ကုန်းယွမ်၏ယုတ်မာသောရည်မှန်းချက်.....

ကိုယ်စားအုပ်ချုပ်သူက ရှင်းရှင်းလင်းလင်းပြောသော်လည်း ထိုစကားများအောက်တွင် တရားခံအစစ်ကို လက်ညှိုးထိုးရန် ရည်ရွယ်ချက်ရှိနေသည်။ ဤ ထိတ်လန့်တုန်လှုပ်မှုသည် မင်းသမီးအား အံ့အားသင့်သွားစေပြီး သူမအမြဲပိုင်ဆိုင်ထားသော ကျက်သရေရှိသော အမူအရာလဲ ပြိုကွဲသွားခဲ့သည်။ သူမသည် ဖြူဖပ်ဖြူရော်ဖြစ်ပြီး နေရာတွင်ပင် လဲကျသွားသည်။

ကိုယ်စားအုပ်ချုပ်သူ၏စကားများသည် သူမအတွက် ရိုးရှင်းလွန်းလှပြီးသူ့နှလုံးသားရဲ့ အနက်ရှိုင်းဆုံး အစိတ်အပိုင်းတွေကို လုံးလုံးလျားလျား ရိုက်ခတ်သွားခဲ့သည်။

ကိုယ်စားအုပ်ချုပ်သူ၏ ရည်ရွယ်ချက်များ မကောင်းမွန်ကြောင်း သူမ သိသော်လည်း ယုတ္တိရှိသော ရှုထောင့်မှကြည့်လျှင် သူ့စကားများက လုံးလုံးလျားလျား အဓိပ္ပါယ်မဲ့ပုံမပေါ်ပေ။ ကုန်းကျင်းယောင် ဖြစ်ပျက်ခဲ့သည့် ထူးဆန်းသော အသွင်အပြင်သည် သူမ ကိုယ်တိုင်တွေ့မြင်နေရသည်မဟုတ်လော.....

အချိန်အနည်းငယ်မျှဖြင့် လူတစ်ယောက်၏ လိင်ကွဲပြားမှုကို ပြောင်းလဲနိုင်စွမ်းမရှိပေ။

ကုန်းကျင်းယောင်၏အစ်မအနေဖြင့်၊ သူမသည် မကြာခဏဆိုသလို သူ့ကိုဂရုစိုက်လေ့ရှိပြီး ရံဖန်ရံခါတွင် ထူးခြားသောဝိသေသလက္ခဏာအချို့ကို တွေ့ရှိခဲ့သည်။ ဥပမာအားဖြင့်၊ သူသည် အရပ်မြင့်ပြီး ပိန်လှီကယ အသားအရည်လည်း အလွန်ဖြူသည်။ သူ၏ကိုယ်ရည်ကိုယ်သွေးသည် အလွန်နူးညံ့ပုံပေါက်ပြီး သူ၏မျက်နှာအသွင်အပြင်သည် အချိန်ကြာလာသည်နှင့်အမျှ မိန်းမဆန်လာသည်။

သေချာစဉ်းစားကြည့်ရင်တော့ လီလော့ကို ကြာနက်အဆိပ် သန့်စင်ပေးဖို့ သူမတောင်းဆိုတဲ့ အချိန်ကတည်းက ဒီအပြောင်းအလဲတွေ စတင်ဖြစ်ပေါ်လာခြင်းပင်.....

ဤအဖြစ်အပျက်များသည် ကိုယ်စားအုပ်ချုပ်သူရဲ့စကားနဲ့ အတိအကျ လိုက်လျောညီထွေဖြစ်ပြီး သူမရဲ့နှလုံးသား နစ်မြုပ်သွားခဲ့လေပြီ.....

ကုန်းကျင်းယောင်၏ လိင်အမျိုးအစားကို မွေးကတည်းက ဖခင်ဖြစ်သူမှ ဖုံးကွယ်ထားခဲ့ခြင်း ဖြစ်နိုင်ပါသလား... နိုင်ငံတော်ကာကွယ်ရေး၀င်္ကပါကို လှည့်ဖြားဖို့လား....

ဒီလိုသာဆိုရင် သူဘာလို့ ဒီအရေးကြီးတဲ့အချက်ကို ဘယ်တုန်းကမှ မပြောခဲ့တာလဲ.....

