လီချင်းဖုန်းနှင့်လီဟုန်လိ.....

နဂါးစွယ်ကလန်တံခွန်အဖွဲ့များကြားတွင် တိုက်ပွဲအတွက် ရုန်းရင်းဆန်ခတ် ဖြစ်ပွားနေချိန်တွင် နဂါးသွေးကလန် ဘက်ခြမ်းတွင် တက်ကြွသော လူစုလူဝေး ရှိနေသည်။

နဂါးသွေးကလန်၏ တံခွန်အဖွဲ့လေးခုစလုံးသည် ယနေ့ တူညီသော ကောင်းကင်အောက်တွင် စုရုံးနေကြသည်။

သို့သော်လည်း နဂါးသွေးကလန်အဖွဲ့များသည် နဂါးစွယ်ကလန်အဖွဲ့သားများနှင့် မတူဘဲ ပြုံးရွှင်နေကြသည်။ သူတို့ရဲ့ ပြိုင်ဘက်တွေ ဘယ်သူတွေပဲဖြစ်ဖြစ်၊ သူတို့ဟာ ထိတ်လန့်တဲ့ အရိပ်အယောင်တွေ မပြဘဲ ရိုးရှင်းစွာ သူတို့အချင်းချင်း ဆွေးနွေးကြတယ် ဒါမှမဟုတ် ရလဒ်အပေါ် လောင်းကြေးထပ်နေကြသည်။

မှောင်မိုက်သောခန်းမရှေ့ ညာဘက်ခြမ်းတွင် ကျောက်မဏ္ဍပ်တစ်ခုရှိသည်။ အထဲမှာ လူလေးယောက် မတ်တတ်ထိုင်ပြီး လက်ဖက်ရည်သောက်ရင်း ပေါ့ပေါ့ပါးပါး စကားစမြည်ပြောနေကြသည်။

ထိုလေးယောက်သည် အမျိုးကောင်းသား သုံးဦးနှင့် အမျိုးသမီးတစ်ဦးတို့ဖြစ်ကြသည်။

ယောက်ျားသုံးယောက်ထဲမှာ အလယ်လူက အထူးချွန်ဆုံးဖြစ်ပြီး အရပ်ရှည်ပြီး ချောမောသော မျက်နှာဖြင့် လျှို့ဝှက်ဆန်းကြယ်သော ၀တ်စုံကို ၀တ်ဆင်ထားကာ သူ့မျက်နှာတွင် နွေးထွေးသော အပြုံးတစ်ခုရှိသည်။ သူစကားပြောတိုင်း သူ့အသံက လေပြည်လို အေးဆေးတည်ငြိမ်ပြီး လူတွေကို နားမလည်နိုင်လောက်အောင် လုံခြုံမှုနဲ့ ယုံကြည်မှုကို ပေးစွမ်းနိုင်သည်။

၎င်း၏ ခါးတစ်ဖက်စီတွင် ဓားတစ်ချောင်းစီ ချိတ်ဆွဲထားရာ ထူးခြားပြင်းထန်သောအငွေ့အသက်များ ထွက်ပေါ်နေသဖြင့် ပတ်ဝန်းကျင်တစ်ခုလုံးကို တုန်လှုပ်ချောက်ချားသွားစေသည်။

ထိုလူသည် နဂါးသွေးကလန်၏ ရွှေသွေးတံခွန်ကိုင လီချင်းဖုန်း မှလွဲ၍ အခြားသူမဟုတ်ပေ။

နဂါးသွေးကလန်၏အကြီးအကဲမျိုးရိုးမှ ဆင်းသက်လာသူ အနေဖြင့် ထင်ရှားသော အဆင့်အတန်းနှင့် ဂုဏ်သတင်းကို ပိုင်ဆိုင်ထားပြှး သူပြသခဲ့သည့် အရည်အချင်းများနှင့် အောင်မြင်မှုများနှင့်အတူ၊ သူသည် ကောင်းကင်နဂါး ငါးကလန်တွင် လက်ရှိမျိုးဆက်များကြားတွင် အကောင်းဆုံးဟု လူသိများသည်။ နဂါးသွေးကလန်၏ကလန်အကြီးအကဲ

