အခန်း ၈၄

အပိုင်း(၈၄)

နောက်တစ်ခဏတွင် ဝင်တာသည် နစ်ဘက်သို့ လှည့်လာခဲ့၏။

"အကုန်လုံးကို ပိတ်လိုက်တော့... ဘာတွေဖြစ်သွားလဲဆိုတာကို ဘယ်သူမှ မသိစေရဘူး..."

နစ်သည် သူ၏ အတွေးများထဲမှ နိုးထလာပြီး ခေါင်းညိတ်ပြလိုက်သည်။

မိနစ်အနည်းငယ် ကြာပြီးနောက်တွင် အရာအားလုံးသည် မူလနေရာသို့ ပြန်လည်ရောက်ရှိသွားခဲ့၏။ ထို့နောက် နစ်သည် ဝင်တာကို တစ်ဖန်ပြန်၍ ကြည့်လိုက်သည်။

"ငါ့ရဲ့ စွမ်းရည်အဆင့်တက်ဖို့အတွက် သင့်တော်တဲ့ စပက်တာ တစ်ကောင် လိုအပ်နေသေးတယ်..."

နစ်က ပြောလိုက်၏။

"ငါ သိပါတယ်..."

ဝင်တာက ပြောသည်။

"ဒါပေမဲ့ ဒီတစ်ခါ ငါတို့ ပူးကပ်တတ်တဲ့ စပက်တာကို ရလိုက်တာက တကယ်ကို အရမ်းကောင်းတဲ့ ကိစ္စပဲ..."

ဝင်တာ၏ မျက်နှာပေါ်တွင် အပြုံးတစ်ခု ပေါ်လာခဲ့၏။

"အဲဒီ အော်ဟစ်နေတဲ့ ခေါင်းတလားက လူသေအလောင်းတွေကို စားသုံးတာဖြစ်လို့ ဇီဖစ်စွမ်းအင် တွေ အများကြီး ထုတ်ပေးနိုင်လောက်တယ်... လူတွေကို စားသုံးတဲ့ စပက်တာ တွေက အချိန်တိုအတွင်းမှာ ဇီဖစ်စွမ်းအင် တွေကို အများကြီး ထုတ်ပေးနိုင်လေ့ရှိတယ်..."

"သူရယ် ဒရီမာ ရယ်သာဆိုရင် ငါတို့ နေ့တိုင်း ဇီဖစ်စွမ်းအင် တွေ အမြောက်အမြား ထုတ်လုပ်နိုင်လိမ့်မယ်... ဒါဆိုရင် ပိုပြီးအဆင့်မြင့်တဲ့ အရာတွေကို ဝယ်နိုင်ပြီပေါ့..."

"မင်း အဆင့်တက်ဖို့က တစ်နှစ်ကျော်တောင် လိုသေးတယ်၊ အဲဒီအချိန်အတွင်းမှာ ငါတို့ စည်းစိမ်တွေ စုဆောင်းဖို့ အချိန်တွေ အများကြီး ရှိပါသေးတယ်..."

ဝင်တာက ပြော၏။

"လောကမှာ ငါတို့ လူသားတွေ မတွေ့သေးတဲ့ သွားလာလှုပ်ရှားနေတဲ့ စပက်တာ တွေ ရှိနေသလို ဖမ်းဆီးထိန်းသိမ်းဖို့ အရမ်းကို ဒုက္ခများတဲ့ ကောင်တွေလည်း ရှိနေသေးတယ်ဆိုတာကို မမေ့နဲ့..."

"ငွေအလုံအလောက်သာ ရှိမယ်ဆိုရင် ငါတို့က ဒြပ်ရှိ စပက်တာ တစ်ကောင်အတွက် ထိန်းသိမ်းရေးအခန်း ကိုတောင် ရနိုင်လိမ့်မယ်..."

