ဖားက ရစ်ဌက်ကို အနိုင်မရနိုင်ဘူး

လူခြောက်ဆယ့်ခုနစ်ယောက်သာ ကျန်တော့သည်။

သို့သော် ဖန်းကွမ်း အနေဖြင့် နောက်ထပ် ဆယ့်ရှစ်ယောက်ကို သတ်ဖြတ်ပြီးမှသာ မစ်ရှင် ပြီးမြောက်မည် ဖြစ်သည်။

အခြားသူများကို ရူးသွပ်စွာ သတ်ဖြတ်ရန်အတွက် အချိန်ကို အပြည့်အဝ အသုံးချရမည် ဖြစ်သည်။

ဝမ်လင်းက တိုက်ရိုက်ထုတ်လွှင့်မှု မြင်ကွင်းမှ မျက်လုံးမခွာနိုင်ပေ။

ဖန်းကွမ်း၏ စစ်မှန်သော နယ်ပယ်အဆင့်ကို အခြားမည်သူမျှ မသိထားကြပေ။

ပကတိအင်မော်တယ် ဂိမ်းကစားသည်ကို ကြည့်ရသည်မှာ တကယ့်ကို ဆန်းကြယ်သော အတွေ့အကြုံတစ်ခု ဖြစ်သည်။

မှော်စွမ်းရည် အသုံးပြု၍ ဂိမ်းဆော့နေခြင်းသည် အလွန်ရှက်ဖွယ် ကောင်း၏။

သို့သော်လည်း ဝမ်လင်းက ယင်းကို လှည့်စားသည်ဟု မယူဆပေ။

အဆုံးသတ်တွင် လူသားများသည် ကိုယ်ပိုင် အရည်အချင်းဖြင့်သာ မှော်စွမ်းရည်ကို အသုံးပြုနိုင်၏။

ဖန်းကွမ်းက ဤအဆင့်ကို ရောက်ဖို့အတွက် နှစ်ပေါင်းများစွာ ကြာအောင် ကြိုးစားခဲ့ရ၏။

နေ့ရောညပါ ဝီရိယစိုက်ထုတ်၍ ကျင့်ကြံလျှင်ပင် ဖန်းကွမ်းလို အာရုံစူးစိုက်မှု မှော်စွမ်းရည်ကို အသုံးပြုနိုင်ရန် နှစ်တစ်ရာခန့် လိုအပ်မည် ဖြစ်သည်။

ဤခေတ်တွင် တစ်နိုင်ငံလုံးနီးပါး ကျင့်ကြံလာကြပြီ ဖြစ်သည်။

အခြား တိုက်ရိုက် ထုတ်လွှင့်သူများ အနေဖြင့် ဂိမ်းဆော့ရာတွင် အထောက်အပံ့ ဖြစ်ရန် အတွက် မှော်စွမ်းရည်များအသုံးပြုခြင်း ရှိမရှိကို မည်သူမှမသိပေ။

ဂိမ်းထဲတွင် လိမ်လည်လှည့်ဖြားမှု နှင့် ပတ်သက်၍ မကြာခဏတွေ့ရလေ့ရှိသည်။

ထိုအတွက်ကြောင့် တိုက်ရိုက်ထုတ်လွှင့်သည့် ပလပ်ဖောင်းများသည် ၎င်းတို့၏ ကိုယ်ပိုင် ခိုးယူမှုရှာဖွေခြင်း ယန္တရားကို ဂိမ်းထဲတွင် ထည့်သွင်းထားခဲ့သည်။

တိုက်ရိုက် ထုတ်လွှင့်နေစဉ်အတွင်း တိုက်ရိုက် ထုတ်လွှင့်သူများ အနေဖြင့် လှည့်စား၍ ကစားနေကြောင်း တွေ့ရှိလျှင် ၎င်းတို့ကို ပလပ်ဖောင်းမှ အပြီးအပိုင် ပိတ်ပင်သွားမည်ဖြစ်သည်။

ဟုတ်ပါသည်။ ပလက်ဖောင်းက လှည့်စားခြင်း မပြုသော ကျွမ်းကျင် တိုက်ရိုက် ထုတ်လွှင့်သူများကိုမူ ဆုချီးမြှင့်မည်ဖြစ်၏။

