နတ်ဘုရားရဲ့ အရှေ့မှာ ဘယ်အရာမှ ဖုံးကွယ်လို့မရဘူး

ဈေးဆိုင်ပိုင်ရှင်၏ အသိစိတ်သည် ပရမ်းပတာ လှုပ်ခါသွားသည်။ ယခု ဖြစ်ပျက်သွားခဲ့သော မြင်ကွင်းက သူ၏ အသိစိတ်ကို လှိုင်းထသွားစေသည်။

အချိန်နောက်ပြန်ဆုတ်သည့် နည်းလမ်းများကို သူကြားဖူးသည်။ သို့သော်လည်း ထိုနည်းလမ်းက အတိတ်မှာ ဖြစ်ပျက်ခဲ့သော မြင်ကွင်းများကို ပြန်လည်ကြည့်ရှုရန်အတွက်သာ အသုံးပြုနိုင်သည်။ အချိန်ကို အမှန်တကယ် ပြောင်းလဲပစ်ရန် မလုပ်ဆောင်နိုင်ပေ။ ထို့ပြင် ထိုသို့နည်းလမ်းများကို ဗလာနတ္ထိအဆင့်ပညာရှင်ကျင့်ကြံသူများသာ စွမ်းဆောင်နိုင်ပေသည်။

သို့သော်လည်း ယခုတော့…

သူက ကိုယ့်ကိုယ်ကို သက်သေရန်အတွက် နည်းလမ်းအမျိုးမျိုးနှင့် အဆိပ်ကို အသုံးပြုခဲ့ကြောင်း ထင်ရှားပေသည်။ သူ၏ ခန္ဓာကိုယ်ပေါ်မှ အကန့်အသတ်စည်းများက ပေါက်ကွဲထွက်လာပြီး သူ၏ ဝိညာဉ်က လောင်ကျွမ်းသွားခဲ့သည်။ ယေဘုယျအားဖြင့်ဆိုရလျှင် သူက သေဆုံးသွားပြီဖြစ်ပြီး သူနှင့်ပတ်သက်သော မည်သည့်သဲလွန်စမှ ကျန်ရှိမနေသင့်ပေ။

သို့သော်လည်း ရွှီချင်းက လက်မြှောက်လိုက်သည့်အခါ အရာအားလုံး နောက်ပြန်ဆုတ်သွားသည်။ သူ၏ အချိန်ကာလသည် ပြောင်းလဲသွားပြီး လွန်ခဲ့သော အသက်ခုနစ်ခါရှူချိန်သို့ အမှန်တကယ် ပြန်ရောက်သွားသည်။

ဤကိစ္စသည် သူ၏ နှလုံးသားကို အပြင်းအထန် တုန်လှုပ်သွားစေသည်။ ရွှီချင်း၏ နောက်ကျောမှ ကြောက်မက်ဖွယ်ရာ ဧရာမပုံရိပ်သည်တော့ ၎င်းက သူ၏ ဝိညာဉ်ကို တုန်လှုပ်သွားစေသည်။ အမှန်မှာ သူ၏ မျက်လုံးသည်ပင် ထိုးဖောက်ခံနေရသော နာကျင်မှုကို ခံစားနေရသည်။

“ ဒါ ဘယ်လိုလုပ်ဖြစ်နိုင်မှာလဲ ”

ချောက်ချားမှုနှင့်အတူ ဈေးဆိုင်ပိုင်ရှင်သည် မြန်ဆန်စွာ အနောက်ဆုတ်သွားသည်။ သူက နောက်တစ်ကြိမ် သက်သေရန် ကြိုးစားလိုက်သည်။ သို့သော်လည်း ဤတစ်ကြိမ်တွင် အလွန်နောက်ကျသွားချေသည်။

ရွှီချင်းက အရှေ့သို့ ခြေတစ်လှမ်း တိုးလိုက်လေရာ ဈေးဆိုင်ပိုင်ရှင်၏ အရှေ့သို့ ချက်ချင်း ရောက်ရှိသွားသည်။ ထို့နောက် သူက ညာလက်ကို မြှောက်လိုက်ပြီး ဈေးဆိုင်ပိုင်ရှင်၏ မေးစေ့ကို ဖမ်းဆုပ်လိုက်သည်။ သူက အကြမ်းပတမ်း လှုပ်ခါလိုက်လေရာ ထိုလူ၏ ပါးစပ်ထဲမှ သွားများနှင့် ပြန်လည်ဖြစ်ပေါ်လာသော အဆိပ်ဆေးလုံးက အောက်သို့ ပြုတ်ကျသွားကြသည်။

