အခန်း ၁၆
Vol. 2 Ch. 16
အခန်း (၁၆) နောက်ထပ် အထူးကျွမ်းကျင်မှုစွမ်းရည်ကတ်တစ်ခု ရရှိခြင်း
စနစ်ကျသော သိုင်းပညာတစ်ခုတွင် သိုင်းကွက်နှစ်ခုကို တတ်မြောက်ပြီးပါက ကျန်ရှိသော သိုင်းများကို သင်ယူရန်မှာ မယုံနိုင်လောက်အောင် လွယ်ကူသွားပြီး သင်ယူမှုဖြစ်စဉ်တွင် တုံ့ဆိုင်းသွားခြင်းမျိုး လုံးဝ မရှိတော့ချေ။
လွင့်မျောတိမ်တိုက် ကျင့်စဉ်၊ အကြွင်းအကျန် တိမ်တိုက်လက်ဝါး၊ တိမ်တိုက်အနုပညာ နှင့် လွှဲယမ်းတိမ်တိုက် ဓားသိုင်း....
ချန်မူသည် လော့ယွင်သိုင်းကျောင်းတော်၏ သိုင်းပညာများဖြစ်သော လွင့်မျောတိမ်တိုက်ကျင့်စဉ် နှင့် တိမ်တိုက် အနုပညာကို တတ်မြောက်ပြီးဖြစ်၏။
ယခုအခါ အကြွင်းအကျန် တိမ်တိုက်လက်ဝါးကို သင်ယူမည်ဆိုပါက ၁၅ မိနစ်ပင် မပြည့်မီမှာ အခြေခံအဆင့်ကို တတ်မြောက်သွားမည်ဖြစ်သည်။
ဟွမ်ဖေးယန်က မျက်လုံးပြူးကာ ပါရမီရှင်ဆိုသည်မှာ တကယ့်ပါရမီရှင်ပါပဲလားဟု အာမေဍိတ်သံ ထွက်သွားမိသည်။
သူကိုယ်တိုင် အကြွင်းအကျန်တိမ်တိုက်လက်ဝါးကို အခြေခံအဆင့် ရောက်အောင်ပင် လဝက်ကျော်ကြာ သင်ယူခဲ့ရကြောင်း သတိပြုသင့်ချေသည်။
ချန်မူကမူ ဆယ့်ငါးမိနစ်ပင် မကြာလိုက်ပေ။
ပါရမီရှင်...
ပါရမီရှင်ဟူသော စကားလုံးကသာ ဤအခြေအနေကို ရှင်းပြနိုင်ပေမည်။
သာမန်လူများနှင့် ပါရမီရှင်များကြားရှိ ကွာခြားချက်ကို ဟွမ်ဖေးယန် အမှန်တကယ် နားလည်သွားသည်မှာ ဤအချိန်လေးတွင်ပင် ဖြစ်သည်။
သူတို့က အခြေခံအားဖြင့် ကွဲပြားခြားနားသော လူတန်းစားနှစ်မျိုးပင်။
...