မည်သို့ပင်ဆိုစေကာမူ ဟက်ကင်း ဆော့ဖ်ဝဲလ်ကို အသုံးပြုခြင်းသည် စက်ဆုပ်ရွံရှာဖွယ် ကောင်းသော အရာဖြစ်သည်ဟု လူအများစုက ယူဆကြသည်။

ဂိမ်းပလပ်ဖောင်းက တိုက်ရိုက် ထုတ်လွှင့်သူများ၏ ထူးခြားသော စွမ်းဆောင်ရည် ပြကွက်များကို ပြန်ဖွင့်ပြလေ့ရှိသည်။

လိမ်လည်လှည့်စားသော တိုက်ရိုက်ထုတ်လွှင့်သူ အများစုသည် "aimbot" လိမ်လည်မှုကို အသုံးပြုကြသည်။

၎င်းတို့က ကင်မရာစတင် လည်ပတ်ပြီးသည်နှင့် စူပါပစ်မှတ်ကို ဖြန့်ကျက်ပြီး ဖြစ်သည်။

စူပါပစ်မှတ် ဆိုသည်မှာ မည်သို့ပင် တလွဲတချော် ပစ်ပါစေ၊ သေနတ်၏ ပြောင်းဝက "ပေါင်" သို့မဟုတ် "လည်ပင်း" ကဲ့သို့ ကိုယ်အင်္ဂါ အစိတ်အပိုင်းတစ်ခု ပေါ်သို့ အလိုအလျောက် ကျရောက်သွားမည် ဖြစ်သည်။

လူတစ်ဦးကို ပစ်ခတ်လိုက်သည်နှင့် ၎င်းတို့၏ သေနတ်ပြောင်းဝက ရန်သူကို တိကျစွာ ချိန်ရွယ်ရန် ရုတ်တရက် အလိုအလျောက် ရွေ့လျားသွားမည် ဖြစ်၏။

ယင်းက တိုက်ရိုက်ထုတ်လွှင့်မှုအတွင်း ထင်သာမြင်သာ ရှိမည်မဟုတ်ပေ။

သို့သော် အနှေးပြကွက်များတွင်မူ လူအများက အမှားအယွင်းတစ်ခုခုကို ရှာတွေ့နိုင်စမြဲပင်။

လူတချို့ကမူ ထိုကဲ့သို့ လှည့်စားသည့် အထောက်အထားဗီဒီယိုအချို့ကို လိုင်းပေါ်တင်လေ့ ရှိကြသည်။

ဝမ်လင်းက ထင်ရှားသော အထောက်အထား ဗီဒီယို တင်သူ "ဖားတစ်ကောင်သည် ငှက်တစ်ကောင်ကို အနိုင်မယူနိုင်ပါ" အကောင့်ပိုင်ရှင် တင်ထားသော အထောက်အထား ဗီဒီယိုအချို့ကို မြင်တွေ့ခဲ့ရဖူးသည်။

အစပိုင်းတွင် ဤဗီဒီယိုများကို တရားမျှတသော စိတ်ဓာတ်ဖြင့် တင်ခဲ့သည်ဟု ဆိုရမည်။

သို့သော် နောက်ပိုင်းတွင် အဆိုပါ အထောက်အထား ဗီဒီယိုများသည် တဖြည်းဖြည်း ဆိုးရွားလာပြီး တိုက်ရိုက်ထုတ်လွှင့်သည့် ပလပ်ဖောင်းများတွင် အသုံးပြုသည့် စီးပွားဖြစ် အရာများ အဖြစ်သို့ ပြောင်းလဲသွားခဲ့သည်။

တစ်စုံတစ်ဦးအား ငွေအနည်းငယ် ပေးခြင်းဖြင့် အခြား ပလက်ဖောင်း အချို့ရှိ တိုက်ရိုက် ထုတ်လွှင့်သူကို ပြင်းပြင်းထန်ထန် ဝေဖန်သည့် ဗီဒီယိုတစ်ခု ပြုလုပ်ပေးရန် အလုပ်အပ်နိုင်ပေသည်။

ထို့ကြောင့် နောက်ပိုင်းတွင် အချို့သော အထောက်အထား ဗီဒီယိုများသည် တစ်ဖက်သားကို သိက္ခာချသည့် အောက်တန်းစား ဗီဒီယိုများသာ ဖြစ်လာ၏။

.................

