အခန်း (၂၉၉၅-၂၉၉၆)

အခန်း (၂၉၉၅) - ဧကရာဇ် ခြောက်ပါးနှင့် မိဖုရား သုံးပါး

​"ဟမ်းဟမ်း... အားလုံးပဲ၊ ငါတို့လည်း မတွေ့ရတာ ကြာပြီ မဟုတ်လား။"

​ဆန်းကြယ်လှသော ဟင်းလင်းပြင်နယ်မြေ ထဲတွင် ရှူးဖူ ရုတ်တရက် ပေါ်ထွက်လာသည်နှင့်တပြိုင်နက် စခန်းနယ်မြေ အသီးသီးမှ စခန်းတာဝန်ခံများကို တွေ့လိုက်ရသည်။

​အချို့က ထျန်းရွှမ်စခန်းမှ ဖြစ်ကြပြီး၊ အချို့က ဘောက်ကျင်းစခန်းမှ၊ အချို့က ချင်းရှစ်စခန်းမှ၊ အချို့က ရေခဲပြင်မြေစခန်းမှ... ဖြစ်ကြသည်။

​"ရှူးဖူ၊ ငါတို့ မတွေ့ရတာ တကယ်ပဲ နှစ်တွေ အများကြီး ကြာသွားပြီပဲ၊ မင်းရဲ့ ရလဒ်တွေ မကောင်းတော့တာ၊ လုပ်ငန်းစွမ်းဆောင်ရည် ညံ့ဖျင်းလာတာနဲ့ ဝူရှန်းပေမြိန့်စခန်းကို ပို့ဆောင်ခံလိုက်ရပြီးတဲ့နောက်မှာပေါ့။"

​"အနည်းဆုံး နှစ်ငါးသောင်းတောင် ရှိသွားပြီ၊ ငါတို့ တစ်ခါမှ မတွေ့ဖြစ်ကြတော့ဘူး မဟုတ်လား။"

​ထျန်းရွှမ်စခန်းမှ စခန်းတာဝန်ခံက အေးအေးလူလူပင် ပြုံးလျက် ဆိုလိုက်သည်။

​ရှူးဖူက ထိုသူ့ကို စူးစူးရဲရဲ စိုက်ကြည့်လိုက်သည်

​"ထင့်ချီမင်၊ မင်း လူလိုသူလို ပြောတတ်ရဲ့လား။ ငါက ဝူရှန်းပေမြိန့်စခန်းကို အငြိမ်းစားယူဖို့ သွားခဲ့တာကွ။"

​စခန်းတာဝန်ခံ အားလုံးက ဟက်ဟက်ပက်ပက် ရယ်မောလိုက်ကြသည်။

​"မင်းတို့ကို ဆက်ပြောနေဖို့ အချိန်မရှိဘူး။"

​ရှူးဖူက နှာမှုတ်လိုက်ပြီး သူ၏ အကြည့်များကို သူတော်စင် အားလုံး၏ အလယ်ဗဟိုရှိ ရွှေရောင် အလင်းတန်းကြီးဆီသို့ ပို့ဆောင်လိုက်သည်။

​အထဲတွင်ကား ရှည်လျားသော စားပွဲဝိုင်းကြီး၏ ရှေ့မှောက်ရှိ မြင်ကွင်းပင် ဖြစ်ပေသည်။

​ထင့်ချီမင်က အပြုံးလေးဖြင့် ဆိုလိုက်သည်

"ရှူးဖူ၊ ဝူရှန်းပေမြိန့်စခန်းမှာ ဒီလို သေးငယ်တဲ့ ကာလအတိုလေးအတွင်းမှာ အရန်ကိုယ်စားလှယ်သူတော်စင်တွေ ဒီလောက်တောင် အများကြီး ထွက်ပေါ်လာတယ်ဆိုတော့... မင်းရဲ့ လုပ်ရပ်တွေက တကယ်ကို သတိကြီးလွန်းပြီး လေတောင်မထိုးဖောက်နိုင်အောင် တင်းကျပ်လွန်းလှချေလား၊ တိတ်တဆိတ်နဲ့ အခြေခံအမြစ်တွေကို နှစ်ပေါင်းများကြီး စုဆောင်းလာခဲ့တာ မဟုတ်လား။"

​ရှူးဖူက ပြုံးစစဖြင့် ဆိုလိုက်သည်

"မင်းက ဟုတ်တယ်လို့ ပြောရင်လည်း ဟုတ်တာပေါ့ ။"

​ထင့်ချီမင်က သက်ပြင်းချလိုက်သည်

"နှမြောစရာပဲ။"

​သူက ရွှေရောင် အလင်းတန်းကြီးထဲမှ မြင်ကွင်းကို တစ်ချက် လှမ်းကြည့်လိုက်သည်။

​"စခန်းနယ်မြေ အသီးသီးက လူငယ်လေးတွေ အားလုံးက ကောင်းကောင်း သိထားကြတယ်၊ မင်းတို့ရဲ့ ဝူရှန်းပေမြိန့်စခန်းကို စားပွဲပေါ် တက်ခွင့်မပေးရဘူးဆိုတာကိုလေ။"

​"ဒီတစ်ကြိမ် တိုက်ပွဲမှာတော့ မင်းတို့ဘက်က အကြီးအကျယ် ထိခိုက်နစ်နာရတော့မှာ သေချာတယ်။"

​"မင်း ဒါတွေ ထပ်ပြောနေစရာ မလိုပါဘူး၊ ငါက ကြိုတင်ပြီး စိတ်ပိုင်းဆိုင်ရာ ပြင်ဆင်ထားပြီးသားပါ၊ ဒါပေမဲ့ သူတို့အနေနဲ့ ယဲ့ထျန်းဂူ၊ လီဖန်၊ လော့ထျန်းဝမ်နဲ့ ချိုင်ကျင်းတို့ကို သတ်ချင်တိုင်း သတ်လို့တော့ လွယ်ကူမယ် မထင်ဘူး။"

​ရှူးဖူ၏ မျက်နှာအမူအရာမှာ တည်ငြိမ်အေးဆေးလျက် ရှိနေသည်။

"ဒီလူငယ်လေး လေးယောက်က ဒီလမ်းကြောင်းကို ရွေးချယ်ပြီးသွားပြီဆိုမှတော့ သဘာဝကျကျပဲ ဘေးဥပဒ် ဒုက္ခအမျိုးမျိုးကို ဖြတ်သန်းဖို့အတွက် ကြိုတင် ပြင်ဆင်ထားပြီးသား ဖြစ်မှာပေါ့။"

​"ဒီဘဝမှာ ရှုံးနိမ့်သွားခဲ့ရင်တောင် ဘာဖြစ်လဲအခွင့်အရေးကတော့ အမြဲတမ်း ရှိနေမှာပါပဲ။"

​ထင့်ချီမင်နှင့် အခြားသော စခန်းတာဝန်ခံများသည် ရှူးဖူ ဤကဲ့သို့ ပြောဆိုလိုက်သည်ကို ကြားလိုက်ရသဖြင့် ဆက်၍ မပြောကြတော့ဘဲ တစ်ဖက်တွင်လည်း ပြုံးရယ်ရင်း ရွှေရောင် အလင်းတန်းကြီးထဲမှ မြင်ကွင်းများကိုသာ ဆက်လက် စူးစမ်း ကြည့်ရှုနေကြတော့သည်။

​ထိုသို့သော အချိန်အခါမျိုးတွင် ရှူးဖူတို့ကဲ့သို့သော စခန်းတာဝန်ခံများသာမကဘဲ...

