လူငယ်တွေက သိုင်းပညာအကျင့်သီလမရှိကြဘူး(က)

ထီးနက်သက်စောင့်မီးအိမ်နေရာတွင် အစားထိုး ဖြစ်တည်လာသော နေနာရီသက်စောင့်မီးအိမ်သည် အသက်မြူခိုးထဲတွင် ထိန်လင်းစွာ တောက်ပနေသည်။

ဒိုင်ကွက်ပြားသည် ကျောက်စိမ်းဖြစ်သော်လည်း အလင်းရောင်က တဖျပ်ဖျပ်လင်းလက်သွားသည့်အခါ သလင်းကျောက်ပုံစံ ရေးတေးတေး မြင်ရလာသည်။ ယင်းက ရတနာတစ်ခုပမာ လင်းလက်တောက်ပသည်။

ယင်းက ခရမ်းသလင်းကျောက်နှင့် အနည်းငယ် ဆင်တူသည်ဟု ရွှီချင်းခံစားမိသည်။ ဤသည်မှာ သက်စောင့်မီးအိမ်က ခရမ်းသလင်းကျောက်၏ မျိုးကွဲပုံစံတစ်ခုဖြစ်သည့်အလားပင်။

ထိုအချက်ကို ဤအခိုက်အတန့်မှာ အပြင်းအထန် တုန်လှုပ်နေသော အရိပ်လေးနှင့် (ဃ၁၃၂)ထဲမှာ အိပ်ပျော်နေလျက် ရုန်းကန်လှုပ်ရှားနေသော နတ်ဘုရားလက်ချောင်းကို ကြည့်ခြင်းအားဖြင့် အတည်ပြုနိုင်သည်။

နေနာရီထွက်ပေါ်လာသည်နှင့် ခရမ်းသလင်းကျောက်သည်လည်း အပြောင်းအလဲတချို့ ဖြစ်ပေါ်လာဟန် ရသည်။

မည်သို့ပြောင်းလဲသွားကြောင်းကိုတော့ ရွှီချင်းသည် အသေးစိတ် မသိပေ။

သို့သော်လည်း နေနာရီပေါ်မှ ရွှေရောင်အပ်သည် သူနှင့်အတူ အရင်းအမြစ်တစ်ခုတည်းမှ ဆင်းသက်လာသော နတ်ငါးအရိုးဆူးချွန်နှင့် ဆင်တူသည်ဟု ရွှီချင်း ရှင်းလင်းစွာ အာရုံခံမိသည်။

ဤသည်မှာ ရွှေရောင်အပ်က သူ၏ သွေးမျိုးစက်မှ ပြောင်းလဲသွားသောအရာ ဖြစ်သည်။

နေနာရီလက်တံသည် ရုတ်တရက် ကြည့်လိုက်မည်ဆိုလျှင် အပ်တစ်ချောင်းနှင့် ဆင်တူသည်။ သို့သော်လည်း ၎င်း၏ ထိပ်ဖျားပေါ်တွင် သေးငယ်သော ထွင်းထုရာတစ်ခု ရှိသည်။

အကယ်၍ ၎င်းကို အဆပေါင်းများစွာ အကျယ်ချဲ့ကြည့်မည်ဆိုလျှင် ထိပ်ဖျားပေါ်မှာ သာမန်ခရမ်းရောင်ထိုင်ခုံတစ်လုံးရှိသည်ကို ရှင်းရှင်းလင်းလင်း မြင်ရလိမ့်မည်။

ရွှီချင်း၏ အကြည့်သည် အေးခဲသွားသည်။

နေနာရီလက်တံ၏ အနီးနားပတ်ဝန်းကျင်တွင် မျောလွင့်နေသော အလင်းဘောလုံးသည်တော့ ယင်းက နေလုံးနှင့် ဆင်တူသည်။ ယင်းက နေနာရီလက်တံကို ဖြည်းညင်းစွာ လှည့်ပတ်နေသောကြောင့် ကျောက်စိမ်းဒိုင်ကွက်ပြားပေါ်တွင် လက်တံ၏ အရိပ်က ထင်ပေါ်နေသည်။

