ဝိညာဉ်သိုက်ထဲမှ နတ်ဘုရား

သားရေအိတ်က လျှို့ဝှက်ရတနာသိုက်ထဲသို့ ဝင်ရောက်သွားသည့်အခိုက် နီလာနတ်သမီး၏ အသွေးအသားတစ်တုံးသည် သားရေအိတ်ထဲမှ ပျံသန်းထွက်လာပြီး လျှို့ဝှက်ရတနာသိုက်ထဲသို့ ကျဆင်းသွားသည်။

နီလာနတ်သမီး၏ အသွေးအသားတုံးပေါ်တွင် ငှက်မွှေးများဖြင့် ယှက်ထွေနေပြီး ယင်းက ရွှေရောင်နှင့် အနီရောင်အလင်းကို ထုတ်လွှတ်နေသည်။ ဤအခိုက်အတန့်မှာ အသွေးအသားတုံးက ကျဆင်းလာသည့်အခါ အဆုံးမရှိသော နတ်ဘုရားအစွမ်းသည် ထိုအသွေးအသားတုံးထဲမှ ပေါက်ကွဲထွက်လာသည်။

လောကကြီးသည် ဝေဝါးလာပြီး အရာအားလုံး ပုံပျက်တွန့်လိမ်လာသည်။

ကမ္ဘာတုန်လှုပ်စေမည့် လေကြမ်းများနှင့် တိမ်တိုက်များက ပေါ်လျှိုးလာကြသည်။

ရွှီချင်း၏ လျှို့ဝှက်ရတနာသိုက်ထဲမှ ကောင်းကင်ပေါ်ရှိ နေလုံးသည် ရွှေကျီးကန်းသို့ အသွင်ပြောင်းလဲသွားသည်။ ၎င်းက စူးရှပြီး ကျယ်လောင်သော အော်မြည်သံကို ထုတ်ဖော်လိုက်သည်။ ထိုအသံသည် ဖော်မပြနိုင်သော လိုအင်ရမ္မက်နှင့်အတူ လျှို့ဝှက်ရတနာသိုက်တစ်ခုလုံးသို့ ပဲ့တင်ထပ်သွားသည်။

တစ်ချိန်တည်းမှာ ခရမ်းလသည် ဝေဝါးလာပြီး အပြင်းအထန် တုန်ယင်လာသည်။ ၎င်းက ထိုအသွေးအသားတုံး၏ ဆွဲဆောင်ခံလိုက်ရသည်။ အဘယ့်ကြောင့်ဆိုသော် ၎င်းတို့က တူညီသော ဇစ်မြစ်မှ ဆင်းသက်လာခြင်း ဖြစ်သည်။ ထို့ကြောင့် ၎င်းတို့က အချင်းချင်း တုံ့ပြန်နိုင်ကြသည်။

တစ္ဆေအင်ပါယာတောင်ကုန်းမှ ဖြစ်ပေါ်လာသော ကုန်းမြေသည် အသွေးအသားတုံး ကျဆင်းလာသည်နှင့် ပြင်းထန်စွာ တုန်ယင်လာသည်။ ကျောက်ရှာအလင်းသည် တလက်လက် တောက်ပလာပြီး တစ်လောကလုံးကို သက်တံ့အလင်းရောင်ဖြင့် လွှမ်းခြုံသွားစေသည်။

တားမြစ်အဆိပ်စွမ်းအား၊ (ဃ၁၃၂)နှင့် အချိန်ပုလင်းသည်လည်း တစ်ခုပြီးတစ်ခု လှုပ်ရှားထကြွလာပြီး ဤလျှို့ဝှက်ရတနာသိုက်ထဲရှိ လောကအတွင်းမှာ ပျံ့နှံ့သွားကြသည်။ ၎င်းတို့က မုန်တိုင်းတစ်ခုသို့ အသွင်ပြောင်းလဲသွားပြီး အရပ်မျက်နှာအဘက်ဘက်သို့ ရိုက်ခတ်သွားသည်။

ရွှီချင်း၏ လျှို့ဝှက်ရတနာသိုက်သည် ဤအခိုက်အတန့်မှာ လုံးဝတုန်လှုပ်လာသည်။ ရတနာသိုက်ထဲမှ အရာအားလုံးက ပေါ်လျှိုးထွက်လာပြီး သိသာသော အပြောင်းအလဲများ ဖြစ်ပေါ်လာကြသည်။

ထိုအဖြစ်အပျက်အားလုံး၏ အကြောင်းအရင်းမှာ နီလာနတ်သမီး၏ အသွေးအသားတုံးကြောင့် ဖြစ်သည်။

ထိုအသွေးအသားတုံးက မြေပြင်ပေါ်သို့ ကျဆင်းသွားသည့်အခိုက် ကမ္ဘာ့ခေါင်းလောင်းကြီးက မြည်ဟိန်းသွားသည့်အလား ကျယ်လောင်သော မြည်သံသည် လျှို့ဝှက်ရတနာသိုက်ထဲမှာ ပဲ့တင်ထပ်သွားသည်။

