စမ်းသပ်ချက်.....

Vol. 15 Ch. 198

ရှီးယန်ရုံးချုပ်တွင်.......

ခန်းမထဲတွင် ပညာရှင်အများအပြားရှိနေသော်လည်း အုပ်စုနှစ်ဖွဲ့ကွဲနေသည်။

တစ်ဖက်က ရုံးချုပ်မှပညာရှင်များ၊ တဖက်က တန်ယွမ် ဉီးဆောင်လာသော ရှီလင်းမှပညာရှင်များ........

ရုံးချုပ်တံခါးဝတွင် ဖြစ်ပျက်ခဲ့သမျှကို သိနေသောကြောင့် ရုံးချုပ်မှပညာရှင်များသည် တန်ယွမ်တို့အဖွဲ့ကို ဒေါသတကြီးစိုက်ကြည့်နေကြသည်။

// ဖေဟောင်ရဲ့လူတွေမှန်း သိသာနေတာကို မျက်နှာပြောင်တိုက်ပြီး လျှို့ဝှက်ရေအရင်းမြစ်လာတောင်းရဲသေးတယ်....နေ့ခင်းကြောင်တောင် ဓားပြတိုက်နေသလိုပဲ.....//

ဖေဟောင်သည် မည်သူနည်း.....

သူတို့သည်လည်း အဆိပ်ပြင်းလှသော ထိုသူ၏လက်ထဲမှ သခင်လေးလီလော့ကြောင့်သာ လွတ်မြောက်ခွင့်ရခဲ့ကြသည်။

ထို့ကြောင့် ယခုချိန်တွင် သူတို့ ရင်ထဲတွင် သခင်လေးလီလော့နှင့် လျှို့ဝှက်ရေအရင်းမြစ်သာ ရှိနေပါတော့သည်။

မလုံသည့်အိုး တုတ်မိုးရုံနှင့်ကွဲဆိုသလို တန်ယွမ်တို့သည်လည်း ရုံးချုပ်မှပညာရှင်များ၏အကြည့်ကြောင့် အတော်နေရခက်နေကြသည်။

ယခုအချိန်တွင် လီလော့က စင်ပေါ်တွင် မတ်တပ်ရပ်နေပြီး သူ့နောက်တွင် ကျန်းချင်းအာနှင့် ချိူင်ဝေတို့လည်း ရှိနေကြသည်။

" ကျေးဇူးပြုပြီး ခွဲခြားဆက်ဆံတာမျိုးတွေမလုပ်ဖို့ မေတ္တာရပ်ခံချင်ပါတယ်......ရှီလင်းရုံးချုပ်ကပညာရှင်တွေကလည်း ကျွန်တော်တို့အတွက် နှစ်ပေါင်းများစွာ ကြိုးစားပေးခဲ့ကြသူတွေပါပဲ....."

ထိုစကားကြောင့် တန်ယွမ်နှင့်လုရှောင်ဖန်းတို့တစ်ယောက်မျက်နှာ တစ်ယောက်ကြည့်မိလိုက်သည်။

လီလော့သည် ရှီလင်းဌာနခွဲတစ်ခုလုံး ဖေဟောင်လက်အောက်ရောက်နေမှန်းသိသည့်တိုင် သဘောထားကြီးစွာဖြင့် အားလုံးကို လက်ခံပေးထားဆဲပင်.....

ထို့ကြောင့်လည်း မျက်နှာပူလာမိသည်။

"ဟမ့်....သခင်လေးဘက်က ဒီလောက်သဘောထားကြီးပေးနေတာကို ကျေးဇူးတင်ရကောင်းမှန်း သိတတ်ကြရင်ကောင်းမယ်...."

အကြီးအကဲကျန်းက တန်ယွမ်တို့ကို ထိုသို့ဆူပူလိုက်သည့်အခါ တန်ယွမ်တို့ခင်မျာ မချိမပြုံးသာ ပြုံးနေရှာသည်။

လီလော့ကို ကျေးဇူးတင်နေပေမယ့်လည်း သူတို့သည် ယခုချိန်ထိ ဖေဟောင့်ဘက်တော်သားများဖြစ်နေကြဆဲပင်....

