နတ်ဘုရားဖြစ်လာရန် နောက်ထပ်ရိုးရာဓလေ့(ခ)

ဤသည်မှာ လဝတ်ပြုဒေသကြီး၌ လပုန်ကန်ခန်းမ၏ ခေတ်တစ်ခေတ်အတွင်း ရိတ်သိမ်းမှုဖြစ်သည်။

သူတို့က ချိပ်ပိတ်ခံထားရခြင်းဖြစ်သလို ကာကွယ်ပေးခံထားရခြင်းလည်း ဟုတ်၏။

သူတို့အားလုံးက မျိုးနွယ်ခြားများ ဖြစ်ကြသည်။ သူတို့က လမ်းလျှောက်ထွက်လာသည့်အခိုက် ပြန်လည်နိုးထလာရသည့်အကြောင်းအရင်းကို နားလည်သွားကြသည်။ သူတို့က လီရှောင်ရှန်းကို မြင်လိုက်ရသောအခါ သူတို့ကိုယ်သူတို့ ထိန်းသိမ်းလိုက်ကြသည်။

သို့တိုင် ထိုပုံရိပ်များ၏ ထွက်ပေါ်လာမှုက အနီရောင်လကျင့်ကြံသူများအပေါ် ကြီးမားသော ဖိအားကို ဖြစ်ပေါ်စေသည်။

သူတို့၏ အရှိန်အဝါက ပျံ့လွင့်ထွက်လာသည့်အခါ သွေးပင်လယ်သည် တအိအိလှုပ်ခတ်သွားသည်။ ကောင်းကင်သည် ငါးအကြေးခွံများဖြင့် ဖုံးလွှမ်းခံထားရသည့်အလား တစ်စစီကွဲထွက်နေပုံပေါ်သည်။

မြူခိုးအလွှာထဲတွင် ရေခဲရုပ်တုတစ်ခုသာ ကျန်ရှိတော့သည်။

ထိုရေခဲရုပ်တုသည် အနှေးကွေးဆုံး အက်ကွဲနေခြင်းဖြစ်သည်။ နောက်ဆုံးမှာတော့ ထိုရေခဲရုပ်တုက လုံးဝအက်ကွဲထွက်သွားသည်။ ချိပ်ပိတ်ခံထားရသော ပုံရိပ်က ထွက်လျှောက်လာသည့်အခါ ရှေးခေတ်ကာလ၏ အရှိန်အဝါသည် သိပ်သည်းစွာ ပျံ့လွင့်လာသည်။ ဤသည်မှာ ရှေးဟောင်းလေက အချိန်ကာလကို ဖြတ်သန်းပြီး တိုက်ခတ်လာနေဟန် ရသည်။ ကောင်းကင်နှင့်မြေပြင်တစ်လျှောက်တွင် ကျယ်လောင်သော ပေါက်ကွဲသံဖြင့် ပြည့်နှက်သွားသည်။

အနီရောင်လဗိမာန်မှ အမြင့်မြတ်ဆုံးဘုန်းတော်ကြီးသည် ဒုတိယအကြိမ် အမူအရာပျက်ယွင်းသွားသည်။ ဤတစ်ကြိမ်တွင်တော့ သူက လီရှောင်ရှန်းကို မြင်လိုက်ရစဉ်ကထက် ပိုပြီးလေးနက်လာသည်။ သူက ဤလောကထဲသို့ တဖြည်းဖြည်း ထွက်လျှောက်လာနေသော ပုံရိပ်ကို သေချာစူးစိုက်ကြည့်လိုက်သည်။

ထိုသူက မျိုးနွယ်ခြားအမျိုးသမီးတစ်ယောက် ဖြစ်သည်။

သူ၏ နဖူးပေါ်တွင် တတိယမျက်လုံးရှိသည်။ ထိုမျက်လုံးသည် ကြက်သွေးရောင်ဖြစ်ပြီး အထဲမှာ မီးတောက်များ ကိန်းဝပ်နေဟန် ရ၏။ သူက လမ်းလျှောက်ထွက်လာသည်နှင့်ချက်ချင်း မီးတောက်များက ပေါက်ကွဲထွက်လာသည်။ မီးတောက်ပင်လယ်တစ်ခုသည် လေထဲမှာ တိုက်ရိုက် ထွက်ပေါ်လာသည်။ ထိုမီးတောက်ပင်လယ်ထဲတွင် ဧရာမမျက်နှာကြီးတစ်ခု ထွက်ပေါ်လာသည်။ ထိုမျက်နှာကြီး၏ အတွင်းဘက်ထဲတွင် လောကတစ်ခုဖြစ်တည်ရှိနေဟန်ရသည်။

