ခန်းမထဲမှ လူများ၏ နှလုံးသား

ဤအခိုက်အတန့်မှာ နေထွက်လာသည်။

ဝမ်ကူးကုန်းမြေမှ နေလုံးအားလုံးက အရှေ့အရပ်မှ ထွက်ပေါ်လာခြင်း မဟုတ်ပေ။ သို့သော်လည်း လူသားမျိုးနွယ်၏ မဟာနန်းမြို့တော်ဒေသကြီးထဲတွင် နေသည် အရှေ့အရပ်မှ ထွက်ပေါ်လာသည်။ ဤအခိုက်အတန့်မှာ လောကကို လောင်ကျွမ်းပြာချပစ်မည့် ဧရာမဆေးမီးဖိုတစ်လုံးနှင့် ဆင်တူသော အနီရောင်နေလုံးသည် အရှေ့အရပ်မှ မြှောက်တတ်လာပြီး အနီရောင်နေရောင်ခြည်အလင်းကို ကမ္ဘာမြေဆီသို့ ဖြည်းညင်းစွာ ဖြာဆင်းကျစေသည်။

နေရောင်ခြည်သည် အမှောင်ထုကို ဖြိုခွင်းလိုက်ပြီး ဓားကိုင်ဧကရာဇ်ရုပ်တုပေါ်မှ အလင်းရောင်ကို ပြန့်ကျဲသွားစေသည်။ နေရာင်ခြည်အောက်တွင် မဟာဧကရာဇ်၏ အရိပ်သည် သက်တံ့လမ်းကြောင်းနှင့် နန်းတော်ကို လွှမ်းခြုံသွားသည်။

အဝေးမှကြည့်လျှင် နန်းတော်၏ အဓိကအဆောက်အဦးရှေ့မှ အင်မော်တယ်လက်ခံဧရိယာထဲတွင် ခရမ်းရောင်မီးခိုးဖြင့် ပြည့်နှက်နေသည်။

ထိုသိပ်သည်းသော မြူခိုးသည် ဧရာမခေါင်းလောင်းကြီးတစ်ခုနှင့် ဆင်တူသည်ဟူသော ခံစားမှုကို ပေးသည်။ ဤအခိုက်အတန့်မှာ ညနှင့် နေ့သည် ပေါင်းစပ်သွားသည်။ ခေါင်းလောင်းကြီးသည် လေထဲမှာ ဘွားခနဲ ထွက်ပေါ်လာပြီး အင်မော်တယ်လက်ခံဧရိယာထဲတွင် အပေါ်သို့ မြှောက်တတ်သွားသည်။

ဤသည်မှာ အမှန်တရားအင်မော်တယ်ခေါင်းလောင်းဖြစ်သည်။

၎င်းကို ရှေးဘုရင်ရွှမ်ယုံခေတ်အတွင်းမှာ ဖန်တီးခဲ့ခြင်း ဖြစ်သည်။ ၎င်းက ယင်နှင့်ယန်ကြားမှာ တည်ရှိပြီး နေထွက်လာသည်နှင့် ထွက်ပေါ်လာကာ နေဝင်သွားသည်နှင့် ပျောက်ကွယ်သွားလေ့ ရှိသည်။

၎င်း၏ အကျိုးသက်ရောက်မှုသည် နှလုံးသားကို စစ်ဆေးပေးနိုင်သည်။

ရှေးခတ်ကာလကတည်းက ရံဖန်ရံခါ တချို့အရာရှိများ၏ စကားများကို တခြားလူများက သံသယရှိနိုင်ပေသည်။ ထိုအခါ သူတို့က သူတို့၏ ရည်ရွယ်ချက်အမှန်ကို သက်သေပြပေးရန် အမှန်တရားအင်မော်တယ်ခေါင်းလောင်းကို တီးခတ်ပေးရလိမ့်မည်။

ယင်းကို ရှေးခေတ်ကာလမှာ ဆောင်ရွက်ခဲ့ကြသည်။

သို့သော်လည်း လူသားဧကရာဇ်ရွှမ်ကျန်း၏ ခေတ်အတွင်းမှာ အမှန်တရားအင်မော်တယ်ခေါင်းလောင်းကို အသုံးပြုရသည့် အရေးကိစ္စများသည် အလွန်နည်းပါးသွားသည်။

ဤအခိုက်အတန့်မှာ ရွှီချင်းအပါအဝင် အနက်ရောင်နန်းတွင်းဝတ်စုံကို ဝတ်ဆင်ထားကြသော အရာရှိများသည် အဓိကခန်းမထဲသို့ ခြေချလိုက်ကြသည်။ ရွှီချင်း၏ မြင်ကွင်းထဲမှာ ထွက်ပေါ်လာသည်မှာ အလွန်ကျယ်ပြောသော ခန်းမကြီးတစ်ခု ဖြစ်သည်။

ထိုခန်းမသည် အလွန်ကျယ်ပြောသောကြောင့် လူတစ်ထောင်ကျော် ဝင်ဆံ့သည်။ ခန်းမ၏ ဘေးပတ်ပတ်လည်တွင် ဧရာမထောက်တိုင်များ ရှိသည်။ ခန်းမ၏ မျက်နှာကြက်ပေါ်တွင်သာမက ထိုထောက်တိုင်များပေါ်တွင်လည်း ကောင်းချီးမင်္ဂလာသားရဲပုံများကို ရေးဆွဲထားကြသည်။ ခန်းမတစ်ခုလုံးကို လင်းထိန်သွားစေမည့် အလင်းရောင်လည်း ရှိသည်။

