အမှောင်ချောက်နက်

“ နတ်ဘုရားမီးတောက်လား ”

အရိပ်လေးကို ကြည့်နေစဉ် ရွှီချင်း၏ အကြည့်သည် အေးခဲသွားသည်။ သူ၏ အကြည့်အောက်မှာ အရိပ်လေးသည် အကြိမ်ရေအနည်းငယ် တုန်ယင်သွားပြီး ၎င်း၏ စိတ်ခံစားချက်များကို ဂရုတစိုက် ထုတ်လွှတ်လိုက်သည်။

“ မီး… ဗုန်း ဗုန်း ဗုန်း…”

ရွှီချင်းသည် နှုတ်ဆိတ်သွားသည်။ သူက ကျင်းကန်းဂိုဏ်းဘိုးဘေးကို သတိရသွားသည်။

တစ်ခါတစ်ရံ အရိပ်လေး ထုတ်လွှတ်လိုက်သော စိတ်ခံစားချက်လှိုင်းများကို သူနားလည်နိုင်သည်။ သို့သော်လည်း အကြိမ်အများစုတွင် တစ်ဖက်လူ၏ အဓိပ္ပာယ်ဆိုလိုရင်းကို အတိအကျ သူနားလည်ရန် အလွန်ခက်ခဲပေသည်။

‘ နတ်ဘုရားမီးတောက် ’ဟူသော အဓိပ္ပာယ်သည် အလွန်ကြီးမားသည်။ လပူဇော်ဒေသကြီးထဲမှ ရွှီချင်း၏ နားလည်မှုအရဆိုလျှင် ယင်းက နတ်ဘုရားတစ်ပါးဖြစ်လာရန် မဖြစ်မနေ လိုအပ်သော အရာဖြစ်သည်။ နတ်ဘုရားမီးတောက်ကို ထွန်းညှိနိုင်မှသာလျှင် ထိုသူက နတ်ဘုရားတစ်ပါး ဖြစ်လာလိမ့်မည်။

ဥပမာ နီလာနတ်သမီးနှင့် နတ်ဘုရားသားတော်သည် ထိုလမ်းစဉ်ကို လျှောက်လှမ်းကြသည်။

သို့သော်လည်း နီလာနတ်သမီးက အောင်မြင်ခဲ့ပြီး နတ်ဘုရားသားတော်က မအောင်မြင်ခဲ့ပေ။ သူကျရှုံးသွားပြီးနောက် နတ်ဘုရားမီးတောက်က သူ့အား ပြန်လည်လောင်ကျွမ်းသွားခဲ့သည်။

သို့ဖြစ်၍ ‘ နတ်ဘုရားမီး‌တောက် ’ဟူသော စကားလုံးကို အရိပ်လေးထံမှ ကြားပြီးနောက် ရွှီချင်း၏ နှလုံးသည် ပရမ်းပတာ လှုပ်ခတ်သွားသည်။

“ မင်းက နတ်ဘုရားမီးတောက်ကို ဖွဲ့စည်းနိုင်တာလား ”

ရွှီချင်းက မေးသည်။

အရိပ်လေးသည် အစတွင် ခေါင်းညိတ်လိုက်သည်။ ထို့နောက် ၎င်းက ခေါင်းခါလိုက်သည်။ နောက်ဆုံးမှာတော့ ၎င်းက စိုးရိမ်ကြောင့်ကြလာသည်။ ထို့ကြောင့် ၎င်းက ရိုးရိုးရှင်းရှင်းသာ ပြောသည်။

“ ဗုန်း… ဗုန်း… ဗုန်း… ”

ရွှီချင်းသည် မျက်မှောင်ကြုတ်လိုက်သည်။ တစ်ခဏကြာ စဉ်းစားပြီးနောက် သူက လက်မြှောက်လိုက်ပြီး ဘေးပတ်ဝန်းကျင်ကို အစီအမံပြုလုပ်လိုက်သည်။ ထို့နောက် သူက နီလာနတ်သမီး၏ အသွေးအသားငှက်မွှေးတစ်ခုကို ထုတ်ယူလိုက်သည်။

ငှက်မွှေးကို ကြည့်နေရင်း အရိပ်လေးသည် အလွန်စိတ်လှုပ်ရှားလာပြီး မြေပြင်ပေါ်မှာ ပရမ်းပတာ ရွေ့လျားလိုက်သည်။ ဤသည်မှာ နေအိမ်၏ အုတ်ကြွပ်ပြားများက အနက်ရောင်နွံတောအဖြစ် ပြောင်းလဲသွားသည့်အလားပင်။

အရိပ်လေး၏ စိတ်ခံစားချက်များကို အာရုံခံမိပြီးနောက် ရွှီချင်းသည် လက်ဝှေ့ယမ်းလိုက်ပြီး အသွေးအသားငှက်မွှေးကို ပစ်လွှတ်လိုက်သည်။ ငှက်မွှေးက မြေပြင်ပေါ်သို့ ပြုတ်ကျမသွားမီ အရိပ်လေးသည် မြေပြင်ပေါ်မှ စိတ်မရှည်စွာ မြှောက်တတ်သွားပြီး ငှက်မွှေးကို ဝါးမျိုရန် ပါးစပ်ဟလိုက်သည်။

