နတ်ဘုရားမျိုးစိတ်

အဆင့်တက်သွားသည်နှင့် ရွှေကျီးကန်းသည် မူလအရွယ်အစားထက် နှစ်ဆပိုကြီးမားလာသည်။ ၎င်း၏ မည်းနက်တောက်ပြောင်သော ခန္ဓာကိုယ်သည် ရှေးဟောင်းသားရဲကြီးတစ်ကောင်နှင့် ဆင်တူပြီး မြေပြင်ကို ပုံဆောင်ခဲအသွင်ဖြစ်သွားစေနိုင်လောက်သည့် မီးတောက်များကို ထုတ်လွှတ်နေသည်။

မနီးမဝေးရှိ လူများသည်ပင် အပူဓာတ်ကို ခံစားနိုင်သည်။

လေထုကြီး ရှုံ့တွသွားပြီး မီးတောက်များမှ လွင့်ထွက်လာသော မီးပွားများသည်ပင် ကြောက်ခမန်းလိလိ ပူပြင်းသည်။

ရွှေကျီးကန်း၏ မျက်လုံးများထဲရှိ အလင်းရောင်က အသက်ဝင်နေဟန်တူပြီး ရွှေကျီးကန်းကြီး၏ကိုယ်မှ စူးရှပြီး ရက်စက်ကြမ်းကြုတ်သော အရှိန်အဝါတစ်ခု ထွက်ပေါ်နေသည်။ ရွှေကျီးကန်းကြီး၏ ပစ်မှတ်ထားခြင်းခံရသော မည်သူမဆို ကောင်းကင်ဘုံကိုးထပ်တွင် ရှိသည်ဖြစ်စေ လောကဆယ်ပါးတွင် ရှိသည်ဖြစ်စေ ရွှေကျီးကန်းကြီး၏ ဝါးမျိုခြင်းမှ မလွတ်မြောက်နိုင်သည့်ပမာပင်။

ယင်းသည် ခံစားချက်တစ်ခုသာ ဖြစ်ပြီး ယခုအချိန်တွင် မဖြစ်နိုင်သေးပါသော်ငြား တိုက်ပွဲကွင်းပြင်ရှိ ရွှေကျီးကန်းကြီးသည် တိုက်ပွဲကွင်းပြင်ရှိ လူအားလုံးကို ကြီးစွာသော သက်ရောက်မှု ဖြစ်သွားစေခဲ့သည်။

ရွှေကျီးကန်းကြီးသည် အတောင်ပံများကို ဖြန့်၍ ကောင်းကင်ယံသို့ ပျံတက်သွားလေရာ မီးပင်လယ်ကြီးက မြေပြင်ပေါ် ကျရောက်သွားသည်။ အတောင်ပံများကို ခတ်လိုက်သည့်အခါတိုင်း မီးတောက်များ လောင်ကျွမ်းသံများကို ကြားနိုင်သည်။

မီးပင်လယ်ကြီးထဲတွင် ရွှီချင်း၏ဆံပင်ရှည်များ တဖျပ်ဖျပ်လွင့်နေသည်။ သူသည် ပို၍ပင် ရက်စက်ကြမ်းကြုတ်သောလူတစ်ယောက် ဖြစ်သွားသည်။ ထိုချောမောသောမျက်နှာက မိစ္ဆာဆန်သောစွဲဆောင်မှုအသွင် ဆောင်နေသည်။ ထိုမျက်နှာကို ကြည့်မိလိုက်သည့်လူတိုင်း နှလုံးသားများ တွေဝေငေးမောသွားကြမည် ဖြစ်သည်။ ဘေးပတ်လည်ရှိ မီးတောက်များ၊ ကောင်းကင်ယံရှိ ရွှေကျီးကန်းကြီးနှင့် တခြားအရာများသည် သူ့ကို အလှဆင်ရန် မွေးဖွားလာကြသည့်ပမာ။

ရွှေကျီးကြီး၏ ထိုပုံပန်းသွင်ပြင်အပြင် ဒုတိယအဆင့်စွမ်းအားသည်လည်း အလွန် အစွမ်းထက်သည်။ ယခင်ကကဲ့သို့ သက်စောင့်မီးလုံးတစ်လုံး တိုက်ရည်ခိုက်ရည်မဟုတ်တော့ဘဲ သက်စောင့်မီးလုံးခြောက်လုံး တိုက်ရည်ခိုက်ရည် ဖြစ်သွားသည်။

