အခြားတစ်ဖက်မှ ကစားသမား

ဤခေါင်းလောင်းသည် အင်မော်တယ်နှင့် နှလုံးသားကို မေးမြန်းသည်။

အကယ်၍ နှလုံးသားက စစ်မှန်သည်ဆိုလျှင် ခေါင်းလောင်းမြည်သံ ထွက်ပေါ်လာလိမ့်မည်။

နင်ယန်သည် ဒူးထောက်ထားရသည့်အချိန်မှစ၍ သူ၏ စိတ်အခြေအနေက ပြောင်းလဲသွားခဲ့သည်။ အင်မော်တယ်အမှန်တရားခေါင်းလောင်းကို သူထုရိုက်လိုက်ပြီး ခေါင်းလောင်းမြည်သံ ထွက်ပေါ်လာသည့်အခါ သူ၏ ဝိညာဉ်က သန့်စင်ခံလိုက်ရဟန် ရ၏။

ဤသန့်စင်မှုသည် ရက်စက်သည်။ ယင်းက လိပ်ပြာအဖြစ်သို့ အသွင်မပြောင်းလဲသွားခင် ပိုးတုံးလုံးဘဝဖြင့် ရုန်းကန်နေရသည့်အလားပင်။ သူ၏ မျက်နှာသည် သွေးဖြင့် ဖုံးလွှမ်းသွားပြီး သူ၏ ကိုယ်တွင်းအင်္ဂါများသည် ပရမ်းပတာ လှုပ်ခတ်သွားကြသည်။ ဤအခိုက်အတန့်မှာ သူက ခေါင်းမော့ရုံသာ တတ်စွမ်းပြီး အပေါ်မှ နန်းတော်ကို ကြည့်လိုက်သည်။

နန်းတော်၏ အလယ်တွင် ထိုင်နေသည့် အမူအရာကင်းမဲ့ပြီး ဩဇာကြီးမားသော လူသားဧကရာဇ်ကို မသဲမကွဲ သူမြင်လိုက်ဟန် ရသည်။

“ အဲ့ဒါကို ငါမလုပ်ခဲ့ဘူး ”

နင်ယန်၏ အက်ရှရှအသံသည် အင်မော်တယ်လက်ခံဧရိယာထဲမှာ ပဲ့တင်ထပ်သွားပြီး လူတိုင်း၏ နားထဲသို့ ဝင်ရောက်သွားသည်။ ထို့နောက် သူက သတိမေ့သွားပြီး သူ၏ ခန္ဓာကိုယ်က လဲပြိုကျသွားသည်။

ရွှီချင်းသည် သူ့ကို ထောက်ပံ့ပေးလိုက်ပြီး မြေပြင်ပေါ်မှာ ညင်သာစွာ ချပေးလိုက်သည်။ ယနေ့ကိစ္စတွင် သူ၏ နှလုံးသားသည် လှုပ်ခတ်သွားသည်။ သက်သေအားလုံးက နင်ယန်ကို ညွှန်ပြနေသော်လည်း ဤကိစ္စကို သူမလုပ်ခဲ့ကြောင်း ရွှီချင်း ယုံကြည်သည်။

သူ့မှာ ထိုသို့လုပ်ဆောင်နိုင်သော စွမ်းရည်မရှိသလို ထိုသို့လုပ်ဆောင်ရမည့် အကြောင်းအရင်းလည်း မရှိပေ။

လူသားဧကရာဇ်က ထိုအချက်ကို မမြင်သည်မှာ မဖြစ်နိုင်ပေ။ သို့သော်လည်း သူက ယခုကဲ့သို့ လုပ်ဆောင်ခဲ့သည်။

သို့သော်လည်း ရွှီချင်း၏ အတိတ်တုန်းက အတွေ့အကြုံများကြောင့် ကိစ္စများကို အပေါ်ယံမျှသာ သူမကြည့်နိုင်ပေ။

အထူးသဖြင့် လူသားဧကရာဇ်ကဲ့သို့ တစ်စုံတစ်ယောက်၏ လုပ်ဆောင်မှုများကို ဖြစ်သည်။

ရွှီချင်းသည် လေးနက်စွာ တွေးတောလိုက်သည်။ ဘုရင်ထျန်းလန်သေဆုံးပြီးနောက် လူသားဧကရာဇ်က နင်ယန်အား ပေးခဲ့သော အင်ပါယာအမိန့်တော်ကို သူပြန်သတိရသွားသည်။ ယင်းက ပြင်းထန်သည်ဟု ထင်ရသော်လည်း ထိုနောက်ကွယ်တွင် လေးနက်သော အဓိပ္ပာယ်ပါရှိသည်။ ထို့ပြင် လူသားဧကရာဇ်က အမိန့်တော်ထဲမှာ ‘ အသုံးမကျတဲ့သားနဲ့ စည်းကမ်းမဲ့တဲ့သား ’ဟု ရှင်းလင်းစွာ ဖော်ပြထားသည်။