အကြွင်းအကျန်တိမ်တိုက်လက်ဝါးမှာ အခြေခံအဆင့်တွင်ပင် လုံလောက်နေပြီဖြစ်ရာ ချန်မူက ၎င်းကို ပိုမိုနက်ရှိုင်းစွာ ဆက်လက် မကျင့်ကြံတော့ချေ။
ထို့အပြင် ကျင့်ကြံမှုကတ်ပြားများက ပြဿနာများကို မျက်တောင်တစ်ခတ်အတွင်း ဖြေရှင်းပေးနိုင်သဖြင့် ကြိုးစားပမ်းစား ကျင့်ကြံရသည့်အလုပ်တွင် အချိန်များစွာ အလဟဿ ဖြုန်းတီးနေရန် မလိုအပ်ပေ။
ဒီအတွက် အချိန်ဖြုန်းနေမည့်အစား မြို့ထဲတွင် ပိုပြီး လျှောက်သွားနေလိုက်တာကမှ ပိုကောင်းဦးမည်။
ဤသို့ လျှောက်သွားရင်းမှ ချန်မူသည် အံ့သြဖွယ်အချက်တစ်ခုကို ရှာဖွေတွေ့ရှိသွားခဲ့သည်။ ၎င်းက ခန္ဓာသွန်းလောင်းခြင်းနယ်ပယ် တတိယအဆင့်သို့ ချိုးဖျက်ဝင်ရောက်ပြီးနောက် သူ၏ ကတ်ပြားကောက်ယူနိုင်သည့် အကွာအဝေးက အမှန်တကယ်ပင် ထပ်မံ ကျယ်ပြန့်လာခဲ့ကြောင်းပင်။
ယခင် လေးမီတာမှ ရှစ်မီတာအထိ ကျယ်ပြန့်သွားခဲ့ပြီ ဖြစ်၏။
ခန္ဓာသွန်းလောင်းခြင်းနယ်ပယ် ဒုတိယအဆင့်တွင် ကောက်ယူနိုင်သည့် အကွာအဝေးက လေးမီတာ။
ခန္ဓာသွန်းလောင်းခြင်းနယ်ပယ် တတိယအဆင့်တွင် ကောက်ယူနိုင်သည့် အကွာအဝေးက ရှစ်မီတာ။
'ဒါဆို ခန္ဓာသွန်းလောင်းခြင်းနယ်ပယ် စတုတ္ထအဆင့်ကျရင်ကော အကွာအဝေးက ဘယ်လောက်ဖြစ်သွားမလဲ...'
ချန်မူက မျှော်လင့်တကြီးဖြင့် တွေးလိုက်မိသည်။
...
ချန်မူသည် အပြင်မြို့တော်ရှိ ရပ်ကွက်လေးခုမှ လမ်းများတစ်လျှောက် လျှောက်သွားရင်း ကတ်ပြားလေးကတ်ကို ကောက်ရခဲ့သည်။
သက်လုံကတ် နှစ်ကတ်၊ စွမ်းအင်ကတ် တစ်ကတ်နှင့် ခွန်အားကတ် တစ်ကတ်တို့ ဖြစ်ကြသည်။
ခွန်အားကတ်က ရုပ်ပိုင်းဆိုင်ရာ ကြံ့ခိုင်မှုကို လှုံ့ဆော်ပေးပြီး ခွန်အားကို ဖြစ်ပေါ်စေသည်။
ထပ်မံ စမ်းသပ်ခြင်းများ မပြုလုပ်ရသေးသော်လည်း ခွန်အားကတ်များကို ဆက်တိုက်အသုံးပြုခြင်းမှ ရရှိလာသော သူ၏ ရုပ်ပိုင်းဆိုင်ရာ ခွန်အားမှာ သေချာပေါက် ကျင်း ၄၀၀၀ကျော်သွားပြီဟု ချန်မူ ခန့်မှန်းမိချေသည်။
ဆိုလိုသည်မှာ ရုပ်ပိုင်းဆိုင်ရာ ခွန်အားကိုသာ ထည့်သွင်းစဉ်းစားမည်ဆိုပါက ခန္ဓာသွန်းလောင်းခြင်းနယ်ပယ်၏ သတ်မှတ်ချက်ထက်ပင် မြင့်မားနေဆဲ ဖြစ်၏။
ခန္ဓာသွန်းလောင်းခြင်းနယ်ပယ် တတိယအဆင့်တွင်ရှိသော သိုင်းသမားတစ်ယောက်၏ ခွန်အားမှာ ကျင်း ၃၀၀၀ မျှသာ ရှိလေသည်။
ခွန်အားကတ်များက အတော်လေး ထိရောက်လှသည်။ များများရလေလေ.... ပိုမိုသန်မာလာလေလေပင်...
...