နီလာနတ်သမီးသည် အဆင့်မြင့်နတ်ဘုရားတစ်ပါးဖြစ်ပြီး လောကကို ပြောင်းလဲပစ်နိုင်သော စွမ်းအားကို ပိုင်ဆိုင်ထားသည်။ ထိုအသွေးအသားတုံးသည် သားရေအိတ်ထဲမှ သေးငယ်သော အပိုင်းအစတစ်ခုမျှသာဖြစ်သော်လည်း ယင်းထဲမှာ ကိန်းအောင်းနေသော စွမ်းအားသည် အလွန်တရာ ချောက်ချားဖွယ်ကောင်းဆဲပင်။

သာမန်နည်းလမ်းများသည် ယင်းကို မစုပ်ယူနိုင်ပေ။ ကျင့်ကြံသူများအတွက် ထိုပစ္စည်း၏ တန်ဖိုးသည် အလွန်အမင်း ကြီးမားသည်။ ဗလာနတ္ထိကျင့်ကြံသူများပင် ယင်းကို စုပ်ယူရန် အချိန်အကြာကြီး ပေးရလိမ့်မည်။

သို့သော်လည်း ယင်းမှ ရရှိလာမည့် အကျိုးအမြတ်များသည် အလွန်ကြီးမားသည်။ အထူးသဖြင့် ဗလာနတ္ထိစတုတ္ထအဆင့် ကျင့်ကြံသူများဖြစ်သည်။ သူတို့သည် ဗလာနတ္ထိအဆင့်မှ ဝိညာဉ်စုစည်းခြင်းအဆင့်သို့ ချိုးဖြတ်ရန် နီလာနတ်သမီး၏ အသွေးအသားတုံးမှ စွမ်းအားကို အသုံးပြုနိုင်ကြသည်။

ရွှီချင်းက ဝိညာဉ်သိုက်ပထမအဆင့်မှာသာ ရှိသေးသော်လည်း သူ၏ လျှို့ဝှက်ရတနာသိုက်သည် သာမန်ရတနာသိုက်မဟုတ်ပေ။

သူ၏ လျှို့ဝှက်ရတနာသိုက်ထဲတွင် နီလာနတ်သမီးနှင့် ဇစ်မြစ်တူသော ခရမ်းလရှိသည်။ ခရမ်းလထက် ပိုပြီးအဆင့်မြင့်သော တားမြစ်အဆိပ်လည်း ရှိသေးသည်။

ထို့ပြင် သူ့လျှို့ဝှက်ရတနာသိုက်၏ အသွင်သဏ္ဍာန်က တခြားလျှို့ဝှက်ရတနာသိုက်များဖြင့် နှိုင်းယှဉ်နိုင်သောအရာ မဟုတ်ပေ။ ဤသည်မှာ လောကတစ်ခု ဖြစ်တည်နေသော လျှို့ဝှက်ရတနာသိုက်ဖြစ်သည်။

ထို့ကြောင့် ရွှီချင်း၏ အခြေအနေသည် တခြားလူများနှင့် ခြားနားပေသည်။

သူ၏ ကောင်းကင်ဘုံတာအိုက တစ်ရာခုမြောက် ရှေးဟောင်းကောင်းကင်ဘုံတာအိုဖြင့် နီးစပ်သော ဆက်ဆံရေးရှိကြောင်းကိုတော့ ထည့်ပြောနေစရာ မလိုပေ။

သို့ဖြစ်၍ ဤအခိုက်အတန့်မှာ ကောင်းကင်ဘုံတာအိုမိုဆာဆောသည် ဒြပ်ထည်ဖြစ်တည်လာသည်။ ၎င်း၏ ခန္ဓာကိုယ်သည် ကျယ်ပြန့်လာပြီး ဘေးပတ်ဝန်းကျင်ကို လွှမ်းခြုံသွားသည်။ ထို့နောက် ၎င်းက လောကဆေးမီးဖိုသို့ အသွင်ပြောင်းလဲသွားပြီး အပြင်းအထန် လောင်ကျွမ်းလာသည်။

ထို့ပြင် ၎င်းသည် ခရမ်းလနှင့် တားမြစ်အဆိပ်၏ အစွမ်းတိုးမြှင့်ပေးခြင်းခံထားရပြီး ဤလောကထဲမှ အရာအားလုံး၏ ကြိုးစားအားထုတ်မှုဖြင့် ပေါင်းစပ်သွားသည်။

ဆေးမီးဖို၏ လောင်ကျွမ်းမှုအောက်မှာ နီလာနတ်သမီး၏ အသွေးအသားတုံးသည် ဖြည်းညင်းစွာ အရည်ပျော်သွားသည်။ ထိုသို့အရည်ပျော်နေစဉ်အတွင်း ကြောက်မက်ဖွယ်ကောင်းသော အားလှိုင်းအတတ်အကျများက ပျံ့လွင့်ထွက်လာပြီး လျှို့ဝှက်ရတနာသိုက်ကို အားဖြည့်ပေးလိုက်သည်။

ဤသည်မှာ မူလစွမ်းအားဖြစ်သည်။

နီလာနတ်သမီး၏ အသွေးအသားများထဲမှာ အသန့်စင်ဆုံး မူလစွမ်းအားပါရှိသည်။

ရွှေကျီးကန်းသည် ရူးသွပ်သွားပြီး မူလစွမ်းအားကို အစွမ်းကုန် စုပ်ယူလိုက်သည်။ တစ္ဆေအင်ပါယာတောင်ကုန်းမှ ဖြစ်ပေါ်လာသော ကုန်းမြေသည် တုန်ယင်လာပြီး မူလစွမ်းအားကို စုပ်ယူလိုက်သည်။