ရွှေရောင်သံချပ်ကာဝတ် အစောင့်အကြပ်များသည် ခန်းမ၏ ဘေးတစ်ဖက်တစ်ချက်စီမှာ စီတန်းရပ်နေကြသည်။ သူတို့က လှုပ်ရှားမှုကင်းမဲ့စွာ ရပ်နေကြပြီး အရာရှိများ၏ ရောက်ရှိလာမှုအတွက် သူတို့၏ ရိုသေလေးစားမှုကို ဖော်ပြရန် အနည်းငယ် ခေါင်းငုံ့ထားကြသည်။

အရှေ့တွင်တော့ အလွှာကိုးလွှာပါရှိသော စင်မြင့်ရှည်တစ်ခု ရှိသည်။ ယင်းက အပေါ်သို့ မြှောက်တတ်သွားနေသော လှေကားရှည်တစ်ခုနှင့် ဆင်တူသည်။ မည်သည့်အလွှာမဆို ပေတစ်ထောင်နီးပါး ရှည်လျားပြီး ပေရာပေါင်းများစွာ ကျယ်ဝန်းသည်။ ထိပ်ဆုံးမှ နဝမအလွှာပေါ်တွင် အလွန်ကြီးကျယ်ခမ်းနားသော နဂါးရာဇပလ္လင်တစ်ခု ရှိ၏။

လူတစ်ယောက်သည် ထိုနဂါးရာဇပလ္လင်ပေါ်တွင် ထိုင်နေသည်။

ထိုလူ၏ တစ်ကိုယ်လုံးက ဝေဝါးနေလေရာ သူ၏ အစစ်အမှန် အသွင်သဏ္ဍာန်ကို ရှင်းလင်းစွာ မမြင်နိုင်ပေ။ သူက အထွတ်အမြတ်အရှိန်အဝါအား ထုတ်လွှတ်နေသော ရွှေရောင်ဧကရာဇ်ဝတ်ရုံကို ဝတ်ဆင်ထားကြောင်းသာ မြင်နိုင်ပေသည်။

သူ၏ ဦးခေါင်းပေါ်တွင် သရဖူတစ်ခုကို ဆောင်းထားသည်။ ပန်းဖွားဆယ့်နှစ်ခုသည် သရဖူ၏ အရှေ့နှင့် အနောက်မှာ တွဲလောင်းကျနေကြသည်။ ယင်းတို့ကို ငါးရောင်ခြယ်အင်မော်တယ်ချည်မျှင်ဖြင့် ရက်လုပ်ထားခြင်းဖြစ်ပြီး ဘုရင်၏ အမှတ်လက္ခဏာဖြစ်သော နေပုလဲများနှင့် လပုလဲများဖြင့် ထပ်မံ အလှတန်ဆာဆင်ထားသည်။

သူက ဤခန်းမတစ်ခုလုံး၏ အဓိက၊ မဟာနန်းမြို့တော်ဒေသကြီး၏ အဓိကဖြစ်ပြီး ဝမ်ကူးကုန်းမြေထဲမှ လူသားမျိုးနွယ်၏ အဓိကထောက်တိုင် ဖြစ်ပေသည်။

ပိုပြီးအံ့ဖွယ်ကောင်းသည်မှာ ကမ္မဖြစ်သည်။

လူသားမျိုးနွယ်တစ်ခုလုံး၏ ကမ္မသည် လူသားဧကရာဇ်ပေါ်မှာ စုဝေးရှိနေသည်။ ကမ္မ၏ အားဖြည့်ပေးမှုအောက်မှာ ရွှီချင်းက လူသားဧကရာဇ်ကို တစ်ချက်ကြည့်လိုက်လေရာ သူက အဆုံးမဲ့သော အရှိန်အဝါဖြင့် ဖိနှိပ်ခံလိုက်ရသည့်အလား ခံစားမိသွားသည်။

သူ၏ မျက်လုံးသည် စူးရှသော နာကျင်မှုကို ခံစားမိသွားသည်။ သူက လပူဇော်ဒေသကြီးမှ အိမ်ရှေ့စံမင်းသားနှင့် တခြားလူများဖြင့် ရင်ဆိုင်တွေ့ခဲ့စဉ်က ထိုသို့ထက်ရှသော အရှိန်အဝါကို မခံစားခဲ့ရပေ။ ဤသည်မှာ ကျင့်ကြံခြင်းအဆင့်ဖြင့် မသက်ဆိုင်ပေ။ ယင်းက ကမ္မစွမ်းအား ဖြစ်သည်။

ထိုကမ္မ၏ အားဖြည့်ပေးမှုအောက်မှာ လူသားဧကရာဇ်သည် အရာအားလုံးကို အတွေးတစ်ချက်ဖြင့် ဖျက်ဆီးပစ်နိုင်သည်။

ရွှီချင်းသည် အနည်းငယ် ခေါင်းငုံ့ထားလိုက်သည်။ နတ်မိမယ်ကျစ်ရွှမ်း သူ့ကို ပြောခဲ့ဖူးသော ယဉ်ကျေးမှုဓလေ့ထုံးတမ်းများက သူ၏ စိတ်ထဲမှာ ပြန်ပေါ်လာသည်။

“ ရှေးဘုရင်ရွှမ်ယုံက သက်ရှိတွေရဲ့ ကုန်းမြေတွေကိုပဲ စုစည်းခဲ့တာမဟုတ်ဘူး… သေခြင်းနယ်မြေတွေကိုလည်း စုစည်းခဲ့တယ်… ဒါကြောင့် အစက မြောက်ဘက်ကို မျက်နှာမူထားတဲ့ ရုံးတော်က တောင်ဘက်ကို ပြောင်းရွှေ့သွားခဲ့တယ်… အဲ့ဒီအဓိပ္ပာယ်က သက်ရှိတွေပဲဖြစ်ဖြစ် သေလွန်ပြီးသူတွေပဲဖြစ်ဖြစ် အရာအားလုံးရဲ့ ကံကြမ္မာက လူသားမျိုးနွယ်ရဲ့ လက်ထဲမှာလို့ ဆိုလိုတယ် ”

