အခန်း ၇၂

အပိုင်း(၇၂)

သဘာဝကျစွာပင် အလွန် လိုက်ဖက်ညီသော စွမ်းရည်များ ရှိသလို လုံးဝ လိုက်ဖက်မှု မရှိသော စွမ်းရည်များလည်း ရှိကြ၏။

ဥပမာအားဖြင့် ဝင်တာ၏ စွမ်းရည်နှင့် ဒရီမာ၏ စွမ်းရည်တို့မှာ လုံးဝကို လိုက်ဖက်မှု မရှိပေ။ ၎င်းတို့ထဲမှ တစ်ခုသည် တောက်ပသော အလင်းရောင်နှင့် အလွန် သိသာထင်ရှားသော တိုက်ခိုက်မှုများကို အသုံးပြုရခြင်း ဖြစ်သည်။ အခြားတစ်ခုကမူ ရုတ်တရက် အလစ်အငိုက် တိုက်ခိုက်ခြင်းအပေါ် မှီခိုရသည့် အလွန် လျှို့ဝှက်သော စွမ်းရည် ဖြစ်၏။

ဤသို့ဆိုလျှင် နစ်က သူ၏စွမ်းရည်ကို အဆင့်မြှင့်တင်ရန်အတွက် ဒရီမာကို အသုံးပြုမည် ဆိုပါကရော။

တစ်နည်းအားဖြင့် ကြည့်မည်ဆိုပါက ဒရီမာ၏ စွမ်းရည်သည် နစ်၏ စွမ်းရည်နှင့် အတော်လေး လိုက်ဖက်မှု ရှိနေ၏။ အဘယ်ကြောင့်ဆိုသော် နှစ်ခုစလုံးက ရုတ်တရက် အလစ်အငိုက် တိုက်ခိုက်ခြင်းကို အသုံးပြုသောကြောင့် ဖြစ်သည်။

သို့သော်လည်း ၎င်းတို့ကို အသုံးပြုပုံမှာ အလွန် ကွဲပြားခြားနားနေပြန်သည်။ နစ်၏ စွမ်းရည်က ရန်သူကို သတ်ဖြတ်လိုခြင်း ဖြစ်ပြီး ဒရီမာ၏ စွမ်းရည်ကမူ သူတို့ကို ခြယ်လှယ်ရန် သို့မဟုတ် စူးစမ်းထောက်လှမ်းရန် ဖြစ်၏။

ထို့ထက်ပို၍ နှစ်ခုစလုံးသည် အလစ်အငိုက် အခြေအနေမျိုးတွင်သာ ၎င်းတို့၏ စွမ်းအားများကို ထုတ်ဖော်နိုင်မည်ဖြစ်ပြီး ထိုအခြေအနေမှ လွဲပါက အသုံးမဝင်တော့ပေ။

ထိုအရာသည် နစ် လိုချင်သောအရာ မဟုတ်ပေ။

စွမ်းရည် တိုးတက်လာခြင်းသည် နစ်၏ စွမ်းရည်ကို တိုက်ပွဲတစ်ခုအတွင်း တစ်ကြိမ်ထက်မက အသုံးပြုနိုင်သော စွမ်းရည်တစ်ခုအဖြစ် ပြောင်းလဲပစ်ရန် အကောင်းဆုံး နည်းလမ်း ဖြစ်၏။

ထို့အပြင် ဒရီမာ၏ စွမ်းရည်က နစ် ထိုသို့ ဖြစ်လာစေရန် ကူညီပေးနိုင်မည် မဟုတ်ပေ။ ထို့ကြောင့် နစ်သည် နောက်ထပ် စပက်တာ တစ်ကောင် လိုအပ်နေခြင်း ဖြစ်သည်။

ဒါကြောင့်ပင် နောက်ထပ် စပက်တာ တစ်ကောင်ကို ဖမ်းဆီးရန် နောက်ဆုံးသတ်မှတ်ရက်မှာ နစ် အဆင့်နှစ်သို့ တက်လှမ်းမည့် အချိန်ဖြစ်ပြီး ၎င်းအတွက် တစ်နှစ်မှ နှစ်နှစ်အထိ အချိန်ယူရမည် ဖြစ်၏။