နေမင်းကြီးက အနောက်ဘက်သို့ ဝင်သွားလေပြီ။
ချန်မူသည် အရှေ့ဘက်ရပ်ကွက်သို့ ပြန်လာခဲ့ပြီး နေဝင်ချိန်တွင် ချန်ဖျင်ရပ်ကွက်သို့ ပြန်ရောက်လာခဲ့သည်။
ရုတ်တရက် သူက ခြေလှမ်းများကို မြန်လိုက်ပြီး ကျဉ်းမြောင်းသော လမ်းကြားလေးတစ်ခုထဲသို့ ဝင်သွားလိုက်၏။
ဝိညာဉ်မြွေခြေလှမ်းကို အသုံးပြု၍ လျင်မြန်စွာ ဖြတ်သန်းသွားကာ မြင့်မားသော နံရံတစ်ခုကို ကျော်တက်၍ ပျောက်ကွယ်သွားလိုက်သည်။
'သူ ဘယ်ရောက်သွားတာလဲ...'
လူသူကင်းမဲ့သော လမ်းကြားထဲသို့ နောက်ယောင်ခံလိုက်လာသော ဝေချီမှာ မျက်နှာထား အေးစက်သွားပြီး ပတ်ဝန်းကျင်ကို လှည့်ပတ်ကြည့်ရှုလိုက်၏။
သူ၏နောက်မှ လိုက်ပါလာသော လူသန်ကြီး နှစ်ယောက်မှာလည်း ကြမ်းတမ်းသော မျက်နှာထားများ ရှိနေကြသည်။
"ဒီခွေးကောင်လေးက ငါတို့ကို ရိပ်မိသွားတာလား..."
"ချန်ဆိုတဲ့ကောင်က သွေးပူလွယ်တဲ့ အရူးလေးတစ်ယောက် မဟုတ်ဘူးလား။ ဘယ်လိုလုပ်ပြီး သူက..."
ရွှစ်... ရွှစ်... ရွှစ်...
ယခင်က တစ်ခါမျှ မကြားဖူးသော ထူးခြားသည့် အသံတစ်သံ ရုတ်တရက် ထွက်ပေါ်လာလေသည်။
ဝေချီ၏ နောက်မှ လူသန်ကြီးနှစ်ယောက် အန္တရာယ်ကို အာရုံမခံမိမီမှာပင် သူတို့တစ်ဦးစီ၏ မျက်နှာပေါ်သို့ ပျံသန်းလာသော အပ်ငါးချောင်းစီ ရောက်ရှိလာကြသည်။
အပ်ငါးချောင်းစလုံးက ခေါင်းထဲသို့ စိုက်ဝင်သွားခြင်းပင်။
ဘုတ်...
ဘုတ်...
တုံးတိတိ အသံနှစ်သံနှင့်အတူ လူသန်ကြီး နှစ်ယောက်မှာ အော်သံပင် မထွက်နိုင်လိုက်ဘဲ မြေပြင်ပေါ်သို့ ဖြောင့်တန်းစွာ လဲကျသွားကြသည်။
"ဘယ်လိုလုပ် ဖြစ်နိုင်မှာလဲ..."
လူသန်ကြီးနှစ်ယောက် မြေပြင်ပေါ် လဲကျသွားသည်ကို မြင်လိုက်ရသောအခါ ဝေချီ၏ သူငယ်အိမ်များ ကျုံ့သွားရသည်။ သူ၏ ကျောရိုးတစ်လျှောက် အေးစက်သွားပြီး တုံ့ဆိုင်းမနေဘဲ နောက်လှည့်ကာ ထွက်ပြေးရန် ပြင်လိုက်၏...