ဈေးဆိုင်ပိုင်ရှင်၏ မျက်လုံးထဲမှာ ချောက်ချားမှုဖြင့် ပြည့်နှက်နေပြီး သူက ရုန်းကန်ရန် ကြိုးစားလိုက်သည်။

ဝိညာဉ်ချည်မျှင်များသည် ရွှီချင်း၏ ခန္ဓာကိုယ်ထဲမှ ချက်ချင်း တိုးထွက်လာကြသည်။ ယင်းတို့က ထက်ရှသော ဓားများအလား ထွန်းလင်းတောက်ပသော အလင်းရောင်နှင့်အတူ ဈေးဆိုင်ပိုင်ရှင်၏ ခန္ဓာကိုယ်ထဲသို့ တိုက်ရိုက် တိုးဝင်သွားကြသည်။ ယင်းတို့ ဖြတ်သန်းသွားနေရာတိုင်း အကန့်အသတ်စည်းအားလုံးကို ဆွေးမြေ့နေသော သစ်သားချောင်းများအလား ဖျက်ဆီးပစ်လိုက်ကြသည်။ သို့ဖြစ်၍ အကန့်အသတ်စည်းများသည် ပေါက်ကွဲထွက်မလာနိုင်တော့ပေ။

ခပ်အုပ်အုပ် ညည်းသံသည် ဈေးဆိုင်ပိုင်ရှင်၏ ပါးစပ်ထဲမှ ပျံ့လွင့်ထွက်လာသည်။ နောက်အခိုက်အတန့်မှာ သူ၏ ခန္ဓာကိုယ်ထဲမှ ဝိညာဉ်မျိုးစေ့သည် ချက်ချင်း နေရာပြောင်းရွှေ့သွားပြီး မီးတောက်ကို ဖိနှိပ်ရန် ဝိညာဉ်ဆီသို့ တန်းမတ်စွာ ဦးတည်သွားသည်။

ရွှီချင်းသည် တစ်ဖက်လူ၏ ကိုယ့်ကိုယ်ကို သက်သေမည့် နည်းလမ်းအားလုံးကို ကြိုတင်တားဆီးပစ်လိုက်သည်။ ထိုအရာအားလုံးက မျက်စိတစ်မှိတ်အတွင်းမှာ ဖြစ်ပျက်သွားခဲ့ခြင်း ဖြစ်သည်။ အစမှအဆုံးအထိ ရွှီချင်းက မည်သည့်စိတ်ခံစားချက်ကိုမှ မထုတ်ဖော်ပြခဲ့ပေ။

ဈေးဆိုင်ပိုင်ရှင်၏ မျက်လုံးထဲတွင် အရာအားလုံးသည် ထူးဆန်းပြီး မယုံကြည်နိုင်ဖွယ်ကောင်းလှသည်။ သို့သော်လည်း ရွှီချင်းက ထိုအရာအားလုံးကို လက်တစ်ဖက်မြှောက်၍ အလွယ်တကူ လုပ်ဆောင်သွားခဲ့ခြင်းသာ ဖြစ်သည်။

ယခု ရွှီချင်းသည် တစ်ဖက်လူ၏ နည်းလမ်းအားလုံးကို ဖိနှိပ်ပြီးသွားပြီ ဖြစ်သည်။ သူက တစ်ဖက်လူကို စစ်ဆေးမေးမြန်းရန် စိတ်မဝင်စားပေ။ တစ်ဖက်လူ၏ စောစောက ကိုယ့်ကိုယ်ကို သက်သေခဲ့သော လုပ်ရပ်ကို ကြည့်ခြင်းအားဖြင့် ထိုလူက သူ၏ မေးခွန်းများကို ပြန်ဖြေကြားလိမ့်မည် မဟုတ်ချေ။ သို့ဖြစ်၍ သူက စိတ်ထဲမှာ နည်းလမ်းတစ်ခုကို စဉ်းစားထားပြီးသား ဖြစ်သည်။

