ဖီးနစ်ငှက်မွှေး(က)

တိတ်ဆိတ်နေသော တားမြစ်ဇုန်သည် အမဲလိုက်သံစဉ် ထွက်ပေါ်လာသည်နှင့်ချက်ချင်း ချောက်ချားဖွယ်ကောင်းသော နယ်မြေသို့ ပြောင်းလဲသွားသည်။ ချောက်ချားဖွယ်သီချင်းသံသည် အရိုးခိုက်တုန်စေမည့် အေးစက်မှုကို သယ်ဆောင်လာလျက် မြေပြင်ကို အေးခဲသွားစေသည်။

မြက်ပင်များသည် ရေခဲအပ်များနှယ် ပြောင်းလဲသွားကြပြီး မိုးမျှော်သစ်ပင်ကြီးများသည် ရေခဲရုပ်တုများအဖြစ် အေးခဲသွားကြသည်။

သီချင်းသံသည် ည၏ ပင်ကိုယ်တစ်စိတ်တစ်ပိုင်းဖြစ်ဟန် တူသည်။ ထို့ကြောင့် ၎င်း၏ တည်ရှိမှုသည် ဤနေရာမှ တိတ်ဆိတ်မှုကို မဖြိုခွင်းနိုင်ပေ။ ယင်းအစား ၎င်းသည် တားမြစ်ဇုန်၏ အရှိန်အဝါကို ပိုပြီးနက်ရှိုင်းလာစေသည်။

ရွှီချင်းသည် ထိုနေရာတွင် တိတ်ဆိတ်စွာ မတ်တတ်ရပ်နေလျက် သီချင်းသံကို နားထောင်နေသည်။ လွန်ခဲ့သော ခုနစ်နှစ်မှ မှတ်ဉာဏ်များက ပြန်ပေါ်လာသည့်အခါ သူ၏ နှလုံးသားထဲတွင် လှိုင်းတချို့ဖြစ်ပေါ်လာသည်။

ဤသည်မှာ သီချင်းသံကို ဒုတိယအကြိမ် သူကြားရခြင်းဖြစ်သည်။

ရတနာမုဆိုးများအတွက် တားမြစ်ဇုန်ထဲမှ သီချင်းဆိုသံသည် သူတို့၏ နှလုံးသားထဲမှ အကြောက်တရား၏ ဇစ်မြစ်ဖြစ်သည်။ ထိုသီချင်းသံကိုကြားသော လူများသည် ပုံမှန်အားဖြင့် သေဆုံးသွားကြလေ့ ရှိသည်။

သို့သော်လည်း လက်ရှိရွှီချင်းသည် အတိတ်တုန်းကရွှီချင်း မဟုတ်တော့ချေ။

အတိတ်တွင် သူ့ကိုယ်သူကာကွယ်ရန် စွမ်းအားအများကြီးမရှိပေ။ သူသည် အေးစက်စက်လေထဲမှာ ခိုက်ခိုက်တုန်နေပြီး သေခြင်းတရားကို စောင့်ဆိုင်းနေရုံသာ တတ်စွမ်းခဲ့သည်။

ယခု သူရပ်နေသော နေရာက ဖုန်းဟိုင်ဒေသငယ်မဟုတ်သည့်တိုင် ဖုန်းဟိုင်ဒေသငယ်မှ ကမ္မစုစည်းခြင်းကို အာရုံခံနိုင်သေးပေသည်။

ကြောက်စရာကောင်းသော မှော်ဝင်တည်ရှိမှုသည်သာ ဤကမ္မအရှိန်အဝါကို ချိုးဖျက်နိုင်ပေသည်။

ထိုမျှတင်မကသေးပေ။ ကောင်းကင်ပေါ်မှာ ထင်ရှားစွာ တည်ရှိနေသော မဟာအတောင်ပံလည်း ရှိသေးပေသည်။ မဟာအတောင်ပံ၏ အထက်ကောင်းကင်ယံတွင် ငှက်ကြီးချင်းချင်းသည် တားမြစ်ဇုန်ထဲသို့ စိုက်ကြည့်နေသည်။

