ဖုန်းဟိုင်ဒေသငယ်ရဲ့ ပြောင်းပြန်အကြေးခွံကို ထိပါးတဲ့လူက သေရမယ်(ခ)

ဤပြောင်းပြန်အကြေးခွံကို ထိပါးလာသည့် မည်သူမဆို တန်ကြေးတစ်ခု ပြန်ပေးဆပ်ရမည်။

တစ်ဖက်လူ၏ သရုပ်က ကောင်းကင်ဘုံအမတ်၏ နောင်သားမျိုးဆက်တစ်ယောက်ဟုတ်သည်ဖြစ်စေ မဟုတ်သည်ဖြစ်စေ ရွှီချင်းသည် ထိုလူကို ယခုအချိန်မှာ သတ်ဖြတ်ပစ်ချင်သည်။

တချို့ကိစ္စများတွင် ထင်သာသော ချဉ်းကပ်မှုကို လိုအပ်ပြီး အမှန်တရားကို အားလုံးသိအောင် ပွင့်ပွင့်လင်းလင်း ပြောပြသင့်သောကြောင့် နောက်ပိုင်းမှ တိတ်တဆိတ် လုပ်ကြံသတ်ဖြတ်ခြင်းကို သူမလုပ်ချင်ပေ။

သို့သော်လည်း ဤနေရာမှာ သူက လူသတ်မည်ဆိုလျှင် အတားအဆီးများစွာဖြင့် ကြုံတွေ့ရမည်ဖြစ်ကြောင်း ရွှီချင်းသိသည်။ သို့ဖြစ်၍ တစ်ခုတည်းသော ဖြစ်နိုင်ခြေမှာ တိုက်ပွဲကို အမြန်ဆုံး အဆုံးသတ်ရန် ဖြစ်သည်။

ထို့ကြောင့် သူက လော့ကျင်းစုန်၏ ရင်ဘက်ကို တိုက်ရိုက် ပစ်မှတ်ထားလိုက်သည်။

လော့ကျင်းစုန်၏ မျက်လုံးသည် မှေးကျဉ်းသွားသည်။ ရွှီချင်း၏ အလျင်သည် သူ့ကို စိုးရိမ်စေသည်။ သူထုတ်လွှတ်နေသော အရှိန်အဝါက သူ့ကို ပိုပြီးသတိထားလာစေသည်။ သို့သော်လည်း သူသည် နည်းနည်းလေးမှ မကြောက်ရွံ့ချေ။ သူက ယုတ်မာစွာ ရယ်မောလိုက်သည်နှင့် သွေးနှင့် ချီသည် သူ၏ တစ်ကိုယ်လုံးမှ ပေါက်ကွဲထွက်လာပြီး သွေးမြူခိုးတစ်ခုသို့ ဖွဲ့စည်းသွားကာ သူ၏ အနောက်မှ ပုံရိပ်ကြီးဆီသို့ တိုးဝင်သွားသည်။

ချက်ချင်းပင် သူ၏ ခန္ဓာကိုယ်ပေါ်မှ အန္တရာယ်အရှိန်အဝါသည် ပိုပြီးနက်ရှိုင်းလာသည်။ တစ်ချိန်တည်းမှာ သူ၏ ခန္ဓာကိုယ်ပေါ်မှ ကြွက်သားများသည် ကြီးထွားလာကြသည်။ ယင်းက မရေမတွက်နိုင်သော သွေးကြောများကို မြင်သာစေသည်။

သူ၏ သွေးမျိုးစက်စွမ်းအားသည် သူ၏ ရုပ်ခွန်အားကို အဆပေါင်းများစွာ တိုးမြှင့်ပေးနိုင်သည်။

သူ၏ သွေးနှင့် ချီက ပေါက်ကွဲထွက်လာသည့်အခိုက် သူ့ခန္ဓာကိုယ်သည် ရုတ်တရက် ကြီးထွားလာပြီး ပေနှစ်ဆယ်နီးပါးထိ ရောက်ရှိသွားသည်။ သူ၏ လက်မောင်းသည် ရွှီချင်း၏ ခါးအရွယ်အစားခန့် ထူထဲသည်။ သူက ရွှီချင်း၏ လက်ကို ဖမ်းဆုပ်ရန် လက်ဆန့်ထုတ်လိုက်သည်။