ထိုသက်စောင့်မီးလုံးခြောက်လုံးတိုက်ရည်ခိုက်ရည်က ရွှီချင်း၏ ခန္ဓာကိုယ်ပေါ် လုံးလုံးလျားလျား ကျရောက်သွားပေရာ တဖျစ်ဖျစ်မြည်သံများ ပျံ့လွင့်လာသည်။ အမှန်စင်စစ် ယင်းသည် သိသိထင်ရှားစွာ မြင်ရသော အပြောင်းအလဲများမဟုတ်ဘဲ သူ့အရိုးများ၊ အသွေးအသားများ ပြောင်းလဲနေခြင်း ဖြစ်သည်။

သူ၏ခန္ဓာဖွဲ့စည်းတည်ဆောက်ပုံ တိုးတက်ပြောင်းလဲသွားသည်။

ထိုအချိန်၌ ရွှေကျီးကန်းကြီးသည် ကောင်းကင်ယံသို့ လွင့်ပျံသွားအောင် အော်ဟစ်မြည်ကြွေးလိုက်ပြီးနောက် ရွှီချင်းထံသို့ ပြန်လာသည်။ ရွှေကျီးကန်းကြီး၏ အမြီးဆယ့်သုံးချောင်းမှ အမြီးမီးတောက်များသည် ရွှီချင်းကို ရစ်ပတ်သွားပြီး ဖီးနစ်ငှက်မွေးများအဖြစ် ပြောင်းလဲသွားသည်။

မီးတောက်များက ဘေးပတ်ဝန်းကျင်တွင် ပျံ့လွင့်နေပြီး ရွှီချင်း၏ခန္ဓာကိုယ်ထဲ ပြန်လည်တိုးဝင်နေသည်။

ထိုအချိန်၌ ရွှီချင်းကို မီးတောက်များက လွှမ်းခြုံထားသည်။ သူ့ခေါင်းအထက်ရှိ ရွှေကျီးကန်းကြီးက ဧကရာဇ်သရဖူတစ်ခုနှင့် ဆင်တူပြီး လူအားလုံး၏ စိတ်အာရုံကို ဆွဲဆောင်နေသည်။

ကောင်းကင်နန်းတော်နှစ်ဆောင် ပေါ်လာပြီး သူ၏စွမ်းအားများ ထိုးတက်သွားကာ သူ၏တိုက်ရည်ခိုက်ရည်လည်း မြင့်မားသွားသည်။ ချီရွှဲ့ထုံဂိုဏ်းသားများနှင့် အလင်းတမန်အဖွဲ့ဝင်များပင် အံ့သြသင့်သွားကြပြီး အနီးသို့ အလိုလို မကပ်ချင်ကြတော့ပေ။

ရွှီချင်းသည် တိတ်ဆိတ်စွာ ရပ်နေသည်။

သူသည် လက်ထဲရှိ သူတော်စင်ကြယ်၏ခေါင်းကို ငုံ့ကြည့်လိုက်သည်။ သူ့မျက်လုံးများထဲ ထူးဆန်းသောအလင်းများဖြင့် ဝင်းလက်သွားသည်။

ဤကိစ္စနှင့် ပတ်သက်၍ တစ်ခုခု လွဲမှားနေသကဲ့သို့ သူ ခံစားလိုက်ရသည်။

သူတော်စင်ကြယ် အမှန်တကယ်သေသွားသည်မှာ သေချာသည်။ ကောင်းကင်နန်းတော်တစ်ဆောင်နှင့် နှစ်ဆောင်အကြား ကွာခြားချက်က ကြီးမားလှသည် မဟုတ်ပါလား။

သို့သော်လည်း သူတော်စင်ကြယ်၏အဖေ ပေါ်မလာခဲ့ပေ။

ယင်းသည် ကျိုးကြောင်းဆီလျော်ခြင်း မရှိပေ။ သွေးယဇ်ပူဇော်ပွဲတွင် သူတော်စင်ကြယ်၏ အဖေက သူတော်စင်ကြယ်အတွက် အရာအားလုံး လုပ်ဆောင်ခဲ့ပုံရသည်။ ယခုတွင် သူတော်စင်ကြယ် သေသွားပြီး သူ့အဖေကို မမြင်ရပေ။