သို့ဖြစ်၍ ရွှီချင်းသည် သီချင်းဆိုသံနှင့်ပတ်သက်ပြီး ကြောက်ရွံ့မှုကို မခံစားရပေ။ ယင်းအစား ခြေသံထွက်ပေါ်လာသောနေရာသို့ စိုက်ကြည့်နေသော သူ၏ မျက်လုံးထဲတွင် မျှော်လင့်တောင့်တမှုဖြင့် ပြည့်နှက်နေလေသည်။

သူက ထိုနေရာမှာ ပုံရိပ်တစ်ခုထွက်ပေါ်လာရန် စောင့်ဆိုင်းနေခြင်း ဖြစ်သည်။

အရိပ်လေးသည် ပေတစ်ထောင်အကျယ်အဝန်းထိ ပျံ့နှံ့နေပြီးဖြစ်လေရာ ၎င်းကိုယ်တိုင်က အထူးတားမြစ်နယ်မြေတစ်ခုဖြစ်လာဟန် တူသည်။ ထိုပေတစ်ထောင်အကျယ်အဝန်းအတွင်း အပင်အားလုံးသည် မျက်လုံးများသို့ ပြောင်းလဲသွားကြပြီး သစ်ပင်ကြီးများသည် ခေါင်းတလားများသို့ ပြောင်းလဲသွားကြသည်။

ဤအခိုက်အတန့်မှာ မရေမတွက်နိုင်သော မျက်လုံးများသည် ရွှီချင်း၏ ဘေးပတ်ပတ်လည်မှာ ထွက်ပေါ်လာကြပြီး သူ့ကို အတူတကွ စူးစိုက်ကြည့်နေကြသည်။

ဤအခိုက်အတန့်မှာ မှော်ဝင်အရှိန်အဝါသည် အရိပ်လေးထံမှ ပေါက်ကွဲထွက်လာပြီး ရက်စက်ကြမ်းကြုတ်ခြင်း၊ ဆာလောင်ခြင်းနှင့် အကြောက်တရားတို့ကို ထုတ်ဖော်လိုက်သည်။

အကယ်၍ ဤအခိုက်အတန့်မှာ တစ်စုံတစ်ယောက်ကသာ တားမြစ်ဇုန်ကို ကောင်းကင်ယံမှ ငုံ့ကြည့်မည်ဆိုလျှင် ထိုနေရာသည် ထူထဲသော မြူခိုးဖြင့် ပြည့်နှက်နေကြောင်း မြင်တွေ့နိုင်လိမ့်မည်။ ရွှီချင်းရှိနေသော ပေတစ်ထောင်ဧရိယာအတွင်းသည်သာ မြူခိုးကင်းရှင်းသော တစ်ခုတည်းသောနေရာ ဖြစ်သည်။

မြူခိုးထဲမှ သီချင်းဆိုသံသည်တော့ တဖြည်းဖြည်း ကြည်လင်လာသည်။ ခြေသံများသည်လည်း တဖြည်းဖြည်း နီးသထက် နီးကပ်လာသည်။

ယင်းက ရွှီချင်းနှင့် ပေတစ်ထောင်အကွာအဝေးသို့ ရောက်ရှိသွားသည့်အခါ ခြေသံသည် ရပ်တန့်သွားသည်။ သို့သော်လည်း သီချင်းဆိုသံသည် ဆက်လက်ထွက်ပေါ်နေဆဲ ဖြစ်သည်။

သွေးဖြင့် အနီရောင်စွန်းထင်နေသော ကောက်ရိုးဖိနပ်တစ်ရံသည် မြူခိုး၏ အစွန်အဖျားတွင်ရှိနေကြောင်း မသဲမကွဲ မြင်ရလိမ့်မည်။

ထိုဖိနပ်တစ်ရံသည် ရွှီချင်း၏ မှတ်ဉာဏ်များထဲမှာ တည်ရှိမနေပေ။ ယင်းကို ယခင်က တစ်ခါမှ သူမမြင်တွေ့ဖူးပေ။

