အခန်း ၂၀၈

အခန်း။ ၂၀၈

ကျန်းထောင်က ဆက်လက်၍ "ကျွန်တော် ဒီလျှပ်စစ်စက်ဘီးကို ဝယ်နိုင်ခဲ့တာက နေ့တိုင်း ကျူရှင်သင်ပေးလို့ပါ... မနက်စောစောကနေ ညအထိ အနားမယူဘဲ အချိန်ပိုင်းအလုပ်တွေ လုပ်ခဲ့တာပါ။ ပိုက်ဆံပိုရချင်လို့ပါ..." ဟု ပြောလိုက်သည်။

ယန်ရှောင်ဒုန်းက သူ၏ နှုတ်ခမ်းကို တင်းတင်းစေ့လိုက်သည်။

ဂူချန်က ဤမျှအထိ လိမ္မာပါးနပ်စွာ ချေပနိုင်လိမ့်မည်ဟု သူ လုံးဝ မထင်ထားခဲ့ပေ။

ယန်ရှောင်ဒုန်းက "ဒါဆိုရင် ကျွန်တော့်ဘက်မှာလည်း အထောက်အထား ရှိပါတယ်" ဟု ပြောကာ ဆက်ပြောသည်။

"ကျောင်းသားတစ်ယောက်က ကျန်းထောင်ရဲ့ နေ့စဉ်ဘဝကို မှတ်တမ်းတင်ထားခဲ့တာပါ..."

"မကြာသေးခင်ကမှ ကျန်းထောင်မှာ ရည်းစားရသွားပြီး သူ့ချစ်သူအတွက် ဇာမဏီပန်း နှစ်ဆယ်ကျော် ဝယ်ပေးခဲ့တာပါ။ အဲဒါတွေအတွက် ယွမ် ၂၀၀ ကျသင့်ခဲ့ပါတယ်..."

"ကျန်းထောင်က သူ့ချစ်သူအတွက် လက်ဆောင်တွေလည်း ဝယ်ပေးခဲ့ပါသေးတယ်..."

"သူတို့နှစ်ယောက် တွဲလာတာ တစ်လရှိပြီဖြစ်ပြီး... ကျန်းထောင်က သူ့ချစ်သူကို စားသောက်ဖို့၊ ဟော့ပေါ့ စားဖို့ ခဏခဏ ခေါ်ထုတ်သွားတတ်တာပါ။ ဟိုတလောကဆိုရင် တန်ဖိုးကြီး ဟိုင်ဒီလာအို စားသောက်ဆိုင်မှာ စားနေတာကိုတောင် ကျောင်းသားတွေ မိသွားခဲ့တာပါ..."

"ကျန်းထောင်က ပျော်ရွှသ်စရာရွာလေးလို့အမည်ရတဲ့ အပန်းဖြေဥယျာဉ်ကို သွားခဲ့ကြောင်း၊ ဒေသတွင်း ခရီးထွက်ခဲ့ကြောင်းကို WeChat Moments မှာတောင် တင်ထားပါသေးတယ်..."

"ဒါတွေ အားလုံးက ပိုက်ဆံတွေချည်းပါပဲ..."

"ဆင်းရဲတဲ့ ကျောင်းသားတစ်ယောက်မှာ ဒီလောက်တောင် ပိုက်ဆံ ဘယ်ကရမှာလဲ..."

"ဒီလောက်တောင် သုံးနေတယ်ဆိုရင်... ဆင်းရဲတဲ့ ကျောင်းသားတစ်ယောက်ရဲ့ သတ်မှတ်ချက်ကို ကျော်လွန်နေပြီဆိုတာ ထင်ရှားတာပေါ့။ တကယ် ဆင်းရဲနွမ်းပါးတဲ့ ကျောင်းသားတွေဆိုရင် ဒီလိုမျိုးတွေ မဝယ်နိုင်ကြပါဘူး၊ အစားအစာအတွက် ဘယ်လောက်သုံးရမလဲဆိုတာကိုတောင် ချင့်ချိန် တွက်ချက်နေရတာပါ..."

