မီးတောက်ပင်လယ်အောက်မှ ကြေးနီခေါင်းတလား(ဂ)

သို့သော်လည်း ရွှီချင်းနှင့် နှိုင်းယှဉ်လျှင် အမျိုးသမီးသည် အများကြီး ပိုမြန်ဆန်သည်။ သို့ဖြစ်၍ သူက သတ်မှတ်ထားသော ဧရိယာဆီသို့ စောစီးစွာ ဝင်ရောက်သွားသည်။

ချော်ရည်အောက်တွင် နတ်ဘုရားအသိစိတ်သည် တားဆီးခံထားရမည်။ သို့ဖြစ်၍ သူတို့နှစ်ယောက်သည် တစ်ခြားတစ်ယောက်၏ တည်ရှိမှုကို အာရုံမခံမိကြချေ။ ထို့ပြင် သူတို့နှစ်ယောက်၏ ကြီးပြင်းလာသော ပတ်ဝန်းကျင်က မတူညီသောကြောင့် နတ်အစေခံ၏ သတိထားမှုသည် ရွှီချင်းထက် နိမ့်ကျပေသည်။

သို့ဖြစ်၍ သတိကြီးစွာထား၍ ရွေ့လျားနေသော ရွှီချင်းက အနီရောင်လစွမ်းအားကို သူအာရုံခံမိသောနေရာသို့ မြင်လိုက်သည်နှင့်ချက်ချင်း ထိုနေရာသို့ ဦးတည်သွားနေသော အနီရောင်ဝတ်စုံနှင့် အမျိုးသမီးတစ်ယောက်ကိုလည်း မြင်သွားသည်။

ရွှီချင်းသည် ရွေ့လျားနေခြင်းကို ချက်ချင်း ရပ်တန့်လိုက်သည်။ သူက ဆောင့်ကြောင့်ထိုင်လိုက်ပြီး သူ၏ ခန္ဓာကိုယ်ကို ပိုပြီးသေးငယ်သွားရန် အကောင်းဆုံး ကြိုးစားလိုက်သည်။

သူက ဘေးပတ်ဝန်းကျင်ကို တိတ်တဆိတ် လေ့လာနေစဉ် အနက်ရောင်ပုံရိပ်သည် သူ၏ မျက်လုံးထဲမှာ ထွက်ပေါ်လာသည်။

အဝေးတွင် အလွန်ကြီးမားသော တောင်တစ်လုံး ရှိသည်။ သို့သော် တောင်သည် ပိရမစ်ပုံစံမဟုတ်ပေ။ ယင်းအစား လေးထောင့်ပုံစံ ရှိသည်။

အတိအကျဆိုရလျှင် ယင်းက တောင်မဖြစ်နိုင်ပေ။ ထောင်မတ်နေသော ဧရာမခေါင်းတလားတစ်လုံးသာ ဖြစ်သည်။

ရွှီချင်း၏ မျက်လုံးထဲတွင် ထင်ဟပ်နေသော အစိတ်အပိုင်းသည်ပင် မြို့တစ်မြို့၏ အရွယ်အစားရှိလေရာ ထိုခေါင်းတလားကြီးက မည်မျှကြီးမားကျယ်ပြောကြောင်း စိတ်ကူးကြည့်နိုင်ပေသည်။

ခေါင်းတလားတစ်ခုလုံးကို ကြေးနီဖြင့် ပြုလုပ်ထားသည်။ ခေါင်းတလား၏ မျက်နှာပြင်ကို အနက်ရောင်၊ အစိမ်းရောင်နှင့် အပြာရောင်ဟူသော အရောင်သုံးရောင် အတူရောထွေးနေသည့် သံချေးဖြင့် ဖုံးလွှမ်းနေသည်။ ယင်းက ခေါင်းတလားကို ရှေးခေတ်အငွေ့အသက်အား ပေးသည်။

ဤသည်မှာ ခေါင်းတလားက ဤနေရာတွင် နှစ်ပေါင်းမရေမတွက်နိုင်အောင် တည်ရှိနေခဲ့သည့်အလားပင်။