ထို့ကြောင့် သူက လုံးဝတုံ့ဆိုင်းမနေတော့ဘဲ ဘယ်လက်ကို မြှောက်လိုက်ပြီး ဈေးဆိုင်ပိုင်ရှင်၏ ဦးခေါင်းပေါ်သို့ ဖိချလိုက်သည်။ သူ၏ နတ်ဘုရားစိတ်အာရုံက တစ်ဖက်လူ၏ ဦးခေါင်းထဲသို့ ဝင်ရောက်သွားပြီး ဝိညာဉ်ရှာဖွေခြင်းကို စတင်လိုက်သည်။

ဝိညာဉ်ရှာဖွေခြင်းသည် ကျင့်ကြံခြင်းလောကတွင် အလွန်ရက်စက်ကြမ်းကြုတ်သော နည်းလမ်းတစ်ခု ဖြစ်သည်။ ယင်းက အဆင့်မြင့်ကျင့်ကြံသူက အဆင့်နိမ့်ကျင့်ကြံသူ၏ အသိစိတ်ကို အတင်းအဓမ္မ စစ်ဆေးရှာဖွေရာတွင် အသုံးပြုသော နည်းလမ်းဖြစ်သည်။ နောက်ဆက်တွဲအကျိုးဆက်သည် အမျိုးမျိုးကွဲပြားခြားနားသည်။ အသက်သာဆုံး အကျိုးဆက်သည် ပစ်မှတ်ထားခံရသူ၏ ဝိညာဉ်က မှေးမှိန်သွားလိမ့်မည်ဖြစ်ပြီး အဆိုးဝါးဆုံး အကျိုးဆက်သည် ပစ်မှတ်ထားခံရသူ၏ ဝိညာဉ်က ဖျက်ဆီးခံရလိမ့်မည်။

အကယ်၍ ဝိညာဉ်ရှာဖွေခြင်းကို အသုံးပြုသူက အသေးစိတ် သိရှိချင်သည်ဆိုလျှင် ဝိညာဉ်ရှာဖွေခြင်းကို စေ့စေ့စပ်စပ် အသုံးပြုရလိမ့်မည်။ ထိုသို့လုပ်ဆောင်နေစဉ်အတွင်း ဝိညာဉ်ကို အပိုင်းပိုင်းအစိတ်စိတ် ပိုင်းခြားပစ်ရန် လိုအပ်သည်။

ယခု ရွှီချင်းက ထိုသို့နည်းလမ်းကို အသုံးပြုနေခြင်း ဖြစ်သည်။

သူ၏ ရှာဖွေမှုအောက်မှာ ဈေးဆိုင်ပိုင်ရှင်၏ ဝိညာဉ်သည် ပြိုကွဲတော့မည့် လက္ခဏာများ ပြလာသည်။ သူ၏ ဝိညာဉ်ပေါ်တွင် အက်ကွဲရာများက ပိုမိုများပြားစွာ ထွက်ပေါ်လာကြပြီး နှလုံးကွဲကြေသော အော်ဟစ်သံသည် ဈေးဆိုင်ပိုင်ရှင်၏ ပါးစပ်ထဲမှ ထွက်ပေါ်လာသည်။

ယင်းက လူသားတစ်ဦး၏ အော်သံမဟုတ်ပေ။ ယင်းက အပြင်းအထန် နာကျင်ခံစားနေရသော သားရိုင်းတစ်ကောင်၏ ဆွဲဆွဲငင်ငင် အော်မြည်သံနှင့် ဆင်တူသည်။ အကယ်၍ သေမျိုးများသာ ယင်းကို ကြားသွားမည်ဆိုလျှင် သူတို့က သေချာပေါက် နေ့စဉ်ရက်ဆက် အိမ်မက်ဆိုးမက်သွားကြလိမ့်မည်။ ကျင့်ကြံသူများသည်ပင် ထိုအသံကို ကြားသည့်အခါ ကြက်သီးမွေးညင်းထသွားကြလိမ့်မည်။

သို့သော်လည်း ဤနေရာက မြို့တော်နှင့် ကီလိုမီတာငါးထောင် ကွာဝေးသော လေထဲမှာဖြစ်ပြီး မည်သူမှ မရှိနေသဖြင့် ထိုအသံ၏ အလှတရားသည် လေထဲမှာသာ ပျောက်ဆုံးသွားသည်။