ယန်ရှောင်ဒုန်းက ပြောလိုက်သည်။

သူ့အနေဖြင့် ကျန်းထောင်က ဆင်းရဲသည့် ကျောင်းသား မဟုတ်ကြောင်းကိုသာ အဓိက သက်သေပြလိုခြင်းပင်။

ဤအချက်ဖြင့်ဆိုလျှင် သူတို့၏ အမှုမှာ သေချာပေါက် အနိုင်ရသွားတော့မည်ပင်။

ယန်ရှောင်ဒုန်းက ဆက်လက်၍ "အထက်မှာ ဖော်ပြခဲ့တဲ့ ကျန်းထောင်ရဲ့ သုံးစွဲမှု အပြုအမူတွေကို အခြေခံပြီး... ကျောင်းဘက်က ကျန်းထောင်က ဆင်းရဲသူ ပညာသင်ဆု စံနှုန်းနဲ့ မကိုက်ညီဘူးလို့ ဆုံးဖြတ်ခဲ့တာမို့လို့ ငွေကြေးအထောက်အပံ့ မပေးခဲ့တာပါ။

နောက်ပိုင်းမှာ ကျန်းထောင်က အကြိမ်ကြိမ် ပြဿနာရှာပြီးနောက် ကျောင်းဘက်က အခြေအနေတွေကို ထပ်မံစစ်ဆေး အတည်ပြုပေးခဲ့ပြီး ကျန်းထောင်ကို တတိယတန်း ငွေကြေးအထောက်အပံ့ ချီးမြှင့်ပေးခဲ့တာက တော်တော်လေး ငဲ့ညှာပေးခဲ့တာပါ..."

"ကျန်းထောင်ရဲ့ သုံးစွဲမှုက သာမန် ဆင်းရဲတဲ့ ကျောင်းသားတစ်ယောက်ရဲ့ အတိုင်းအတာကို ကျော်လွန်သွားပြီလို့ပဲ ကျွန်တော် ပြောရမှာပါ။ သူက အီလက်ထရွန်းနစ် ပစ္စည်းတွေ၊ သုံးစွဲမှုတွေ၊ ဖျော်ဖြေရေးတွေ၊ ပျော်ပါးခံစားမှုတွေ၊ ခရီးသွားတာတွေအတွက် ပိုက်ဆံအများကြီး သုံးခဲ့တာပါ..."

"ဒါကြောင့် ကျန်းထောင်ဟာ ဆင်းရဲတဲ့ ကျောင်းသား စံနှုန်းနဲ့ မကိုက်ညီဘူးလို့ ကျောင်းဘက်က ယုံကြည်တာပါ..." ဟု ပြောလိုက်သည်။

ယန်ရှောင်ဒုန်း စကားဆုံးသည်နှင့် ဂူချန်က ချက်ချင်းပင် မတ်တတ်ရပ်လိုက်သည်။

ဂူချန်က "တရားသူကြီးမင်း တရားခံဘက်က ရှေ့နေရဲ့ စကားတွေက အဓိပ္ပာယ်မရှိဘူးလို့ ကျွန်တော် ထင်ပါတယ်" ဟု ပြောလိုက်သည်။

"တရားခံဘက်က ရှေ့နေဆိုတာလည်း ရန်ချန်းတက္ကသိုလ်ရဲ့ ဥပဒေဌာနက ပါမောက္ခတစ်ယောက်ပါ။ ဆင်းရဲတဲ့ ကျောင်းသားဆိုတာ ဘာလဲဆိုတာကို ခင်ဗျား တကယ်ရော သိရဲ့လား..."

"ဆင်းရဲတဲ့ ကျောင်းသားဆိုတဲ့ ခင်ဗျားတို့ရဲ့ အဓိပ္ပာယ်ဖွင့်ဆိုချက်က အရမ်းကို ကျဉ်းမြောင်းလွန်းမနေဘူးလား..."

"ခင်ဗျားတို့ ပြောချင်တာက... ဆင်းရဲတဲ့ ကျောင်းသားဆိုတာ အဆင်းရဲဆုံး ဖြစ်ရမယ်၊ သူတို့ရဲ့ ပိုက်ဆံတွေကို ကျောင်းလခနဲ့ အခြေခံ အစားအစာတွေအတွက်ပဲ သုံးရမယ်၊ အဲဒီ အစားအစာတွေကလည်း အရိုးရှင်းဆုံးနဲ့ အပေါဆုံး ဖြစ်ရမယ်လို့ ပြောချင်တာလား..."

