အခန်း ၂၁၀

အခန်း။ ၂၁၀

ယန်ရှောင်ဒုန်းက "တရားသူကြီးမင်း တရားလိုဘက်က ရှေ့နေက ကျွန်တော်တို့ကို အသရေဖျက်နေတယ်လို့ ကျွန်တော် ယုံကြည်ပါတယ်" ဟု ပြောလိုက်သည်။

"တရားလိုဘက်က ရှေ့နေက ကျွန်တော်တို့ တက္ကသိုလ်မှာ ဆင်းရဲတဲ့ ကျောင်းသားများစွာက ရွေးချယ်ခံရခြင်း မရှိကြဘူးလို့ စွပ်စွဲခဲ့ပြီး ဒါက ပညာသင်ဆု ရွေးချယ်ရေး လုပ်ငန်းစဉ်မှာ နောက်ကွယ်က တာဝန်ခံမှုတွေ ရှိနေတယ်လို့ သွယ်ဝိုက်ပြီး စွပ်စွဲနေတာပါပဲ..."

"ပညာသင်ဆု ရွေးချယ်ရေး လုပ်ငန်းစဉ်ကို ကျောင်းသားသမဂ္ဂနဲ့ အတန်းကော်မတီတွေက ကိုင်တွယ်ဆောင်ရွက်တာဖြစ်ပြီး... ကျောင်းသားတွေ ကိုယ်တိုင် လုပ်ဆောင်ကြတာဖြစ်ကြောင်း ကျွန်တော် အရင်က ပြောခဲ့ပြီးပါပြီ။ ဒါကြောင့် အချို့သော လွတ်ကင်းမှုတွေနဲ့ အမှားအယွင်းတွေ ဖြစ်ပေါ်လာတာက ပုံမှန်ပါပဲ..."

"တစ်ဦးချင်း ကျောင်းသားအချို့မှာ ပညာသင်ဆုနဲ့ ပတ်သက်ပြီး ပြဿနာတွေ ရှိနေတာကလည်း ရှောင်လွှဲလို့ မရနိုင်တဲ့ ကိစ္စပါပဲ..."

"ကျောက်ဝမ်ရွှမ်းက သူဌေးသားတစ်ယောက် ဖြစ်နေတာနဲ့ပဲ ဘာဖြစ်လဲ။ ကျောင်းအနေနဲ့ ဆင်းရဲတဲ့ ကျောင်းသား တစ်ယောက်ချင်းစီရဲ့ မိသားစု အခြေအနေကို လိုက်လံစစ်ဆေးဖို့ဆိုတာ တကယ်ကို မဖြစ်နိုင်ပါဘူး။ ပြီးတော့ ကျောင်းအုပ်ချုပ်သူတွေကလည်း အမြဲတမ်း အလုပ်များကြပါတယ်။ ဒါ့အပြင် ကျောက်ဝမ်ရွှမ်းကို ဘယ်ကျောင်းသားကမှ တိုင်ကြားခဲ့တာ မရှိသလို... တင်ပြလာတဲ့ အချက်အလက်တွေကလည်း သူ့ရဲ့ ဆင်းရဲနွမ်းပါးတဲ့ အခြေအနေကို သက်သေပြဖို့ လုံလောက်နေတာကြောင့် ထပ်မံ စုံစမ်းစစ်ဆေးမှုတွေ မလုပ်ခဲ့တာပါ..."

"အခုလို အမှန်တရား ပေါ်ပေါက်လာတဲ့အတွက် ကျောင်းဘက်က ကျောက်ဝမ်ရွှမ်းရဲ့ ပထမတန်း ပညာသင်ဆုကို ဖျက်သိမ်းပေးမှာဖြစ်ပြီး... အဲဒီပညာသင်ဆုကို ကျောင်းသား ကျန်းထောင်ဆီ လွှဲပြောင်းပေးအပ်သွားမှာပါ။ ကျောင်းဘက်ကလည်း တောင်းပန်သွားမှာဖြစ်ပြီး အနာဂတ်မှာ အမှားအယွင်း မရှိအောင် ဆင်းရဲနွမ်းပါးတဲ့ ကျောင်းသားတွေနဲ့ ပတ်သက်ပြီး စုံစမ်းစစ်ဆေးမှုကို ပိုတိုးမြှင့်ပြီး လုပ်ဆောင်သွားမှာပါ..."