ဝင်တာနှင့် စကားအနည်းငယ် ထပ်ပြောပြီးနောက် နစ်သည် ဂိုဒေါင်ထဲမှ ထွက်လာခဲ့၏။

ယနေ့အတွက် ဒရီမာနှင့် လုပ်ရမည့် သူ၏အလုပ်ချိန်မှာ ပြီးဆုံးသွားခဲ့ပြီ ဖြစ်သည်။ အလုပ်လျှောက်ထားသူ အသစ်များကိုလည်း အင်တာဗျူးရန် မလိုတော့ပေ။ ထို့ကြောင့် နောက်ထပ် စပက်တာ တစ်ကောင်ကို ရှာဖွေရေးတွင်သာ အာရုံအပြည့်အဝ စိုက်ထားရန် သူ ဆုံးဖြတ်လိုက်၏။

သို့သော်လည်း ထိုအရာက ပြောသလောက်တော့ မလွယ်ကူလှပေ။ အရင်တစ်ခေါက်ကကဲ့သို့ပင် ယခုလည်း စပက်တာ တစ်ကောင်ကို ဘယ်မှာ သွားရှာရမည်ကို နစ် လုံးဝ မသိခဲ့ပေ။

ပြီးတော့... ယခုတစ်ကြိမ်တွင်မူ အများပြည်သူကို ကူညီလိုသော စုံစမ်းစစ်ဆေးရေးမှူး တစ်ယောက်၏ ကယ်တင်မှုကို သူ ရရှိနိုင်တော့မည် မဟုတ်ပေ။

အနည်းဆုံးတော့ သူ့မှာ အချိန်များစွာ ရှိနေသေး၏။ အချိန် အတန်ကြာပြီးနောက် ပထမဆုံးအကြိမ်အဖြစ် နစ်သည် ဆင်ခြေဖုံးရပ်ကွက်ကြီး သို့ ပြန်လာခဲ့သည်။

နစ်က ဒရီမာကို ဖမ်းဆီးပြီးနောက် ဟိုရူဝါအတွက် အစားအစာ အနည်းငယ် လာရှာပေးကတည်းက သူ ဤနေရာသို့ မရောက်ဖြစ်ခဲ့တော့ပေ။ ဆင်ခြေဖုံးရပ်ကွက်ကြီး ထဲသို့ နစ် ဝင်ရောက်လာသည်နှင့် လူတိုင်းက သူ့ကို လှမ်းကြည့်နေကြ၏။

နစ်သည် ဇီဖစ်စွမ်းအင် ထုတ်ယူသူ ဝတ်စုံကို ဝတ်ဆင်ထားရန် လိုအပ်၏။ ထို့ကြောင့်ပင် လူတိုင်းက သူ့ကို ဝိုင်းကြည့်နေကြခြင်း ဖြစ်သည်။

အရည်အသွေးမြင့် ဝတ်စုံပေါ်ရှိ အနီနှင့် အနက်ရောင်များက သူ့ကို ဆင်ခြေဖုံးရပ်ကွက်ကြီး အတွင်းရှိ ဆင်းရဲသားများကြားတွင် ထင်ရှားစွာ ကွဲထွက်နေစေခဲ့သည်။

"လတ်တလော ထူးထူးဆန်းဆန်းတွေ ဘာများ ဖြစ်ထားသေးလဲ..."

လမ်းဘေးမှနေ၍ သူ့ကို လှမ်းကြည့်နေသူ တစ်ယောက်အား နစ်က မေးလိုက်၏။

အနက်ရောင် ဆံပင်နှင့် ထိုလူငယ်သည် နစ်ကို အံ့ဩတကြီး ပြန်ကြည့်နေခဲ့သည်။

"ဇီဖစ်စွမ်းအင် ထုတ်ယူသူ တစ်ယောက် ပေါ်လာတာကလွဲပြီး တခြားဟာကို ပြောတာလား..."

ထိုလူက မေးလိုက်၏။ ထို့နောက် သူကပင် ဆက်ပြောလိုက်သည်။

"မရှိပါဘူး၊ သိပ်ပြီးတော့ မထူးခြားပါဘူး..."

