အခန်း ၉
Vol. 1 Ch. 9
အခန်း (၉) ကတ်ပြားအသစ်
ရှင်းယုံ၏ နေအိမ်။
ခြံဝင်းနှစ်ခုပါသော အိမ်လေးမှာ ယခုအခါ လူများဖြင့် ပြည့်နှက်နေလေပြီ။
ခြံဝင်းထဲသို့ ဝင်ဝင်ချင်း ချန်မူ အရင်ဆုံးမြင်လိုက်ရသည်မှာ မြေပြင်ပေါ်ရှိ ရှင်းယုံ၊ လျိုပေါက်နှင့် အခြားသုံးယောက်၏ အလောင်းများကို စစ်ဆေးနေသော မုတ်ဆိတ်မွေးအပြည့်နှင့် လူသန်ကြီးတစ်ယောက်ပင်။
"ခေါင်းဆောင်ကြီးရှဲ့..."
ချန်မူက ရပ်နေပြီး ဟွမ်ဖေးယန်က ရှေ့သို့ အနည်းငယ်တိုးကာ လက်ယှက်၍ အရိုအသေပေးလိုက်၏။
"ဖေးယန် ရောက်လာပြီလား..."
လူသန်ကြီးက ခေါင်းပင်မမော့ဘဲ အလောင်းကို ဆက်လက်စစ်ဆေးနေရင်း "မကြာသေးခင်က ရှင်းယုံ ဘယ်သူနဲ့ ခိုက်ရန်ဖြစ်ထားလဲဆိုတာ မင်း သိလား" ဟု မေးလိုက်သည်။
"ခေါင်းဆောင်ကြီးရှဲ့ကို တင်ပြပါတယ်... ကျွန်တော် သေချာတော့ မသိပါဘူး" ဟွမ်ဖေးယန်က ပြန်ဖြေလိုက်သည်။ "အစ်ကိုပေါက်နဲ့ တခြားလူတွေကသာ ဂိုဏ်းခွဲမှူးရှင်းနဲ့ အချိန်အကြာဆုံး အတူရှိနေခဲ့ကြတာပါ..."
ထို့နောက် သူက ဘာမှ ဆက်မပြောတော့ချေ။
လျိုပေါက်နှင့် အခြားသုံးယောက်မှာ ရှင်းယုံ၏ လူယုံတော်များဖြစ်ကြပြီး ရှင်းယုံ ဘာတွေလုပ်ခဲ့သလဲဆိုတာကို သူတို့က အခြေခံအားဖြင့် သိရှိကြသည်။
သို့သော် ပြဿနာမှာ ယခုအခါ လျိုပေါက်နှင့် အခြားသုံးယောက်စလုံး သေဆုံးသွားခဲ့ပြီ ဖြစ်သည်။
ကံကောင်းထောက်မစွာဖြင့် ဟွမ်ဖေးယန်မှာ နှစ်အတော်ကြာ တိုက်ပွဲဝင်လာခဲ့သူဖြစ်ရာ သူ၏ စိတ်တည်ငြိမ်မှုက အတော်လေး ကောင်းမွန်နေဆဲပင်။
ရှဲ့ဟုန်က ဒေါသမထွက်ဘဲ သိုင်းသမားတစ်ယောက်၏ အရှိန်အဝါကိုသာ ထုတ်လွှတ်လိုက်သည်။
မဟုတ်ပါက ဟွမ်ဖေးယန်မှာ သူ ဆက်လက် ဟန်ဆောင်ထားနိုင်မည်လား၊ ဟန်ပျက်သွားလေမလားဆိုတာကို မသေချာတော့ပေ။
သေချာပေသည်။
အရေးအကြီးဆုံးအချက်မှာ အလောင်းများကို စစ်ဆေးပြီးနောက် ရှဲ့ဟုန်က ချန်ဖျင်ရပ်ကွက်ဘက်မှ မည်သူမျှ ရှင်းယုံနှင့် လျိုပေါက်တို့ကို ဤမျှလွယ်ကူစွာ သတ်ဖြတ်နိုင်မည် မဟုတ်ကြောင်း ကောက်ချက်ချလိုက်ခြင်းပင်။
"အပ်တွေက မျက်နှာကို ဖုံးလွှမ်းသွားတယ်... သံချွန်က လည်ချောင်းကို ဖောက်ထွက်သွားတယ်..."