ခေါင်းတလား၏ အလျားကိုတော့ မသိရပေ။ ရွှီချင်းက ခြုံငုံကြည့်လိုက်သည့်အခါ ခေါင်းတလား၏ ထောင့်လေးထောင့်တွင် ချော်ရည်၏ နက်ရှိုင်းသော အပိုင်းများနှင့် ဆက်သွယ်ထားသော သံကြိုးထူထူလေးချောင်းရှိကြောင်း သူမြင်သွားသည်။

ထို့ပြင် ခေါင်းတလား၏ အဖုံးကို တင်းတင်းကျပ်ကျပ် မပိတ်ထားပေ။ ယင်းအစား အဟတစ်ခု ရှိသည်။

သို့သော်လည်း ခေါင်းတလားက အလွန်အမင်း ကြီးမားသောကြောင့် ထိုအဟသည် နက်ရှိုင်းသော ချောက်နက်တစ်ခုနှင့် ဆင်တူသည်။

ဤအခိုက်အတန့်မှာ ဝတ်စုံနီအမျိုးသမီးသည် အက်ကြောင်း၏ အပြင်ဘက်တွင် ဆင်းသက်လိုက်ပြီး ယင်းနှင့် ပေတစ်ထောင်အကွာတွင် မျောလွင့်နေလိုက်သည်။

သူက လက်နှစ်ဖက်ဖြင့် ချိပ်တံဆိပ်လက်သင်္ကေတများစွာကို ဖွဲ့စည်းလိုက်လေရာ အနီရောင်လ၏ နတ်ဘုရားစွမ်းအင်လှိုင်းများသည် အရပ်မျက်နှာအဘက်ဘက်သို့ ပျံ့လွင့်သွားသည်။

ယင်းက ဤနေရာတွင် နဂိုကတည်းကရှိနေပြီးသော သဏ္ဍာန်မဲ့အချုပ်အနှောင်စည်းများနှင့် ပေါင်းစပ်သွားပြီး ဤနေရာတစ်ခုလုံးကို အနီရောင်လင်းထိန်သွားစေသည်။ ထို့နောက် ကြီးမားသော ကွန်ချာတစ်ခုသည် တဖြည်းဖြည်း ဒြပ်ထည်ဖွဲ့စည်းလာသည်။

ထိုကွန်ချာကို ဤနေရာမှ အချုပ်အနှောင်စည်းများဖြင့် ဖွဲ့စည်းထားခြင်း ဖြစ်သည်။

အနီးကပ် သေချာကြည့်မည်ဆိုလျှင် ကြီးမားသော ထိုကွန်ချာသည် နတ်ဘုရားအစွမ်းကို ထုတ်လွှတ်နေသော မှော်သင်္ကေတများဖြင့် ပြည့်နှက်နေကြောင်း မြင်တွေ့ရလိမ့်မည်။

ရွှီချင်းသည် သူ့ကိုယ်သူ ဖုံးကွယ်လိုက်ပြီး သေချာစူးစမ်းလေ့လာသည်။ တစ်ဖက်လူက ဤနေရာမှ အချုပ်အနှောင်စည်းများကို အားဖြည့်တင်းပေးနိုင်ကြောင်း သူပြောနိုင်သည်။ သို့သော်လည်း ထိုနတ်ဘုရားအစွမ်းသည် ရေပုံးထဲမှ ရေတစ်စက်မျှသာ ဖြစ်သည်။

သို့သော်လည်း များမကြာမီ ရွှီချင်း၏ မျက်လုံးသည် မှေးကျဉ်းသွားသည်။ ဝတ်စုံနီအမျိုးသမီးသည် ချိပ်တံဆိပ်လက်သင်္ကေတများကို ဖွဲ့စည်းပြီးနောက် လူ့ဦးခေါင်းခွံအရွယ်အစားရှိသော အနီရောင်သလင်းကျောက်တစ်ခုကို ထုတ်ယူလိုက်ကြောင်း သူမြင်သွားသည်။

