ရွှီချင်း… မင်း ရက်စက်တယ်

စက်လုံးအလတ်၏ ပေါက်ကွဲမှုစွမ်းအားသည် အစကတည်းက အားမနည်းသော်လည်း ၎င်း၏ စွမ်းအားမှာ အကန့်အသတ်ရှိသည်။ သို့သော်လည်း ၎င်းက လပူဇော်ဒေသကြီးထဲတွင် နတ်ဘုရားသားတော်ကို လောင်ကျွမ်းခဲ့သော နတ်ဘုရားမီးတောက်၏ တစ်စိတ်တစ်ပိုင်းကို စုပ်ယူပြီးနောက် သိသိသာသာ ပြောင်းလဲသွားခဲ့သည်။

ထိုပြောင်းလဲမှုက ၎င်း၏ အနှစ်သာရမှ ပြောင်းလဲသွားခြင်းဖြစ်ပြီး အဆင့်မြှင့်တင်လိုက်ခြင်း ဖြစ်သည်။ ၎င်းက အတိုင်းအတာတစ်ခုထိ အာရုဏ်ဦးနေမင်း၏ ဝိသေသလက္ခဏာများကို ပိုင်ဆိုင်ထားသည်။

ထို့ကြောင့် ၎င်း၏ စွမ်းအားသည် အလွန်ကြောက်စရာကောင်းသည်။ ရွှီချင်းက စက်လုံးအလတ်ကို ပစ်လွှတ်လိုက်သည့်အခိုက် ၎င်းသည် အသွေးအသားဝဲကတော့ထဲမှ အတားအဆီးအားလုံးနှင့် ရွှေကျီးကန်းလက်သည်းထံမှ ဖိအားကို လျစ်လျူရှုလျက် ဝဲကတော့ထဲသို့ တန်းမတ်စွာ ဝင်ရောက်သွားသည်။

၎င်းက ယခင် ကောင်းကင်လေပြည်ထောင်၏ နန်းမြို့တော်ထဲမှာ ပြန်ပေါ်လာသည်။ ချန်းယန်းဇီ၏ စစ်တုရင်ခုံသည် အကြိမ်ရေအနည်းငယ် လှုပ်ခါသွားပြီး အဖြူရောင်အလင်းကို ထုတ်လွှတ်လာသည်။ ကြောက်မက်ဖွယ်ကောင်းသော အရှိန်အဝါသည် ထိုထဲမှ ပေါ်လျှိုးထွက်လာသည်။

အစက ချန်းယန်းဇီသည် ကစားပွဲတွင် အသာစီးရရှိထားသည်ဟု ခံစားမိသောကြောင့် သူ၏ အမူအရာက စိတ်အေးလက်အေး ရှိနေသည်။ သူ၏ အစီအစဉ်အားလုံးသည် အောင်မြင်စွာ ဆက်လက်သွားနေသည်။ ထို့ကြောင့် သူက နတ်မိမယ်ကျစ်ရွှမ်းကို ဖမ်းမိရန် ယုံကြည်မှုရှိသည်။

သို့သော်လည်း စက်လုံးအလတ်ကို မြင်သွားပြီး ၎င်း၏ အရှိန်အဝါကို အာရုံခံမိသွားသည့်အခိုက် သူ၏ သူငယ်အိမ်က ရုတ်တရက် ကျုံ့သွားသည်။ မိုးခြိမ်းသံသဖွယ် ကျယ်လောင်သော သတိပေးသံသည် သူ၏ အသိစိတ်ထဲမှာ ထွက်ပေါ်လာသည်။ ထိုအရာက မည်သည့်အရာမှန်း သူမသိသော်လည်း သေခြင်းရှင်ခြင်းကပ်ဘေးသည် အထွတ်အထိပ်အခြေအနေသို့ ချက်ချင်း ရောက်ရှိသွားသည်။ ယင်းက သူ၏ ခန္ဓာကိုယ်ပေါ်မှ အမွှေးအမျှင်အားလုံးကို ထောင်မတ်သွားစေသည်။

အန္တရာယ်… အလွန်ပြင်းထန်သော အန္တရာယ်…

သူ၏ အသွေးအသားတစ်လက်မစီတိုင်းနှင့် သူ၏ ခန္ဓာကိုယ်ထဲမှ အရိုးအားလုံးသည် တုန်ယင်သွားပြီး အလွန်ပြင်းထန်သော အန္တရာယ်သတိပေးမှုကို ထုတ်လွှတ်လာသည်။ ယင်းက ချန်းယန်းဇီကို ကျောရိုးတစ်လျှောက် ခိုက်ခိုက်တုန်သွားစေပြီး သူ၏ အသိစိတ်ကို ပရမ်းပတာ လှုပ်ခတ်သွားစေသည်။