ကောက်ရိုးဖိနပ်ပေါ်တွင် မြူခိုးသည် လှုပ်ရှားထကြွလာပြီး တဖြည်းဖြည်း ပုံရိပ်တစ်ခုသို့ ဖွဲ့စည်းသွားသည်။ ယင်းက လူစိမ်းတစ်ယောက်ဖြစ်သည်။ သူက အနက်ရောင်ဝတ်ရုံကို ဝတ်ဆင်ထားသော အမျိုးသမီးတစ်ဦး ဖြစ်သည်။

ဝတ်ရုံသည် အလွန်ကြီးမားလေရာ သူ၏ အနောက်မှ တားမြစ်ဇုန်ကို ဖုံးလွှမ်းနိုင်သည့်အလားပင်။ သူရောက်ရှိလာသည်နှင့်ချက်ချင်း ဘေးပတ်ဝန်းကျင်မှ အပင်များသည် ကွေးညွတ်သွားကြပြီး သစ်ပင်ကြီးများသည် ပုံပျက်တွန့်လိမ်သွားကြသည်။ ဤသည်မှာ သူတို့က သူ့ကို အရိုအသေပေးနေသည့်အလားပင်။

ဒြပ်နှောများသည်လည်း ပေါ်လျှိုးလာပြီး မြူခိုးနှင့် ပေါင်းစပ်သွားသည်။ ယင်းက မြူခိုးကို ပို၍သိပ်သည်းလာစေပြီး ဘေးပတ်ဝန်းကျင်ကို ဖုံးလွှမ်းသွားမည့် ဖိအားတစ်ခုကို ဖြစ်ပေါ်လာစေသည်။

သူ၏ မျက်လုံးသည် ပို၍ပင် ထူးခြားသေး၏။ တစ်ဖက်သည် အနီရောင်ဖြစ်ပြီး အခြားတစ်ဖက်သည် အဖြူရောင် ဖြစ်သည်။

မရေမတွက်နိုင်သော ဝိညာဉ်များကို အနီရောင်မျက်လုံးထဲတွင် မြင်နိုင်ပြီး အဖြူရောင်မျက်လုံးထဲတွင်တော့ အဆုံးမရှိသော အရိုးခြောက်များ ရှိသည်။

ဤအခိုက်အတန့်မှာ ထိုမျက်လုံးများသည် ရွှီချင်းနှင့် အရိပ်လေးကို စိုက်ကြည့်နေသည်။

“ အစာ ”

အက်ရှရှအသံသည် သူ၏ ပါးစပ်ထဲမှ မြည်ဟိန်းထွက်လာသည်။ ယင်းက မြူခိုး၊ အပင်များနှင့် တားမြစ်ဇုန်တစ်ခုလုံးမှ ပျံ့လွင့်ထွက်လာခြင်း ဖြစ်သည်။ ယင်းက ဆက်လက်ပဲ့တင်ထပ်သွားပြီး ထပ်ဆင့်အသံလှိုင်းများကို ဖြစ်ပေါ်စေသည်။

ပေတစ်ထောင်အကျယ်အဝန်းထိ ဖြန့်ကြက်ထားသော အရိပ်လေး၏ မျက်လုံးများထဲမှ အနက်ရောင်အလင်း ပေါ်လျှိုးလာသည်။ မျက်လုံးအားလုံးက ထိုအမျိုးသမီးအပေါ်သို့ ကျရောက်သွားကြသည်နှင့် အရိပ်လေးသည် ပြင်းထန်သော ကြောက်ရွံ့ခြင်းကို ခံစားသွားရသည်။

“ တားမြစ်ဇုန်ရဲ့… အရှင်သခင်… ”

အရိပ်လေးထံမှ ခံစားချက်များသည် ရွှီချင်း၏ စိတ်ထဲသို့ အမြန်ဝင်ရောက်သွားသည်။

ရွှီချင်း၏ အကြည့်သည် အေးစက်သွားသည်။ ထိုဝတ်ရုံနက်အမျိုးသမီးက ရွှီချင်း၏ ပေတစ်ထောင်အကျယ်အဝန်းထဲသို့ ဝင်ရောက်ရန် ဟန်ပြင်လိုက်သည်။ သို့သော်လည်း သူ၏ ခြေလှမ်းသည် ရပ်တန့်သွားသည်။ သူက ရုတ်တရက် ခေါင်းမော့လိုက်ပြီး ကောင်းကင်ပေါ်သို့ ကြည့်လိုက်ကာ နှုတ်ဆိတ်သွားသည်။