​စခန်းနယ်မြေ အသီးသီးမှ သူတော်စင်များသည်လည်း အလွန်တရာမှ အာရုံစိုက်လျက် စောင့်ကြည့်နေကြပြီး အကောင်းဆုံး၊ အကြမ်းဆုံး တိုက်ပွဲကြီးကို လက်လွှတ်မခံလိုကြပေ။

​အာဏာလုပွဲ ကျင်းပရာ နေရာဒေသ။

​ထုံယိုဧကရာဇ် သည် လက်နှစ်ဖက်ကို ဆုပ်ကိုင်ထားပြီး ပါးစပ်မှလည်း တစ်စုံတစ်ရာကို တတွတ်တွတ် ရွတ်ဆိုနေသည်။

​ချန်နန်ခယ် မှာမူ နားထောင်ရတာ အနည်းငယ် စိတ်အနှောင့်အယှက် ဖြစ်လာသဖြင့် သူ့ကို စူးစူးရဲရဲ စိုက်ကြည့်လိုက်သည်။

​"နင် ဘာတွေ တတွတ်တွတ် ရွတ်ဆိုနေတာလဲ။"

​"ဪ, ငါ မကြာသေးခင်ကမှ ထူးခြားဆန်းကြယ်တဲ့ စွမ်းအင်ပညာရပ် တစ်ခုကို နားလည်သဘောပေါက်ထားခဲ့တယ်၊ အမည်ကတော့ ကောင်းကင်မင်္ဂလာဆုတောင်းခြင်း လို့ ခေါ်တယ်၊ ဒါရဲ့ စွမ်းအင်က အလွန်ထူးခြားဆန်းကြယ်တယ်၊ အစ်ကိုကြီးတို့ ဒီတစ်ကြိမ် တိုက်ပွဲမှာ အလံတလူလူနဲ့ အောင်ပွဲခံနိုင်ဖို့အတွက် ငါက ကောင်းချီးဆုတောင်းပေးလို့ ရမလားဆိုတာကို စမ်းကြည့်နေတာပါ။"

​ထုံယိုဧကရာဇ်က ပေါ့ပေါ့ပါးပါးပင် ရှင်းပြလိုက်ပြီး ဆက်လက်၍ တတွတ်တွတ် ရွတ်ဆိုနေပြန်သည်။

​သူတော်စင် အားလုံး၏ မျက်နှာအမူအရာများမှာ ထူးဆန်းနေကြပြီး သူ့ကို လုံးဝ တုံ့ပြန်ခြင်း မပြုကြတော့ဘဲ ကောင်းကင်ယံရှိ ရှည်လျားသော စားပွဲဝိုင်းကြီးဆီသို့သာ မော့ကြည့်နေကြတော့သည်။

​စားပွဲဝိုင်းကြီး၏ ရှေ့မှောက်တွင် မဟာနတ်ဆိုးကြီးက အပြုံးပျက်မရှိဘဲ သွေးစဥ်းနတ်ဆိုး ဘက်သို့ လှည့်ကြည့်လိုက်သည်။

​"သွေးစဥ်းနတ်ဆိုး, မင်း ဒီတစ်ကြိမ် ဝင်ရောက်ခဲ့တာ ဘယ်လို ရှေးဟောင်း အင်အားစုကြီးထဲကိုလဲ။"

​အေးစက်သော ဘုရင်မနှင့် စစ်ဘုရင် တို့သည်လည်း သွေးစဥ်းနတ်ဆိုး ဘက်သို့ လှည့်ကြည့်လိုက်ကြသည်။

​သွေးစဥ်းနတ်ဆိုး၏ အမူအရာမှာ အေးစက်တည်ငြိမ်လျက် ရှိနေသည်။

​"မိစ္ဆာသတ်ဖြတ်ရေး နန်းတော် ။"

​"ဪ, တကယ်ပဲ မိစ္ဆာသတ်ဖြတ်ရေး နန်းတော်ကိုး, ဒါဆိုရင် မင်းရဲ့ စွမ်းဆောင်ရည်က တော်တော်လေး ကောင်းမွန်တယ်လို့ ဆိုရမှာပဲ၊ ငါသိရသလောက်ဆိုရင် မိစ္ဆာသတ်ဖြတ်ရေး နန်းတော်က အရန်ကိုယ်စားလှယ်သူတော်စင်တွေကို ရွေးချယ်တဲ့ သတ်မှတ်ချက်က ကြေးနီ သူတော်စင်နန်းတော်ထက် အနည်းငယ် ပိုပြီး တင်းကျပ်တယ်လို့ သိရတယ်။"

​"တကယ်လည်း အဲဒီလိုပါပဲ။"

​"သွေးစဥ်းနတ်ဆိုး, မင်းရဲ့ အနာဂတ်က တကယ်ကောင်းမွန်တယ်။"

​မိစ္ဆာသတ်ဖြတ်ရေး နန်းတော်မှ လာကြသည့် အရန်ကိုယ်စားလှယ်သူတော်စင် အားလုံးက အပြုံးကိုယ်စီဖြင့် လှမ်း၍ ပြောဆိုလိုက်ကြသည်။

​"ဘယ်လို ဖြစ်တာလဲ ငါတို့က ဘာလို့ ဒီနေရာမှာ ဆက်ပြီး ချုပ်နှောင်ခံထားရတာတုန်း။"

​မဟာနတ်ဆိုးကြီးက ရုတ်တရက် သူ့၏ မျက်ခုံးများကို တွန့်ချိုးလိုက်သည်။

​သွေးစဥ်းနတ်ဆိုးက ရုတ်တရက် ဝင်ပြောလိုက်သည်။

​"မကြာသေးခင်က မိစ္ဆာသတ်ဖြတ်ရေး နန်းတော်က အကြီးအကဲ တစ်ယောက် ငါ့ကို စကားတစ်ခွန်း ပိုပြောခဲ့တယ်။"

​"ဪ ဟုတ်လား"

​သူတော်စင် အားလုံးက တစ်ပြိုင်နက်တည်း သူ့ဘက်သို့ လှည့်ကြည့်လာကြသည်။

​အေးစက်သော ဘုရင်မ က အေးအေးလူလူပင် မေးလိုက်သည်။

​"မင်းကို ဘာတွေ ပြောခဲ့လို့လဲ။"

​"ဒီတစ်ကြိမ် အရန်ကိုယ်စားလှယ်သူတော်စင်တွေအကြားက တိုက်ပွဲက အဆင့်ဆင့် တက်လှမ်းရမယ့် စနစ် တဲ့။"

​"အခြားသော စခန်းနယ်မြေတွေက သာမန်သူတော်စင်တွေအတွက် ယှဉ်ပြိုင်ကြတဲ့ အာဏာလုပွဲတွေ အားလုံး ပြီးဆုံးသွားတာကို စောင့်ရမယ်၊ အဲဒီနောက်မှာမှ အဆင့်ဆင့် တက်လှမ်းတဲ့ နည်းလမ်းနဲ့ အရန်ကိုယ်စားလှယ်သူတော်စင်တွေအကြားက ပြိုင်ပွဲတွေကို ဆက်ပြီး ကျင်းပသွားမယ်လို့ ပြောတယ်။"