သေခြင်းအငွေ့အသက်ကို သူခံစားမိသွားသည်။

သူ့မှာ တုံ့ပြန်ရန်နှင့် ခုခံကာကွယ်ရန် အချိန်မရှိကြောင်း သူသိသည်။ ဤအခိုက်အတန့်မှာ သူ့အတွက် လွတ်မြောက်နိုင်မည့် တစ်ခုတည်းသော အခွင့်အလမ်းသည် စစ်တုရင်ခုံဖြစ်သည်။

ထို့ကြောင့် သူက အဖြူရောင်အလင်း ထွက်ပေါ်လာသည်နှင့်ချက်ချင်း ဝဲကတော့ထဲသို့ ဆန့်ထုတ်ထားသော သူ၏ လက်ကို တိုက်ရိုက် ဖြတ်တောက်လိုက်သည်။ နောက်အခိုက်အတန့်မှာ အဖြူရောင်အလင်းပင်လယ်သည် ကမ္ဘာဖျက်ဆီးမည့် အင်အားနှင့်အတူ စက်လုံးအလတ်ထံမှ ရက်စက်ကြမ်းကြုတ်စွာ ထွက်ပေါ်လာသည်။

မျက်စိတစ်မှိတ်အတွင်းမှာ ယင်းက ချန်းယန်းဇီ၏ အခန်းကို ဖုံးလွှမ်းသွားသည်။

အခန်းထဲမှာရှိသော ပစ္စည်းအားလုံး၊ အဆောက်အဦးနှင့် ပရိဘောဂပစ္စည်းများ၊ စစ်တုရင်ခုံနှင့် ချန်းယန်းဇီ၏ ခန္ဓာကိုယ် အစရှိသော အရာအားလုံးသည် ဤအခိုက်အတန့်မှာ ပြာအဖြစ်သို့ ပြောင်းလဲသွားကြသည်။ ယင်းတို့အားလုံးက ပြင်းထန်သော အပူလှိုင်းအောက်မှာ အငွေ့ပျံသွားကြပြီး ဗလာနတ္ထိသို့ ပြောင်းလဲသွားကြသည်။

အဖြူရောင်အလင်း၏ ထွက်ပေါ်လာမှုသည်တော့ ယင်းက အစမျှသာ ရှိသေးသည်။ အလင်းပင်လယ်သည် ချန်းယန်းဇီ၏ ခြံဝန်းကို ဝါးမျိုသွားပြီးနောက် အရပ်မျက်နှာအဘက်ဘက်သို့ ဆက်လက် ပျံ့နှံ့သွားသည်။ စက္ကန့်ပိုင်းအတွင်းမှာ ယင်းက ဘေးပတ်ဝန်းကျင်မှ အဆောက်အဦးများကိုလည်း လွှမ်းခြုံသွားသည်။

အဆောက်အဦးများသည် ယိုယွင်းပျက်စီးသွားပြီး ပြာအဖြစ်သို့ ပြောင်းလဲသွားကြသည်။ အပူလှိုင်းများသည် ၎င်း၏ လမ်းကြောင်းတစ်လျှောက်မှာရှိသော အရာအားလုံးကို ဖျက်ဆီးပစ်လိုက်ကြသည်။

အဝေးမှကြည့်လျှင် ထိုဧရိယာအတွင်းမှာရှိသော အလင်းပင်လယ်သည် ကြီးမားသော စက်ဝိုင်းအကာအကွယ်အလွှာတစ်ခုပမာ ထင်မှတ်ရသည်။ ထိုစက်ဝိုင်းထဲမှာရှိသော အရာအားလုံးသည် ပြာအဖြစ်သို့ ပြောင်းလဲသွားသည်။

စက်ဝိုင်းအကာအကွယ်အလွှာသည် မြန်ဆန်စွာ ပျံ့ပွားသွားသည်။

မြို့တော်ထဲမှာ သေမျိုးများမရှိပေ။ သေမျိုးများသည် ကောင်းကင်လေပြည်ထောင်နှင့်အတူ နေရာရွှေ့ပြောင်းသွားကြသည်။

ယခု နန်းမြို့တော်ထဲမှာ နေထိုင်ကြသော လူတိုင်းသည် သတ္တမမင်းသား၏ လက်အောက်ငယ်သားများဖြစ်ပြီး သူ့လက်အောက်ဆီသို့ ခိုလှုံလာကြသော အင်အားစုများ ဖြစ်ကြသည်။

ထိုထဲမှာ ပညာရှင်ကျင့်ကြံသူများ မနည်းမနောရှိသည်။ နန်းမြို့တော်ထဲတွင် ဗလာနတ္ထိအဆင့် ကျင့်ကြံသူအများအပြားရှိပြီး ဝိညာဉ်သိုက်အဆင့် ကျင့်ကြံသူများက ပိုပြီးများပြားသည်။