ရှုပ်ထွေးသော မျက်နှာပြင်ပေါ်တွင် ယင်းက ရှင်းလင်းစွာ ရွေ့လျားနေခြင်း ဖြစ်သည်။

ရွှီချင်း၏ နှလုံးသည် အပြင်းအထန် လှုပ်ခါလာသည်။

သူဖန်တီးလိုက်သော သက်စောင့်မီးအိမ်က မည်သို့ကြောင့် ထိုသို့ပုံစံဖြစ်လာရသလဲဟူသော အဖြေကို အနည်းငယ် သူမှန်းဆမိသည်။

ထိုအရာအားလုံးသည် ခရမ်းသလင်းကျောက်ကြောင့် ဖြစ်သည်။

“ အဲ့ဒါက ခရမ်းသလင်းကျောက်နဲ့ ငါ့သွေးမျိုးစက် ပေါင်းစပ်ပြီးနောက် ဖြစ်ပေါ်လာတဲ့ပုံစံလား ”

“ ပြီးတော့ သူ့ရဲ့အရှိန်အဝါက… ”

ရွှီချင်းသည် စိတ်ထဲမှ တီးတိုးရေရွတ်လိုက်သည်။ နေနာရီလက်တံ၏ အရိပ်က ရွေ့လျားသွားနေသည့်အခါ အချိန်ပုလင်းနှင့် တူညီသော အရှိန်အဝါတစ်ခုသည် သူ၏ သက်စောင့်မီးအိမ်ထံမှ ထုတ်လွှတ်လာသည်။

ဤသည်မှာ အချိန်ဖြစ်သည်။

သို့သော်လည်း ယင်းက အပြင်လောကမှ အချိန်နှင့် မတူညီပေ။

နေနာရီလက်တံက လှည့်ပတ်လာသည့်အခါ ကြီးမားသော စွမ်းအားသည် သက်စောင့်မီးအိမ်အတွင်းမှာ ပေါ်လျှိုးလာသည်။ ယင်းက ရွှီချင်း၏ အသိစိတ်ပင်လယ်ပေါ်သို့ သက်ရောက်လာပြီး လှုပ်ယမ်းသွားစေသည်။

ယင်းက သူ၏ ရုပ်ခန္ဓာကိုယ်ပေါ်သို့လည်း လွှမ်းခြုံလာပြီး တုန်ရီသွားစေသည်။

ယင်းက အပြင်လောကကိုလည်း သက်ရောက်သွားလေရာ ပေတစ်သောင်းရှည်လျားသော ဝဲကတော့သည် တုန်လှုပ်ချောက်ချားဖွယ်ကောင်းသော လှည့်ပတ်မှုနှင့်အတူ ဘေးပတ်ဝန်းကျင်ကို သီးခြားခွဲထုတ်ပစ်လိုက်သည်။ ယင်းက ဤဧရိယာအတွင်းမှ အချိန်ကို ရွှီချင်းနှင့် အတင်းအကျပ် ထပ်တူကျစေသည်။

ရလဒ်အနေဖြင့် ပေတစ်သောင်းအချင်းဝက်ရှိသော ဤဧရိယာ၏ အတွင်းနှင့်အပြင်ဘက်တွင် ကမ္ဘာနှစ်ခု ပေါ်ထွက်လာသည့်အလား အနားစွန်းများတွင် အပျက်အစီးများ ဖြစ်ပေါ်လာပြီး ပေါက်ကွဲမှုများ ထွက်ပေါ်လာကြသည်။ ယင်းက အရာအားလုံးကို ပုံပျက်တွန့်လိမ်စေသည်။