တစ်ခုခု လွဲမှားနေလေပြီ။

တခြားတစ်ခုမှာ သူတော်စင်ကြယ်က မူမမှန်စွာ ပြုမူနေခဲ့သည်။ အစမှအဆုံးတိုင်အောင် စကားတစ်ခွန်း မပြောခဲ့ပေ။ သူ၏စူးစူးဝါးဝါး အော်ဟစ်သံများသည်ပင် ဗလုံးဗထွေးဖြစ်နေခဲ့ပြီး ယခင်ကကဲ့သို့ စူးရှပြတ်သားခြင်း မရှိပေ။

ယင်းသည် ရွှီချင်း သိသည့် သူတော်စင်ကြယ်နှင့် ကွာခြားသည်။

ရွှီချင်း၏မျက်လုံးများ မှေးသွားသည်။ သူ၏ဘယ်လက်ကို ရုတ်တရက် မြှောက်လိုက်ပြီး သူတော်စင်ကြယ်၏ခေါင်းကို မေးစေ့နေရာမှ ဖမ်းဆုပ်လိုက်သည်။ ထို့နောက် မေးစေ့ကို အတင်းအကြပ် ဆွဲဖြဲလိုက်သည်။

ပါးစပ်ကြီး ပွင့်လာသည်။

ရွှီချင်း ဝေ့ကြည့်လိုက်ပြီး သူ၏မျက်လုံးများထဲ နားလည်ရခက်သောအမူအရာတစ်ခု ပေါ်လာသည်။

သူတော်စင်ကြယ်မှာ လျှာမရှိပေ။

သူတော်စင်ကြယ်နှင့် ပတ်သက်၍ ရွှီချင်း အမှတ်မိဆုံးမှာ ရွှမ်လင်းယုံလီတံခါးကို ဖွင့်လိုက်ပြီးနောက် ပေါ်လာသည့် အကျိအချွဲများနှင့် လျှာကြီး ဖြစ်သည်။ နောက်ပိုင်းတွင် ထိုတံခါးကို ဖွင့်လိုက်သည့်အခါ လူတစ်ယောက်၏ စိတ်နှလုံးသားကို ရောင်ပြန်ဟပ်ကြောင်း သူ သိခဲ့ရသည်။

ထိုလျှာကြီးသည် သူတော်စင်ကြယ်၏ နှလုံးသားကို ကိုယ်စားပြုသည်။

ယင်းသည် တိုက်ဆိုင်မှုတစ်ခုသာ ဖြစ်ကောင်းဖြစ်ပေမည်။ သို့သော် သေသွားသော သူတော်စင်ကြယ်မှာ လျှာမရှိပေ။

ထိုအချိန်၌ ကောင်းကင်ယံတွင် တုန်လှုပ်ချောက်ချားစရာကောင်းသော ပေါက်ကွဲသံကြီး မြည်ဟည်းသွားသည်။ ကြောက်ခမန်းလိလိ စွမ်းအင်အငွေ့အသက်များ ပျံ့လွင့်လာသည်။

ထိုပေါက်ကွဲသံကြီးသည် အမှတ်ခုနစ်သခင်ကြီးနှင့် တိုက်ခိုက်နေသော ကျောက်လူသားကြီးထံမှ လာပေသည်။

ကျောက်လူသားကြီးသည် နောက်ထပ် တောင့်မခံနိုင်တော့ပေ။ ၎င်း၏ခန္ဓာကိုယ်တစ်ပိုင်းမှာ မရေမတွက်နိုင်သော အစိတ်အပိုင်းများအဖြစ် ပျက်စီးသွားပြီး ကျယ်လောင်သော မြည်ဟည်းသံများနှင့်အတူ မြေပြင်သို့ ကျဆင်းသွားကာ ကျဉ်းနက်ကြီးများ ဖြစ်လာသည်။ ကျောက်လူသားကြီး၏ ခန္ဓာကိုယ်ထဲတွင် မြှုပ်နှံထားသော အနက်ရောင်ခေါင်းတလား၏ တစ်ဝက်ကျော် ပေါ်လာသည်။

နေရောင်ခြည်အောက်တွင် အနက်ရောင်ခေါင်းတလားက သွေးပျက်စရာခံစားချက်ကို ဖြစ်စေသည်။ ခေါင်းတလားကြီးဆီမှ လက်သည်းခြစ်သံများပင် လွင့်ပျံလာသည်။