‘ အဲ့ဒါက နင်ယန်အပေါ် လူသားဧကရာဇ်ရဲ့ ကာကွယ်ပေးမှုပုံစံတစ်မျိုး ဖြစ်နေမလား ’

ထို့နောက် ရွှီချင်းသည် သူ့ဆရာပြောဖူးသည့် ပြဿနာဖြေရှင်းပုံကို ပြန်အမှတ်ရသွားသည်။ ထို့ကြောင့် သူက သူ့ကိုယ်သူ လူသားဧကရာဇ်နေရာမှာ ဝင်ရောက်စေပြီး တစ်ဖက်လူ၏ ရှုထောင့်မှတဆင့် အလုံးစုံအခြေအနေကို ကြည့်လိုက်သည်။

‘ တကယ်လို့ ငါသာ လူသားဧကရာဇ်ဖြစ်ပြီး သက်သေအားလုံးက ငါ့သားကို ညွှန်ပြနေတယ်ဆိုရင် ငါဘာလုပ်မလဲ… ’

‘ လူသားဧကရာဇ်က လူသားတစ်ယောက်ရဲ့ ဖခင်မဟုတ်သလို သာမန်ဖခင်တစ်ယောက် မဟုတ်ဘူး… သူက လူသားမျိုးနွယ်တစ်ခုလုံးရဲ့ ဧကရာဇ်ဖြစ်တယ်… ’

‘ ပြီးတော့ နောက်တစ်ချက် ရှိသေးတယ်… တရားဝန်ကြီးချုပ် နန်းတော်ထဲကနေ ထွက်လာတဲ့အချိန်ပဲ… အဲ့ဒီအချိန်က နေထွက်လာပြီး အင်မော်တယ်အမှန်တရားခေါင်းလောင်း ထွက်ပေါ်လာမယ့်အချိန်နဲ့ အံကိုက်ဖြစ်နေတယ် ’

‘ သူက နင်ယန်ကို ခေါင်းလောင်းတီးဖို့ အခွင့်အရေးတစ်ခု ပေးချင်တာလား… ပြီးတော့ လူသားဧကရာဇ်ရဲ့ စကားက နင်ယန်ရဲ့ ဆုံးဖြတ်ချက်ပြတ်သားမှုကို လှုံ့ဆော်ပေးချင်တာလား ’

‘ ဒါပေါ့… နောက်ထပ် ဖြစ်နိုင်ခြေတစ်ခု ရှိသေးတယ်… လူသားဧကရာဇ်ရဲ့ မျက်လုံးထဲမှာ နင်ယန်က တကယ်အသုံးမကျဘူး… ပြီးတော့ သဲလွန်စအားလုံးက နင်ယန်ကို ညွှန်ပြနေတယ်… သူ့ရဲ့ အမြင်မှာ နင်ယန်က တကယ်ပဲ အမှားမလုပ်ခဲ့ဘူးဆိုရင်တောင် အပြစ်ဒဏ်ပေးခံရတာကနေ လွတ်မြောက်နိုင်မှာ မဟုတ်ဘူး… သူနဲ့ သူ့ဘေးပတ်ဝန်းကျင်က လူတွေလည်းပဲ သံသယဝင်ခံရနိုင်တယ်… ဒါကြောင့် ငါက နန်းတော်ဆီ ဆင့်ခေါ်ခံရတာ ဖြစ်နိုင်တယ် ’

‘ ဒီဟာက အကုန်မဟုတ်သေးတာ ဖြစ်နိုင်တယ်… ငါစဉ်းစားလို့မရတဲ့ နောက်ထပ်ဖြစ်နိုင်ခြေတစ်ခု ရှိနေနိုင်တယ် ’

ရွှီချင်းသည် နက်နဲစွာ တွေးတောလိုက်သည်။ လူသားဧကရာဇ်၏ အတွေးများကို သူမခန့်မှန်းနိုင်ပေ။

ဤအခိုက်အတန့်မှာ လေထဲ၌ ရစ်ဝဲနေသော ခေါင်းလောင်းမြည်သံသည် ဖြည်းညင်းစွာ လွင့်ပြယ်သွားသည်။ တရားဝန်ကြီးချုပ်သည် တော်ဝင်နန်းတော်ဆီသို့ မျက်နှာမူထားပြီး ခေါင်းငုံ့ထားလျက် အမိန့်တော်ကို စောင့်ဆိုင်းသည်။ မကြာမီ ခံစားချက်ကင်းမဲ့သော အသံသည် တော်ဝင်နန်းတော်ထဲမှ ပဲ့တင်ထပ်လာသည်။

‘ ဖန်တီးခြင်းနန်းတော်က လူတွေနဲ့ တခြားလူတွေက အနက်ရောင်မြေအောက်လှိုင်ဂူထဲမှာ အကျဉ်းချခံရမယ် ”

“ ကူယွဲ့ပိုင်ရွှမ်နဲ့ ကူယွဲ့နင်ယန်က တော်ဝင်နန်းတော်ရဲ့ ကောင်းကင်အကျဉ်းထောင်ထဲမှာ အချုပ်ကျခံရမယ် ”

