လောကကြီး၏အမှန်တရား....

လသာဆောင်လေးအတွင်း အပ်ကျသံကြားရလောက်သည်အထိ တိတ်ဆိတ်နေသည်။

နည်းပြချီချန်းသည် စွမ်းအားများသုံးပြီး ပတ်ဝန်းကျင်သို့ အသံများ မပျံ့လွှင့်သွားအောင် စည်းချလိုက်ပြီဖြစ်သည်။

ကြည့်ရသည်မှာ မြင့်မြတ်သောစစ်ပွဲသည် မြို့စားအဆင့်များအတွက်ပင် အရေးကြီးသောအရာတစ်ခုဖြစ်နေလောက်သည်။

နည်းပြကို စိတ်အနှောက်အယှက်ဖြစ်အောင်မေးလိုက်သည့် လီလော့ကို ရှင်းဖူနှင့် ပိုင်မျန်မျန်တို့က ဘုကြည့်ကြည့်နေလေ၏။

မြင့်မြတ်သောစစ်ပွဲအကြောင်းကို ယောင်ဝါးဝါးမျှသာကြားဖူးထားခဲ့ကြသည်။ ဤသည်မှာ သူတို့လက်လှမ်းမှီနိုင်သောအရာမဟုတ်ခဲ့ပေ။

" မင်း မိဘတွေကြောင့်လား... "

လီလော့ ခေါင်းညိတ်ပြလိုက်သည့်အခါ ချီချန်း သက်ပြင်းချလိုက်ပြီး.....

" ငါပြောမယ့်အကြောင်းအရာတွေကို နားထောင်ပြီးရင် မင်းတို့ရင်လေးသွားလိမ့်မယ်....."

" ဒီလောကကြီးရဲ့အမှန်တရားကို သိကြလား....."

ထိုမေးခွန်းကြောင့် လီလော့တို့သုံးယောက်စလုံး သိချင်စိတ်ပြင်းပြလာကြသည်။

" အရင်ဆုံး ငါတို့နေနေတဲ့ လောကကြီးအကြောင်းပြောပြမယ်....မင်းတို့အားလုံး ရှပြည်ထောင်စုကို သိကြတယ်မဟုတ်လား...ရှပြည်ထောင်စုရဲ့အနီးအနားမှာဘာတွေရှိလဲ....အဲ့တာတွေရဲ့အလွန်မှာ ဘာတွေရှိလဲဆိုတာ သိကြရဲ့လား....."

လီလော့တို့အဖို့ ရှပြည်ထောင်စုတစ်ခုလုံးကိုပင် နှံ့စပ်အောင်မသိကျွမ်းနိူင်သေးခင်မှာ ရှပြည်ထောင်စု၏အလွန်တွင်ရှိနေသောအရာများအကြောင်း အမေးခံလိုက်ရသည့်အတွက် ဖြေရခက်နေကြသည်။

"ရှပြည်ထောင်စုက အရှေ့ပိုင်းနတ်ဘုရာကုန်းမြေမှာတည်ရှိနေတဲ့ နယ်မြေလေးတစ်ခုပါ.....ရှပြည်ထောင်စုထဲမှာ သန်မာတဲ့ အင်အားစုတွေရှိတဲ့အတွက် ငါတို့မှာ ရန်သူမရှိဘူး....ဒါပေမယ့် ငါတို့လိုအင်အားကြီးတဲ့ နယ်မြေသုံးခုရှိနေသေးတယ်...အဲ့တာတွေက ရွှေခြင်္သေ့ရုံးတော်၊ သဲသံမဏိအင်ပါယာနဲ့ သန့်စင်သောနေမင်း မင်းဆက်တွေပဲ.... "

" အရှေ့ပိုင်းနတ်ဘုရားကုန်းမြေအပြင်ဘက်မှာ နောက်ထပ်ကုန်းမြေတိုက်ကြီး ကိုးခုရှိနေသေးတယ်....ငါတို့ရဲ့ အရှေ့ပိုင်းနတ်ဘုရားကုန်း​​မြေအပါဝင်တိုက်ကြီးဆယ်တိုက်စလုံးက လူသားမျိုးနွယ်တွေ အုတ်မြစ်ချနေထိုင်ခဲ့တဲ့နေရာ....."