“ အဲ့ဒီအချိန်ကစပြီး သေးငယ်တဲ့ ညီလာခံဖြစ်စေ ကြီးမားတဲ့ ညီလာခံဖြစ်စေ ဧကရာဇ်က အရှေ့အရပ်ကို မျက်နှာမူလိမ့်မယ် ”

“ သေးငယ်တဲ့ ညီလာခံမှာဆိုရင် မဟာဧကရာဇ်တွေ၊ ကောင်းကင်ဘုရင်တွေနဲ့ အထက်ရွှမ်နန်းတော်သခင်တွေက တတ်ရောက်ဖို့မလိုဘူး… ဒါပေမဲ့ ကြီးမားတဲ့ ညီလာခံဆိုရင် သူတို့က မဖြစ်မနေ တတ်ရောက်ရလိမ့်မယ်… မဟာဧကရာဇ်တွေက ဆဌမအလွှာမှာထိုင်ရတယ်… ကောင်းကင်ဘုရင်တွေက တတိယအလွှာမှာ ထိုင်ရပြီး ကောင်းကင်ဘုံအမတ်တွေက ပထမအလွှာမှာ ထိုင်ရတယ်… သူတို့အားလုံးက အရှေ့အရပ်ကို မျက်နှာမူရတယ်… အမတ်ကြီးသုံးပါးက ပထမအလွှာရဲ့ အောက်မှာ မတ်တတ်ရပ်ရပြီး အရှေ့အရပ်ကို မျက်နှာမူရတယ်… အထက်ရွှမ်နန်းတော်ငါးခုရဲ့ လက်ထောက်နန်းတော်သခင်တွေက မြောက်ဘက်မှာ မတ်တတ်ရပ်ရပြီး အနောက်ဘက်ကို မျက်နှာမူရတယ်… အောက်ရွှမ်နန်းတော်ငါးခုရဲ့ လက်ထောက်နန်းတော်သခင်တွေက တောင်ဘက်မှာ မတ်တတ်ရပ်ရပြီး အရှေ့ဘက်ကို မျက်နှာမူရတယ်… တော်ဝင်မိသားစုရဲ့ အဖွဲ့ဝင်တွေက အဓိကဝင်ပေါက်ရဲ့ ညာဘက်ခြမ်းမှာ မတ်တတ်ရပ်ရတယ်... ဘဏ္ဍာထိန်းဝန်ကြီးနဲ့ သူတို့ရဲ့ အဖွဲ့ဝင်တွေက ဘယ်ဘက်ခြမ်းမှာ မတ်တတ်ရပ်ရတယ် ”

ရွှီချင်းက တွေးတောစဉ်းစားနေစဉ် အနက်ရောင်နန်းတွင်းဝတ်စုံကို ဝတ်ဆင်ထားကြသော ကျင့်ကြံသူများသည် အရှေ့သို့ ခြေတစ်လှမ်းတိုးလိုက်ကြပြီး ပထမအလွှာဆီသို့ လျှောက်သွားကြသည်။ သူတို့သည် ထိုနေရာမှာ မတ်တတ်ရပ်လိုက်ကြပြီး ခန်းမ၏ ဝင်ပေါက်ဆီသို့ မျက်နှာမူလိုက်ကြသည်။

ရွှီချင်းသည် အသက်ပြင်းပြင်းရှူသွင်းလိုက်ပြီး သူတို့နည်းတူ ပထမအလွှာဆီသို့ ဦးတည်သွားလိုက်သည်။

သူ၏ ရောက်ရှိလာမှုက အကြည့်များစွာကို ဆွဲဆောင်သွားသည်။ သို့သော်လည်း သူတို့အများစုသည် ကြည့်ရုံသာ ကြည့်ကြသည်။ မကြာမီ ရွှီချင်း၏ ပုံရိပ်သည် ပထမအလွှာပေါ်မှာ ထွက်ပေါ်လာပြီး အစွန်ဆုံးနားမှာ မတ်တတ်ရပ်လိုက်သည်။

သူက ပထမအလွှာပေါ်မှာ ခြေချလိုက်သည်နှင့်ချက်ချင်း ခန်းမ၏ အပြင်ဘက်မှ အရာရှိများက စတင်ဝင်ရောက်လာကြသည်။ သူတို့က ရာထူးအဆင့်ပေါ်မူတည်၍ ကိုယ်စီနေရာယူလိုက်ကြသည်။

အဓိကခန်းမသည် တိတ်ဆိတ်ငြိမ်သက်သွားသည်။

ပထမအလွှာ၏ အောက်ဘက်မှ အမတ်ကြီးသုံးပါးတွင် ရွှီချင်းက တစ်ယောက်ကိုသာ မြင်ဖူးသည်။ ထိုလူသည် အနီရောင်နန်းတွင်းဝတ်စုံကို ဝတ်ဆင်ထားသော အဖိုးအိုတစ်ယောက် ဖြစ်သည်။ သူ၏ အဖြူရောင် ဆံပင်သည် ပခုံးထက်သို့ ကျဆင်းနေသည်။ သူက အရပ်ရှည်ပြီး ဖြောင့်မတ်ကာ ဂုဏ်သိက္ခာကြီးမားပုံပေါ်သည်။ သူ၏ သရုပ်နှင့်ပတ်သက်ပြီး ရွှီချင်းက အသေးစိတ် မသိထားသော်လည်း ထိုအဖိုးအိုက တရားဝန်ကြီးချုပ်ဖြစ်နိုင်သည်။