ရှဲ့ဟုန်က မတ်တပ်ရပ်လိုက်ပြီး တည်ငြိမ်စွာဖြင့် "ရှင်းယုံကို သတ်သွားတဲ့လူက ကျွမ်းကျင်တဲ့ တိုက်ခိုက်ရေးသမားပဲ။ ရှင်းယုံနဲ့ သူ့လူတွေက သိပ်တောင် ပြန်မခုခံလိုက်ရဘဲ တစ်ချက်တည်းနဲ့ အားလုံး သေကုန်ကြတာပဲ" ဟု ပြောလိုက်သည်။
ဟွမ်ဖေးယန်က တိတ်ဆိတ်နေချေသည်။
သို့သော် သူ၏ နှလုံးသားက တစ်ချက် ခုန်သွားရသည်။
'ရှင်းယုံက သိပ်တောင် ပြန်မခုခံလိုက်နိုင်ဘဲ သေသွားတာလား...'
'ချန်မူရဲ့ လုပ်ကြံသတ်ဖြတ်မှုက တကယ်ကို အံ့မခန်းပါပဲ... သူက ငါ့ညီဖြစ်ရတာ တကယ်ကို ထိုက်တန်ပါတယ်....'
"အိမ်ထဲက တန်ဖိုးကြီးပစ္စည်းတွေ ဘာမှ မပါသွားဘူး... ရှင်းယုံနဲ့ သူ့လူငါးယောက်ဆီက ပိုက်ဆံတွေကိုလည်း မယူသွားဘူး။ ရှင်းယုံရဲ့ မယားကြီးမယားငယ် ခုနစ်ယောက်ကလည်း အိမ်ရှေ့ခြံဝင်းမှာ ဘာတွေဖြစ်သွားလဲဆိုတာကို လုံးဝ မသိလိုက်ကြဘူး...."
ရှဲ့ဟုန်က ဆက်ပြောသည်။ "လူသတ်သမားက ရှင်းယုံရဲ့ အသက်ကိုပဲ လိုချင်တာ သေချာတယ်။ ဒီကောင်က မပတ်သက်သင့်တဲ့လူနဲ့ သွားပတ်သက်မိတာပဲ။ အခု သူ သေသွားတာ.... ဒါ သူနဲ့ ထိုက်တန်ပါတယ်"
"..."
ဟွမ်ဖေးယန်က ခေါင်းငုံ့ထားပြီး အော်ဟစ်အောင်ပွဲခံချင်စိတ်ကို ဖိနှိပ်ထားရသည်။
ချန်မူကလည်း ခေါင်းငုံ့ထားပြီး သူ၏ နှုတ်ခမ်းထောင့်များက အပေါ်သို့ ကွေးတက်နေချေသည်။
'မှတ်ပြီလား... မှတ်ပြီလား...'
ရှဲ့ဟုန်၏ စကားများက ရှင်းယုံနှင့် အခြားလူလေးယောက်၏ သေဆုံးမှု သဘောသဘာဝကို အခြေခံအားဖြင့် သတ်မှတ်ပေးလိုက်ခြင်းပင်။
"သူက မပတ်သက်သင့်တဲ့လူနဲ့ သွားပတ်သက်မိတာပဲ..."
"အခု သူ အသတ်ခံရတာက ကိုယ်ရေးကိုယ်တာ ရန်ငြိုးကြောင့်ပဲ..."