ရွှီချင်း၏ မျက်လုံးများ မှေးသွားသည်။

အလင်းတမန်အဖွဲ့ဝင်များ သွေးရူးသွေးတမ်း ဖြစ်လာကြသည်။ သူတို့သည် ဆုံးဖြတ်လိုက်သောအကြည့်ဖြင့် မန္တန်လက်ကွက်များ ဖော်လိုက်ရာ ကျောက်လူသားကြီး၏ ဗိုက်ပေါ်ရှိ ခေါင်းတလားကြီးက တုန်ခါလာသည်။

လူသားတစ်ယောက်အသံနှင့် မဆင်ဘဲ တောရိုင်းတစ်ကောင်၏အသံနှင့် ဆင်သော အော်ဟစ်သံကြီး ခေါင်းတလားထဲမှ လွင့်ပျံလာပြီး အရပ်မျက်နှာအနှံ့ ပျံ့လွင့်သွားသည်။

ထိုအော်ဟစ်သံဖြင့်ပင် ချီရွှဲ့ထုံဂိုဏ်းသားများစွာ တုန်ခါသွားကြသည်။ သူတို့ပါးစပ်များနှင့် နှာခေါင်းများမှ သွေးများ ပန်းထွက်လာကြပြီး အနားတိုးမကပ်ဝံ့ဘဲ အလျင်အမြန် နောက်ဆုတ်သွားကြသည်။

ထိုအသံတွင် လူတစ်ယောက်၏ ဝိညာဉ်နှင့် စိတ်ကို တုန်ခါသွားစေနိုင်သော ဖော်ပြ၍ မရနိုင်သည့် စွမ်းအားတစ်ခု ပါဝင်နေပြီး ဇီဝကမ္မဖြစ်စဉ်များကို ဖိနှိပ်ကာ ကြောက်လန့်တုန်ရီသွားစေနိုင်သည်။

ခေါင်းတလားကြီးထဲရှိ အရာက အပြင်ထွက်ရန် ကြိုးစားနေသည့်အလား လက်သီးများဖြင့် ထုသံများ လေထဲ ပျံ့လွင့်လာသည်။

ထိုမြင်ကွင်းသည် ဘေးပတ်လည်ရှိ ဂိုဏ်းသားများကို အံ့အားသင့်သွားစေသည်။ အမှတ်ခုနစ်သခင်ကြီး၏ မျက်လုံးများ မှေးသွားပြီး ရွှယ်လျန့်ကျစ်၏ မျက်လုံးများထဲတွင် ထူးဆန်းသောအလင်းများဖြင့် ဝင်းလက်သွားသည်။

လူအားလုံး လှမ်းကြည့်လိုက်ကြသည့်အချိန်မှာပင် ခေါင်းတလားအဖုံးမှာ အစိတ်စိတ်အမြွှာမြွှာ ဖြစ်သွားသည်။

မရေမတွက်နိုင်သော အစိတ်အပိုင်းများ အရပ်မျက်နှာအနှံ့ လွင့်ပျံသွားပြီး ခေါင်းတလားကြီးဆီမှ အလွန် အားကောင်းသော နတ်စွမ်းအား ထွက်ပေါ်လာသည်။

ထိုစွမ်းအင်အငွေ့အသက်များသည် ကြောက်ခမန်းလိလိ ဖိအားတစ်ရပ်ကို ဆောင်ကြဉ်းလာသည်။ ထိုစွမ်းအားပေါ်လာသည်နှင့် ကောင်းကင်ကြီး အရောင်ပြောင်းလဲသွားသည်။

ကောင်းကင်ယံတွင် ရောင်စုံဝင်းလက်သွားပြီး တိမ်နှင့်လေပြင်းများ တရွှီရွှီ တိုက်ခတ်လာသည်။ ကောင်းကင်ယံတွင် ဧရာမလေပွေကြီးတစ်ခု ပေါ်လာပြီး နေ့မှ ညအဖြစ်သို့ ပြောင်းလဲသွားသည်။

