သူ၏ရွေးချယ်မှု

Vol. 14 Ch. 1314

ယခုလေးတင် ပိုင်ရှောင်ချန်း မြင်ခဲ့ရသည့် အရာအားလုံးမှာ ပျောက်ကွယ်သွားပြီး ထာဝရမှတ်ဉာဏ်တစ်ခုအဖြစ် ပြောင်းလဲသွားသည်။

သူသည် မျက်လုံးများကို ဖွင့်လိုက်သောအခါ အချိန်နှင့်အာကာသမြစ်ထဲရှိ လှေဦးပေါ်တွင် ရပ်နေဆဲဖြစ်ကြောင်း သိလိုက်ရသည်။ တဒင်္ဂကြာပြီးနောက် သူသည် ညာဘက်ရှိ ထာဝရပန်းပွင့်ဆီမှ အကြည့်လွှဲလိုက်တော့သည်။

လှေသမားအဘိုးကြီးမှာ သေရည်အိုးနောက်ထပ်တစ်အိုး ထုတ်ကာ တစ်ကျိုက်မော့သောက်လိုက်ပြီး ပိုင်ရှောင်ချန်းအား ကြည့်လိုက်သည်။

" အဲဒီပန်းပွင့်က မင်းနဲ့ တကယ် ကိုက်ပါတယ်။ အစကိုပြန်သွားတာလည်း မဟုတ်သလို အဆုံးသတ်အစစ်အမှန်လည်း မဟုတ်ဘူး "

ပိုင်ရှောင်ချန်းကမူ မည်သည့်စကားမှ ပြန်မပြောပေ။ မည်သည့်အရာကို သူ တွေးတောနေကြောင်းကိုလည်း မသိနိုင်ပေ။ သူသည် ဘယ်ဘက်ရှိပန်းပွင့်အား လှမ်းကြည့်ပြီးနောက် ညာဘက်ရှိပန်းပွင့်အား ထပ်၍ကြည့်လိုက်သည်။ အဆုံးတွင် သူ၏မျက်လုံးများကို ထပ်မှိတ်လိုက်တော့သည်။

" ညာဘက်က ပန်းပွင့်ကို ယူပါလား။ ငါ့အမြင်မှာတော့ အဲဒီပန်းပွင့်က စိတ်ကျေနပ်ပျော်ရွှင်မှု ပေးစွမ်းနိုင်မယ်လို့ ထင်တယ်။ အဲဒီနှစ်ပွင့်စလုံးက နှစ်လိုဖွယ်ကောင်းပေမဲ့ နှစ်ပွင့်ထဲက တစ်ပွင့်ကိုရွေးရမယ်ဆိုတာကြီးကတော့ သိပ်ခက်တဲ့ ရွေးချယ်မှုတစ်ခုပဲ "

အဘိုးကြီးက သက်ပြင်းချလိုက်တော့သည်။ အမှန်အတိုင်းဆိုရလျှင် သူသည်ပင် ယခုလိုရွေးချယ်ရမည်ဆိုပါက လွယ်လွယ်ကူကူ ရွေးချယ်နိုင်မည် မဟုတ်ပေ။

" တခြားအပွင့်က အဆုံးမရှိတဲ့ ဖြစ်နိုင်ခြေတွေ၊ ရွေးချယ်စရာတွေနဲ့ ပြည့်နှက်နေတဲ့ အနာဂတ်တစ်ခုကို ပေးစွမ်းနိုင်မှာ။ အဲဒါဆို မင်းလည်း အရာရာတိုင်းကို ပိုပြီး ပြီးပြည့်စုံအောင် လုပ်ရင် လုပ်နိုင်မှာပေါ့။ မင်းရဲ့သံသယအားလုံးတွေကို ပယ်ရှားပြီး မင်းရဲ့အနာဂတ်ကို မင်းစိတ်တိုင်းကျ ပုံဖော်ရင်လည်း ပုံဖော်နိုင်မှာပေါ့ "

အဘိုးကြီးမှာ ခေါင်းယမ်းလိုက်တော့သည်။

" မင်းဘယ်လို ရွေးချယ်မှာလဲ၊ ေသရည်သောက်ရင်း စဥ်းစားဦးမလား "

ထိုသို့မေးကာ သူ၏သေရည်အိုးကို လှမ်းပေးလိုက်သည်။

" မလိုပါဘူး "

ပိုင်ရှောင်ချန်းက ပြန်ဖြေလိုက်သည်။ ထို့နောက် သူ၏မျက်လုံးများကိုဖွင့်ကာ ထိုပန်းပွင့်နှစ်ပွင့်ကို လှမ်းကြည့်လိုက်ပြီး ပြုံး၍ လက်ကိုဆန့်ထုတ်လိုက်တော့သည်။

ပြီးပါပြီ။

တစ်ထောင့်သုံးရာတစ်ဆယ့်လေး၊ အသက်တစ်သက်၊ ဘဝတစ်ခု၊ ထာဝရ စိတ်ဆန္ဒ …

ဘာသာပြန်သူမှတ်စု။ တရုတ်ဘာသာစကားတွင် တစ်ထောင့်သုံးရာတစ်ဆယ့်လေး ဆိုသောနံပါတ်မှာ " အသက်တစ်သက်၊ ဘဝတစ်ခု " သို့တည်းမဟုတ် အခြေခံအားဖြင့် " လူတစ်ယောက်၏ သက်တမ်းတစ်ခုလုံး " ဟူ၍ အဓိပ္ပါယ်ရသော စာလုံးများနှင့် ကာရန်ကိုက်နေသည်။ ၎င်းမှာ အလွန်စိတ်ကူးယဥ်ဆန်ပြီး ကဗျာဆန်လွန်းသည့် နံပါတ်တစ်ခုဖြစ်သည်။