ဒုတိယလူကို သတ်ပြီးနောက်တွင် ဖန်းကွမ်းက သူ၏ ကျန်းမာရေးကို ပြန်လည် ဖြည့်တင်းပြီး ဒယ်အိုးတစ်လုံးကို ကောက်ယူကာ ယခင် ကစားသမားဟောင်း၏ ဆိုင်ကယ်နှင့် မြို့သို့ တက်လာခဲ့သည်။

ဖန်းကွမ်းက အန္တရာယ်များသော အဆင့်သို့ ရောက်ရှိနေပြီ ဖြစ်သည်။

ဤအဆင့်တွင် ဖြတ်သွားဖြတ်လာများပင် သေနတ်ပစ်ရာ၌ လက်ဖြောင့်ကြသည်။

သို့ရာတွင် အရှိန်မြင့်မောင်းလာသော မော်တော်ဆိုင်ကယ်စီးသူအား ပစ်သတ်ရန်မှာ အလွန်ခက်ခဲသည်။

ရွေ့လျားနေသော မော်တော်ဆိုင်ကယ်၏ အသံသည် မြို့တွင်း မှ ကစားသမား များစွာကို ဆွဲဆောင်နိုင်မည် ဖြစ်၏။

ယင်းက ဖန်းကွမ်း လိုချင်သည်နှင့် အတိအကျပင်။

ဤနည်းလမ်းက ပြိုင်ဘက်များကို သတ်ဖြတ်ရန် ရှာမတွေ့သောအခါတွင် အလွန်အသုံးကျ၏။

ဖန်းကွမ်းသည် တစ်စုံတစ်ယောက်က သူ့ကို ဦးစွာ ပစ်ခတ်သည်ကို အလိုရှိသည်။

ထိုအခါမှ သူက အသံနှင့် ကျည်ဆန်၏ လာရာ လမ်းကြောင်းကို အခြေခံ၍ ရန်သူ၏ နေရာကို တွက်ချက်ပြီး လက်တုံ့ပြန်နိုင်မည် မဟုတ်ပါလား။

ယင်းအချိန်တွင် ဖန်းကွမ်းက သေနတ်သံကို ကြားလိုက်သည်။

သူ၏ တိုက်ရိုက် ထုတ်လွှင့်မှု ပတ်ဝန်းကျင်က မည်မျှပင် ဆူညံနေပါစေ၊ ဖန်းကွမ်းက ကွန်ပျူတာမှ အသံကို ချဲ့ထား၍ စနိုက်ပါရိုင်ဖယ်၏ အသံကို တိုက်ရိုက်ထုတ်လွှင့်မှု အခန်းမှ ကြည့်ရှုသူ အများအပြားက အလွန် ရှင်းလင်းစွာ ကြားခဲ့ရသည်။

"စနိုက်ပါသမားရှိတယ်"

"ကျွန်းသခင်.. သတိထားပါ"

"ဒီလို ပစ်ချက်တွေကြားထဲမှာ အသက်တောင်ရှူနိုင်မှာ မဟုတ်ဘူး"

"ပြီးသွားပြီ.. ကျွန်းသခင် သေရင် ဂိမ်းလည်း ပြီးသွားပြီ"

ဖန်းကွမ်းက ကာဗာအဖြစ် သုံးနိုင်သော အိမ်တစ်လုံးကို တွေ့ရှိပြီး ဆိုင်ကယ်ကို ရပ်တန့်လိုက်သည်။

စနိုက်ပါသမား၏ ပစ်ခတ်မှုကို ခံရပြီးနောက် ဖန်းကွမ်းက စနိုက်ပါသမား၏ တည်နေရာကို ခြေရာခံပြီးပြီ ဖြစ်သည်။

ဖန်သားပြင်ပေါ်တွင် ဖန်းကွမ်း၏ ဇာတ်ကောင်ကို နံရံတစ်ခုနောက်ကွယ်တွင် ပုန်းအောင်းနေသည်အား မြင်တွေ့နိုင်သည်။

သူက ခန္ဓာကိုယ်တစ်ဝက်ကို တမင်တကာ အနည်းငယ် ဖော်ထုတ်ထားသည်။

သူက မလှမ်းမကမ်းရှိ မျှော်စင်ပေါ်သို့ စိုက်ကြည့်နေခဲ့သည်။

တိုက်ရိုက် ထုတ်လွှင့်မှုအခန်းမှ အမြင်စူးရှသော ကြည့်ရှုသူများစွာက ဖန်းကွမ်း ကြည့်နေသည့် နေရာကို ကြည့်လိုက်ရာ မျှော်စင်ထိပ်တွင် အနက်ရောင်အစက်ငယ် တစ်ခုကို တွေ့လိုက်ရသည်။