သူမသည် ထူးဆန်းသော အဆိပ်ကို သုတ်သင်ရန် နှစ်ပေါင်းများစွာ ကြိုးစားခဲ့ပြီး သမားတော်များကို ကျယ်ကျယ်ပြန့်ပြန့် ရှာဖွေခဲ့သည်။ သူမဟာ ကျင်းယောင်ကိုရော

သူ့အဖေရဲ့ ခမ်းနားတဲ့ အစီအစဉ်ကိုပါလုံးလုံးလျားလျား ဖျက်ဆီးခဲ့မိပြီလား....

ပုံမှန်အားဖြင့် တောက်ပပြီး ယုံကြည်မှုရှိသော ဖီးနစ်မျက်လုံးများအတွင်းတွင် စိတ်ဓာတ်ကျနေသော နက်ရှိုင်းသောအကြည့်များ ပေါ်လာသည်။

တစ်စုံတစ်ခုကို ပြီးမြောက်အောင် ကြိုးပမ်းအားထုတ်မှု အားလုံးကို အစကတည်းက မှားယွင်းနေမှန်း သိလိုက်ခြင်းထက် ပိုစိတ်ပျက်စရာ ဘာမှ မရှိတော့ပေ။

မင်းသမီး ဘာလုပ်ရမှန်းမသိအောင် စိတ်ဓာတ်ကျနေခဲ့သည်။

မင်းသမီးသည် မိမိကိုယ်ကို သံသယစိတ်ဖြင့် ဖုံးကွယ်ထားသော်လည်း ကုန်းကျင်းယောင် ၏ပြောင်းလဲမှုကို အခြားလူတိုင်းက ရှာဖွေတွေ့ရှိခဲ့ပြီး ၎င်းတို့အားလုံး ထိတ်လန့်ကာ မယုံကြည်နိုင်ဖြစ်ခဲ့ကြသည်။

“အိုး!”

ပရိတ်သတ်တစ်ခုလုံး လှိုင်းလုံးကြီးကဲ့သို့ ရုတ်ရုတ်သဲသဲ ဖြစ်ကုန်ကြသည်။

“ဒါ…”

လီလော့သည်ပင် အံကြိတ်မိလိုက်ပြီး သူ့မျက်နှာက သိသိသာသာ ပြောင်းလဲသွားသည်။ တခြားသူတွေက ဒီအပြောင်းအလဲကြောင့် အံ့အားသင့်နေချိန်မှာတော့ သူလည်း ရုတ်တရက် ထိတ်လန့်တုန်လှုပ်နေခဲ့ပါသည်။

ကြာနက်အဆိပ်ကို သန့်စင်လိုက်သောအခါ ဧကရာဇ်ငယ်လေး ပို၍ဣတ္ထိယဆန်လာသည်မှာ အံ့သြစရာမဟုတ်တော့ပေ။

ဒီတော့ သူက ယောက်ျားလေးမဟုတ်ဘူးပေါ့.....

ဧကရာဇ်ငယ်သည် ယခုအခါ လုံးဝဖွံ့ဖြိုးပြီး မိန်းမပျိုအဖြစ်သို့ ပြောင်းလဲသွားခဲ့ပြီဖြစ်သည်။ သူမသည် ဆယ်နှစ်သာရှိသေးသော်လည်း ယင်ယန်ကြာစိမ်းသည် သူမ၏ခန္ဓာကိုယ်ကြီးထွားမှုကို လှုံ့ဆော်ပေးခဲ့ပြီး ယခုအခါ အရွယ်ရောက်ပြီးသူတစ်ယောက်လိုပင်......

အသွင်ပြောင်းပြီးနောက်ပိုင်း ခြားနားချက်ကို လူတိုင်း ပြတ်ပြတ်သားသား ပိုင်းခြားနိုင်နေပြီဖြစ်သည်။

"ဒါက အရင်ဧကရာဇ်ရဲ့ အစီအစဉ်လား... "

ကျန်းချင်းအာက မျက်မှောင်ကြုတ်ကာ မေးလိုက်သည်။

"မဖြစ်နိုင်ဘူးထင်လို့လား?"