"ဒါကြောင့် ကိုယ်ရေးကိုယ်တာ ရန်ငြိုးဖြစ်နေမှတော့ ဓားမကြီးဂိုဏ်းနဲ့ ဘာမှမဆိုင်ဘူး.... ငါတို့လည်း ဆက်ပြီး စုံစမ်းတော့မှာ မဟုတ်ဘူး..."
ဤသည်မှာ ချန်မူနှင့် ဟွမ်ဖေးယန်တို့အတွက် သေချာပေါက် သတင်းကောင်းပင်။
သေချာစဉ်းစားကြည့်လျှင် နားလည်နိုင်သည်။
ရှင်းယုံကို သတ်သွားသူမှာ သေချာပေါက် သိုင်းသမားတစ်ယောက်ဖြစ်ပြီး လျှို့ဝှက်လက်နက်များနှင့် လုပ်ကြံသတ်ဖြတ်မှုတွင် ကျွမ်းကျင်သော သိုင်းသမားတစ်ယောက် ဖြစ်သည်။
ဤကဲ့သို့သောလူမျိုး၏ ပစ်မှတ်ထားခြင်းကို ခံရပါက ရှဲ့ဟုန်လည်း ညဘက် ကောင်းကောင်းအိပ်ပျော်နိုင်မည် မဟုတ်ချေ။ ထို့ကြောင့် ဦးနှောက်ထဲ ရေဝင်နေသော လူသာလျှင် ဤကိစ္စကို ဆက်လက် စွဲလမ်းနေလိမ့်မည်။
ရှင်းယုံမှာ သူ၏ လက်အောက်ငယ်သား ဖြစ်သော်လည်း သူတို့၏ ဆက်ဆံရေးမှာ သာမန်မျှသာ ဖြစ်၏။ သူကိုယ်တိုင်ပင် အမှောင်ထဲတွင် ပုန်းအောင်းနေသော တရားခံနှင့် အမြန်ဆုံး အဆက်အသွယ်ဖြတ်ရန် ကြိုးစားနေရလေသည်။
"ချန်ဖျင်ရပ်ကွက်ကို ကြီးကြပ်ဖို့ လူတစ်ယောက် လိုနေတယ်။ အခု ရှင်းယုံလည်း သေသွားပြီဆိုတော့..."
ရှဲ့ဟုန်က လှည့်လိုက်ပြီး ခြံဝင်းထဲရှိ ဂိုဏ်းသားအားလုံးကို မျက်နှာမူကာ ဟွမ်ဖေးယန်ကို လက်ညှိုးထိုးပြပြီး အသံကျယ်ကျယ်ဖြင့် "ဖေးယန်က ရှင်းယုံရဲ့ နေရာကို ယာယီတာဝန်ယူပြီး ချန်ဖျင်ရပ်ကွက်ကို ကြီးကြပ်ရမယ်။ သူ လုံလောက်တဲ့ အကျိုးဆောင်မှုတွေ ရလာတာနဲ့ ဂိုဏ်းခွဲမှူးအဖြစ် တရားဝင် တာဝန်ယူရလိမ့်မယ်" ဟု ပြောလိုက်သည်။
ဘာ...
ခြံဝင်းထဲရှိ လူတိုင်း အံ့အားသင့်သွားကြရသည်။
နောက်တစ်ခဏ၌ လူအုပ်ကြီးမှာ အသိဝင်လာပြီး တစ်သံတည်းဖြင့် "ဟုတ်ကဲ့ပါ..." ဟု အော်ဟစ်လိုက်ကြသည်။
"..."