“ နန်းမြို့တော်ကို ဆက်လက် ချိပ်ပိတ်ထားပြီး စည်းချအစီအရင်တွေကနေတဆင့် စောင့်ကြည့်စစ်ဆေးမယ်… တည်နေရာပြောင်းရွှေ့ခြင်း အစီအရင်အားလုံးကို ဆက်လက် ပိတ်ထားမယ်… စုံစမ်းစစ်ဆေးခြင်းကို ဒီညကနေ စတင်မယ်… အထက်ရွှမ်နန်းတော်ငါးခုက ဒီကိစ္စမှာ သီးသန့်စုံစမ်းစစ်ဆေးပြီး ရလဒ်ကို ငါ့ကို တင်ပြမယ်… ပျောက်သွားတဲ့ အာရုဏ်ဦးနေမင်းကို နာရီနှစ်ဆယ်အတွင်း တွေ့အောင်ရှာပါ ”

အနက်ရောင်မြေအောက်လှိုင်ဂူသည် နန်းတော်၏ အပြင်ဘက်မှာ တည်ရှိပြီး ဓားကိုင်နန်းတော်၏ စောင့်ကြပ်ခံထားရသည်။ အပြစ်ကြီးမားသော ရာဇဝတ်သားများကိုသာ ထိုနေရာတွင် ချုပ်နှောင်ကြသည်။ ဤနှစ်များတွင် လူသားမျိုးနွယ်ကို ထိခိုက်ပျက်စီးစေရန် ဆန္ဒရှိကြသော ရာဇဝတ်သားအားလုံးကို ထိုမြေအောက်လှိုင်ဂူထဲမှာ ချုပ်နှောင်ခဲ့ကြသည်။

နန်းတော်ထဲမှ ကောင်းကင်အကျဉ်းထောင်သည်တော့ မြေအောက်လှိုင်ဂူထက် ပိုပြီးထူးခြားသည်။ အဘယ့်ကြောင့်ဆိုသော် ယင်းက တော်ဝင်မိသားစုဝင်များအတွက် အကျဉ်းထောင်ဖြစ်သည်။

လူသားဧကရာဇ်၏ တော်ဝင်အမိန့်တော် ထွက်ပေါ်လာသည်နှင့်ချက်ချင်း မိုးခြိမ်းသံသည် ကောင်းကင်ယံမှာ မြည်ဟိန်းသွားသည်။ အင်မော်တယ်လက်ခံဧရိယာထဲမှ အစောင့်အကြပ်များသည် အရှေ့သို့ လျှောက်လာကြပြီး နင်ယန်အပါအဝင် လူတိုင်းကို အဝေးသို့ ခေါ်ဆောင်သွားကြသည်။

ရွှီချင်းသည် သူတို့ကို မတားဆီးပေ။ ထိုသို့လုပ်ဆောင်ရန် သူ့မှာ အကြောင်းမရှိပေ။

အဝေးသို့ ခေါ်ဆောင်သွားခြင်းခံရသော နင်ယန်၏ ပုံရိပ်ကို ကြည့်နေရင်း လူသားဧကရာဇ်၏ အမိန့်တော်ကို သူသုံးသပ်လိုက်သည်။ အဆိုးဘက်မှ ကြည့်မည်ဆိုလျှင် ယင်းက နင်ယန်အတွက် သေခြင်းရှင်ခြင်းကပ်ဘေး ဖြစ်သည်။

သို့သော်လည်း အကောင်းဘက်မှ ကြည့်မည်ဆိုလျှင် ယင်းက ကာကွယ်ပေးမှုပုံစံတစ်မျိုး ဖြစ်သည်။

လူတိုင်းကို အကျဉ်းထောင်ဆီသို့ ပို့ဆောင်ပြီးနောက် အဓိကခန်းမအရှေ့မှ တရားဝန်ကြီးချုပ်သည် ရုတ်တရက် ပြောသည်။

“ ဒေသအရှင်သခင်ရွှီ… အရှင်မင်းကြီးက မင်းကို ခန်းမထဲ ဝင်ရောက်ဖို့ ဆင့်ခေါ်လိုက်ပါတယ် ”

ရွှီချင်း၏ အမူအရာသည် တည်ငြိမ်သည်။ သူက အရှေ့သို့ တစ်လှမ်းချင်း လျှောက်သွားသည်။ သူက တရားဝန်ကြီးချုပ်၏ အရှေ့သို့ ရောက်ရှိသွားသည့်အခါ လက်သီးဆုပ်လိုက်သည်။

တရားဝန်ကြီးချုပ်သည် ခေါင်းညိတ်ပြပြီးနောက် အနောက်သို့လှည့်ကာ အရှေ့ဆုံးမှ ဦးဆောင်သွားသည်။ သူတို့နှစ်ယောက်က အဓိကခန်းမထဲသို့ ခြေချလိုက်သည့်အခါ ခန်းမထဲမှာ နဂိုရှိနေကြသော လူများသည် တစ်ယောက်ပြီးတစ်ယောက် အနောက်ဆုတ်သွားကြသည်။ တရားဝန်ကြီးချုပ်သည်ပင် အနောက်ဆုတ်သွားပြီး နန်းတော်အပြင်ဘက်တွင် သူ၏ လက်ကို ဝှေ့ယမ်းလိုက်ကာ တံခါးပိတ်လိုက်သည်။