ပရိသတ်များက ချက်ချင်းပင် မက်ဆေ့ချ်များတွင် အံ့အားသင့်စွာ အော်ဟစ်ခဲ့ကြသည်။

"လခွမ်း.. သူဘယ်လိုမြင်တာလဲဟ"

"ကျွန်းသခင်က အရမ်းမိုက်တာပဲ.. သူက မော်တော်ဆိုင်ကယ်စီးရင်းနဲ့တောင် ရန်သူ့တည်နေရာကို ချက်ချင်း ဆုံးဖြတ်နိုင်ခဲ့တယ်"

"ဘယ်မှာလဲ.. ငါ ဘာလို့ မတွေ့ရတာလဲ"

"မင်းမျက်စိကန်းနေလား.. မျှော်စင်ထိပ်က လူဆီကနေ အခုလေးတင် မီးခိုးတစ်ခု ထွက်လာတာ မတွေ့ဘူးလား.."

ဖန်းကွမ်းက ဤမက်ဆေ့ချ်များကို အာရုံစိုက်ရန် အချိန်မရှိခဲ့ပေ။

သူက မျှော်စင်ထိပ်မှ လူကိုသာ စောင့်ကြည့်နေခဲ့သည်။

အကယ်၍ သူက ဤမြို့၌ အစုလိုက်အပြုံလိုက် သတ်ဖြတ်မှု ပြုလုပ်မည်ဆိုလျှင် ဤစနိုက်ပါသမားသည် သူ့အတွက် ကြီးမားသော ခြိမ်းခြောက်မှုတစ်ခု ဖြစ်လာနိုင်သည်။

ထို့ကြောင့် ဖန်းကွမ်းက စနိုက်ပါသမားကို အမြန်ဆုံး ရှင်းထုတ်ချင်ခဲ့သည်။

စနိုက်ပါသမား၏ တည်နေရာက သူနှင့် သိပ်မဝေးပေ။

၎င်းတို့ကြားရှိ အကွာအဝေးနှင့် ရန်သူ၏ ယေဘုယျ နေရာကို ဆုံးဖြတ်ပြီးနောက်တွင် တစ်ဖက်လူကို ရှင်းပစ်ရန်မှာ သူ့အတွက် လွယ်ကူလွန်းလှသည်။

ယင်းအချိန်တွင် တစ်ဖက်လူက ဖန်းကွမ်းကို ထပ်မံ ပစ်ခတ်လိုက်ပြန််သည်။

သို့သော် ကျည်ဆံက ဖန်းကွမ်းကို ထိမည့်အစား ဖန်းကွမ်းအရှေ့ရှိ အိမ်နံရံကိုသာ ထိသွားသည်။

ဤမြင်ကွင်းကို မြင်လျှင် ဝမ်လင်းက အံ့သြသွားသည်။

တစ်ဖက်လူ၏ ပစ်ချက်က မဆိုးပေ။

၎င်းက ခန္ဓာကိုယ်ကောက်ကြောင်း-ခြေရာခံ မာစတာ တစ်ဦးဖြစ်မည်မှာ သေချာပြီး ကျန်းပိုင်နှင့် တန်းတူနီးပါးပင်။

ဖန်းကွမ်းကလည်း စိတ်ထဲကနေ သက်ပြင်းချလိုက်သည်။

ဤညီငယ်လေး၏ လက်ဖြောင့်မှုဟာ ကြောက်စရာကောင်းလွန်းလှ၏။

သို့သော် ယင်းက သူလိုချင်သည်နှင့် အတိအကျပင်။

"ငါ့ကို ပစ်ရဲတယ်လား"

နံရံအနောက်မှာ ကပ်၍ ပုန်းနေရင်း ဖန်းကွမ်းက တည်ငြိမ်စွာ ပြုံးနေခဲ့သည်။

သူ့လက်ထဲမှ ဆာမူရိုင်းဓားကို ဒယ်အိုးသို့ တိုက်ရိုက် ပြောင်းလဲပြီး မျှော်စင်ဆီသို့ အမြန်သွားလိုက်၏။