ဤသည်မှာ ဝမ်ကူးကုန်းမြေ၏ နိယာမများက ဤလောကထဲတွင် အသစ်မွေးဖွားလာသော သက်စောင့်မီးအိမ်မှ နိယာမများနှင့် ပွတ်တိုက်သွားရာမှ ဖြစ်ပေါ်လာသော သဘာဝလွန်အဖြစ်အပျက် ဖြစ်သည်။ မတူညီသော သက်စောင့်မီးအိမ်များက မတူကွဲပြားသော သဘာဝလွန်အဖြစ်အပျက်များကို ဖြစ်ပေါ်စေလိမ့်မည်။ ဤသည်မှာ ဝမ်ကူးကုန်းမြေ၏ အသိအမှတ်ပြုမှုလည်း မည်၏။

လူအနည်းစုသာလျှင် ဤမြင်ကွင်းကို မှတ်မိကြလိမ့်မည်။ မည်သို့ဖြစ်ပါစေ ရှေးခေတ်ကာလကတည်းက ဤသို့သဘာဝလွန်အဖြစ်အပျက်များကို ကိုယ်တိုင်မျက်မြင်တွေ့ဖူးသူသည် လူနည်းစုသာလျှင် ရှိသည်။

ပေတစ်သောင်းကျယ်ဝန်းသော ဝဲကတော့၏ အလယ်တွင် ရွှီချင်းသည် လက်ရှိ တင်ပျဉ်ခွေလျက် ထိုင်နေသည်။ သူ၏ တစ်ကိုယ်လုံးသည် ခရမ်းရောင်အလင်း တောက်ပနေသည်။ ဆန်းကြယ်သော အရှိန်အဝါတစ်ခုသည် သူ့အပေါ်သို့ စိမ့်ဝင်ပျံ့နှံ့နေသည်။ သူ၏ နှလုံးသားထဲတွင် တည်ငြိမ်ရန် ငြင်းဆန်နေသော ခံစားချက်လှိုင်းများက အစဉ်မပြတ် ပေါ်လျှိုးလာနေသည်။

ရွှီချင်းသည် သူ၏ အသိစိတ်ပင်လယ်ထဲတွင် ထွန်းလင်းတောက်ပနေသော နေနာရီကို ကြည့်လိုက်သည်။ ယင်းက သူ၏ သွေးမျိုးစက်နှင့် ခရမ်းသလင်းကျောက်၏ ပေါင်းစပ်မှုမှ ဖြစ်ပေါ်လာခြင်းဟုတ်မဟုတ် သူမသေချာပေ။ သို့သော်လည်း နေနာရီ၏ တူညီသော အရင်းအမြစ်မှ ထွက်ပေါ်လာနေသော ခံစားမှုသည် ယင်းက သူ့ကိုယ်ပိုင် သက်စောင့်မီးအိမ်ဖြစ်ကြောင်း ရွှီချင်းကို ရှင်းလင်းစွာ နားလည်စေသည်။

ယင်းက တခြားသက်စောင့်မီးအိမ်များကို သူရရှိခဲ့စဉ်က ခံစားချက်နှင့် လုံးဝကွဲပြားသည်။

တခြားသက်စောင့်မီးအိမ်များသည် ရွှီချင်း၏ ခန္ဓာကိုယ်နှင့် ပေါင်းစပ်ထားသော်လည်း မည်သို့ဖြစ်ပါစေ ၎င်းတို့က ရွှီချင်း၏ သွေးမျိုးစက်နှင့် ဘာမှမသက်ဆိုင်ချေ။ ရွှီချင်းအတွက်တော့ ၎င်းတို့က သက်မဲ့ပစ္စည်းများသာ ဖြစ်ကြသည်။

သူက ၎င်းတို့ထံမှ စွမ်းအားကို ငှားယူနိုင်သော်လည်း မည်သို့ဖြစ်ပါစေ ၎င်းတို့၏ အစစ်အမှန်ပိုင်ရှင်သည် သူမဟုတ်ချေ။

သို့ဖြစ်၍ ဝမ်ကူးကုန်းမြေမှ ကျင့်ကြံသူများအတွက် သက်စောင့်မီးအိမ်သည် အထွတ်အမြတ်ရတနာတစ်ခု ဖြစ်သော်လည်း ယင်းက ဝိညာဉ်သိုက်အဆင့်အောက်မှ ကျင့်ကြံသူများအတွက်သာ အသုံးဝင်သည်။