ရွှီချင်းသည် ထိုလူ၏ ဝိညာဉ်ကို နည်းနည်းချင်းစီ ခွဲခြမ်းစိတ်ဖြာလိုက်ပြီး သူ၏ မှတ်ဉာဏ်အားလုံးကို စစ်ဆေးကြည့်လိုက်သည်။ တဖြည်းဖြည်း ဈေးဆိုင်ပိုင်ရှင်၏ ဤဘဝ မှတ်ဉာဏ်များက သူ၏ စိတ်ထဲမှာ ထွက်ပေါ်လာသည်။

တစ်ဖက်လူ၏ နောက်ခံ၊ သရုပ်နှင့် တခြားအရာများသည် တဖြည်းဖြည်း ရှင်းလင်းလာသည်။ ယင်းတို့က အလွန်များပြားပြီး ရှုပ်ထွေးသောကြောင့် ရွှီချင်းက အများကြီး အာရုံမစိုက်ခဲ့ပေ။ သူက ယင်းတို့ကို ဖယ်ရှားပစ်လိုက်ပြီး လွန်ခဲ့သော လဝက်တုန်းက အဖြစ်အပျက်များကိုသာ အထူးအာရုံစိုက်လိုက်သည်။

နောက်ဆုံးမှာတော့ သူလိုချင်သော မြင်ကွင်းကို ရှာတွေ့သွားသည်။

လွန်ခဲ့သော လဝက်တုန်းက လျှို့ဝှက်သော နေအိမ်တစ်ခုမှာ ဝတ်ရုံနက်အမျိုးသားတစ်ဦး၏ ပုံရိပ်နှင့် ထိုလူ၏ စကားများကို ရွှီချင်း မြင်တွေ့သွားသည်။

သို့သော်လည်း သူက သေချာဂရုတစိုက် စစ်ဆေးကြည့်တော့မည့်အချိန် ထိုမြင်ကွင်းသည် ပျောက်ကွယ်သွားသည်။ ဈေးဆိုင်ပိုင်ရှင်၏ ဝိညာဉ်သည် လုံးဝဖျက်ဆီးခံလိုက်ရပြီ ဖြစ်သည်။ သူ၏ အသက်မဲ့နေသော ခန္ဓာကိုယ်သည်သာ လေထဲမှာ လှုပ်ရှားမှုကင်းမဲ့စွာ ကျန်ရှိနေတော့သည်။

ရွှီချင်းသည် မျက်မှောင်ကြုတ်လိုက်သည်။

“ ဒီလူရဲ့ ဝိညာဉ်က အရမ်းအားနည်းတာပဲ… အဲ့ဒါက အားကောင်းတဲ့ ဝိညာဉ်ရှာဖွေတာကို မတောင့်ခံနိုင်ဘူး ”

ရွှီချင်းသည် အစောနက သူမြင်တွေ့ခဲ့သော မြင်ကွင်းများကို ပြန်စဉ်းစားလိုက်သည်။

“ အစောပိုင်းနှစ်တွေမှာ ဒီလူက ဇစ်မြစ်မသိတဲ့ အဖွဲ့အစည်းတစ်ခုကို ဝင်ရောက်ခဲ့တယ်… အဖွဲ့အစည်းက သူ့ကို ဘဝသစ်စတင်ဖို့ အခွင့်အရေးတစ်ခု ပေးတယ်… ဒါပေမဲ့ သူတို့က သူ့ရဲ့ ဘဝကို ကန့်သတ်ချုပ်နှောင်ထားတယ် ”

“ အသေးစိတ်ကတော့… ”

ရွှီချင်းသည် မျက်မှောင်ကြုတ်လိုက်ပြီး ထိုလူ၏ သိုလှောင်အိတ်ကို ထုတ်လိုက်သည်။ ထို့နောက် သိုလှောင်အိတ်ထဲမှ အနက်ရောင်အရိုးပြာအိုးကို ရှာဖွေလိုက်သည်။

သူ၏ နတ်ဘုရားစိတ်အာရုံကို အရိုးပြာအိုးထဲသို့ ပို့လွှတ်လိုက်သည့်အခါ ရွှီချင်း၏ မျက်နှာသည် ပိုပြီးအရုပ်ဆိုးသွားသည်။ အရိုးပြာအိုးထဲတွင် လူသားဝိညာဉ်သိန်းပေါင်းများစွာ ရှိသည်။