အမျိုးသမီးသည်တော့ မီးတောက်ပင်လယ်ထဲမှာ ဧကရီတစ်ပါးနှယ် အောက်မေ့ရသည်။ ဝိညာဉ်စုစည်းခြင်းအဆင့်နှင့် အလွန်နီးကပ်နေသော ကျင့်ကြံခြင်းအားလှိုင်းများသည် သူ၏ ခန္ဓာကိုယ်ထဲမှ ထွက်ပေါ်လာသည်။ ဤသည်မှာ အကယ်၍ သူသာ ဆန္ဒရှိမည်ဆိုလျှင် သူ့ကိုယ်ပိုင် မဟာလောကတစ်ခုကို ချက်ချင်း ဖွဲ့စည်းနိုင်ပြီး ဝိညာဉ်စုစည်းခြင်းအဆင့်သို့ တတ်လှမ်းနိုင်ဟန် ရသည်။

သူက အပြင်သို့ ထွက်လျှောက်လာပြီးနောက် နေရာမှာ ရပ်လိုက်သည်။ သူ၏ မျက်လုံးက ပွင့်သွားသည်။ သို့သော်လည်း သူ၏ အကြည့်က ငေးငိုင်နေပုံပေါ်သည်။

သူ၏ ထွက်ပေါ်လာမှုသည် လူတိုင်းကို နှလုံးတုန်သွားစေသည်။ သို့သော်လည်း လူအများကြီးက သူ့ကို မမှတ်မိကြပေ။ လပုန်ကန်ခန်းမထဲမှ ဝါရင့်အဖွဲ့ဝင်များပင် သူ့ကို မမှတ်မိကြပေ။

ဤသည်မှာ ထိုအမျိုးသမီးက ဤခေတ်ထဲမှာ တစ်ခါမှ ထွက်ပေါ်မလာဖူးဟန် ရသည်။

သူ၏ ခန္ဓာကိုယ်ထဲမှ ထုတ်လွှတ်နေသော ရှေးဟောင်းအငွေ့အသက်သည် အလွန်အမင်း အားကောင်းသည်။ ဤသည်မှာ တစ်စုံတစ်ယောက်က သူ့ကို ကြည့်လိုက်သည်နှင့် အချိန်ဖြတ်သန်းစီးဆင်းမှုကို အာရုံခံနိုင်ဟန် ရသည်။

ရေခဲရုပ်တုထဲမှာ အတူတူချိပ်ပိတ်ခံထားရသော ပုဂ္ဂိုလ်များသည်ပင် ထိုအမျိုးသမီး၏ သရုပ်ကို မသိကြပေ။ လီရှောင်ရှန်းတစ်ယောက်တည်းသာ မျိုးနွယ်ခြားအမျိုးသမီးကို ကြည့်လိုက်ပြီး အရှေ့သို့ လျှောက်သွားသည်။ သူက ခေါင်းငုံ့လိုက်ပြီး နူးညံ့စွာ နှုတ်ဆက်လိုက်သည်။

“ နှုတ်ဆက်ပါတယ် အရင်လပုန်ကန်ခန်းမသခင် ”

သူက စကားပြောလိုက်သည်နှင့်ချက်ချင်း လူတိုင်းသည် နှလုံးတုန်သွားကြသည်။ ရွှီချင်းနှင့် ခေါင်းဆောင်သည်သာ တည်ငြိမ်ကြသည်။ အဘယ့်ကြောင့်ဆိုသော် သူတို့က လပုန်ကန်ခန်းမသခင်ဖြစ်လာသည့်အခိုက် ထိုအမျိုးသမီး၏ သရုပ်အဆင့်အတန်းကို သိရှိပြီးသားဖြစ်သည်။

လက်ရှိခေတ်တွင် လပုန်ကန်ခန်းမသခင်များသည် ရွှီချင်းနှင့် ခေါင်းဆောင်ဖြစ်သည်။

သို့သော်လည်း လပုန်ကန်ခန်းမထဲမှာ အရှင်သခင်နှစ်ပါးတည်းရှိခြင်း မဟုတ်ပေ။ ယင်းက ဤခေတ်အတွင်းကိုသာ ဆိုလိုသည်။ ခေတ်တိုင်းကို မဆိုလိုပေ။ သို့ဖြစ်၍ လပုန်ကန်ခန်းမ၏ သမိုင်းတစ်လျှောက်တွင် လပုန်ကန်ခန်းမသခင်များစွာ ထွက်ပေါ်လာခဲ့ဖူးသည်။