လီလော့ ခါးသီးစွာ ရယ်မောလိုက်သည်။

အရင်ဧကရာဇ်သည် သမီးတော်ကို သားတော်အဖြစ် ပြောင်းလဲပစ်ရလောက်အောင် အာဏာအတွက်ရုန်းကန်ဖို့လိုအပ်ပါသလား.....

"ဒီလိုပညာရပ်မျိုး ကမ္ဘာပေါ်မှာ ရှိကောင်းရှိနိုင်ပေမယ့် မြို့စားအဆင့်တွေ လုပ်နိုင်တဲ့အရာတော့ မဟုတ်ဘူး....တကယ်တော့ သာမန်ဘုရင်အဆင့် ကျွမ်းကျင်သူတွေသာလုပ်နိုင်လောက်မှာ" ဟု ချီချန်းက ရှင်းပြခဲ့သည်။

"ဒါက လှည့်စားမှုများလား...."

လီလော့ မယုံကြည်နိုင်စွာ မေးလိုက်သည်။ တစ်နှစ်ပတ်လုံး ကုသပေးခဲ့သော ကောင်လေးသည် မိန်းကလေးသို့ ရုတ်တရက် ပြောင်းလဲသွားသည်ကို သူလည်း လက်ခံဖို့ခက်ခဲနေသည်။

"ဒီမှာ မရေမတွက်နိုင်တဲ့ မြို့စားအဆင့်တွေ ရှိတယ်-...ငါတို့အားလုံးကို လှည့်စားမှုတစ်ခုနဲ့ တစ်ပြိုင်နက် ဘယ်လို လှည့်စားနိုင်မလဲ...

လီလော့၊ မင်း အဖြစ်မှန်ကို လက်ခံဖို့ သင်ယူရမယ်" လို့ ချီချန်းက ပြန်ဖြေခဲ့သည်။

လီလော့ အသက်ပြင်းပြင်းရှူသွင်းပြီးရယ်မောလိုက်သည်။

"အင်း၊ အခြေအနေကတော့ ဘေးကြပ်နံကြပ်ဖြစ်နေပြီ....."

ဧကရာဇ်ငယ် မိန်းမပျိုလေးအဖြစ်သို့ ပြောင်းလဲလာသောအခါ၊ နိုင်ငံတော်ကာကွယ်ရေး၀င်္ကပါဿိ ထိန်းချုပ်ရန် သူတို့၏အစီအစဉ်သည်လည်း ရေစုန်မြောခဲ့ချေပြီ။ ၀င်္ကပါကို မထိန်းချုပ်နိုင်သော ဧကရာဇ်သည် အုပ်ချုပ်ပိုင်ခွင့်မရှိပေ။

ယနေ့ နန်းတက်ပွဲသည် မလွဲမသွေ ချောချောမွေ့မွေ့နှင့် ရိုးရှင်းစွာ မပြီးမြောက်ခဲ့ပေ။

လီလော့၏နှလုံးသား လေးလံသွားသလို ခံစားလိုက်ရသည်။ လော့လန်အိမ်တော်သည် မင်းသမီး၏ဘက်တွင် ရှိနေပြီး ကုန်းယွမ်နှင့် ၎င်းတို့၏ ဆက်ဆံရေးသည် သွေးစွန်းသော ရန်စအဆင့်သို့ မရောက်သေးသော်လည်း၊ ၎င်းတို့သည် သူ့မျက်လုံးထဲတွင် ဆူးပင်ဖြစ်နေဆဲပင်။ အကယ်၍ ကိုယ်စားအုပ်ချုပ်သူသာ အာဏာရခဲ့ပါက၊ သူ့မိဘများ အမြန်ပြန်မလာနိုင်လျှင် လော့လန်အိမ်တော်၏ အနာဂတ်သည် ဆိုးရွားသွားမည်ဖြစ်သည်။

လီလော့ အခြေအနေကို ဆက်လက်တွေးတောနေစဉ်၊ အကြီးတန်းအရာရှိအချို့သည် တဖြည်းဖြည်း မတ်တပ်ထရပ်ကာ မင်းသမီးကို စိုက်ကြည့်ရင်း ဒေါသတကြီးဖြင့်....

" မင်းသမီး၊ ဘာတွေဖြစ်ကုန်တာလဲ... မင်း ငါတို့ကို ဖြေရှင်းချက်ပေးမှဖြစ်မယ်...!"

