ "ကျန်းထောင် ခင်ဗျား ဘာကြောင့် ဒီ ယွမ် ၂,၈၀၀ တန် လျှပ်စစ်စက်ဘီးကို ဝယ်ခဲ့ရတာလဲ ဆိုတာကို ပြောပြပါဦး" ဟု မေးလိုက်သည်။

ကျန်းထောင်က တည်ငြိမ်စွာဖြင့် "ရှေ့နေဂူ ကျွန်တော် ဒီလျှပ်စစ်စက်ဘီးကို ဝယ်ခဲ့ရတာက ကျောင်းမှာ အချိန်ပိုင်းအလုပ် လုပ်ဖို့အတွက် မဖြစ်မနေ လိုအပ်လို့ပါ။ ကျွန်တော်တို့ ကျောင်းမှာ မြောက်ကျောင်းဝင်းနဲ့ တောင်ကျောင်းဝင်းဆိုပြီး နှစ်ပိုင်းကွဲနေပါတယ်။ ကျွန်တော်က မြောက်ကျောင်းဝင်း စာကြည့်တိုက်နဲ့ တောင်ကျောင်းဝင်း စားသောက်ဆိုင်ကြားမှာ အမြဲတမ်း အလုပ်လုပ်ရပါတယ်။ ပြီးတော့ ညဘက်ရောက်ရင်လည်း အဝေးမှာရှိတဲ့ ကျူရှင်သင်တဲ့ နေရာကို သွားဖို့အတွက် လျှပ်စစ်စက်ဘီးက လိုအပ်ပါတယ်။ စက်ဘီးနင်းသွားမယ်ဆိုရင် အချိန်တွေ အရမ်းကုန်သွားပါမယ်..."

"ကျွန်တော့်ရဲ့ ကျောင်းတွင်း အချိန်ပိုင်းအလုပ်တွေက ည ၈ နာရီအထိ လုပ်ရပါတယ်။ အဲဒီကနေမှ ကျူရှင်သွားသင်ရတာပါ... စက်ဘီးနဲ့ သွားမယ်ဆိုရင် ည ၈နာရီခွဲမှ ရောက်မှာဖြစ်ပြီး အဲဒီကနေမှ နေ့စဉ် နှစ်နာရီကြာ စာသင်ပေးရပါတယ်..."

"ဒါ့အပြင် ကျွန်တော်တို့ အိပ်ဆောင်က ည ၁၁ နာရီတိတိမှာ တံခါးပိတ်ပါတယ်။ အိပ်ဆောင်ထိန်း အဒေါ်ကြီးက တံခါးကို မြန်မြန်ပိတ်တတ်တာကြောင့် ၁၁ နာရီ မတိုင်ခင် အရောက်ပြန်လာရပါတယ်။ စက်ဘီးနဲ့ဆိုရင် အချိန်မီ ပြန်မရောက်နိုင်ပါဘူး၊ ဒါကြောင့် လျှပ်စစ်စက်ဘီးကို မဖြစ်မနေ သုံးရတာပါ..."

"နေ့တိုင်း ဘတ်စ်ကားစီးမယ်ဆိုရင်လည်း တက္ကသိုလ် လေးနှစ်နဲ့ ဘွဲ့လွန် သုံးနှစ်အတွင်း ကုန်ကျစရိတ်တွေ အများကြီး ထွက်သွားမှာပါ။ ဒါကြောင့် လျှပ်စစ်စက်ဘီး တစ်စီး ဝယ်လိုက်တာ ပိုကောင်းမယ်လို့ တွေးခဲ့တာပါ..."

"ဒီစက်ဘီးကို အချိန်အကြာကြီး သုံးဖို့ ရည်ရွယ်ထားတာဖြစ်လို့ နည်းနည်း ပိုကောင်းတာကို သွားဝယ်လိုက်မိတာပါ" ဟု ရှင်းပြလိုက်သည်။