"ဒါပေမဲ့ တရားလိုဘက်က ရှေ့နေက ကျွန်တော်တို့ရဲ့ ပညာသင်ဆု လျှောက်ထားရေး လုပ်ငန်းစဉ်မှာ နောက်ကွယ်က လိမ်လည်လှည့်ဖြားမှုတွေ ရှိနေတယ်လို့ အခိုင်အမာ စွပ်စွဲနေမယ်ဆိုရင်တော့... ကျွန်တော် လုံးဝ လက်ခံနိုင်စရာ မရှိပါဘူး..."

"ဒါ့အပြင် ကျွန်တော်တို့ ကျောင်းမှာ ဆင်းရဲတဲ့ ကျောင်းသားအများစု ပညာသင်ဆု မရဘဲ နေတယ်ဆိုတာလည်း လုံးဝ မဖြစ်နိုင်ပါဘူး..."

"တရားလိုဘက်က ရှေ့နေက ဒီလို အဓိပ္ပာယ်မရှိတဲ့ ငြင်းခုံချက်တွေနဲ့ ကျွန်တော်တို့ ကျောင်းရဲ့ ဂုဏ်သိက္ခာကို ညှိုးနွမ်းစေနိုင်မယ်လို့ ထင်နေတာလား..."

"တရားသူကြီးမင်း... ဂူချန်အပေါ် ဥပဒေအရ အရေးယူပေးဖို့ ကျွန်တော် တောင်းဆိုပါတယ်..."

တရားသူကြီး စကားမပြောရသေးမီမှာပင် ဂူချန်က ထရပ်လိုက်သည်။

ရွှယ်ချင်းချင်းက စာရွက်စာတမ်း အထပ်လိုက်ကို ဂူချန်ထံသို့ တိုက်ရိုက် လှမ်းပေးလိုက်သည်။

"ဒါတွေကတော့ ဒီနှစ် ရန်ချန်းတက္ကသိုလ်က ဆင်းရဲနွမ်းပါးတဲ့ ကျောင်းသား ၁၅ ဦးရဲ့ အချက်အလက် စာရွက်စာတမ်းတွေပါ။ သူတို့ရဲ့ လုပ်ထုံးလုပ်နည်းတွေနဲ့ အချက်အလက်တွေမှာ ဘယ်လို အမှားအယွင်းမှ မရှိပါဘူး။ ဒါပေမဲ့ အဲဒီ ၁၅ ဦးစလုံး ပညာသင်ဆု ရွေးချယ်ခံရခြင်း မရှိခဲ့ပါဘူး အချို့ကသာ တတိယတန်း ပညာသင်ဆုကို ရရှိခဲ့ကြပါတယ်"

ဂူချန်က အထောက်အလက်များကို တင်ပြလိုက်သည်။

တရားသူကြီး ရှန်ကျားရွေက တစ်ချက် ငုံ့ကြည့်လိုက်သည်....

အံ့ဩစရာပင်။

ဆင်းရဲနွမ်းပါးတဲ့ ဒီကျောင်းသား ၁၅ ဦးစလုံး ရွေးချယ်ခံရခြင်း မရှိခဲ့ဘူး……

အချို့သော စာရွက်စာတမ်းများက အခြား ဆင်းရဲနွမ်းပါးသော ကျောင်းသားများအတွက် ဖြစ်ပြီး သူတို့သည် တတိယတန်း ပညာသင်ဆုကိုသာ ရရှိခဲ့ကြသည်။

သို့သော် သူတို့၏ ဆင်းရဲနွမ်းပါးမှု အဆင့်အတန်းအရဆိုလျှင် ပထမတန်း ပညာသင်ဆုကို ရရှိသင့်သည်။

အမှုက ဤအဆင့်သို့ ရောက်လာသည့်အခါ လူတိုင်း ရှင်းရှင်းလင်းလင်း မြင်တွေ့ကြရပြီ ဖြစ်သည်။

"ကျောင်းဘက်မှာ ပြဿနာ ရှိနေတာပဲ..."

