မီးလောင်ရာလေပင့်ခြင်း… သတ်ဖြတ်ရန် ဓားငှားခြင်း(ဂ)

သူက ရွှီချင်းကို ပြုံးလျက် ကြည့်နေသည်။

သတ္တမမင်းသား စောစောတုန်းက မိတ်ဆက်ပေးခဲ့စဉ်က ထိုလူ၏ သရုပ်ကို ပြောပြသွားခဲ့ကြောင်း ရွှီချင်း မှတ်မိသည်။ သူက လက်ရှိတပ်မှူးချုပ်ကြီး၏ မြေးဖြစ်ပြီး နာမည်က မုန့်ယွင်ပိုင်ဖြစ်သည်။

မုန့်ယွင်ပိုင်က ပြောလိုက်သည်နှင့် တခြားတစ်ဖက်မှာ ထိုင်နေသော အမျိုးသမီးသည်လည်း လှည့်ကြည့်လာသည်။

ထိုအမျိုးသမီးသည် ရိုးရှင်းသပ်ရပ်သော အပြာရောင်ဝတ်စုံကို ဝတ်ဆင်ထားသည်။ သူ၏ အသွင်အပြင်သည် ချောမောလှပပြီး ဆံပင်ကို မြင်းမြှီးသဖွယ် စုချည်ထားသည်။ သို့သော်လည်း သူ၏ မျက်လုံးထဲမှ သူငယ်အိမ်များသည် ချောက်ချားဖွယ်ကောင်းသော အငွေ့အသက်ကို ပေးသည်။ ယင်းက သူ့မျက်လုံးဖြင့် စိုက်ကြည့်ခံလိုက်ရသော မည်သူ့ကိုမဆို အလိုအလျောက် ကျောချမ်းသွားစေနိုင်သည်။

ထိုအမျိုးသမီးက နတ်သမီးလျှိုလန်ဖြစ်ပြီး ဖန်တီးရှင်စံအိမ်မှ တစ်စုံတစ်ယောက်ဖြစ်ကြောင်း သတ္တမမင်းသားက မိတ်ဆက်ပေးခဲ့သည်။

“ နင့်ကိုယ်ပေါ်မှာ နတ်ဘုရားအနံ့အသက်ရှိတယ် ”

နတ်သမီးလျှိုလန်သည် ရွှီချင်းကို စိုက်ကြည့်လိုက်သည်။ သူက ငယ်ရွယ်ပုံပေါ်သော်လည်း သူ၏ အသံသည် အရွယ်အိုနေသော အမျိုးသမီးအသံနှင့် ဆင်တူသည်။ ယင်းက အလွန်ထူးဆန်းသည်။

ရွှီချင်းသည် ခေါင်းလှည့်လိုက်ပြီး မုန့်ယွင်ပိုင်ကို ကြည့်လိုက်သည်။ ထို့နောက် သူက နတ်သမီးလျှိုလန်ကို ကြည့်လိုက်သည်။ သူက ယဉ်ယဉ်ကျေးကျေး ငြင်းပယ်တော့မည့်အချိန် မုန့်ယွင်ပိုင်သည် ပြုံးလိုက်ပြီး ရုတ်တရက် ထပ်ပြောသည်။

“ ငါတို့ သဘောတူညီမှုတစ်ခု လုပ်ကြရအောင်… မင်းက ငါ့ကို အဖြေပြောပြရမယ်… အပြန်အလှန်အနေနဲ့ ငါက ဒီနေ့ ဒီနေရာမှာရှိနေတဲ့ လူတွေထဲမှာ ဘယ်သူတွေက မင်းအပေါ် မကောင်းတဲ့ရည်ရွယ်ချက်ရှိလဲ… အဲ့ဒီမကောင်းတဲ့ရည်ရွယ်ချက်တွေရဲ့ ဇစ်မြစ်ကဘာလဲ ပြောပြမယ်… မင်း ဘယ်လိုသဘောရလဲ ”

ဤသည်ကို ခုန်းရှန်းလုံကြားသောအခါ သူက အတွေးနက်သွားသည်။ နန်းမြို့တော်မှ ဤလူများသည် မရိုးရှင်းကြောင်း အစကတည်းက သူခံစားမိထားပြီး ဖြစ်သည်။