ဟွမ်ဖေးယန် အနည်းငယ် မှင်တက်သွားသည်။ ဤရုတ်တရက် အံ့ဩဖွယ်ရာက သူ၏ စိတ်ကို တစ်ခဏမျှ ဗလာကျင်းသွားစေခဲ့သည်။
ချန်မူကမူ ချွင်းချက်ပင်။
ရှင်းယုံကို သတ်ဖြတ်ခြင်းမှာ တန်ပြန်တိုက်ခိုက်ခြင်းနှင့် နောင်လာမည့် ပြဿနာများကို ရှင်းလင်းခြင်းသာ ဖြစ်သည်။ ဤကိစ္စမှ တစ်ခုခု ရလာလိမ့်မည်ဟု သူ မမျှော်လင့်ထားခဲ့ချေ။
ဟွမ်ဖေးယန်က ရှင်းယုံကို ယာယီအစားထိုးကာ ချန်ဖျင်ရပ်ကွက်ကို ကြီးကြပ်ရမည့် ခေါင်းဆောင် ဖြစ်လာခဲ့ပြီပဲ။
"... ကျေး... ကျေးဇူးတင်ပါတယ် ခေါင်းဆောင်ကြီးရှဲ့"
ဟွမ်ဖေးယန်က သတိပြန်ဝင်လာပြီး ဒုန်းခနဲ ဒူးထောက်ချကာ ရှဲ့ဟုန်ကို ဦးချ၍ အလွန်အမင်း အရိုအသေပေးလိုက်၏။
"ဟား... ဟား... မြန်မြန် ထပါ..."
ရှဲ့ဟုန်က လက်ကာပြကာ ရယ်မောရင်း "ဖေးယန်... မင်းရဲ့ စွမ်းဆောင်ရည်တွေကို အားလုံးက မြင်ပြီးသားပါ။ လောလောဆယ်တော့ မင်းရဲ့ အရည်အချင်းကို ငါတို့အားလုံး လက်ခံတယ်။ မင်း နေရာရလာပြီးရင်လည်း ဆက်ကြိုးစားပြီး ချန်လယ်လမ်းကို အမြန်ဆုံး သိမ်းပိုက်နိုင်ဖို့ ငါတို့ မျှော်လင့်တယ်" ဟု ပြောလိုက်သည်။
"ချန်လယ်လမ်းကို သိမ်းပိုက်ဖို့အတွက် ဖေးယန် အစွမ်းကုန် ကြိုးစားသွားပါ့မယ်...." ဟွမ်ဖေးယန်က ပြတ်သားစွာ အော်ဟစ်လိုက်သည်။
"ဟား... ဟား... ဒါဆိုလည်း မင်းရဲ့ သတင်းကောင်းကို ငါ စောင့်နေမယ်..." ရှဲ့ဟုန်က ရယ်မောလိုက်၏။
"ချန်လယ်လမ်းကို သိမ်းပိုက်ကြ..."
"ချန်လယ်လမ်းကို သိမ်းပိုက်ကြ..."
အခြားသူများကလည်း တစ်သံတည်း အော်ဟစ်လိုက်ကြသည်။
ဤအချက်က ရှင်းယုံအပေါ်ထားရှိသော လူတိုင်း၏ သဘောထားကို ပြသနေချေသည်။
အလောင်းများပင် မရှင်းလင်းရသေးမီမှာပင် ဟွမ်ဖေးယန်အတွက် အပြည့်အဝ ထောက်ခံမှုများ ရှိနေခဲ့လေပြီ။
ရှဲ့ဟုန်၏ မျက်နှာပေါ်ရှိ အပြုံးကိုကြည့်ရင်း ချန်မူ ရုတ်တရက် တစ်ခုခုကို သဘောပေါက်သွားရသည်။
'ဒီလူက အစ်ကို့ကို ယာယီခေါင်းဆောင်အဖြစ် တာဝန်ယူခိုင်းတာ... သိပ်တော့ စေတနာပါပုံ မပေါ်ဘူး...'
'ဒိုင်းကာလား...'
ချန်မူက အတွေးများထဲ နစ်မြောသွားရသည်။
'တကယ်လို့ ရှင်းယုံကို သတ်သွားတဲ့လူက ဓားမကြီးဂိုဏ်းကို ပစ်မှတ်ထားတာဆိုရင်... အခု ရှင်းယုံ သေသွားပြီဆိုတော့ နောက်ထပ် ပစ်မှတ်က ရှဲ့ဟုန် ဖြစ်လာမှာပဲ...'