လျှပ်စီးတန်းများ ပြိုးပြိုးပြက်ပြက် ဝင်းလက်လာပြီး မိုးခြိမ်းသံ မြည်ဟည်းလာသည်။

ထို့နောက် ခေါင်းတလားထဲမှ လူသားတစ်ယောက်၏ လက်နှင့် မတူသော အရိုးပေါ်အရေတင် လက်ကြီးတစ်ဖက် ထွက်လာပြီး ခေါင်းတလားအစွန်းကို ဖိလိုက်သည်။ ထို့နောက် တဖြည်းဖြည်း ထရပ်လိုက်ရာ ချောက်ချားစရာခန္ဓာကိုယ်တစ်ခု ပေါ်လာသည်။

ထိုခန္ဓာကိုယ်တွင် ဒဏ်ရာများစွာ ရှိနေပြီး အရိုးများကိုပင် မြင်ရသည်။ မည်သည့်ခေတ်ကတည်းက သေသွားမှန်း မသိရသော အလောင်းတစ်လောင်းနှင့် ဆင်တူသည်။

ထိုခန္ဓာတွင် ဆံပင်များမရှိတော့သည့်အပြင် မျက်နှာအရေပြားများလည်း ပျက်စီးသွားခဲ့ပြီဖြစ်ရာ မျက်တွင်းဟောက်ပက်ကြီးနှင့် ပါးစပ်မှ တွဲကျနေသော အနီရဲရဲလျှာကြီးတစ်ခုသာ ရှိသည်။

လျှာအရောင်က ပုံမှန်အလောင်းကောင်များ၏လျှာအရောင်နှင့် လုံးလုံးလျားလျား ကွဲပြားသည်။ တစ်စုံတစ်ယောက်နှင့် ပေါင်းစည်းထားသည့်အလားပင်။ အလောင်းကြီး ထရပ်လိုက်သည်နှင့် ကောင်းကင်ယံတွင် လျှပ်စီးများ ပေါက်ကွဲသွားပြီး ငွေရောင်မြွေလေးများအဖြစ် ပြောင်းလဲကာ လောကကြီးကို ခဏတာ အလင်းပေးလိုက်သည်။

၎င်း၏ဟောက်ပက်ဖြစ်နေသော မျက်လုံးကြီးနှစ်လုံးနေရာမှ တစ္ဆေမီးတောက်ကြီးနှစ်ခု တောက်လောင်လာသည်။ ရွှီချင်း၏မျက်လုံးများကို ကျဉ်းမြောင်းသွားစေသည်မှာ အလောင်း၏ လျှာကြီးပင်။

ထိုအနီရဲရဲလျှာကြီးသည် သူတော်စင်ကြယ်၏ ပါးစပ်မှ ပျောက်သွားသောလျှာကြီး ဖြစ်သည်။

အလောင်းထံမှ ထွက်ပေါ်နေသော နတ်စွမ်းအားက ချောက်ချားစရာကောင်းသည်။ ယခုလောလောဆယ်တွင် ၎င်း၏မျက်လုံးများထဲရှိ တစ္ဆေမီးတောက်များက ရွှေရောင်အလင်းများဖြင့် ဝင်းလက်တောက်ပလာသည်။

ထိုအလင်း ပေါ်လာသည်နှင့် အလောင်းထံမှ နတ်စွမ်းအားများ ပို၍ အားကောင်းလာပြီး ကောင်းကင်နှင့်မြေပြင် တုန်ခါလာသည်။ ဓာတ်နှောများ အရူးအမူး ဖြစ်တည်လာပြီး အနက်ရောင်မိုးများ ရွာသွန်းလာသည်။

ထိုအလောင်းကြီးသည် နတ်ဘုရားတစ်ပါးအလားပင်။

သို့သော်လည်း အမှန်စင်စစ် ယင်းမှာ နတ်ဘုရားတစ်ပါးနှင့် မဆင်တူပေ။ နတ်အစွမ်းသာ ရှိပေသည်။

မည်မျှပင် နတ်စွမ်းအား များပြားစွာ ရှိနေစေကာမူ နတ်ဘုရားနှင့် ဆင်တူနေသည့်တိုင်အောင် နတ်ဘုရားတစ်ပါး ဖြစ်လာမည် မဟုတ်ပေ။

ကွာခြားချက်က မြူခိုးနှင့် ရေခဲပမာပင်။

အလောင်းကြီးက အချိန်မရွေး ပေါက်ကွဲနိုင်သည့်အလား အလောင်းကြီးဆီမှ မတည်ငြိမ်သော အငွေ့အသက်များ ပေါ်ပေါက်လာသည်။