တစ်ခဏကြာ တိတ်ဆိတ်နေပြီးနောက် ရွှီချင်း၏ ခန္ဓာကိုယ်သည် တစ်ချက်ရွေ့လျားသွားပြီး နေရာမှ ပျောက်ကွယ်သွားသည်။ သူက ထိုလူ၏ မှတ်ဉာဏ်များထဲမှ တည်နေရာတချို့ဆီသို့ ဦးတည်သွားသည်။

တည်နေရာတိုင်းသည် တစ်ဖက်လူ သတ်မှတ်ထားခဲ့သော ရိတ်သိမ်းမည့်နေရာများ ဖြစ်ကြသည်။ သူ၏ ရဲဘော်ရဲဘက်တစ်ဦးက ထုတ်ဖော်ခံလိုက်ရပြီး အခြေအနေက ပိုပြီးတင်းကျပ်လာသောကြောင့် သူက ထိုရိတ်သိမ်းမည့်နေရာများကို လက်လျော့သွားခဲ့ခြင်း ဖြစ်သည်။

ရွှီချင်းသည် ထိုနေရာများသို့ ကိုယ်တိုင်သွားရောက်ပြီး တစ်ဖက်လူ၏ အစီအစဉ်များကို ဖျက်ဆီးပစ်ရန် စီစဉ်ထားသည်။ တစ်ချိန်တည်းမှာ သူက သက်သေများကို မှတ်တမ်းယူချင်သည်။

ထို့ကြောင့် သူက ဤနယ်မြေစက်ဝန်းထဲမှ ထွက်ခွာသွားသည်။

သူက ဈေးဆိုင်ပိုင်ရှင်၏ အလောင်းကိုလည်း ယူဆောင်ခဲ့သည်။ ယင်းက သက်သေတစ်ခု ဖြစ်သည်။

အချိန်သည် တရွေ့ရွေ့ ကုန်ဆုံးသွားသည်။

ငါးရက်ကြာပြီးနောက်…

တာအိုကောင်းကင်ဒေသကြီး၏ ပြည်နယ်ကိုးခုဒေသငယ်ထဲတွင်…

ထိုဒေသငယ်သည် တခြားဒေသကြီးများ၏ ပိုင်နက်အတွင်းသို့ ကျရောက်နေကြသော လူသားမျိုးနွယ်၏ ဒေသငယ်ခုနစ်ခုထဲမှ တစ်ခုဖြစ်သည်။ ယင်းက မဟာနန်းမြို့တော်ဒေသကြီးနှင့် သိပ်မဝေးပေ။ ထို့ကြောင့် ရွှီချင်းသည် ရှေးဟောင်းနေလုံးဖြင့် မြန်ဆန်စွာ ပျံသန်းပြီး တည်နေရာပြောင်းရွှေ့ခြင်းအစီအရင်များကို ဆက်တိုက် အသုံးပြုပြီးနောက် ငါးရက်အကြာမှာ ပြည်နယ်ကိုးခုဒေသငယ်သို့ ရောက်ရှိသွားသည်။

သူရောက်ရှိလာသည့်အခါ ညအချိန်သို့ ရောက်ရှိနေပြီ ဖြစ်သည်။

ရွှီချင်းသည် ယခင်က နန်းမြို့တော်ဆီသို့ သူ၏ ခရီးစဉ်တွင် ဤဒေသငယ်ကို ဖြတ်သန်းသွားခဲ့ဖူးသည်။ သို့သော်လည်း သူတို့အုပ်စုသည် ရှေးဟောင်းတည်နေရာပြောင်းရွှေ့ခြင်း အစီအရင်ဖြင့် မထွက်သွားခင် ဤနေရာမှာ အချိန်အကြာကြီး မနေထိုင်ခဲ့ကြပေ။

ယခု သူက ပြန်ရောက်ရှိလာပြီ ဖြစ်သည်။ သူ၏ နှလုံးသားထဲမှ သတ်ဖြတ်ခြင်း စိတ်ဆန္ဒသည် အတော်လေး ပြင်းထန်နေသည်။ သူက တည်နေရာပြောင်းရွှေ့ခြင်းအစီအရင်ထဲမှ ထွက်လျှောက်လာသည်နှင့်ချက်ချင်း သူ၏ ပုံရိပ်သည် ပျောက်ကွယ်သွားသည်။ သူက ဝိညာဉ်မျိုးစေ့၏ တည်နေရာကို ပစ်မှတ်ထားလိုက်ပြီး ထိုနေရာသို့ အရှိန်မြှင့်တင်လိုက်သည်။