၎င်း၏ ကိုယ်ထည်သည် အရာအားလုံးကို ဝါးမျိုနိုင်သော တွင်းနက်အဖြစ် ပြောင်းလဲသွားသည်။ မျက်စိတစ်မှိတ်အတွင်းမှာ ငှက်မွှေးသည် ပျောက်ကွယ်သွားသည်။ အရိပ်လေးသည်တော့ အပြင်းအထန် တုန်ယင်လာပြီး ဆက်လက် ပျံ့ပွားသွားသည်။

ရွှီချင်းသည် ဖြစ်စဉ်တစ်ခုလုံးကို အာရုံစိုက်ထားသည်။ တစ်နာရီကြာပြီးနောက် အရိပ်လေး၏ အားလှိုင်းအတတ်အကျများသည် ဖြည်းညင်းစွာ လျော့ပါးသွားပြီး တည်ငြိမ်သွားသည်။ နောက်ဆုံးမှာတော့ ၎င်းသည် ကျုံ့သွားပြီး ရွှီချင်း၏ ခြေဖဝါးအောက်သို့ ပြန်ရောက်သွားသည်။ အရိပ်လေးသည် တစ်ခါမှမဖြစ်စဖူး ပြင်းပြသော လိုအင်ဆန္ဒကို ထုတ်လွှတ်လိုက်သည်။

“ အရသာရှိတယ်… စားချင်တယ်… နောက်ထပ်… ”

စဉ်းစားချင့်ချိန်သော အကြည့်သည် ရွှီချင်း၏ မျက်လုံးထဲမှာ ထွက်ပေါ်လာသည်။ သူက နီလာနတ်သမီး၏ ကျန်ရှိသော အသွေးအသားပမာဏကို စစ်ဆေးကြည့်လိုက်သည်။ ထို့နောက် သူက ခေါင်းကိုက်မှုကို သည်းခံလိုက်ပြီး လက်သီးဆုပ်အရွယ်ခန့် အသွေးအသားတုံးတစ်တုံးကို ထုတ်လိုက်သည်။

ပိုပြီးကြီးမားသော အသွေးအသားတုံးက အရိပ်လေးကို အလွန်စိတ်လှုပ်ရှားစေသည်။ အရိပ်လေး၏ မျက်လုံးထဲမှာ စိတ်လှုပ်ရှားသော အရိပ်အယောင် ထွက်ပေါ်လာသည်နှင့်ချက်ချင်း ဆူးချွန်များသည် ၎င်း၏ ကိုယ်ထည်ပေါ်မှာ ဖွဲ့စည်းလာကြပြီး မြှောက်တတ်လာကြသည်။ ၎င်းက ပါးစပ်ပေါက်အများအပြားကို တစ်ပြိုင်နက် ဖွင့်ဟလိုက်ပြီး တံတွေးမျိုချလိုက်သည်။

အမှန်မှာ ၎င်းက ထိုအသွေးအသားတုံးကို စားနိုင်ရေးအတွက် အရိပ်အမြှီးတစ်ချောင်းကို ဖွဲ့စည်းလိုက်ပြီး ခွေးပေါက်လေးသဖွယ် အမြှီးနှံ့လိုက်သည်။

၎င်းသည် ယခင်က မည်သည့်လူသားအသိစိတ်ကို သိမ်းပိုက်ခဲ့မှန်း မသိရပေ။

ယင်းက ယခုအချိန်အထိ သက်ရောက်မှုတချို့ ရှိနေဆဲပင်။

ရွှီချင်းသည် မြေပြင်ပေါ်တွင် အမြှီးနှံ့နေသော အရိပ်လေးကို ကြည့်လိုက်သည်။ ထို့နောက် သူက အသွေးအသားတုံးကို အရိပ်လေးဆီသို့ ပစ်ချပေးလိုက်သည်။

လျှပ်တစ်ပြက်အတွင်းမှာ အရိပ်ဆူးချွန်အားလုံးသည် အသွေးအသားတုံးဆီသို့ တန်းမတ်စွာ ပျံသန်းသွားကြပြီး ယင်းကို ချက်ချင်း ဝါးမျိုလိုက်ကြသည်။ တဂျွတ်ဂျွတ် ဝါးစားသံများသည် ပဲ့တင်ထွက်လာသည်။ အရိပ်လေးထံမှ ထုတ်လွှတ်လိုက်သော စွမ်းအင်လှိုင်းများသည် အစောနကထက် အများကြီး ပိုအားကောင်းသည်။ ဤသည်မှာ ယင်းတို့က ပွက်ပွက်ဆူနေသော ရေနွေးနှင့် ဆင်တူသည်။