သို့သော် ပျံသန်းလာသော အပ်ဆယ်ချောင်းက လျင်မြန်စွာ ပျံသန်းလာပြီး ဝေချီ၏ ခြေထောက်များကို စိုက်ဝင်သွားချေသည်။
ချက်ချင်းပင် ချန်မူက လျင်မြန်စွာ လှုပ်ရှားကာ အနောက်မှ ကပ်လျက်လိုက်လာပြီး ဘယ်ညာယိမ်းနွဲ့ကာ သူ၏အရိပ်များကို ချန်ရစ်ခဲ့ပြီးနောက် နံရံပေါ်မှ ခုန်ဆင်းကာ ရှေ့သို့ယိုင်ကျသွားသော ဝေချီဆီသို့ ပြေးဝင်လာလိုက်သည်။
"ချမ်းသာပေးပါ..."
ဝေချီက ပါးစပ်ဖွင့်ကာ အလောတကြီး အော်ဟစ်လိုက်၏။
သို့သော် ချန်မူက လက်ကိုမြှောက်ကာ ဝေချီ၏ ဘယ်ညာ ပခုံးရိုးများကို ရိုက်ချိုးလိုက်ရာ တက်ခနဲ အရိုးကျိုးသံ နှစ်သံ ထွက်ပေါ်လာပြီး ပြင်းထန်သော ခွန်အားက ဝေချီကို အနောက်သို့ လွင့်စင်သွားစေခဲ့သည်။
လေပြင်းတစ်ချက် တိုက်ခတ်သွားခဲ့သည်။
အော်ဟစ်သံနှင့်အတူ ဝေချီမှာ မီတာဆယ်ကျော်ခန့် အနောက်သို့ လွင့်စင်သွားပြီး နံရံကို ဝုန်းခနဲ ပြင်းထန်စွာ ဝင်တိုက်မိကာ နံရံမှာပင် အက်ကွဲကြောင်းများ ဖြစ်ပေါ်သွားချေသည်။
"ဖူး..."
ပြင်းထန်သော နာကျင်မှုနှင့်အတူ ဝေချီက ပါးစပ်ဟကာ ခဲနေသော သွေးအမြောက်အများကို အန်ထုတ်လိုက်ပြီး သူ၏ ခန္ဓာကိုယ်မှာ ရှေ့သို့ ယိမ်းယိုင်သွားရသည်။
ချန်မူက ကိုယ်ကို ယိမ်းလိုက်ပြီး ပန်းထွက်လာသော သွေးများကို ရှောင်ရှားလိုက်ကာ သူ၏ ညာလက်ကို ဆန့်ထုတ်၍ ဝေချီ၏ လည်ပင်းကို ဖမ်းဆုပ်လိုက်ပြီး အနည်းငယ် အားစိုက်ကာ မြေပြင်ပေါ်မှ မြှောက်မတင်လိုက်၏။
ဝေချီမှာ ရုတ်တရက် အသက်ရှူရ ခက်ခဲလာပြီး ဖြူရော်နေပြီဖြစ်သော သူ၏မျက်နှာမှာ ပို၍ပင် ဖြူဆွတ်လာခဲ့သည်။
သူ၏ ပခုံးရိုးနှစ်ဖက်စလုံး ကျိုးနေသဖြင့် ပြန်လည်ခုခံရန် လက်ကိုမြှောက်နိုင်စွမ်း မရှိတော့ချေ။ သူ၏ ခြေထောက်များမှာလည်း အပ်များ စိုက်ဝင်ခံထားရသဖြင့် ပြတ်ထွက်သွားသကဲ့သို့ ထုံကျင်နေခဲ့သည်။
"ချမ်း... ချမ်းသာပေးပါ..."
ဝေချီက စကားလုံးများကို ခက်ခဲစွာ ပြောလိုက်သည်။
"မင်းတို့က ဘယ်သူတွေလဲ။ ဘာလို့ ငါ့နောက်ကို လိုက်နေတာလဲ။ ပြီးတော့ မင်းတို့ရဲ့ ရည်ရွယ်ချက်က ဘာလဲ...."
ချန်မူက ဝေချီ၏ လည်ပင်းကို ဆုပ်ကိုင်ထားသော လက်ကို အနည်းငယ် လျှော့ပေးရင်း တည်ငြိမ်စွာ မေးလိုက်၏။
"ဟူး... ဟူး..."