ထိုသလင်းကျောက် ထွက်ပေါ်လာသည်နှင့်ချက်ချင်း ဘေးပတ်ဝန်းကျင်မှ ချော်ရည်သည် ပွက်ပွက်ဆူလာပြီး ယင်းက ကြောက်မက်ဖွယ်ကောင်းသော အရှိန်အဝါကို ထုတ်လွှတ်လာသည်။ ထိုသလင်းကျောက်ကို မြင်သွားသည့်အခိုက် ရွှီချင်း၏ နှလုံးသည်ပင် တုန်ယင်သွားသည်။

အပြင်လူများသည်တော့ ယင်းကို မသိနိုင်လောက်ပေ။ သို့သော်လည်း ခရမ်းလ၏ အာရုံခံစားမှုမှတဆင့် ထိုအနီရောင်သလင်းကျောက်သည် အကြိမ်ပေါင်းမရေမတွက်နိုင်အောင် အားလျော့ခံထားရသော သွေးတစ်စက်မှ ဖြစ်တည်လာခြင်းဖြစ်ကြောင်း ချက်ချင်း သူသိလိုက်သည်။

“ နီလာနတ်သမီးရဲ့ သွေးလား ”

ရွှီချင်း၏ နှလုံးခုန်သံသည် မြန်ဆန်လာသည်။ ယင်းက အကြိမ်ပေါင်းများစွာ အားလျော့ခံထားရသော်လည်း ထိုထဲတွင် ပါဝင်သည့် အနီရောင်လ၏ အရှိန်အဝါသည် ပြောမပြနိုင်အောင် အလွန်သိပ်သည်းနေဆဲပင်။ ရွှီချင်းအတွက်တော့ ယင်းသည် ကြီးမားသော အာဟာရဖြည့်တင်းမှု ဖြစ်သည်။

ရွှီချင်းက အာရုံစိုက်နေစဉ် ဝတ်စုံနီအမျိုးသမီးသည် သလင်းကျောက်ကို လိုချင်တပ်မက်စွာ ကြည့်လိုက်သည်။

သို့သော်လည်း သူက အလိုရမ္မက်ဆန္ဒကို အတင်းအကျပ် ချိုးနှိမ်လိုက်သည်။ ဤပစ္စည်းသည် သူခံစားခွင့်ရှိသော အရာမဟုတ်ကြောင်း သိသည်။

“ အဆင့်မြင့်နတ်ဘုရားက ဒီရောက်လာပြီး ဒေသကြီးကို လာရိတ်သိမ်းတဲ့အခါ ငါ့မိသားစုလည်းပဲ ဒီလိုနတ်ဘုရားသွေးတစ်စက်ကို ရရှိနိုင်လောက်ပါတယ်… အဲ့ဒီအခါ ငါလည်းပဲ အမျှင်တစ်ခုလောက်တော့ စုပ်ယူနိုင်ဖို့ အခွင့်အရေးရနိုင်လောက်မယ် ထင်တယ် ”

ဝတ်စုံနီအမျိုးသမီးသည် စိတ်ထဲမှ တီးတိုးရေရွတ်လိုက်ပြီး သလင်းကျောက်ကို အောက်ဘက်သို့ ပစ်ချလိုက်သည်။

သလင်းကျောက်သည် အက်ကြောင်းထဲသို့ ပြုတ်မကျသွားပေ။ ယင်းအစား သလင်းကျောက်က ချောက်နက်၏ အပြင်ဘက်မှာ မျောလွင့်နေပြီး သူ့ဘာသာ အလိုအလျောက် အက်ကွဲထွက်သွားကာ ကြောက်မက်ဖွယ်ကောင်းသော စွမ်းအင်လှိုင်းတစ်ခုကို ထုတ်လွှတ်လိုက်သည်။