နတ်မိမယ်ကျစ်ရွှမ်း၏ ပြောကြားမှုအရ ရုံးတော်ညီလာခံကို ပုံမှန်အားဖြင့် တရားဝန်ကြီးချုပ်က သဘာပတိအဖြစ် စီမံဆောင်ရွက်ရသည်။

ဤအခိုက်အတန့်မှာ လူတိုင်းက ကိုယ်စီနေရာယူပြီးသွားသည်နှင့် အနီရောင်နန်းတွင်းဝတ်စုံဖြင့် အဖိုးအိုသည် လူတိုင်းကို ကြည့်ရှုလိုက်သည်။ နောက်ဆုံးမှာတော့ သူက ခေါင်းလှည့်လိုက်ပြီး ရွှီချင်းအပါအဝင် ပထမအလွှာပေါ်မှ လူများကို ကြည့်ရှုလိုက်သည်။

သူ၏ အကြည့်က ရွှီချင်းပေါ်သို့ ကျရောက်သွားသည့်အခါ မသိမသာ ရပ်တန့်သွားသည်။ သူက ရွှီချင်း၏ ရုပ်အသွင်အပြင်ကို အာရုံစိုက်နေခြင်းမဟုတ်ပေ။ ယင်းအစား သူက ရွှီချင်း၏ အဝတ်အစားကို အသေးစိတ် စစ်ဆေးကြည့်ရှုနေခြင်း ဖြစ်သည်။ အံ့အားသင့်မှုက သူ၏ မျက်နှာပေါ်မှာ ထွက်ပေါ်လာသည်။

ရွှီချင်း၏ နန်းတွင်းဝတ်စုံက တခြားလူများနှင့် အနည်းငယ် ကွဲထွက်နေသည်။ ဝတ်စုံပေါ်မှ ရှေးဟောင်းအရှိန်အဝါနှင့် ကောင်းချီးမင်္ဂလာနိမိတ်သည် သာမန်လူများအတွက် အာရုံခံမိရန် ခက်ခဲသော်လည်း သူကတော့ အကြည့်တစ်ချက်ဖြင့် ပြောနိုင်သည်။

ထို့နောက် သူက ရွှီချင်းထံမှ အကြည့်ပြန်ရုပ်လိုက်ပြီး လက်သီးဆုပ်လိုက်ကာ နဝမအလွှာပေါ်မှ လူသားဧကရာဇ်ကို ဦးညွတ်လိုက်သည်။

“ အရှင်မင်းကြီး… ရုံးတော်ညီလာခံ စတင်နိုင်ပါပြီ ”

ခန်းမထဲမှ လူတိုင်းသည် ခေါင်းငုံ့ထားလိုက်ကြသည်။ ယခင်က ရုံးတော်ညီလာခံများအရဆိုလျှင် ဤအခိုက်အတန့်မှာ လူသားဧကရာဇ်က အမတ်ကြီးများနှင့် ဝန်ကြီးများအပေါ် သူ၏ ရိုသေလေးစားမှုကို ဖော်ပြရန် မတ်တတ်ရပ်ပေးရလိမ့်မည်။ ထို့နောက် သူက လူတိုင်းနှင့်အတူ အရိုအသေပေးပြီး ဓလေ့ထုံးတမ်းကို ပြီးမြောက်စေလိမ့်မည်။

သို့သော်လည်း ဤတစ်ကြိမ်တွင် အနည်းငယ် ခြားနားသည်။

လူသားဧကရာဇ်သည် ရာဇပလ္လင်မှ ဖြည်းညင်းစွာ မတ်တတ်ရပ်လိုက်သည်။ သူ့ထံမှ ဖိအားသည် ဘေးပတ်ဝန်းကျင်ကို လွှမ်းခြုံသွားပြီး လူသားမျိုးနွယ်၏ ကမ္မစွမ်းအားသည် လောကတစ်ခွင် ပျံ့နှံ့သွားသည်။

အပြင်ဘက်မှ တိမ်တိုက်များနှင့် မြူခိုးသည် တအိအိလှုပ်ရှားထကြွလာပြီး ရွှေရောင်နဂါးများသည် ကျယ်လောင်စွာ ဟိန်းဟောက်လိုက်ကြသည်။ သူက ယခင်ကဲ့သို့ စုပေါင်းအရိုအသေပေးခြင်းမှာ မပါဝင်ခဲ့ပေ။ ယင်းအစား သူက ခေါင်းလှည့်လိုက်ပြီး သူ၏ အကြည့်က သရဖူ၏ ပန်းဖွားများကို ဖောက်ထွင်းသွားကာ ရွှီချင်းထံသို့ ကျရောက်သွားသည်။ ထို့နောက် သူက ရွှီချင်းကို ညင်သာစွာ သုံးကြိမ် ခေါင်းညိတ်ပြသည်။

“ လူသားမျိုးနွယ်ရဲ့ နယ်စပ်ဒေသကို အုပ်ချုပ်ပေးတဲ့ အကျိုးဆောင်မှုကြောင့် ထိုင်ခုံပေါ်မှာ ထိုင်စေ ”

တရားဝန်ကြီးချုပ်၏ အသံသည် လူသားဧကရာဇ်ကိုယ်စား ပဲ့တင်ထွက်လာသည်။

နောက်အခိုက်အတန့်မှာ ရွှီချင်း၏ အနောက်မှ စင်မြင့်၏ မျက်နှာပြင်ပေါ်တွင် လှိုင်းဂယက်တချို့ ထွက်ပေါ်လာသည်။ ထို့နောက် အနက်ရောင်နဂါးတစ်ကောင် ရစ်ခွေနေသော ထိုင်ခုံတစ်လုံးသည် စင်မြင့်ပေါ်မှာ ဖြည်းညင်းစွာ ထွက်ပေါ်လာသည်။