သို့သော်လည်း ကြီးမားသော အသွေးအသားတုံးထံမှ စွမ်းအားသည် အရိပ်လေးအတွက် တောင့်ခံရန် အနည်းငယ် ခက်ခဲကြောင်း ထင်ရှားသည်။ သို့ဖြစ်၍ သိပ်မကြာမီ ၎င်း၏ ခန္ဓာကိုယ်သည် မတည်မငြိမ်ဖြစ်လာသည်။ ဗုန်းဟူသော ပေါက်ကွဲသံနှင့်အတူ အရိပ်လေး၏ ခန္ဓာကိုယ်သည် တိုက်ရိုက် ပြိုကွဲထွက်သွားသည်။ ဤသည်မှာ မှင်အိုးက မြေပြင်ပေါ်သို့ မှောက်ကျသွားသည့်အလား အောက်မေ့ရသည်။ အရိပ်လေးသည် ရာထောင်ချီသော အပိုင်းအစများအဖြစ် ပြိုကွဲထွက်သွားသည်။

၎င်းဝါးမျိုထားသော နီလာနတ်သမီး၏ အသွေးအသားတုံးသည်လည်း ၎င်း၏ ခန္ဓာကိုယ်အပြင်ဘက်သို့ ပြုတ်ကျသွားသည်။

သို့သော်လည်း စက္ကန့်ပိုင်းအတွင်းမှာ အရိပ်လေးသည် ရာထောင်ချီသော အရိပ်ငယ်များသို့ အသွင်ပြောင်းလဲသွားသည်။ ထို့နောက် ၎င်းတို့က ဆာလောင်မွတ်သိပ်နေသော ခွေးရူးများနှယ် နီလာနတ်သမီး၏ အသွေးအသားတုံးကို အရူးအမူး ထပ်မံ လွှမ်းခြုံသွားကြသည်။ ၎င်းတို့က ဆက်လက် ဝါးမျိုနေရင်း ဆက်လက် ပြိုကွဲသွားကြသည်။

အရိပ်လေး၏ ဇွဲကောင်းမှုသည် ဤအခိုက်အတန့်မှာ အထင်အရှား ထွက်ပေါ်လာသည်။

ယင်းက ကောင်းကင်ယံမှ နေအလင်းရောင် မထွက်ပေါ်လာခင်အထိ ကြာမြင့်ခဲ့သည်။ တစ်ညတာ ကုန်ဆုံးသွားပြီး အကြိမ်ပေါင်းမရေမတွက်နိုင်အောင် ပြိုကွဲသွားပြီးနောက် အရိပ်လေးသည် အသွေးအသားတုံးကို နောက်ဆုံးမှာတော့ အပြည့်အဝ ဝါးမျိုနိုင်သွားသည်။ ယခု အရိပ်လေးသည် ၎င်း၏ ခန္ဓာကိုယ်ကို နောက်ထပ် မပြိုကွဲသွားအောင် ထိန်းထားနိုင်သွားသည်။

၎င်း၏ နှလုံးသားထဲမှာတော့ အရိပ်လေးသည် စိတ်မကျေနပ်နိုင်သေးပေ။ ဤအခိုက်အတန့်မှာ ၎င်းက အက်ကွဲနေသော ခန္ဓာကိုယ်ကို ထိန်းထားရင်း ရွှီချင်းဆီသို့ ဖော်လံဖားသော စိတ်ခံစားချက်များကို ပို့လွှတ်လိုက်သည်။

“ သခင်… သဘောကောင်းတယ်… ငါ… လိုချင်တယ်… ”

“ အသွေးအသားတစ်တုံးလုံးကို ဝါးမျိုပြီးတာတောင် ဘာမှမထူးခြားလာဘူး… မင်းက ဘာအသုံးကျလို့လဲ ”

ရွှီချင်းက အေးစက်စွာ ပြောသည်။

အသွေးအသားတုံးကို ဝါးမျိုပြီးနောက် အရိပ်လေးက အသွင်ပြောင်းလဲနိုင်လောက်သည်ဟု သူခံစားမိသည်။ ၎င်းက အသွင်မပြောင်းလဲဘဲ တမင်ဖိနှိပ်ထားခြင်း ဖြစ်နိုင်ရန် ရာခိုင်နှုန်းအလွန်များသည်။ ထိုခန့်မှန်းမှုက သူ့ကို မပျော်မရွှင်ဖြစ်စေသည်။

ထို့ကြောင့် ရွှီချင်းသည် ခရမ်းသလင်းကျောက်ကို လှုံ့ဆော်လိုက်သည်။

သူက ခရမ်းသလင်းကျောက်ဖြင့် အရိပ်လေးဝါးမျိုလိုက်သော အသွေးအသားတုံးကို ပြန်လည်ထုတ်ယူနိုင်မည်လော စမ်းသပ်ကြည့်ချင်သည်။ တစ်ချိန်တည်းမှာ သူက အရိပ်လေးကို ခြိမ်းခြောက်ချင်သည်။