သည်ပင်လျှင် မြင့်မားသောမျှော်လင့်ချက်ရှိပြီး သူ့ကို အလွန်လေးစားသည်ဟုဆိုသည်။

ကျောက်မဏ္ဍပ်တွင် အထူးအာရုံစူးစိုက်မှုကို စွဲဆောင်နိုင်သော အမျိုးသမီးတစ်ဦးရှိသည်။ သူမသည် လက်ရာမြောက်သော ခရမ်းရောင်ဝတ်စုံကို ၀တ်ဆင်ထားပြီး ၎င်းပေါ်တွင် အသက်ဝင်နေသော ငါးကြင်းနီပုံကို ရွှေချည်ထိုးထားသည်။ သူမ၏ ချောမွေ့သော အသားအရေသည် နှင်းကဲ့သို့ ဖြူဖွေးနေပြီး သူမ၏ အသက်ဝင်သော မျက်ဝန်းတစ်စုံက အထူးဆွဲဆောင်မှုရှိသည်။

သူ့မျက်နှာက အမြဲပြုံးနေပေမယ့် သူ့အကြည့်နောက်ကွယ်မှာ သိမ်မွေ့တဲ့မာန တစ်မျိုးရှိနေသည်။ ထိုသို့သော မာနသည် သူမ၌ မွေးရာပါပင်။ သူမသည် မြင့်မားသောတောင်တန်းများပေါ်မှ ပန်းတစ်ပွင့်ကဲ့သို့ သာမန်လူများ မချဉ်းကပ်ဝံ့ဘဲ အဝေးကနေသာ ငေးကြည့်နေနိုင်သည်။

သူမ၏အမည်မှာ လီဟုန်လိဖြစ်ပြီး နဂါးသွေးကလန်၏ ခရမ်းသွေးတံခွန်ကိုင်ဖြစ်သည်။

တံခွန်အဖွဲ့အနှစ်ဆယ်ကြားတွင် ကျော်ကြားသော အလှနတ်ဘုရားမနှစ်ပါး ရှိသည်။နဂါးအကြေးခွံကလန်မှ လုချင်းမိနိနှင့် နဂါးသွေးကလန်မှ လီဟုန်လိ တို့ကို လူတိုင်းသိကြသည်။

နဂါးအကြေးခွံကလန်မှ လုချင်းမိန်သည် မြင့်မြတ်သောအကြေးခွံတံခွန်ကိုင်ဖြစ်သည်။

လီဟုန်လိသည် အမှန်တကယ်ပင် ရင်သပ်ရှုမောဖွယ်ကောင်းပြီး သူမသည် ဆွဲဆောင်မှုရှိသော လူများကိုပင် အရှက်ရစေမည့် သာလွန်သောအလှတရားကိုပိုင်ဆိုင်ထားသည်။

နောက်ဆုံးတွင် ကျောက်မဏ္ဍပ်ရှိ အခြားသော ယောက်ကျားသားနှစ်ဦးမှာ နဂါးသွေးကလန်၏ ကျန်ရှိသော တံခွန်ကိုင်များ ဖြစ်သည်။

ငွေသွေးတံခွန်ကိုင် ကျင်းမင်......

မဟူရာသွေးတံခွန်ကိုင်...လီလု....

သူတို့လေးယောက် လက်ဖက်ရည်သောက်ဖို့ စုဝေးခဲ့ကြပေမယ့် လီချင်းဖုန်း ကသာ ဉီးဆောင်သူဖြစ်သည်။ သူစကားပြောတိုင်း အခြားသုံးယောက်က သူ့ကို လေးစားနာခံမှုဖြင့် ဂရုတစိုက် နားထောင်ကြသည်။

မာနကြီးသော လီဟုန်လိပင် လီချင်းဖုန်းစကားပြောနေသည်ကိုချိုသာစွာပြုံး၍နားထောင်နေသည်။

နှစ်ဆယ်တံခွန်ကြားတွင် ထင်ရှားကျော်ကြားသော ဤအလှတရားသည် လီချင်းဖုန်းအပေါ် နှစ်သက်မှုအချို့ရှိခဲ့သည်မှာ ထင်ရှားသည်။

"တိုက်ပွဲအတွက် ပြိုင်ဆိုင်မှုကို ကြေငြာလိုက်ပြီ..." ဟု လီချင်းဖုန်းကပြောလိုက်သည်။

သို့သော်လည်း ရွှေသွေးတံခွန်ကို ဘယ်သူက ဆန့်ကျင်နေမယ်ဆိုတာ အရေးမကြီးတာကြောင့် ဖန်သားပြင်ကိုကြည့်ဖို့ စိတ်မ၀င်စားပေ။

"မင်းသာ မြင့်မြတ်သောအကြေးခွံတံခွန်အဖွဲ့ရဲ့ လုချင်းမိန်နဲ့ မပြိုင်ရသရွေ့ပြသာနာမရှိဘူး..." ဟု ငွေသွေးတံခွန်မှ ကျင်းမင်က အရွှန်းဖောက်လိုက်သည်။

"ဒါဆို သူတို့ အချင်းချင်း တိုက်ခိုက်တော့လည်း ဘာဖြစ်လဲ.... လုချင်းမိန်က အစ်ကိုချင်းဖုန်းဆီမှာ တချိန်လုံး ဖိနှိပ်ခံနေရတာပဲလေ...."

