အခန်း ၇၀

အပိုင်း(၇၀)

အထူး စွမ်းရည်သာ မရှိပါက နစ်၏ ခွန်အားသည်လည်း သာမန် အရွယ်ရောက်ပြီး အမျိုးသား တစ်ယောက်ခန့်သာ ရှိမည် ဖြစ်၏။ သို့သော်လည်း ဆင်ခြေဖုံးရပ်ကွက်ကြီး အတွင်းရှိ လူတိုင်းမှာ အာဟာရချို့တဲ့နေကြသဖြင့် နစ်သည် ပျမ်းမျှလူများထက် များစွာ ပို၍ အားကောင်းသူအဖြစ် သတ်မှတ်ခံရဆဲ ဖြစ်သည်။

ထို့ကြောင့်ပင် ဒရီမာသည် နစ်ထက် များစွာ ပို၍ အစွမ်းထက်နေခဲ့ခြင်း ဖြစ်၏။ သို့သော် နစ်၏ စွမ်းရည် သက်ဝင်လာသောအခါတွင်မူ သူသည် ဒရီမာထက် များစွာ ပိုမို အစွမ်းထက်လာခဲ့သည်။ သို့တိုင်အောင် ဒရီမာသည်သာ ယခုကဲ့သို့ အစွမ်းထက်နေခဲ့မည် ဆိုပါက နစ်သည် ယှဉ်ပြိုင်တိုက်ခိုက်နိုင်ခဲ့မည် မဟုတ်ပေ။

၎င်းသည် နစ်ကို အလွယ်တကူပင် ဆွဲဖြဲပစ်လိုက်နိုင်ပေမည်။

ယခုအချိန်တွင် ဒရီမာသည် နစ်က သူ၏စွမ်းရည်ကို အသက်သွင်းကာ ၎င်းကို ဖမ်းဆီးခဲ့စဉ်က နစ်၏ စွမ်းအားမျှ ရှိနေပြီ ဖြစ်၏။

သို့သော်လည်း ဇီဖစ်စွမ်းအင် ထုတ်ယူသူ များသည်လည်း ပိုမို အစွမ်းထက်လာနိုင်ကြောင်းကို သတိပြုရမည် ဖြစ်သည်။

ဒရီမာက ဇီဖစ်စွမ်းအင် ထုတ်လုပ်သောအခါ နစ်သည်လည်း ထို ဇီဖစ်စွမ်းအင် အချို့ကို စုပ်ယူရရှိ၏။ သို့သော် အရေးကြီးသည့်အချက်မှာ နစ်၏ စွမ်းအား တိုးတက်လာမှုသည် ဇီဖစ်စွမ်းအင် ထုတ်လုပ်မှုကို ထိခိုက်နစ်နာစေခြင်း မရှိပေ။

ဇီဖစ်စွမ်းအင် ထုတ်ယူသူ တစ်ယောက်သည် စပက်တာ တစ်ကောင်နှင့် အလုပ်လုပ်သောအခါ ၎င်းတို့ နှစ်ဦးစလုံးက ဇီဖစ်စွမ်းအင်ကို ထုတ်လုပ်ကြ၏။ သို့သော် စပက်တာ မှ ထုတ်လုပ်သော ဇီဖစ်စွမ်းအင် ကိုသာလျှင် ရိတ်သိမ်းယူမည် ဖြစ်သည်။

ဇီဖစ်စွမ်းအင် ထုတ်ယူသူ မှ ထုတ်လုပ်သော ဇီဖစ်စွမ်းအင် သည် ထုတ်ယူသူ၏ ခန္ဓာကိုယ်ထဲမှ ဘယ်သောအခါမျှ ထွက်ခွာသွားမည် မဟုတ်ပေ။ ၎င်းသည် ချက်ချင်း စုပ်ယူခံရမည်ဖြစ်ပြီး ထုတ်ယူသူ၏ စွမ်းအားကို တိုးပွားစေမည် ဖြစ်၏။