သို့သော်လည်း သူတို့အားလုံး၏ တော်လှန်မှုသည် အဆုံးမှာ ကျရှုံးသွားခဲ့သည်။

ဤနောက်ဆုံးရေခဲရုပ်တုသည် ယခင်လပုန်ကန်ခန်းမသခင်ဖြစ်သည်။ သို့သော်လည်း ယင်းက သူ၏ အစစ်အမှန်ခန္ဓာကိုယ်မဟုတ်ပေ။ ကိုယ်ပွားတစ်ခုသာ ဖြစ်သည်။

သူက ကိုယ်တိုင်သီးခြားတည်ရှိရန် ရွေးချယ်ခဲ့သည်။ သူက နီလာနတ်သမီး၏ ဝါးမျိုခံရမည့်ကဒ်ဘေးကို ရှောင်ရှားရန် လပုန်ကန်ခန်းမနှင့်အတူ ထူးခြားသော အတတ်ပညာတစ်ခုကို အသုံးပြုခဲ့ပြီး ကိုယ်ပွားတစ်ခုကို ချန်ထားခဲ့သည်။

ယင်းက နောင်လပုန်ကန်ခန်းမသခင်အတွက် သူထားရစ်ခဲ့သော လက်ဆောင်ဖြစ်သည်။

“ အရင်လပုန်ကန်ခန်းမသခင်…နတ်ငှက် ”

အမြင့်မြတ်ဆုံးဘုန်းတော်ကြီး၏ အမူအရာသည် တည်ကြည်လေးနက်လာသည်။ သူက စကားပြောလိုက်သည့်အခါ လှိုင်းအတတ်အကျသည် အမျိုးသမီး၏ မျက်လုံးထဲမှာ ထွက်ပေါ်လာသည်။ ထို့နောက် ဇဝေဇဝါဖြစ်မှုက ပျောက်ကွယ်သွားပြီး မထူးမခြားနား အကြည့်က နေရာဝင်ယူလာသည်။ သူက အမြင့်မြတ်ဆုံးဘုန်းတော်ကြီးကို အာရုံစိုက်လိုက်သည်။

“ မပြည့်စုံတဲ့ ခန္ဓာကိုယ်တစ်ခု… အပ်ချုပ်ရာတွေနဲ့ ပြည့်နှက်နေတဲ့ လောကတစ်ခု… ဒီခေတ်မှာ မပိုင်ဆိုင်တဲ့ မျက်လုံးတစ်စုံကို ဝိညာဉ်စုစည်းခြင်းအစွမ်းအတွက် လဲလှယ်ယူထားတယ်… ဒါတောင် နင်က ငါဘယ်သူလဲဆိုတာ မှတ်မိနေတယ် ”

အမျိုးသမီးက တည်ငြိမ်စွာ ပြောသည်။ သူ၏ စကားလုံးတိုင်းက အမြင့်မြတ်ဆုံးဘုန်းတော်ကြီးကို အံ့ဩသွားစေသည်။ သူက ချက်ချင်း ပြောသည်။

“ ငါက အနီရောင်လရဲ့ အမြင့်မြတ်ဆုံးဘုန်းတော်ကြီး ”

“ ငါ့ခေတ်မှာ အမြင့်မြတ်ဆုံးဘုန်းတော်ကြီးဆိုတာ မရှိခဲ့ဘူး ”

အမျိုးသမီးသည် ခေါင်းခါလိုက်ပြီး နူးညံ့စွာ သက်ပြင်းချလိုက်သည်။ ထို့နောက် သူက ရွှီချင်း၏ ဘေးမှ အားညိုကို ကြည့်လိုက်သည်။

“ အဲ့ဒါ နင့်မျက်လုံးတွေ ”

အားညို၏ အမူအရာသည် ပြောင်းလဲသွားပြီး ချက်ချင်း တည်ကြည်သွားသည်။ သူက သူ့အရှေ့မှ အမျိုးသမီးကို အာရုံစိုက်လိုက်သည်။ သို့သော် သူက မည်သည့်စကားမှ မပြောပေ။