ဤလောကထဲမှ တခြားအရာများသည်လည်း ထို့အတူပင်။ ရွှီချင်း၏ လျှို့ဝှက်ရတနာသိုက်အတွက်တော့ ထိုအသွေးအသားတုံးသည် ကြီးမားသော အခွင့်အရေးတစ်ခု ဖြစ်သည်။ ယင်းက ကံကြမ္မာကောင်းဖြစ်ပြီး ကြီးမားသော အာဟာရဓာတ်စာလည်း ဖြစ်သည်။

ထိုသို့စုပ်ယူနေစဉ် ရွှေကျီးကန်း၏ အမြှီးများသည် သိသိသာသာ တိုးပွားလာကြသည်။ ရွှေကျီးကန်း၏ ခန္ဓာကိုယ်သည် အနက်ရောင်မဟုတ်တော့ပေ။ ရွှေရောင်ပြောင်းလဲသွားသည်။ ၎င်းက ကောင်းကင်ပေါ်မှာ ရွှေရောင်ရုပ်တုတစ်ခုပမာ တည်ရှိနေပြီး နတ်ဘုရားအရှိန်အဝါကို ထုတ်လွှတ်နေသည်။

ကုန်းမြေသည်လည်း မြန်ဆန်စွာ ပြောင်းလဲသွားနေသည်။ ယင်းက ရွှေရောင်ကုန်းမြေသို့ ပြောင်းလဲသွားသည်။

တောင်တန်းဒေသများနှင့် မြစ်ချောင်းများသည်လည်း တူညီစွာ ပြောင်းလဲသွားကြသည်။

ကျောက်ရှာအလင်းသည်ပင် ဤအခိုက်အတန့်မှာ ပြောင်းလဲသွားသည်။ ၎င်း၏ အရောင်အားလုံးသည် ရွှေရောင်ဖြင့် လွှမ်းခြုံခံလိုက်ရသည်။ လျှို့ဝှက်ရတနာသိုက်တစ်ခုလုံး အကြီးအကျယ် ပြောင်းလဲသွားနေသည်။

အစတွင် ထိုပြောင်းလဲမှုသည် အပေါ်ယံမျှသာ ဖြစ်သည်။ သို့သော်လည်း နီလာနတ်သမီး၏ အသွေးအသားတုံးက ဆက်လက် လောင်ကျွမ်းနေသည်နှင့်အမျှ ထိုအပြောင်းအလဲသည် ပိုပြီးနက်ရှိုင်းလာသည်။ အကယ်၍ အရာအားလုံး ပြီးမြောက်သွားလျှင် ရွှီချင်း၏ လျှို့ဝှက်ရတနာသိုက်သည် အထဲမှစ၍ တဖြည်းဖြည်း ရွှေရောင်ပြောင်းသွားလိမ့်မည်ဖြစ်ကြောင်း စိတ်ကူးကြည့်နိုင်ပေသည်။

ထိုနေရာမှ မီးတောက်များသည်ပင် ရွှေရောင်ပြောင်းသွားလိမ့်မည်။

ထိုအရာကို ပြီးမြောက်အောင် သူလုပ်ဆောင်နိုင်သည့်အခါ လျှို့ဝှက်ရတနာသိုက်၏ အနှစ်သာရနှင့် မူလဇစ်မြစ်သည်လည်း ကြီးကြီးမားမား ပြောင်းလဲသွားကြလိမ့်မည်။

ဤအခိုက်အတန့်မှာ ကြီးမားသော ထိုအပြောင်းအလဲသည် ဆက်လက် ဖြစ်ပွားနေဆဲပင်။

ရွှီချင်းသည် လျှို့ဝှက်ရတနာသိုက်၏ အပြောင်းအလဲကို ရှင်းလင်းစွာ အာရုံခံမိသည်။ ၎င်း၏ အရှိန်အဝါသည် ယခင်ကထက် ပိုပြီးကြီးကျယ်မြင့်မြတ်လာပြီး အများကြီး သာလွန်သွားသည်။

“ ငါ့လျှို့ဝှက်ရတနာသိုက်ထဲမှာ ထူးဆန်းတဲ့ အပြောင်းအလဲတွေ ဖြစ်ပေါ်နေတယ်… ”

ရွှီချင်း၏ အသက်ရှူသံသည် အနည်းငယ် မြန်ဆန်လာသည်။ အကယ်၍ လျှို့ဝှက်ရတနာသိုက်၏ ထိုပြောင်းလဲမှုသာ ပြီးမြောက်သွားလျှင် သူက နောက်ထပ် အမြင့်တစ်နေရာသို့ ရောက်ရှိသွားလိမ့်မည်ဖြစ်ကြောင်း အာရုံရနေသည်။

သို့သော်လည်း လျှို့ဝှက်ရတနာသိုက်ထဲမှ အပြောင်းအလဲများသည် တစ်ခဏကြာမြင့်ပြီးနောက် စတင်ငြိမ်သက်လာသည်။

ရွှေရောင်ပြောင်းလဲနေသည့် လျှို့ဝှက်ရတနာသိုက်ထဲမှ ကောင်းကင်နှင့် မြေပြင်သော်လည်းကောင်း သို့မဟုတ် တခြားအရာများသော်လည်းကောင်း ထိုပြောင်းလဲမှုက ရပ်တန့်သွားသည်နှင့် ရွှေရောင်သည် မှေးမှိန်သွားပြီး မူလအခြေအနေသို့ ပြန်ရောက်သွားသည်။