ယေဘုယျအားဖြင့် ထုတ်ယူသူ ထုတ်လုပ်သော ဇီဖစ်စွမ်းအင် သည် စပက်တာ ထုတ်လုပ်သော ပမာဏ၏ ၂၀ ရာခိုင်နှုန်းခန့် ရှိတတ်သည်။ သို့သော် ဤအချိုးအစားမှာ ပြောင်းလဲနိုင်ခြေ ရှိ၏။

ဆိုလိုသည်မှာ အကယ်၍ နစ်က ဒရီမာကို ဇီဖစ်စွမ်းအင် ဆယ်ဂရမ် ထုတ်လုပ်ရန် ခိုင်းစေပါက နစ်သည် သူ၏ကိုယ်ပိုင်အတွက် ဇီဖစ်စွမ်းအင် နှစ်ဂရမ်ခန့် ရရှိမည် ဖြစ်၏။

ပုံမှန်အခြေအနေများအောက်တွင် ဆိုရလျှင် ယင်းက ဒရီမာသည် နစ်ထက် ငါးဆ ပိုမိုမြန်ဆန်စွာ ကြီးထွားလာမည်ဟု ဆိုလိုခြင်း ဖြစ်သည်။

သို့သော်လည်း ထိန်းသိမ်းရေးခန်း သည် ဇီဖစ်စွမ်းအင် ၏ ၉၀ ရာခိုင်နှုန်းကို ရိတ်သိမ်းလိုက်ကြောင်းကို သတိရရမည် ဖြစ်၏။ ဆိုလိုသည်မှာ ထုတ်လုပ်လိုက်သော ဆယ်ဂရမ်ထဲမှ ဒရီမာသည် တစ်ဂရမ်သာ သိမ်းဆည်းထားနိုင်မည် ဖြစ်သည်။

သို့သော် တစ်ချိန်တည်းမှာပင် လူသုံးယောက်သည် ဒရီမာနှင့် နေ့စဉ် အလုပ်လုပ်နေပြီး ဇီဖစ်စွမ်းအင် စုစုပေါင်း ၂၄ ဂရမ်ခန့် ထုတ်လုပ်နေကြောင်းကိုလည်း မှတ်သားထားရမည် ဖြစ်၏။

ထို့ကြောင့် တစ်နေ့လျှင် ဒရီမာသည် ဇီဖစ်စွမ်းအင် ၂.၄ ဂရမ်ခန့်ဖြင့် ကြီးထွားနေပြီး နစ်ကမူ နှစ်ဂရမ်ခန့်ဖြင့် ကြီးထွားနေသည်ဟု ဆိုလိုခြင်း ဖြစ်သည်။

သို့သော် အဆင့်ကွာခြားမှုကြောင့် အဆင့်တက်ရန်အတွက် နစ်သည် ဒရီမာလောက် ဇီဖစ်စွမ်းအင် မလိုအပ်ပေ။ ဆိုလိုသည်မှာ သူသည် ပိုမို မြန်ဆန်စွာ ကြီးထွားနေခြင်းပင် ဖြစ်၏။

ဤသို့ဆိုလျှင် ဤအရာက နစ်၏ တကယ့် စွမ်းအားအတွက် ဘာကို ဆိုလိုသနည်း။

မနေ့ကတင် နစ်သည် နောက်ထပ် အဆင့်တစ်ခုသို့ အောင်မြင်စွာ တက်လှမ်းနိုင်ခဲ့ပြီ ဖြစ်သည်။ ထို့ကြောင့် ယခုအချိန်တွင်မူ... နစ်သည် ပထမအဆင့်၏ နှောင်းပိုင်းအဆင့် သို့ ရောက်ရှိနေပြီ ဖြစ်၏။

သို့မဟုတ် တရားမဝင် အခေါ်အဝေါ်ကို သုံးရမည်ဆိုလျှင် နှောင်းပိုင်း လူသစ် အဆင့်သို့ ရောက်ရှိနေပြီ ဖြစ်ပေသည်။