၎င်းတို့သည် ကုန်းကျင်းယောင်ကို ဧကရာဇ်အဖြစ် ထောက်ခံအားပေးခဲ့ကြသော အကြီးတန်းအရာရှိများဖြစ်သည်။ သို့သော် ဤရုတ်တရက် လိင်ပြောင်းလဲမှုသည် ၎င်းတို့အား လုံးဝအံ့အားသင့်စေခဲ့ပြီး အလွန်အမင်း ဒေါသထွက်ခဲ့ကြသည်။

၎င်းတို့သည် ထင်ရှားသော အာဏာအင်အားကို ပိုင်ဆိုင်ထားပြီး တော်ဝင်မိသားစုကို ပံ့ပိုးပေးသူများထဲတွင် အလွန်အရေးပါသော အုပ်စုဖြစ်သည်။ ယခုတော့ သံသယတွေကြောင့် တော်ဝင်မိသားစုအပေါ် သစ္စာစောင့်သိတဲ့ ကျန်သူတွေ စိတ်ထဲမှာ စိုးရိမ်ပူပန်မှုတွေ ပေါ်လာကြသည်။ ကိုယ်စားအုပ်ချုပ်သူဘက်က လှုပ်ရှားခြင်းမပြုရသေးသော်လည်း ပြိုကျနေပြီဖြစ်သည်။

မင်းသမီး ဘယ်လိုတုံ့ပြန်သင့်လဲ....သူမလည်း တကယ်ကပဲ အမှောင်ထဲမှာပဲ ရှိနေခဲ့တာလား။ ဤအရေးကြီးသောလျှို့ဝှက်ချက်ကိုပင် ၎င်းတို့အားအသိမပေးဘဲ ထောက်ပံ့ခိုင်းခဲ့သလား..... ဤမျှပြင်းထန်စွာ အမှားလုပ်မိကြောင်း သိလိုက်ရသဖြင့် သူတို့သည် သူမအပေါ် ယုံကြည်မှု ပျောက်ဆုံးသွားပေလိမ့်မည်။ နောင်တွင် ထိုသို့သော ခေါင်းဆောင်နောက်သို့ လိုက်ရန် မည်သူဆန္ဒရှိမည်နည်း။

"နိုင်ငံတော်ကာကွယ်ရေး၀င်္ကပါကို

အမွေဆက်ခံတာ မအောင်မြင်ဘူး..." ဟု ကိုယ်စားအုပ်ချုပ်သူက ရုတ်တရက် ကြေငြာခဲ့သည်။

"ဉီးရီးတော်... ရှင် နန်းတက်ပွဲကို ဖျက်ချင်တာလား"

မင်းသမီးက အေးစက်စွာ အော်ဟစ်လိုက်သည်။

ကိုယ်စားအုပ်ချုပ်သူက တည်ငြိမ်စွဖြင့်....

"ကုန်းမိသားစုရဲ့ စည်းမျဉ်းတွေအတိုင်း တစ်ဦးဦးက နိုင်ငံတော်ကာကွယ်ရေး၀င်္ကပါကို ထိန်းချုပ်ဖို့ အမွေဆက်ခံနိုင်ခြင်း မရှိခဲ့ရင် ထိုသူကို ရှပြည်ထောင်စုရဲ့ စစ်မှန်သောဧကရာဇ်လို့ မသတ်မှတ်နိုင်ဘူး.... ဒီ နန်းတက်ပွဲ အခမ်းအနားကို ကျင်းယောင် တက်ထိန်းထားနိုင်ရင်တောင် အာဏာ အားလုံးကို စွန့်လွှတ်ပြီး တော်ဝင်နန်းတွင်း ဝင်မစွက်ဖက်ဖို့ကတိပေးမှပဲရမယ်....၀င်္ကပါက ရှပြည်ထောင်စုကိုကာကွယ်တဲ့ အကြွင်းမဲ့အာဏာပါ....အကယ်၍ ဧကရာဇ်က ဒါကို မထိန်းချုပ်နိုင်ရင် ငါတင်မကဘူး ရှပြည်ထောင်စုတစ်ခုလုံးက သူ့ကိုဧကရာဇ်လို့သတ်မှတ်မှာမဟုတ်ဘူး.....ဒီလို မသေချာမရေရာတဲ့ အခြေအနေတွေအောက်မှာ ဘယ်သူနေချင်မှာလဲ.....”