"သူဌေးသား ကျောက်ဝမ်ရွှမ်းက ဘယ်လိုလုပ်ပြီး ပထမတန်း ပညာသင်ဆုအတွက် ရွေးချယ်ခံရတာလဲ..."

"ကျောက်ဝမ်ရွှမ်းရဲ့ ထောက်ခံစာကို ဘယ်သူက ထုတ်ပေးခဲ့တာလဲ..."

"သူ့ဘာသာသူ အတုလုပ်ထားတာချည်းတော့ မဖြစ်နိုင်ဘူး မဟုတ်လား..."

[ကောင်းလိုက်တာ ကျောင်းမှာ ဆင်းရဲတဲ့ ကျောင်းသားတွေ ဒီလောက်တောင် များများစားစား မရွေးချယ်ခံရဘဲ နေခဲ့ကြတာလား]

[သူတို့ရဲ့ စာရွက်စာတမ်းတွေမှာ ပြဿနာ ရှိစရာ အကြောင်းကို မရှိတာ]

[ဒီကျောင်းမှာ ပြဿနာရှိတယ်ဆိုတာ ထင်ရှားနေပြီ။ ချမ်းသာတဲ့ ကျောင်းသားတွေကိုပဲ ပညာသင်ဆု ပေးနေတာ မဟုတ်ဘူးလို့ ဘယ်သူက အာမခံနိုင်မှာလဲ]

[အမှန်တရားကတော့ တစ်ခါတလေ ပညာသင်ဆု ရွေးချယ်မှုတွေမှာ အဆက်အသွယ်တွေကို ကြည့်ပြီး ရွေးကြတာပါပဲ။ ဆင်းရဲရုံနဲ့ အလိုလို ရလာတာမျိုး မဟုတ်ပါဘူး။ ကျောင်းသားသမဂ္ဂ အများစုက ဒီလိုပါပဲ]

[သြော်... ကျွန်တော်တို့ ကျောင်းကတော့ ဒါနဲ့စာရင် တော်ပါသေးတယ်။ ကျွန်တော်တို့က 985 တက္ကသိုလ် ဖြစ်ပြီး ပညာသင်ဆု စာရင်းတွေကိုလည်း လူသိရှင်ကြား ထုတ်ပြန်ပေးတာမို့ ငြင်းခုံစရာ မရှိပါဘူး]

[ကောင်းတဲ့ကျောင်းဆိုရင် ပညာသင်ဆုကိစ္စနဲ့ ပတ်သက်ပြီး အရှုပ်အထွေး မလုပ်ပါဘူး။ အမှန်အတိုင်းပြောရရင် ကျွန်တော်တို့ကျောင်းက သာမန်ပါပဲ။ ဒါပေမဲ့ ပညာသင်ဆုတွေကတော့ အများသိအောင် ထုတ်ပြန်ပေးပါတယ်]

[ဒါဆိုရင် ဒီပညာသင်ဆုတွေနဲ့ ပတ်သက်ပြီး တကယ်ပဲ ဘာတွေဖြစ်နေတာလဲ]

စာရွက်စာတမ်း အမြောက်အများကို ကြည့်လိုက်ရင်း တရားခံဘက်မှ ထိုင်ခုံတွင် ထိုင်နေကြသော လူလေးဦးမှာ အနည်းငယ် မသက်မသာ ဖြစ်လာကြသည်။

ကျောင်းအုပ်ကြီး၊ ဒုကျောင်းအုပ်ကြီးနှင့် လူငယ်အဖွဲ့ကော်မတီမှ ဆရာတို့ အားလုံး မျက်နှာငယ်သွားကြသည်။

ဘာမှ မဖြစ်လောက်ပါဘူး မဟုတ်လား။

ငါတို့ကို ထိခိုက်လာစရာ အကြောင်း မရှိလောက်ဘူး မဟုတ်ဘူးလား။

တောင်းပန်လိုက်ရုံနဲ့တင် ပြီးသွားမှာပါလေ။

"ပညာသင်ဆု ရွေးချယ်မှုမှာ လုပ်ထုံးလုပ်နည်း ပြဿနာတစ်ခု ရှိခဲ့တယ်လို့ပဲ ပြောလိုက်ကြတာပေါ့"