အခြေခံအားဖြင့် ဆိုရလျှင် ယင်းက နစ်သည် ဒရီမာ ကို ဖမ်းဆီးခဲ့စဉ်က သူ၏စွမ်းအားထက် ၃.၄ ဆခန့် ပိုမို အစွမ်းထက်လာသည်ဟု ဆိုလိုခြင်း ဖြစ်၏။

ဒရီမာ တွင် တိုက်ခိုက်ရေးအတွက် အသုံးဝင်သော စွမ်းရည် မရှိသောကြောင့် အကယ်၍ နစ်သာ ထိုအချိန်က ဤမျှလောက် အစွမ်းထက်နေခဲ့မည်ဆိုလျှင် သူ၏စွမ်းရည်ကို အသုံးမပြုဘဲနှင့်ပင် ဒရီမာ ကို ဖမ်းဆီးနိုင်ခဲ့မည် ဖြစ်သည်။

သို့သော် ထိုအချက်က စပက်တာ များသည် အန္တရာယ် မရှိတော့ဘူးဟု ဆိုလိုခြင်း မဟုတ်ပေ။ စပက်တာ များ၏ ရုပ်ပိုင်းဆိုင်ရာ ခန္ဓာကိုယ်များသည် ၎င်းတို့၏ စွမ်းအားများထဲမှ သေးငယ်သော အစိတ်အပိုင်း တစ်ခုမျှသာ ဖြစ်၏။ တကယ်တမ်း ခြိမ်းခြောက်နိုင်ပြီး ကြောက်မက်ဖွယ် ကောင်းသောအရာမှာ ၎င်းတို့၏ စွမ်းရည်ပင် ဖြစ်သည်။

ဥပမာအားဖြင့် မိသားစုနောက်ခံကြောင့် ဝင်တာ သည် စပက်တာ တစ်ကောင်ထံမှ အလွန် အစွမ်းထက်သော စွမ်းရည်တစ်ခုကို ရရှိထားခဲ့၏။ ထိုစွမ်းရည်သည် စပက်တာ များကို ဖမ်းဆီးရာတွင် သိပ်၍ အသုံးမဝင်သော်လည်း အသက်ရှင်သန်ရေးအတွက်မူ မယုံနိုင်လောက်အောင် အသုံးဝင်လှပေသည်။ ထိုစွမ်းရည်သည် မျက်ကန်း အလင်းတန်း ဟုခေါ်သည့် စပက်တာ တစ်ကောင်ထံမှ ရရှိလာခြင်း ဖြစ်၏။

မျက်ကန်း အလင်းတန်း သည် လေထဲတွင် ပေါလောပေါ်နေသော အလင်းဘောလုံး တစ်လုံးနှင့်တူသည့် အဆင့်သုံး စပက်တာ တစ်ကောင် ဖြစ်သည်။

ထိုစပက်တာ သည် ကူဂယ်ဘလစ် ကုမ္ပဏီ၏ ပိုင်ဆိုင်မှုဖြစ်ပြီး ထိုအချက်ကြောင့်ပင် ဝင်တာ အနေဖြင့် ၎င်း၏ စွမ်းရည်ကို ရယူနိုင်ခဲ့ခြင်း ဖြစ်၏။

မျက်ကန်း အလင်းတန်း သည် သီအိုရီအရ လူတစ်ယောက်ကို ၎င်း၏ ခန္ဓာကိုယ်ဖြင့် ဝင်တိုက်နိုင်သော်လည်း ယင်းမှာ ၎င်း၏ အန္တရာယ်အရှိဆုံး အချက်တော့ မဟုတ်ပေ။ ၎င်း၏ အစစ်အမှန် စွမ်းအားမှာ လူများကို လောင်ကျွမ်းစေနိုင်သော စွမ်းရည်ပင် ဖြစ်သည်။ မျက်ကန်း အလင်းတန်းသည် ၎င်း၏ အနီးအနားရှိ မည်သည့် သက်ရှိသတ္တဝါကိုမဆို လောင်ကျွမ်းသွားစေနိုင်၏။