တစ်ချိန်တည်းမှာ သူက ညာလက်ကို မြှောက်လိုက်ပြီး ရွှီချင်းကို ဖမ်းဆုပ်ရန် ရည်ရွယ်လိုက်သည်။ လက်နှစ်ဖက်၏ လှုပ်ရှားမှုမှ ထွက်ပေါ်လာသော အရှိန်အဟုန်သည် ကြောက်စရာကောင်းသော အင်အားတစ်ခုကို ဖြစ်ပေါ်စေသည်။

သို့သော်လည်း နောက်အခိုက်အတန့်မှာ ရွှီချင်း၏ ခန္ဓာကိုယ်သည် ချက်ချင်း ဝေဝါးလာပြီး ကြည်လင်ပြတ်သားလာသည်။ ယင်းက လော့ကျင်းစုန်၏ လက်များကို ချဉ်းကပ်လာရန် ခွင့်ပြုလိုက်သည်။

လက်နှစ်ဖက်သည် လေကိုသာ ဖမ်းဆုပ်မိသွားသည်။

ရွှီချင်း၏ ခန္ဓာကိုယ်သည် ဤသို့အောက်လမ်းတာအိုပုံစံဖြင့် ဖြတ်သန်းသွားနိုင်စွမ်းရှိသည်။ ထို့အပြင် သူ၏ အလျင်သည် အနည်းငယ်မှ လျော့ကျမသွားခဲ့ချေ။ သူက လော့ကျင်းစုန်ဆီသို့ ဆက်လက်သွားသည်။

လော့ကျင်းစုန်၏ အမူအရာသည် ပြောင်းလဲသွားသည်။ အခြေအနေမဟန်တော့ကြောင်း သူသိလိုက်သည်။ ထို့ကြောင့် သူက အနောက်ဆုတ်ရန် ဟန်ပြင်လိုက်သည်။ သို့သော်လည်း နောက်ကျလွန်းသွားချေသည်။

သို့သော်လည်း သူ၏ တုံ့ပြန်မှုသည် အတော်လေး မြန်ဆန်သည်။ ဒေါသတကြီး ဟိန်းဟောက်လိုက်သည့်အခါ သူ၏ မျက်လုံးသည် ပြူးကျယ်လာသည်။ သူက ပုံရိပ်ယောင်ရွှီချင်းထံသို့ ချဉ်းကပ်သွားသည်။

ချက်ချင်းဆိုသလို သူ၏ အနောက်မှ ပုံရိပ်သည် အနီရောင်အလင်းဖြင့် တောက်ပလာသည်။ ၎င်းက လော့ကျင်းစုန်၏ ခန္ဓာကိုယ်မှ ထွက်ခွာသွားကာ ရွှီချင်းဆီသို့ ခြေတစ်လှမ်း တိုးသွားသည်။

ပုံရိပ်ယောင်သွေးပင်လယ်မှ ဖြစ်ပေါ်လာသော အနီရောင်အလင်းသည် ရွှီချင်းကို ဖိနှိပ်လိုက်သည်။

သို့သော်လည်း မျက်စိတစ်မှိတ်အတွင်းမှာ ရွှေရောင်အလင်းသည် လင်းထိန်လာပြီး ကျင်းကန်းဂိုဏ်းဘိုးဘေး၏ ထိန်းချုပ်ခံထားရသော နတ်ငါးအရိုးဆူးချွန်က ပေါ်ထွက်လာသည်။ ဆူးချွန်သည် သူ၏ အရှေ့မှ သွေးပင်လယ်နှင့် သွေးပုံရိပ်ကို ကြမ်းကြမ်းတမ်းတမ်း ထိုးစိုက်လိုက်သည်။

နတ်ငါးအရိုးဆူးချွန်၏ ထက်ရှမှုနှင့် အဆင့်အတန်းကြောင့် ယင်းက အပူပေးထားသော ဓားဖြင့် တိုဟူးကို ခုတ်ပိုင်းလိုက်သည့်နှယ် သွေးပင်လယ်သော်လည်းကောင်း သွေးပုံရိပ်သော်လည်းကောင်း ချက်ချင်း ထိုးဖောက်ခံလိုက်ရသည်။