ရွှီချင်း၏ အမူအရာသည် တည်ကြည်လေးနက်သွားပြီး သူ၏ ကျေးဇူးတင်မှုကို ဖော်ပြရန် ကိုးကြိမ် အရိုအသေပေးလိုက်သည်။ သူ၏ လုပ်ဆောင်မှုမှာ မည်သည့်အမှားအယွင်းမှမရှိဘဲ ကိုယ်နေဟန်ထားသည် မှန်ကန်သည်။ ယင်းက ရှေးခတ်ထုံးတမ်းစဉ်လာ၏ အငွေ့အသက်ကို ဖြစ်ပေါ်စေသည်။

ထိုမြင်ကွင်းက ခန်းမထဲမှ လူတိုင်း၏ မျက်စိရှေ့သို့ ကျရောက်သွားသောအခါ မည်သူမှ မျက်တောင်တစ်ချက် မခတ်သွားကြသော်လည်း သူတို့၏ စိတ်ထဲမှာ ရွှီချင်းအပေါ် ပိုပြီးအာရုံစိုက်လာကြသည်။ ရွှီချင်း၏ အနောက်တွင် လူသားမျိုးနွယ်၏ ယဉ်ကျေးမှုဓလေ့ကို ကောင်းမွန်စွာ နားလည်ထားသူတစ်ယောက်ရှိကြောင်း သူတို့နားလည်သွားကြသည်။

ထို့နောက် လူသားဧကရာဇ်နှင့် အရာရှိများသည် အတူတကွ အရိုအသေပေးလိုက်ကြသည်။ လူသားဧကရာဇ်သည် ပလ္လင်ပေါ်မှာ ပြန်ထိုင်လိုက်သည်။ ထို့နောက် ရွှီချင်းသည် ထိုင်ခုံပေါ်မှာ ထိုင်လိုက်သည်။ အနက်ရောင်နန်းတွင်းဝတ်စုံဖြင့် ကျင့်ကြံသူများသည်တော့ စင်မြင့်ပေါ်မှာ တင်ပျဉ်ခွေထိုင်လိုက်ကြသည်။

ခေါင်းလောင်းမြည်သံ ထွက်ပေါ်လာသောအခါ မနက်ခင်းညီလာခံတွေ့ဆုံခြင်း စတင်လာသည်။

မကြာမီ တစ်စုံတစ်ယောက်က အပြင်သို့ ထွက်လျှောက်လာပြီး အုပ်ချုပ်ရေးကိစ္စများကို တင်ပြသည်။

ပထမဆုံးသည် ပြည်သူပြည်သားများ၏ ဘဝနေထိုင်မှုအကြောင်း ဖြစ်သည်။ ထို့နောက် လူသားမျိုးနွယ်အတွင်းမှ အမျိုးမျိုးသော ကိစ္စများကို တင်ပြသည်။ ထိုထဲတွင် အုပ်ချုပ်ရေးဆိုင်ရာ ကိစ္စရပ်များ၊ ငွေကြေးဆိုင်ရာပြဿနာများနှင့် သံတမန်ရေးရာကိစ္စများ ပါဝင်ကြသည်။

လူသားဧကရာဇ်သည်တော့ စကားပြောခဲသည်။ ကိစ္စအများစုကို တရားဝန်ကြီးချုပ်သာလျှင် ကိုင်တွယ်ဖြေရှင်းခဲ့သည်။ အရေးကြီးသော ကိစ္စရပ်များမှသာ လူသားဧကရာဇ်က တစ်စုံတစ်ခု ဝင်ပြောပြီး ဆုံးဖြတ်ချက်ချပေးလိမ့်မည်။

ဤသည်မှာ ရွှီချင်းက လူသားမျိုးနွယ်၏ ပင်မထောက်တိုင်ဖြစ်သော ဤခန်းမထဲသို့ ပထမဆုံးအကြိမ် ရောက်ဖူးခြင်းဖြစ်ပြီး ဤကဲ့သို့ ညီလာခံတွေ့ဆုံမှုကို တတ်ရောက်ဖူးခြင်း ဖြစ်သည်။ သူ၏ နှလုံးသားထဲမှာ လှိုင်းလုံးတချို့ ထွက်ပေါ်နေသောကြောင့် ပုံမှန်အတိုင်း အေးဆေးတည်ငြိမ်စွာ ရှိနေရန် သူ့အတွက် အလွန်ခက်ခဲပေသည်။

လူသားဧကရာဇ်ကို နောက်ကျောပေးကာ ထိုင်နေရင်း သူ၏ အကြည့်က အဓိကခန်းမပေါ်သို့ ကျရောက်သွားသည်။

ဤနေရာမှ လူတိုင်း၏ အမူအရာများမှတဆင့် သူတို့က မည်သည့်အရာကို တွေးတောနေကြောင်း ပြောရန် မဖြစ်နိုင်ပေ။ ရွီချင်းသည် သူတို့၏ စကားများကို နားထောင်နေရင်း လူတိုင်း၏ ပါဝင်ဆောင်ရွက်မှုများကို ကြည့်ရှုလေ့လာနေသည်။ သူတို့ထံမှ စကားလုံးတိုင်းက ကျောက်စိမ်းသဖွယ် တန်ဖိုးကြီးမားပြီး ကျစ်လျစ်ပြည့်စုံသည်။ ရံဖန်ရံခါ သူတို့၏ စကားများက အတွေးများစွာကို ဖွင့်လှစ်ပေးနိုင်သည်။