​သွေးစဥ်းနတ်ဆိုးက ရှင်းပြလိုက်သည်။

​"အဓိပ္ပာယ်ကတော့... ငါတို့အချင်းချင်းကြားမှာ အနိုင်အရှုံးကို အဆုံးသတ်ပြီးသွားရင်တောင်မှ တစ်ဆင့်ပြီး တစ်ဆင့် အပေါ်ကို ဆက်တက်သွားရဦးမယ်၊ တခြား အနိုင်အရှုံး ထွက်ပေါ်ပြီးသား ဖြစ်ကြတဲ့ အရန်ကိုယ်စားလှယ်သူတော်စင်တွေနဲ့ နောက်တစ်ကြိမ် ထပ်ပြီး တိုက်ခိုက်ရဦးမယ် လို့ ဆိုလိုတာလား။"

​မဟာနတ်ဆိုးကြီး၏ အမူအရာ တစ်ချက် ပြောင်းလဲသွားကာ အလွန်တရာမှ လေးနက်သွားခဲ့သည်။

​"ဘာလို့ ဒီလို လုပ်ရတာလဲ ဒါမှမဟုတ်ရင် ဒီတစ်ကြိမ်မှာ အဓိက ရှေးဟောင်း အင်အားစုကြီး ခုနစ်ခုက ငါတို့ရဲ့ စွမ်းအားတွေကို စစ်ဆေးဖို့အတွက် မဟုတ်ဘဲနဲ့, ငါတို့ထဲကနေ ထိပ်တန်း အထွတ်အထိပ် ပုဂ္ဂိုလ် တစ်ယောက် ဒါမှမဟုတ်အများအပြားကို ရွေးချယ်ထုတ်နုတ်ချင်နေကြလို့များလား။"

​အခြားသော အရန်ကိုယ်စားလှယ်သူတော်စင်များသည် ထိုစကားကို ကြားလိုက်ရသဖြင့် မည်သို့မျှ မပြောကြတော့ဘဲ တိတ်ဆိတ်ငြိမ်သက်သွားကြကာ ၎င်းတို့၏ အကြည့်များမှာ အနည်းငယ် လေးနက်သွားကြသည်။

​အရန်ကိုယ်စားလှယ်သူတော်စင် တစ်ဦးက ရုတ်တရက် လှောင်ပြောင်ရယ်မောလိုက်သည်။

​"ဒါဆိုရင် ငါတို့တွေ ဒီနေရာမှာ အမှတ်သုံးမှတ်ကို စုဆောင်းမိကြရင်တောင်မှ မဟာလောက အနှစ်သာရစွမ်းအင်နဲ့ လဲလှယ်ခွင့် ရဖို့ မသေချာဘူးပေါ့။"

​"အသက်နဲ့ရင်းပြီး ရယူရမယ်၊ ဒါပေမဲ့ ခံစားစံစားဖို့ကျတော့ အသက်မရှိတော့ဘူးပေါ့။"

​အရန်ကိုယ်စားလှယ်သူတော်စင် တစ်ဦးချင်းစီသည် ဤစကားကြောင့် အလွန်တရာမှ စိတ်နှလုံးလေးလံလာကြရသည်။

​သူတို့၏ ကိုယ်ပိုင် စွမ်းဆောင်ရည်အပေါ်တွင်မူ ၎င်းတို့ အလွန်တရာမှ ယုံကြည်မှု အပြည့်အဝ ရှိကြပေသည်။

​သို့သော်လည်း ဆန်းနယဲ့ စစ်မြေပြင်ကြီးက ဤမျှလောက်အထိ ကျယ်ပြန့်လှပေသည်။

​စခန်းနယ်မြေပေါင်းများစွာကလည်း အလွန်တရာမှ များပြားလှသည်။

​အာဏာပါဝါ ကြီးမားကြပြီး ထိပ်တန်းရောက်နေကြသည့် ထိုစခန်းနယ်မြေများထဲတွင် ၎င်းတို့ပင်လျှင် အလွန်တရာမှ ကြောက်ရွံ့တုန်လှုပ်ရမည့် အရန်ကိုယ်စားလှယ်သူတော်စင် အများအပြား ရှိနေဆဲပင် ဖြစ်ပေသည်။

​"အကယ်၍သာ ဧကရာဇ် ခြောက်ပါးနှင့် မိဖုရား သုံးပါး နဲ့ ဆုံခဲ့မယ်ဆိုရင် ဘယ်လိုလုပ်ရမလဲ။"

​မဟာနတ်ဆိုးကြီးက ရုတ်တရက် ပြောလိုက်သည်။

​အရန်ကိုယ်စားလှယ်သူတော်စင် အားလုံး ချက်ချင်းပင် စကားသံ တိတ်ဆိတ်သွားကြတော့သည်။

​ဖန့်ချန်က လီတောက်ယဲ့ ဘက်သို့ တစ်ချက် လှမ်းကြည့်လိုက်သည်။

​"ဘယ်လို ဧကရာဇ် ခြောက်ပါးနဲ့ မိဖုရား သုံးပါးလဲ။"

​လီတောက်ယဲ့၏ အမူအရာမှာ ထူးဆန်းနေသည်

"ငါလည်း ဘယ်တုန်းကမှ မကြားဖူးဘူး။"

​အေးစက်သော ဘုရင်မ က ထိုသူနှစ်ဦးဘက်သို့ လှည့်ကြည့်လိုက်သည်။

​"မင်းတို့ရဲ့ အတွေ့အကြုံက နုနယ်လွန်းအားကြီးတော့ ဧကရာဇ် ခြောက်ပါးနဲ့ မိဖုရား သုံးပါး အကြောင်းကို မသိတာ မဆန်းပါဘူး။"

​" ဧကရာဇ် ခြောက်ပါးနဲ့ မိဖုရား သုံးပါး ဆိုတာက လက်ရှိအချိန်မှာ ရှိနေကြတဲ့ အရန်ကိုယ်စားလှယ်သူတော်စင် အားလုံးထဲမှာ အသန်မာဆုံးနဲ့ အထွတ်အထိပ် ရောက်နေကြတဲ့ ပုဂ္ဂိုလ် ကိုးပါးကို ဆိုလိုတာပဲ။"

​လီတောက်ယဲ့က ပြုံးလျက် ဆိုလိုက်သည်

"မင်းတို့ သတ်မှတ်ထားတာလား သူတို့က အသန်မာဆုံး ပုဂ္ဂိုလ် ကိုးပါးပါလို့ ပြောလိုက်တိုင်း အဲဒါက အသန်မာဆုံး ဖြစ်သွားရောလား။"

​အရန်ကိုယ်စားလှယ်သူတော်စင် တစ်ဦးက လီတောက်ယဲ့ ဘက်သို့ လှည့်ကြည့်လာသည်။

​"မင်းရဲ့ အတွင်း ကြယ်တာရာ ဘယ်နှစ်ခုကို ကျင့်ကြံပြုပြင်ပြီးပြီလဲ။"

​"မင်း နဲ့ ဘာဆိုင်လို့လည်း ဒါက ငါ့ရဲ့ လျှို့ဝှက်ချက်ပဲ။"

​လီတောက်ယဲ့က သတိကြီးစွာဖြင့် ထိုသူ့ကို စိုက်ကြည့်လိုက်သည်၊

​"ဒီနေရာမှာ လာပြီး မစုံစမ်းနဲ့။"

​ထိုသူက ပြုံးလျက် ဆိုလိုက်သည်

​"ဧကရာဇ် ခြောက်ပါးနဲ့ မိဖုရား သုံးပါး မှာတော့ ဘယ်လို လျှို့ဝှက်ချက်မှ မရှိဘူး၊ သူတို့က အတွင်း ကြယ်တာရာ (၈၁) ခုအထိ ပြည့်ဝအောင် ကျင့်ကြံပြုပြင်ပြီးသွားကြပြီ။"

​"..."