သူတို့သည် သတ္တမမင်းသား၏ သစ္စာတော်ခံလက်အောက်ငယ်သားများ ဖြစ်ကြသည်။ သူတို့သည် သတ္တမမင်းသား၏ စစ်တပ်ထဲမှ စစ်သည်တော်များဖြစ်ကြပြီး ဤသန့်စင်ရေလှိုင်းဒေသကြီးထဲမှာ သတ္တမမင်းသား ခြေကုပ်ယူနိုင်ရန်အတွက် ထောက်ပံ့ကူညီပေးနေသူများ ဖြစ်ကြသည်။

သူတို့တစ်ယောက်စီတိုင်းသည် သတ္တမမင်းသား၏ အားကိုးရာဖြစ်ပြီး အနာဂတ်မှာ သူ၏ ကြီးမားသော ရည်မှန်းချက်အတွက် ထောင့်တိုင်များဖြစ်ကြသည်။

ထို့ကြောင့် သူက သူတို့ကို ရှေ့တန်းစစ်မြေပြင်ဆီသို့ မစေလွှတ်ဘဲ ဘေးကင်းလုံခြုံသော ဤနန်းမြို့တော်ထဲမှာ နေခွင့်ပြုထားခြင်း ဖြစ်သည်။

သို့သော်လည်း ဤအခိုက်အတန့်မှာ အလင်းပင်လယ်၏ ပေါ်ထွက်လာမှုနှင့် ၎င်း၏ ကြောက်မက်ဖွယ်ကောင်းသော အဖျက်စွမ်းအားက မြို့တော်ထဲမှ ကျင့်ကြံသူအားလုံးကို တုန်လှုပ်ချောက်ချားသွားစေသည်။ ကြောက်လန့်သော စိတ်ခံစားမှုနှင့် သေခြင်းအန္တရာယ်သည် လူတိုင်း၏ အမူအရာကို သိသိသာသာ ပြောင်းလဲသွားစေသည်။

ယခု နန်းဆောင်ထဲတွင် သတ္တမမင်းသားသည် အကြီးအကဲတစ်အုပ်စုနှင့် တွေ့ဆုံပြီး ရှေ့တန်းစစ်မြေပြင်အတွက် မည်သို့ထောက်ပံ့ပေးရမည်ကို တိုင်ပင်ဆွေးနွေးနေကြသည်။

သူတို့ထဲမှ တစ်ယောက်သည် ဖုန်းဟိုင်ဒေသငယ်မှ ဖြစ်သည်။ ထိုသူ၏ အသံသည် အဓိကခန်းမထဲမှာ ကျယ်လောင်စွာ ပဲ့တင်ထပ်နေဆဲပင်။

“ ရှေ့တန်းအတွက် လိုအပ်တဲ့ အထောက်အပံ့တွေကို ဖုန်းဟိုင်ဒေသငယ်က အပြည့်အဝ ထောက်ပံ့ပေးနိုင်လိမ့်မယ်လို့ ငါထင်တယ်… ဘာပဲပြောပြော… ”

သူ၏ စကားမဆုံးခင်မှာ ကြောက်စရာကောင်းသော အရှိန်အဝါသည် ချန်းယန်းဇီ၏ ခြံဝန်းတည်နေရာမှ ပေါ်လျှိုးထွက်လာသည်။ ယင်းက ကောင်းကင်ကို လင်းထိန်သွားစေပြီး လောကကို ဗလာနတ္ထိထဲသို့ ကျရောက်သွားစေသည်။

ယင်းက ကောင်းကင်ကို တုန်လှုပ်သွားစေပြီး အနီရောင်သို့ ပြောင်းလဲသွားစေသည်။

ပေါက်ကွဲမှု၏ သက်ရောက်မှုကြောင့် မြေပြင်သည် အပြင်းအထန် တုန်ခါသွားသည်။

ခန်းမထဲမှ လူတိုင်း၏ အမူအရာသည် သိသာစွာ ပြောင်းလဲသွားကြသည်။ အပူလှိုင်းများသည် သူတို့၏ မျက်နှာသို့ ရိုက်ခတ်လာပြီး သူတို့၏ အမွှေးအမျှင်များကို လောင်ကျွမ်းသွားစေသည်။

သတ္တမမင်းသားသည် ချက်ချင်း မတ်တတ်ထရပ်လိုက်ပြီး အဝေးသို့ ကြည့်လိုက်သည်။ ထိတ်လန့်မှုသည် သူ၏ မျက်နှာပေါ်မှာ ထွက်ပေါ်လာသည်။ သူ၏ မျက်လုံးထဲတွင် အဝေးမှ စက်ဝိုင်းအကာအကွယ်အလွှာက ရှင်းလင်းစွာ ပုံရိပ်ပြန်‌နေသည်။