ကြားလိုက်ရသည့် သတင်းအချက်အလက်များသည် မှင်သက်အံ့သြဖွယ်ကောင်းလွန်းလှသည်။ရှပြည်ထောင်စုကို ကမ္ဘာကြီးတစ်ခုအဖြစ်မှတ်ယူထားခဲ့သမျှ အခုမှသာ မည်မျှသေးငယ်မှန်း နားလည်သဘောပေါက်ခဲ့ရသည်။

"အဲ့ဒီ့အင်အားကြီးနယ်မြေသုံးခုစလုံးမှာ ကြယ်တာယာခရီးရှည်ကောလိပ်နဲ့ ခွန်အားချင်းတူတဲ့ ကျောင်းတော်တွေရှိတယ်....ဘာ့ကြောင့် အဲ့လိုကျောင်းတော်တွေရှိနေရတာလဲ သိလား....."

" ဗဟိုကျောင်းသားသမဂ္ဂဖွဲ့ချင်လို့ပဲ...."

ထိုအဖြေစကားကြောင့် သုံးယောက်စလုံး ထိတ်လန့်သွားခဲ့ကြသည်။

" ဗဟိုကျောင်းသားသမဂ္ဂအဖွဲ့???"

" ဟုတ်တယ်....ဗဟိုကျောင်းသားသမဂ္ဂက ကုန်းမြေတိုက်ကြီးဆယ်ခုစလုံးမှာ အင်အားအကြီးအဆုံးအဖွဲ့ပဲ....ငါတို့ ကောလိပ်ကလည်း အဲ့အဖွဲ့ရဲ့ အဖွဲ့ဝင်ကျောင်းတော်တစ်ခု....."

ရိုက်ချက်ပြင်းလှပေသည်။ ကြယ်တာယာခရီးရှည်ကောလိပ်သည် သူတို့အတွက် ဖြိုဖျက်မရနိုင်အောင် ကြီးကျယ်ခမ်းနားလှပြီဟုထင်နေချိန်တွင် ၎င်းသည် ဗဟိုကျောင်းသားသမဂ္ဂအဖွဲ့၏အဖွဲ့ဝင်မျှသာ ရှိသေးသည်။

ထိုသို့ဆိုပါက အဖွဲ့ချုပ်သည် မည်မျှအထိ အစွမ်းထက်မည်နည်း။တွေးဆမရတော့ပေ။

ထိုအချိန်တွင် လီလော့ တစ်ခုတွေးလိုက်မိသည်။

// ဒါဆို အဖွဲ့ချုပ်ကဘာလို့ရှိနေရတာလဲ....တိုက်ကြီးဆယ်ခုကို အုပ်စိုးဖို့လား.....//

" ဗဟိုကျောင်းသားသမဂ္ဂ ဘာလို့တည်ရှိနေရသလဲ သိချင်နေကြတယ်မဟုတ်လား.....ဗဟိုကျောင်းသားသမဂ္ဂအဖွဲ့ချုပ်က အ​ခြားတည်ရှိမှုတစ်ခုကြောင့် တည်ရှိနေရတာ....."

" အဲ့တာဘာလဲ....."

" လွန်ခဲ့တဲ့နှစ်ပေါင်းများစွာတုန်းကတော့ လူသားမျိုးနွယ်ကျင့်ကြံသူတိုင်းအတွက် ရွှေခေါတ်တစ်ခေါတ်ပေါ့...အဲ့တုန်းကဆို နည်းပညာတွေ မယုံန်ိုင်လောက်အောင်ထွန်းကားခဲ့တယ်...ဒီလိုနဲ့ လူသားတွေကိုယ်တိုင် သဘာဝတရားကြီးကို ချိုးဖောက်လာခဲ့ကြတာကြောင့် ဆိုးရွားတဲ့ ဖြစ်ရပ်တွေဖြစ်ပေါ်လာခဲ့တယ်....ငါတို့နေထိုင်တဲ့ကမ္ဘာကြီးကနေ ရောင်ပြန်ဟပ်မှုတစ်ခုဖြစ်လာခဲ့တယ်...."

" ရောင်ပြန်ဟပ်ခံရတဲ့ကမ္ဘာကို အရိပ်ကမ္ဘာလို့ခေါ်တယ်....."