ရွှီချင်းနှင့် လူသားဧကရာဇ်သည်သာ ခန်းမတစ်ခုလုံးတွင် ကျန်ရှိနေတော့သည်။

ရွှီချင်းသည် ခေါင်းမော့လိုက်သည်။ သူက လူသားဧကရာဇ်ကို မကြည့်ခင် အရင်ဦးညွတ်လိုက်သည်။

“ အရှင်မင်းကြီးကို နှုတ်ဆက်ပါတယ် ”

ခန်းမ၏ နဝမအလွှာပေါ်တွင် ထိုင်နေသော လူသားဧကရာဇ်သည် ဟင်းလင်းပြင်ကို ဖရိုဖရဲဖြစ်စေနိုင်သော ဖိအားကို ထုတ်လွှတ်နေသည်။ ယင်းက သူ၏ ဘေးပတ်ဝန်းကျင်မှ အရာအားလုံးကို ဝေဝါးသွားစေသည်။ သရဖူ၏ ပန်းဖွားများအနောက်မှ သူ၏ မျက်လုံးသည်သာ ကြည်လင်တောက်ပသည်။

သူ၏ အကြည့်ထဲမှာ အေးစက်မှုနှင့် ထက်ရှမှုတို့ ရှိသည်။ ဤသည်မှာ သူ၏ အကြည့်အောက်တွင် တစ်စုံတစ်ယောက်က နှင်းတောထဲသို့ ရောက်ရှိသွားသည့်အလား ခံစားရလိမ့်မည်။

“ ရွှီချင်း… မင်းရဲ့ လျှို့ဝှက်ရတနာသိုက်ထဲက ဧကရာဇ်ဓားကို ဆင့်ခေါ်ပြီး အဲ့ဒါကို ငါ့ကို သတ်ဖို့ ပြောပါ ”

လူသားဧကရာဇ်၏ အသံသည် ခန်းမထဲမှာ ပဲ့တင်ထပ်သွားသည်။ အသံသည် ချက်ချင်း မပျောက်ကွယ်သွားဘဲ ခန်းမထဲမှာ အချိန်အတန်ကြာအောင် ရစ်ဝဲနေခဲ့သည်။

ရွှီချင်းသည် မျက်လုံးမှေးကျဉ်းလိုက်သည်။ လူသားဧကရာဇ်က သူ့ကို ပထမဆုံးပြောသည့်စကားက ထိုသို့ဖြစ်လိမ့်မည်ဟု သူမမျှော်လင့်ထားပေ။ သူက လူသားဧကရာဇ်၏ မျက်လုံးကို ကြည့်လိုက်သည်။

အချိန်အတော်ကြာပြီးနောက် သူက လျှို့ဝှက်ရတနာသိုက်ထဲမှ ဧကရာဇ်ဓားကို ဆင့်ခေါ်လိုက်သည်။ ဓားသည် မလှုပ်ရှားပေ။

လူသားဧကရာဇ်သည်လည်း မလှုပ်မယှက် ထိုင်နေဆဲပင်။ သူ၏ ခန္ဓာကိုယ်ပေါ်မှ အရှိန်အဝါနှင့် အားလှိုင်းအတတ်အကျသည် ယခင်ကနှင့် အတူတူပင်။ သူ၏ မျက်လုံးထဲမှ အကြည့်သည်လည်း မပြောင်းလဲသွားပေ။ သူက တည်ငြိမ်စွာ ပြောသည်။

“ ဧကရာဇ်ဓားက ဘာလို့ မလှုပ်ရှားလဲ မင်းသိလား ”

ရွှီချင်းက ခေါင်းခါလိုက်သည်။

“ ဘာလို့လဲဆိုတော့ ငါက လူသားမျိုးနွယ်ရဲ့ အကျိုးစီးပွား ပျက်စီးအောင်နဲ့ မဟာဧကရာဇ်ကို စိတ်ပျက်အောင် မလုပ်ဆောင်လို့ပဲ… ငါက မင်းရဲ့ ရန်သူမဟုတ်ဘူး ”

လူသားဧကရာဇ်၏ အသံသည် ခန်းမထဲမှာ ပဲ့တင်ထပ်သွားသည်။

ထိုသို့ပြောပြီးနောက် လူသားဧကရာဇ်သည် မျက်လုံးမှိတ်လိုက်ပြီး စကားပြောခြင်းကို အဆုံးသတ်လိုက်သည်။

အချိန်အတော်ကြာပြီးနောက် ရွှီချင်းသည် လူသားဧကရာဇ်ကို အရိုအသေပေးလိုက်ပြီး ခန်းမ၏ တံခါးဆီသို့ လျှောက်သွားသည်။ သူက ခန်းမတံခါးကို တွန်းဖွင့်တော့မည့်အချိန် လူသားဧကရာဇ်၏ နောက်ဆုံးစကားက သူ့အနောက်မှ ပျံ့လွင့်လာသည်။