"ဒါဆိုရင် ပညာသင်ဆုတွေကို ပြန်လည် စိစစ်သတ်မှတ်လိုက်မယ်ဆိုရင် အကုန် အဆင်ပြေသွားမှာပါ"

"ဒီပြဿနာက အဲဒီလောက်ကြီး မကြီးမားပါဘူး"

"ငါတို့ ဘာတွေလုပ်ခဲ့တယ်ဆိုတာနဲ့ ပတ်သက်ပြီးတော့လည်း ဂူချန်မှာ ဘယ်လိုမှ အထောက်အထား ရှိလာစရာ အကြောင်း မရှိပါဘူး"

ယန်ရှောင်ဒုန်း၏ မျက်နှာထားကလည်း တင်းမာကာ မည်းမှောင်နေခဲ့သည်။

ဂူချန်က ထိုအချက်အလက်ကိုပါ ဖော်ထုတ်နိုင်လိမ့်မည်ဟု သူ လုံးဝ မထင်ထားခဲ့ပေ။

ဒါပေမဲ့ ဘာဖြစ်လဲ။

ဒါက ဘာကို သက်သေပြနိုင်လို့လဲ။

ယန်ရှောင်ဒုန်းက "တရားလိုဘက်က ရှေ့နေကို သတိပေးတဲ့အတွက် ကျေးဇူးတင်ပါတယ်။ ကျောင်းဘက်မှာ ပညာသင်ဆုနဲ့ ပတ်သက်တဲ့ ပြဿနာအချို့ အမှန်တကယ် ရှိခဲ့ပုံပဲ။ ဒါပေမဲ့ ဒီနှစ်ရဲ့ ရွေးချယ်မှုကို ကျောင်းသားသမဂ္ဂနဲ့ အတန်းကော်မတီတွေကသာ ကိုင်တွယ်ခဲ့တာဖြစ်ပြီး သူတို့အားလုံးက ပထမနှစ် ကျောင်းသားတွေချည်းပဲ။ လုပ်ထုံးလုပ်နည်းတွေကို သူတို့ အကျွမ်းတဝင် မရှိတာ ထင်ရှားတဲ့အတွက် အမှားအယွင်းအချို့ ဖြစ်ပေါ်ခဲ့ရပြီး ဒါက ကျောင်းရဲ့ တာဝန်ပါပဲ" ဟု ပြောလိုက်သည်။

"ကျောင်းဘက်ကနေ နောက်ပိုင်းမှာ တောင်းပန်စာ ထုတ်ပြန်ပေးသွားမှာပါ။ ကျောင်းသားတွေကြားမှာ အဆက်အသွယ်တွေကြောင့် ပညာသင်ဆု အစားထိုးခံရတာ ဒါမှမဟုတ် ဘက်လိုက်တာတွေ ရှိခဲ့တယ်ဆိုရင်... ကျောင်းဘက်ကနေ တင်းကျပ်တဲ့ အရေးယူမှုတွေကို သေချာပေါက် လုပ်ဆောင်သွားမှာပါ..."

"ပြန်ရောက်တာနဲ့ ကျောင်းဘက်က ဒီကိစ္စကို သေချာပေါက် စုံစမ်းစစ်ဆေးသွားမှာဖြစ်ပြီး... အပြစ်ရှိတဲ့ ကျောင်းသားတွေကို စည်းကမ်းပိုင်းဆိုင်ရာ အရေးယူတာတွေ ပြုလုပ်သွားမှာပါ..."

"အဲဒီနောက်မှာ ကျောင်းက ပညာသင်ဆုတွေကို ပြန်လည် စိစစ်ပေးသွားမှာဖြစ်ပြီး... ရွေးချယ်ခံရခြင်း မရှိခဲ့တဲ့ ဆင်းရဲနွမ်းပါးတဲ့ ကျောင်းသားအားလုံး ပညာသင်ဆု ရရှိကြဖို့ကို အာမခံပေးသွားမှာပါ..."

"ဒါ့အပြင် ကျောင်းက ဒီပြဿနာတွေဆီကနေ သင်ခန်းစာယူပြီး... အနာဂတ်မှာ ဒီလိုပြဿနာမျိုးတွေ ထပ်မံမဖြစ်ပွားအောင် ပြုပြင်သွားမှာပါ..."