ရွှီချင်း၏ ခန္ဓာကိုယ်ထဲမှ ထွက်ပေါ်လာသော ခရမ်းရောင်အလင်းကို မြင်လိုက်ရသောအခါ အရိပ်လေးသည် ခန္ဓာကိုယ်တုန်ယင်သွားသည်။ ၎င်းက အသနားခံသော စိတ်ခံစားချက်ကို အမြန်ထုတ်လွှတ်လိုက်သည်။

“ မလိုဘူး… မစားဘူး… တားမြစ်ဇုန်… အဆင်ပြေတယ် ”

ရွှီချင်းသည် အရိပ်လေးကို လျစ်လျုရှုထားပြီး ၎င်းကို တိုက်ရိုက် ဖိနှိပ်လိုက်သည်။ ချက်ချင်းဆိုသလို ခရမ်းရောင်အလင်းသည် ရွှီချင်း၏ ခန္ဓာကိုယ်ထဲမှ ပျံ့နှံ့ထွက်လာပြီး အရိပ်လေးပေါ်သို့ ကျရောက်သွားသည်။ အရိပ်လေး၏ ခန္ဓာကိုယ်က ပြိုကွဲထွက်သွားသည့်အခါ အော်ဟစ်ညည်းညူသံများ ပျံ့လွင့်လာသည်။ အစောနက ၎င်းဝါးမျိုထားသော အသွေးအသားတုံး၏ တစ်ဝက်နီးပါးသည် ပြိုကွဲသွားသော ခန္ဓာကိုယ်ထဲမှ အပြင်သို့ ပြုတ်ကျသွားသည်။

ရွှီချင်းသည် လက်မြှောက်လိုက်ပြီး အသွေးအသားတုံးကို အဝေးမှ ဖမ်းဆုပ်လိုက်သည်။

၎င်း၏ အစာက ရွှီချင်း၏ သိမ်းဆည်းခံလိုက်ရကြောင်း မြင်သွားသောအခါ အရိပ်လေးသည် တုန်ယင်သွားသည်။ ၎င်းက စိုးရိမ်ကြောင့်ကြလာပြီး ရွှီချင်း၏ ဘေးမှာ အမြန်လှည့်ပတ်လိုက်သည်။ ထိုအခါ အနက်ရောင်ဝဲကတော့တစ်ခု ဖြစ်ပေါ်လာသည်။

“ စားတယ်… စားတယ်… ”

“ ဗုန်း… ဗုန်း… ဗုန်း ”

“ ငါ… သန်မာတယ်… အသုံးဝင်တယ် ”

အရိပ်လေးသည် ၎င်း၏ စိတ်ခံစားချက်များကို အမြန်ဖော်ပြလိုက်သည်။ ရွှီချင်းသည် အရိပ်လေးကို အေးစက်စွာ စိုက်ကြည့်လိုက်သည်။

“ နောက်ထပ် အသားလိုဦးမှာလား ”

“ မလိုဘူး… တားမြစ်ဇုန်… စားတယ်… ”

အရိပ်လေးသည် ၎င်း၏ စိတ်ခံစားချက်များကို ဂရုတစိုက် ပို့လွှတ်လိုက်သည်။

ရွှီချင်းသည် ဆက်ပြီး မပြောတော့ပေ။ ယခင်က အရိပ်လေး၏ အဆင့်တတ်မှုတိုင်းသည် ဒြပ်နှောများပေါ်မှာ မှီခိုအားထားရသည်။

ဒြပ်နှောများသည်တော့ နတ်ဘုရားအသွေးအသားထဲမှာအပြင် မည်သည့်တားမြစ်ဇုန်မှာမဆို အလွန်အမင်း သိပ်သည်းသည်။

ထို့ကြောင့် အရိပ်လေး အဆင့်တတ်ရန်အတွက် အထူးသဖြင့် ‘ နတ်ဘုရားမီးတောက် ’ဟူသော စကားလုံးနှင့်ပတ်သက်ပြီး သူ၏ ခန့်မှန်းမှုကို အတည်ပြုရန်အတွက် ရွှီချင်း၏ ခန္ဓာကိုယ်သည် နေအိမ်ထဲမှ ချက်ချင်း ပျောက်ကွယ်သွားသည်။ သူက ပြန်ပေါ်လာသည့်အခါ ဒေသငယ်မြို့တော်၏ အပြင်ဘက်သို့ ရောက်ရှိသွားသည်။

သူက ထိုနေရာမှာ မရပ်တန့်ခဲ့ပေ။ သူက ထွက်ပေါ်လာသည်နှင့်ချက်ချင်း အရှေ့သို့ ခြေတစ်လှမ်း လှမ်းလိုက်သည်။ မြေပြင်သည် သူ၏ ခြေဖဝါးအောက်မှာ ကျုံ့သွားဟန် ရသည်။ သူက ခြေတစ်လှမ်း လှမ်းလိုက်သည့်အခါတိုင်း ကျယ်ပြောသော ဧရိယာတစ်ခုကို ကျော်ဖြတ်သွားသည်။