“ နင်ယန်က မင်းကို ရွေးချယ်ခဲ့မှတော့ သူ့ရဲ့ အနာဂတ်မှာ မင်းလက်ထဲမှာဖြစ်သွားပြီ ”

ခန်းမတံခါးသည် ပွင့်သွားသည်။

ရွှီချင်းသည် နေရာမှာ အသက်ရှူချိန်အနည်းငယ်ကြာ ရပ်တန့်သွားသည်။ ထို့နောက် သူက ခေါင်းညိတ်လိုက်ပြီး ခန်းမအပြင်သို့ ထွက်လျှောက်သွားသည်။ သူက အင်မော်တယ်လက်ခံဧရိယာကို ဖြတ်ကျော်သွားပြီး နန်းတော်၏ အပြင်ဘက်သို့ ရောက်ရှိသွားသည်။ သူက ရွှေရောင်သံချပ်ကာဝတ် လူ့ဘီလူးကြီး၏ အောက်မှာ ရပ်နေရင်း ခေါင်းလှည့်လိုက်ပြီး အဝေးမှ နန်းတော်ကို ကြည့်လိုက်သည်။

‘ လူသားဧကရာဇ်က ဘယ်လိုလူမျိုးလဲ ’

ထိုမေးခွန်းအတွက် သူ့မှာ အဖြေမရှိပေ။

ရွှီချင်းသည် အကြည့်ပြန်ရုပ်လိုက်ပြီး အဝေးမှ မုန်တိုင်းထဲသို့ လျှောက်သွားသည်။

သူက စံအိမ်ဆီသို့ မပြန်သွားပေ။ ယင်းအစား သူက ဓားကိုင်နန်းတော်ဆီသို့ သွားခဲ့ပြီး အာရုဏ်ဦးနေမင်း အခိုးခံရမှုကိစ္စအပေါ် စုံစမ်းစစ်ဆေးရာတွင် ပူးပေါင်းပါဝင်ခဲ့သည်။

ဓားကိုင်နန်းတော်သည် ရွှီချင်း၏ ရောက်ရှိလာမှုကို ကြိုဆိုခဲ့သည်။ သူတို့၏ စုံစမ်းစစ်ဆေးမှုသည် မြန်ဆန်စွာ စတင်ခဲ့သည်။ သူတို့၏ ပထမဆုံး ဦးတည်ရာသည် နန်းမြို့တော်ထဲမှ တော်ဝင်ဂူဗိမာန်ဖြစ်သည်။

တော်ဝင်ဂူဗိမာန်နှင့် ဘိုးဘေးဂူဗိမာန်သည် အဓိပ္ပာယ်မတူညီပေ။

ဘိုးဘေးဂူဗိမာန်သည် ကွယ်လွန်သွားကြသော ဧကရာဇ်များအတွက် သီးသန့်သင်္ချိုင်းဖြစ်ပြီး တော်ဝင်ဂူဗိမာန်သည် ကွယ်လွန်သွားကြသော တော်ဝင်မိသားစုဝင်များအတွက် သင်္ချိုင်းဖြစ်သည်။

ဓားကိုင်နန်းတော်သည် တော်ဝင်ဂူဗိမာန်ထဲတွင် အုတ်ဂူတစ်ခုကို ရှာဖွေခဲ့ကြသည်။

ယင်းက နင်ယန်၏ အမွှာအကို မင်းသားဆယ့်တစ်၏ အုတ်ဂူဖြစ်သည်။

အချိန်နောက်ပြန်ဆုတ်ပြီးနောက် ထွက်ပေါ်လာသော ပုံရိပ်နှင့် အရှိန်အဝါက တစ်ခုတည်းသော သဲလွန်စဖြစ်ပြီး နင်ယန်ကလည်း သူအပြစ်မရှိကြောင်းကို အင်မော်တယ်အမှန်တရားခေါင်းလောင်းဖြင့် သက်သေပြခဲ့သောကြောင့် ဖြစ်နိုင်ခြေသည် နောက်တစ်ခု ထပ်တိုးလာသည်။

ယင်းမှာ နင်ယန်နှင့် ရုပ်ချင်းဆင်တူပြီး အရှိန်အဝါလည်း တူညီသော တစ်စုံတစ်ယောက်က ဖန်တီးခြင်းနန်းတော်ထဲမှာ ထွက်ပေါ်လာခြင်း ဖြစ်သည်။

တစ်စုံတစ်ယောက်၏ အသွင်အပြင်နှင့် အရှိန်အဝါကို မန္တန်များဖြင့် ပြောင်းလဲခြင်းသည်တော့ ထိုသို့ကိစ္စမျိုးသည် သေမျိုးလောကမှာသာ အလုပ်ဖြစ်လိမ့်မည်။ ဝမ်ကူးကုန်းမြေထဲတွင် တစ်စုံတစ်ယောက်၏ ကျင့်ကြံခြင်းအဆင့်က ကောင်းကင်သို့ရောက်သည်အထိ မမြင့်မားသရွေ့ ကောင်းကင်ဘုရင်များ၊ စည်းချအစီအရင်များနှင့် လျှို့ဝှက်အတတ်ပညာများ၏ အရှေ့မှာ ကိုယ့်ကိုယ်ကို ရုပ်ဖျက်ထားရန် မဖြစ်နိုင်ပေ။