ရွှီချင်းသည် မျက်မှောင်ကြုတ်လိုက်ပြီး သေချာစစ်ဆေးကြည့်လိုက်သည်။

နီလာနတ်သမီး၏ အသွေးအသားတုံးသည် အတိုင်းအတာတစ်ခုထိ လောင်ကျွမ်းပြီးနောက် ထက်ဝက်နီးပါး ကျန်ရှိနေသေးသော်လည်း ဆက်လက် မလောင်ကျွမ်းတော့ပေ။ ယင်းက မူလစွမ်းအားထောက်ပံ့ပေးမှုကို ရပ်တန့်သွားစေသည်။

ရွှီချင်းသည် နှုတ်ဆိတ်သွားသည်။ သူက သားရေအိတ်ကို ထိန်းချုပ်လိုက်ပြီး နောက်ထပ် အသွေးအသားတစ်တုံးကို ပစ်ချလိုက်သည်။

မြေပြင်သည် တုန်ယင်သွားပြီး အသွေးအသားတုံးက မီးတောက်ပင်လယ်ထဲသို့ ကျဆင်းသွားသည်။ သို့သော်လည်း ယင်းက ယခင်အတိုင်း ရှိနေဆဲပင်။

“ မီးတောက်စွမ်းအားက မလုံလောက်တာပဲ ”

ရွှီချင်းသည် မီးတောက်ပင်လယ်ထဲမှ အသွေးအသားတုံးနှစ်တုံးကို ကြည့်နေရင်း ထိုသို့ဖြစ်ရသည့် အကြောင်းအရင်းကို ရှာတွေ့သွားသည်။

တစ်ခဏကြာ တိတ်ဆိတ်နေပြီးနောက် သူ၏ လျှို့ဝှက်ရတနာသိုက်ထဲမှ အရာအားလုံးက ပုံမှန်ပြန်ဖြစ်သွားသည်နှင့် ရွှီချင်းက ထိုအတွက် ဖြေရှင်းနည်းတစ်ခုကို ရှာတွေ့သွားသည်။

“ မီးတောက်စွမ်းအားက မလုံလောက်ဘူးဆိုမှတော့ လောင်စာထပ်ထည့်ပေးမယ် ”

ရွှီချင်းသည် လပုန်ကန်ခန်းမမှ အမြင့်မြတ်ဆုံးဘုရားကျောင်း၏ ဂိတ်တံခါးပေါ်မှ နီလာနတ်သမီး၏ တိုတမ်အား လောင်ကျွမ်းစေခဲ့သော မြင်ကွင်းကို ပြန်အမှတ်ရသွားသောအခါ မျက်လုံးဝင်းလက်သွားသည်။ သူ၏ နတ်ဘုရားစိတ်အာရုံကို ဖြန့်ထုတ်လိုက်သည့်အခါ လျှို့ဝှက်ရတနာသိုက်၏ မြေပြင်သည် တုန်ယင်သွားပြီး ကြီးမားသော အက်ကွဲကြောင်းတစ်ခု ထွက်ပေါ်လာသည်။ သွေးသားရဲများသည် အက်ကွဲကြောင်းထဲမှ တစ်ကောင်ပြီးတစ်ကောင် ပြေးထွက်လာကြပြီး မီးတောက်ပင်လယ်ထဲသို့ ခုန်ဆင်းသွားကြသည်။ ထို့နောက် ၎င်းတို့က ကိုယ့်ကိုယ်ကို ဖောက်ခွဲပစ်လိုက်ကြသည်။

၎င်းတို့၏ ကိုယ့်ကိုယ်ကို ဖောက်ခွဲမှုသည် ခပ်အုပ်အုပ်မိုးခြိမ်းသံသို့ ပြောင်းလဲသွားသည်။ ထိုသို့ဖောက်ခွဲမှုအောက်မှာ လျှို့ဝှက်ရတနာသိုက်ထဲမှ ဆေးမီးဖို၏ မီးတောက်များသည် ပိုပြီးသိပ်သည်းလာသည်။ ယင်း၏ အရောင်သည် သွေးနီရောင်သို့ မြန်ဆန်စွာ ပြောင်းလဲသွားသည်။

လောင်စာအဖြစ် သွေးသားရဲများကို အသုံးပြုခြင်းသည် နီလာနတ်သမီးနှင့် ၎င်းတို့ကြားမှ ဆက်နွယ်မှုကြောင့် အသွေးအသားတုံး၏ ခုခံမှုကို အလွယ်တကူ ကျိုးပျက်စေနိုင်သည်။ ထို့ပြင် သွေးသားရဲများဆီမှာ မွေးရာပါ တိုက်စားခြင်းဂုဏ်သတ္တိလည်း ရှိသေးသည်။ ဤသည်မှာ ရွှီချင်းစဉ်းစားမိသော ဖြေရှင်းနည်း ဖြစ်သည်။