လောက၏ နိယာမများနှင့် အသေးစားဥပဒေသများသည် ဝိညာဉ်သိုက်အဆင့်ကျင့်ကြံသူများပေါ်မှာ ဒြပ်ထည်ဖြစ်ပေါ်နိုင်သည်။

ထိုသို့ဖြင့် နှစ်နာရီကြာမြင့်ပြီးနောက် ရွှီချင်းသည် ဒေသငယ်မြို့တော်ထဲမှ ထွက်ခွာသွားပြီး အနီးနားမှ ပြည်နယ်တစ်ခုထဲမှာ ထွက်ပေါ်လာသည်။

ထိုပြည်နယ်ကို ဝိညာဉ်ကုန်းမြေဟုခေါ်သည်။ ယင်းက ဖုန်းဟိုင်ဒေသငယ်ထဲမှာ အသေးဆုံးပြည်နယ်လည်း ဖြစ်သည်။ ဝိညာဉ်ကုန်းမြေဟု ယင်းကို ခေါ်ဆိုရခြင်းမှာ ထိုပြည်နယ်ထဲတွင် တားမြစ်ဇုန်အများအပြားရှိသောကြောင့် ဖြစ်သည်။

ဝိညာဉ်ဟူသော စကားလုံးသည် ဝိညာဉ်စွမ်းအင်ကို ဆိုလိုခြင်းမဟုတ်ပေ။ ယင်းက သေဆုံးပြီးသော လေလွင့်ဝိညာဉ်များကို ဆိုလိုသည်။

တားမြစ်ဇုန်များသည် ဖုတ်ကောင်များနှင့် ထူးဆန်းသတ္တဝါများအတွက်တော့ နိဗ္ဗာန်ဖြစ်သည်။ သာမန်ကျင့်ကြံသူများအနေဖြင့် အစွန်အဖျားနားကိုသာ သွားလာနိုင်ပေသည်။ အကယ်၍ သူတို့က အနက်ပိုင်းထဲသို့ ဝင်ရောက်သွားမည်ဆိုလျှင် အသက်ရှင်ရန် အခွင့်အရေး အလွန်နည်းပါးလိမ့်မည်။ သူတို့၏ ကျင့်ကြံခြင်းအဆင့်က ဝိညာဉ်နတ်သူငယ်အဆင့်သို့ ရောက်ရှိနေပြီး အလုံအလောက် ကံကောင်းမှသာလျှင် အသက်ရှင်ရန် အခွင့်အရေးရရှိလိမ့်မည်။

ထိုပြည်နယ်သည် တစ္ဆေသင်္ဘောဖြတ်သန်းသွားရမည့် လမ်းကြောင်းလည်း ဖြစ်သည်။

ထိုနေရာသို့ ရွှီချင်းရောက်ရှိသွားသည့်အခါ တစ္ဆေသင်္ဘောကို သူမြင်သွားသည်။

နေ့ခင်းအချိန်သာရှိသေးသော်လည်း အနက်ရောင်တိမ်တိုက်များသည် အဝေးတွင် ပြည့်နှက်နေပြီး ကောင်းကင်ကို အမှောင်ထုအဖြစ် တဖြည်းဖြည်း ပြောင်းလဲပစ်နေသည်။ မြူခိုးသည် တအိအိလှုပ်ရှားထကြွလာပြီး ကောင်းကင်ကို လွှမ်းခြုံသွားသည်။ ယင်းက နေရောင်ခြည်ကို မှေးမှိန်သွားစေပြီး အရိုးခိုက်ခိုက်တုန်စေမည့် အအေးဓာတ်ကို အရပ်မျက်နှာအဘက်ဘက်ဆီသို့ ပျံ့လွင့်သွားစေသည်။

ယိုယွင်းပျက်စီးနေသော ဧရာမတစ္ဆေသင်္ဘောသည် မြူခိုးထဲမှာ ဝေဝေဝါးဝါး ထွက်ပေါ်နေပြီး ကောင်းကင်ယံမှာ အရှေ့သို့ ရွေ့လျားသွားနေသည်။

တစ္ဆေသင်္ဘောကို စိုက်ကြည့်လိုက်စဉ် ရွှီချင်း၏ အမူအရာသည် တည်ငြိမ်နေသည်။

သူသည် အတိတ်တုန်းက ကျင့်ကြံသူမဟုတ်တော့ပေ။ ထို့ပြင် သူ၏ သရုပ်အဆင့်အတန်းသည် အလွန်မြင့်မားသည်။ ဒေသအကြီးအကဲအနေဖြင့် သူသည် ဒေသငယ်၏ ကမ္မကို စုဝေးနိုင်သည်။ ယခင်က သူစီးခဲ့ဖူးသော ဤတစ္ဆေသင်္ဘောအပေါ် အများကြီး သူစိတ်မဝင်စားပေ။