ထို့ပြင် လူသားဧကရာဇ်က ဖြစ်စဉ်တစ်ခုလုံးကို စစ်ဆေးစောင့်ကြည့်နေသည်။

ထို့ကြောင့် နင်ယန်၏ အမွှာအကိုသည် စုံစမ်းစစ်ဆေးရန် ပထမဆုံး ပစ်မှတ်ဖြစ်သည်။ မင်းသားဆယ့်တစ် အမှန်တကယ် သေသွားခြင်းဟုတ်မဟုတ် သူတို့က အတည်ပြုရမည်။

ဤသည်မှာ အမှုဟောင်းဖြစ်သော်လည်း ယခု ပြန်လည်ဖော်ထုတ်ခံလာရသည်။

ရလဒ်သည် မြန်ဆန်စွာ ထွက်ပေါ်လာသည်။ နည်းလမ်းများစွာကို အသုံးပြုပြီးနောက် မင်းသားဆယ့်တစ်သည် အမှန်တကယ် သေဆုံးသွားပြီး အုတ်ဂူထဲမှာ မြှုပ်နှံခံထားရကြောင်း အတည်ပြုနိုင်ခဲ့သည်။

ဓားကိုင်နန်းတော်ထဲတွင် ဤကိစ္စကို စုံစမ်းစစ်ဆေးနေကြသည့် လူများထဲမှ တစ်စုံတစ်ယောက်သည် မင်းသားဆယ့်တစ်၏ သေဆုံးမှုအကြောင်းကို ပြန်လည်စုံစမ်းစစ်ဆေးရန် အကြံပြုခဲ့သည်။ မင်းသားဆယ့်တစ်၏ သေဆုံးမှုက ဤအမှုနှင့်ပတ်သက်ပြီး သဲလွန်စတချို့ကို ထောက်ပံ့ပေးနိုင်လိမ့်မည်ဟု သူတို့ခံစားမိကြသည်။

သို့သော်လည်း ထိုအကြံကို လက်ရှိဓားကိုင်နန်းတော်သခင်က တားဆီးခဲ့သည်။

ဓားကိုင်နန်းတော်သခင်က အဓိပ္ပာယ်ရှိစွာ ပြောသည်။

“ ဒီကိစ္စက တော်ဝင်မိသားစုရဲ့ လျှို့ဝှက်ချက်တွေနဲ့ ပတ်သက်နေတယ်… အဲ့ဒါက လက်ရှိအမှုနဲ့ ဘာမှမပတ်သက်ဘူး… ဒါကြောင့် အင်ပါယာအမိန့်တော်မဟုတ်ဘဲနဲ့ အဲ့ဒီဟာကို ငါတို့သွားမထိသင့်ဘူး ”

ရွှီချင်းသည်လည်း ထိုလူများထဲမှာ ရှိနေခဲ့သည်။ သူက မင်းသားဆယ့်တစ်၏ အုတ်ဂူကို မြင်သွားသောအခါ နင်ယန်ပြောခဲ့ဖူးသော စကားများကို ပြန်အမှတ်ရသွားသည်။ သူ၏ မယ်တော်နှင့် အကိုတော်သည် တစ်နေ့တည်းမှာ အတူတကွ သေဆုံးသွားခဲ့ကြသည်။

သို့သော်လည်း ထိုကိစ္စမှာ တော်ဝင်မိသားစု၏ လျှို့ဝှက်ချက်များ ပါဝင်နေသည်။ ထို့ကြောင့် ယင်းကို ဆက်လက် စုံစမ်းစစ်ဆေးရန် ခက်ခဲသည်။ ထို့ကြောင့် သဲလွန်စများသည် နှောင့်ယှက်ခံလိုက်ရသည်။

သို့သော်လည်း တခြားဦးတည်ရာဘက်မှ သဲလွန်စများ ရှိသေးပေသည်။ ထို့ကြောင့် ဓားကိုင်နန်းတော်၏ အာရုံစိုက်မှုသည် ဖန်တီးခြင်းနန်းတော်နှင့် နဝမမင်းသားဘက်သို့ ရောက်ရှိသွားသည်။ ဓားကိုင်နန်းတော်သခင်သည် ကောင်းကင်အကျဉ်းထောင်သို့ ကိုယ်တိုင် သွားရောက်ခဲ့ပြီး နဝမမင်းသားကို စစ်ဆေးမေးမြန်းခဲ့သည်။