မုန့်ယွင်ပိုင်သည်တော့ သူတကယ်လိုချင်သည်မှာ အဖြေမဟုတ်ပေ။ ယင်းအစား သူက ဤအချက်ကိုအသုံးပြုပြီး သူ၏ သဘောထားကို ထုတ်ဖော်ပြလိုခြင်း ဖြစ်သည်။ သူက ကောင်းသောရည်ရွယ်ချက်ဖြင့် လုပ်ဆောင်ခြင်းဟုတ်မဟုတ်ကို ဆုံးဖြတ်ရန် ခက်ခဲပေသည်။ သို့သော်လည်း သူက ရွှီချင်း၏ နားလည်မှုကို ခြယ်လှယ်လိုခြင်းဖြစ်ကြောင်းတော့ ထင်ရှားသည်။

မည်သို့ဖြစ်ပါစေ သူပြောသည်က အမှန်လည်းဖြစ်နိုင်သလို အမှားလည်းဖြစ်နိုင်ပေသည်။

သို့သော်လည်း ခုန်းရှန်းလုံ၏ အမြင်တွင် ဤလှည့်ကွက်သည် ရွှီချင်း၏ အရှေ့မှာ အသုံးမဝင်ချေ။

ရွှီချင်းသည် မုန့်ယွင်ပိုင်ကို တစ်ချက်ကြည့်လိုက်သည်။ သူက သိုလှောင်အိတ်ထဲမှ ကျောက်စိမ်းပြားတစ်ခုကို ထုတ်လိုက်ပြီး မုန့်ယွင်ပိုင်ဆီသို့ ကမ်းပေးလိုက်သည်။

“ ဒါက ဘာလဲ ”

မုန့်ယွင်ပိုင်သည် မျက်ခုံးပင့်တင်လိုက်သည်။ သူက ကျောက်စိမ်းပြားကို လက်ခံယူလိုက်ပြီး အထဲသို့ သူ၏ နတ်ဘုရားအသိစိတ်ကို ပို့လွှတ်လိုက်သည့်အခါ ရုတ်ချည်း မျက်လုံးပြူးကျယ်သွားသည်။ ထို့နောက် သူက ရွှီချင်းကို ကြည့်လိုက်သည်။

“ ဒီကနေ တဆင့်လား… ဒါက အရမ်းပြည့်စုံတယ် ”

“ ဟုတ်တယ်… ဒီနှစ်တွေမှာ လူသားမျိုးနွယ်က ဒေသငယ်ခုနစ်ခုက နှလုံးသားအလင်းစစ်ဆေးမှုရဲ့ မေးခွန်းအားလုံးနီးပါးအတွက် အဖြေတွေက ဒီထဲမှာ ရှိတယ် ”

ရွှီချင်းက တည်ငြိမ်စွာ ပြောသည်။

အတိတ်တွင် ခေါင်းဆောင်သည် ထိုကျောက်စိမ်းပြားကို ဝယ်ယူခဲ့ပြီး ရွှီချင်းကို မိတ္တူတစ်ဆောင်ပေးခဲ့သည်။

မုန့်ယွင်ပိုင်သည် တစ်ခဏ ဆွံ့အသွားသည်။ သူက ရွှီချင်းကို သံသယဖြစ်စွာ ကြည့်လိုက်သည်။

သူ၏ ပင်ကိုယ်အသိစိတ်က ရွှီချင်းကို မယုံကြည်ပေ။ သို့သော်လည်း ကျောက်စိမ်းပြားထဲတွင် အဖြေများစွာ ပါရှိသည်။ ထို့အပြင် အဖြေတိုင်းသည် အလွန်အသေးစိတ်ကျသည်။ တုံ့ပြန်မှုများ၏ အတိမ်အနက်ကိုပင် အမှတ်အသားပြုလုပ်ထားသေးသည်။ ယင်းက ဤသတင်းအချက်အလက်ကို စုစည်းရန် များပြားသော ကြိုးစားအားထုတ်မှုနှင့် အရင်းအမြစ်များကို အသုံးပြုထားကြောင်း သိသာစေသည်။