ယန်ရှောင်ဒုန်းလည်း ယခုအချိန်တွင် ခေါင်းမာနေရုံဖြင့် မဖြစ်တော့ကြောင်း သဘောပေါက်လာခဲ့သည်။

သူ အပြစ်ကို ဝန်ခံရတော့မည်ပင်။

အပြစ်ဝန်ခံသည့်တိုင်အောင် သူတို့က အပြစ်အားလုံးကို ကျောင်းသားများဆီသို့သာ ဆက်လက် ပုံချနေဆဲပင်။

ကျောင်းဘက်က တောင်းပန်စာ ထုတ်ပေးရုံသာ ရှိမည်ဖြစ်ပြီး လျော်ကြေးပေးစရာ မလိုသလောက်ပင် ဖြစ်ပေမည်။

အများဆုံးအနေဖြင့် ကျောင်းဘက်က တရားစွဲဆိုမှု စရိတ်များကိုသာ ကျခံပေးရမည်ဖြစ်ပြီး ယင်းမှာလည်း ပမာဏ ကြီးမားလှသည် မဟုတ်ပေ။

ထိုအရာမျာရက အသေးစား ပြဿနာများသာ ဖြစ်သည်။

"ဒါပေမဲ၊ ရှေ့နေ ဂူချန်ရဲ့ အခြား တရားစွဲဆို တောင်းဆိုချက်တွေကိုတော့ ကျွန်တော်တို့ဘက်က အခိုင်အမာ ငြင်းပယ်ပါတယ်"

"ကျွန်တော်တို့ ကျောင်းက အမြဲတမ်း တရားမျှတပြီး ဖြောင့်မတ်ခဲ့တာပါ။ တစ်ခါတလေ အမှားအယွင်း ဖြစ်တာက ပုံမှန်ပါပဲ"

"ဒါပေမဲ့ ကျောင်းခေါင်းဆောင်တွေက အကျိုးအမြတ်အတွက် ပူးပေါင်းကြံစည်တယ်လို့ ပြောဆိုတာကိုတော့ လုံးဝ သဘောမတူနိုင်ပါဘူး ဂူချန်က ကျွန်တော်တို့ ကျောင်းကို ဆက်လက် အသရေဖျက်နေတုန်းပါပဲ"

ယန်ရှောင်ဒုန်းက ကိစ္စရပ်ကို နောက်ဆုံးအကြိမ်အနေဖြင့် ဂူချန်ဘက်သို့ ပြန်လည်လှည့်ရန် ကြိုးစားလိုက်သည်။

ဂူချန်ကတော့ ရိုးရိုးလေးသာ ပြုံးလိုက်သည်။

ဤတရားစွဲဆိုမှုတွင် အစပိုင်းက ဆင်းရဲနွမ်းပါးသည့် ကျောင်းသားတစ်ဦး၏ ပညာသင်ဆုကိစ္စဆိုသည်မှာ အစပျိုးရုံသက်သက်သာ ဖြစ်ပြီး အဘယ်ကြောင့်ဆိုသော် ကျောင်းဘက်မှ ထိုပညာသင်ဆုကိစ္စတွင် ပေါ့ဆမှုရှိခဲ့လျှင်ပင် ၎င်းမှာ ကြီးမားသည့် ပြဿနာမဟုတ်ဘဲ အများဆုံး တောင်းပန်ရုံဖြင့် ပြီးပြတ်သွားနိုင်သောကြောင့်ပင်။

သို့သော်လည်း ဂူချန်ကမူ အစကတည်းက ကျောင်းအုပ်ကြီး၊ ဒုကျောင်းအုပ်ကြီးနှင့် ကျောင်းသားသမဂ္ဂ တာဝန်ခံဆရာတို့ကိုပါ တစ်ပါတည်း တရားစွဲဆိုထားပြီးဖြစ်သည်။