ရွှီချင်းသည် ယင်းကို အခွင့်အရေးတစ်ခုအဖြစ် အသုံးချလိုက်လေရာ သူ၏ အောက်လမ်းတာအိုခန္ဓာကိုယ်သည် ပိုပြီးမြန်ဆန်သော အလျင်ဖြင့် ပေါက်ကွဲထွက်လာသည်။ မျက်စိတစ်မှိတ်အတွင်း သူက လော့ကျင်းစုန်၏ ခန္ဓာကိုယ်ကို ဖြတ်သန်းသွားသည်။

လော့ကျင်းစုန်၏ အနောက်တွင် သူက ပြန်ပေါ်လာသည့်အခါ ဝိညာဉ်နတ်သူငယ်တစ်ကောင်သည် သူ၏ လက်ထဲမှာ ရှိနေသည်။

ဤသည်မှာ လော့ကျင်းစုန်၏ ဝိညာဉ်နတ်သူငယ်များအနက် တစ်ကောင်ဖြစ်သည်။

ရွှီချင်းက အကြမ်းပတမ်း ဖျစ်ညှစ်လိုက်သည့်အခါ ဝိညာဉ်နတ်သူငယ်သည် ချက်ချင်း နာကျင်စွာ အော်ဟစ်ညည်းညူလိုက်ပြီး ပြိုကွဲထွက်သွားသည်။ အထဲမှ ကောင်းကင်အာဏာစက်များသည် ရွှီချင်း၏ လက်ထဲသို့ စီးဆင်းသွားပြီး သူ၏ ခန္ဓာကိုယ်ထဲသို့ အမြန်ပေါင်းစပ်သွားကာ သူ့ကို အာဟာရဖြည့်တင်းပေးလိုက်သည်။

ဝိညာဉ်နတ်သူငယ်မှ အကြွင်းအကျန်အပိုင်းအတွက်တော့ ရွှီချင်းသည် လက်တစ်ဖက်ကို ဝှေ့ယမ်းလိုက်သည်။ ထိုအခါ ၎င်းက သာမန်မျက်စိဖြင့် မြင်နိုင်သောအမြန်နှုန်းဖြင့် အနက်ရောင်သို့ ပြောင်းလဲသွားသည်။ အဆုံးမှာတော့ ၎င်းက အနက်ရောင်ပုံရိပ်သို့ ပြောင်းလဲသွားပြီး ရွှီချင်း၏ အနောက်မှာ မျောလွင့်နေသည်။ အေးစက်ခြင်းနှင့် မိစ္ဆာဆန်သော အရှိန်အဝါကို ထိုအနက်ရောင်ပုံရိပ်ထံမှ ထုတ်လွှတ်နေလေသည်။

ဤသည်မှာ သူ၏ ပထမဆုံး ကောင်းကင်မိစ္ဆာခန္ဓာကိုယ်ဖြစ်သည်။

လော့ကျင်းစုန်၏ တစ်ကိုယ်လုံးသည် အပြင်းအထန် တုန်ရီလာသည်။ အကြောက်တရားက သူ၏ မျက်လုံးထဲမှာ ထွက်ပေါ်လာသည်။ သူက ပါးစပ်အပြည့်သွေးကို အန်ထုတ်လိုက်သည်။ သူက အရှေ့သို့ ယိုင်တိယိုင်တိုင် လျှောက်သွားစဉ် သူ၏ တစ်ကိုယ်လုံးသည် အနက်ရောင်သို့ ပြောင်းလဲသွားသည်။ သူ၏ ခန္ဓာကိုယ်ပေါ်မှ အစိတ်အပိုင်းအများစုသည် စတင်ပုပ်သိုးဆွေးမြေ့လာသည်။

“ ဘယ်… ”

သူက စကားပြောတော့မည့်အချိန် ရွှီချင်း၏ ပုံရိပ်သည် ရုတ်ချည်း ပျောက်ကွယ်သွားသည်။ သူက မည်သည့်အသံမှမထွက်ဘဲ လော့ကျင်းစုန်၏ ကြီးမားသော ခန္ဓာကိုယ်အရှေ့မှာ တစ္ဆေတစ်ကောင်ပမာ ဘွားခနဲ ထွက်ပေါ်လာသည်။

ဓားမြှောင်သည် သူ၏ လက်ထဲမှာ ထွက်ပေါ်လာသည်။ သူက ဓားမြှောင်ဖြင့် လော့ကျင်းစုန်၏ လည်ပင်းကို အကြင်နာမဲ့စွာ လှီးဖြတ်လိုက်သည်။