သိသာထင်ရှားစွာပင် အလောင်းကြီးက ထိုသိပ်သည်းထူထပ်သော နတ်စွမ်းအားကို ကျွမ်းကျင်ပိုင်နိုင်ခြင်းမရှိသေးပေ။

ထိုအလောင်းကြီးသည် အမျိုးအမည်မသိသော သတ္တဝါတစ်ကောင်အဖြစ် ပေါင်းစည်းဖန်တီးထားခြင်း ဖြစ်သည်ဟု ရွှီချင်း ခံစားနေရသည်။

ကြည့်မိရုံဖြင့် ရွှီချင်း၏မျက်လုံးများ နာကျင်လာရသည်။ ထိုအလောင်းကြီးကို သူ တည့်တည့် မကြည့်နိုင်သည့်အလားပင်။

“ ဒါက … အလင်းတမန်အဖွဲ့ ကျွမ်းကျင်တဲ့ နတ်ဘုရားရဲ့စွမ်းအားဆိုတာလား ”

အမှတ်ခုနစ်သခင်ကြီး ခပ်တိုးတိုး ရေရွတ်လိုက်သည်။

“ အဲဒါကို ငါ လေ့လာနေတာ အချိန်အတော်ကြာပြီ ”

“ အလင်းတမန်အဖွဲ့၊ ဒီလောက်ကြီးကျယ်တဲ့ ရွှေ့ကွက်။ တကယ့်ကို နတ်ဘုရားကို ဖန်တီးနေတာပဲ။ ငါ ခန့်မှန်းထားတာနဲ့ နည်းနည်း လိုနေသေးတာ ကံမကောင်းတာပဲ ”

“ ဘိုးဘေး၊ အလင်းတမန်လာဖို့ မဖြစ်နိုင်တော့ပါဘူး။ ကျုပ်တို့ စီစဉ်ထားတဲ့အစီအစဉ်အတိုင်း ပိုက်ကွန်ထဲက ငါးမျှားကြိုးကို ပြတ်သိမ်းလို့ရပါပြီ။ ကျုပ်တို့ ဒီအလင်းတမန်နတ်ဘုရားမျိုးစိတ်ကို ဖိနှိပ်ပြီး ဂိုဏ်းရဲ့အုတ်မြစ်ဖြစ်အောင် လုပ်ရပါမယ် ”

အမှတ်ခုနစ်သခင်ကြီး၏ စကားသံများ ဟိန်းထွက်သွားစဉ်မှာပင် အလောင်းကြီးသည် ခေါင်းနောက်လှန်၍ ဟိန်းဟောက်လိုက်သည်။ နတ်စွမ်းအားများ ထွက်ပေါ်လာပြီး ပတ်ဝန်းကျင်ရှိ ဓာတ်နှောများ အရူးအမူး ပြေးဝင်လာသည်။ အလောင်း၏ တည်ရှိမှုက ကြောက်စရာကောင်းသည်။ ခြေလှမ်းတစ်လှမ်းဖြင့် ချီရွှဲ့ထုံဂိုဏ်း၏ တားမြစ်ဓမ္မရတနာ အချုပ်အနှောင်ကို လျစ်လျူရှုကာ လေထဲသို့ ပျံတက်သွားပြီး ထွက်ခွာရန် ပြင်လိုက်သည်။

အလောင်း၏ရှေ့တွင် ရွှယ်လျန့်ကျစ် ရိပ်ခနဲ ပေါ်လာပြီး မရေမတွက်နိုင်သော သွေးအမျှင်တန်းများကို ဧရာမလက်သီးကြီးအသွင် စုစည်း၍ ထိုးနှက်လိုက်သည်။

အလောင်း၏မျက်လုံးများထဲ ရွှေရောင်ဝင်းလက်သွားပြီး လေထုကြီး ရှုံ့တွသွားသည်။ ရွှယ်လျန့်ကျစ်၏ လက်သီးကြီးက အလောင်းကို ထိုးနှက်သွားပါသော်လည်း မတူညီသော လောကများတွင် တည်ရှိနေကြသည့်အလား ရွှယ်လျန့်ကျစ်၏လက်သီးကြီးက အလောင်းကို ဖြတ်ကျော်သွားသည်။