“ အာရုဏ်ဦးနေမင်း ”

သတ္တမမင်းသားက တုန်တုန်ယင်ယင် ပြောသည်။

ထိုကပ်ဘေးသည် ဆက်လက် ပျံ့ပွားသွားသည်။

အလင်းပင်လယ်၏ ပေါ်လျှိုးလာမှုနှင့်အတူ အပူလှိုင်းများသည် ကောင်းကင်ယံထိ ပျံတတ်သွားပြီး အဆုံးမဲ့သော ရိုက်ခတ်မှုများကို ဖြစ်ပေါ်လာစေသည်။ ယင်းက မြို့တော်၏ တစ်စိတ်တစ်ဒေသကို ထင်ထင်ရှားရှား လွှမ်းခြုံသွားသည်။ ထို့နောက် မြို့တော်တစ်ဝက်ခန့်ထိ ပျံ့ပွားသွားပြီး နောက်ဆုံးမှာ နန်းမြို့တော်တစ်ခုလုံးကို လွှမ်းခြုံသွားသည်။

ကောင်းကင်လေပြည်ထောင်၏ တားမြစ်ဓမ္မရတနာသည် အသက်ဝင်လာသည်။ သို့သော်လည်း ယင်းက အချိန်ကြာကြာ မတောင့်ခံနိုင်ခဲ့ပေ။ အသက်ရှူချိန်အနည်းငယ် ကြာပြီးနောက် တားမြစ်ဓမ္မရတနာသည် အပိုင်းပိုင်းအစစ အက်ကွဲသွားသည်။

မရေမတွက်နိုင်သော ကျင့်ကြံသူများသည် ထွက်ပြေးလွတ်မြောက်ရန် ကြိုးစားကြသည်။ သို့သော်လည်း ကံမကောင်းစွာပင် သူတို့က မြေလျှိုးမိုးပျံရန် ကြိုးစားခဲ့ကြသည့်တိုင် သေခြင်းကပ်ဘေးမှ မလွတ်မြောက်နိုင်ခဲ့ကြပေ။ အလင်းပင်လယ်သည် မရေမတွက်နိုင်သော ကျင့်ကြံသူများကို လွှမ်းခြုံသွားပြီး သူတို့ကို စက္ကန့်ပိုင်းအတွင်း ပြာအဖြစ်သို့ ပြောင်းလဲသွားစေသည်။

ပျံ့လွင့်ထွက်လာသော အပူလှိုင်းများသည်လည်း အလွန်များပြားသည်။ ယင်းက ကျင့်ကြံသူများကို ပြာအဖြစ် လောင်ကျွမ်းသွားစေသည်။ အော်ဟစ်ငိုကြွေးသံများသည် အဆုံးမဲ့စွာ ပဲ့တင်ထပ်လာပြီး နန်းမြို့တော်ကို ငရဲပြည်၏ ကြေးချွတ်သန့်စင်ဘုံအဖြစ် ပြောင်းလဲသွားစေသည်။

အလင်းပင်လယ်သည် ဆယ့်ငါးမိနစ်ကြာပြီးနောက် လွင့်ပြယ်သွားသည်။ လေထဲမှ ကြွင်းကျန်ရစ်သော အပူလှိုင်းနှင့် မီးလောင်ကျွမ်းသော အနံ့အသက်သည်သာ မြို့တော်ထဲမှာ ပြည့်နှက်နေသည်။

နန်းမြို့တော်သည် ဆက်လက် မတည်ရှိတော့ပေ။

ဤနေရာမှာ ပူပြင်းသော မြေကြီးသက်သက်သာ ကျန်ရှိတော့သည်။ အဆောက်အဦးများနှင့် အရိုးများလည်း မရှိပေ။ အရာအားလုံးသည် ပြာအဖြစ်သို့ ပြောင်းလဲသွားသည်။

နှစ်ပေါင်းမရေမတွက်နိုင်သည်အထိ တည်ရှိနေခဲ့သော ကောင်းကင်လေပြည်ထောင်၏ နန်းမြို့တော်သည် ယနေ့ ဖျက်ဆီးခံလိုက်ရသည်။

လူတစ်ထောင်ကျော်သာ ဤကပ်ဘေးမှ အသက်ရှင်လွတ်မြောက်ခဲ့ကြသည်။ ထုံးစံအားဖြင့် သတ္တမမင်းသားသည် သူတို့ထဲမှာ ပါဝင်သည်။ သို့သော်လည်း သူတို့အားလုံးသည် အလွန်ဆိုးဝါးသော အခြေအနေသို့ ကျရောက်နေကြပြီး ဒဏ်ရာအပြင်းအထန် ရရှိထားကြသည်။