သူက တုံ့ဆိုင်းနေစဉ် ပွဲအခမ်းအနားထဲမှ တစ်စုံတစ်ယောက်သည် ဤနေရာတွင် တစ်ခါက ပေါ်လာခဲ့ဖူးသော ကောင်းကင်နက်နတ်သားတော်အကြောင်းကို စပြောလိုက်သည်။

သန့်စင်ရေလှိုင်းမျိုးနွယ်ထဲမှ လူအများအပြားသည် ထိုအကြောင်းကို ကြားမိကြသည်။ မျက်မြင်တွေ့ခဲ့ရသော လူအများစုသည် သေဆုံးသွားခဲ့ကြသော်လည်း ကောလဟာလသည် မရပ်တန့်သွားခဲ့ပေ။ လူသားမျိုးနွယ်သည်ပင် ယင်းကို တဖြည်းဖြည်း သိရှိလာသည်။

“ အဲ့ဒီကောင်းကင်နက်နတ်သားတော်အကြောင်းကို ပြောရမယ်ဆို အသေးစိတ်ကိုတော့ ငါမသိပေမဲ့ အပြင်ဘက်က တွင်းနက်ကြီးက သူ့ကြောင့်ဖြစ်လာတာလို့ ငါကြားခဲ့တယ်… အဲ့ဒါကိုကြည့်လိုက်တာနဲ့ သူ့နည်းလမ်းတွေက တကယ်အံ့ဩဖွယ်ကောင်းတယ် ”

“ သူက ဘာကြောင့် ဒီနေရာမှာ ထွက်ပေါ်လာပြီး ဒီနေရာက အင်မော်တယ်အူခွေသစ်ပင်တွေက ဘာကြောင့် ပျောက်ကွယ်သွားလဲဆိုတာ တစ်ယောက်မှမသိတာ စိတ်မကောင်းစရာပဲ ”

“ ကောင်းကင်နက်မျိုးနွယ်ဝင်တွေက နတ်ဆိုးတွေ… ဒီတော့ ဒီကောင်းကင်နက်နတ်သားတော်လည်း နတ်ဆိုးပဲနေမယ်… သူက ယဇ်ပူဇော်တာကို လုပ်ခဲ့တာဖြစ်နိုင်တယ်… သူက ကဒ်ဘေးအင်မော်တယ်မျိုးနွယ်ရဲ့ အင်မော်တယ်အူခွေသစ်ပင်တွေကို သူ့သခင် နီလာနတ်သမီးဆီကို ယဇ်ပူဇော်လိုက်တာက ဖြစ်နိုင်ခြေများတယ် ”

“ သတ္တမမင်းသား… အရှင့်သားက သန့်စင်ရေလှိုင်းမျိုးနွယ်ကို အောင်ပွဲရခဲ့ပါတယ်… ဒီတော့ အရှင့်သားက ကောင်းကင်နက်နတ်သားတော်အကြောင်းနဲ့ပတ်သက်ပြီး သဲလွန်စတစ်ခုတစ်လေများ ရှာမတွေ့မိဘူးလား ”

အားလုံးသည် တစ်ယောက်တစ်ပေါက် ပြောကြသည်။ ကောင်းကင်နက်နတ်သားတော်အကြောင်းကို ပြောသည့်အခါတွင် သူတို့၏ သရုပ်နှင့် အဆင့်တန်းက မည်သို့ဖြစ်ပါစေ သူတို့၏ စကားထဲမှာ အကြောက်တရားများ ကိန်းအောင်းနေသည်။ သိသာစွာပင် ‘ကောင်းကင်နက်နတ်သားတော်’ဟူသော စကားသည် သူတို့အတွက် အတော်လေး အလေးချိန်များသည်။

သတ္တမမင်းသားသည် ခေါင်းခါလိုက်သည်။

“ ငါ ဒီကိစ္စကိုကြားတဲ့အခါမှာ သန့်စင်ရေလှိုင်းမျိုးနွယ်ဝင်တချို့ကို မေးမြန်းကြည့်ခဲ့တယ်… သူတို့ရဲ့ပြောကြားချက်အရ အဲ့ဒီကောင်းကင်နက်နတ်သားတော်ရဲ့ ကျင့်ကြံခြင်းက အတော်လေး အံ့ဩစရာကောင်းပြီး သူ့ရဲ့ အဆင့်အတန်းက အရမ်းမြင့်မြတ်တယ်… သူက လက်တစ်ဖက်ဝှေ့ယမ်းလိုက်တာနဲ့ နီလာနတ်သမီးရဲ့စွမ်းအားကို ဆင့်ခေါ်နိုင်တယ်… သူက ကောင်းကင်နက်မျိုးနွယ်ရဲ့ ရုပ်တုကို ဒူးထောက်စေပြီး သူ့ကို သခင်လို့ ခေါ်စေတယ် ”