ယင်းက ဘေးပတ်ဝန်းကျင်မှ အချုပ်အနှောင်စည်းများထဲသို့ ပေါင်းစပ်သွားသောအခါ ပိုပြီးလင်းထိန်သော အနီရောင်ကွန်ချာတစ်ခု ဖြစ်ပေါ်လာသည်။

ယင်းသည်သာ အစစ်အမှန် အားဖြည့်တင်းမှု ဖြစ်သည်။

သွေးနီကွန်ချာက မျက်စိကျိန်းစပ်လုနီးပါး ထွန်းလင်းတောက်ပလာပြီး နတ်ဘုရားအစွမ်းက တိုးမြှင့်လာသောအခါ ထိုအရှိန်အဝါကြောင့် ဧရာမခေါင်းတလားသည်လည်း နိုးထလာပြီး ရုတ်တရက် လှုပ်ခါလာသည်။

နာကျည်းသော စိတ်ဆန္ဒဖြင့် ဒေါသတကြီး ဟိန်းဟောက်သံသည် ခေါင်းတလားထဲမှ ပဲ့တင်ထပ်လာသည်။

“ နီလာနတ်သမီး ”

ဟိန်းသံထွက်ပေါ်လာသည်နှင့်ချက်ချင်း ခေါင်းတလားသည် ပိုပြီးပြင်းထန်စွာ လှုပ်ခါလာသည်။ ရွှီချင်း၏ နှလုံးသည်လည်း တုန်ယင်လာသည်။ သူ၏ စူးစမ်းချင်စိတ်က ပိုပြီးပြင်းထန်လာသည့်အခါ ဝတ်စုံနီအမျိုးသမီးသည် ခေါင်းငုံ့လိုက်ပြီး အဝေးမှ ချောက်နက်ကို ကြည့်လိုက်ကာ သူ၏ နတ်ဘုရားအာရုံကို ပို့လွှတ်လိုက်သည်။

“ ပါးစပ်ပိတ်ထားစမ်း ”

ပြင်းထန်သော အသက်ရှူသံသည် ခေါင်းတလားထဲမှ ပဲ့တင်ထွက်လာသည်။ သိသာစွာပင် အဆင့်နိမ့်ကျင့်ကြံသူတစ်ယောက်ထံမှ ထိုသို့အစော်ကားခံရခြင်းသည် ခေါင်းတလားထဲမှ တည်ရှိမှုကို အကြီးအကျယ် ဒေါသထွက်သွားစေသည်။

သို့သော်လည်း သူသည် အကူအညီမဲ့၏။

သရော်လှောင်ပြောင်သော အကြည့်သည် ဝတ်စုံနီအမျိုးသမီး၏ မျက်လုံးထဲမှာ ထွက်ပေါ်လာသည်။ သူ့အတွက် ကြောက်စရာကောင်းသော ရှေးခေတ်တည်ရှိမှုကို ထိုသို့အနိုင်ကျင့်စော်ကားခြင်းသည် ကြီးမားသော ပျော်ရွှင်မှုကို ဖြစ်ပေါ်စေသည်။ သို့ဖြစ်၍ သူက လက်ဝှေ့ယမ်းလိုက်ပြီး သိုလှောင်အိတ်ထဲမှ လတ်ဆတ်သော အသားတုံးများကို ထုတ်ယူလိုက်သည်။

အသားတုံးများသည် စုစုပေါင်း တစ်ရာရှိသည်။ အသားတုံးတစ်ခုစီသည် ပေတစ်ရာအရွယ်အစားခန့် ကြီးမားကြသည်။ ယင်းတို့က ဘေးပတ်ဝန်းကျင်သို့ ပျံ့လွင့်သွားသောအခါ အမျိုးသမီးသည် သူ၏ လက်ကို မြှောက်တင်လိုက်ပြီး လက်ညှိုးညွှန်လိုက်သည်။ ထိုအခါ အသားတုံးတစ်တုံးသည် ချောက်နက်ထဲသို့ ချက်ချင်း ကျဆင်းသွားသည်။