"သူတို့မှာ ဖျော်ဖြေရေး လှုပ်ရှားမှုတွေ လုပ်ပိုင်ခွင့် မရှိဘူး၊ ရည်းစားထားခွင့် မရှိဘူး၊ ပါတီပွဲတွေ မလုပ်ရဘူး၊ စုပေါင်းစားသောက်တာမျိုး မလုပ်ရဘူးလို့ ပြောချင်တာလား..."

"ပြီးတော့ သုံးစွဲမှု အနည်းငယ် မြင့်မားတဲ့ လှုပ်ရှားမှုတစ်ခုခု လုပ်လိုက်တာနဲ့... သူတို့က ဆင်းရဲတဲ့ ကျောင်းသားတွေ မဟုတ်တော့ဘူးလို့ ခင်ဗျားတို့ စွပ်စွဲကြတယ်..."

"ဆင်းရဲတဲ့ ကျောင်းသားတွေ ငွေဘယ်လိုသုံးရမယ်ဆိုတာကို ခင်ဗျားတို့ကပဲ သတ်မှတ်ပေးရမှာလား..."

"ဆင်းရဲတဲ့ ကျောင်းသားတစ်ယောက် အချစ်ရေးမှာ ပါဝင်တာက ဘာများ အပြစ်ဖြစ်လို့လဲ။ ဆင်းရဲတယ်ဆိုတာက ရည်းစားတောင် ထားလို့မရဘူးလို့ ဆိုလိုတာလား..."

"ဆင်းရဲတယ်ဆိုရင် ပန်းတွေ ဝယ်ခွင့်မရှိဘူးလို့ ပြောချင်တာလား..."

"ဆင်းရဲတယ်ဆိုရင် အပြင်ထွက်ပြီး ပျော်ပါးခွင့်မရှိဘူးလို့ ဆိုလိုတာလား..."

"ဆင်းရဲတဲ့ ကျောင်းသားတွေက လူသားတွေ မဟုတ်ကြဘူးလား..."

"ဆင်းရဲတဲ့ ကျောင်းသားတွေက တစ်ခါတလေ ဘဝကို မွေ့လျော်ခံစားခွင့် မရှိဘူးလား..."

"ဆင်းရဲတဲ့ ကျောင်းသားတွေက ဟိုင်ဒီလာအိုမှာ တစ်ခါတလေ သွားစားတာ ဘာဖြစ်လဲ..."

"ဘာလို့လဲ... ဟိုင်ဒီလာအိုဆိုတာ သူဌေးတွေမှသာ တတ်နိုင်ပြီး ဆင်းရဲသားတွေ သွားစားခွင့် မရှိတဲ့နေရာလို့ ခင်ဗျားတို့ ဆိုလိုချင်တာလား..."

"ဆင်းရဲတဲ့ ကျောင်းသား ဖြစ်ရမယ့် အခြေအနေဆိုတာ ငွေကြေးကျပ်တည်းတဲ့ မိသားစုက လာတဲ့ ကျောင်းသားတွေကို ဆိုလိုတာပါ။ သတ်မှတ်ထားတဲ့ စံနှုန်းအောက် နိမ့်ကျတဲ့ နှစ်စဉ်ဝင်ငွေ ရှိတဲ့ မိသားစုတွေက ဆင်းရဲတဲ့ ကျောင်းသားတွေ ဖြစ်ကြတာပါ..."

"ကျွန်တော် မေးပါရစေ... ကျန်းထောင်က တကယ်ရော မဆင်းရဲဘူးလား..."

"ကျန်းထောင်မှာ မိဘတွေ မရှိတော့ပါဘူး။ သူ့မိသားစုမှာ ပင်စင်မရှိတဲ့ အဘိုးတစ်ယောက်ပဲ ရှိတာပါ..."

"ကျန်းထောင်ရဲ့ ပိုက်ဆံတွေက ဘယ်ကလာတာလဲ။ သူ့ကို ဘယ်သူက ပိုက်ဆံပေးနိုင်မှာလဲ..."