လူသုံးယောက်ထဲတွင် တစ်ယောက်သည် ထျန်းဇောင်ဒေသအကြီးအကဲ၏ အသတ်ခံခဲ့ရသည်။ တခြားတစ်ယောက်သည် ရွှီချင်း၏ သတ်ဖြတ်ခံခဲ့ရပြီး နောက်ဆုံးတစ်ယောက်သည် ဤနေရာမှာ ရှိသည်။

အပြင်လူများအတွက်တော့ ထိုလူ၏ ပုန်းကွယ်နေသော နေရာကို ရှာဖွေရန် ခက်ခဲလိမ့်မည်။ သို့သော်လည်း ရွှီချင်း၏ မျက်လုံးထဲမှာတော့ သူ၏ ဝိညာဉ်မျိုးစေ့အခွဲကို စုပ်ယူထားခဲ့သော ပစ်မှတ်၏ သဲလွန်စများသည် အလွန်ရှင်းလင်းသည်။

သူက ကျောင်းတော်ကို ရှင်းလင်းပြီး နောက်ကွယ်မှ ကြိုးကိုင်သူကို ရှာဖွေချင်မှတော့ ယင်းတို့ကို လုံးဝရှင်းထုတ်ပစ်ရလိမ့်မည်။ တစ်ချိန်တည်းမှာ ယခင်က သူမြင်ခဲ့သော ဝတ်ရုံနက်အမျိုးသား၏ သရုပ်ကို အတည်ပြုရန် ဝိညာဉ်ရှာဖွေခြင်းကို သူအသုံးပြုရန် လိုအပ်သည်။

“ တစ်ဖက်လူရဲ့ ဝိညာဉ်မျိုးစေ့က နာရီအတော်ကြာအောင် မလှုပ်ရှားသေးဘူး ”

ညအချိန်တွင် ရွှီချင်း၏ ပုံရိပ်သည် ပြည်နယ်ကိုးခုဒေသငယ်ထဲမှာ တည်နေရာပြောင်းရွှေ့နေသည်။ တစ်နာရီကြာပြီးနောက် သူက တောင်တန်းဒေသတစ်ခုမှာ ထွက်ပေါ်လာသည်။

တောင်တန်းဒေသသည် မည်းမှောင်နေသည်။ ရံဖန်ရံခါ ကျေးငှက်များ၏ အသံနှင့် သားရဲများ၏ အော်သံကို ကြားရသည်။ သစ်ပင်များကို တိုက်ခတ်နေသော လေတိုးသံလည်း ရှိသေးသည်။

ထိုအသံများမှလွဲ၍ တောင်တန်းသည် လုံးဝတိတ်ဆိတ်နေသည်။

ရွှီချင်း၏ အကြည့်က ဘေးပတ်ဝန်းကျင်သို့ ဖြတ်သန်းသွားသည်။ ထို့နောက် သူက မြန်ဆန်စွာ ရွေ့လျားလိုက်သည့်အခါ သူ၏ ခန္ဓာကိုယ်က ဝေဝါးသွားသည်။

နောက်အခိုက်အတန့်မှာ သူ၏ ပုံရိပ်က ပြန်ထွက်ပေါ်လာသည့်အခါ တောင်တန်း၏ အနက်ပိုင်းထဲမှာ တည်ရှိနေသော သဘာဝလှိုင်ဂူ၏ အပြင်ဘက်သို့ ရောက်ရှိသွားသည်။