ဝိညာဉ်သိုက်အဆင့်ကျင့်ကြံသူများအတွက် သက်စောင့်မီးအိမ်များသည် အသုံးမဝင်ချေ။ သူတို့သည် ကမ္မကို လျှော့ချရန် ၎င်းတို့ကို သူတို့၏ ခန္ဓာကိုယ်ထဲမှပင် ထုတ်ပစ်ရလိမ့်မည်။

ဤသည်မှာ သူတို့ကိုယ်ပိုင်မဟုတ်သော သက်စောင့်မီးအိမ်များကို ကျင့်ကြံသောလူများအတွက် အခြေခံနားလည်မှုဖြစ်သည်။

သို့သော်လည်း ယခုတော့ ရွှီချင်း၏ အခြေအနေသည် ခြားနားသွား၏။

ထိုသက်စောင့်မီးအိမ်သည် သူ၏ သွေးမျိုးစက်မှ မွေးဖွားလာခြင်း ဖြစ်သည်။ ယင်းက ဝိညာဉ်သိုက်အဆင့်သို့ သူတတ်လှမ်းသွားသည့်အခါ ဧရာမမီးဖိုအဖြစ် ပြောင်းလဲသွားနိုင်သည်။ ဤသည်မှာ ရှေးဟောင်းအုပ်ချုပ်သူများနှင့် တူညီသော အခြေခံအုတ်မြစ်ချမှု ဖြစ်သည်။

မီးဖို၏ အကူအညီဖြင့် ရွှီချင်းက ဝိညာဉ်သိုက်အဆင့်သို့ ဝင်ရောက်သည့်အခါ သူက အားလုံးကို လျှို့ဝှက်ရတနာသိုက်ထဲသို့ ထည့်သွင်းပြီး သူ့ကိုယ်ပိုင်အဖြစ် သန့်စင်ပစ်နိုင်မည်။ ထိုနည်းဖြင့် သူ၏ လျှို့ဝှက်ရတနာသိုက်သည် ပိုပြီးအားကောင်းလာလိမ့်မည်။ ယင်းက သူ့အတွက် အသန်မာဆုံးလမ်းစဉ်ကို ဖွင့်လှစ်ပေးလိမ့်မည်။

ဤသည်မှာ ရှေးဘုရင်များနှင့် ရှေးဟောင်းအုပ်ချုပ်သူများ၏ နောင်သားမျိုးဆက်များသာ ရရှိနိုင်သော တုနှိုင်းမဲ့ အားသာချက်ကြီးတစ်ခု ဖြစ်သည်။

ရွှီချင်းသည် ပို၍အခွင့်အလမ်း များသည်။ သူသည် ရှေးဘုရင်များနှင့် ရှေးဟောင်းအုပ်ချုပ်သူများ၏ ကောင်းချီးရရှိထားသော နောင်သားမျိုးဆက်မဟုတ်ပေ။ သူက ထိုကောင်းချီးကို ကိုယ်တိုင်ကိုယ်ကျ ရှာတွေ့ခဲ့သူ ဖြစ်သည်။ သို့ဖြစ်၍ ဤသက်စောင့်မီးအိမ်တွင် သူ၏ ရှာဖွေဖော်ထုတ်မှုကို စောင့်ဆိုင်းနေသော လျှို့ဝှက်ချက်များစွာ ရှိနေသေးသည်။

ယခု သူအာရုံခံနိုင်သည်မှာ သူ၏ သက်စောင့်မီးအိမ်က အချိန်နှင့်ဆက်စပ်သော စွမ်းအားရှိကြောင်းသာ ဖြစ်သည်။