"ကျန်းထောင်က သူ့ကိုယ်သူ ရှာဖွေရတာပါ။ သူက အချိန်ပိုင်းအလုပ်တွေကို ကြိုးစားပမ်းစား လုပ်ခဲ့တာပါ။ ကျောင်းမှာ သူ အချိန်ပိုင်းအလုပ် လုပ်ခဲ့တဲ့ မှတ်တမ်းတွေလည်း ရှိပြီးသားပါ။ ကျွန်တော် ပြောရဲပါတယ်... သူ့လောက် ကြိုးစားတဲ့သူ ဘယ်သူမှ မရှိပါဘူး..."

"သူက စာကျက်ဖို့အတွက် အီလက်ထရွန်းနစ် ပစ္စည်းတွေ ဝယ်ခဲ့တာပါ။ အထူးပြု ဘာသာရပ်တွေမှာ ကျန်းထောင်ရဲ့ စွမ်းဆောင်ရည်က ဘယ်လိုရှိလဲဆိုတာ ခင်ဗျားတို့ သိကြရဲ့လား။ သူ့ရဲ့ အထူးပြု ဘာသာရပ်တွေမှာ သူက အမြဲတမ်း ထိပ်ဆုံးကနေ ရပ်တည်နေခဲ့တာပါ..." ဟု ပြတ်သားစွာ ချေပလိုက်သည်။

"ကျန်းထောင်က ပိုက်ဆံ ရှာခဲ့တာပါ။ နေ့ရောညပါ အချိန်ပိုင်းအလုပ်တွေ လုပ်ခဲ့တယ်၊ ညဘက်တွေမှာလည်း ကျူရှင်သင်ပေးခဲ့တယ်။ အဲဒီလို ပိုက်ဆံရှာပြီးမှတော့ ဟိုင်ဒီလာအိုမှာ တစ်နပ်လောက် သွားစားတာ ဘာဖြစ်လဲ။ အချစ်ရေးမှာ ပါဝင်တာကရော မရဘူးလား..."

"သူက ဆင်းရဲတဲ့ ကျောင်းသားဖြစ်နေရုံနဲ့ ငွေနည်းနည်း ပိုသုံးမိတာ၊ ဖျော်ဖြေရေး နည်းနည်း လုပ်မိတာနဲ့တင် ဆင်းရဲတဲ့ ကျောင်းသား မဟုတ်တော့ဘူးလို့ သတ်မှတ်ရမှာလား..."

"ဒါကပဲ ခင်ဗျားတို့ရဲ့ ဆင်းရဲတဲ့ ကျောင်းသားဆိုတဲ့ အဓိပ္ပာယ်ဖွင့်ဆိုချက်လား..."

"ကျန်းထောင်ရဲ့ မိသားစု အခြေအနေက ဒီလောက်တောင် ဆင်းရဲနေတာ၊ အလုပ်ကြိုးစားလို့ ပိုက်ဆံနည်းနည်း ရှာနိုင်လာတဲ့အခါမှာ ချစ်သူထားတာ၊ အပြင်ထွက်စားတာ၊ ပျော်ပါးတာတွေ မလုပ်ရဘူးလား..."

"ခင်ဗျားတို့က ကျန်းထောင် တစ်ခါတလေ ပျော်ပါးဖို့ ထွက်သွားတာကိုပဲ မြင်ကြတယ်၊ ဒါပေမဲ့ သူ ပိုက်ဆံရှာဖို့ ဘယ်လောက်အထိ အလုပ်ကြိုးစားခဲ့ရတယ်ဆိုတာကိုတော့ ဘယ်သူမှ မမြင်ကြဘူး..."

ဂူချန် စကားဆုံးသွားသောအခါ တရားခွင်တစ်ခုလုံး ပဲ့တင်ထပ်သွားသည်။

တရားလိုဘက်က ရှေ့နေကိုယ်တိုင်ပင် ကျောချမ်းသွားရသည်။

ထိုအမှုက တကယ်ကို ရင်ခုန်စိတ်လှုပ်ရှားစရာ ကောင်းလွန်းလှသည်။

နာမည်ကြီး ရှေ့နေကြီး နှစ်ဦး တိုက်ရိုက် ရင်ဆိုင်တိုက်ခိုက်နေကြခြင်းပင်။

တရားလိုဘက်က ရှေ့နေပင် ထပ်ပြောစရာ မလိုတော့ပေ။

တရားလိုရှေ့နေသည် အလယ်တွင် တိတ်ဆိတ်စွာ ထိုင်လျက် တရားခွင်အတွင်း သူတို့နှစ်ဦး တိုက်ခိုက်နေပုံကိုသာ စိုက်ကြည့်နေသည်။