အကယ်၍ ဟွမ်ဖေးယန်သာ ခေါင်းဆောင်ဖြစ်လာပါက တစ်ယောက်ယောက် သေရမည်ဆိုလျှင်တောင် ဟွမ်ဖေးယန်က အရင်သေရမည် ဖြစ်သည်။
ချန်ဖျင်ရပ်ကွက်ဘက်တွင် ဟွမ်ဖေးယန်မှာ အစွမ်းအထက်ဆုံး တိုက်ခိုက်ရေးသမား ဖြစ်သည်။ ထို့ကြောင့် သူ့ကို ယာယီခေါင်းဆောင်အဖြစ် ရာထူးတိုးပေးပြီး ဒိုင်းကာအဖြစ် အသုံးပြုခြင်းက ရှဲ့ဟုန်အတွက် ဘာအရှုံးမှ မရှိချေ။
ဆန့်ကျင်ဘက်အနေဖြင့် ဟွမ်ဖေးယန်၏ သစ္စာရှိမှုကို ရရှိနိုင်သည်။
'တစ်ချက်ပစ် ငှက်နှစ်ကောင်ရတာပဲ...'
ဤအရာကို တွေးမိသောအခါ ချန်မူက ရှဲ့ဟုန်ကို နောက်တစ်ကြိမ် ကြည့်လိုက်၏။
ခေါင်းဆောင်ကြီး ဖြစ်လာနိုင်သူများမှာ သေချာပေါက် သာမန်လူများ မဟုတ်ကြချေ။
...
ယာယီခေါင်းဆောင် ဖြစ်သော်လည်း ခေါင်းဆောင်က ခေါင်းဆောင်ပင်။
ဟွမ်ဖေးယန်က ချန်ဖျင်ရပ်ကွက်လမ်းတွင် ခေါင်းဆောင်သစ် ဖြစ်လာခဲ့သည်။ သတင်းပျံ့သွားသည်နှင့် တစ်ပြိုင်နက် လမ်းတစ်လျှောက်ရှိ ဆိုင်ရှင်များက သူ့ထံသို့ လက်ဆောင်များ ပေးပို့လာကြသည်။
ဆိုင်ရှင်များအတွက် ဤသည်မှာ မလွှဲမရှောင်သာ ကုန်ကျစရိတ်တစ်ခု ဖြစ်သည်။
အိမ်ထောင်စုတိုင်းက ပေးဆောင်ရသော လစဉ်ဆက်ကြေးငွေမှာ ဓားမကြီးဂိုဏ်းမှ တူညီစွာ သတ်မှတ်ထားခြင်းမဟုတ်ဘဲ ကောက်ခံသည့် ခေါင်းဆောင်အပေါ်တွင်သာ မူတည်ကြောင်း သတိပြုသင့်ချေသည်။
ခေါင်းဆောင် ပြောင်းသွားခြင်းက နည်းလမ်းပြောင်းသွားခြင်းပင်။
အကယ်၍ ဤနေရာတွင် ရက်စက်သော လူတစ်ယောက်က တာဝန်ယူပါက ဆိုင်တိုင်းက သွေးထွက်အောင် ပေးရလိမ့်မည်။
ထို့ကြောင့် ကြိုတင်၍ လက်ဆောင်များ ပေးခြင်းမှာ ဆက်ဆံရေးကောင်းများ တည်ဆောက်ရန်အတွက်သာဖြစ်ပြီး လက်ခံရရှိသူအနေဖြင့် ငွေကြေးလက်ဆောင်များ ကောက်ခံရာတွင် အရမ်းမလောဘကြီးရန် မျှော်လင့်ခြင်းပင် ဖြစ်သည်။
လက်ဆောင်များ လက်ခံရရှိပြီးနောက် ဟွမ်ဖေးယန်က ငွေကြေးလက်ဆောင်များ ကောက်ခံသည့် ဓလေ့မှာ ယခင်အတိုင်းသာ ဆက်လက်ရှိနေမည်ဖြစ်ကြောင်း ကြေညာလိုက်၏။