နစ်က ခေါင်းညိတ်လိုက်သည်။

"ငါက ဒါ့ဒရမ် ဆိုတဲ့ ဇီဖစ်စွမ်းအင် ထုတ်လုပ်ရေး ကုမ္ပဏီ အသစ်ကပါ... ဆင်ခြေဖုံးရပ်ကွက်ကြီး ထဲမှာ နေပြီး လူတွေကို အရမ်းကို ဒုက္ခပေးနေတဲ့ စပက်တာ တစ်ကောင်ကို ငါ ရှင်းလင်းပေးခဲ့ပြီးပြီ... စုံစမ်းစစ်ဆေးရေးမှူးတွေက မင်းတို့ကို စိတ်မပူဖို့ ပြောထားတဲ့ မသင်္ကာစရာ ကိစ္စမျိုးတွေ ရှိရင် ကျေးဇူးပြုပြီး ငါ့ကို ပြောပြပါ..."

ထိုလူသည် အံ့ဩသွားပြီး မျက်တောင် နှစ်ချက်သုံးချက်မျှ ခတ်လိုက်၏။ ထို့နောက် စဉ်းစားဟန်ဖြင့် သူ၏ ဂုတ်ကို ကုတ်နေလေသည်။

ငါးစက္ကန့်ခန့်ကြာအောင် သူသည် တိတ်ဆိတ်နေခဲ့၏။

"အရေးကြီးတဲ့ ကိစ္စမျိုးတော့ ရှိမယ် မထင်ပါဘူး..."

ထိုလူက မသေချာသော မျက်နှာထားဖြင့် ပြောလိုက်သည်။

နစ်သည် မျက်မှောင်ကုတ်လိုက်၏။

"မင်း သေချာလို့လား... သေချာပုံ မပေါ်ပါဘူး..."

ထိုလူသည် အနည်းငယ် နေရခက်သွားဟန် ရှိ၏။

"အင်း... တစ်ခုတော့ ရှိတယ်။ ဒါပေမယ့် အဲဒါက စပက်တာ တစ်ကောင်ရဲ့ လက်ချက်လို့တော့ ငါ တကယ် မထင်ဘူး..."

နစ်၏ အကြည့်များမှာ လေးနက်သွားခဲ့သည်။

"ပြောပြပါဦး..."

ထိုလူသည် ပို၍ပင် နေရခက်သွားပုံရ၏။

"သေချာလို့လား..."

သူက မေးလိုက်သည်။

"သေချာတယ်..."

နစ်က လေးနက်စွာဖြင့် ပြောလိုက်၏။

"အင်း..."

ထိုလူက ပြောလိုက်သည်။

"ပြီးခဲ့တဲ့ တစ်ပတ်လုံး ကျွန်တော် ဝမ်းလျှောနေခဲ့တယ်... ဒါပေမယ့် ကျွန်တော့်ရဲ့ စားသောက်ပုံကို ဘာမှ မပြောင်းလဲခဲ့ဘူး..."

တိတ်ဆိတ်မှုကြီးက လွှမ်းမိုးသွား၏။

"ပြီးတော့..."

နစ်က မေးလိုက်သည်။

"ဒါပါပဲ..."

ထိုလူက ဖြေ၏။

နစ်၏ စိတ်လှုပ်ရှားမှုများ အားလုံး ပျောက်ကွယ်သွားခဲ့၏။ ထို့နောက် သူသည် ထိုလူကို ခံစားချက်ကင်းမဲ့သော မျက်နှာထားဖြင့်သာ စိုက်ကြည့်နေလိုက်သည်။

"မင်း သံချေးလျက်ခဲ ကိုရော စမ်းကြည့်ပြီးပြီလား..."

နစ်က မေးလိုက်၏။ ထိုလူသည် သူ၏ ဂုတ်ကို ကုတ်လိုက်သည်။

"အင်း... အဲဒါက ပြဿနာကို ဖြေရှင်းပေးနိုင်မယ် ထင်တယ်... ကျေးဇူးပဲ..."

သူက ပြောလိုက်၏။

နစ်သည် သက်ပြင်းတစ်ချက် ချလိုက်သော်လည်း ခေါင်းကိုမူ ညိတ်ပြလိုက်သည်။

"တစ်ခုခု ထူးခြားလာရင် ငါ့ကို ပြောပါ..."

သူက ပြောလိုက်၏။

"သေချာတာပေါ့..."