သူ့စကားတွေက လူအုပ်အတွင်း ဆူပူအုံကြွမှုတွေ ဖြစ်စေခဲ့သည်။ကိုယ်စားအုပ်ချုပ်သူ၏စကားများသည် ကမ္ဘာကိုမြင်တွေ့စေရန် သူ၏ရည်မှန်းချက်ကို တိုက်ရိုက်ပြသခဲ့ပြီး ခေါင်းဆောင်များ၏အသုံးအနှုန်းများလည်း ပြောင်းလဲသွားခဲ့သည်။

"ကုန်းယွမ်! မင်း သစ္စာဖောက်ချင်လို့လား?"

မင်းသမီး၏ မျက်နှာသည် ဒေါသကြောင့်နီးမြန်းနေသည်။ သူမ၏ ဒေါသကြောင်ြ ကိုယ်စားအုပ်ချုပ်သူအပေါ် လေးစားမှု အပြည့်အ၀ ကင်းမဲ့နေခြင်းကို အားလုံးမြင်နိုင်သည်။

"ငါဒါကို ရှပြည်ထောင်စုအတွက် လုပ်နေတာ!"

ကိုယ်စားအုပ်ချုပ်သူ၏လေသံက ပို၍ကျယ်လောင်လာသည်။

ထို့နောက် သူသည် တော်ဝင်အရာရှိများဘက်သို့ မျက်နှာလှည့်ကာ...

"ကျင်းယောင်က နိုင်ငံတော် ကာကွယ်ရေး၀င်္ကပါကို ထိန်းချုပ်ဖို့ ပျက်ကွက်ခဲ့ပြီ....ခင်ဗျားတို့တွေ ဆက်ပြီး ခေါင်းမာနေရင် ရှပြည်ထောင်စု ဘေးအန္တရာယ်နဲ့ ရင်ဆိုင်ရတဲ့အခါ ဘယ်လိုခုခံကြမလဲ.....ဒီလိုသာဆို နောင်အခါမှာ နိုင်ငံတော်ကို ကာကွယ်ဖို့ ဘယ်လိုအင်အားရှိနိုင်မှာလဲ....တော်ဝင် သွေးသားကမွေးဖွားလာတဲ့ ယောက်ျားသားတွေသယ နိုင်ငံတော်ကာကွယ်ရေး၀င်္ကပါကို ထိန်းချုပ်နိုင်မှာ.... ကုန်းကျင်းယောင် မလုပ်ဆောင်နိုင်တာကြောင့်၊ ကျုပ်ကပဲ သူ့ကိုယ်စားတာဝန်ယူလိုက်တော့မယ်....."

ထိုနောက်ဆုံးစကားသည် မိုးခြိမ်းသံကဲ့သို့ ထွက်ပေါ်လာသည်။ ထို့နောက် သူသည် ရှေ့သို့ ခြေတစ်လှမ်းတိုးကာ ကောင်းကင်ကို ဖုံးလွှမ်းနေသော အကန့်အသတ်မဲ့ ဖိအားများကို ထုတ်ပေးသည်။ ဧကရာဇ်မင်းမြတ်၏ အုပ်စိုးမှုနှင့် ဘုန်းအာနုဘော်အားလုံးကို သက်သေပြခဲ့သော သူ၏နှစ်ပေါင်းများစွာ စိုက်ထုတ်ခဲ့သော လုံ့လဝီရိယများကြောင့် ကျားရဲနှင့်တူသော မျက်လုံးများသည် အားမာန်အပြည့်ရှိသည်။ ရင်ပြင်ရှိ မရေမတွက်နိုင်သော ဂိုဏ်းခွဲများမှ ခေါင်းဆောင်များအားလုံး လေးနက်သော အမူအရာများပြောင်းလဲသွားကြသည်။

နန်းတက်ပွဲ အခမ်းအနားတွင် မမျှော်လင့်ထားသော အဖြစ်အပျက်တစ်ခု ဖြစ်ပွားခဲ့သည်။

ကုန်းယွမ် ပြောသောစကားများကိုကြားပြီးနောက် သံသယများတိုးမလာအောင် တားဆီးရန်မှာ ခဲယဉ်းပေလိမ့်မည်။