​လီတောက်ယဲ့၊ လော့ထျန်းဝမ်နှင့် ချိုင်ကျင်းတို့ပင်လျှင် ဤစကားကို ကြားလိုက်ရသဖြင့် မယုံကြည်နိုင်လောက်အောင် ဖြစ်သွားကြရသည်။

​"တကယ်လား။"

​ဖန့်ချန်၏ မျက်ဝန်းများ လင်းလက်သွားသည်။

​သူ့အနေဖြင့် လက်ရှိတွင် အတွင်း ကြယ်တာရာ (၃၆) ခုကို ပိုင်ဆိုင်ထားသူ ဖြစ်ပြီး၊ နောက်ထပ် တစ်ခုတည်း ထပ်မံ၍ ပြုပြင်တည်ဆောက်လိုက်သည်နှင့် ကမ္ဘာကြီး သူတော်စင် အဆင့်အတန်းဆီသို့ တက်လှမ်းရန်အတွက် မထိန်းချုပ်နိုင်တော့ဘဲ ဖြစ်သွားလိမ့်မည် ဖြစ်ပေသည်။

​ဆန်းနယဲ့ စစ်မြေပြင်ကြီးထဲတွင် အတွင်း ကြယ်တာရာ (၈၁) ခုအထိ တည်ဆောက်ပြုပြင်နိုင်ပြီးကမ္ဘာတည်ဆောက်ခြင်း နောက်ဆုံးအဆင့် တွင် ဆက်လက် ရပ်တည်နေဆဲဖြစ်သည့် လူသားများ ရှိနေသေးသည် လို့လား။

​၎င်းတို့၏ ဤကဲ့သို့သော အမူအရာများကို မြင်လိုက်ရသဖြင့် အရန်ကိုယ်စားလှယ်သူတော်စင် အများအပြားမှာ ဟက်ဟက်ပက်ပက် ရယ်မောလာကြသည်။

​စစ်ဘုရင် က အပြုံးလေးဖြင့် ဆိုလိုက်သည်

​"ဧကရာဇ် ခြောက်ပါးနဲ့ မိဖုရား သုံးပါးကိုတော့ လေးစားရမှာပဲ၊ သူတို့က မွေးရာပါ ထူးချွန်တဲ့ အရည်အချင်းတွေ ရှိရုံသာမကဘဲ, သူတို့ရဲ့ ကျောနောက်မှာလည်း မင်းနဲ့ငါတို့ မယုံကြည်နိုင်လောက်အောင် ကြီးမားတဲ့ အရင်းအမြစ်တွေနဲ့ ပြုစုပျိုးထောင်ပေးမှုတွေကို ရရှိထားကြတာကြောင့်သာကမ္ဘာတည်ဆောက်ခြင်း နောက်ဆုံးအဆင့်မှာ အတွင်း ကြယ်တာရာ (၈၁) ခုကို တည်ဆောက်နိုင်ခဲ့ကြပြီး အခြေခံအုတ်မြစ်တွေကို အပြည့်အဝ ခိုင်မာစေခဲ့ကြတာပေါ့။"

​စကားခေတ္တ ရပ်လိုက်ပြီးနောက်

"ဒါပေမဲ့ အားလုံးလည်း သက်ပြင်းချစရာ မလိုပါဘူး ငါတို့တွေ ဧကရာဇ် ခြောက်ပါးနဲ့ မိဖုရား သုံးပါးကို သွားတွေ့ဖို့ဆိုတာ ဘယ်လိုမှ မဖြစ်နိုင်ပါဘူး။"

​အရန်ကိုယ်စားလှယ်သူတော်စင် အားလုံးသည် ထိုစကားကို ကြားလိုက်ရသဖြင့် စိတ်အေးလက်အေး ဖြစ်သွားကြပြီး သက်ပြင်းရှည်ကြီး ကိုယ်စီ ချလိုက်ကြသည်။

​မှန်ပေသည်၊ ၎င်းတို့အနေဖြင့် ဧကရာဇ် ခြောက်ပါးနှင့် မိဖုရား သုံးပါးတို့နှင့် မည်သို့သော အကြောင်းရင်းကြောင့် သွားပြီး ဆုံတွေ့ရမည်နည်း။

​ထိုပုဂ္ဂိုလ် ကိုးပါးနှင့် ၎င်းတို့မှာ လုံးဝ တန်းတူအဆင့် မဟုတ်ပေ။

​ထိုပုဂ္ဂိုလ် ကိုးပါးသည် နောင်တစ်ချိန်တွင် မိစ္ဆာသတ်ဖြတ်ရေး နန်းတော်ကဲ့သို့သော ရှေးဟောင်း အင်အားစုကြီး ခုနစ်ခု၏ ဗဟိုချက်မထဲမှ ဗဟိုချက်မ ဖြစ်လာကြမည်မှာ သံသယရှိစရာပင် မလိုပေ။

​အချိန်နာရီများသည် ဤကဲ့သို့ပင် တစ်ရက်ပြီး တစ်ရက် ကုန်ဆုံးသွားခဲ့သည်။

​စခန်းနယ်မြေ အသီးသီးမှ ပုဂ္ဂိုလ်များသည် ယခုအချိန်တွင် အံ့သြထိတ်လန့်နေကြပြီး အကြောင်းရင်းကို ကောင်းကောင်း မသိရှိကြသေးသော်လည်း အရေးအပါဆုံး မြင်ကွင်းတိုင်းကို လက်လွှတ်မခံလိုကြေတော့ပေ၊ မျက်တောင်မခတ်တမ်းဖြင့် ဤနေရာရှိ မြင်ကွင်းများကို စိုက်ကြည့်နေကြသည်။

​အချိန် သုံးနှစ်ခန့် ကြာမြင့်သွားပြီးနောက်...

​ရုတ်တရက် ကောင်းကင်ယံမှ ရောင်ခြည်တန်း ကိုးခု ပြိုဆင်းလာခဲ့သည်။

​ရွှေရောင် အလင်းတန်းများ ပျောက်ကွယ်သွားသည်နှင့် တစ်ပြိုင်နက် ပုံရိပ်ကိုးခုသည် သူတော်စင် အားလုံး၏ ရှေ့မှောက်တွင် တစ်ပြိုင်နက်တည်း ပေါ်ထွက်လာခဲ့ကြသည်။

​"အခြား စခန်းနယ်မြေတွေက အရန်ကိုယ်စားလှယ်သူတော်စင်တွေက တကယ်ကို အားနည်းလွန်းတယ်။"

​"ငါတို့တွေ နေရာအနှံ့ လျှောက်သွားခဲ့ကြတာတောင်မှ ငါတို့ရဲ့ နေရာကို အစားထိုးနိုင်မယ့်သူ တစ်ယောက်တောင်မှ မတွေ့ရဘူးလား။"

​"ဟာ... ငါတို့တွေ အဆင့်တက်လှမ်းသွားပြီးသွားရင် ဧကရာဇ် ခြောက်ပါးနဲ့ မိဖုရား သုံးပါး ဆိုတာတွေလည်း ရှိတော့မှာ မဟုတ်လောက်ဘူး။"

​ဤပုံရိပ် ကိုးခု ပေါ်ထွက်လာကြပြီးနောက်တွင် ၎င်းတို့ဘာသာ အေးအေးလူလူ စကားစမြည် ပြောဆိုနေကြသည်။