ထိုလူက ပြန်ဖြေသည်။

နစ်သည် ချက်ချင်း လှည့်ကာ ထွက်သွားခဲ့လေသည်။ သူ သိပ်ပြီး စိတ်အနှောင့်အယှက် မဖြစ်သလို ဒေါသလည်း မထွက်ခဲ့ပေ။ ဒရီမာကို ရှာဖွေနေခဲ့စဉ်ကလည်း သူသည် ဤကဲ့သို့သော စကားပြောဆိုမှုမျိုးကို အမြဲတမ်း ကြုံတွေ့ခဲ့ရဖူးသည်။

ဆင်ခြေဖုံးရပ်ကွက်ကြီး အတွင်းရှိ ဘဝများသည် ဆိုးရွားလွန်းလှ၏။ ထို့ကြောင့် လူအများစုမှာ စပက်တာ တစ်ကောင်၏ လုပ်ရပ်များကို သဘာဝကျသောအရာများအဖြစ်သာ မှတ်ယူထားလေ့ရှိကြသည်။

စပက်တာ တစ်ကောင်၏ လုပ်ရပ်များသည် ကြောက်မက်ဖွယ်ကောင်းလှ၏။ ထိုနည်းတူစွာပင် ဆင်ခြေဖုံးရပ်ကွက်ကြီး အတွင်းရှိ ဘဝများသည်လည်း ကြောက်မက်ဖွယ် ကောင်းလှပေသည်။

ထို့ကြောင့် ထိုအရာနှစ်ခုကြားတွင် ဘာကွာခြားမှုများ ရှိနေမည်နည်း။ ထိုအကြောင်းကြောင့်ပင် ဆင်ခြေဖုံးရပ်ကွက်ကြီး မှ လူများသည် စပက်တာ များ၏ လက္ခဏာများကို မကြာခဏ လျစ်လျူရှုမိတတ်ကြသည်။

ဤနေရာရှိ ဘဝများမှာ အလွန် ဆိုးရွားလွန်းလှသောကြောင့် လူများသည် အိပ်မက်ဆိုးများ မက်ခြင်းကို ပုံမှန်ဟုသာ ယူဆခဲ့ကြ၏။ ထိုအချက်ကြောင့်ပင် ဒရီမာ ကို မည်သူမျှ သတိမထားမိခဲ့ခြင်း ဖြစ်သည်။

နေရာတိုင်းတွင် ရုန့်ရင်းကြမ်းတမ်းသော ရာဇဝတ်ကောင်များ ရှိနေသောကြောင့် လူများသည် ကြောက်မက်ဖွယ်ကောင်းသော လူများရှိနေမည်ကို ကြိုတင်မျှော်လင့်ထားတတ်ကြ၏။ ထို့ကြောင့်ပင် ရိုက်ကာသည် စပက်တာ တစ်ကောင် ဖြစ်နေနိုင်သည်ဆိုသည်ကို မည်သူမျှ သတိမထားမိခဲ့ကြခြင်း ဖြစ်သည်။

စပက်တာ များသည် ဆင်ခြေဖုံးရပ်ကွက်ကြီး အတွင်းသို့ ပြီးပြည့်စုံစွာ ပျော်ဝင်နေခဲ့၏။ ထို့ကြောင့် ဤနေရာတွင် ၎င်းတို့ကို ရှာဖွေရန် အလွန် ခက်ခဲနေခြင်း ဖြစ်သည်။

ဝမ်းနည်းစရာကောင်းသည်မှာ အပြင်ဘက်မြို့တော် နှင့် အတွင်းဘက်မြို့တော် တို့တွင်မူ စပက်တာ များ လုံးဝ ကင်းစင်နေခြင်းပင် ဖြစ်၏။ အဘယ်ကြောင့်ဆိုသော် အစွမ်းထက်သော ဇီဖစ်စွမ်းအင် ထုတ်လုပ်ရေး ကုမ္ပဏီ များအားလုံးက ထိုနေရာများကို အထူးဂရုစိုက် စောင့်ကြည့်နေသောကြောင့် ဖြစ်သည်။