“ ဒီက လူအားလုံးက အရည်အချင်းရှိတဲ့ လူတွေချည်းပဲ… ”

ရွှီချင်းက ထိုသို့တွေးတောနေစဉ် ခန်းမထဲမှာ ဆွေးနွေးနေသော ကိစ္စသည် တိုင်းတစ်ပါးခြားဆီသို့ ရောက်ရှိသွားသည်။ ယခု သူတို့က ကောင်းကင်နက်မျိုးနွယ်နှင့် ပဋိပက္ခကို ဆွေးနွေးနေကြသည်။ ဤကိစ္စနှင့်ပတ်သက်၍ အမတ်တစ်ယောက်က သူ၏ ထင်မြင်ယူဆချက်များကို တင်ပြနေစဉ် ရွှီချင်းသည် ခန်းမ၏ ညာဘက်ခြမ်းမှာရှိသော တော်ဝင်မိသားစု၏ အဖွဲ့ဝင်များကို ကြည့်လိုက်သည်။

ထိုနေရာတွင် လူအများကြီး မရှိပေ။ အများစုသည် အကြီးအကဲများ ဖြစ်ကြသည်။ မင်းသားသည်တော့ ယခုအချိန်မှာ နင်ယန်တစ်ယောက်တည်းသာ ရှိ၏။

သူက ထိုနေရာမှာ သတိကြီးစွာထား၍ မတ်တတ်ရပ်နေလေရာ သူ၏ ခမည်းတော်ကို ကြောက်ရွံ့နေကြောင်း ထင်ရှားသည်။

ရွှီချင်း၏ အကြည့်က နင်ယန်ပေါ်သို့ ကျရောက်သွားသည်။ သူက အကြည့်ပြန်ရုပ်လိုက်သည့်အခိုက် တရားဝန်ကြီးချုပ်၏ အသံကို ကြားလိုက်ရသည်။

“ ကောင်းကင်နက်မျိုးနွယ်ရဲ့ ဝိညာဉ်နက်ဒေသကြီးအကြောင်းကို ဖုန်းဟိုင်ဒေသငယ်ရဲ့ ဒေသအကြီးအကဲရွှီချင်းကို ကျုပ်မေးမြန်းချင်ပါတယ်… ဒေသအကြီးအကဲရွှီချင်း အဲ့ဒီကိစ္စကို အသေးစိတ် တင်ပြပေးပါ ”

လူအများအပြား၏ အကြည့်သည် ရွှီချင်းထံသို့ ချက်ချင်း စုပြုံကျရောက်လာသည်။ ရွှီချင်းသည် ဖြည်းညင်းစွာ မတ်တတ်ရပ်လိုက်ပြီး လူသားဧကရာဇ်ကို အရိုအသေပေးလိုက်သည်။ လူတိုင်း၏ အာရုံစိုက်မှုအောက်မှာ သူက တည်ကြည်လေးနက်သော အသံဖြင့် ပြောသည်။

“ ဝိညာဉ်နက်ဒေသကြီးကို တောင်ပိုင်းဒေသနဲ့ မြောက်ပိုင်းဒေသဆိုပြီး ခွဲခြားထားပါတယ်… မြောက်ပိုင်းဒေသကို ကောင်းကင်နက်တော်ဝင်မိသားစုရဲ့ ပြန့်ကျဲနေတဲ့ အင်အားစုတွေက ထိန်းချုပ်ထားပါတယ်… တောင်ပိုင်းဒေသကိုတော့ ကောင်းကင်နက်မျိုးနွယ်ရဲ့ နတ်ဆရာတွေက ထိန်းချုပ်ထားပါတယ် ”

“ နီလာနတ်သမီးရဲ့ သေဆုံးမှုက ကောင်းကင်နက်မျိုးနွယ်ရဲ့ နတ်ဆရာတွေရဲ့ အဆင့်အတန်းကို ကျဆင်းသွားစေပြီး နတ်ဘုရားရဲ့ ကောင်းချီးပေးမှုကို ဆုံးရှုံးသွားစေပါတယ်… ဖုန်းဟိုင်ဒေသငယ်က သူတို့ကို ငါတို့ရဲ့ အတောင်ပံအောက်ဆီ ဝင်ရောက်ခိုလှုံခွင့်ပြုခဲ့ပါတယ်… ကောင်းကင်နက်မျိုးနွယ်ရဲ့ နတ်ဆရာတွေအတွက် ယုံကြည်မှုဘုရားကျောင်းကိုလည်း ပြန်ဆောက်ပေးခဲ့ပါတယ် ”

ထိုနေရာသို့ ရောက်သည့်အခါ အပြာရောင်နန်းတွင်းဝတ်စုံကို ဝတ်ဆင်ထားသော သက်လတ်ပိုင်းအမျိုးသားတစ်ယောက်သည် ရုတ်တရက် အရှေ့ထွက်လာပြီး ပြောသည်။

“ ဒေသအကြီးအကဲရွှီ… ပြန်ဆောက်ခဲ့တဲ့ အဲ့ဒီဘုရားကျောင်းမှာ ကောင်းကင်နက်မျိုးနွယ်ရဲ့ နတ်ဆရာတွေရဲ့ ယုံကြည်မှုဇစ်မြစ်က ဘာလဲဆိုတာ ငါမေးချင်ပါတယ် ”