​စားပွဲဝိုင်းကြီး၏ ရှေ့မှောက်ရှိ အံ့သြမှင်တက်နေကြသည့် မျက်ဝန်းစုံများကို လုံးဝ လှည့်ပင် မကြည့်ခဲ့ကြပေ။

​အခန်း (၂၉၉၆) - ယဲ့ထျန်းဂူ၊ မင်း လာခဲ့လေ

​"ဒါ ဘာအဓိပ္ပာယ်လဲ။ ဧကရာဇ် ခြောက်ပါးနဲ့ မိဖုရား သုံးပါးက ဘာလာလုပ်ကြတာလဲ။"

​ရှူးဖူက အံ့သြတုန်လှုပ်လျက် မော့ကြည့်လိုက်သည်။

​ထိုင်နေကြသည့် စခန်းတာဝန်ခံများသည်လည်း အချင်းချင်း တစ်ယောက်မျက်နှာ တစ်ယောက် ကြည့်နေကြပြီး ၎င်းတို့၏ အမူအရာများမှာ အနည်းငယ် လေးနက်သွားကြသည်။

​ထင့်ချီမင်က မျက်ခုံးများကို တွန့်ချိုးကာ ပြောလိုက်သည်။

​"ခဏစောင့်ကြ၊ ငါ မေးကြည့်လိုက်မယ်။"

​သူက မျက်လုံးများကို ဖြည်းဖြည်းချင်း မှိတ်ချလိုက်သည်။

​အချိန် အနည်းငယ် အကြာတွင်မှ မျက်လုံးများကို ပြန်ဖွင့်ကာ ခါးသီးစွာ ပြုံးလိုက်သည်။

​"ဒီတစ်ကြိမ် ဆန်းနယဲ့ စစ်မြေပြင်ရဲ့ အာဏာလုပွဲက တကယ်တော့ ဧကရာဇ် ခြောက်ပါးနဲ့ မိဖုရား သုံးပါးအတွက် ဆက်ခံမယ့်သူတွေကို ရွေးချယ်ပေးနေတာ။"

​"သူတို့တွေက ကမ္ဘာကြီးသူတော်စင် အဆင့်အတန်းဆီကို အဆင့်တက်လှမ်းတော့မှာ။"

​"အရင်တုန်းက အာဏာလုပွဲ ပြီးဆုံးသွားကြတဲ့ စခန်းနယ်မြေတွေဆီကို သူတို့တွေ အစဉ်အတိုင်း သွားရောက်ပြီးပြီ။"

​"စခန်းနယ်မြေ အာဏာလုပွဲ တစ်ခုချင်းစီတိုင်းကနေ သူတို့မျက်စိကျတဲ့ သူတော်စင် အချို့ကို ရွေးချယ်ထုတ်နုတ်သွားကြပြီး သူတို့နဲ့ တိုက်ခိုက်စေမှာ။"

​"အကယ်၍ သူတို့ရဲ့ အသိအမှတ်ပြုမှုကို ရရှိခဲ့မယ်ဆိုရင် သူတို့ အဆင့်တက်လှမ်းပြီးသွားတဲ့နောက်မှာ ဧကရာဇ် ခြောက်ပါးနဲ့ မိဖုရား သုံးပါး ရဲ့ ဘွဲ့နာမကို ဆက်ခံခွင့် ရရှိမှာ။"

​"နောင်လာမယ့် အချိန်တွေမှာလည်း ဆန်းနယဲ့ စစ်မြေပြင်က ဒီလို ဆက်ခံသူတွေကို အဓိကထားပြီး ပြုစုပျိုးထောင်ပေးသွားမှာ ဖြစ်သလို ကမ္ဘာတည်ဆောက်ခြင်း နောက်ဆုံးအဆင့် သူတော်စင် အဆင့်မှာ အတွင်း ကြယ်တာရာ (၈၁) ခုအထိ တည်ဆောက်နိုင်ဖို့အတွက် အခွင့်အလမ်း ပေးသွားမယ်။"

​ဤစကား ထွက်ပေါ်လာသည်နှင့် တစ်ပြိုင်နက် ထိုနေရာတွင် ရှိနေကြသည့် စခန်းတာဝန်ခံ အားလုံး အလွန်တရာမှ အံ့သြသွားကြကာ အမောတကော ရှိုက်ထုတ်လိုက်ကြသည်။

​၎င်းတို့၏ မျက်ဝန်းများထဲတွင် အံ့သြထိတ်လန့်နေသည့် အရိပ်အယောင်များ ပေါ်ထွက်လာသလို အချို့မှာလည်း ဝမ်းမြောက်ဝမ်းသာ ဖြစ်နေကြသည်။

​"ဒါက ရှားပါးလှတဲ့ အခွင့်အရေး တစ်ရပ်ပဲ"

​"တကယ်တော့ ဧကရာဇ် ခြောက်ပါးနဲ့ မိဖုရား သုံးပါးကို ရွေးချယ်တာကိုး"

​"နှမြောစရာပဲ၊ ဒီလူငယ်လေးတွေရော ဒီအခွင့်အရေးကို ဆုပ်ကိုင်နိုင်မလား မသိဘူး။"

​"ဧကရာဇ် ခြောက်ပါးနဲ့ မိဖုရား သုံးပါး ရဲ့ အရည်အချင်းက ငါတို့ထက် အများကြီး အများကြီး သာလွန်တယ်။ ဒီလူငယ်လေးတွေက သူတို့ရဲ့ လက်ချက်အောက်မှာ အဘယ်လောက်ကြာကြာ ခံနိုင်ရည် ရှိမလဲ မသိဘူး..."

​"အလုပ်တွေ အများကြီး ရှုပ်ပြီးမှ အထက်လူကြီးတွေက သွေးသစ်တွေ ထပ်ဖြည့်ချင်နေကြတာ၊ ဧကရာဇ် ခြောက်ပါးနဲ့ မိဖုရား သုံးပါး ကို အစားထိုးဖို့အတွက် သူတော်စင်တွေကို ရှာနေတာပေါ့။"

​ရှူးဖူ၏ အမူအရာမှာ အနည်းငယ် လေးနက်သွားသည်။

​"ထျန်းရွှမ်စခန်း၊ ဘောက်ကျင်းစခန်း၊ ချင်းရှစ်စခန်း..."

​ရွှေရောင် အလင်းတန်းများဖြင့် ဝန်းရံခံထားရသည့် ပုံရိပ် ကိုးခုသည် ယခုအခါတွင် စားပွဲဝိုင်းကြီး ရှိရာဘက်သို့ ရုတ်တရက် လှည့်ကြည့်လိုက်ကြသည်။

​ထိုအထဲမှ တစ်ဦးက တိုးညှင်းစွာဖြင့် ရွတ်ဆိုလိုက်ပြီး စကားအဆုံးတွင် သူ့၏ အကြည့်များသည် ဖန့်ချန်နှင့် လီတောက်ယဲ့တို့ ရှိရာဘက်သို့ ကျရောက်သွားသည်။

​"မင်းတို့က... ဝူရှန်းပေမြိန့်စခန်းကလား။"

​"သူတို့တွေက ဝူရှန်းပေမြိန့်စခန်းကနေ ဆင်းသက်လာကြတာ အမှန်ပဲ၊ မင်းတို့က... ဧကရာဇ် ခြောက်ပါးနဲ့ မိဖုရား သုံးပါး လား။"

​"ကျွန်မက ထျန်းရွှမ်စခန်းက အေးစက်သော ဘုရင်မ ရှောက်ချင်ရွှေ ပါ။"