ဝင်တာက နှုတ်ခမ်းမဲ့ကာ ပြောလိုက်သည်။

နစ်၏ မျက်ခုံးများ ပင့်တက်သွားကာ အံ့သြဝမ်းသာဖြစ်သွား၏။ အကယ်၍ နစ်သည် ဒြပ်ရှိ စပက်တာ အချို့ထဲမှလည်း ရွေးချယ်နိုင်မည်ဆိုပါက သူ၏ ရွေးချယ်စရာ အရေအတွက်သည် အလွန်အမင်း များပြားလာမည် ဖြစ်သည်။

နောက်ဆုံးတွင် ပူးကပ်တတ်သော စပက်တာ တစ်ကောင်ကို ရရှိခြင်းသည် ကောင်းမွန်သောအရာတစ်ခု ဖြစ်ကြောင်း နစ်က လက်ခံလိုက်တော့သည်။

အကောင်းဆုံးအချက်မှာ အဆိုပါ စပက်တာ အသစ်အတွက် နောက်ထပ် ဇီဖစ်စွမ်းအင် ထုတ်ယူသူ များကို နစ်က ငှားရမ်းရန်ပင် လိုအပ်မည် မဟုတ်ပေ။

ပါရာဆိုက်နှင့် အရောင်းအဝယ်ပြုလုပ်ခဲ့သည့် လက္ခဏာရပ်များအားလုံးကို ရှင်းလင်းဖျောက်ဖျက်ပြီးနောက် နစ်သည် ဂိုဒေါင်ထဲမှ ထွက်ခွာလာခဲ့၏။ ထို့နောက် သူသည် ဟိုရူဝါကို သွားရောက်ပြုစုစောင့်ရှောက်ပေးခဲ့သည်။

ယခုအခါတွင် နစ်သည် ဟိုရူဝါကို ပြုစုစောင့်ရှောက်ရသည်မှာ လုံးဝအကျွမ်းတဝင်ရှိနေပြီ ဖြစ်၏။ ထိုကိစ္စအတွက် အဆင်ပြေချောမွေ့သော ကိုယ်ပိုင်အလေ့အထကိုလည်း သူ ရှာတွေ့နေပြီ ဖြစ်သည်။

အချိန်သုံးလကြာမြင့်သွားပြီဖြစ်ရာ ဟိုရူဝါသည် အတော်လေး အရွယ်ရောက်လာခဲ့၏။ ထို့ကြောင့် နစ်သည် သူ့အတွက် အဝတ်အစားသစ်အချို့ပင် ဝယ်ပေးခဲ့ရသေးသည်။

ဝမ်းနည်းစရာကောင်းသည်မှာ ဟိုရူဝါသည် ယခုတိုင် သက်သာလာမည့် လက္ခဏာတစ်စုံတစ်ရာမျှ မပြသသေးခြင်းပင် ဖြစ်၏။

လွန်ခဲ့သော ရက်အနည်းငယ်က ဂျင်နီသည် ဒရီမာထံမှ ရရှိထားသော စွမ်းရည်ဖြင့် တစ်ခုခုလုပ်ပေးနိုင်မည်လားဟု သိရရန်အတွက် နစ်က သူမကို ဟိုရူဝါထံသို့ ခေါ်လာခဲ့သည်။

ဂျင်နီသည် ဟိုရူဝါ၏ အသက်အရွယ်ကို မြင်တွေ့လိုက်ရသောအခါ အလွန်အမင်း အံ့အားသင့်သွားခဲ့၏။

နစ်သည် အလွန်တော်ပြီး ဖော်ရွေသော အထက်လူကြီးတစ်ယောက်အဖြစ် အမြဲတမ်း ပုံပေါက်နေခဲ့သည်။

သို့ရာတွင် ယခုအခါ၌ နစ်သည် ကလေးငယ်တစ်ယောက်ကို ဒရီမာ၏ ရှေ့မှောက်သို့ ပစ်ချခဲ့သည်ဆိုသော အမှန်တရားနှင့် သူမ ရင်ဆိုင်လိုက်ရ၏။