ဤအခိုက်အတန့်မှာ အဝတ်အစား ဖိုသီဖတ်သီဖြစ်နေသော သတ္တမမင်းသားသည် အရာအားလုံးကို အဝေးတစ်နေရာမှ ကြည့်ရှုနေသည်။ သူ့ဆီမှာ ယခင်ကဲ့သို့ အေးဆေးတည်ငြိမ်မှု မရှိတော့ပေ။ သူ၏ ခန္ဓာကိုယ်သည် တစ်ခါမှမဖြစ်စဖူး တုန်ယင်နေပြီး သူ၏ မျက်လုံးသည် နီမြန်းနေသည်။ ယခု သူ၏ စိတ်ခံစားချက်များသည် ပရမ်းပတာဖြစ်နေသည်။

ဤအခိုက်အတန့်မှာ သူ၏ အမူအကျင့်၊ ဂုဏ်သိက္ခာနှင့် မာန်မာန အစရှိသော အရာအားလုံးက ပြိုကွဲသွားသည်။

“ အား ”

“ ဘယ်သူလဲ… ဘယ်သူလုပ်တာလဲ ”

“ ဘယ်သူက အာရုဏ်ဦးနေမင်းကို ဒီကို ပစ်လိုက်တာလဲ ”

သတ္တမမင်းသားသည် နှလုံးကွဲကြေသော အသံဖြင့် အော်ပြောလိုက်သည်။ သူ၏ မျက်လုံးသည် သွေးနီရောင်သို့ ပြောင်းလဲသွားသည်။ ဤအခိုက်အတန့်မှာ သူက ဂုဏ်သိက္ခာကြီးမားသော သူ၏ ပုံရိပ်ကို မထိန်းထားနိုင်တော့ပေ။ ယခုအချိန်ထိတိုင် သူမြင်နေရသော အရာနှင့် အစောနက တွေ့ကြုံခဲ့ရသော အရာကို သူမယုံကြည်နိုင်သေးပေ။

လွန်ခဲ့သော မိနစ်အနည်းငယ်တုန်းက အကောင်းတိုင်း ရှိနေခဲ့သော နန်းမြို့တော်သည် ယခု အပျက်အစီးနယ်မြေအဖြစ်သို့ ပြောင်းလဲသွားကြောင်း သူလက်မခံနိုင်ပေ။

သူ၏ သစ္စာတော်ခံ လက်အောက်ငယ်သားတစ်သန်းကျော်သည် သေဆုံးသွားခဲ့ကြသည်။ ထိုလူများသည် သူ့အပေါ်မှာ အလွန်သစ္စာရှိကြသည်။ သူ၏ စကားတစ်ခွန်းက သူတို့ကို ငြိမ်ဝပ်ပိပြားစေနိုင်သည်။ ထို့ပြင် သူ၏ လက်အောက်ထဲသို့ ဝင်ရောက်ခိုလှုံလာကြသော ဂိုဏ်းတော်အသီးသီးနှင့် အင်အားစုအသီးသီးမှ ကျင့်ကြံသူများလည်း ရှိသေးသည်။

သူတို့တစ်ယောက်စီသည် သူ၏ အနာဂတ်ရည်မှန်းချက်အတွက် ကြိုတင်ပြင်ဆင်မှုများ ဖြစ်သည်။

သို့သော်လည်း ယခု ထိုအရာအားလုံးက ပြာဖြစ်သွားသည်။

ဤနှစ်များတွင် သူ၏ ပြင်ဆင်မှုအားလုံးက အလဟဿဖြစ်သွားသည်။

သတ္တမမင်းသားသည် နှလုံးကြေကွဲမှုကို ပြင်းထန်စွာ ခံစားမိသွားပြီး မျက်နှာဖြူဖျော့သွားသည်။ သွေးသည် သူ၏ ခန္ဓာကိုယ်ထဲမှ ဒလဟော တိုးထွက်လာပြီး သူ၏ ခန္ဓာကိုယ်သည် ဆက်လက် တုန်ယင်နေသည်။ သူက နာကျည်းစွာ အော်ဟစ်လိုက်သည့်အခါ သူ၏ နဖူးပေါ်မှ သွေးကြောများက ဖောင်းကြွလာသည်။

နာကျင်မှု…

ပြင်းထန်သော နာကျင်မှုသည် သူ၏ အရိုးများနှင့် ဝိညာဉ်အထိ ပျံ့နှံ့သွားသည်။

မည်သို့ကြောင့် ထိုသို့ဖြစ်လာရမှန်း သူစိတ်ကူးမကြည့်နိုင်သလို နားမလည်ပေ။ အဘယ့်ကြောင့် အာရုဏ်ဦးနေမင်းက ဤနေရာမှာ ပေါက်ကွဲသွားရပြီး သူ၏ ပိုင်ဆိုင်မှုအားလုံးကို ဖျက်ဆီးသွားရသနည်း။