နှစ်သက်သည်ဖြစ်စေ၊ မနှစ်သက်သည်ဖြစ်စေ နစ်သည် ဆင်ခြေဖုံးရပ်ကွက်ကြီး ထဲတွင် စပက်တာ တစ်ကောင်ကို ရှာဖွေရန် လိုအပ်နေခဲ့သည်။

နစ်သည် လူများနှင့် ဆက်လက် စကားပြောဆိုနေခဲ့၏။ သို့သော် အရင်တစ်ခေါက်ကကဲ့သို့ပင် မည်သည့် သဲလွန်စကိုမျှ မတွေ့ခဲ့ရပေ။ အနည်းဆုံးတော့ ယခုတစ်ကြိမ်တွင် စုံစမ်းစစ်ဆေးရေးမှူးများက သူ့ကို လှောင်ပြောင်ခြင်း မပြုခဲ့ကြပေ။

ထိုအစား စုံစမ်းစစ်ဆေးရေးမှူးများသည် ယဉ်ကျေးပျူငှာသော ဟန်ဆောင်စကား အနည်းငယ်မှလွဲ၍ နစ်နှင့် စကားပြောဆိုရန် ငြင်းဆန်ခဲ့ကြ၏။ ယခုအခါ နစ်သည် တရားဝင် ပြိုင်ဘက်တစ်ယောက် ဖြစ်လာခဲ့ပြီ ဖြစ်သည်။

နှစ်နာရီကြာတိုင်း နစ်သည် ဟိုရူဝါ ကို သွားကြည့်ရန် ဟိုတယ်သို့ ပြန်သွားလေ့ရှိ၏။ သို့သော် ထိုအချိန်များကသာ သူ၏ တစ်ခုတည်းသော အနားယူချိန်များ ဖြစ်သည်။

ကျန်ရှိနေသော အချိန်များတွင် နစ်သည် ဆင်ခြေဖုံးရပ်ကွက်ကြီး အတွင်း လှည့်လည်သွားလာကာ လူများနှင့် စကားပြောဆိုနေခဲ့သည်။

တစ်နေ့တာ ပြီးဆုံးသွားသောအခါ နစ်သည် အိပ်ရာဝင်ခဲ့၏။

နောက်တစ်နေ့တွင် သူသည် ဒရီမာ နှင့် ထပ်မံ အလုပ်လုပ်ခဲ့သည်။ ဝင်တာ နှင့် စကားအနည်းငယ် ပြောပြီးနောက် ရှာဖွေရေးကို ဆက်လုပ်ခဲ့၏။

ထိုနည်းအတိုင်းပင် နောက်တစ်ပတ် ကုန်ဆုံးသွားခဲ့သည်။

တစ်ပတ်ကျော်ကြာသည်အထိ နစ်သည် သဲလွန်စတစ်ခုကို လိုက်လံရှာဖွေနေခဲ့၏။ သို့သော် သူ မည်သို့မျှ ရှာမတွေ့ခဲ့ပေ။

ယခုအချိန်တွင် နစ်သည် လူများ၏ ပုံမှန် ပြဿနာအားလုံးကို ကြားသိခဲ့ရပြီ ဖြစ်သည်။ သို့သော် ၎င်းတို့ထဲမှ မည်သည့်အရာကမျှ စပက်တာ တစ်ကောင် ရှိရာသို့ ညွှန်ပြမနေခဲ့ပေ။

နောက်ထပ် တစ်ပတ် ကုန်ဆုံးသွားပြန်၏။

ဝုန်း...

နစ်သည် ဆင်ခြေဖုံးရပ်ကွက်ကြီး အတွင်း လမ်းလျှောက်နေစဉ် ရုတ်တရက် ကျယ်လောင်သော ပေါက်ကွဲသံကြီးတစ်ခုကို ကြားလိုက်ရ၏။ ထို့နောက် ကြီးမားသော အရာတစ်ခု ပြိုကျသွားသည့် အသံကိုလည်း ဆက်တိုက် ကြားလိုက်ရသည်။

အဝေးမှ အဆောက်အအုံကြီးတစ်ခု ပြိုကျသွားသည်ကို နစ် သတိပြုမိလိုက်၏။ ထို့ကြောင့် ဘေးဘက်ရှိ လမ်းကြားငယ်လေးတစ်ခုထဲသို့ ချက်ချင်း ပြေးဝင်သွားခဲ့သည်။

***