ဦးခေါင်းသည် လေပေါ်သို့ မြှောက်တတ်သွားသည်။

ဦးခေါင်းသည် မြေပြင်ပေါ်သို့ ကျယ်လောင်စွာ ပြန်ပြုတ်ကျလာသည်။ ယင်းက အကြိမ်ရေအနည်းငယ် လိမ့်သွားပြီးနောက် သတ္တမမင်းသားနှင့် မင်းသမီးအန်းဟိုင်၏ အရှေ့မှာ ရပ်တန့်သွားသည်။

ဦးခေါင်း၏ မျက်လုံးသည် ပွင့်နေဆဲဖြစ်ပြီး မယုံကြည်နိုင်ခြင်းနှင့် အကြောက်တရားက အထင်းသား ထွက်ပေါ်နေသည်။ သူခေါင်းဖြတ်ခံလိုက်ရသည့်အခါမှာပင် သူတို့၏ ကျင့်ကြံခြင်းအဆင့်က အတူတူဖြစ်ပြီး သူက သွေးမျိုးစက်စွမ်းအားဖြင့် ရုပ်ခွန်အားကို တိုးမြှင့်ထားသည့်တိုင် အဘယ့်ကြောင့် လျှပ်တစ်ပြက်အတွင်း အသတ်ခံခဲ့ရကြောင်း မစဉ်းစားနိုင်ခဲ့ပေ။

ဓားဒဏ်ရာပေါ်မှ အဆိပ်သည် ပေါက်ကွဲထွက်လာသည်။ မကြာမီ ဦးခေါင်းသည် အနက်ရောင်အရည်သို့ ပြောင်းလဲသွားသည်။

သူ၏ ခန္ဓာကိုယ်သည်လည်း စတင်အရည်ပျော်နေသည်။

သို့သော်လည်း ရွှီချင်းသည် လုံးလုံးလျားလျား စိတ်မအေးနိုင်သေးပေ။ သူက လော့ကျင်းစုန်၏ အဆိပ်မိနေသော ဦးခေါင်းမဲ့ခန္ဓာကိုယ်ကြီးကို ချက်ချင်း ပိုင်းဖြတ်လိုက်သည်။

သို့သော်လည်း သူ၏ ဓားမြှောင်က ခန္ဓာကိုယ်ပေါ်သို့ ကျရောက်သွားသည့်အခါ အက်ကွဲကြောင်းတစ်ခုသည် လော့ကျင်းစုန်၏ ဦးခေါင်းမဲ့နေသော ရင်ဘက်ပေါ်မှာ အမှန်တကယ် ထွက်ပေါ်လာသည်။ ထို့နောက် အနီရောင်မီးတောက်များသည် အက်ကွဲကြောင်းထဲမှ အလျှင်အမြန် ပေါက်ကွဲထွက်လာသည်။

မီးတောက်သည် အံ့မခန်းအရှိန်အဝါဖြင့် ပြည့်နှက်နေသည်။ ယင်းက သေချာပေါက် သာမန်မီးတောက်မဟုတ်ပေ။ မီးတောက်ထွက်ပေါ်လာသည်နှင့်ချက်ချင်း ပြင်းထန်သော အပူလှိုင်းများသည် အရပ်မျက်နှာအသီးသီးသို့ ပျံ့လွင့်သွားကြသည်။ ထို့နောက် မီးတောက်သည် ရွှီချင်းထံသို့ တန်းမတ်စွာ ပျံသန်းသွားပြီး သူ့ကို ဝါးမျိုလိုက်သည်။

တစ်ချိန်တည်းမှာ ပုံမှန်လူတစ်ယောက်၏ အရွယ်အစားရှိသော ပုံရိပ်တစ်ခုသည် လော့ကျင်းစုန်၏ ခန္ဓာကိုယ်ပေါ်ရှိ အက်ကွဲကြောင်းထဲမှ ခုန်ထွက်လာသည်။ သူက မဟူရာရွှေအစီအရင်ပါသော ကောင်းကင်မြေပြင်ဘူးသီးခြောက်ကို လက်ထဲမှာ ကိုင်ထားသည်။ မီးတောက်ပင်လယ်သည် ထိုဘူးသီးခြောက်ထဲမှ ပေါ်ထွက်လာနေခြင်း ဖြစ်သည်။