ဤအရာသည် ဂျင်နီမြင်ထားသော နစ်၏ ပုံစံနှင့် လုံးဝကိုက်ညီမှု မရှိပေ။

မည်သို့ပင်ဆိုစေကာမူ သူမ၏ ရှေ့မှောက်တွင် ရောက်နေသော သက်သေအထောက်အထားကို သူမ လျစ်လျူမရှုနိုင်ခဲ့ချေ။

ဟိုရူဝါ အိပ်ပျော်သွားပြီးနောက် ဂျင်နီသည် သူ၏ အိပ်မက်များကို ကြည့်ရှုရန် ကြိုးစားခဲ့၏။ သို့သော်လည်း မည်သည့်အိပ်မက်ကိုမျှ မတွေ့ရပေ။ ဂျင်နီ၏ အဆိုအရ ဟိုရူဝါသည် အိပ်မက် လုံးဝမမက်ခြင်းပင် ဖြစ်သည်။

နောက်တစ်နေ့တွင် သူတို့နှစ်ယောက်သည် ဤကိစ္စနှင့်ပတ်သက်၍ ဝင်တာကို မေးမြန်းခဲ့ကြ၏။ အဘယ်ကြောင့်ဆိုသော် ဝင်တာသည် သူ၏ မိသားစုမှ ငှားရမ်းထားသော ဆရာများထံမှ ပညာရပ်များစွာကို သင်ကြားခဲ့ရသောကြောင့် ဖြစ်သည်။

ပုံမှန်အားဖြင့် အိပ်မက်မက်ခြင်းဆိုသည်မှာ လူတစ်ယောက်၏ ဦးနှောက်က ထိုနေ့တွင် မှတ်သားထားသော မှတ်ဉာဏ်များကို ပြန်လည်စီစဉ်ခြင်းသာဖြစ်ကြောင်း ဝင်တာက ပြောပြခဲ့သည်။ ထို့ကြောင့်ပင် အိပ်မက်အားလုံးနီးပါးသည် ထိုနေ့အတွင်း တွေးတောခဲ့သော အတွေးအချို့နှင့် တစ်နည်းနည်းဖြင့် ဆက်စပ်နေခြင်း ဖြစ်၏။

ဟိုရူဝါ အိပ်မက်မမက်ခြင်းမှာ တကယ်တော့ သိပ်အံ့သြစရာကောင်းလှသည်တော့ မဟုတ်ပေ။

အကြောင်းမူကား ဟိုရူဝါသည် မည်သည့်အရာကိုမျှ အာရုံမခံနိုင်သောကြောင့် ဖြစ်၏။ ၎င်းသည် သူက မှတ်ဉာဏ်အသစ်များကို မဖန်တီးနိုင်ခြင်းဖြစ်ကြောင်း အဓိပ္ပာယ်သက်ရောက်နေသည်။

ထို့ကြောင့် သူသည် အိပ်မက်လည်း မမက်ခဲ့ချေ။

အိပ်မက်မက်စရာ အကြောင်းအရာဟူ၍ ဘာတစ်ခုမှ မရှိခြင်းပင် ဖြစ်သည်။

ယင်းကို ကြားလိုက်ရသောအခါ နစ်သည် သက်ပြင်းသာ ချနိုင်ခဲ့တော့၏။ သူသည် ဟိုရူဝါကို ကူညီပေးချင်ခဲ့သည်။ ဟိုရူဝါသည် ဤအခြေအနေဖြင့် အချိန်သုံးလမျှ ကြာမြင့်နေပြီ ဖြစ်၏။ ဤသည်မှာ ရှင်သန်ရန် တန်ဖိုးရှိသော ဘဝမျိုး မဟုတ်ကြောင်းကို နစ်သိနေခဲ့သည်။

သူဘာသာသူများ ပြန်လည်နိုးထလာနိုင်မလား။

ဆရာဝန်ကတော့ ဖြစ်နိုင်ခြေရှိသည်ဟု ပြောခဲ့၏။

သို့သော် သူ မနိုးလာခဲ့လျှင်ရော ဘယ်လိုလုပ်မလဲ။

ဟိုရူဝါကို နှိုးပေးရန်အတွက် ဒရီမာကို သွားရောက်တောင်းဆိုလိုက်ရမည်လား။ သို့ရာတွင် ထိုသို့လုပ်ခြင်းက ဟိုရူဝါအတွက် ပို၍နာကျင်စေခဲ့လျှင်ကော။