“ ဒါပေမဲ့ သူပျောက်ကွယ်သွားတဲ့အခါမှာ ဘာသဲလွန်စမှ မချန်ထားခဲ့တာ စိတ်မကောင်းစရာပဲ… ဒါပေမဲ့ တော်ဝင်အမတော်က ကောင်းကင်နက်မျိုးနွယ်အကြောင်းကို ငါ့ထက် ပိုပြီးတော့ သိလိမ့်မယ်… ဘာလို့လဲဆိုတော့ အမတော်က ဖန်တီးရှင်စံအိမ်က ကြီးကြပ်ရေးမှူးလေ ”

သတ္တမမင်းသားသည် စကားဆုံးအောင်ပြောပြီးနောက် ခေါင်းလှည့်လိုက်ပြီး သူ၏ ဘေးမှ မင်းသမီးအန်းဟိုင်ကို ကြည့်လိုက်သည်။

မင်းသမီးအန်းဟိုင်သည် အမူအရာကင်းမဲ့စွာ ပြောသည်။ သူ၏ အေးတိအေးစက် စကားသံသည် ခန်းမဆောင်ထဲမှာ ပျံ့လွင့်သွားသည်။

“ အဲ့ဒီကောင်းကင်နက်နတ်သားတော်က လဝတ်ပြုဒေသကြီးက ဖြစ်လောက်မယ်… အဲ့ဒီမှာရှိတဲ့ နီလာနတ်သမီးရဲ့ အစစ်အမှန် မှီခိုသူတွေပဲ သူ့ကို ထိန်းကျောင်းနိုင်စွမ်းရှိတယ် ”

ထိုသတင်းကိုကြားသောအခါ ရွှီချင်းသည် မျက်လုံးမှေးကျဉ်းလိုက်သည်။ ဤသည်မှာ ယခင်က သူမသိထားသော အချက်အလက်ဖြစ်သည်။ ယင်းကို ယခု သူကြားလိုက်ရသောအခါ ရွှီချင်းသည် နက်နဲစွာ တွေးတောလိုက်သည်။

သူ၏ ဘေးမှ ခုန်းရှန်းလုံသည် ဝိုင်ခွက်ကို ကောက်ယူလိုက်ပြီး တစ်ငုံသောက်လိုက်သည်။ ဝိုင်သောက်နေစဉ်အတွင်း သူက ရွှီချင်းကို မကြည့်မိအောင် အကောင်းဆုံး ကြိုးစားနေသည်။

ရွှီချင်းနှင့် သူ၏ စီနီယာအကိုကြီးသည် သူ့အရှေ့မှာ ကောင်းကင်နက်မျိုးနွယ်အသွင်သို့ ရုပ်ပြောင်းလဲသွားခဲ့ကြသည်ကို ယခုထိတိုင် သူက မှတ်မိနေဆဲဖြစ်သည်။ ထို့နောက် သူတို့နှစ်ယောက်သည် ယခု သူရပ်နေသော နေရာဆီသို့ ဦးတည်သွားခဲ့ကြသည်။

ဤနေရာသို့ သူတို့ရောက်လာပြီးနောက်တွင် ကောင်းကင်နက်နတ်သားတော်ကိစ္စလည်း ထွက်ပေါ်လာခဲ့သည်။

တခြားလူများသည်တော့ မင်းသမီးအန်းဟိုင်၏ စကားကိုကြားသောအခါ သူတို့အားလုံးသည် ခေါင်းညိတ်လိုက်ကြသည်။ သတ္တမမင်းသားတစ်ယောက်တည်းသာ ရုတ်တရက် ရွှီချင်းကို လှမ်းကြည့်လိုက်ပြီး ပြုံးသည်။