အဆုံးမဲ့သော သွေးသားရဲများသည် လောင်စာဆီနှင့် တူညီသည်။ ၎င်းတို့၏ အားဖြည့်ပေးမှုအောက်မှာ မီးတောက်များ၏ စွမ်းအားသည် တစ်ဟုန်ထိုး တိုးမြှင့်သွားပြီး နီလာနတ်သမီး၏ အသွေးအသားနှစ်တုံးကို အရူးအမူး လောင်ကျွမ်းပစ်လိုက်သည်။

မကြာမီ ထိုအသွေးအသားနှစ်တုံးသည် ပျောက်ကွယ်သွားပြီး ပမာဏများပြားသော မူလစွမ်းအားက ပျံ့နှံ့ထွက်လာသည်။ ရွှေရောင်သည် ရွှီချင်း၏ လျှို့ဝှက်ရတနာသိုက်ထဲမှာ ထပ်မံ ပေါ်ထွက်လာသည်။

ဤတစ်ကြိမ်တွင် ၎င်း၏ အမြန်နှုန်းသည် ယခင်ကထက် ပိုပြီးမြန်ဆန်သည်။ မျက်စိတစ်မှိတ်အတွင်းမှာ လျှို့ဝှက်ရတနာသိုက်ထဲမှ အပေါ်ယံအလွှာအားလုံးသည် ရွှေရောင်ပြောင်းလဲသွားကြသည်။ ထို့နောက် အတွင်းပိုင်းထဲမှာလည်း ဆက်လက် ပြောင်းလဲသွားသည်။ ဆယ့်ငါးမိနစ်ကြာပြီးနောက် လျှို့ဝှက်ရတနာသိုက်သည် အတွင်းရောအပြင်ပါမကျန် လုံးဝရွှေရောင်ပြောင်းလဲသွားသည်။

ရွှေရောင်လျှို့ဝှက်ရတနာသိုက်… ရွှေရောင်လောက…

ရွှေရောင်မီးတောက်သည် လျှို့ဝှက်ရတနာသိုက်ထဲမှာ လောင်ကျွမ်းနေသည်။ မူလစွမ်းအားက အလွန်အမင်း သိပ်သည်းသော အဆင့်တစ်ခုသို့ ရောက်ရှိသွားသည့်အခါ ပိုပြီးအဆင့်မြင့်သော မူလစွမ်းအားက မွေးဖွားလာသည်။

ထိုမူလစွမ်းအားထဲမှာ လွှမ်းမိုးဖိနှိပ်ခြင်းနှင့် အထွတ်အမြတ်ဖြစ်တည်မှု ပါရှိသည်။

ထိုစွမ်းအားကို အနည်းငယ် အာရုံခံမိသွားသည်နှင့်ချက်ချင်း ရွှီချင်း၏ အမူအရာသည် ပြောင်းလဲသွားသည်။

ဤသည်မှာ နတ်ဘုရားအရင်းအမြစ်ဖြစ်သည်။

ထိုနတ်ဘုရားအရင်းအမြစ်သည် မည်သည့်နတ်ဘုရားအပိုင်မှ မဟုတ်ပေ။ ရွှီချင်းပိုင်ဆိုင်သော နတ်ဘုရားအရင်းအမြစ် ဖြစ်သည်။ ယင်းကို ရွှီချင်းက ဖွဲ့စည်းခဲ့သောကြောင့် ထိုထဲမှာ ရွှီချင်း၏ အရှိန်အဝါနှင့် အသက်ဓာတ် ကိန်းအောင်းနေသည်။

နတ်ဘုရားအရင်းအမြစ်၏ ထွက်ပေါ်လာမှုကြောင့် ရွှီချင်း၏ လျှို့ဝှက်ရတနာသိုက်က အဆင့်မြင့်တတ်သွားဟန် ရသည်။ ယင်းက လျှို့ဝှက်ရတနာသိုက်မှ နတ်ဘုရားရတနာသိုက်အဖြစ်သို့ တိုက်ရိုက် တတ်လှမ်းသွားသည်။

နတ်ဘုရားများမွေးဖွားလာသော နေရာကို နတ်ဘုရားရတနာသိုက်ဟု ခေါ်ပေသည်။

လှိုင်းလုံးများသည် ရွှီချင်း၏ နှလုံးသားထဲမှာ ပေါ်လျှိုးလာသည်။ သူက အနီးကပ် သေချာမစစ်ဆေးနိုင်မီ သူ၏ လျှို့ဝှက်ရတနာသိုက်ထဲမှ မီးတောက်ပင်လယ်သည် ပေါက်ကွဲထွက်သွားသည်။ နတ်ဘုရားအရင်းအမြစ်ထဲမှ လွှမ်းမိုးဖိနှိပ်သော အရှိန်အဝါသည် နတ်ဘုရားရတနာသိုက်တစ်ခုလုံးမှာ ပြည့်နှက်သွားသည်။

ဤသည်မှာ နတ်ဘုရာအရင်းအမြစ်က ၎င်း၏ အချုပ်အခြာအာဏာကို ကြေညာနေသည့်အလားပင်။

ရွှေကျီးကန်းသည် ဦးညွတ်လိုက်ပြီး မြေပြင်သည် ၎င်းကို အညံ့ခံလိုက်သည်။ ကောင်းကင်သည် ငြိမ်သက်သွားပြီး မြစ်သည် တသွင်သွင် စီးဆင်းသွားသည်။