အကယ်၍ ဟိုရူဝါက နောက်တစ်ပတ်အကြာတွင် အလိုအလျောက် နိုးလာခဲ့မည်ဆိုလျှင်ကော။

လောလောဆယ်တွင် ဒရီမာကို အသုံးမပြုရန် နစ်ဆုံးဖြတ်လိုက်၏။ ထို့နောက် ဟိုရူဝါကိုသာ ဆက်လက်ပြုစုစောင့်ရှောက်နေခဲ့သည်။

နောက်ရက်အနည်းငယ်အတွင်းတွင် နစ်သည် ဟိုရူဝါရှိရာနေရာနှင့် ဂိုဒေါင်ကြားတွင်သာ သွားလာလှုပ်ရှားနေခဲ့၏။

အခြား စပက်တာ တစ်ကောင်ကို ရှာဖွေရန်အတွက် ဆင်ခြေဖုံးရပ်ကွက်ကြီး သို့ သူ ပြန်မသွားခဲ့ပေ။

နစ်သည် သူတို့အနေဖြင့် စပက်တာ တစ်ကောင်ကို ဖမ်းမိပြီးဖြစ်သကဲ့သို့ ဟန်ဆောင်ရမည် ဖြစ်၏။

ပါရာဆိုက် နှင့် အရောင်းအဝယ် ပြုလုပ်ပြီးနောက် လေးရက်အကြာတွင် အချိန်ကျရောက်လာခဲ့ပြီ ဖြစ်သည်။

ညဉ့်နက်ချိန်၌ နစ်သည် ဂိုဒေါင်ထဲသို့ ဝင်သွားခဲ့၏။ နေမင်းကြီးက အမြဲတမ်း သာယာတောက်ပနေသော်လည်း လူအများစုမှာမူ ညဘက်တွင် အိပ်စက်ကြဆဲပင် ဖြစ်သည်။

ဟိုရူဝါ သည်လည်း အိပ်ပျော်သွားပြီ ဖြစ်၏။ ထို့ကြောင့် နစ်သည် ဟိုရူဝါ ကို ထပ်မံမစစ်ဆေးမီ အပြင်ဘက်တွင် လေးနာရီခန့် နေနိုင်မည်ဖြစ်ကြောင်း ဆိုလိုနေပေသည်။

ဂိုဒေါင်ထဲသို့ ဝင်ပြီးနောက် နစ်သည် ဝင်တာကို စောင့်ဆိုင်းနေခဲ့၏။ မိနစ်အနည်းငယ် အကြာတွင် ဝင်တာရောက်ရှိလာခဲ့သည်။

ထိုအချိန်မှာ သန်းခေါင်ယံကျော်ကာစ အချိန်လေးသာ ဖြစ်၏။

"မင်း အဆင်သင့်ဖြစ်ပြီလား..."

နစ်က မေးလိုက်သည်။

ဝင်တာက ခေါင်းညိတ်ပြလိုက်၏။

"အလောင်းကို သွားယူလိုက်တော့..."

သူက ပြောကာ နစ်အား တိုကင်ပြားတစ်ခု ကမ်းပေးလိုက်သည်။

၎င်းသည် ဆင်ခြေဖုံးရပ်ကွက်ကြီး အတွင်း၌ အလောင်းတစ်လောင်းကို "ဖန်တီးပြီး ယူဆောင်ရန်" နစ်အား ခွင့်ပြုပေးသည့် အထူးတိုကင်ပြားတစ်ခု ဖြစ်၏။