" ဒီလအတွက် ရုံးချုပ်ကနေ အမြတ်တော်တော်ရထားတယ်.....ဟန်ဇီတို့တွေ မရှိတော့တဲ့အတွက် ဆုံးရှုံးမှုများခဲ့ပေမယ့်လည်း သမုဒ္ဒရာထဲမှာ ငါးမရှားပါဘူး.....ရှီးယန်ရုံးချုပ်နောက်တဖန် ထွန်းတောက်လာမှာ သေချာပါတယ်..... "

" ရှီးယန်ရုံးချုပ်ကို ရှပြည်ထောင်စုရဲ့ထိပ်တန်းစံအိမ်ဆယ်ခုစာရင်းဝင်နိုင်ဖို့ ကျွန်တော် ရည်မှန်းထားတယ်.....ရေမြင့်ရင် ကြာတင့်တယ်ဆိုတဲ့စကားအတိုင်း ခင်ဗျားတို့လည်း ထင်ရှားကျော်ကြားလာကြမှာပါ....."

ပြောင်းလဲမှုကို ကိုယ်တိုင်ကြုံတွေ့ဖူးထားသည့်အတွက် လီလော့၏ ကြေငြာချက်ကို ရုံချုပ်မှ ပညာရှင်များက သောင်းသောင်းဖြဖြ လက်ခံနေကြသည်။

ရှီးယန်စံအိမ်သည် ထိုပန်းတိုင်သို့ရောက်ရန် အလှမ်းဝေးနေသေးသော်လည်း သခင်လေး၏ ဦးဆောင်မှုအောက်တွင် ထိုသို့ဖြစ်လာမည်မှာ သိပ်ကြာမည်မဟုတ်လောက်ပေ။မညိသို့ပင်ဆိုစေ လီလော့သည် သူတို့၏မျက်စိရှေ့တွင် အံ့ဖွယ်ရာများကို လုပ်ဆောင်ခဲ့ပြီးဖြစ်သည်။

ထို့အပြင် ရှီးယန်စံအိမ်ကျော်ကြားလာသည်နှင့်အမျှ သူတို့သည်လည်း ကျော်ကြားလာပေတော့မည်။

လီလော့ပြောလိုက်သောစကားများသည် အမှန်လား မျှော်လင့်ချက်လား ကွဲပြားစွာ မသိနိုင်သေးသော်လည်း တန်ယွမ်တို့သည် ရုံးချုပ်မှပညာရှင်များကို မနာလိုဖြစ်နေမိကြသည်။

ဖေဟောင်သည် ရှီလင်းဌာနခွဲ တစ်ခုလုံးကို အဆီစား အသားမျိုဖို့သာ တွေးနေပြီး တိုးတက်ရာတိုးတက်ကြောင်း ဘာတခုမျှ မလုပ်ပေးခဲ့ပေ။

" သခင်လေးက လူတွေ့ရဲ့စိတ်နှလုံးသားကို ဖမ်းစားတဲ့နေရာမှာ အတော်ဆရာကျနေပြီပဲ...."

ချိုင်ဝေက ကျန်းချင်းအာကို လက်တို့ပြီး ချီးကျူးစကားဆိုလိုက်သည်။

" ဟုတ်တယ်....ဉက္ကဌရာထူးနဲ့ ထိုက်တန်ကြောင်းသက်သေပြဖို့ကြိုးစားနေပြီ....."

လီလော့နှင့် ရုံးချုပ်ကပညာရှင်များ အပေးယူမျှနေကြသည့်အတွက် တန်ယွမ်တို့ ပို၍ပက်နေရခက်နေကြသည်။

" သ..သခင်လေး..ကျွန်တော်တို့ဘယ်တော့လောက် အလုပ်စဆင်းရမလဲ....."

" မစိုးရိမ်ပါနဲ့......ခင်ဗျားတို့ကို ရုံးချုပ်ကလူတွေနဲ့ တန်းတူထားပေးမှာပါ.......နေရာထိုင်ခင်းအတွက် အကြီးအကဲကျန်း စီစဉ်ပေးပါလိမ့်မယ်......"

" ဒါဆို လျှို့ဝှက်ရေအရင်းမြစ်တွေလည်း လုံလုံလောက်လောက်ရမှာပေါ့နော်......"

လုရှောင်ဖန်းက မဝံ့မရဲလေသံဖြင့် မေးလာပြန်သည်။

" ပေးမှာပါ.....အကုန်တန်းတူ ထောက်ပံ့ပေးမှာပါ.....ဘယ်သူ့ကိုမှခွဲခြားဆက်ဆံမှာမဟုတ်ဘူး....."