// ဟမ်...နောက်ထပ် ကမ္ဘာတစ်ခုရှိနေသေးတာလား...အဲ့ကမ္ဘာကလူတွေ ဘယ်လောက်သန်မာကြလဲ....//

" အရိပ်ကမ္ဘာစတင်ကြီးထွားလာတုန်းက ပြသာနာကြီးကြီးမားမားမရှိခဲ့ဘူး။ ဒါပေမယ့် လူသားတွေရဲ့ ဆိုးယုတ်တဲ့ အကြံအစည်အတွေးအခေါ်တွေကို အဲ့ကမ္ဘာကြီးကနေ တိတ်တဆိတ်စုဆောင်းပြီး အခြားအရာတွေကို မွေးဖွားပေးလိုက်တယ်.....အဲ့ဒီ့အရာတွေက လူသားတွေဆီက စွမ်းအားတွေကို ဆက်ခံပြီး အလျင်အမြန်ကြီးထွားလာခဲ့ကြတယ်....."

" အဲ့ဒီ့အရာတွေကို မမြင်နိုင် မထိတွေ့နိူင်တဲ့အပြင် ဖျက်စီးလို့လဲမရဘူး။ ဒါ့အပြင် အဲ့အရာတွေက လူသားတွေရဲ့ စိတ်ကိုဖောက်လွှဲဖောက်ပြန်ဖြစ်အောင်လွှမ်းမိုးနိုင်ကြတယ်....အဲ့တာတွေက ကပ်ပါးပိုးကောင်တွေလိုပဲ....သူတို့တွေ ပေါ်လာပြီဆို ကပ်ဘေးဆိုက်သလို အရာအားလုံး ဖျက်ဆီးခံရတော့တာပဲ....."

" လူသားတွေရဲ့ ဆိုးယုတ်မှုက မွေးဖွားလာတဲ့အရာတွေကပဲ လူသားတွေကို ဂုဏ်သရေညှိုးနွမ်းစေခဲ့တယ်....."

" နှစ်ပေါင်းမရေမတွက်နိုင်အောင် တိုက်ခိုက်ခဲ့ကြပြီးမှသာ လူသားမျိုးနွယ်စုဘက်ကနေ ကမ္ဘာနှစ်ခုကို ဖြတ်တောက်နိုင်ဖို့ ကြီးမားတဲ့စွမ်းအင်ပမာဏတွေ စုဆောင်းနိုင်ခဲ့ကြတယ်....ကမ္ဘာနှစ်ခုကို အဆက်အသွယ် ဖြတ်နိုင်ခဲ့ပြီဆိုပေမယ့်လည်း အပြည့်အဝတော့ မဟုတ်ခဲ့ဘူး။ မြင့်မြတ်တဲ့ စစ်တလင်းတွေက  အရိပ်ကမ္ဘာနဲ့ ငါတို့ကမ္ဘာကို ချိတ်ဆက်ပေးထားတဲ့နေရာတွေပဲ..."

" သတ်ဖြတ်မှုတွေ ဘယ်တုန်းကမှ မရပ်တန့်ခဲ့ကြဘူး...ဗဟိုကျောင်းသားသမဂ္ဂအဖွဲ့ချုပ်တည်ရှိနေရတာလည်း အရိပ်ကမ္ဘာလက်ကနေ လူသားမျိုးနွယ်ကို ကာကွယ်ပေးဖို့အတွက်ပါ....."

လီလော့ရဲ့ အာခံတွင်းတစ်ခုလုံး​ခြောက်သွေးသလိုခံစားနေရသည်။

" ဒါဆို ဘုရင်အဆင့်နဲ့ မြို့စားအဆင့်တွေအားလုံး မြင့်မြတ်တဲ့စစ်ပွဲထဲဝင်ပြီး အရိပ်ကမ္ဘာကဟာတွေနဲ့ တိုက်ခိုက်နေကြတာပေါ့...ဟုတ်လား...."

" ဟုတ်တယ်....မြင့်မြတ်တဲ့စစ်တလင်းက မင်းတို့ထင်ထားတာထက်တောင် ပိုရက်စက်သေးတယ်....ဒါကြောင့်မို့ မြို့စားအဆင့်နဲ့ ဘုရင်အဆင့်တွေပဲ ဝင်ပါခွင့်ရတာ....စစ်ပွဲထဲရောက်သွားတဲ့ မြို့စားဆယ်ယောက်မှာ တစ်ယောက်တောင် အသက်ရှင်ဖို့မလွယ်ဘူး...."