၎င်းကို တိုက်ရိုက် စိုက်ကြည့်ခြင်းကသာ ခြွင်းချက် ဖြစ်သည်။ သို့သော်လည်း... မျက်ကန်း အလင်းတန်း ကို တိုက်ရိုက် ကြည့်လိုက်မိမည် ဆိုပါက မျက်လုံးများ လောင်ကျွမ်းသွားမည် ဖြစ်သည်။ အခြေခံအားဖြင့်တော့ လူတစ်ယောက်သည် အသက်ရှင်သန်နိုင်ရန်အတွက် သူ၏ အမြင်အာရုံနှင့် လဲလှယ်ရခြင်းပင် ဖြစ်၏။

အကယ်၍ လူတစ်ယောက်သည် သူ၏ မျက်လုံးများကို ဆုံးရှုံးသွားပါက မျက်ကန်း အလင်းတန်း ၏ လောင်ကျွမ်းစေသော အာနိသင်ကို ခုခံနိုင်စွမ်း ရှိသွားမည် ဖြစ်သည်။

ဤသည်က မျက်ကန်း အလင်းတန်း ကို မျက်လုံးမပါဘဲ တိုက်ခိုက်ရမည်ဟု ထိရောက်စွာ ဆိုလိုခြင်းပင် ဖြစ်၏။

အကယ်၍ မျက်ကန်း အလင်းတန်းသာ သားပေါက်အဆင့် ဖြစ်နေခဲ့ပြီး နစ်ကသာ ၎င်းကို ဖမ်းဆီးရန် ကြိုးစားခဲ့မည်ဆိုပါက အခြေအနေများမှာ အလွန်ကွဲပြားခြားနားသွားပေလိမ့်မည်။

ဒရီမာ၏ စွမ်းရည်နှင့် နှိုင်းယှဉ်ပါက မျက်ကန်း အလင်းတန်း ၏ စွမ်းရည်မှာ တိုက်ခိုက်ရေးအတွက် တကယ်ကို အသုံးဝင်လှပေသည်။

မျက်ကန်း အလင်းတန်းသည်သာ သားပေါက်အဆင့် ဖြစ်နေမည်ဆိုပါက ၎င်းကို မည်သို့ ဖမ်းဆီးရမည်ကို နစ် သေချာမည် မဟုတ်သလို သူ အသက်ရှင်နိုင်မည်လား ဆိုသည်ကိုလည်း သေချာမည် မဟုတ်ပေ။ ကံကောင်းစွာဖြင့် ဒရီမာ တွင် တိုက်ခိုက်ရေးအတွက် အသုံးဝင်သော စွမ်းရည် မရှိခဲ့ပေ။

ဝင်တာ က မျက်ကန်း အလင်းတန်း အကြောင်းကို နစ်အား ပြောပြချိန်တွင် သူ ထိုအရာကို မည်မျှ မုန်းတီးကြောင်းကိုလည်း ပြောပြခဲ့၏။ ဝင်တာ တွင် ၎င်း၏ စွမ်းရည် ရှိနေခဲ့ပြီး ထိုစွမ်းရည်ကို ရရှိရန်အတွက် ဝင်တာ သည် သူ၏ မျက်လုံးများကို ငါးကြိမ်တိုင်တိုင် ဆုံးရှုံးခဲ့ရသည်။ ဤသည်မှာ သူ၏ဘဝတွင် နာကျင်ရဆုံး အတွေ့အကြုံဖြစ်ခဲ့ကြောင်း သူက ဆို၏။

ပုံမှန်အားဖြင့် မျက်ကန်း အလင်းတန်း ၏ စွမ်းရည်ကို ရရှိရန် ထိုမျှလောက် အကြိမ်အရေအတွက် မလိုအပ်ကြောင်းကိုပင် ဝင်တာ က နစ်အား ပြောပြခဲ့သေးသည်။ ပုံမှန်ဆိုလျှင် လူများသည် သူတို့၏ မျက်လုံးများကို သုံးကြိမ်မျှသာ လောင်ကျွမ်းခံရန် လိုအပ်၏။ အချို့ဆိုလျှင် နှစ်ကြိမ်တည်းနှင့်ပင် ရရှိသွားတတ်ကြသည်။