အမျိုးသမီး၏ အကြည့်သည် ပြောင်းရွှေ့သွားပြီး ရွှီချင်း၏ အပေါ်သို့ ကျရောက်သွားသည်။ သူ၏ မျက်လုံးထဲမှာ အနက်ရောင်အလင်းက ဖြည်းညင်းစွာ ထွက်ပေါ်လာသည်။ အေးစက်စက် အရှိန်အဝါက သူ၏ ခန္ဓာကိုယ်ထဲမှ ပျံ့လွင့်လာသည်။ မီးတောက်ပင်လယ်သည် သူ၏ ဘေးနားတစ်ဝိုက်တွင် ရှိနေကြောင်း ထင်ရှားသည်။ သို့သော်လည်း ဤအခိုက်အတန့်မှာ မီးတောက်များ၏ အရောင်သည် အနက်ရောင်သို့ ပြောင်းလဲသွားသည်။

“ နင်က အရမ်းထူးဆန်းတယ်… ”

အမျိုးသမီးသည် ရွှီချင်းကို လေးနက်စွာ စိုက်ကြည့်လိုက်သည်။ သို့သော်လည်း သူက မည်သည့်စကားမှ မပြောပေ။ ယင်းအစား သူက ခေါင်းလှည့်လိုက်ပြီး အပြင်လောကမှ စစ်မြေပြင်ကို ကြည့်လိုက်သည်။

“ ဒီခေတ်ရဲ့ အဆုံးအဖြတ်တိုက်ပွဲက စတင်တော့မှာလား… အဲ့ဒါက ငါ့ခေတ်တုန်းကထက် အများကြီး ပိုစိတ်ဝင်စားဖို့ကောင်းတယ် ”

“ ငါက ကိုယ်ပွားတစ်ခုပဲ… ငါ့မှာ အတိတ်တုန်းက အစစ်အမှန်ခန္ဓာကိုယ်ရဲ့ စွမ်းအားမျိုး မရှိဘူး… ဒီတိုက်ပွဲမှာ ငါက အများကြီး အကူအညီပေးနိုင်မှာ မဟုတ်ပေမဲ့ အကောင်းဆုံး ကြိုးစားပေးမယ် ”

“ နတ်ဘုရားတွေက ပြိုင်ဘက်ကင်းတည်ရှိမှု မဟုတ်ဘူး… မျှော်လင့်ချက်က ထာဝရ တည်ရှိနေမယ် ”

အမျိုးသမီးသည် ကျယ်လောင်စွာ အော်ပြောလိုက်ပြီး အရှေ့သို့ ခြေတစ်လှမ်းတိုးလိုက်သည်။ သူက လပုန်ကန်ခန်းမထဲမှ ထွက်ခွာသွားပြီး အပြင်လောကမှ သွေးပင်လယ်၏ အပေါ်မှာ ပြန်ပေါ်လာသည်။ သူက လက်မြှောက်လိုက်ပြီး ဝှေ့ယမ်းလိုက်သည်။ ချက်ချင်းဆိုသလို အဆုံးမရှိသော မီးတောက်များက သူ၏ ခန္ဓာကိုယ်ထဲမှ ပေါ်ထွက်လာကြသည်။ မီးတောက်များသည် သူ့အောက်မှ သွေးပင်လယ်ဆီသို့ ဦးတည်ပျံသန်းသွားကြသည်။

လျှပ်တစ်ပြက်အတွင်း သွေးပင်လယ်သည် ပွက်ပွက်ဆူလာသည်။

မီးတောက်များက ပျံ့နှံ့သွားပြီး လောကတစ်ခုလုံးကို လွှမ်းခြုံသွားသည်။ သွေးပင်လယ်သည် အပြင်းအထန် လှုပ်ခတ်လာပြီး ကောင်းကင်သည် တုန်ခါသွားသည်။

အမြင့်မြတ်ဆုံးဘုန်းတော်ကြီး၏ အမူအရာသည် ပြောင်းလဲသွားသည်။ သူက ညာလက်ကို မြှောက်လိုက်ပြီး အောက်သို့ အကြမ်းပတမ်း ဖိချလိုက်သည်။ မဟာလောကတစ်ခုသည် သူ၏ အနောက်မှာ ဒြပ်ထည်ဖြစ်လာပြီး မီးတောက်များကို ဖိနှိပ်ရန် ပြင်လိုက်သည်။