သူ၏ နှလုံးသည် ကြောက်ရွံ့မှုကြောင့် အပြင်းအထန် တုန်လှုပ်နေသည်။ သူက သေဘေးမှ ကပ်သီးလေး လွတ်မြောက်ခဲ့ခြင်း ဖြစ်သည်။

တော်ဝင်မင်းသားတစ်ပါးအနေဖြင့် အထူးသဖြင့် ဒေသကြီးတစ်ခုကို သိမ်းပိုက်ထားပြီး တောက်ပသော အနာဂတ်ကို ပိုင်ဆိုင်ထားသည့် မင်းသားတစ်ပါးအနေဖြင့် သေခြင်းတရားဟူသော အကြောင်းကိစ္စကို တစ်ခါမှ သူမစဉ်းစားခဲ့ဖူးပေ။ သို့သော်လည်း ယနေ့မှာ သေခြင်းတရားသည် သူနှင့် အလွန်နီးကပ်ခဲ့သည်။

အကယ်၍ ဘုရင်ထျန်းလန်သာ သူ့အတွက် ပြင်ဆင်မှုတချို့ မချန်ထားခဲ့ဘူးဆိုလျှင် သူက နောက်တစ်နေ့ နေထွက်ခြင်းကိုပင် မြင်နိုင်တော့မည်မဟုတ်ချေ။

သတ္တမမင်းသားက ကြောက်ရွံ့မှုကြောင့် တုန်ယင်နေစဉ် ဤကိစ္စကို သွားရောက်စုံစမ်းသော သူ၏ လက်အောက်ငယ်သားများက အဖြေရှာတွေ့သွားကြသည်။

ဤအခိုက်အတန့်မှာ ပုံရိပ်တစ်ခုသည် မီးကျွမ်းနေသော မြေကြီးထဲမှ ပျံသန်းထွက်လာသည်။ သူက သတ္တမမင်းသား၏ အရှေ့သို့ ရောက်ရှိသွားပြီးနောက် ချက်ချင်း ဒူးထောက်လိုက်သည်။ သူ၏ ပါးစပ်ထောင့်မှာ သွေးစီးကြောင်းတစ်ခု ရှိသည်။ သို့‌သော်လည်း သူက သွေးစီးကြောင်းကိုပင် မသုတ်အားဘဲ အမြန်ပြောသည်။

“ အရှင့်သား ကျွန်တော်တို့ ရလဒ်တချို့ ရလာပါပြီ… ”

သတ္တမမင်းသားသည် ဆတ်ခနဲ ခေါင်းလှည့်လိုက်ပြီး သူ့အရှေ့မှ လူကို စူးစိုက်ကြည့်လိုက်သည်။ သူ၏ အသက်ရှူသံသည် မြန်ဆန်လာသည်။ သူက အရှေ့သို့ လျှောက်သွားပြီး ထိုလူကို ဆွဲမြှောက်လိုက်သည်။ သူက အံတင်းတင်းကြိတ်လိုက်သည်။

“ ပြောစမ်း ”

“ အာရုဏ်ဦးနေမင်း ထွက်ပေါ်လာတဲ့ ဇစ်မြစ်နေရာက… ချန်းယန်းဇီရဲ့ ခြံဝန်းကနေပါ… ”

ထိုလူက တိုးညင်းစွာ ပြောသည်။

“ ချန်းယန်းဇီက အရှင့်သားပေးတဲ့ တာဝန်ကို ထမ်းဆောင်နေပါတယ်… မဟုတ်မှ ဒီဟာက ဖုန်းဟိုင်ဒေသငယ်ရဲ့ ပြန်လက်စားချေမှု ဖြစ်နိုင်ပါတယ်… ”

ထိုလူက ဆက်မပြောဝံ့ပေ။ ချန်းယန်းဇီ၏ ကျင့်ကြံခြင်းအရ အကယ်၍ သူက သူ့ကိုယ်သူ ဖောက်ခွဲပစ်လျှင်ပင် အာရုဏ်ဦးနေမင်း၏ အစွမ်းကို ထုတ်ဖော်ရန် မည်သို့မှ မဖြစ်နိုင်ပေ။ ထို့ကြောင့် ချန်းယန်းဇီ၏ လက်ရှိထမ်းဆောင်နေသော တာဝန်ကို ထည့်သွင်းစဉ်းစားမည်ဆိုလျှင် ထိုသို့ဖြစ်ရသည့် အကြောင်းအရင်းကို ခန့်မှန်းရန် သူ့အတွက် မခက်ခဲပေ။