သို့သော် ဝင်တာ အတွက်မူ ငါးကြိမ်တိုင်တိုင် လိုအပ်ခဲ့၏။

နစ်သည် ဘာကြောင့်လဲဟု မေးခဲ့ပြီး ဝင်တာ ၏ အဖြေကတော့ အလွန်ပင် ရိုးရှင်းနေခဲ့သည်။

"အဲဒါက ငါ ဇီဖစ်စွမ်းအင် ထုတ်လုပ်တဲ့နေရာမှာ ပါရမီမပါဘူးလို့ ဆိုလိုတာပဲ... ငါ့မှာ ဇီဖစ်စွမ်းအင် ထုတ်ယူသူ တစ်ယောက် ဖြစ်လာဖို့ ပါရမီ မရှိဘူးဆိုတဲ့ သဘောပေါ့..."

သဘာဝကျစွာပင် ဇီဖစ်စွမ်းအင် ထုတ်ယူသူ တစ်ယောက် ဖြစ်ရခြင်းသည် ကမ္ဘာပေါ်တွင် အထူးချွန် အပြောင်မြောက်ဆုံး အသက်မွေးဝမ်းကျောင်း အလုပ်များထဲမှ တစ်ခုဖြစ်ပြီး မဲဖီယွန် မိသားစု၏ အမွေဆက်ခံသူ တစ်ယောက် ဖြစ်လာရန်အတွက် လုံလောက်သည်ထက်ပင် ပိုနေခဲ့ပြီ ဖြစ်၏။

သို့တိုင်အောင် ဝင်တာ တွင် ပါရမီ မရှိသောကြောင့် သူသည် အုပ်ချုပ်ရေးလမ်းကြောင်းကိုသာ ရွေးချယ်ခဲ့ရပြီး အံ့မခန်း စီးပွားရေးသမား တစ်ယောက် ဖြစ်လာခဲ့ရသည်။ သို့သော် ထိုသို့ဖြစ်လာရန်အတွက် သူသည် ငွေကြေး လိုအပ်၏။ ထို့ကြောင့်ပင် သူတို့ ယခု ဒုတိယမြောက် စပက်တာ တစ်ကောင် ရယူရန် ဆွေးနွေးနေကြခြင်း ဖြစ်သည်။

"မင်း အများကြီး ပိုပြီး အစွမ်းထက်လာတယ် ဆိုပေမယ့်လည်း စပက်တာ တစ်ကောင်၊ သားပေါက်အဆင့် ဆိုရင်တောင်မှ မင်းရဲ့ သေရေးရှင်ရေးကို ခြိမ်းခြောက်နိုင်သေးတယ် ဆိုတာကို မမေ့ပါနဲ့..."

ဝင်တာ က သတိပေးသော လေသံဖြင့် ပြောလိုက်၏။

"သေချာတာပေါ့... မင်း လူပျိုပေါက်အဆင့် စပက်တာ တစ်ကောင် နောက်ကို လိုက်လိမ့်မယ်လို့ ငါ မမျှော်လင့်ထားပါဘူး... ဒရီမာ က မကြာခင်မှာတင် လူပျိုပေါက်အဆင့် စပက်တာ တစ်ကောင် ဖြစ်လာတော့မှာမို့ သူက ထိန်းသိမ်းရေးခန်း အသစ်ထဲမှာ နေရလိမ့်မယ်... ဆိုလိုတာက ငါတို့ နောက်ထပ် သားပေါက်အဆင့် တစ်ကောင် လိုအပ်တယ်..."

နစ်က ခေါင်းညိတ်လိုက်သည်။

"ထားပါတော့..."

ဝင်တာ က စကားဆက်လိုက်၏။

"ရိုက်ကာ စထရိုက်ကာ တွေနဲ့ ပတ်သက်ပြီး ဂျန်နီ ပေးထားတဲ့ သဲလွန်စကို ငါ လိုက်စုံစမ်းထားတယ်..."