ရွှီချင်းသည် မျက်မှောင်ကြုတ်လိုက်သည်။ ဤသို့လမ်းတစ်လျှောက်တွင် တစ်စုံတစ်ခု လွဲမှားနေသည်ဟု အမြဲတမ်း သူခံစားမိခဲ့သည်။ လှိုင်ဂူ၏ အပြင်ဘက်မှာ သူရပ်နေစဉ် ထိုခံစားမှုသည် ပိုပြီးထင်ရှားလာသည်။ အေးစက်စက် အလင်းသည် ရွှီချင်း၏ မျက်လုံးထဲမှာ ထွက်ပေါ်လာသည်။ သူက ညာလက်ကို မြှောက်၍ ဝှေ့ယမ်းလိုက်သည်။ လှိုင်ဂူထဲမှာ ဖုံးကွယ်ခံထားရသော တားမြစ်စည်းများသည် သူထုတ်လွှတ်လိုက်သော ဒြပ်နှောများ၏ တိုက်စားမှုအောက်မှာ ၎င်းတို့၏ အကျိုးသက်ရောက်မှုကို ဆုံးရှုံးသွားကြသည်။

ထို့နောက် ရွှီချင်းက လှိုင်ဂူထဲမှာ ချက်ချင်း ထွက်ပေါ်လာသည်။

မြေပြင်ပေါ်တွင် အသက်ဝင်နေဆဲဖြစ်သော စည်းချအစီအရင်တစ်ခုရှိသည်။

လူတစ်ယောက်သည် ထိုစည်းချအစီအရင်ထဲမှာ ရှိသည်။

ထိုလူသည် သန်စွမ်းကြံ့ခိုင်သော သက်လတ်ပိုင်းအမျိုးသားတစ်ဦးဖြစ်သည်။ သို့သော်လည်း ယခု သူက လှုပ်ရှားမှုကင်းမဲ့နေသည်။

သူက ကိုယ်လုံးတီးဖြစ်နေပြီး သူ၏ ဝမ်းဗိုက်က တွန့်လိမ်နေသည်။ ရွှီချင်း၏ ဝိညာဉ်မျိုးစေ့သည် ထိုထဲမှာ ရှိသည်။

စည်းချအစီအရင်၏ အပြင်ဘက်တွင် ကျောက်စိမ်းပြားတစ်ခုက မြေပြင်ပေါ်မှာ ကျနေသည်။

ရွှီချင်းသည် စည်းချအစီအရင်ကို ကြည့်လိုက်သည်။ ထို့နောက် ကျောက်စိမ်းပြားကို ကြည့်လိုက်သည်။ သူ၏ နတ်ဘုရားစိတ်အာရုံကို ဖြန့်ကြက်လိုက်သည့်အခါ မည်သည့်အမှားအယွင်းမှ မရှိကြောင်း ရှာတွေ့သွားသည်။ ထို့နောက် သူက လက်မြှောက်လိုက်ပြီး ကျောက်စိမ်းပြားကို ဖမ်းဆုပ်လိုက်သည်။ သူက ကျောက်စိမ်းပြားကို စစ်ဆေးကြည့်လိုက်သည့်အခိုက် ရှေးဟောင်းအသံသည် ကျောက်စိမ်းပြားထဲမှ ပဲ့ထင်ထပ်လာသည်။

“ မင်းက ဘယ်သူပဲဖြစ်ပါစေ ဒီနေရာကို ရှာတွေ့နိုင်မှတော့ ငါနဲ့ ရည်ရွယ်ချက်တူတဲ့လူ ဖြစ်ရမယ်… မင်းက မူကွဲအင်မော်တယ်ကျောင်းတော်ရဲ့ တာအိုမျိုးစေ့ကိစ္စကို စုံစမ်းဖို့ ရောက်လာတာ မဟုတ်လား… အဖြေကို ငါမေးပြီးသွားပြီ ”

“ ဒီလူက ဝိညာဉ်ရှာဖွေတာကို မတောင့်ခံနိုင်လို့ ဝိညာဉ်ပြိုကွဲသွားတဲ့ အခြေအနေမှာ ရှိနေတယ်… ဒါပေမဲ့ ငါ့စည်းချအစီအရင်ရဲ့ ထောက်ပံ့ပေးမှုကြောင့် သူ့ရဲ့ ဝိညာဉ်က လုံးလုံးမပျောက်ကွယ်သေးဘူး… ဒါပေမဲ့ စည်းချအစီအရင်က အချိန်အကြာကြီး မထောက်ပံ့ပေးနိုင်ဘူး… ဒီကို ရောက်လာတဲ့ ဘယ်သူမဆို ကိုယ့်ဘာသာ စစ်မေးနိုင်တယ် ”