သို့သော်လည်း ထိုခန့်မှန်းမှုက သူ့အား ကြောက်ရွံ့သွားစေသည်။ မြို့တော်ထဲမှ လူတစ်သန်းကျော်တွင် တစ်ထောင်ခန့်သာ အသက်ရှင်ကျန်ရစ်ခဲ့သည်။

သတ္တမမင်းသား၏ လက်သည် တုန်ယင်သွားပြီး သူ၏ နှလုံးသည် ထိန်းချုပ်မရအောင် ခုန်ပေါက်လာသည်။ သူက ဖုန်းဟိုင်ဒေသငယ်၏ ဦးတည်ရာဆီသို့ ရုတ်တရက် ကြည့်လိုက်သည်။ သူ၏ မျက်လုံးထဲမှာ သတ်ဖြတ်ချင်သော စိတ်ဆန္ဒဖြင့် ပြည့်နှက်နေသည်။ အကယ်၍ သူ၏ အကြည့်သာ လူသတ်နိုင်ပြီး အာရုဏ်ဦးနေမင်းအဖြစ်သို့ ပြောင်းလဲနိုင်မည်ဆိုလျှင် ဖုန်းဟိုင်ဒေသငယ်သည် သူ၏ အကြည့်အောက်မှာ ဆက်လက် တည်ရှိတော့မည်မဟုတ်ချေ။

ကံမကောင်းစွာပင် သူက ထိုသို့မလုပ်ဆောင်နိုင်ပေ။

“ ဖုန်းဟိုင်ဒေသငယ်က အာရုဏ်ဦးနေမင်းကို ပြုလုပ်နိုင်တယ်… အဲ့ဒါရဲ့ စွမ်းအားက တကယ့်အာရုဏ်ဦးနေမင်းကို မယှဉ်နိုင်ပေမဲ့ ကမ္ဘာတုန်ဟီးအောင် ချောက်ချားစရာကောင်းနေဆဲပဲ ”

“ ဖုန်းဟိုင်ဒေသငယ်မှာ ငါတို့ရဲ့ စစ်သည်တော်တစ်သောင်းပါဝင်တဲ့ စစ်တပ်နဲ့ အဆက်အသွယ်ပြတ်သွားရတာ ဒီဟာကြောင့် ဖြစ်ရမယ် ”

သတ္တမမင်းသားက စိတ်ထဲမှာ တီးတိုးရေရွတ်လိုက်သည်။ သူက တည်ငြိမ်သော စိတ်အခြေအနေသို့ ပြန်ရောက်ချင်ပြီး သူ၏ နှလုံးသားထဲမှ ကြီးမားသော နာကျင်မှုကို ဖိနှိပ်ချင်သည်။ သို့သော်လည်း သူ၏ ခန္ဓာကိုယ်က ဆက်လက် တုန်ယင်နေပြီး သူ၏ မျက်လုံးထဲမှာ ပုန်းကွယ်နေသော အကြောက်တရားက အရှင်းမပျောက်ကွယ်သွားပေ။

သူက အမှန်တကယ် ကြောက်ရွံ့သွားခဲ့သည်။

“ ဖုန်းဟိုင်ဒေသငယ်ရဲ့ အခြေအနေကို စစ်ဆေးဖို့အတွက် လူသားဆေးမီးဖိုဖြစ်တဲ့ ကျစ်ရွှမ်းကို ဖမ်းဆီးဖို့ ချန်းယန်းဇီကို ငါစေခိုင်းခဲ့တယ်… ဒါပေမဲ့ ဖုန်းဟိုင်ဒေသငယ်က အာရုဏ်ဦးနေမင်းကို တကယ်ကြီး ငါ့ဆီ ပစ်လွှတ်ခဲ့တယ်… ”

“ အဲ့ဒါက ရွှီချင်းရဲ့ အမိန့်ဖြစ်ရမယ်… သူက သူ့ကို ရန်လာမစဖို့နဲ့ သူ့ရဲ့ မိန်းကလေးကို မထိဖို့ ငါ့ကို သတိပေးချင်တာပဲ… ရွှီချင်း… မင်း တကယ် ရက်စက်တယ် ”

သတ္တမမင်းသားက ထိုသို့တွေးမိသောအခါ နောက်ထပ် သွေးတစ်ပွက် အန်လိုက်ရသည်။ ထို့နောက် သူက ဖုန်းဟိုင်ဒေသငယ်၏ ဦးတည်ရာထံမှ ခက်ခက်ခဲခဲ အကြည့်ပြန်ရုပ်လိုက်ပြီး သူ့အရှေ့မှ မီးကျွမ်းနေသော မြေကြီးကို မျက်တောင်မခတ်တမ်း စိုက်ကြည့်လိုက်သည်။ နောက်ဆုံးမှာတော့ သူက အံတင်းတင်းကြိတ်လိုက်ပြီး ပြောသည်။