ထို့နောက် ကောင်းကင်ဘုံတာအိုနှင့် တခြားအရာအားလုံးက ၎င်းကို အသိအမှတ်ပြုလိုက်ကြသည်။ (ဃ၁၃၂)ထဲမှ နတ်ဘုရားလက်ချောင်းသည်ပင် တုန်ယင်လာပြီး ဝပ်တွားလိုက်သည်။ ၎င်းက အညံ့ခံရန် ရွေးချယ်လိုက်သည်။

သို့သော်လည်း ကောင်းကင်ပေါ်မှ ခရမ်းလသည် ထွန်းလင်းတောက်ပလာပြီး နတ်ဘုရားအရင်းအမြစ်ကို ခုခံနေသည်။ ထို့နောက် ခရမ်းလသည် ဤနတ်ဘုရားရတနာသိုက်ထဲမှ အတင်းအကျပ် ဖယ်ထုတ်ခံလိုက်ရသည်။

ထို့နောက် တားမြစ်အဆိပ်မှ ဖွဲ့စည်းဖြစ်ပေါ်လာသော မြူခိုးတိမ်တိုက်သည်လည်း နတ်ဘုရားအရင်းအမြစ်၏ လွှမ်းမိုးဖိနှိပ်မှုအောက်မှာ မောင်းထုတ်ခံလိုက်ရသည်။

ရွှီချင်း၏ လောကနတ်ဘုရားရတနာသိုက်က ဖွဲ့စည်းဖြစ်ပေါ်လာပြီး သူ့ကိုယ်ပိုင် နတ်ဘုရားအရင်းအမြစ် မွေးဖွားလာသည့်အခိုက် တခြားနတ်ဘုရားအစွမ်းအားလုံးသည် နတ်ဘုရားရတနာသိုက်ထဲမှ အတင်းအကျပ် ဖယ်ထုတ်ခံလိုက်ရသည်။ အကယ်၍ ၎င်းတို့က မဦးညွတ်လျှင် ဤနတ်ဘုရားရတနာသိုက်ထဲမှာ ဆက်ပြီးတည်ရှိနိုင်လိမ့်မည် မဟုတ်ပေ။

ဤသည်ကို ရွှီချင်းအာရုံခံမိသွားသည့်အခါ သူ၏ စိတ်ထဲမှ လှိုင်းဂယက်များသည် ပိုပြီးပြင်းထန်လာသည်။ ထိုနတ်ဘုရားရတနာသိုက်က သူ့ကိုယ်ပိုင်ဖြစ်ကြောင်း ရှင်းလင်းစွာ သူအာရုံခံမိသည်။ ထိုထဲမှာ ကိန်းအောင်းနေသော စွမ်းအားသည် ယခင်က သူ၏ လျှို့ဝှက်ရတနာသိုက်ထက် အများကြီး ပိုပြီးသာလွန်သည်။

ထိုနှစ်ခုကြားမှ ကွာခြားမှုသည် သေမျိုးနှင့် ကျင့်ကြံသူကဲ့သို့ပင်။

“ အခု ငါက အင်မော်တယ်လမ်းစဉ်ကို ကျင့်ကြံနေတာလား ဒါမှမဟုတ် နတ်ဘုရားလမ်းစဉ်ကို ကျင့်ကြံနေတာလား ”

“ ငါက ကျင့်ကြံခြင်းနယ်ပယ်ရဲ့ ဝိညာဉ်သိုက်အဆင့်မှာပဲ ရှိသေးတာ သေချာပါတယ်… ဒါပေမဲ့ နတ်ဘုရားအရင်းအမြစ်ရှိတဲ့ နတ်ဘုရားရတနာသိုက်က ငါ့ဆီမှာ တကယ်ကြီး ထွက်ပေါ်လာတယ် ”

“ အဲ့ဒါက အခွင့်အာဏာ မဟုတ်တော့ဘူး… ငါ့ကြောင့် မွေးဖွားလာတဲ့ နတ်ဘုရားအရင်းအမြစ်ဖြစ်သွားပြီ… ”

အချိန်အတော်ကြာပြီးနောက် ရွှီချင်းသည် သူ၏ နှလုံးသားထဲမှ လှိုင်းလုံးများကို ဖိနှိပ်လိုက်သည်။ ထို့နောက် သူက နတ်ဘုရားရတနာသိုက်ထဲမှ ဖယ်ထုတ်ခံလိုက်ရသော တားမြစ်အဆိပ်စွမ်းအားနှင့် ခရမ်းလ၏ အခွင့်အာဏာကို ကြည့်လိုက်သည်။

“ ဒါပေမဲ့ ဘာပဲဖြစ်ဖြစ်ပါ… နတ်ဘုရားရတနာသိုက်ထွက်ပေါ်လာပြီးနောက် ငါက အရင်ကထက် ပိုပြီးသိသိသာသာ သန်မာလာတယ်… ဒါဆိုရင်… နောက်ထပ် နတ်ဘုရားရတနာသိုက်တွေ ထွက်ပေါ်လာနိုင်မလား ”

ရွှီချင်းသည် မျက်လုံးမှေးကျဉ်းလိုက်သည်။ အနီရောင်လ၏ အခွင့်အာဏာကို သူနားလည်ခဲ့စဉ်က ပုံရိပ်ယောင်နတ်ဘုရားရတနာသိုက်တစ်ခု ထွက်ပေါ်လာဖူးကြောင်း စဉ်းစားမိသွားသည်။ နောက်ပိုင်းတွင် အခွင့်အာဏာကြောင့် ၎င်းက သူ၏ လျှို့ဝှက်ရတနာသိုက်ထဲသို့ ပေါင်းစပ်သွားပြီး လစန္ဒာအသွင် ပြောင်းလဲသွားခဲ့သည်။