“ စားစမ်း… အဲ့ဒါက အဆင့်မြင့်နတ်ဘုရား နင့်ကိုကျွေးတဲ့ အစားအစာပဲ… သူတို့အားလုံးက လဝတ်ပြုဒေသကြီးက ပြည်သူပြည်သားတွေပဲ… နင့်ရဲ့ ညီအကိုတွေ ညီအမတွေလည်း နင့်လိုပဲ အဲ့ဒါကို စားရတာကို သဘောကျကြတယ် ”

“ ပြီးတော့ နင်တို့တွေ ကောင်းကောင်းမွန်မွန် အစာချေနိုင်အောင်လို့ ငါတို့က အရိုးတွေတောင်မှ ဖယ်ထားပေးသေးတယ် ”

“ ပျော်ပျော်ရွှင်ရွှင် စားစမ်း ”

အသားတုံးက ချောက်နက်ထဲသို့ ပြုတ်ကျသွားသည့်အခါ နာကျည်းဒေါသထွက်သော အော်သံသည် ခေါင်းတလားထဲမှ မြည်ဟိန်းထွက်လာသည်။ ခေါင်းတလားထဲမှ တည်ရှိမှုသည် ငြင်းဆန်ရန် အကောင်းဆုံး ကြိုးစားနေသည့်အလားပင်။

သို့သော်လည်း အကြောင်းအရင်းတချို့ကြောင့် အသားတုံးကို ဝါးမျိုရန်မှတပါး သူ့မှာ တခြားရွေးချယ်စရာ မရှိပေ။

သို့ဖြစ်၍ တအင့်အင့် ငိုရှိုက်သံနှင့် ဝါးစားသံသည် အတူတကွ ရောထွေးသွားပြီး နှလုံးကြေကွဲဖွယ်ကောင်းသော မြင်ကွင်းတစ်ခုကို ဖြစ်ပေါ်လာစေသည်။

ကြီးမားသော နာကျည်းဒေါသဖြစ်မှုသည် ခေါင်းတလားထဲမှ ပျံ့လွင့်ထွက်လာသည်။ ယင်းက အမှတ်အသားတစ်ခုအဖြစ်သို့ ပြောင်းလဲသွားပြီး ဝတ်စုံနီအမျိုးသမီးပေါ်သို့ တံဆိပ်ခတ်နှိပ်လိုက်လေရာ ခေါင်းတလားထဲမှ တည်ရှိမှုသည် အမျိုးသမီးကို အမြဲတမ်း အမှတ်ရနေလိုဟန် ရသည်။

အစာပစ်ချကျွေးနေသော အမျိုးသမီးသည်တော့ ဤသို့လုပ်ဆောင်ရသည်ကို အလွန်ပျော်ရွှင်နေလေသည်။ သူက ဒေါသတကြီး ဟိန်းသံကိုကြားသောအခါ သူ၏ စိတ်ခံစားမှုသည် ပိုပြီးကောင်းမွန်လာဟန် ရသည်။ အမျိုးသမီးသည် သူ၏ ခန္ဓာကိုယ်ပေါ်မှ အမှတ်အသားများကို ဂရုမစိုက်ပေ။ သူက လက်ကို ဝှေ့ယမ်းလိုက်ပြီး အသားတုံးများကို ချောက်နက်ထဲသို့ ဆက်တိုက် ပစ်ချကျွေးနေသည်။

ရွှီချင်းသည် တိတ်ဆိတ်လျက် ရှိနေသည်။ သူက အမျိုးသမီး၏ အကြင်နာစိတ်ကင်းမဲ့ပုံကို မျက်မြင်တွေ့ပြီး ခေါင်းတလားထဲမှ ထွက်ပေါ်လာနေသော ဒေါသတကြီး အော်ဟစ်သံကို ကြားမိသည်။

ထိုအမျိုးသမီး၏ သရုပ်နှင့်ပတ်သက်ပြီး သူ့မှာ ခန့်မှန်းမှုတစ်ခု ရှိ၏။