“ သွားကြစို့… ဒီနေရာကနေ ထွက်သွားပြီး ပုန်းအောင်းရမယ်… ငါတို့စောင့်ရမယ်… ငါ့ဦးရီးတော် ပြန်ရောက်လာမယ့်အချိန်ကို စောင့်ရမယ် ”

သတ္တမမင်းသားသည် ဒေါသထွက်နေသည်။ သို့သော်လည်း ကြောက်လန့်ခြင်းနှင့် နှလုံးတုန်ခြင်းက ပိုပြီးပြင်းထန်သည်။ ထို့ပြင် နောက်ထပ်အာရုဏ်ဦးနေမင်းတစ်ခု ကျဆင်းလာလိမ့်မည်ကို သူစိုးရိမ်သည်။

ဘုရင်ထျန်းလန်ပြန်မရောက်ခင်အထိ ဖုန်းဟိုင်ဒေသငယ်ကို သူရန်မစချင်ပေ။ ထို့ပြင် ထိုသို့လုပ်ဆောင်ဝံ့သောသတ္တိ သူ့မှာ မရှိပေ။ ထိုအုပ်စုက အရူးအုပ်စုဟု သူခံစားမိသည်။ အထူးသဖြင့် သူတို့က ကြောက်စရာကောင်းသော အာရုဏ်ဦးနေမင်းကို ထိန်းချုပ်နိုင်သည်။

တစ်ချိန်တည်းမှာ ကောင်းကင်လေပြည်ထောင်က စက်လုံးအလတ်ကြောင့် ပြာဖြစ်သွားစဉ် ဖုန်းဟိုင်ဒေသငယ်၏ ဒေသအကြီးအကဲခြံဝန်းထဲမှ အဓိကခန်းမထဲတွင် အသွေးအသားဝဲကတော့သည် ပြိုကွဲပျက်စီးသွားသည်။

ဝဲကတော့ထဲမှ ဆန့်တန်းထွက်လာသော ချန်းယန်းဇီ၏ ရွှေကျီးကန်းလက်သည်းသည် မြေပြင်ပေါ်သို့ ပြုတ်ကျသွားသည်။ ထို့နောက် ယင်းက လူးလွန့်လှုပ်ရှားသွားပြီး ချန်းယန်ဇီ၏ အားနည်းနေသော ခန္ဓာကိုယ်အဖြစ်သို့ အသွင်ပြောင်းလဲသွားသည်။

တစ်စုံတစ်ယောက်၏ ကျင့်ကြံခြင်းက အဆင့်တစ်ခုထိ ရောက်ရှိသွားသည့်အခါ သူတို့၏ ခန္ဓာကိုယ်က လုံးဝမပျက်စီးသွားသရွေ့ အသစ်ပြန်လည်ဖွဲ့စည်းရန် မခက်ခဲပေ။ သို့သော်လည်း ထိုအတွက် ပေးဆပ်ရမည့် တန်ကြေးသည် အလွန်မြင့်မားသည်။

ချန်းယန်းဇီ၏ အစောနက ရွေးချယ်မှုသည်တော့ ယင်းက သူ့အတွက် တစ်ခုတည်းသော လွတ်လမ်းဖြစ်သည်။ ဝဲကတော့၏ အပြင်ဘက်မှ သူ၏ လက်ကို ဖြတ်တောက်ပြီး ခန္ဓာကိုယ်ကို အသစ်ပြန်လည်ဖွဲ့စည်းမှသာလျှင် စက်လုံးအလတ်၏ မဟာကပ်ဘေးမှ သူလွတ်မြောက်နိုင်လိမ့်မည်။

ဤအခိုက်အတန့်မှာ မြေပြင်ပေါ်မှ သူ၏ လက်ပြတ်က ခန္ဓာကိုယ်တစ်ခုသို့ အသွင်ပြောင်းလဲသွားပြီးနောက် သူက ချက်ချင်း အနောက်သို့ ဒယိမ်းဒယိုင် ဆုတ်သွားသည်။ သူ၏ မျက်နှာသည် ဖြူဖျော့နေပြီး သူ၏ အမူအရာသည် တည်ကြည်လေးနက်နေသည်။ သူက လောင်ကျွမ်းပျက်စီးသွားသော အသွေးအသားဝဲကတော့ကို ကြည့်ပြီးနောက် ရွှီချင်းထံသို့ အလိုအလျောက် ကြည့်လိုက်သည်။

“ မင်း… စောစောက ဘာကို ပစ်လွှတ်လိုက်တာလဲ ”