​အေးစက်သော ဘုရင်မ က ဦးဆောင်ပြီး စကားစတင် ပြောလိုက်ပြီး သူမ၏ အမူအရာမှာ အနည်းငယ် လေးနက်နေသည်။

​စခန်းနယ်မြေ အသီးသီးမှ သူတော်စင်များသည်လည်း ခေါင်းများကို မော့ထားကြပြီး သံသယများ၊ စိုးရိမ်မှုများဖြင့် ထိုပုံရိပ် ကိုးခုကို စိုက်ကြည့်နေကြသည်။

သူတော်စင်များသည်လည်း ထိုနည်းတူပင် ဖြစ်ကြပြီး ၎င်းတို့၏ မျက်ဝန်းများထဲတွင် သံသယများနှင့် ပြည့်နှက်နေကာ မည်သည့်အရာများ ဖြစ်ပျက်နေသည်ကို နားမလည်နိုင် ဖြစ်နေကြသည်။

​ဒီပုဂ္ဂိုလ် ကိုးပါးက ဘယ်သူတွေလဲ၊ ၎င်းတို့က အာဏာလုပွဲကို ဘာအတွက်ကြောင့် ရောက်လာကြတာလဲ။

​"အေးစက်သော ဘုရင်မ ရှောက်ချင်ရွှေလား မင်းရဲ့ နာမည်ကို ငါ အရင်နှစ်တွေတုန်းက ကြားဖူးသလိုပဲ၊ မင်းက လွန်ခဲ့တဲ့ နှစ်ပေါင်းများစွာကတည်းက ကြေးနီ သူတော်စင်နန်းတော်က ရွေးချယ်ထားတဲ့ အရန်ကိုယ်စားလှယ်သူတော်စင် မဟုတ်ဘူးလား။"

​"ဘာလို့ ဒီလောက်တောင် ကြာတာတောင်မှ ကမ္ဘာကြီး သူတော်စင် အဆင့်ကို မတက်လှမ်းနိုင်သေးတာလဲ။"

​ထိုပုဂ္ဂိုလ်က အတွေးထဲနစ်မြောနေဟန်ဖြင့် မေးလိုက်သည်။

​သူ့ဘေးနားရှိ ပုံရိပ်က ၎င်းကို မြင်လိုက်ရသဖြင့် ပြုံးလျက် ဆိုလိုက်သည်။

​"အာဏာပိုင်ဘုရင် ၊ မင်း မေ့သွားပြီလား သူတို့အနေနဲ့ မဟာလောက အနှစ်သာရစွမ်းအင်ကို ရရှိဖို့ဆိုတာ အဲဒီလောက် မလွယ်ကူပါဘူး။"

​"ဒီတစ်ကြိမ် ဆန်းနယဲ့ စစ်မြေပြင်က ငါတို့ရဲ့ နေရာကို အစားထိုးနိုင်မယ့် တကယ့် ထက်မြက်တဲ့ ပုဂ္ဂိုလ်တွေကို ရွေးချယ်ဖို့ ပြင်ဆင်ထားမှသာ ဒီလိုမျိုး ထူးကဲတဲ့ ဆုလာဘ်တွေကို ပေးအပ်တာပေါ့။"

​အာဏာပိုင်ဘုရင် က သဘောပေါက်သွားဟန်ဖြင့် -

"ဒါလည်း ဟုတ်တာပါပဲ။"

​"ဘာလဲ... ဧကရာဇ် ခြောက်ပါးနဲ့ မိဖုရား သုံးပါး ကို အစားထိုးမှာ လို့လား။"

​"ဒီတစ်ကြိမ် အာဏာလုပွဲက တကယ်တော့ ဒီလို ရည်ရွယ်ချက်မျိုးနဲ့ကိုး။"

​"အာ... ဒါကြောင့်မို့လို့ပါလား..."

​ထိုနေရာတွင် ရှိနေကြသည့် အရန်ကိုယ်စားလှယ်သူတော်စင် အားလုံး၏ မျက်နှာများပေါ်တွင် တုန်လှုပ်စရာ အမူအရာများ ပေါ်ထွက်လာကြသလို တစ်ချိန်တည်းမှာပင် ၎င်းတို့၏ စိတ်နှလုံးများမှာ တဖြည်းဖြည်းနဲ့ စိတ်လှုပ်ရှားလာကြသည်။

​ဧကရာဇ် ခြောက်ပါးနဲ့ မိဖုရား သုံးပါး ရရှိနိုင်မည့် ထိုမျှလောက် ကြောက်မက်ဖွယ်ကောင်းသော ပြုစုပျိုးထောင်မှုကို တွေးမိလိုက်သည်နှင့် ၎င်းတို့မှာ စိတ်လှုပ်ရှားမှုကို မထိန်းချုပ်နိုင်တော့ပေ။

​အောက်ဘက်ရှိ စခန်းနယ်မြေ အသီးသီးမှ သူတော်စင်များသည်လည်း ယခုအခါတွင် အလွန်တရာမှ အံ့သြတုန်လှုပ်နေကြသည်။

​စစ်ဘုရင် က ဧကရာဇ် ခြောက်ပါးနဲ့ မိဖုရား သုံးပါး ရဲ့ ကြောက်မက်ဖွယ်ကောင်းပုံကို အခုလေးတင် ရှင်းပြခဲ့ရုံသာ ရှိသေးသည်၊ ရုတ်တရက် မျက်စိတစ်မှိတ်အတွင်းမှာပင် ၎င်းတို့ကို တကယ်တမ်း တွေ့လိုက်ရလိမ့်မည်ဟု မည်သူကမှ ထင်မှတ်ထားလိမ့်မည် မဟုတ်ပေ။

​"ကဲပါ၊ ငါတို့ရဲ့ လာရာရင်းမြစ်ကို မင်းတို့ သေချာပေါက် သိကြလောက်မယ် ထင်ပါတယ်။"

​အာဏာပိုင်ဘုရင် က အေးအေးလူလူပင် ပြုံးလျက် ဆိုလိုက်သည်။

​"ငါတို့ကတော့ ဧကရာဇ် ခြောက်ပါးနဲ့ မိဖုရား သုံးပါး ဖြစ်ကြပြီး၊ ငါကတော့ ဧကရာဇ် ခြောက်ပါးထဲက တစ်ပါးဖြစ်တဲ့ အာဏာပိုင်ဘုရင် ပဲ။"

​"အခု မင်းတို့ကို စည်းကမ်းတွေကို ရှင်းပြမယ်၊ မင်းတို့ရဲ့ နားတွေကို သေချာစိုက်ပြီး ကောင်းကောင်း နားထောင်ထားကြ။"

​"မှန်ပါ့"

​အရန်ကိုယ်စားလှယ်သူတော်စင် အားလုံးက လေးစားသမှုဖြင့် ပြန်လည် ဖြေကြားလိုက်ကြသည်။

​"ငါတို့ ဧကရာဇ် ခြောက်ပါးနဲ့ မိဖုရား သုံးပါး က အထက်လူကြီးတွေရဲ့ အမိန့်ကို ခံယူပြီး ကမ္ဘာကြီး သူတော်စင် အဆင့်အတန်းဆီကို အဆင့်တက်လှမ်းရမှာ ဖြစ်တဲ့အတွက် ဒီနေရာက နေရာ ကိုးခုကို မဖြစ်မနေ လွတ်မြောက်အောင် လုပ်ရမယ်။"