တစ္ဆေသင်္ဘောသည်လည်း ရွှီချင်းထံသို့ ၎င်း၏ ရိုသေလေးစားမှုကို ဖော်ပြလိုက်သည်။ ၎င်းသည် ရွှီချင်း၏ ပုံရိပ်ကို အာရုံခံမိသွားပြီးနောက် တစ္ဆေသင်္ဘောပေါ်မှ မြူခိုးသည် ချက်ချင်း ဒြပ်ထည်ဖွဲ့စည်းသွားသည်။ အရေအတွက်များပြားသော သရဲတစ္ဆေများသည် သင်္ဘောပေါ်မှ ဆင်းသက်လာကြပြီး အပြင်ဘက်မှာ မျောလွင့်သွားကြသည်။ ထို့နောက် ၎င်းတို့က ရွှီချင်းထံသို့ ဦးညွတ်လိုက်ကြသည်။

ရွှီချင်းသည် ခေါင်းညိတ်လိုက်ပြီးနောက် တစ္ဆေသင်္ဘောကို ဖြတ်ကျော်သွားသည်။ သူက ဝိညာဉ်ကုန်းမြေတားမြစ်ဇုန်တစ်ခုဆီသို့ ဦးတည်သွားသည်။

သူထွက်သွားပြီးနောက် ကောင်းကင်ပေါ်မှ မြူခိုးသည် ထပ်မံလှုပ်ရှားထကြွသွားသည်။ တစ္ဆေသင်္ဘောသည် အရှေ့သို့ ဆက်လက် ရွေ့လျားသွားပြီး မြန်ဆန်စွာ ပျောက်ကွယ်သွားသည်။ ထို့နောက် ကောင်းကင်သည် ထပ်မံ လင်းထိန်လာသည်။

ဆယ့်ငါးမိနစ်ကြာပြီးနောက် ရွှီချင်းသည် အရှေ့သို့ ရွေ့လျားသွားနေရင်း အဝေးမှ ဝိညာဉ်ကုန်းမြေတားမြစ်ဇုန်တစ်ခုကို မြင်သွားသည်။

ဝိညာဉ်ကုန်းမြေပြည်နယ်ထဲတွင် စုစုပေါင်း တားမြစ်ဇုန်(၁၃)ခုရှိသည်။

တားမြစ်ဇုန်တစ်ခုစီသည် ရှေးကျပြီး နှစ်ပေါင်းမရေမတွက်နိုင်အောင် တည်ရှိနေခဲ့ကြသည်။ သမိုင်းမှတ်တမ်းများအရ ယင်းတို့သည် လူသားဧကရာဇ်ဒုန်းရှန့်ခေတ်မှာ ဖြစ်ပေါ်လာကြခြင်း ဖြစ်သည်။

အစက ၎င်းသည် တားမြစ်ဒေသကြီးတစ်ခု ဖြစ်သည်။ သို့သော်လည်း နောက်ပိုင်းမျိုးဆက်များတွင် အပြောင်းအလဲများစွာ ဖြစ်ပေါ်လာခဲ့သည်။ တစ်ညမှာ တားမြစ်ဒေသကြီးသည် ပြိုကွဲထွက်သွားပြီး တားမြစ်ဇုန်(၁၃)ခုအဖြစ် ပြောင်းလဲသွားခဲ့သည်။

ပြိုကွဲထွက်သွားရသည့် အကြောင်းအရင်းကိုတော့ သမိုင်းမှတ်တမ်းများထဲမှာ ဖော်ပြမထားပေ။ သို့သော်လည်း သဲလွန်စများအရ အတိတ်တုန်းက ဤနေရာမှာ နတ်ဘုရားအဆင့်တိုက်ပွဲတစ်ခု ဖြစ်ပွားခဲ့သည်ဟု တစ်စုံတစ်ယောက်က သုံးသပ်ခဲ့သည်။

သို့သော်လည်း အမှန်တရားသည် သမိုင်းထဲမှာ မြှုပ်နှံခံလိုက်ရသည်။

ဤအခိုက်အတန့်မှာ တားမြစ်ဇုန်က ရွှီချင်း၏ အရှေ့မှာ ထွက်ပေါ်လာသည်။ ယင်းက အမှောင်တောအုပ်တစ်ခုဖြစ်ပြီး နန်းဟွမ်ကုန်းမြေ၏ ရတနာအမဲလိုက်စခန်းမှ တားမြစ်ဇုန်နှင့် အတော်လေး ဆင်တူသည်။

တောအုပ်ထဲမှ အပင်အားလုံးသည် အနက်ရောင်ဖြစ်ပြီး ညှိုးခြောက်သော ခံစားမှုကို ထုတ်လွှတ်နေသည်။ အလွန်သိပ်သည်းသော ဒြပ်နှောများသည် ထိုတောအုပ်ထဲမှာ ပျံ့နှံ့နေပြီး အနက်ရောင်မြူခိုးထုကို ဖြစ်ပေါ်စေကာ တားမြစ်ဇုန်တစ်ခုလုံးကို လွှမ်းခြုံထားသည်။ တစ်ချိန်တည်းမှာ စိတ်ဝိညာဉ်ဖြင့် အာရုံခံနိုင်သော ဟိန်းသံလှိုင်းများသည် တားမြစ်ဇုန်၏ အနက်ပိုင်းထဲမှ တစ်ချိန်လုံး ပဲ့တင်ထပ်နေသည်။