ဝေချီက မျက်လုံးများ ပြူးကျယ်လာကာ အသက်ကို ပြင်းပြင်းရှူလိုက်ရသည်။ "ငါတို့က... သွေးဝံပုလွေဂိုဏ်းကပါ... မင်းနောက်ကို လိုက်နေတာက... လက်စားချေဖို့... ခေါင်းဆောင်ဝူက ရှဲ့ဟုန်ကို လက်စားချေချင်လို့ပါ... မင်းက ဟွမ်ဖေးယန်ရဲ့ ညီဆိုတော့... မင်းကိုသတ်လိုက်ရင် ဟွမ်ဖေးယန် ဒေါသထွက်လာအောင် ဆွပေးသလို ဖြစ်သွားမှာ... ပြီးတော့... ဂိုဏ်းနှစ်ခုကြားမှာ စစ်ပွဲစတင်အောင် မင်းရဲ့အလောင်းကို... မြွေစိမ်းဂိုဏ်းရဲ့ နယ်မြေထဲမှာ သွားပစ်ထားမလို့..."
ဝေချီက စကားကို ခက်ခဲစွာ ပြောလိုက်ပြီးနောက် ထပ်မံ၍ တောင်းပန်လိုက်၏။ "ငါပြောတာတွေ... အားလုံးက အမှန်တွေချည်းပါပဲ။ ငါ မင်းအတွက်... သူလျှို လုပ်ပေးလို့ရပါတယ်...."
သို့သော်.....
ချန်မူက အားအနည်းငယ်သုံး၍ ဝေချီ၏ လည်ပင်းရိုးကို ချိုးပစ်လိုက်သည်။
မျက်လုံးများ ပြူးကျယ်ကာ အသက်ရှူရန် ရုန်းကန်နေပြီး အသက်ရှင်ရန် အသည်းအသန် ကြိုးစားနေသော ဝေချီ၏ မျက်လုံးများမှာ ရုတ်တရက် အလင်းရောင် ကင်းမဲ့သွားပြီး ခေါင်းငိုက်စိုက်ကျကာ သေဆုံးသွားချေသည်။
[အလောင်းတစ်လောင်းအား ရှာဖွေတွေ့ရှိပါသည်။ ၎င်းထံမှ သိမ်းယူမှု ပြုလုပ်မည်လား။]
'လုပ်မယ်...'
ချန်မူက စိတ်ထဲမှ တုံ့ပြန်လိုက်ရင်း သူ၏ လက်ကို လွှတ်လိုက်ရာ ဝေချီ၏ အလောင်းက မြေပြင်ပေါ်သို့ ပုံကျသွားလေသည်။
"သွေးဝံပုလွေဂိုဏ်းရဲ့ ခေါင်းဆောင်ကြီး ဝူစီဟိုင်..."
သွေးဝံပုလွေဂိုဏ်းနှင့် မြွေစိမ်းဂိုဏ်းတို့ ဆုံးရှုံးမှုများ ကြုံတွေ့နေရသည်ကို အခွင့်ကောင်းယူကာ ဓားမကြီးဂိုဏ်းက နယ်မြေလုယူရန် ရုတ်တရက် ဝင်တိုက်ခဲ့ခြင်း ဖြစ်ရာ သွေးဝံပုလွေဂိုဏ်းဘက်မှ လက်စားချေမည်ကို မျှော်လင့်ထားပြီး ဖြစ်သည်။
ပြဿနာမှာ လက်စားချေမည့် ပစ်မှတ်က ဂိုဏ်း၏ အောက်ခြေအဆင့် အဖွဲ့ဝင်ဖြစ်သော သူကိုယ်တိုင် ဖြစ်နေခြင်းပင်။
အကြောင်းရင်းမှာ ဟွမ်ဖေးယန်က သူ၏ အစ်ကိုဝမ်းကွဲဖြစ်နေသောကြောင့်ပင်။
ဟွမ်ဖေးယန်က လွန်ခဲ့သော ရက်အနည်းငယ်ကမှ ခေါင်းဆောင်ဖြစ်လာပြီး အရှိန်အဝါ ကြီးမားနေခဲ့သည်။ ထို့ကြောင့် ဟွမ်ဖေးယန်ကို သတ်ပါက ဆိုးရွားသော နောက်ဆက်တွဲ ပြဿနာများ ဖြစ်လာနိုင်သော်လည်း ချန်မူကို သတ်ခြင်းကတော့ တခြားစီပင်။
ဒါက ဒေါသကို ပြေပျောက်စေရုံသာမက ရှဲ့ဟုန်ကိုပါ ရွံရှာသွားစေနိုင်ပြီး ဟွမ်ဖေးယန်နှင့် ရှဲ့ဟုန်ကြားတွင် သွေးကွဲသွားအောင်ပင် ဖန်တီးနိုင်ချေသည်။
တကယ်ကို ရက်စက်တဲ့ အကြံအစည်ပင်...