အချိန်အတော်ကြာပြီးနောက် အသံသည် ထပ်မံထွက်ပေါ်လာသည်။

“ ထွက်သွား ”

အသံသည် ငြင်းဆန်ခြင်းသို့ ပြောင်းလဲသွားပြီး တားမြစ်ဇုန်တစ်ခုလုံးမှ ပေါ်လျှိုးလာသည်။

ရွှီချင်း၏ အမူအရာသည် တည်ငြိမ်သည်။ သူက လက်သီးဆုပ်လိုက်ပြီး တားမြစ်ဇုန်အရှင်သခင်ကို အရိုအသေပေးလိုက်သည်။ သူက တည်ငြိမ်စွာ ပြောသည်။

“ အရှင့်ကို နှောင့်ယှက်မိတာ တောင်းပန်ပါတယ် ”

မြူခိုးသည် တအိအိ လှုပ်ရှားထကြွလာပြီး အမျိုးသမီး၏ ပုံရိပ်ကို တဖြည်းဖြည်း လွှမ်းမိုးသွားနေသည်။ ဤအခိုက်အတန့်မှာ ငြင်းဆန်ခြင်းစွမ်းအားသည်လည်း ပိုပြီးပြင်းထန်လာသည်။ ထိုထဲမှာ မလိုမုန်းထားစိတ်လည်းရှိလေရာ သူက အခွင့်အရေးတစ်ခုကို ချောင်းမြောင်းနေဟန် ရ၏။

သို့သော်လည်း ကောင်းကင်ပေါ်မှ ဖိအားသည် သူ့ကို အနည်းငယ် ကြောက်လန့်စေသည်မှာ ထင်ရှားသည်။ သို့ဖြစ်၍ သူက မလိုမုန်းထားစိတ်ရှိသော်လည်း လှုပ်ရှားခြင်းမပြုချေ။

တားမြစ်ဇုန်အရှင်သခင်၏ ပုံရိပ်က ဝေဝါးသွားနေသည်ကို မြင်သောအခါ ရွှီချင်းသည် ရိုသေစွာ ပြောသည်။

“ အရှင် တစ်ခုခုကို မေ့နေတာလား ”

မြူခိုးပုံရိပ်သည် နားကန်းနေဟန် ရသည်။

ရွှီချင်းသည် ရိုသေလေးစားသော အမူအရာဖြင့် နူးညံ့စွာ ပြောသည်။

“ တားမြစ်ဇုန်က သီချင်းဆိုသံကို ဒုတိယအကြိမ်ကြားတဲ့လူကို လက်ဆောင်တစ်ခု ပေးလိမ့်မယ်… အဲ့ဒါက သူတို့အတွေ့ချင်ဆုံးလူကို မြင်တွေ့နိုင်စေလိမ့်မယ် ”

“ ဒီနေ့ သီချင်းသံကို ကျွန်တော်ကြားတာ ဒုတိယအကြိမ်ရှိပါပြီ ”

မြူခိုးပုံရိပ်၏ အေးစက်စက် အကြည့်သည် ရွှီချင်းထံသို့ ကျရောက်သွားသည်။ သို့သော်လည်း သူက အလေးမထားချေ။

သူက ခေါင်းလှည့်လိုက်ပြီး မြူခိုးထဲသို့ လျှောက်သွားသည်။ သူက ပိုပြီးဝေဝါးလာနေသည်နှင့်အမျှ ဘေးပတ်ဝန်းကျင်မှ အေးစက်မှုသည် ပိုပြီးသိပ်သည်းလာသည်။ ထပ်ဆင့်အသံလှိုင်းများသည် ဤနယ်မြေထဲမှာ ဆက်လက်ပဲ့တင်ထပ်နေသေးပြီး ပိုပြီးသိပ်သည်းသော ငြင်းဆန်ခြင်းစွမ်းအားကို ထုတ်လွှတ်လာသည်။