​"ဒါကြောင့်မို့လို့ ဒီတစ်ကြိမ် အာဏာလုပွဲ ပေါ်ပေါက်လာရတာပဲ။"

​"ရည်ရွယ်ချက်ကတော့ ဆန်းနယဲ့ စစ်မြေပြင်ထဲက အဆုံးအစမရှိတဲ့ စခန်းနယ်မြေတွေထဲကနေ ငါတို့ရဲ့ ဆက်ခံသူတွေကို ရွေးချယ်ဖို့ပါပဲ။"

​"ဒါပေမဲ့ ဘယ်သူမဆို ငါတို့ရဲ့ ရှေ့မှောက်မှာ ရပ်တည်နိုင်ဖို့ အရည်အချင်း ရှိကြတာတော့ မဟုတ်ဘူး။"

​"မင်းတို့ အခုလုပ်ရမှာက အနိုင်အရှုံးကို အဆုံးသတ်ဖို့ပါပဲ၊ ထိပ်ဆုံးက သုံးယောက်ကသာ ငါတို့ရဲ့ ရှေ့မှောက်မှာ ရပ်တည်ပြီး ငါတို့ရဲ့ စစ်ဆေးမှုကို ခံယူခွင့် ရှိကြတယ်။"

​"ဒီလိုလုပ်ကြစို့၊ ငါ မင်းတို့အတွက် စည်းကမ်းတစ်ခု ချမှတ်ပေးမယ်၊ တရားမျှတပြီးတော့ မင်းတို့ရဲ့ စွမ်းရည်တွေကို အပြည့်အဝ ထုတ်ဖော်ပြသနိုင်မယ့် စည်းကမ်းမျိုးပေါ့။"

​အာဏာပိုင်ဘုရင် က ထိုနေရာရှိ အရန်ကိုယ်စားလှယ်သူတော်စင် အားလုံးကို တစ်ချက် လှမ်းကြည့်လိုက်သည်။

​"ဘယ်သူက ပထမဆုံး ထွက်လာပြီး စိန်ခေါ်ချင်လဲ၊ အကယ်၍ ပွဲသုံးပွဲဆက်တိုက် အနိုင်ရရှိသွားမယ်ဆိုရင် ငါ့ရဲ့ ရှေ့မှောက်မှာ တိုက်ရိုက် ရပ်တည်နိုင်မယ့် အခွင့်အရေးကို ရရှိမှာ။"

​"ခဏနေရင် ငါ ကိုယ်တိုင်ပဲ စစ်ဆေးပေးမယ်။"

​ဤစကား ထွက်ပေါ်လာသည်နှင့် တစ်ပြိုင်နက် ထိုနေရာရှိ အရန်ကိုယ်စားလှယ်သူတော်စင်များ၏ မျက်ဝန်းများ ချက်ချင်း တောက်လောင်သွားကြသည်။

​ပွဲသုံးပွဲဆက်တိုက် အနိုင်ရလိုက်ရုံနဲ့ အာဏာပိုင်ဘုရင် ရဲ့ စစ်ဆေးမှုကို ခံယူမယ့် အခွင့်အရေးကို တိုက်ရိုက် ရရှိမှာလား။

​မဟာနတ်ဆိုးကြီးက ချက်ချင်းပင် ဟက်ဟက်ပက်ပက် ရယ်မောလိုက်သည်။

​"ဒါဆိုရင် ငါ အရင်ဆုံး စလုပ်မယ်"

​စက္ကန့်ပိုင်းအတွင်းမှာပင် သူ့ကို ချုပ်နှောင်ထားခဲ့သည့် ရွှေရောင် အလင်းတန်းများ ပျောက်ကွယ်သွားသည်ကို သူ တွေ့လိုက်ရသဖြင့် အနည်းငယ် ဝမ်းသာအားရ ဖြစ်သွားသည်။

​သူက ချက်ချင်းပင် နေရာမှ ထရပ်လိုက်ပြီး ဖန့်ချန်ကို လက်ညှိုးထိုးပြလိုက်သည်။

​"ဝူရှန်းပေမြိန့်စခန်းက ယဲ့ထျန်းဂူ၊ ငါ မင်းကို စိန်ခေါ်တယ်"

​ဖန့်ချန်က သူ့ကိုယ်သူ ပတ်လည်ရှိ ရွှေရောင် အလင်းတန်းများလည်း ရုတ်တရက် ပျောက်ကွယ်သွားသည်ကို ခံစားလိုက်ရသဖြင့် စိတ်ထဲတွင် အနည်းငယ် အံ့သြသွားသည်။

​ဆန်းနယဲ့ စစ်မြေပြင်ထဲရှိ ဤဧကရာဇ် ခြောက်ပါးနဲ့ မိဖုရား သုံးပါး ရဲ့ အခွင့်အာဏာက သူထင်ထားတာထက် အများကြီး ပိုပြီး ကြီးမားနေတာပဲ။

​"လာခဲ့လေ။"

​ဖန့်ချန်က ထရပ်လိုက်ပြီး သူ၏ ကိုယ်ခန္ဓာကို အကြောဖြေလိုက်သည်။

​ဒီနေ့ကို ရောက်လာဖို့အတွက် အတော်လေးကို စောင့်ဆိုင်းခဲ့ရပေပြီ။

​စခန်းနယ်မြေ အသီးသီးမှ သူတော်စင်များသည် ချက်ချင်းပင် အသက်ရှူရပ်သွားကြသည်အထိ အာရုံစိုက်လိုက်ကြသည်။

​အထူးသဖြင့် ဝူရှန်းပေမြိန့်စခန်းမှ သူတော်စင်များသည် ဖန့်ချန်၏ စွမ်းဆောင်ရည်ကို ကောင်းကောင်း သိရှိထားကြသူများ ဖြစ်ကြသဖြင့် ယခုအခါတွင် မျှော်လင့်ချက်အပြည့်ဖြင့် ကြည့်နေကြသည်။

​"ဝူရှန်းပေမြိန့်စခန်းက ယဲ့ထျန်းဂူလား ဪ၊ တကယ်တော့ မင်းက ယဲ့ထျန်းဂူ ကိုး။"

​အာဏာပိုင်ဘုရင် ၏ အကြည့်များသည် ဖန့်ချန်၏ ကိုယ်ပေါ်သို့ ကျရောက်သွားပြီး အပြုံးလေးဖြင့် ဆိုလိုက်သည်။

​"ငါ လွန်ခဲ့တဲ့ နှစ်အနည်းငယ်တုန်းက မင်းရဲ့ နာမည်ကို ကြားဖူးတယ်။"

​"ဟား..."