ထိုအခါမှသာ ရှီလင်းဌာနခွဲမှ ပညာရှင်များ သက်ပြင်းချနိုင်ရှာတော့သည်။

" တစ်ခုလောက်မေးချင်လို့ပါ....သခင်လေးပြောခဲ့တဲ့ စမ်းသပ်စစ်ဆေးပွဲဆိုတာ ဘယ်လိုမျိုးကိုပြောတာလဲ......"

ထောင်ချောက်မှန်းမသိ တိုးဝင်မိလိုက်မည်စိုးသောကြောင့် တန်ယွမ်က ချက်ကျလက်ချ မေးခွန်းထုတ်လာခဲ့သည်။

တခြားသူများသာမက ချိူင်ဝေနှင့် ကျန်းချင်းအာတို့ပင်လျှင် လီလော့၏အတွေးများကို လိုက်မမှီကြတော့ပေ။

စမ်းသပ်မှုကို အောင်မြင်မှသာ ရှီလင်းဌာနခွဲအတွက် လျှို့ဝှက်ရေအရင်းမြစ် ထောက်ပံပေးမည်ဟု လီလော့ ပြောထားခဲ့သည်မဟုတ်လော.....

အကယ်၍ လီလော့ဘက်ကသာ မဖြစ်နိုင်သောအရာများကို လုပ်ခိုင်းမည်ဆိုလျှင် အကုန်ဒုက္ခများကုန်လိမ့်မည်။

" ဟုတ်သားပဲ....အကုန်လုံး သိအောင် ရှင်းရှင်းလင်းလင်း ကြေငြာပေးပါ့မယ်...."

" စစ်ဆေးမှုက ရိုးရှင်းပါတယ်....ကျွန်တော်ကိုယ်တိုင်ကလဲ အဆင့်သုံးပဲ့တင်ထပ်သံပြုပြင်သူဖြစ်ဖို့ ကြိုးစားနေတာဆိုတော့.......ဒီတလအတွင်း ကျွန်တော်နဲ့ယှဉ်ပြိုင်ဖို့ ရှီးယန်ရုံးချုပ်ဘက်ကရော ရှီလင်းဌာနခွဲဘက်ကရော အဆင့်သုံးနဲ့ အဆင့်သုံးအောက် ပဲ့တင်ထပ်သံပညာရှင်တွေစေလွှတ်လိုက်ပါ.....ပထမအခေါက်မှာ အဆင့်တစ်၊ ဒုတိယခေါက်မှာ အဆင့်နှစ်၊ တတိယအအခေါက်မှာ အဆင့်သုံး..... ဝိဉာဉ်ရည်သန့်စင်တာတွေပြိုင်ရမယ်......ဖော်ဖြူလာတူရမယ်၊ပါဝင်ပစ္စည်းတွေတူရမယ်......လျှို့ဝှက်ရေအရင်းမြစ်တွေမသုံးရဘူး....."

"ခင်ဗျားတို့ဘက်က တစ်ခါနိူင်လိုက်တာနဲ့ စစ်ဆေးမှုအောင်မြင်သွားပြီ.....ဘယ်လိုလဲ....."

" ငါတို့တွေလည်း ဝင်ပါရမှာလား....."

တန်ယွမ်နှင့် လုရှောင်ဖန်းတို့သည် တယောက်မျက်နှာတယောက်ကြည့်ပြီး မေးခွန်းထုတ်လိုက်ကြသည်။

သူတို့နှစ်ဉီးစလုံးသည် အဆင့်လေးပညာရှင်များဖြစ်ကြသော်လည်း ကန့်သတ်ထားသည့် အဆင့်သုံးအောက် ပဲ့တင်ထပ်သံပညာရှင်များကို ကူညီသင်ပြပေးမည်ဆို မလွဲမသွေအနိုင်ရရှိပေလိမ့်မည်။

ထို့အပြင် စစ်ဆေးမှုအောင်မြင်ရန် သုံးပွဲစလုံးအနိုင်ရဖို့မလိုပေ။

လီလော့သည် အဆင့်သုံးပညာရှင်ဖြစ်ရန် ကြိုးစားနေသူဖြစ်သောကြောင့် အလွန်ဆုံးမှ အဆင့်သုံးဝိဉာဉ်လောက်ကိုသာ သန့်စင်နိုင်လိမ့်မည်။

လီလော့ဘက်က တကယ်ကြီး ချနင်းဖို့လမ်းခင်းပေးခးထားခြင်းပေလော......

// သခင်လေးအပေါ်အထင်မှားခဲ့မိပြီ.....တကယ်တော့ သခင်လေးကတကယ့်ကို ငတုံးတစ်ယောက်ပဲ......//