အမှန်မှာ တစ်စုံတစ်ယောက်က အနားကပ်သွားသည့်အခါ တောအုပ်ထဲတွင် ရွေ့လျားနေကြသော အရိုးခြောက်များကို မြင်နိုင်လိမ့်မည်။ ထို့ပြင် ထူးဆန်းသတ္တဝါများလည်း ရှိသေးသည်။

ဥပမာ ရွှီချင်းက တားမြစ်ဇုန်၏ အပြင်ဘက်မှာ မတ်တတ်ရပ်နေစဉ် တားမြစ်ဇုန်ထဲမှာ ရပ်နေသော အဖွားအိုတစ်ယောက်ကို မြင်သွားသည်။

ထိုအဖွားအိုသည် ဈာပနအဝတ်အစားများကို ဝတ်ဆင်ထားသည်။ သူက မျက်နှာဖြူဖျော့နေပြီး ရွှီချင်းထံသို့ ပြုံးပြနေသည်။

ထိုအပြုံးသည် ကျယ်ပြောလေရာ သူ၏ အနက်ရောင်သွားများပင် ထွက်ပေါ်နေသည်။ အလွန်ပြင်းထန်သော အပုပ်နံ့သည် သူ၏ ခန္ဓာကိုယ်ထဲမှ ထွက်ပေါ်နေပြီး ဘေးပတ်ဝန်းကျင်တစ်လျှောက် ပျံ့နှံ့နေသည်။

ရွှီချင်းသည် တည်ငြိမ်သည်။ သူ့ဘဝတစ်လျှောက်တွင် ထူးဆန်းသတ္တဝါများစွာကို မြင်တွေ့ဖူးသည်။ ၎င်းတို့သည် ထူးဆန်းရုံမှလွဲ၍ ဘာမှမဟုတ်ကြပေ။ ၎င်းတို့အားလုံးသည် အရိပ်လေးအတွက် အစားအစာမျှသာ ဖြစ်ကြသည်။

“ ငါမင်းကို အခွင့်အရေးတစ်ခု ပေးမယ်… တကယ်လို့ မင်းက အဆင့်မတတ်နိုင်သေးဘူးဆိုရင် မင်းကို ငါ့နားမှာ ဆက်ထားဖို့ မလိုတော့ဘူး ”

ရွှီချင်းက တည်ငြိမ်စွာ ပြောသည်။ သူ၏ ခြေဖဝါးအောက်မှ အရိပ်‌လေးသည် တုန်ယင်သွားသည်။ ၎င်းသည် စိတ်ဆုံးဖြတ်ပြီးသော စိတ်ခံစားချက်ကို ထုတ်လွှတ်ပြီးနောက် တားမြစ်ဇုန်ဆီသို့ ချက်ချင်း ဖြန့်ကြက်သွားသည်။

အရိပ်လေးထွက်ပေါ်လာသည်နှင့်ချက်ချင်း ရွှီချင်းကို စိုက်ကြည့်နေပြီး ပြုံးပြနေသော အဖွားအို၏ အမူအရာသည် ချက်ချင်း ပျက်ယွင်းသွားသည်။ ဤသည်မှာ သူက သဘာဝရန်သူကို မြင်လိုက်ရသည့်အလား အမြန်အနောက်လှည့်လိုက်ပြီး ထွက်ပြေးရန် ကြိုးစားလိုက်သည်။

သို့သော်လည်း သူက နောက်ကျသွားနေဆဲပင်။ အရိပ်လေးသည် ပိုပြီးမြန်ဆန်စွာ ပျံ့ပွားထွက်လာပြီး တားမြစ်ဇုန်ဆီသို့ တစ်ဟုန်ထိုး ပြေးသွားသည်။ မျက်စိတစ်မှိတ်အတွင်းမှာ ၎င်းက အဖွားအိုနောက်သို့ လိုက်မီသွားသည်။ အဖွားအိုသည် အရိပ်လေးနှင့် ထိတွေ့သွားသည်နှင့်ချက်ချင်း အရည်ပျော်သွားပြီး အရိပ်ထဲမှာ ပျောက်ကွယ်သွားသည်။

အရိပ်လေးသည် မရပ်တန့်ခဲ့ပေ။ ၎င်းက အဖွားအိုကို ဝါးမျိုပြီးသည်နှင့် အရပ်မျက်နှာအသီးသီးသို့ အစွမ်းကုန်သုံး၍ ဆက်လက် ပျံ့ပွားသွားသည်။