ခန်းမထဲမှ လူတိုင်း၏ အမူအရာသည် ပြောင်းလဲသွားကြသည်။ သို့သော်လည်း ယင်းက သိပ်မထင်ရှားပေ။ ကောင်းကင်နက်မျိုးနွယ်၏ နတ်ဆရာများက ခရမ်းအရှင်သခင်အား ကိုးကွယ်ယုံကြည်ပြီး ထိုခရမ်းအရှင်သခင်က ရွှီချင်းနှင့် ဆက်စပ်နေကြောင်းသည် လျှို့ဝှက်ချက်တစ်ခု မဟုတ်ပေ။ သို့သော်လည်း တချို့ကိစ္စများသည် အလွန်ထိရှလွယ်သဖြင့် အလွယ်တကူ ထုတ်မပြောသင့်ပေ။

ထို့ကြောင့် ဤမေးခွန်းထဲတွင် အဓိပ္ပာယ်များစွာ ပါရှိသည်။

ရွှီချင်း၏ အကြည့်သည် ထိုသက်လတ်ပိုင်းအမျိုးသားပေါ်သို့ ကျရောက်သွားပြီး တည်ငြိမ်စွာ ပြောသည်။

“ မင်း စည်းကျော်သွားတယ် ”

ရွှီချင်းက ထိုစကားပြောလိုက်သည်နှင့်ချက်ချင်း သက်လတ်ပိုင်းအမျိုးသားသည် ရွှီချင်းကို စိုက်ကြည့်လိုက်ပြီး အနောက်သို့ ခြေလှမ်းအနည်းငယ် ဆုတ်သွားကာ သူ့နေရာသို့ ပြန်ရောက်သွားသည်။

ခန်းမထဲမှ လူတိုင်းသည် ရွှီချင်း၏ အဖြေကို အတွေးကိုယ်စီဖြင့် စဉ်းစားလိုက်ကြသည်။ ရွှီချင်းကို ပညာရှိတစ်ယောက်က ယဉ်ကျေးမှုဓလေ့များနှင့်ပတ်သက်ပြီး သင်ကြားပေးထားခြင်းဖြစ်မည်ဟု သူတို့က ခန့်မှန်းလိုက်ကြသည်။

တရားဝန်ကြီးချုပ်သည် ခေါင်းညိတ်လိုက်သည်။

“ ဒေသကြီးတစ်ခုကို အုပ်ချုပ်တယ်… ကောင်းကင်ဘုံအမတ်နန်းတွင်းဝတ်စုံကို ဝတ်ဆင်ပြီး ပထမအလွှာမှာ ထိုင်နိုင်တာက ဒေသအကြီးအကဲရွှီရဲ့ စွမ်းဆောင်ရည်တွေပဲ… ကျိုးထျန်းချီ… မင်းက ဒေသအကြီးအကဲရွှီ စကားပြောနေချိန်မှာ ဝင်နှောင့်ယှက်ခဲ့တယ်… မင်းရဲ့ အပြုအမူက တကယ်ပဲ စည်းကျော်သွားခဲ့တယ် ”

ကျိုးထျန်းချီသည် ခေါင်းငုံ့လိုက်ပြီး သူမှားသွားကြောင်း သဘောတူလိုက်သည်။ သို့သော်လည်း သူ၏ မျက်နှာပေါ်မှ အမူအရာသည် ပြောင်းလဲသွားခြင်းမရှိပေ။

ရွှီချင်းသည် သူ့ကို လျစ်လျူရှုလိုက်သည်။ သူက လူသားဧကရာဇ်ကို အရိုအသေပေးလိုက်ပြီး ထိုင်ခုံပေါ်မှာ ထိုင်လိုက်သည်။

ခန်းမက တစ်ခဏကြာ တိတ်ဆိတ်သွားပြီးနောက် နောက်ထပ်အရာရှိတစ်ဦးသည် အရှေ့ထွက်လျှောက်လာသည်။ သူက အပြာရောင်နန်းတွင်းဝတ်စုံကို ဝတ်ဆင်ထားပြီး ခန်းမ၏ အလယ်ဗဟိုမှာ ရှိသည်။ သူက အရင်ဦးစွာ လူသားဧကရာဇ်ကို အရိုအသေပေးလိုက်သည်။ ထို့နောက် သူက ရွှီချင်းကို ကြည့်လိုက်သည်။

“ ဒေသအကြီးအကဲရွှီက ထိုင်ခုံပေါ်မှာ ပြန်ထိုင်ပြီးပါပြီ… အခု ငါက မေးခွန်းမေးမယ်ဆိုရင် အဲ့ဒါကို စည်းကျော်တယ်လို့ မသတ်မှတ်နိုင်ပါဘူး… ဒေသအကြီးအကဲရွှီ… လူသားမျိုးနွယ်ရဲ့ အရေးကြီးဆုံး လျှို့ဝှက်ချက်ဖြစ်တဲ့ အာရုဏ်ဦးနေမင်းကို မင်းဘယ်လိုလုပ် သိတာပါလဲ… အဲ့ဒါကို မင်းဘယ်လို ရရှိခဲ့တာပါလဲ… မင်းမှာ အဲ့ဒါ ဘယ်နှစ်ခုရှိပါသလဲ… ပြီးတော့ မင်းက အဲဒါကို ဘာဖြစ်လို့ နန်းမြို့တော်နဲ့ နန်းတော်ထဲကို ယူဆောင်လာတာပါလဲ ”

ထိုမေးခွန်းသည်လည်း အလွန်ထိရှလွယ်သည်။ သူ၏ အသံထဲမှာ သတ်ဖြတ်ခြင်းစိတ်ဆန္ဒတချို့ ကိန်းအောင်းနေပြီး ယင်းက ဘေးပတ်ဝန်းကျင်မှ လေထုကို လူသတ်ငွေ့ဖြင့် ချက်ချင်း ပြည့်နှက်သွားစေသည်။ ဘေးတစ်ဖက်စီမှ ရွှေရောင်သံချပ်ကာဝတ် အစောင့်အကြပ်များသည်ပင် ချက်ချင်း သတိထားလိုက်ကြသည်။