“ ရွှီချင်း… ဖုန်းဟိုင်ဒေသငယ်က ဒီနေရာနဲ့ သိပ်မဝေးဘူး… အဲ့ဒီကောင်းကင်နက်နတ်သားတော်အကြောင်းကို မင်းရောကြားမိသေးလား ”

“ ကျွန်တော် အနည်းအကျဉ်းလောက်ပဲ ကြားမိပါတယ် ”

ရွှီချင်းသည် ခေါင်းမော့လိုက်ပြီး သတ္တမမင်းသား၏ မျက်လုံးကို လေးနက်သော အမူအရာဖြင့် ကြည့်လိုက်သည်။

သတ္တမမင်းသားသည် ပြုံးလိုက်ပြီး နောက်ထပ်မပြောတော့ပေ။

ရွှီချင်း၏ အကြည့်သည် ပုံမှန်အတိုင်း ဆက်လက်ရှိနေဆဲပင်။ အပြောင်းအလဲ လုံးဝမရှိပေ။ ဤနေရာမှ လူများသည်လည်း ဖြည်းဖြည်းချင်း ခေါင်းစဉ်ပြောင်းလဲလိုက်ပြီး ရှေးဟောင်းမျိုးနွယ်များမှ အဓိကကိစ္စများကို ဆွေးနွေးကြသည်။ ဥပမာ မီးလျှံလရွှမ်ကောင်းကင်မျိုးနွယ်၏ အမဲလိုက်ပွဲတော်အကြောင်း ဖြစ်သည်။

ထိုအကြောင်းကို ပြောသည့်အခါ တချို့လူများ၏ အမူအရာသည် စိတ်မချမ်းမြေ့သည့်ပုံပေါ်လာသည်။

သတ္တမမင်းသား၏ အကျိုးဆောင်မှုများနှင့် သန့်စင်ရေလှိုင်းမျိုးနွယ်၏ ပြန်ရောက်လာမှုအကြောင်းကိုလည်း သူတို့က ပြောသည်။ သတ္တမမင်းသားသည် စကားပြောနေစဉ်တစ်လျှောက် အမြဲပြုံးထားသည်။

သူတို့သည် အာရုဏ်ဦးနေမင်းနှင့် လူသားမျိုးနွယ်မှ တခြားဒေသငယ်များအကြောင်းကိုလည်း ပြောသည်။

ရံဖန်ရံခါ သူတို့သည် တခြားဒေသကြီးများမှ ထူးဆန်းသော ပုံပြင်များအကြောင်းကို ပြောသည်။

ရွှီချင်းနှင့် ခုန်းရှန်းလုံသည် သူတို့ပြောသော အကြောင်းအရာအများစုကို တစ်ခါမှ မကြားဖူးချေ။ သို့ဖြစ်၍ သူတို့သည် နှုတ်ဆိတ်နေကြသည်။

ယင်းသည် တစ်စုံတစ်ယောက်က ရွှီချင်းအကြောင်းကို မပြောခင်အထိ ဖြစ်သည်။

“ သတ္တမမင်းသား… ငါက တည်ကြည်ဖြောင့်မတ်တဲ့ အကျင့်စရိုက်ရှိပြီး ကြမ်းကြမ်းတမ်းတမ်း ပြောတတ်ပါတယ်… အရင်တုန်းက အရှင့်သားက ငါ့ကို အဲ့ဒီကိစ္စနဲ့ပတ်သက်ပြီး သတိပေးခဲ့ဖူးပါတယ်… ဒါပေမဲ့ အခုထိ အဲ့ဒီအကျင့်ဆိုးကို ငါမပြင်နိုင်သေးပါဘူး… တချို့လူတွေက ကျေးဇူးတရားကို တကယ်ပဲ မသိတတ်ကြဘူး… စက်ဆုပ်ဖို့ကောင်းတယ် ”

ထိုစကားကိုပြောသည့်လူသည် ကောင်းကင်ဘုံအမတ်လော့၏ နောင်သားမျိုးဆက်တစ်ဦး ဖြစ်သည်။ သတ္တမမင်းသားက သူ့ကို မိတ်ဆက်ပေးခဲ့စဉ်က သူ၏ နာမည်သည် လော့ကျင်းစုန်ဖြစ်သည်ဟု ပြောခဲ့သည်။