ရွှီချင်းသည် မလိုက်သွားခဲ့ပေ။ သူက တားမြစ်ဇုန်၏ အပြင်ဘက်မှာ မတ်တတ်ရပ်နေသည်။ အရိပ်လေးနှင့် သူ့ကြားမှ ဆက်သွယ်မှုကို အမှီပြု၍ သူက အရိပ်လေး၏ လှုပ်ရှားမှုတိုင်းကို အာရုံခံနိုင်ပေသည်။ တဖြည်းဖြည်း ထူးဆန်းသော အမူအရာက သူ၏ မျက်နှာပေါ်မှာ ထွက်ပေါ်လာသည်။ ထို့နောက် ယင်းက အံ့ဩမှုသို့ ပြောင်းလဲသွားသည်။ နောက်ဆုံးမှာ သူ၏ နှလုံးက အနည်းငယ် လှုပ်ခါသွားသည်။

“ သူက ဘာလုပ်နေတာလဲ ”

ရွှီချင်း၏ စိတ်အာရုံထဲတွင် ဤတစ်ကြိမ် အရိပ်လေး၏ ဝါးမျိုနိုင်သော ဧရိယာအတိုင်းအတာသည် ယခင်အခေါက်များထက် လုံးဝကျော်လွန်သွားပြီး မယုံကြည်နိုင်စရာကောင်းသော အဆင့်အထိ ရောက်ရှိသွားသည်။

၎င်းက တားမြစ်ဇုန်တစ်ခုလုံးကို အမှန်တကယ် ဖြန့်ကြက်နိုင်သွားသည်။

တားမြစ်ဇုန်တစ်ခုလုံးကို အရိပ်လေးက ဖုံးလွှမ်းသွားသည်နှင့်ချက်ချင်း ယင်းက ရွှီချင်း၏ အရှေ့မှာ တဖြည်းဖြည်း ဝေဝါးလာနေသည်။ ဤသည်မှာ တားမြစ်ဇုန်က အရိပ်လေး၏ ဝါးမျိုခံနေရသည့်အလားပင်။

မကြာမီ ထိုတားမြစ်ဇုန်က အမှန်တကယ် ဝါးမျိုခံနေရခြင်းဖြစ်ကြောင်း ရွှီချင်း အတည်ပြုနိုင်သွားသည်။

တားမြစ်ဇုန်သည် ပိုပြီးမှေးမှိန်လာပြီး ဝေဝါးလာသည်။ တားမြစ်ဇုန်၏ အစွန်အဖျားသည် လုံးဝပျောက်ကွယ်သွားသည်။ တစ်ရက်ကြာပြီးနောက် ရွှီချင်းသည် သူ၏ အရှေ့ကို အံ့ဩထိတ်လန့်စွာ ကြည့်လိုက်သည်။

ထိုနေရာသည် ဟာလာဟင်းလင်းဖြစ်သွားသည်။

တားမြစ်ဇုန်သည် ပျောက်ကွယ်သွားသည်။

ယခုအချိန်မှစ၍ ဝိညာဉ်ကုန်းမြေပြည်နယ်ထဲတွင် တားမြစ်ဇုန်တစ်ခု လျော့နည်းသွားပြီ ဖြစ်သည်။

ယင်းက အရိပ်လေး၏ ဝါးမျိုခံလိုက်ရသည်။

ထိုဗလာကုန်းမြေပေါ်တွင် မြေကြီးသည် မီးခိုးရောင်ဖြစ်သည်။ ထိုနေရာတွင် အသက်ဓာတ်သော်လည်းကောင်း သို့မဟုတ် သေခြင်းအရှိန်အဝါသော်လည်း ဘာမှမရှိပေ။ ထိုမီးခိုးရောင်သည် လောက၏ နောက်ခံအရောင်နှင့် ဆင်တူသည်။

ထိုနောက်ခံအရောင်၏ အပေါ်တွင် လူးလွန့်လှုပ်ရှားနေသော အနက်ရောင်အရိပ်တစ်ခု ရှိသည်။

နတ်ဘုရားရေရွတ်သံများသည် အနက်ရောင်အရိပ်ထံမှ မြည်ဟန်းထွက်လာပြီး လောကတစ်ခွင် ပဲ့တင်ထပ်သွားသည်။

“ ဒြပ်စင်သုံးခု ပျိုးထောင်တယ်… ချီစက်ဝန်းကိုးကြိမ် လှည့်ပတ်တယ်… ဒြပ်စင်ငါးမျိုးက အသွင်ပြောင်းလဲတယ်… ကိုယ်အင်္ဂါတွေ ဖြစ်ပေါ်လာပြီး ကြယ်ခုနစ်လုံးက ဝင်ထွက်ပေါက်တွေကို ဖန်တီးတယ်… သက်ရှိအားလုံးရဲ့ ဝိညာဉ်တွေက ထိပ်ဆုံးကို မြှောက်တတ်တယ်… ငါ့ဦးခေါင်းထက်ရဲ့ သုံးပေအကွာမှာ ရှိတယ်… အမှောင်ချောက်နက်… ကြယ်အလင်းသုံးပေရဲ့ တောက်ပမှုအောက်မှာ လင်းထိန်နေတယ် ”