ထိုသို့တွေးမိသောအခါ ဆုံးဖြတ်ချက်ပြတ်သားမှုသည် ရွှီချင်း၏ မျက်လုံးထဲမှာ ထွက်ပေါ်လာသည်။ သူက နီလာနတ်သမီး၏ အသွေးအသားတစ်တုံးကို သားရေအိတ်ထဲမှ ထုတ်ယူလိုက်ပြီး ခရမ်းလထဲသို့ ထည့်သွင်းလိုက်သည်။

နောက်အခိုက်အတန့်မှာ ခရမ်းရောင်အလင်းသည် ပျံ့နှံ့ထွက်လာသည်။ ဝုန်းခနဲ မြည်ဟိန်းသံများက အရပ်မျက်နှာအသီးသီးသို့ ပဲ့တင်ထပ်သွားသည်။ တရစပ် ပေါက်ကွဲသံများကြားမှာ ယခင်က ထွက်ပေါ်လာဖူးသော ပုံရိပ်ယောင်နတ်ဘုရားရတနာသိုက်သည် နောက်တစ်ကြိမ် ပြန်ဆင်းသက်လာသည်။

ထို့ပြင် ဤတစ်ကြိမ်မှာ ၎င်းက ပုံရိပ်ယောင်မှ အစစ်အမှန်သို့ မြန်ဆန်စွာ ပြောင်းလဲသွားနေသည်။

ထိုရတနာသိုက်ထဲမှာ ကောင်းကင်ဘုံတာအိုမရှိသော်လည်း နီလာနတ်သမီး၏ အသွေးအသားတုံးနှင့် ရွှီချင်း၏ ခရမ်းလအခွင့်အာဏာသည် အတိုင်းအတာတစ်ခုအရဆိုလျှင် တူညီသော ဇစ်မြစ်ထံမှ ဆင်းသက်လာကြခြင်း ဖြစ်သည်။ သို့ဖြစ်၍ ၎င်းတို့ကြားမှ ပေါင်းစပ်မှုသည် အဆင်ပြေချောမွေ့သည်။

သူ၏ ခန့်မှန်းမှုက မမှားယွင်းကြောင်း မြင်တွေ့သွားသောအခါ ရွှီချင်းသည် လုံးဝတုံ့ဆိုင်းမနေဘဲ စတုတ္ထမြောက် နီလာနတ်သမီး၏ အသွေးအသားတုံးကို ပစ်ထည့်လိုက်သည်။

နတ်ဘုရားရတနာသိုက်သည် တုန်ယင်လာပြီး ပိုပြီးမြန်ဆန်စွာ ပြောင်းလဲသွားသည်။

တစ်ခဏကြာပြီးနောက် ရွှီချင်း၏ ခန္ဓာကိုယ်ပေါ်မှ အရှိန်အဝါက တိုးမြှင့်လာပြီး ကြောက်စရာကောင်းသော အားလှိုင်းအတတ်အကျများကို ထုတ်လွှတ်လာသည်နှင့်ချက်ချင်း ခရမ်းလနတ်ဘုရားရတနာသိုက်က အပြည့်အဝ ဖွဲ့စည်းသွားသည်။

ထိုနတ်ဘုရားရတနာသိုက်သည် ရွှီချင်း၏ လောကနတ်ဘုရားရတနာသိုက်နှင့် ခြားနားသည်။ ထိုထဲမှာ ခရမ်းရောင်အလင်းဖြင့် ပြည့်နှက်နေသည်။ နားလည်ရခက်ခဲသော ဟိန်းသံများသည် နတ်ဘုရားရတနာသိုက်ထဲမှာ ပဲ့တင်ထပ်နေပြီး မိုးခြိမ်းသံများသို့ ပြောင်းလဲသွားကြသည်။ ယင်းတို့က ဆေးမီးဖိုတစ်ခုကို ဖွဲ့စည်းသွားပြီး ထာဝရ တည်ရှိနေမည့် ဟိန်းသံများကို ထုတ်လွှတ်နေသည်။

ဤအခိုက်အတန့်မှာ ရွှီချင်းသည် ယခင်ကနှင့် လုံးဝခြားနားသွားသည်။

သူက မျက်လုံးမှိတ်ထားပြီး တင်ပျဉ်ခွေထိုင်နေသည်။ သူ၏ ဆံပင်ရှည်က လေတိုးဝှေ့မှုကြောင့် တဖျပ်ဖျပ်လွင့်မျောနေစဉ် နတ်ဘုရားရတနာသိုက်နှစ်ခုသည် အားအင်အပြည့်ဖြင့် ပေါ်လျှိုးထွက်လာကြသည်။

နတ်ဘုရားရတနာသိုက်များထဲတွင် ပုံရိပ်နှစ်ခုက တင်ပျဉ်ခွေထိုင်နေကြသည်။

လောကနတ်ဘုရားရတနာသိုက်ထဲမှ ပုံရိပ်သည် နတ်ဘုရားတစ်ပါးနှင့် ဆင်တူပြီး ဖော်မပြနိုင်အောင် မွန်မြတ်သန့်စင်သည်။ ၎င်း၏ အရှိန်အဝါသည် ကြီးကျယ်မြင့်မြတ်ပြီး လွှမ်းမိုးဖိနှိပ်နိုင်စွမ်း ရှိသည်။