"ဟုတ်လား..."

နစ်က ဝင်တာ ကို စိတ်ဝင်တစား ကြည့်ရင်း ရေရွတ်လိုက်၏။

"တော်တော်လေး စိတ်ဝင်စားဖို့ကောင်းတဲ့ သတင်းအချက်အလက် တချို့ကို ငါ စုံစမ်းသိရှိခဲ့ရတယ်..."

ဝင်တာ က ပြောလိုက်၏။

"ဥပမာအနေနဲ့ ပြောရရင် ရိုက်ကာ စထရိုက်ကာ တွေဟာ ဆင်ခြေဖုံးရပ်ကွက်ကြီး ထဲမှာ လွန်ခဲ့တဲ့ ငါးနှစ်လောက်ကမှ ပေါ်လာခဲ့တာ..."

"အဲဒီမတိုင်ခင်တုန်းက ရိုက်ကာ စထရိုက်ကာ တွေ ဆိုတာ မရှိခဲ့ဘူး..."

နစ်က ခေါင်းညိတ်လိုက်သည်။ အတိတ်ကာလက ရိုက်ကာ စထရိုက်ကာ များနှင့် ပတ်သက်၍ မည်သူမျှ မပြောခဲ့ကြသော်လည်း ၎င်းတို့မှာ အလွန်လျင်မြန်စွာ ပေါ်ပေါက်လာခဲ့ကြောင်းကို သူ မှတ်မိနေ၏။

၎င်းတို့သည် ညတွင်းချင်းပင် အလွန် အစွမ်းထက်လာခဲ့သည့်အလား ထင်မှတ်ရ၏။

ထိုအချိန်က နစ်သည် အသက် ဆယ့်တစ်နှစ် အရွယ်မျှသာ ရှိသေးသည်။ သူ၏ ကိုယ်ပိုင်ဘဝလေး အဆင်ပြေစေရန် ရုန်းကန်နေရသဖြင့် မည်သည့်အရာကိုမျှ သေချာ သတိမထားမိခဲ့ပေ။

"သူတို့ရဲ့ ခေါင်းဆောင် ရိုက်ကာ ကလည်း ဘယ်ကနေ ဘယ်လို ပေါ်လာမှန်း မသိဘူး..."

ဝင်တာက စကားဆက်လိုက်၏။

"မသိဘူးလို့ ထင်ရပေမယ့် တော်တော်လေး စုံစမ်းကြည့်လိုက်တော့ ရိုက်ကာ စထရိုက်ကာ တွေရဲ့ ခေါင်းဆောင် မဖြစ်လာခင်က သူ့ကို တွေ့ခဲ့ရတဲ့ ခြေရာလက်ရာ တချို့ကို ငါ ရှာတွေ့ခဲ့တယ်..."

"မျက်မြင်သက်သေတွေရဲ့ ပြောစကားအရ ရိုက်ကာဟာ ဟပ် အတွက် အလုပ်လုပ်ပေးခဲ့သူ တစ်ယောက် ဖြစ်တယ်... ပြီးတော့ သူက ငွေအများကြီးရတဲ့ ညစ်ပတ်တဲ့ အလုပ်မှန်သမျှကို လက်ခံခဲ့တယ်..."

"သူက လူသတ်တာတွေ၊ လူရိုက်တာတွေ၊ ငွေညှစ်တာတွေ၊ ခြိမ်းခြောက်တာတွေ စတဲ့ အလုပ်တွေကို အဓိက လုပ်ခဲ့တာ..."

"ဆင်ခြေဖုံးရပ်ကွက်ကြီး ရဲ့ စံနှုန်းတွေနဲ့ ချိန်ထိုးကြည့်ရင်တော့ သူ တော်တော်လေး ချမ်းသာကြွယ်ဝခဲ့တယ်..."