လီလော့တစ်ကိုယ်လုံး အေးစက်တောင့်တင်းနေလေပြီ။

" ဒါဆို ကျွန်တော့်မိဘတွေ ဘာလို့သွားကြတာလဲ... "

" မြို့စားအဆင့်တွေ ဘုရင်အဆင့်တွေမှ စစ်ပွဲထဲကို မသွားရင် ငါတို့ကမ္ဘကြီးတစ်ခုလုံး ကျူးကျော်ခံရပြီး ပျက်ဆီးနေလောက်ပြီ "

" ဒါဆို ဘာလို့ ကျွန်တော့်မိဘတွေသွားကြတာလဲ....."

အကယ်၍ မြင့်မြတ်သောစစ်တလင်းသည် ဤမျှအထိ သေခြင်းတရားပြည့်လွှမ်းနေပါက၊ မြို့စားအဆင့်ကျွမ်းကျင်သူပင် မိမိကိုယ်ကို မကာကွယ်နိုင်ပါက သူ့မိဘနှစ်ပါးသည် အဘယ်ကြောင့် ကျန်းချင်းအာနှင့်သူ့ကို ဆာလောင်နေသောကျားရဲများကြားတွင် ပစ်ထား၍ စစ်ပွဲအတွင်း ဝင်ရောက်ခဲ့ကြသနည်း။

" မင်း ဘာတွေတွေးနေလဲ ငါနားလည်ပါတယ်.....သေနိုင်ချေသိပ်များတဲ့အတွက် မြို့စားအဆင့်တိုင်းမှာ သွားရဲတဲ့သတ္တိမရှိကြဘူး....."

" တစ်ချိန်တုန်းက လူသားတွေ စစ်ပွဲထဲ မဝင်တော့ဖို့ ဆုံးဖြတ်လိုက်ကြတယ်..အဲ့တုန်းကဆို အရိပ်ကမ္ဘာကဟာတွေ အမြန်နှုန်းနဲ့ ပျံနှံ့လာပြီး ကုန်းမြေတိုက်ကြီးတွေကို ကပ်ဘေးဆိုက်စေခဲ့တယ်...."

" နှစ်ပေါင်းများစွာ လေ့လာပြီးချိန်မှာ စစ်ပွဲအတွင်းမှာ ရှိနေတဲ့ မြို့စားအဆင့်နဲ့ ဘုရင်အဆင့်တွေ သတ်မှတ်ထားတဲ့အရေအတွက်အောက် လျော့လာတာနဲ့ ပျံ့နှံ့မှုစတင်လာတာကို ရှာတွေ့ခဲ့ကြတယ်....ဒါ့ကြောင့် စစ်ကူထပ်ပို့ဖို့ကလွဲရင် ရွေးချယ်စရာမရှိတော့ဘူး...ဟုတ်တယ် အများစုကို စစ်ကူပို့ခဲ့ကြရတယ်...."

ဤသည်မှာ လူသားမျိုးနွယ်ကို ကာကွယ်ပေးရန် အဆုံးမရှိသော မြို့စားအဆင့်နှင့် ဘုရင်အဆင့်များကို ထိုးကျွေးနေရသည်နှင့်တူနေသည်။

"မြင့်မြတ်တဲ့စစ်ပွဲက သိပ်ကို အန္တရာယ်များလွန်းတာကြောင့် စစ်ကူပို့မယ့်သူတွေကို မဲနှိုက်ရွေးချယ်ခဲ့ကြတယ်....."

" အဲ့တာကို သေခြင်းတရားလက်မှတ်လို့ခေါ်တယ်....လက်မှတ်ကို နှစ်မျိုးခွဲခြားထားတယ်...အဖြူရောင်ဆို အသက်ရှင်ခွင့်ရမယ်...အနက်ရောင်ဆို သေဆုံးရမယ်....ဆိုလိုချင်တာက အနက်ရောင်ကျရင် စစ်ပွဲထဲသွားရမယ်....."

" မင်း မိဘနှစ်ပါးစလုံး အနက်ရောင်ကတ်တွေ ရွေးမိခဲ့ကြတယ်....သူတို့လည်း မင်းကိုထားခဲ့ပြီး မသွားချင်ပါဘူး.....အနက်ရောင်သေမင်းကတ်ကို ဘယ်သူမှ မဖီဆန်နိုင်ဘူး....ဖီဆန်ခဲ့ရင်လည်း ကုန်းမြေဆယ်ခုလုံးမှာ ပုန်းစရာမြေမရှိဖြစ်သွားလိမ့်မယ်...."