သို့သော်လည်း လေထဲတွင် သခင်မကြီး တုံယုံ ရုတ်တရက် ပေါ်လာသည်။ သခင်မကြီးတုံယုံသည် ရောက်နေသည်မှာ ကြာပြီဖြစ်ပြီး ပုန်းအောင်းနေသည်မှာ သိသာသည်။ သူမ၏မျက်လုံးများထဲတွင် မယုံကြည်နိုင်ခြင်းများဖြင့် ပြည့်နှက်နေသည်။

“ ရွှယ်လျန့်ကျစ်၊ ရှင့်သားမက် ပြောတာမှန်တယ်။ အလင်းတမန်အဖွဲ့က နတ်ဘုရားကို ဖန်တီးနေတာ။ ဒါပေမဲ့ သူတို့ မအောင်မြင်ဘူး။ သူတို့ ဖန်တီးတာက စွမ်းအင်မလုံလောက်လို့ ထိန်းချုပ်လို့မရဘူး။ နတ်စွမ်းအားကြောင့် အဲဒါ အရည်ပျော်နေပြီ ”

သခင်မကြီးတုံယုံသည် ပြောလိုက်ရင်း ထူးဆန်းသောအလင်းများ ဝင်းလက်နေသည့်အကြည့်ဖြင့် ညာလက်ကို ဆန့်ထုတ်လိုက်သည်။

သခင်မကြီးတုံယုံ၏ မျက်လုံးများထဲ တာအိုအမျှင်တန်းများ စီးဆင်သွားစဉ် အလောင်းပတ်လည်ရှိ ဟင်းလင်းပြင်မှာ ပျက်စီးသွားဟန်တူသည်။ တချိန်တည်းမှာပင် ရွှယ်လျန့်ကျစ်မှ ဖြစ်လာသော သွေးအမျှင်တန်းများသည် နောက်သို့ လိမ့်လာပြီး အလောင်းရှိနေသည့် ဟင်းလင်းပြင်ထဲသို့ တိုးဝင်သွားသည်။

သခင်မကြီးတုံယုံနှင့် ရွှယ်လျန့်ကျစ်တို့ တိုက်ခိုက်လိုက်သည်ဖြစ်၍ တဂျိမ်းဂျိမ်းမြည်ဟည်းသံများ ပြည့်နှက်သွားသည်။ အမှတ်ခုနစ်သခင်ကြီး၏ မျက်လုံးများ ဝင်းလက်သွားပြီး မန္တန်လက်ကွက်များ ဖော်လိုက်သည်။ ရုတ်တရက် ကောင်းကင်ကြီး ဝေဝါးသွားပြီး တိုက်ပွဲကွင်းပြင်ထဲသို့ ဧရာမသွေးသစ်ပင်ကြီးတစ်ပင် ဆင်းသက်လာသည်။ သွေးသစ်ပင်ကြီးသည် ယိမ်းခါသွားပြီး အချုပ်အနှောင်အမှတ်အသားတစ်ခုအဖြစ် ပြောင်းလဲသွားသည်။

တချိန်တည်းမှာပင် ဘိုးဘေးရုပ်ထုဆယ့်လေးခုမှ စွမ်းအားအပြည့် ပေါက်ကွဲထွက်လာပြီး ကောင်းကင်ယံရှိ ချီရွှဲ့ထုံဂိုဏ်း၏ တားမြစ်ဓမ္မရတနာက စွမ်းအားအပြည့် ထုတ်လွှတ်လိုက်သည်။ တားမြစ်ကြေးမုံပြင်ကြီးသည် သွေးနီရောင်ပြောင်းကာ မျက်လုံးကြီးခုနစ်လုံးနောက်တွင် နောက်ထပ်မျက်လုံးခုနစ်လုံး ပေါ်လာသည်။

မျက်လုံးဆယ့်လေးလုံး ပွင့်လာပြီး တိုက်ပွဲကွင်းပြင်ရှိ အလောင်းကြီးကို စူးစိုက်ကြည့်လိုက်သည်။ ဧရာမရှေးဟောင်းကြေးမုံပြင်ကြီးသည် စူးရှတောက်ပသော အနီရောင်အလင်းတန်းကို ထုတ်လွှတ်လိုက်ပြီး ချုပ်နှောင်စွမ်းအားတစ်ခုအဖြစ် ပြောင်းလဲသွားပြန်သည်။