လီဟုန်လိသည် ဤအခိုက်အတန့်တွင် သူမသည် ကျင်းမင်ကို စိတ်အနှောင့်အယှက်ဖြစ်စေသော နာမည်တစ်ခုကို ဖော်ပြလိုက်သကဲ့သို့ စိုက်ကြည့်နေသည်။

ကျင်းမင်က ရယ်ရုံသာရယ်နေခဲ့သည်။ လီဟုန်လိနှင့် လုချင်းမိန်တို့၏ပြိုင်ဆိုင်မှုကို တံခွန်အဖွဲ့နှစ်ဆယ်ရှိလူတိုင်း သိကြသည်။ အမှန်တော့၊ ၎င်းသည် အဓိကအားဖြင့် အေးစက်ပြီး မာနကြီးသော ကိုယ်ရည်ကိုယ်သွေးရှိသည့် လီဟုန်လိ ကအစပြုခဲ့ခြင်းဖြစ်သည်။သူမတွင် မြင့်မြတ်သော နောက်ခံရှိ၍ မိဘများကလည်းရာထူးကြီးမားကြသည်။ ထို့ကြောင့် သူမသည် လီချင်းဖုန်းမှလွဲ၍ မည်သူ့ကိုမျှအဖက်မလုပ်ခဲ့ပေ။

တစ်ဖက်တွင်၊ လုချင်းမိန်သည် နဂါး​ကြေးခွံကလန်မှ ဆင်းသက်လာသော်လည်း တိုက်ရိုက်သွေးနွယ်မှ မဟုတ်ပေ။ သူမသည် နိမ့်ပါးသောသွေးမျိုးဆက်မှ ပေါက်ဖွားလာသော်လည်း အရည်အချင်းရှိသူဖြစ်သည်။ သူမဦးဆောင်သော မြင့်မြတ်သောအကြေးခွံ တံခွန်အဖွဲ့သည် ထိပ်တန်းအဆင့်ဖြစ်ပြီး လီချင်းဖုန်းဦးဆောင်သော ရွှေသွေးတံခွန်ပြီးနောက် ဒုတိယဖြစ်သည်။

တံခွန်အဖွဲ့နှစ်ဆယ်တို့တွင် မြင့်မြတ်သောအကြေးခွံတံခွန်အဖွဲ့ သည် အဆင့်နှစ်ဖြစ်သည်။

ထိုအချိန်တွင် လီဟုန်လိ ဦးဆောင်သော ခရမ်းသွေးတံခွန်သည် အဆင့်သုံးနေရာတွင် ရှိနေသည်။

သူတို့သည် အဆင့်သတ်မှတ်ချက်အတွက် အကြိမ်ပေါင်းများစွာ တိုက်ခိုက်ခဲ့ကြသော်လည်း နောက်ဆုံးတွင် လုချင်းမိန်ကသာ နှာတဖျားသာခဲ့သည်။ ယင်းက အေးစက်ပြီး မာနကြီးသော လီဟုန်လိကို မလွဲမသွေ မကျေမနပ် ဖြစ်စေသည်။

"လုချင်းမိန်က တကယ်ကို ထူးခြားပါတယ်...သူက နဂါးကြေးခွံကလန်ရဲ့ ကောင်းကင်နဂါးကြေးခွံချပ်ဝတ်ပညာရပ်ကိုကျွမ်းကျင်ပြီးသားပါ.... တကယ်သာဆို အနိုင်ရဖို့ ကြိုးစားရမှာပဲ" ဟု လီချင်းဖုန်းက နွေးထွေးသော အပြုံးဖြင့် ပြောကြားခဲ့သည်။

"ဟမ့်...ညီမလည်း နဂါးသွေးကလန်ရဲ့ နဂါးကြာပန်းပညာရပ်ကို ကျွမ်းကျင်တာပဲလေ... အဲဒါက သူ့ရဲ့ ကောင်းကင်ဘုံ နဂါးအကြေးခွံချပ်ဝတ်ကို ချိုးဖျက်နိုင်တယ်" ဟု လီဟုန်လိက ပြန်ပြောခဲ့သည်။