​အရန်ကိုယ်စားလှယ်သူတော်စင် အားလုံးနီးပါးမှာ တိတ်တဆိတ် အမောတကော ရှိုက်ထုတ်လိုက်ကြသည်။

​ဒါ တကယ်ပဲလား

​ဧကရာဇ် ခြောက်ပါးနဲ့ မိဖုရား သုံးပါး က ယဲ့ထျန်းဂူ ရဲ့ နာမည်ကို တကယ်ပဲ ကြားဖူးတယ် လို့ ပြောတာလား။

​"ကြိုးစားပါကွာ၊ မင်း ဒီတစ်ကြိမ်မှာ ငါ့ရဲ့ ရှေ့မှောက်မှာ ရပ်တည်နိုင်ဖို့ တကယ်ကို အခွင့်အလမ်း ရှိပါတယ်။"

​အာဏာပိုင်ဘုရင် က အပြုံးလေးဖြင့် အားပေးစကား ဆိုလိုက်သည်။

​မဟာနတ်ဆိုးကြီး၏ မျက်ဝန်းများထဲတွင် ရက်စက်ကြမ်းကြုတ်သော အရိပ်အယောင်များ ဖြတ်ပြေးသွားပြီး ချက်ချင်းပင် လေထုထဲသို့ ပျံသန်းထွက်သွားကာ ဖန့်ချန်ကို ကြိမ်းဝါးလိုက်သည်။

​"ယဲ့ထျန်းဂူ၊ မင်း လာခဲ့လေ"

​စက္ကန့်ပိုင်းအတွင်းမှာပင် မဟာနတ်ဆိုးကြီး၏ ကိုယ်ခန္ဓာထဲမှ မည်းနက်နေသော မိစ္ဆာအခိုးအငွေ့များ ရုတ်တရက် ထွက်ပေါ်လာပြီး သူ့၏ ကိုယ်ခန္ဓာမှာ ချက်ချင်းပင် အဆပေါင်းများစွာ ကြီးထွားလာကာ ဧရာမ မည်းနက်နေသော ဘီလူးကြီး တစ်ပါးအဖြစ်သို့ ပြောင်းလဲသွားသည်။

​"မသေနိုင်တဲ့ မိစ္ဆာကိုယ်ခန္ဓာ၊ ဒါက မဟာနတ်ဆိုးကြီး နာမည်ကြီးစေခဲ့တဲ့ ထူးခြားဆန်းကြယ်တဲ့ စွမ်းအင်ပညာရပ် တွေထဲက တစ်ခုပဲ။"

​အရန်ကိုယ်စားလှယ်သူတော်စင် အားလုံးက မျက်လုံးများ ပြူးကျယ်သွားကြပြီး မဟာနတ်ဆိုးကြီးက အစတည်းက အပြင်းထန်ဆုံး စွမ်းအင်ပညာရပ်ကို ထုတ်သုံးလိုက်ခြင်းမှာ အနည်းငယ် တန်ဖိုးမရှိလှပေ၊ ပထမဆုံးအနေနဲ့ အခြေအနေကို အရင်စောင့်ကြည့်သင့်ပြီးမှ တစ်ဆင့်ချင်း တုံ့ပြန်သင့်သည်ဟု တွေးလိုက်ကြသည်။

​သို့သော်လည်း နောက်တစ်စက္ကန့်တွင်မူ ဖန့်ချန်သည် မျက်စိတစ်မှိတ်အတွင်းမှာပင် ပို၍ ကြောက်မက်ဖွယ်ကောင်းပြီး သန်မာလှသည့် ဧရာမ ဘီလူးကြီး တစ်ပါးအဖြစ်သို့ ပြောင်းလဲသွားသည်ကို ၎င်းတို့ တွေ့လိုက်ရသည်။

​မျက်စိတစ်မှိတ်အတွင်းမှာပင် မဟာနတ်ဆိုးကြီးကို မြေကြီးပေါ်သို့ ဖိချလိုက်ပြီး သူ့၏ မျက်နှာပေါ်သို့ လက်သီးချက်များကို တစ်ချက်ပြီး တစ်ချက် ပြင်းပြင်းထန်ထန် ထိုးချလိုက်သည်။

​ဘုန်း ဘုန်း ဘုန်း

​မဟာနတ်ဆိုးကြီးက လက်သီးချက် တစ်ချက်တည်းကို ခံလိုက်ရုံဖြင့် အသိစိတ် မရှိတော့ဘဲ သတိလစ်သွားခဲ့သည်။

​လက်သီးချက် တစ်ချက်ချင်းစီတိုင်းက သူ့၏ ကိုယ်လက်အင်္ဂါများကို မထင်မှတ်ဘဲ တုန်ခါသွားစေသည်။

​"..."

​"အစ်ကိုကြီးက... အရင်တုန်းက ဒီစွမ်းအင်ပညာရပ်ကို သုံးဖူးပုံမရဘူး၊ ဒါ ဘယ်လို စွမ်းအင်ပညာရပ်လဲ။"

​ထုံယိုဧကရာဇ်က မသိစိတ်ဖြင့် ရှဲ့အာမန်နှင့် ဝမ်ချုံစန်း တို့ ရှိရာဘက်သို့ လှည့်ကြည့်လိုက်သည်။

​"ကလေးတွေက ဒါတွေ လာမမေးနဲ့၊ နင် မမြင်ဖူးတဲ့ စွမ်းအင်ပညာရပ်တွေ အများကြီး ရှိသေးတယ်။"

​ချန်နန်‌ခယ် က ပေါ့ပေါ့ပါးပါးပင် ပြန်ပြောလိုက်သည်။

​ထုံယိုဧကရာဇ်လည်း ချက်ချင်းပင် ပါးစပ်ပိတ်လိုက်ပြီး ဘာမှ ဆက်မပြောတော့ပေ။

​ဘောက်ကျင်းစခန်းမှ သူတော်စင်များသည် ဤမြင်ကွင်းကို ကြည့်နေရင်း စိတ်နှလုံးများ ကွဲအက်သွားကြရသည်။

​နောက်ထပ် လက်သီးချက် အနည်းငယ် ထပ်ထိုးလိုက်သည်။

​မဟာနတ်ဆိုးကြီး၏ သတိမေ့နေသော အသံတိုးတိုးလေး ထွက်ပေါ်လာသည်ကိုသာ ကြားလိုက်ရပြီး၊ မကြာမီမှာပင် သူသည် မည်းနက်နေသော မီးခိုးငွေ့တန်းလေး တစ်ခုအဖြစ်သို့ ပြောင်းလဲသွားကာ လုံးဝ ပျောက်ကွယ်သွားခဲ့သည်။

​ဧကရာဇ် ခြောက်ပါးနဲ့ မိဖုရား သုံးပါး သည် အချင်းချင်း တစ်ယောက်မျက်နှာ တစ်ယောက် ကြည့်လိုက်ကြပြီး အားလုံး၏ မျက်ဝန်းများထဲတွင် အနည်းငယ် အံ့သြနေကြသည့် အရိပ်အယောင်များကို တွေ့လိုက်ရသည်။

​အာဏာပိုင်ဘုရင် က ရယ်မောလျက် လက်ခုပ်တီးလိုက်သည်။

​"ကောင်းတယ်၊ တကယ်ကို ကောင်းတယ်။"

​"မင်းအနေနဲ့ နောက်ထပ် လူနှစ်ယောက်ကို ဆက်ပြီး စိန်ခေါ်လို့ ရသေးတယ်၊ ရွေးလိုက်တော့။"

​စားပွဲဝိုင်းကြီး၏ ရှေ့မှောက်တွင် ရှိနေကြသည့် အရန်ကိုယ်စားလှယ်သူတော်စင်များသည် ထိုစကားကို ကြားလိုက်ရသဖြင့် ချက်ချင်းပင် ကျောရိုးထဲမှ စိမ့်တက်လာသည်အထိ ကြောက်ရွံ့လာကြသည်။

​ဖန့်ချန်က မော့ကြည့်လိုက်သောအခါတွင် ထိုအရန်ကိုယ်စားလှယ်သူတော်စင် အားလုံးသည် သဘာဝကျကျပင် ၎င်းတို့၏ အကြည့်များကို လွှဲဖယ်လိုက်ကြပြီး လေးနက်စွာ တွေးတောနေကြဟန် ဆောင်နေကြသည်ကို တွေ့လိုက်ရပေသည်။