တရားသူကြီးနှင့် တရားသူကြီးအဖွဲ့ဝင်များလည်း အတူတူပင် ဖြစ်ကြသည်။

ဂူချန်က ကောင်းကောင်း သိထားသည်။ ဤအဆင့်သို့ ရောက်လာသည့်အခါတွင် ကျန်းထောင်သည် ဆင်းရဲသည့် ကျောင်းသား ဟုတ်မဟုတ်ဆိုသည်ကို ဆန့်ကျင်ဘက် ရှေ့နေနှင့် ဆွေးနွေးငြင်းခုံနေခြင်းက အဓိပ္ပာယ် မရှိတော့ပေ။

ကျန်းထောင်၏ ဆင်းရဲနွမ်းပါးသည့် ကျောင်းသား အဆင့်အတန်းသည် ပြောင်းလဲသွားမည် မဟုတ်ပေ။

သူ့အနေဖြင့် တစ်ခါတလေ ကောင်းကောင်းစားမိရုံ၊ ပျော်ပါးမှု နည်းနည်း လုပ်မိရုံဖြင့် ဆင်းရဲသည့် ကျောင်းသားအဖြစ်မှ ရပ်စဲသွားမည်လည်း မဟုတ်ပေ။

သူသည် ဆင်းရဲသည့် ကျောင်းသား ဟုတ်မဟုတ်ဆိုသည်ကို ဤအချက်များက ဆုံးဖြတ်ပေးနိုင်သည် မဟုတ်ပေ။

[၆၆၆၆၆၆၆၆၆၆]

[ရှေ့နေဂူက တကယ့်ကို အမိုက်စားပဲ]

[ဝါး.. ဒါကမှ တကယ့်ကို ဥပဒေမဲ့ မိုက်ရူးရဲဆိုတာ]

[မှန်လိုက်တာ ဆင်းရဲတဲ့ ကျောင်းသားတွေမှာ လူ့အခွင့်အရေး မရှိဘူးလား]

[ရယ်ရတယ်။ ဆင်းရဲတဲ့ ကျောင်းသားတစ်ယောက် ထမင်းစားတာတောင် အမှားဖြစ်နေပြီလား။ ဟိုင်ဒီလာအို သွားမစားရဘူးလား]

[ဆင်းရဲတဲ့ ကျောင်းသားတွေက ရည်းစားကို ပန်းစည်း မဝယ်ပေးရဘူး။ ပန်းစည်းလက်ဆောင်ပေးတာနဲ့ ဆင်းရဲတဲ့ ကျောင်းသား မဟုတ်တော့ဘူးလို့ ဘယ်ဥပဒေမှာ ပြဋ္ဌာန်းထားလို့လဲ]

တိုက်ရိုက်ထုတ်လွှင့်မှုကို ကြည့်ရှုနေကြသော ပရိသတ်များလည်း တစ်ယောက်ပြီး တစ်ယောက် မှတ်ချက်များ ရေးသားကြသည်။