ထွက်ပေါ်လာသော ပုံရိပ်သည် လော့ကျင်းစုန်နှင့် တစ်ထေရာတည်း ဆင်တူသည်။

သူက ထွက်ပေါ်လာသည်နှင့်ချက်ချင်း အဆိပ်ဖြေဆေးလုံးများစွာကို ချက်ချင်း ထုတ်လိုက်ပြီး အားလုံးကို ဝါးမျိုပစ်လိုက်သည်။ သူက မီးတောက်များ၏ လွှမ်းခြုံခံထားရသော ရွှီချင်းကို အေးစက်စက် မျက်လုံးဖြင့် ကြည့်လိုက်သည်။ သူက စကားပြောရန် ပါးစပ်ဟလိုက်စဉ် သူ၏ အမူအရာသည် လျှပ်တစ်ပြက်အတွင်း ထပ်မံပြောင်းလဲသွားသည်။

ရွှီချင်းကို လွှမ်းခြုံထားသော မီးတောက်ပင်လယ်သည် အလျှင်အမြန် လျော့နည်းလာသည်။ အသက်နှစ်ခါရှူချိန်အတွင်း မီးတောက်အားလုံးသည် ရွှီချင်း၏ ပါးစပ်ထဲသို့ ဝင်ရောက်သွားကြပြီး ဝါးမျိုခံလိုက်ရသည်။

မီးတောက်များပျောက်ကွယ်သွားသည်နှင့် ရွှီချင်း၏ ပုံရိပ်သည် ပြန်ပေါ်လာသည်။ သူ၏ အကြည့်က လော့ကျင်းစုန်ကိုင်ထားသော ကောင်းကင်မြေပြင်ဘူးသီးခြောက်ပေါ်သို့ ကျရောက်သွားသည့်အခါ သူ၏ အမူအရာသည် အနည်းငယ် ထူးဆန်းသွားသည်။ ဤနှစ်များတွင် တစ်ခါမှမဖြစ်ပေါ်ဖူးသော ထူးထူးဆန်းဆန်း အလင်းရောင်သည် ရွှီချင်း၏ မျက်လုံးထဲမှာ ပေါ်လျှိုးလာသည်။

“ လော့မိသားစုက ကျဆင်းလာပြီဆိုပေမဲ့ အတိတ်တုန်းက သူတို့ရဲ့ ကောင်းကင်ဘုံအမတ်ဘိုးဘေးရဲ့ ကျင့်ကြံခြင်းအတတ်ပညာကို နောင်မျိုးဆက်တွေဆီ လက်ဆင့်ကမ်းပေးနိုင်တုန်းပဲ… အဲ့ဒါကို ရွှမ်ကောင်းကင်ဆင့်ကဲအတတ်လို့ခေါ်တယ်… သွေးကြောတွေက အသစ်ပြန်လည်ဖြစ်ပေါ်လာတိုင်း ရုပ်ခန္ဓာကိုယ်က ကောင်းချီးအများကြီး ပိုရလာလိမ့်မယ် ”

မုန့်ယွင်ပိုင်၏ အသံပို့လွှတ်ခြင်းသည် ရွှီချင်း၏ နားထဲသို့ ဝင်ရောက်လာသည်။

ရွှီချင်းသည် ဂရုမစိုက်ချေ။ ထိုအခိုက်အတန့်မှာ ဘေးပတ်ပတ်လည်မှ လူများစွာသည် မတ်တတ်ရပ်လိုက်ကြပြီး အော်လိုက်ကြသည်။

“ ရပ်လိုက်စမ်း ”

“ ဒီလိုဂုဏ်ပြုပွဲအခမ်းအနားမှာ သတ်ဖြတ်တာတွေကို မလုပ်သင့်ဘူး ”

“ မင်းတို့နှစ်ယောက်… ဘယ်ကိစ္စမှာမဆို ဖြေရှင်းဖို့အတွက် အကြမ်းဖက်တာအပြင် တခြားရွေးချယ်စရာတွေ ရှိသေးတယ် ”

လူတချို့သည် အရှေ့သို့ ထွက်လျှောက်လာကြသည်။

အမှန်မှာ စောစောတုန်းက ဆူညံသံများကြောင့် အပြင်ဘက်မှ အစောင့်အကြပ်များသည်ပင် အထဲသို့ ပြေးဝင်လာနေကြသည်။