၎င်း၏ အစွမ်းကိုတော့ သူမစမ်းသပ်ကြည့်ရသေးပေ။ သို့သော်လည်း သူ၏ မသိစိတ်မှတဆင့် သူ့သက်စောင့်မီးအိမ်၏ တိုက်ခိုက်စွမ်းအားသည် တခြားသက်စောင့်မီးအိမ်များနှင့် အတူတူဖြစ်ကြောင်း သူ့အား နားလည်စေခဲ့သည်။ ယင်းက ကျင့်ကြံခြင်းအဆင့်ကို လျစ်လျူရှုနိုင်ပြီး အားလုံးကို ဖိနှိပ်နိုင်သော စွမ်းအားကို ရုတ်ချည်း ပိုင်ဆိုင်သွားစေနိုင်မည့် သက်စောင့်မီးအိမ်အမျိုးအစား မဟုတ်ပေ။

ထိုအကြောင်းနှင့်ပတ်သက်ပြီး ရွှီချင်းသည် အနည်းငယ် နောင်တရမိသည်။

သို့သော်လည်း ယင်းက ယုတ္တိမဆန်ကြောင်း သူနားလည်သည်။

“ ငါ့ကိုယ်ပိုင်သက်စောင့်မီးအိမ်နဲ့ တခြားသက်စောင့်မီးအိမ်တွေရဲ့ အဓိကခြားနားချက်ကတော့ အသက်ရှိတာနဲ့ အသက်မဲ့တာ ကွာတာပဲ… ငါ့အတွက် တခြားသက်စောင့်မီးအိမ်တွေက သက်မဲ့ပစ္စည်းတွေ… အဲ့ဒါတွေက တိုးတတ်ဖို့ ဘာအလားအလာမှမရှိဘူး… စွမ်းအားငှားပေးနိုင်ရုံသက်သက်ပဲ ”

“ ဒါပေမဲ့ ငါ့သက်စောင့်မီးအိမ်ကတော့ ငါ့ရဲ့အသက်စွမ်းအင်နဲ့အတူ ယှဉ်တွဲတည်ရှိတယ်… အဲ့ဒါက အကန့်အသတ်မဲ့တဲ့ အလားအလာကို ပိုင်ဆိုင်ပြီး ငါနဲ့အတူ ကြီးထွားနိုင်တယ် ”

“ အချိန်စွမ်းအားကတော့ အဲ့ဒါက ခရမ်းသလင်းကျောက်ကနေ ရလာတာဖြစ်မယ် ”

ရွှီချင်းသည် နှုတ်ဆိတ်သွားသည်။ အသေးစိတ်ကိုတော့ ဤနေရာက ကျင့်ကြံခြင်းမှာ လုံးဝစိတ်နှစ်မြှုပ်ထားပြီး စဉ်းစားချင့်ချိန်ရန် သင့်တော်သော ပတ်ဝန်းကျင်မဟုတ်ကြောင်း သူသိသည်။ မည်သို့ဖြစ်ပါစေ ဤပတ်ဝန်းကျင်တွင် ပေတစ်သောင်းဝဲကတော့သည် အလွန်မျက်စိဖမ်းစားနိုင်သည်။

လင်းအာသည် အလျှင်အမြန် အသံပို့လွှတ်လိုက်သည်။

“ အကိုရွှီချင်း မြန်မြန်ပြေးတော့… လူဆိုးကောင်တွေ ဒီရောက်လာကြပြီ… လူဆိုးကောင်တွေက အရေအတွက် အများကြီးပဲ ”

လင်းအာ၏ အသံထဲမှာ စိုးရိမ်ပူပန်ခြင်းဖြင့် ပြည့်နှက်နေသည်။

ရွှီချင်း၏ ခန္ဓာကိုယ်ထဲမှ ကောင်းကင်ဘုံတာအို မိုဆာဆော၏ သတိပေးမှုက ပြင်းထန်လာသော်လည်း ယင်းက လွန်ခဲ့သောရက်များတုန်းကနှင့် အတူတူသာ ဖြစ်သည်။ ယခုအချိန်တွင် ယင်းက အများကြီး ပြောင်းလဲသွားခြင်း မရှိပေ။

သို့ဖြစ်၍ ဤကဲ့သို့ အာရုံခံသည့်အပိုင်းတွင် လင်းအာ၏ စိတ်အာရုံက ပိုပြီးတိကျကြောင်း ထင်ရှားပေသည်။