"ငါသာ သာမန် အောက်ခြေအဆင့်က သွေးပူလွယ်တဲ့ အရူးလေးတစ်ယောက်သာဆိုရင် ဒီအကြံအစည်က တကယ် အောင်မြင်သွားမှာပဲ...."
"နှမြောစရာပဲ..."
ချန်မူက စိတ်ကို တည်ငြိမ်စေရန် လေငွေ့တန်းတစ်ခုကို မှုတ်ထုတ်လိုက်၏။
ထို့နောက် သူက ဝေချီ၏ အလောင်းကို ကောက်ယူကာ အခြား လူသန်ကြီးနှစ်ယောက်၏ အလောင်းများဆီသို့ လျှောက်သွားလိုက်ပြီး သူတို့၏ ခါးပတ်များကို ဖြုတ်ကာ တစ်ခုနှင့်တစ်ခု ဆက်ပြီး အလောင်းနှစ်လောင်းကို အတူတကွ ပူးချည်လိုက်သည်။
လက်တစ်ဖက်က ဝေချီကို ဆွဲကာ အခြားတစ်ဖက်က လူသန်ကြီးနှစ်ယောက်ကို သယ်လျက် ချန်မူသည် လေထဲသို့ ခုန်တက်ကာ နံရံကိုကျော်၍ လမ်းကြားထဲမှ ထွက်ခွာသွားလေသည်။
ထို့နောက် ကျိကန်း၏ မှတ်ဉာဏ်ကတ်ပြားမှ လမ်းကြောင်းအတိုင်းလိုက်ကာ အနီးအနားရှိ နေအိမ်များကို ရှောင်ရှားလျက် လျင်မြန်စွာ ပြေးလွှားသွားပြီး လူသူကင်းမဲ့သော ခြံဝင်းတစ်ခုထဲသို့ ဝင်ရောက်ကာ ရေခန်းနေသော ရေတွင်းပျက်တစ်ခုအနီးတွင် ရပ်တန့်လိုက်၏။
သူက အလောင်းသုံးလောင်းကို ချထားကာ တစ်လောင်းချင်းစီကို ရှာဖွေလိုက်ရာ ငွေအနည်းငယ်ကို ရရှိခဲ့သည်။
ရေတွင်းပျက်ကို ဖုံးအုပ်ထားသော စတုရန်းပုံ ကျောက်တုံးကြီးကို ဘေးသို့ တွန်းဖယ်လိုက်သည်နှင့် ရေတွင်းအောက်ခြေမှ ပုပ်ဟောင်နေသော အနံ့ဆိုးများက ချက်ချင်း ထွက်ပေါ်လာချေသည်။
ချန်မူက ကြိုတင်ပြင်ဆင်ထားပြီး ဖြစ်၏။ သူက အသက်အောင့်ထားကာ အလောင်းသုံးလောင်းကို မပြီး ရေတွင်းထဲသို့ တစ်လောင်းချင်းစီ ပစ်ချလိုက်သည်။ ထို့နောက် ကျောက်တုံးကြီးကို မူလနေရာသို့ ပြန်ရွှေ့ကာ ရေတွင်းပျက်ကို ပြန်လည် ဖုံးအုပ်ထားလိုက်သည်။