"ဟာဟား....လီဟုန်လိ... မင်းရဲ့ ခွန်အားက သံသယဖြစ်စရာ မရှိပါဘူး.... ဒီမှာ အစ်ကိုချင်းဖုန်းသာမရှိရင် မင်းကို အစ်မလို့ ခေါ်ပြီး ငါတို့ရဲ့ ခေါင်းဆောင်အဖြစ် သတ်မှတ်ရမှာ" ဟု မဟူရာသွေးတံခွန်ကိုင် လီလုက ပြောလိုက်သည်။

"ဒါဆို ဟုန်လိရဲ့ကျော်ကြားမှုကို ခိုးယူခဲ့တာ ငါ့အပြစ်ပါ....." လီချင်းဖုန်းက ခေါင်းညိတ်ပြလိုက်သည်။

သူတို့နှစ်ယောက်၏ ချီးမွမ်းသံကိုကြားတော့ လီဟုန်လိ၏ နူးညံ့ပြီး ချစ်စရာကောင်းသော ပါးပြင်ပေါ်တွင် အပြုံးတစ်ခု ပေါ်လာသည်။

“အစ်ကိုချင်းဖုန်းရဲ့ ခွန်အားကို ညီမ ယုံပါတယ်.... ညီမအမြင်အရတော့ အစ်ကို့ရဲ့ အရည်အချင်းက အဲဒီတုန်းက နဂါးစွယ်ကလန်ထဲက လီတိုင်ရွှမ်နဲ့ တန်းတူပဲ..... "

ဒီနာမည်ကိုကြားတော့ အားလုံးရဲ့ အမူအရာတွေ ချက်ချင်းပြောင်းသွားသည်။ လီတိုင်ရွှမ်သည် ကောင်းကင်နဂါးကလန်ငါးခု တွင် ဒဏ္ဍာရီလာပုဂ္ဂိုလ်ဖြစ်သည်။ သူနှင့်အတူ နဂါးစွယ်ကလန်ကို လူတိုင်းလေးစားခဲ့သည်။ အစိမ်းရောင်နယ်သာတံခွန်အဖွဲ့ ၊ နဂါးစွယ်အစောင့်တပ်မဟာတွေကို ဦးဆောင်တာပဲဖြစ်ဖြစ်၊ အစိမ်းရောင်နယ်သာ ခန်းမရဲ့ ခန်းမသခင်အဖြစ်ပဲဖြစ်ဖြစ်၊ ကောင်းကင်နဂါးကလန်ငါးခုမှာ အကောင်းဆုံးလို့ အမြဲတမ်း သတ်မှတ်ခံရသူပင်....

သူ၏ ကြီးကျယ်ခမ်းနားသော ဦးဆောင်မှုအောက်တွင်၊ နဂါးသွေးကလန်ကို နဂါးစွယ်ကလန်က လုံးဝလွှမ်းမိုးထားသည်။ တကယ်တော့၊ သူသာရှိနေရင်၊ ဘုရင်အဆင့်ကိုတက်လှမ်းပြီး နဂါးစွယ်ကလန်ကို လက်ရှိအုပ်ချုပ်နေတဲ့ နဂါးသွေးကလန်ကို လွှမ်းမိုးသွားနိုင်တယ်လို့ ဆိုကြသည်။

"ငါ ကိုယ့်ကိုကိုယ် ဦးလေးတိုင်ရွှမ်နဲ့ မနှိုင်းဝံ့ဘူး.... ဟုန်လိ..... ငါ့ကို ဒီလိုမြှောက်ပင့် မနေနဲ့....." လီချင်းဖုန်း ပြုံးပြီး ခေါင်းယမ်းလိုက်သည်။

သူက ဆက်ပြောရင်း သူ့မျက်လုံးတွေ အနည်းငယ်လှုပ်ရှားသွားကာ.....

"အဲဒါကို ပြောရရင် ဦးလေးတိုင်ရွှမ်ရဲ့ သားလေး မကြာသေးခင်ကမှ နဂါးစွယ်ကလန်ကို ပြန်လာခဲ့တယ်.... သူက အစိမ်းရောင်နယ်သာ တံခွန်အဖွဲ့ကို ဝင်သွားပြီလို့ ကြားတယ်...."

"ဟုတ်ပါတယ်....သူ့နာမည်က လီလော့ ပါ...သူ နဂါးငွေ့တန်းကိုးသွယ်စမ်းသပ်မှုကို အောင်မြင်ပြီး နဂါးငွေ့တန်းကိုးသွယ်ကျင့်စဉ်ကို အစိမ်းရောင်နယ်သာ တံခွန်အဖွဲ့မှာ ပါဝင်ခဲ့တဲ့ ပထမဆုံးနေ့မှာပဲ ရရှိခဲ့တယ်" လို့ ငွေသွေးတံခွန်ကိုင် ကျင်းမင် က အသိပေးခဲ့သည်။

"တော်တော် အရည်အချင်းရှိပုံရတယ်...."