ခရမ်းလနတ်ဘုရားရတနာသိုက်ထဲမှ ပုံရိပ်သည် ဝေဝါးနေသည်။ အသွေးအသားများနှင့် ငှက်မွှေးများ၏ ပေါင်းစပ်မှုမှ ဖြစ်ပေါ်လာသော အတောင်ပံများကိုသာ ရှင်းရှင်းလင်းလင်း မြင်နိုင်ပေသည်။ ထိုအတောင်ပံများသည် အနည်းငယ် လှုပ်ယမ်းနေကြသည်။ ထို့ပြင် မထူးမခြားနား မျက်လုံးတစ်စုံလည်း ရှိသေးသည်။

ဤသည်မှာ ၎င်းကို တိုက်ရိုက် ကြည့်ရန် မဖြစ်နိုင်သည့်အလားပင်။

“ တတိယတစ်ခု ရှိနိုင်သေးတယ် ”

ရွှီချင်းက မျက်လုံးဖွင့်လိုက်သည့်အခါ သူ၏ မျက်လုံးသည် အနက်ရောင်သို့ ပြောင်းလဲသွားသည်။ တားမြစ်အဆိပ်စွမ်းအားက ပေါ်လျှိုးထွက်လာပြီး သူ၏ အနောက်မှာ အဆိပ်မြူခိုးတစ်ခု ဖွဲ့စည်းသွားသည်။

ထို့နောက် သူက နီလာနတ်သမီး၏ အသွေးအသားနှစ်တုံးကို သားရေအိတ်ထဲမှ ထုတ်ယူလိုက်ပြီး အဆိပ်မြူခိုးထဲသို့ ပစ်ထည့်လိုက်သည်။

အဆိပ်မြူခိုးသည် ပရမ်းပတာ လှုပ်ရှားထကြွလာပြီး အရပ်မျက်နှာအဘက်ဘက်သို့ ပျံ့ပွားသွားသည်။ မြူခိုးထဲမှ အဆိပ်စွမ်းအားသည် ကြီးကြီးမားမား အားဖြည့်ပေးခြင်းခံလိုက်ရသည်။ ၎င်း၏ တားမြစ်အစွမ်းသည်လည်း သိသိသာသာ မြှင့်တတ်သွားသည်။ ကျယ်လောင်သော ဟိန်းသံများသည် အဆိပ်မြူခိုးထဲမှ မြည်ဟိန်းထွက်လာသည်။

အချိန်သည် တရွေ့ရွေ့ ကုန်ဆုံးသွားသည်။ တစ်နာရီကြာမြင့်ပြီးနောက် မည်းမှောင်နေသော နတ်ဘုရားရတနာသိုက်တစ်ခုသည် အဆိပ်မြူခိုးထဲမှာ ဒြပ်ထည်ဖြစ်တည်လာသည်။

ထိုနတ်ဘုရားရတနာသိုက်ထဲတွင် ပုံရိပ်တစ်ခုက မြူခိုးထဲမှာ တရားထိုင်နေသည်။ ၎င်း၏ မျက်လုံးသည် တစ္ဆေမီးတောက်ဖြင့် လောင်မြိုက်နေသည်။ အဆိပ်မြူခိုးက ပရမ်းပတာ လှုပ်ရှားထကြွလာသည့်အခါ အနက်ရောင်စစ်ချပ်ဝတ်ကို ဝတ်ဆင်ထားသော ပုံရိပ်တစ်ခုသည် လောကအဆုံးသတ်၏ ရှေ့ဆောင်လမ်းပြဖြစ်သော မိစ္ဆာတစ်ကောင်နှယ် ထွက်ပေါ်လာသည်။

၎င်းက တခြားနတ်ဘုရားပုံရိပ်နှစ်ခုဖြင့် ပူးပေါင်းလိုက်ပြီး သူတို့အရှေ့မှ ပုဂ္ဂိုလ်ကို ကာကွယ်စောင့်ကြပ်ပေးလိုက်ကြသည်။

သူတို့အရှေ့မှာ တင်ပျဉ်ခွေထိုင်နေသော ပုဂ္ဂိုလ်သည် အလွန်ချောမောခန့်ညားသော လူငယ်တစ်ယောက် ဖြစ်သည်။

သူ၏ မျက်နှာသည် ပြစ်ချက်မဲ့သည်။ သူ၏ အမူအရာက အေးတိအေးစက်ဖြစ်နေပြီး သူ၏ နက်ရှိုင်းသော အကြည့်ထဲမှာ မြူခိုးငွေ့များ ပုန်းကွယ်နေသည်။ သူ၏ အနက်ရောင် ဆံပင်ရှည်သည် နားနားတစ်ဝိုက်မှာ ကျဆင်းနေပြီး မှိန်ဖျော့ဖျော့ ခရမ်းရောင်ရောင်ခြည်ကို ထုတ်လွှတ်နေသည်။

သူက အင်မော်တယ်တစ်ပါးနှင့် ဆင်တူသကဲ့သို့ နတ်ဘုရားတစ်ပါးနှင့်လည်း ဆင်တူပေသည်။