ထိုစကားတစ်ခွန်းတည်းက ဆိုင်ရှင်များအားလုံး၏ မျက်နှာပေါ်သို့ အပြုံးများ ချက်ချင်း ဆောင်ကြဉ်းပေးနိုင်ခဲ့သည်။
တကယ်တမ်းတွင် ချန်မူနှင့် ဟွမ်ဖေးယန်တို့က ဆွေးနွေးပြီးကြပြီ ဖြစ်သည်။ ချန်ဖျင်ရပ်ကွက်ရှိ ဆိုင်များထံမှ ငွေကြေး မည်မျှပင် ညှစ်ထုတ်ယူစေကာမူ အမြတ်များများ ရနိုင်မည်မဟုတ်ကြောင်း သူတို့ သိထားကြသည်။
ပိုက်ဆံရချင်လျှင် ချန်လယ်လမ်းကို သိမ်းပိုက်ရမည်။
သို့သော် ချန်လယ်လမ်းကို သိမ်းပိုက်ရန်မှာ ထိုမျှမလွယ်ကူပေ။ ဟွမ်ဖေးယန်က ရှင်းယုံကို အစားထိုးလိုက်ရုံဖြင့် ဖြေရှင်းနိုင်မည် မဟုတ်ချေ။
၎င်းက အချိန်အခါအပေါ်တွင် မူတည်လေသည်။
သို့သော် မှန်ကန်သော အချိန်ကို စောင့်ဆိုင်းရန် လိုအပ်၏။
အလကားနေရင်း စောင့်နေခြင်းက ပြဿနာမဟုတ်ချေ။
နောက်ရက်များတွင် ဟွမ်ဖေးယန်က သူ လက်ဆောင်ရထားသော ငွေများကို အသုံးပြု၍ အိမ်ကြီးအိမ်ကောင်းအသစ်တစ်လုံး ငှားရမ်းကာ မြောင်ရှိုးရှိုးနှင့် လက်ထပ်လိုက်သည်။
ရာထူးတိုးခြင်း၊ ဝင်ငွေတိုးခြင်းနှင့် ဇနီးသည်ရခြင်း အားလုံးကို တစ်ပြိုင်နက်တည်း သူ အမှန်တကယ် အောင်မြင်သွားခဲ့လေပြီ။
...
ဟွမ်ဖေးယန်တစ်ယောက် အချိန်အတန်ကြာအောင် အောင်မြင်ကျော်ကြားမှုနှင့် ချမ်းသာကြွယ်ဝမှုတို့ကို ခံစားနေရသည်။
ချန်မူမှာလည်း အလုပ်များနေချေသည်။
သူသည် မြို့အနှံ့ လျှောက်သွားကာ မြို့ပြင်ရှိ သင်္ချိုင်းကုန်းနှစ်ခုသို့ သုံးရက်တစ်ကြိမ် သွားရောက်၍ ကတ်ပြားများ စုဆောင်းခဲ့သည်။
အတွင်းအားကတ်များ သို့မဟုတ် ကျွမ်းကျင်မှုစွမ်းရည်ကတ်များကို ထပ်မရတော့သော်လည်း ခွန်အားကတ် အများအပြားကို ရရှိခဲ့သည်။ ၎င်းတို့ကို ရုပ်ပိုင်းဆိုင်ရာ ကြံ့ခိုင်မှု တိုးမြှင့်ရန်နှင့် ခွန်အားကို စဉ်ဆက်မပြတ် တိုးတက်စေရန် အသုံးပြုခဲ့သည်။
လဝက်အတွင်းမှာပင် သူ၏ ခွန်အားက ကျင်း ၃၀၀၀ အထိ အောင်မြင်စွာ တိုးလာလေပြီ။