သို့သော်လည်း ထိုအခိုက်အတန့်မှာ လီရှောင်ရှန်းက လှုပ်ရှားလိုက်သည်။ သူက ပျက်စီးနေသော ဆေဘာဓားရှည်ကို လက်ထဲမှာ ဆုပ်ကိုင်လျက် တရွတ်တိုက်ဆွဲသွားပြီး ခြေလှမ်းကိုးလှမ်း တစ်ဆက်တည်း လျှောက်လှမ်းလိုက်သည်။ သူက အမှန်တရားနှင့် ဟင်းလင်းပြင်ကို ထွင်းဖောက်သွားသည်။ မည်သည့်အရာကမှ သူ့အရှေ့တွင် မတားဆီးနိုင်ဟန် ရ၏။

နဝမမြောက်ခြေလှမ်းတွင် သူက အမြင့်မြတ်ဆုံးဘုန်းတော်ကြီး၏ အရှေ့သို့ တိုက်ရိုက် ရောက်ရှိသွားပြီး ဆေဘာဓားရှည်ဖြင့် ခုတ်ချလိုက်သည်။

လောက၏ အရောင်သည် ပြောင်းလဲသွားသည်။ အမြင့်မြတ်ဆုံးဘုန်းတော်ကြီးနှင့် လီရှောင်ရှန်းသည် တိုက်ခိုက်မှုမှ သက်ရောက်မှုကြောင့် နှစ်ယောက်စလုံး အနောက်ဆုတ်လိုက်ရသည်။

လီရှောင်ရှန်းက အနောက်ဆုတ်သွားစဉ် သွေးတစ်ပွက်အန်လိုက်ရသည်။ သူ၏ အရှိန်အဝါသည် အားနည်းသွားသည်။ သို့သော်လည်း နောက်အခိုက်အတန့်မှာ သူက ပုံမှန်ပြန်ဖြစ်သွားသည်။ သူက ခေါင်းမော့လိုက်သည်။ သူ၏ အကြည့်က အေးစက်နေသည်။ သူက ဆေဘာဓားကို နောက်တစ်ကြိမ် လွှဲယမ်းလိုက်သည်။

အမြင့်မြတ်ဆုံးဘုန်းတော်ကြီး၏ အမူအရာသည် ပျက်ယွင်းသွားသည်။ လီရှောင်ရှန်း၏ နှောင့်ယှက်မှုကြောင့် သူက တဒင်္ဂ နှောင့်နှေးသွားခဲ့သည်။ ထိုသို့နှောင့်နှေးသွားမှုကြောင့် သွေးပင်လယ်သည် မြန်ဆန်စွာ အငွေ့ပျံ့သွားပြီး နောက်ဆုံးမှာ ပျောက်ကွယ်သွားသည်။ သွေးပင်လယ်တစ်ခုလုံးက မီးတောက်များကြောင့် ခမ်းခြောက်သွားသော်လည်း မီးတောက်များသည် မငြိမ်းသတ်သွားပေ။ ယင်းတို့က အမြင့်မြတ်ဆုံးဘုန်းတော်ကြီးဆီသို့ ဦးတည်သွားသည်။

တစ်ချိန်တည်းမှာ လပုန်ကန်ခန်းမထဲတွင် ရွှီချင်း၏ အကြည့်က အေးစက်လာသည်။ သူက လပုန်ကန်ခန်းမမှ ဖြစ်ပေါ်လာသော ကြေးမုံကို ထိန်းချုပ်လိုက်သည်။ ယင်းက တောက်ပသော အလင်းရောင်ကို ထုတ်လွှတ်လာပြီး ဘေးပတ်ဝန်းကျင်ကို လွှမ်းခြုံသွားကာ လပုန်ကန်ခန်းမမှ ကျင့်ကြံသူများအပေါ် အစွမ်းတိုးမြှင့်ပေးလိုက်သည်။

ချိပ်ပိတ်ထားမှုမှ လွတ်မြောက်လာကြသော မျိုးနွယ်ခြားများသည် တစ်ဦးပြီးတစ်ဦး ပြေးထွက်သွားကြသည်။ သူတို့၏ ကျင့်ကြံခြင်းအခြေခံက ပေါက်ကွဲထွက်လာသည်နှင့် အနီရောင်လကျင့်ကြံသူများကို အစုလိုက်အပြုံလိုက် သတ်ဖြတ်လိုက်ကြသည်။