ရွှီချင်း၏ အမူအရာသည် မည်းမှောင်သွားပြီး သူ၏ အကြည့်သည် အေးစက်သွားသည်။ သူက ဆက်ပြီးမယဉ်ကျေးတော့ဘဲ ဖြည်းညင်းစွာ ပြောသည်။

“ မဟာအတောင်ပံ ”

သူ၏ စကားဆုံးသည်နှင့် ကောင်းကင်သည် တုန်ယင်သွားပြီး ပေတစ်ထောင်ခန့်ရှည်သော မဟာအတောင်ပံသည် ချက်ချင်း ဆင်းသက်လာသည်။ ၎င်းက ကြောက်မက်ဖွယ်ကောင်းသော ဖိအားကို ထုတ်လွှတ်လိုက်သည်။ မဟာအတောင်ပံပေါ်တွင် တာအိုပညာရှင်စစ်မာနှင့် ဓားကိုင်တစ်ထောင်လည်း ရှိကြသည်။ သူတို့၏ အရှိန်အဝါများသည် တစ်ခုပြီးတစ်ခု ထွက်ပေါ်လာကြပြီး တားမြစ်ဇုန်ကို ဖိနှိပ်လိုက်သည်။

တားမြစ်ဇုန်သည် တုန်ယင်လာပြီး မြူခိုးသည် အပြင်းအထန် လှုပ်ရှားလာသည်။ ထွက်ခွာရန် ပြင်ဆင်နေသော ပုံရိပ်သည် သူ၏ ခြေလှမ်းများကို ရပ်တန့်လိုက်သည်။ သူက အနောက်သို့ လှည့်လိုက်သည့်အခါ သူ၏ ခန္ဓာကိုယ်ထဲမှ အန္တရာယ်ရှိသော အားလှိုင်းအတတ်အကျများကို ထုတ်လွှတ်လာသည်။

သူက ရွှီချင်းကို ရက်စက်ကြမ်းကြုတ်သော အမူအရာဖြင့် စိန်းစိန်းဝါးဝါး ကြည့်လိုက်သည်။

“ ကျွန်တော့်တောင်းဆိုမှုက အကျိုးအကြောင်းမဆီလျော်တာ မဟုတ်ပါဘူး ”

ရွှီချင်းသည် တားမြစ်ဇုန်အရှင်သခင်၏ မျက်လုံးထဲသို့ ကြည့်လိုက်ပြီး ဖြည်းညင်းစွာ ပြောသည်။

“ ငှက်ကြီးချင်းချင်း ”

ကောင်းကင်ပေါ်တွင် သတ္ထုနှင့် ကျောက်တုံးများကို ထိုးဖောက်နိုင်ဟန်ရသော စူးစူးဝါးဝါးအော်မြည်သံ ထွက်ပေါ်လာသည်။ ၎င်းက ဤအခိုက်အတန့်ကို အချိန်အကြာကြီး စောင့်ဆိုင်းနေခဲ့ရသည့်အလားပင်။ သို့ဖြစ်၍ ၎င်းသည် ရွှီချင်း၏ ဆင့်ခေါ်ခံလိုက်ရသည်နှင့် စိတ်လှုပ်ရှားစွာ အော်မြည်လိုက်သည်။ ၎င်း၏ အော်မြည်သံသည် အရပ်မျက်နှာအဘက်ဘက်သို့ ပဲ့တင်ထပ်သွားသည်။ ထို့အပြင် အားကောင်းသော တောင်ပံရိုက်ခတ်မှုထွက်ပေါ်လာလေရာ သဏ္ဍာန်မဲ့လက်တစ်ဖက်က တားမြစ်ဇုန်ပေါ်သို့ ရိုက်ချလိုက်သည့်အလားပင်။

ငှက်ကြီးချင်းချင်း၏ ခန္ဓာကိုယ်သည် သက်ဆင်းလာသည်။

မြေပြင်သည် တုန်ယင်သွားပြီး မြူခိုးသည် ကျယ်ပြောသော အတိုင်းအတာတစ်ခုထိ ပြိုကွဲထွက်သွားသည်။ လှုပ်ရှားထကြွမှု၏ ပြင်းထန်မှုသည် အထွတ်အထိပ်သို့ ရောက်ရှိသွားသည်။