ရွှီချင်းသည် မတ်တတ်မရပ်ပေ။ သူက အသက်ရှူချိန်အနည်းငယ်ကြာ တိတ်ဆိတ်နေပြီးနောက် တည်ငြိမ်စွာ ပြောသည်။

“ လပူဇော်ဒေသကြီးရဲ့ အိမ်ရှေ့စံမင်းသားက ငါ့ကို စုစုပေါင်း အာရုဏ်ဦးနေမင်းကိုးခု ပေးခဲ့ပါတယ်… နီလာနတ်သမီးကို သတ်ဖြတ်တဲ့နေရာမှာ အာရုဏ်ဦးနေမင်းခြောက်ခုကို ငါအသုံးပြုခဲ့ပါတယ် ”

“ နန်းမြို့တော်ဆီ ဘာဖြစ်လို့ အာရုဏ်ဦးနေမင်းကို ယူဆောင်လာတာလဲဆိုတော့… ငါ သေမှာကြောက်လို့ပါ ”

ဤမေးခွန်းကို မေးမြန်းသော အရာရှိသည် ရွှီချင်းကို ကြည့်ပြီးနောက် နောက်ထပ် မပြောတော့ပေ။ ထို့နောက် သူက သူ့ကိုယ်ပိုင်နေရာဆီသို့ ပြန်ဆုတ်သွားသည်။

တရားဝန်ကြီးချုပ်သည် ထိုအရာရှိကို ကြည့်လိုက်သည်။ တစ်ဖက်လူ၏ မေးခွန်းသည် ရွှီချင်းကို အခက်တွေ့အောင် ပြုလုပ်နေဟန် ထင်ရသော်လည်း တခြားရှုထောင့်မှ ကြည့်မည်ဆိုလျှင် သူက ရွှီချင်းကို ရှင်းပြရန် အခွင့်အရေးတစ်ခု ပေးသွားခဲ့ခြင်း ဖြစ်သည်။

သူ၏ ရည်ရွယ်ချက်ထဲမှာ အကောင်းအဆိုး ဒွန်တွဲနေသည်။ မတူညီသော လူပုဂ္ဂိုလ်ပေါ်မူတည်၍ အမြင်ကွဲလွဲနိုင်သည်။

သို့သော်လည်း ယင်းက သူနှင့်ဘာမှမသက်ဆိုင်ပေ။ သို့ဖြစ်၍ တရားဝန်ကြီးချုပ်သည် လူသားဧကရာဇ်ထံသို့ ကြည့်လိုက်သည်။

လူသားဧကရာဇ်၏ တည်နေရာသည် အလွန်မြင့်မားပြီး သူ၏ ဩဇာကြီးမားသော အရှိန်အဝါကြောင့် သူ၏ အမူအရာကို မည်သူမှ ရှင်းလင်းစွာ မမြင်နိုင်ပေ။ သို့သော်လည်း သူက အန္တရာယ်အရှိန်အဝါကို ထုတ်လွှတ်လိုက်လေရာ ခန်းမတစ်ခုလုံး၏ လေထုသည် ချက်ချင်း တင်းကျပ်သွားသည်။ အေးစက်စက် ခံစားမှုသည် အရပ်မျက်နှာအသီးသီးသို့ ပျံ့လွင့်သွားသည်။

အသက်ဆယ်ခါရှူချိန်ကြာပြီးနောက် လူသားဧကရာဇ်၏ ဩဇာကြီးမားသော အသံက ပဲ့တင်ထပ်လာသည်။

“ တရားဝန်ကြီးချုပ်… လုပ်ကြံမှုကိစ္စရဲ့ ရလဒ်ကို ထုတ်ပြန်ကြေညာစေ ”

တရားဝန်ကြီးချုပ်က ခေါင်းငုံ့လိုက်သည်။ လူသားဧကရာဇ်က ရွှီချင်း၏ အာရုဏ်ဦးနေမင်းကိစ္စကို ဆက်စုံစမ်းရန် ဆန္ဒမရှိကြောင်း သူနားလည်သွားသည်။ ထိုသဘောထားက အချက်ပြမှုတစ်ခုလည်း ဖြစ်သည်။ ယင်းကို ခန်းမထဲမှ လူတိုင်းက နားလည်ကြသည်။

သို့ဖြစ်၍ တရားဝန်ကြီးချုပ်သည် ထပ်မံခေါင်းမော့လိုက်သည်။ သူက ခန်းမအပြင်ဘက်ကို ကြည့်လိုက်သည်။ သူ၏ အကြည့်က အေးစက်လာပြီး သူ၏ အသံထဲမှာ သတ်ဖြတ်ခြင်းစိတ်ဆန္ဒဖြင့် ပြည့်နှက်နေသည်။

“ လုပ်ကြံသတ်ဖြတ်မှုမှာ ပါဝင်ခဲ့ကြတဲ့လူတွေကို အထဲခေါ်လာကြစမ်း ”

( ဘာသာပြန်သူ၏ မှတ်ချက်: နန်းတွင်းအသုံးအနှုန်းနဲ့ ရာထူးအခေါ်အဝေါ်တွေကို ကျွန်တော်သိပ်မသိတာကြောင့် အမှားတချို့ ပါကောင်းပါသွားနိုင်ပါတယ်… အဲ့ဒါကြောင့် ဖြည့်တွေးပြီး ဖတ်စေလိုပါတယ်)