တားမြစ်ဓမ္မရတနာနှစ်ခု၏ စွမ်းအားများအောက်တွင် မြေပြင်ရှိ ကျန်နေသော အလင်းတမန်အဖွဲ့ဝင်များဖြစ်စေ၊ မျက်နှာဖုံးတပ်ထားသော ဝတ်ရုံနက်နှစ်ယောက်ဖြစ်စေ သူတို့ခန္ဓာကိုယ်များ ပြင်းထန်စွာ တုန်ရီလာသည်။ သူတို့ခန္ဓာကိုယ်များ ဖိနှိပ်ခံလိုက်ရပြီး သူတို့ပါးစပ်များမှ သွေးများ စီးကျလာသည်။ မြေပြင်ပေါ်သို့ လဲကျသွားကာ မရုန်းကန်နိုင်တော့ဘဲ မလှုပ်မယှက် ဖြစ်သွားသည်။

ယင်းသည် ဤစစ်ဆင်ရေးအတွက် အမှတ်ခုနစ်သခင်ကြီး၏ အစီအစဉ် ဖြစ်သည်။

သူ၏အစီအစဉ်မှာ ဘယ်တော့မှ ရည်ချက်ချက်တစ်ခုတည်း မရှိတတ်ပေ။ သူသည် ဤအတောအတွင်း အလင်းတမန်အဖွဲ့၏အကြောင်းများကို လေ့လာနေခဲ့ပြီး နောက်ဆုံးတွင် သဲလွန်စရသွားခဲ့သည်။

ထိုသဲလွန်စပေါ် အခြေခံ၍ ယင်ဟွမ်ပြည်နယ်ထဲရှိ အလင်းတမန်အဖွဲ့၏ နောက်ဆက်တွဲအစီအမံများကို အမှတ်ခုနစ်သခင်ကြီး ခပ်ရေးရေး ခန့်မှန်းမိသွားသည်။ ထိုသို့ဖြင့် ယနေ့တိုက်ပွဲ ပေါ်ပေါက်လာရခြင်း ဖြစ်သည်။ အလင်းတမန်အဖွဲ့ခေါင်းဆောင်သာ ရောက်လာပါက ဓားကိုင်ရုံးခွဲ လှုပ်ရှားမည် ဖြစ်သည်။

အလင်းတမန်အဖွဲ့ခေါင်းဆောင်သာ ရောက်မလာခဲ့လျှင် သူ၏ဆန်းစစ်ချက်အရ ဤနေရာတွင် အလင်းတမန်အဖွဲ့ ချန်ခဲ့သော အရာတစ်ခုခု ရှိရပေမည်။ ထိုပစ္စည်းသည် နတ်ဘုရားနှင့် ဆက်နွှယ်နေရပေမည်။ သူသာ ရရှိလိုက်ပါက အလင်းတမန်အဖွဲ့အစည်းကို သူ ပို၍ နားလည်သွားမည် ဖြစ်သည်။

ယခုအချိန်မှစ၍ အလင်းတမန်အဖွဲ့က သူ၏ရန်သူတော်ကြီး ဖြစ်လာခဲ့သည်ဖြစ်၍ ယခင်က အဏ္ဏဝါရုပ်အလောင်းမျိုးနွယ်အား လေ့လာခဲ့သလိုမျိုး အလင်းတမန်အဖွဲ့ကို သူ လေ့လာရမည် ဖြစ်သည်။

တစ်ခါက ခေတ်ကြီးတစ်ခေတ် ရောက်လာပြီး ပါရမီရှင်များ ပေါ်ထွက်လာမည်ဟု ရွှီချင်းကို အမှတ်ခုနစ်သခင်ကြီး ပြောခဲ့ဖူးသည်။

သို့သော်လည်း ခေတ်ကြီးက ယခုမှ ရောက်လာသည် မဟုတ်ပေ။ လွန်ခဲ့သော နှစ်ရာဂဏန်းခန့်က ရောက်နေခဲ့ပြီ ဖြစ်ပြီး ဤခေတ်ကြီးတွင် အမှတ်ခုနစ်သခင်ကြီးသည်လည်း ထူးချွန်သော ပါရမီရှင်တစ်ယောက် ဖြစ်သည်။

ဤလောကကြီးထဲတွင် ဘယ်သေသာအခါမှ ပြိုင်စံရှားပါရမီရှင် အနည်းအကျဉ်းသာ ရှိမည် မဟုတ်ပေ။

ဤသည်ကား ကြီးကျယ်ခမ်းနားသော ခေတ်ကြီး ဖြစ်ပေသည်။