တစ်ချိန်တည်းမှာ တခြားနန်းတော်များသည်လည်း ကိုယ်စီနည်းလမ်းများဖြင့် စုံစမ်းကြသည်။ သူတို့၏ စုံစမ်းစစ်ဆေးသော ဦးတည်ရာများသည် မတူညီကြချေ။ အဆုံးမှာတော့ စုံစမ်းစစ်ဆေးမှုရလဒ်များကို အကဲဖြတ်ရန် လူသားဧကရာဇ်ထံသို့ တင်ပြကြသည်။

ဤချဉ်းကပ်မှုသည် အကျိုးသက်ရောက်မှု နည်းပါးသော်လည်း အများကြီး ကွဲပြားခြားနားခြင်း မရှိပေ။ အရေးကြီးဆုံးမှာ ဤစုံစမ်းစစ်ဆေးသော နည်းလမ်းသည် ဘက်လိုက်ခြင်းကို ရှောင်ရှားနိုင်ပြီး အစီအစဉ်ကို ကမောက်ကမာဖြစ်စေမည့် အခြေအနေများအား ရှင်းထုတ်ပစ်နိုင်သည်။ ထိုသို့ဖြင့် အရာအားလုံးကို အသေးစိတ် စုံစမ်းစစ်ဆေးနိုင်လိမ့်မည်။

အချိန်သည် နှေးကွေးစွာ စီးဆင်းသွားပြီး ဆယ်နာရီကုန်လွန်သွားသည်။

ထိုဆယ်နာရီအတွင်းမှာ နန်းမြို့တော်တစ်ခုလုံးကို ချိပ်ပိတ်ထားသည်။ ဧကရာဇ်၏ ကိုယ်ရံတော်အစောင့်အကြပ်များနှင့် အထက်ရွှမ်နန်းတော်ငါးခု၏ အဖွဲ့ဝင်အားလုံးနီးပါးသည် နန်းမြို့တော်တစ်လျှောက် နေရာစုံမှာ စုံစမ်းစစ်ဆေးကြသည်။

နန်းတော်အသီးသီးထံမှ သဲလွန်စများသည် ဧကရာဇ်၏ လက်ထဲမှာ စုဝေးသွားသည်။

“ ဒုတိယမင်းသားက လွန်ခဲ့တဲ့သုံးလတုန်းက သူ့ရဲ့ တားမြစ်ဓမ္မရတနာကို အစွမ်းတိုးမြှင့်ချင်တဲ့အတွက် ဖန်တီးခြင်းနန်းတော်ဆီကနေ အာရုဏ်ဦးနေမင်းကို တောင်းဆိုခဲ့ပါတယ်… သူ့ရဲ့ တင်ပြမှုကို ဖန်တီးခြင်းနန်းတော်က အကြိမ်ကြိမ် ငြင်းပယ်ခဲ့တာကြောင့် သူ့ရဲ့ မကျေနပ်စိတ်က ကြီးထွားလာခဲ့ပါတယ်… စုံစမ်းစစ်ဆေးမှုအရတော့ သူ့ရဲ့ တားမြစ်ဓမ္မရတနာက အရင်ကထက် ပိုပြီးအစွမ်းထက်လာပါတယ် ”

“ မင်းသားကြီးက တာဝန်တစ်ခုကြောင့် မီးလျှံလရွှမ်ကောင်းကင်မျိုးနွယ်ဆီ မနေ့က အမြန်ခရီးထွက်သွားခဲ့ပါတယ်… မီးလျှံလရွှမ်ကောင်းကင်မျိုးနွယ်က အာရုဏ်ဦးနေမင်းကို လူသားမျိုးနွယ်ဆီကနေ အကြိမ်ကြိမ် တောင်းဆိုခဲ့ဖူးပါတယ်… အာရုဏ်ဦးနေမင်းပျောက်ဆုံးမှုနဲ့ မင်းသားကြီးရဲ့ ထွက်ခွာမှုက တိုက်ဆိုင်လွန်းပြီး သံသယဖြစ်ဖွယ်ကောင်းပါတယ် ”

“ ဒီလထဲမှာ သတ္တမမင်းသားရဲ့ စံအိမ်ထဲက အဖွဲ့သားတွေကို ဖန်တီးခြင်းနန်းတော်နားမှာ မကြာခဏ မြင်တွေ့ရပါတယ်… သူတို့က နယ်စပ်စောင့်ကြပ်ဖို့အတွက် ပထမကောင်းကင်ဘုရင်နဲ့ လိုက်ပါသွားခဲ့တဲ့ ပဉ္စမမင်းသားကို လျှို့ဝှက်ဆက်သွယ်မှုတွေ ပြုလုပ်ခဲ့ပါတယ်”

“ အာရုဏ်ဦးနေမင်းရဲ့ အရှိန်အဝါက မင်းသားတစ်ဆယ်ရဲ့ စံအိမ်ထဲမှာ တစ်ခါထွက်ပေါ်လာဖူးပါတယ် ”