ဂူချန်က "တကယ်တော့ ရန်ချန်းတက္ကသိုလ်ရဲ့ နှစ်စဉ် ပညာသင်ဆု ကိစ္စတွေကို ကျွန်တော် စုံစမ်းခဲ့ပြီးပါပြီ။ နှစ်တိုင်းလိုလို ဆင်းရဲတဲ့ ကျောင်းသား အများအပြားက ပညာသင်ဆု မရခဲ့ကြပါဘူး။ ကျွန်တော် ခုနက တင်ပြခဲ့တဲ့ နာမည် ၁၅ ခုဆိုတာ ကျောင်းရဲ့ စာရင်းအပြည့်အစုံ မဟုတ်ပါဘူး။ တော်တော်လေး ဆင်းရဲနွမ်းပါးတဲ့ ကျောင်းသားတွေရဲ့ ဥပမာ အချို့ပါ..." ဟု ပြောလိုက်သည်။

ဂူချန်က ဆက်ပြီး...

"တကယ်တော့ ဒီကျောင်းမှာ နှစ်စဉ် ကျောင်းသား အနည်းဆုံး လေးဆယ်လောက်က ပညာသင်ဆု မရကြပါဘူး..."

"ပြီးတော့ ရန်ချန်းတက္ကသိုလ်က လွန်ခဲ့တဲ့ ဆယ်နှစ်အတွင်း ပညာသင်ဆု ရရှိသူတွေရဲ့ စာရင်းကို တစ်ခါမှ လူသိရှင်ကြား မထုတ်ပြန်ခဲ့ပါဘူး။ တစ်ခါတလေ ထုတ်ပြန်တဲ့အခါမျိုးမှာလည်း အဲဒီစာရင်းတွေက အတုအယောင်တွေ ဖြစ်နေတာပါ..."

"စာရင်းထဲမှာပါတဲ့ ကျောင်းသား အနည်းဆုံး လေးဆယ်ဆိုတာ တကယ်တမ်း မရှိကြပါဘူး..."

"တကယ်လို့ ဒီကျောင်းသား လေးဆယ်ဆိုတာ မရှိဘူးဆိုရင်... သူတို့ရဲ့ ပညာသင်ဆု ငွေတွေ ဘယ်ကို ရောက်သွားခဲ့တာလဲ..."

"ပထမတန်း ပညာသင်ဆု တစ်ခုကို အနည်းဆုံး ယွမ် ၅,၀၀၀ ကျသင့်ပြီး... လူလေးဆယ်ဆိုရင် ယွမ် ၂၀၀,၀၀၀ ဖြစ်ပါတယ်..."

"ဒါ့အပြင် နှစ်စဉ် ပညာသင်ဆု ရန်ပုံငွေ အချို့က... ကျောင်းအုပ်ကြီးရဲ့ ဆုကြေးပဲဖြစ်ဖြစ်၊ နိုင်ငံတော် ပညာသင်ဆုပဲဖြစ်ဖြစ်၊ တကယ်မရှိတဲ့ ကျောင်းသားတွေဆီကို ပေးအပ်နေခဲ့တာပါ..."

"နှစ်စဉ် ပညာသင်ဆုနဲ့ ဆုကြေးငွေ ရန်ပုံငွေ တစ်ခုတည်းကတင် ယွမ် ၄၀၀,၀၀၀ ကျော် ရှိနေတာပါ..."

"ပြီးတော့ ဒါက ရေခဲတောင်ရဲ့ ထိပ်ဖျားလေး သက်သက်ပါပဲ..."

ဂူချန် ပြောဆိုနေရင်းဖြင့် အချက်အလက် အထောက်အထားများကိုပါ ဆက်လက် တင်ပြလိုက်သည်။

ရွှယ်ချင်းချင်းက သူ့ဘေးတွင် ရပ်လျက် အထောက်အထား စာရွက်စာတမ်းများကို ဆက်လက် ကူညီပေးနေသည်။

ဂူချန်၏ ရှင်းလင်းတင်ပြချက်များကို နားထောင်နေကြရစဉ် လူတိုင်း အလွန်တရာ တုန်လှုပ်ချောက်ချားသွားကြရသည်။

ဒါဆိုရင် ဒီပညာသင်ဆု ငွေတွေ အားလုံးကရော တရားခံဘက်က ထိုင်ခုံမှာ ထိုင်နေကြသူတွေက ခေါင်းပုံဖြတ်သွားခဲ့ကြတာလား။