ထိုနေ့ ညနေခင်း။
ချန်မူက မြို့ပြင်မှ ပြန်လာစဉ် လမ်းထောင့်တစ်ခုကို ဖြတ်သန်းသွားချိန်တွင် ရုတ်တရက် ဆူညံသံများနှင့် သတ်ဖြတ်ရန် အော်ဟစ်သံများကို ကြားလိုက်ရ၏။
လမ်းမပေါ်ရှိ လူအုပ်ကြီးက အော်ဟစ်ကာ ထိတ်လန့်တကြား ဟိုဟိုဒီဒီ ပြေးလွှားနေကြသည်။
လူအုပ်ကြီး လူစုကွဲသွားပြီးနောက် ထောင့်တစ်နေရာသို့ ဆုတ်ခွာသွားသော ချန်မူက လမ်းမပေါ်တွင် တိုက်ခိုက်နေသော လူနှစ်စုကို မြင်လိုက်ရသည်။
၎င်းက သာမန် ရန်ပွဲတစ်ခုမဟုတ်ဘဲ တကယ့် သွေးထွက်သံယို တိုက်ပွဲတစ်ခုပင်။
"မြွေစိမ်းဂိုဏ်း နဲ့ သွေးဝံပုလွေဂိုဏ်း..."
ချန်မူက သူတို့၏ ဝတ်စုံများအရ လူနှစ်စု၏ ဂိုဏ်းအမည်များကို မှတ်မိသွားသည်။
သူတို့က အပြင်မြို့တော်၏ အရှေ့ဘက်ရပ်ကွက်တွင် အခြေစိုက်သော အခြားဂိုဏ်းနှစ်ခု ဖြစ်လေသည်။
လူနှစ်စု ရှိသည်။ မြွေစိမ်းဂိုဏ်းဘက်က လူနည်းပြီး ကိုးယောက်သာရှိကာ သွေးဝံပုလွေဂိုဏ်းဘက်တွင် လူဆယ့်ငါးယောက် ရှိသည်။
ထို့အပြင် သူတို့က အသေသတ်မည့် အင်အားများကို အသုံးပြုနေကြသောကြောင့်... မြွေစိမ်းဂိုဏ်းမှ အဖွဲ့ဝင်သုံးယောက်မှာ မြေပြင်ပေါ်သို့ လျင်မြန်စွာ လဲကျသွားကြရသည်။
ကျန်ခြောက်ယောက်မှာ ထိတ်လန့်တကြား ထွက်ပြေးသွားခဲ့ကြသည်။
သွေးဝံပုလွေဂိုဏ်းသားများကလည်း အနောက်မှ အပြင်းအထန် လိုက်ဖမ်းနေခဲ့ကြသည်။
လူနှစ်စုလုံး လမ်းကြားအဆုံးတွင် လျင်မြန်စွာ ပျောက်ကွယ်သွားပြီး မြေပြင်ပေါ်တွင် လဲကျနေသော အလောင်းသုံးလောင်းသာ ကျန်ရစ်ခဲ့လေသည်။
"..."
ချန်မူက ချက်ချင်းပင် ရှေ့သို့ထွက်လာကာ ကတ်သုံးခုကို ကောက်ယူလိုက်၏။ ထို့နောက် အမြန်ထွက်လာလိုက်သည်။
သူက လမ်းမပေါ်သို့ ရောက်သောအခါ ကတ်ပြားအသစ်ကို စမ်းကြည့်ရန် လက်လှမ်းလိုက်၏။
'သက်လုံကတ်...'
'အစွမ်းခွန်အားကတ်...'
'ကျင့်ကြံမှုကတ်...'
'ဟင်...'
'ကျင့်ကြံမှုကတ်...'
အခန်း ၉ပြီး၏။