“ လွန်ခဲ့တဲ့တစ်ပတ်က မျိုးနွယ်ခြားတစ်စုက အဌမမင်းသားရဲ့ စံအိမ်ဆီ ရောက်လာခဲ့ပြီး လျှို့ဝှက်တဲ့ ကုန်သွယ်မှုတစ်ခုကို ပြုလုပ်ခဲ့ပါတယ်… သူတို့ရဲ့ စကားထဲမှာ ဖန်တီးခြင်းနန်းတော်အကြောင်း ပါဝင်ခဲ့ပါတယ်… ဒါပေမဲ့ အသေးစိတ်ကိုတော့ မသိရပါဘူး ”

“ လွန်ခဲ့တဲ့ဆယ်ရက်က တတိယမင်းသားက ဖန်တီးခြင်းနန်းတော်ဆီ သွားရောက်ခဲ့ပြီး နဝမမင်းသားနဲ့ တစ်နာရီကြာအောင် သီးသန့်စကားပြောခဲ့ပါတယ် ”

ထိုသဲလွန်စများသည် သာမန်ဖြစ်ဟန် ထင်ရသော်လည်း ဂရုတစိုက် ကြည့်မည်ဆိုလျှင် အံ့ဩထိတ်လန့်ဖွယ်ကောင်းသည်။

ထိုသဲလွန်စများက လျှို့ဝှက်ကြံစည်မှုများ၏ တည်ရှိမှုကို ဖော်ပြနေသည်။

ယင်းက စုံစမ်းစစ်ဆေးမှုတွင် ပါဝင်ကြသော လူများကို နှလုံးတုန်သွားစေခဲ့သည်။ ထိုထဲမှာ ရွှီချင်းသည်လည်း ပါဝင်သည်။

စတုတ္ထမင်းသားနှင့် ကာမကိုသာ ပျော်မွေ့သော ဆဌမမင်းသားမှလွဲ၍ ကျန်မင်းသားအားလုံးသည် ဤကိစ္စထဲမှာ အနည်းနှင့်အများ ပါဝင်ပတ်သက်ကြသည်။ သူတို့သည် အတိုင်းအတာတစ်ခုထိ သံသယဝင်ခံကြရသည်။

ဤကိစ္စကို တိုက်ဆိုင်မှုတစ်ခုအဖြစ် မရှင်းပြနိုင်တော့ပေ။

“ နောက်ကွယ်က ဧရာမလက်တစ်စုံက ဒီစုံစမ်းစစ်ဆေးမှုကို အသုံးချပြီး မင်းသားတွေရဲ့ လျှို့ဝှက်ချက်တွေကို ထုတ်ဖော်လိုက်တာပဲ ”

ရွှီချင်းသည် နှုတ်ဆိတ်သွားသည်။ နန်းတော်ထဲတွင် ကျစ်လွီဆဲ့အိမ်ရှေ့စံမင်းသားအား ပထမဆုံးအကြိမ် သူမြင်တွေ့ခဲ့သော အချိန်ကို ပြန်စဉ်းစားလိုက်သည်။ အတွေးများစွာသည် သူ၏ စိတ်ထဲမှာ ထွက်ပေါ်လာသည်။

စစ်တုရင်ခုံ၏ သဘောတရားအရ အကယ်၍ တစ်ဖက်က လှုပ်ရှားမှုပြုလုပ်ပြီးလျှင် အခြားတစ်ဖက်က လှုပ်ရှားမှုပြုလုပ်လိမ့်မည်။

နန်းတော်အသီးသီးသည် တိတ်ဆိတ်ငြိမ်သက်သွားကြသည်။

နောက်ဆုံးမှာတော့ ဓားကိုင်နန်းတော်သခင်သည် ခေါင်းခါလိုက်သည်။

“ တစ်ယောက်ယောက်က ထီးနန်းအရိုက်အရာအတွက် လျှို့ဝှက်အားပြိုင်မှုကို အတင်းအကျပ် ထုတ်ဖော်လိုက်တာပဲ… သူတို့က ငါတို့ကို အသုံးပြုပြီး အိမ်ရှေ့စံမင်းသားနေရာကို မြန်မြန်ရွေးချယ်ဖို့အတွက် အရှင်မင်းကြီးကို တွန်းအားပေးချင်တာပဲ ”

“ မဟုတ်ရင်… ပိုပြီးကြီးမားတဲ့ လျှို့ဝှက်ချက်တွေက အချိန်မရွေး ထွက်ပေါ်လာနိုင်တယ် ”

“ ဘာဖြစ်လို့ မင်းသားဆယ့်နှစ်က အရှေ့ထွက်လာအောင် တွန်းအားပေးခံရလဲဆိုတော့ အဲ့ဒီလူက စူးစမ်းနေတာ ဖြစ်နိုင်တယ်… ဒါမှမဟုတ် အဲ့ဒါက ဟန့်တားမှုတစ်မျိုး ဖြစ်နိုင်တယ် ”

ထိုသို့ပြောပြီးနောက် ဓားကိုင်နန်းတော်သခင်၏ အကြည့်က ရွှီချင်းပေါ်သို့ ကျရောက်သွားသည်။

“ ရွှီချင်း… နင်ယန်ကို မင်းသွားတွေ့ကြည့်မယ်ဆိုရင် ဘယ်လိုလဲ ”