ဤမြင်ကွင်းသည် တိုက်ရိုက်ထုတ်လွှင့်မှု အခန်းရှိ လူတိုင်းကို ထိတ်လန့်စေခဲ့သည်။

မျှော်စင်ပေါ်ကလူပင် အံ့အားသင့်သွား၏။

ယခု သူသွားနေသည့် လမ်းကြောင်း၌ စနိုက်ပါသမား တစ်ယောက် ရှိနေသည်ကို မသိသည်မှာ မဖြစ်နိုင်ပေ။

ထို့အပြင် ကစားသမားများသည် ပုံမှန်အားဖြင့် ရန်သူနှင့် နီးကပ်နေလျှင် သင့်တော်သည့် နေရာကို ဦးစားပေး ရှာဖွေပြီး ပိုမိုကောင်းမွန်သည့် အောင်မြင်မှုရအောင် လုပ်ဆောင်တတ်ကြသည်။

ရှေ့တွင် စနိုက်ပါသမား တစ်ယောက်ရှိမှန်း ရှင်းရှင်းလင်းလင်း သိလျက်နှင့် ဒယ်အိုးကို ကိုင်၍ မည်သို့သောအရူးက ရှေ့တက်လာပါမည်နည်း။

ID "GAYLIGAYQI" ဖြစ်သည့် မျှော်စင်ပေါ်မှ ကစားသမားပင် အံသြသွားသည်။

ထို့နောက် သူက လျင်မြန်စွာ အာရုံခံစားကာ ဖန်းကွမ်းကို ရိုင်ဖယ်မှန်ဘီလူးမှ တစ်ဆင့် ချိန်ရွယ်ရန် အကောင်းဆုံးအနေအထားဖြင့် လှဲလျောင်း၍ နေခဲ့သည်။

"တောင်းပန်ပါတယ် အစ်ကိုကြီး.. မင်းကိုသတ်ရတော့မယ်"

ဒိုင်း..

ဤတစ်ခေါက် ပစ်ချက်က လုံးဝအတိအကျပင်။

သို့သော် စနိုက်ပါသမားက မပျော်ရွှင်ခဲ့ပေ။

အကြောင်းရင်းမှာ သူ၏ ပစ်ခတ်မှုက ဒယ်အိုးကို အတိအကျထိမှန်သွား၍ ဖြစ်သည်။

"ဘာမှားသွားတာလဲဟ"

အရာအားလုံးက တခဏအတွင်း ဖြစ်ပျက်သွားသောကြောင့် ကြည့်ရှုသူများက ရှင်းရှင်းလင်းလင်း မသိလိုက်ပေ။

ဖန်းကွမ်း လက်ထဲရှိ ဒယ်အိုးထံမှ မီးပွားကို မြင်ရသောအခါမှ အကြမ်းဖျင်း ခန့်မှန်းနိုင်ခဲ့သည်။

"ဒီလောက်အထိ တိုက်ဆိုင်မှုမျိုး ရှိလို့လား"

"ဒယ်အိုးကို မှန်သွားတာလား"

ထိုအချိန်တွင် မျှော်စင်ထဲမှ ကစားသမားက အသက်ကို ခပ်ပြင်းပြင်းရှူ၍ ထပ်မံ ပစ်ခတ်လိုက်သည်။

ဒိုင်း...

နောက်ထပ်ပစ်ချက်..

ဤတစ်ကြိမ်တွင် ကစားသမားက အထူး အာရုံစိုက်ခဲ့သည်။

သူ့ပစ်ချက်က အလွန်ကောင်းသော်လည်း ဒယ်အိုးကို ထပ်ပြီး မှန်သွားပြန်သည်။

ဖန်းကွမ်းက ကျည်ဆံကို ပိတ်ဆို့ရန်အတွက် သူ့လက်ထဲမှ ဒယ်အိုးကို ဝှေ့ယမ်းနေခဲ့သည်။

"???"

တိုက်ရိုက်ထုတ်လွှင့်မှုတွင် မေးခွန်းအမှတ်အသားများ ပြည့်လျှံလာသည်နှင့်အမျှ "GAYLIGAYQI" ဟု ခေါ်သော ဤကစားသမားသည် ဒုက္ခတွင်းထဲ ရောက်နေပြီဖြစ်ကြောင်း သူ့ကိုယ်သူ ချက်ချင်း ခံစားလိုက်ရသည်။