လီချင်းဖုန်း ခေါင်းညိတ်လိုက်သည်။

"သူက အရည်အချင်းရှိပေမယ့် ကံမကောင်းရှာဘူး.... ပြင်ပနတ်ဘုရားတိုက်ကြီးမှာ နှစ်ပေါင်းများစွာကြာအောင်နေပြီးနောက်မှာ အကောင်းဆုံးစွမ်းရည်တွေ အလဟသဖြစ်သွားလောက်ပြီ ဟု လီဟုန်လိက မကျေနပ်ကြောင်း မှတ်ချက်ပေးခဲ့သည်။ သူ့မိဘတွေ အကြိမ်ကြိမ် ပြောဖူးတာကြောင့် လီတိုင်ရွှမ်ကို အထင်ကြီးခြင်း မရှိခဲ့ပေ။ သူမသည် ငယ်စဉ်ကတည်းက ကြီးပြင်းသည်အထိ ဖခင်ဖြစ်သူ၏ ကျိန်ဆဲခြင်းကို မကြာခဏကြားရပြီး သဘာဝအလျောက် လွှမ်းမိုးခံခဲ့ရသည်။

"သူက လောလောဆယ် အစောပိုင်းနတ်ဆိုးနန်းတော်အဆင့်မှာသာရှိနေတယ်လို့ ငါကြားတယ်.... ဒီလို အင်အားအဆင့်နဲ့ သူ့နောက်ခံကြောင့် ခေါင်းဆောင် ရာထူးကို ရယူနိုင်ခဲ့တယ်...." ကျင်းမင် နှင့် လီလုတို့က ခေါင်းညိတ်သဘောတူခဲ့ကြပြီးလှောင်ပြောင်နေသည်။

အစောပိုင်းနတ်ဆိုးနန်းတော်အဆင့် လေ့ကျင့်သူနှင့် ၎င်းတို့ကြားတွင် အင်အားကွာဟချက် ကြီးမားသည်။ လီလော့ သူတို့ကို လိုက်မီဖို့ လွယ်မှာမဟုတ်ပေ။

သူတို့ စကားစမြည်ပြောနေကြစဉ် တံခွန်အဖွဲ့ဝင်တစ်ဦး ၎င်းတို့ဆီသို့ ပြေးလာပြီး မဟူရာသွေးတံခွန်၏ တံခွန်အဖွဲ့ခေါင်းဆောင် လီလုကို တိုးတိုးကပ်ပြောနေသည်။

လီလု၏မျက်နှာတွင် အံ့သြသွားသည့်အရိပ်အယောင် ပေါ်လာပြီးနောက် သတင်းပို့သူကို ထွက်သွားဖို့ လက် ဝှေ့ယမ်းလိုက်သည်။ ထို့နောက် သူသည် လီချင်းဖုန်းနှင့် လီဟုန်လိတို့ကို ကြည့်လိုက်သည်။

"ငါ့တံခွန်အဖွဲ့ရဲ့တတိယတပ်ခွဲက အစိမ်းရောင်နယ်သာတံခွန်အဖွဲ့ရဲ့ ပဉ္စမတပ်ခွဲနဲ့ယှဉ်ပြိုင်ရမယ်..... လီလော့က ပဉ္စမတပ်ခွဲရဲ့ခေါင်းဆောင်ပဲ" ဟု လီလု က ၎င်းတို့နှင့် မျှဝေခဲ့သည်။

ထိုသတင်းကြောင့် သုံးယောက်သား လန့်ဖျပ်သွားကြပြီး အသီးသီး ပြုံးလိုက်ကြသည်။

လီဟုန်လိက "လီတိုင်ရွှမ်က ငါတို့ နဂါးသွေးကလန်ကို အချိန်အတော်ကြာအောင် ဖိနှိပ်ထားခဲ့တယ်... ဆုံးရှုံးသွားတဲ့ ဂုဏ်အသရေကို ပြန်ယူဖို့ မဟူရာသွေးတံခွန်အဖွဲ့ကို အားကိုးပါရစေ...."

လီလုက သူမ စကားကိုကြားပြီးနောက် ရယ်မောလိုက်သည်။ သူ နောက်ပြောင်နေမှန်း သိသော်လည်း ခေါင်းညိတ်ကာ ထောက်ခံဆဲပင်....

“အင်းပါ....ပြင်ပတိုက်ကြီးကလာတဲ့ဧည့်သည်လေးကိုကောင်းကောင်းဂရုစိုက်ခိုင်းလိုက်ပါ့မယ်....."