နစ်သည် တိုကင်ပြားကို ယူကာ ဂိုဒေါင်ထဲမှ ထွက်ခွာလာခဲ့သည်။

ထိုအချိန်များတွင် လမ်းမများပေါ်၌ လူအများအပြား မရှိလှပေ။ မြို့တော်ကြီးမှာလည်း လူသူကင်းမဲ့နေသကဲ့သို့ ခံစားရ၏။

မိနစ်အနည်းငယ် အကြာတွင် နစ်သည် ဆင်ခြေဖုံးရပ်ကွက်ကြီး ထဲသို့ ဝင်ရောက်သွားခဲ့သည်။

သူ ရောက်ရောက်ချင်းပင် အဆောက်အအုံတစ်ခု၏ အမိုးပေါ်သို့ ခုန်တက်လိုက်၏။ ထို့နောက် ခေါင်မိုးတစ်ခုမှ တစ်ခုသို့ တိတ်ဆိတ်စွာ ကူးလူးသွားလာနေခဲ့သည်။

နစ်သည် မြင်ကွင်းကောင်းကောင်း ရလိုသော်လည်း သူတစ်ပါး သတိပြုမိမည်ကိုမူ မလိုလားခဲ့ပေ။

သူသည် သင့်တော်မည့် အလောင်းတစ်လောင်းကို ရှာဖွေနေခြင်း ဖြစ်၏။

နောက်ထပ် မိနစ်အနည်းငယ် ကြာသောအခါ လမ်းလျှောက်နေသည့် လူအုပ်စုအချို့ကို နစ်မြင်တွေ့လိုက်ရသည်။ သို့သော် သူက ၎င်းတို့ကို ဂရုမစိုက်ခဲ့ပေ။

သူတို့သည် မသင်္ကာဖွယ်ရာ ကိစ္စရပ်များကို ပြုလုပ်နေခြင်း မရှိကြချေ။

လူစုလူဝေး အချို့ကိုလည်း နစ်တွေ့ခဲ့ရ၏။ သို့သော် ၎င်းမှာလည်း အတော်လေး ပုံမှန်ဖြစ်နေခဲ့သည်။

ဆင်ခြေဖုံးရပ်ကွက်ကြီး ရှိ လူအများစုသည် ညဘက်တွင် လုံခြုံမှုမရှိဟု ခံစားကြရ၏။ ထို့ကြောင့် ၎င်းတို့အနက်မှ အချို့သည် အုပ်စုငယ်လေးများ ဖွဲ့ထားကြပြီး ညဘက်တွင် အိမ်များကို စောင့်ကြပ်ကြည့်ရှုလေ့ ရှိကြသည်။

မိနစ်အနည်းငယ် ထပ်ကြာပြီးနောက် လူတစ်စုသည် လမ်းကြားများထဲမှ တိတ်တဆိတ် သွားလာနေသည်ကို နစ်တွေ့လိုက်ရ၏။ သူတို့ကို မြင်လိုက်ရသောအခါ နစ်သည် အထူးအာရုံစိုက်၍ စောင့်ကြည့်နေခဲ့သည်။ သူတို့ ခိုးကြောင်ခိုးဝှက် သွားလာနေပုံမှာ သံသယဖြစ်ဖွယ် ကောင်းနေ၏။

သို့သော် အနည်းငယ် ကြည့်ရှုပြီးနောက် သူတို့သည် အာမခံဂိုဏ်း မှ အဖွဲ့ငယ်လေး တစ်ဖွဲ့မျှသာ ဖြစ်ကြောင်း နစ်နားလည်သွားခဲ့သည်။ အာမခံဂိုဏ်း သည် ၎င်းတို့၏ ဝန်ဆောင်မှုများကို ကြော်ငြာရန်အတွက် ဆင်ခြေဖုံးရပ်ကွက်ကြီး တစ်လျှောက် ပုံမှန် လှည့်လည်သွားလာလေ့ ရှိကြ၏။

ထိုအုပ်စုများသည် ငွေကြေး ထောင်ဂဏန်း မဟုတ်တောင်မှ ရာဂဏန်းအထိ ကိုင်ဆောင်ထားလေ့ ရှိကြသည်။ ထို့ကြောင့်ပင် သူတို့က ဤသို့ ခိုးကြောင်ခိုးဝှက် သွားလာနေကြခြင်း ဖြစ်၏။