လွန်ခဲ့သော နှစ်နှစ်ကျော်က ကျိကန်းသည် ဤရေတွင်းပျက်ကို မတော်တဆ ရှာတွေ့ခဲ့ခြင်းဖြစ်ပြီး အလောင်းဖျောက်ရန်အတွက် အလွန်ကောင်းမွန်သော နေရာတစ်ခုပင်။
ဤခြံဝင်းကြီးမှာ ဆယ်စုနှစ်များစွာကြာအောင် စွန့်ပစ်ခံထားရပြီး ပေါင်းပင်များ ဖုံးလွှမ်းနေခဲ့သည်။ ထို့အပြင် အလောင်းများကို ရေတွင်းပျက်ထဲတွင် စွန့်ပစ်ထားသဖြင့် မည်သူကမျှ လာရောက်ရှာဖွေတွေ့ရှိနိုင်မည် မဟုတ်ချေ။
အထူးသဖြင့် ချန်မူက ဝေချီနှင့် အခြားနှစ်ယောက်ကို သတ်ရာတွင် သွေးများ အပြင်သို့ ယိုစိမ့်ထွက်လာစေမည့် ပြင်ပဒဏ်ရာများ မဖြစ်စေခဲ့ပေ။
ဝူစီဟိုင်က သူ့ကို ပစ်မှတ်အဖြစ် ရွေးချယ်ခဲ့ပြီး ဝေချီက အကောင်အထည်ဖော်သူ ဖြစ်သည်။ ယခု ဝေချီ သေသွားပြီဖြစ်ရာ ဝူစီဟိုင်လည်း ချွင်းချက်မဟုတ်တော့ချေ။
သွေးဝံပုလွေဂိုဏ်း၏ ခေါင်းဆောင်ကြီးနှင့် သိုင်းသမားတစ်ယောက်...
သို့သော် ချန်မူသည် သွေးဝံပုလွေဂိုဏ်း၊ ဓားမကြီးဂိုဏ်းနှင့် မြွေစိမ်းဂိုဏ်းတို့မှ ခေါင်းဆောင်ကြီးများ၏ သိုင်းပညာ အဆင့်များကို ကြိုတင် စုံစမ်းထားပြီး ဖြစ်သည်။
ဝူစီဟိုင်မှာ ခန္ဓာသွန်းလောင်းခြင်းနယ်ပယ် ဒုတိယအဆင့်ထက် မပိုချေ။
ထို့ကြောင့် ခန္ဓာသွန်းလောင်းခြင်းနယ်ပယ် ဒုတိယအဆင့်ဆိုလျှင် ချန်မူက အလွယ်တကူ ကိုင်တွယ်ဖြေရှင်းနိုင်လေသည်။
ဒါပေမဲ့ မှောင်တဲ့အထိတော့ စောင့်ရဦးချေမည်....
...
ထို့နောက် အလောင်းစွန့်ပစ်ခဲ့သော ခြံဝင်းထဲမှ သူ ထွက်ခွာလာလိုက်သည်။
အိမ်ပြန်ရာလမ်းတွင် ချန်မူသည် သူအသစ်ရရှိထားသော ကတ်ပြားသုံးခုကို စစ်ဆေးရန် အိတ်ကပ်ထဲသို့ လက်နှိုက်လိုက်၏။
စွမ်းအင်ကတ်...
ခွန်အားကတ်...
ကျွမ်းကျင်မှုစွမ်းရည်ကတ် (အထူး)...
'ဟင်...'
'ဒါက နောက်ထပ် အထူးကျွမ်းကျင်မှုစွမ်းရည်ကတ် တစ်ခုလား...'
အခန်း ၁၆ပြီး၏။