တစ်ချိန်တည်းမှာပင် ယန်ရှောင်ဒုန်း၏ မျက်နှာထားမှာ မည်းမှောင်နေတော့သည်။

ဂူချန်၏ စကားများက သူ့ကို စကားမပြောနိုင်အောင် အထိနာသွားစေခဲ့သည်။

ရှေ့နေတစ်ဦးအနေဖြင့် ဂူချန်တွင် စွမ်းဆောင်ရည် အပြည့်အဝ ရှိနေသည်။

ဒါပေမဲ့ အဲဒါက ဘာထူးလဲ။

ဂူချန်က ဒီအမှုကို အနိုင်ရနိုင်လို့လား။

ကျန်းထောင်က တကယ်ပဲ ဆင်းရဲတဲ့ ကျောင်းသား ဖြစ်နေရင်တော့်ရော ဘာဖြစ်လဲ။

ယန်ရှောင်ဒုန်းက အနောက်သို့ အနည်းငယ်ဆုတ်ကာ "ကျန်းထောင် ဝယ်ထားတဲ့ အီလက်ထရွန်းနစ် ပစ္စည်းတွေနဲ့ ဆင်းရဲတဲ့ ကျောင်းသားတစ်ယောက်နဲ့ မတူတဲ့ နေထိုင်မှုပုံစံတွေကြောင့်... ကျောင်းရဲ့ လူငယ်အဖွဲ့ကော်မတီက ကျန်းထောင်ရဲ့ အခြေအနေကို သုံးသပ်ရာမှာ လွဲမှားတာတွေ ရှိခဲ့တယ်ဆိုရင်တောင်... ဒါက နားလည်ပေးလို့ ရတဲ့ ကိစ္စပါပဲ..."

"တကယ်လို့ ကျန်းထောင်က အမှန်တကယ် ဆင်းရဲတဲ့ ကျောင်းသား ဖြစ်တယ်ဆိုရင်... ကျောင်းဘက်က ကျန်းထောင်ရဲ့ ငွေကြေးထောက်ပံ့မှု ခံစားခွင့်ကို ပြန်ပေးနိုင်ပါတယ်။ ဒါပေမဲ့ ကျောင်းရဲ့ ငွေကြေးထောက်ပံ့မှု ခွဲဝေမှုမှာ ဘယ်တုန်းကမှ ပြဿနာ မရှိခဲ့ဖူးပါဘူး..."

"အထူးသဖြင့် သူဌေးသားတွေက ဆင်းရဲတဲ့ ကျောင်းသားတွေရဲ့နေရာကို အစားထိုးပြီး ထောက်ပံ့ကြေး ရယူတယ်ဆိုတဲ့ ဖြစ်ရပ်မျိုး လုံးဝ မရှိခဲ့ပါဘူး..."

"ရန်ချန်းတက္ကသိုလ်အနေနဲ့ တောင်းပန်နိုင်ပြီး ကျန်းထောင်ရဲ့ ငွေကြေးထောက်ပံ့မှု ခံစားခွင့်ကိုလည်း ပြန်ပေးနိုင်ပါတယ်။ ဒါပေမဲ့..."

"ရှေ့နေ ဂူချန်က ရန်ချန်းတက္ကသိုလ်ကို အသရေဖျက်ခဲ့ပါတယ်... ကျောင်းအုပ်ကြီး၊ ဒုကျောင်းအုပ်ကြီးနဲ့ လူငယ်အဖွဲ့ကော်မတီက ဆရာများစွာကို အသရေဖျက် စွပ်စွဲခဲ့တာပါ..."

"ဒါ့အပြင် ရှေ့နေ ဂူချန်က ချမ်းသာတဲ့သူတွေက ဆင်းရဲတဲ့ ကျောင်းသားတွေကို အစားထိုးပြီး ထောက်ပံ့ကြေး ရယူနေကြတယ်လို့ အကြိမ်ကြိမ် ပြောခဲ့တာတွေက ကောလာဟလတွေချည်းပါပဲ..."

"ရှေ့နေ ဂူချန်က တဖက်သတ် ကောလာဟလတွေကို ဖြန့်ပြီး... ကျောင်းရဲ့ ဂုဏ်သိက္ခာကို ကြီးမားစွာ ထိခိုက်စေခဲ့တဲ့အတွက် ဂူချန်ကို ဥပဒေအရ တာဝန်ယူစေဖို့ တရားရုံးကို တောင်းဆိုပါတယ်..."

"ဂူချန်ရဲ့ အသရေဖျက်မှုနဲ့ စွပ်စွဲချက်တွေက ကျောင်းရဲ့ ဂုဏ်သိက္ခာကို ထိခိုက်စေတာပါ။ အကြောင်းမဲ့ တရားစွဲဆိုတာတွေ လုပ်တာဟာ အခြားသူတွေနဲ့ ကျောင်းအပေါ် မမှန်မကန် စွပ်စွဲပြစ်တင်တာ မြောက်ပါတယ်..."

"ဒါ့အပြင် ရှေ့နေတစ်ယောက်ဖြစ်ပါလျက်နဲ့ ဥပဒေကို သိရက်နဲ့ ချိုးဖောက်တဲ့ ဂူချန်ကို ပိုပြီး ပြင်းထန်တဲ့ ပြစ်ဒဏ် ပေးသင့်ပါတယ်..."