သူတို့သည် အာမခံဂိုဏ်း မှ ဖြစ်ကြောင်း သိလိုက်ရသောအခါ နစ်သည် ၎င်းတို့ကို ထပ်မံ၍ လျစ်လျူရှုလိုက်ပြန်သည်။

မိနစ်အနည်းငယ် အကြာတွင် အမျိုးသမီးတစ်ဦး အိမ်တစ်လုံးထဲသို့ ဖောက်ထွင်းဝင်ရောက်နေသည်ကို နစ်မြင်တွေ့လိုက်ရ၏။ နစ်က ဂရုမစိုက်ခဲ့ပေ။

ထို့နောက် လမ်းကြားတစ်ခုထဲတွင် မိန်းကလေး တစ်ယောက်ကို ဝိုင်းစော်ကားနေသည့် အမျိုးသားအချို့ကို သူ တွေ့လိုက်ရသည်။ ထိုအမျိုးသမီးမှာ စိတ်ပါဝင်စားပုံ မရသော်လည်း အလွန်အမင်း ဆန့်ကျင်ငြင်းဆန်နေပုံလည်း မရချေ။ ထို့ကြောင့် နစ်သည် ယင်းကိုလည်း လျစ်လျူရှုခဲ့ပြန်၏။

နောက်ဆုံး ဆင်ခြေဖုံးရပ်ကွက်ကြီး သို့ ရောက်ရှိပြီး မိနစ်၃၀ အကြာ၌ စိတ်ဝင်စားဖွယ် တစ်စုံတစ်ရာကို နစ်တွေ့ရှိသွားခဲ့သည်။

အရပ်ရှည်ရှည်နှင့် အသက် ၂၅ နှစ်အရွယ်ခန့်ရှိသော အမျိုးသမီးတစ်ဦးသည် လမ်းကြားအချို့ကို ဖြတ်သန်းလျှောက်လာနေ၏။

ပုံမှန်အားဖြင့်ဆိုလျှင် နစ်က ဂရုစိုက်မည် မဟုတ်ပေ။ သို့သော် တစ်စုံတစ်ခုက ဤအရာကို သူနှင့် အလွန်သက်ဆိုင်သွားစေခဲ့သည်။

ထိုအမျိုးသမီးသည် ရိုက်ကာ စထရိုက်ကာများ၏ တံဆိပ်ကို တပ်ဆင်ထားခြင်းပင် ဖြစ်၏။ ထိုတံဆိပ်နှင့်အတူ သူမကို မြင်လိုက်ရသောအခါ နစ်သည် အနည်းငယ် တုံ့ဆိုင်းသွားခဲ့သည်။

သို့သော် နောက်ဆုံးတွင် ရိုင်ကာ စထရိုက်ကာ အဖွဲ့ဝင်ဖြစ်ရန် ရွေးချယ်သူတစ်ယောက်သည် လူကောင်းတစ်ယောက် ဖြစ်ရန် မဖြစ်နိုင်ကြောင်း သူ သိနေခဲ့၏။

ထို့ကြောင့် နစ်သည် ခေါင်မိုးတစ်ခုပေါ်မှ ခုန်ချလိုက်ပြီး သူမ၏ ခေါင်းပေါ်သို့ ဒူးဖြင့် ကျဆင်းသွားခဲ့သည်။

ဘုန်း...

သူမ၏ ဦးနှောက် အပိုင်းအစများက လမ်းပေါ်သို့ ပန်းထွက်သွားကာ နစ်၏ အဝတ်အစားများကို ညစ်ပေသွားစေ၏။

သို့ရာတွင် နစ်သည် ထိုအလောင်းကို ဆွဲယူလိုက်ပြီး ခေါင်မိုးတစ်ခုပေါ်သို့ ထပ်မံခုန်တက်သွားခဲ့တော့သည်။

***