"ဒါတွေ အားလုံးက ပုံမှန်ပဲဆိုရင်တော့ သူ ထူးဆန်းနေမှာ မဟုတ်ဘူး... ဒါပေမယ့် ကြားလိုက်ရတဲ့ အချိန်မှာ ငါ့ကို သံသယ ဝင်သွားစေတဲ့ အချက် နှစ်ချက် ရှိတယ်..."

ဝင်တာက ပြောလိုက်၏။ နစ်သည် စိတ်ဝင်တစားဖြင့် ရှေ့သို့ ကိုင်းညွတ်လိုက်သည်။

"ပထမအချက်ကတော့..."

ဝင်တာက သူ၏ ညာဘက် လက်ညှိုးကို ထောင်ပြရင်း ပြောလိုက်၏။

"သူက အခကြေးငွေ အများဆုံးရတဲ့ အလုပ်ကို အမြဲတမ်း လက်ခံလေ့ မရှိဘူး..."

"ပုံမှန် အခြေအနေမှာဆိုရင်တော့ ဒါက ထူးဆန်းတယ်လို့ မထင်ရဘူးလေ... ဘာလို့လဲဆိုတော့ ငွေကြေး အများကြီးရတဲ့ အလုပ်တွေက များသောအားဖြင့် ကြောက်စရာကောင်းတဲ့ ဒါမှမဟုတ် အရမ်းအန္တရာယ်များတဲ့ အလုပ်တွေ ဖြစ်နေတတ်လို့ပဲ..."

"ဒါပေမယ့် သူ့ကိစ္စမှာတော့ ပြောင်းပြန် ဖြစ်နေတယ်..."

"တကယ်တော့ သူက ငွေအများဆုံးရတဲ့ အလုပ်တွေကို ရည်ရွယ်ခဲ့တာ မဟုတ်ဘူး... အဆိုးရွားဆုံး လုပ်ရပ်တွေ လုပ်ရမယ့် အလုပ်တွေကိုမှ သူက ရွေးချယ်ခဲ့တာ..."

နစ်၏ မျက်လုံးများမှာ အံ့ဩမှုကြောင့် ပြူးကျယ်သွားခဲ့၏။

"အဲဒီအလုပ်တွေက အများစုသော အချိန်တွေမှာ အဆိုးရွားဆုံး ဖြစ်နေတတ်တာမို့ သူဟာ ဆုကြေး အများဆုံးရတဲ့ အလုပ်တွေကိုပဲ လုပ်ခဲ့တယ်လို့ လူတွေက ထင်နေကြတာ..."

"လူတချို့ ငွေအများကြီး လိုချင်ကြတာကို ငါ နားလည်ပါတယ်... ဒါပေမယ့် သူက ပိုပြီး ဆိုးရွားတဲ့ လုပ်ရပ်တွေကို လုပ်ချင်ရုံ သက်သက်နဲ့ ငွေကို တမင်သက်သက် လျစ်လျူရှုခဲ့တာကတော့ တော်တော်လေးကို ထူးဆန်းနေတယ်..."

ဝင်တာက ဆို၏။

နစ်သည် မျက်မှောင်ကြုတ်ကာ ခေါင်းညိတ်လိုက်သည်။

"ဟုတ်တယ်... အဲဒါက ပုံမှန်မဟုတ်ဘူး..."

ဝင်တာကလည်း ခေါင်းညိတ်ပြ၏။

"ဒုတိယအချက်က ပိုပြီးတောင် အံ့ဩစရာ ကောင်းသေးတယ်..."

ဝင်တာသည် ရှေ့သို့ ကိုင်းညွတ်လိုက်သည်။

"အစားအသောက် ရောင်းတဲ့ ကုန်သည် တစ်ယောက်ကမှ ရိုက်ကာကို သူတို့ အစားအသောက် ရောင်းဖူးတယ်လို့ မမှတ်မိကြဘူး..."

နစ်၏ မျက်လုံးများမှာ ပြူးကျယ်သွားခဲ့၏။ ဒါက တကယ်ကို မသင်္ကာစရာကောင်းလှပေသည်။

***