ရွှီချင်းသည် နှုတ်ဆိတ်သွားသည်။ အချိန်အတန်ကြာပြီးနောက် သူက တည်ငြိမ်စွာ ပြောသည်။

“ ကလေးအကွက်တွေ ”

“ အရိပ်လေး… နေရာအနှံ့ ဖြန့်ကြက်ပြီး အရာအားလုံးကို ချိပ်ပိတ်လိုက်ပါ… မင်း ဘယ်လိုနည်းလမ်းပဲသုံးသုံး ကိစ္စမရှိဘူး… ဒီနေရာမှာ ပုန်းအောင်းနေတဲ့ အဲ့ဒီလူကို တွေ့အောင်ရှာပါ ”

ရွှီချင်း၏ စကားဆုံးသွားသည်နှင့် သူ၏ ခြေဖဝါးအောက်မှ အရိပ်လေးသည် ချက်ချင်း ပေါ်ထွက်လာသည်။ ၎င်းက မျက်နှာချိုသွေးသော စိတ်ခံစားချက်ကို ထုတ်ဖော်ပြီးနောက် မြန်ဆန်စွာ ဖြန့်ကြက်သွားသည်။ ၎င်းက တောင်တန်းဒေသတစ်ခုလုံးကို ဖုံးလွှမ်းသွားပြီး အရှေ့သို့ ဆက်လက် ပျံ့ပွားသွားသည်။

အရိပ်လေး၏ နယ်နိမိတ်အတွင်းမှာရှိသော ငှက်များနှင့် သားရဲအားလုံးသည် တုန်ယင်သွားကြသည်။ ၎င်းတို့က အရိပ်လေး၏ ပူးကပ်ခံလိုက်ရပြီး ဤနေရာတစ်ခုလုံးကို စစ်ဆေးရှာဖွေလိုက်ကြသည်။

ရွှီချင်းသည် မြေပြင်ပေါ်မှ လူကို ကြည့်လိုက်သည်။ သူက ကျောက်စိမ်းပြားထဲမှ စကားကို မယုံကြည်ပေ။

သူက တခြားဖြစ်နိုင်ခြေကိုသာ ယုံကြည်သည်။ ဥပမာ သူရှာဖွေနေသော ထိုလူမှာ သူ၏ ဝိညာဉ်မျိုးစေ့ကို ထုတ်ယူပြီး တခြားလူများ၏ ခန္ဓာကိုယ်ထဲသို့ ထည့်သွင်းနိုင်သော လျှို့ဝှက်ဆန်းကြယ်သည့် နည်းလမ်းများ ရှိနေခြင်းဖြစ်သည်။ ထို့ကြောင့် သူက လွတ်မြောက်သွားခြင်း ဖြစ်နိုင်သည်။

ဤနည်းလမ်းသည် ရွှီချင်းကို ပစ်မှတ်ထားရန် မလိုအပ်ပေ။ မည်သို့ဖြစ်ပါစေ တစ်ဖက်လူသည် ရွှီချင်း၏ တည်ရှိမှုကို မသိထားပေ။ သို့ဆိုလျှင် ဤနည်းလမ်းသည် နန်းမြို့တော်မှ စုံစမ်းစစ်ဆေးသူများပေါ်မှာ ပစ်မှတ်ထားခြင်း ဖြစ်ရမည်။

သို့ဖြစ်၍ ထိုလူက ကိစ္စများကို ပိုပြီးရှုပ်ထွေးသွားအောင် ကျောက်စိမ်းပြားကို တမင်ချန်ထားခဲ့ခြင်း ဖြစ်နိုင်ပေသည်။

အဓိကအချက်မှာ တစ်ဖက်လူက ရွှီချင်းမသိဘဲ ဝိညာဉ်မျိုးစေ့ကို မည်သို့ထုတ်ယူသွားခဲ့သလဲ ဖြစ်သည်။ သို့သော်လည်း ဖြစ်နိုင်ခြေနောက်တစ်ခု ရှိသေးသည်။

ဤသည်မှာ အစမှအဆုံးထိ ဝိညာဉ်မျိုးစေ့က တစ်ခါမှ မထုတ်ယူခံရခြင်းလည်း ဖြစ်နိုင်သည်။ ဝိညာဉ်မျိုးစေ့က မထုတ်ယူခံရဘဲ ထုတ်ယူခံထားရသကဲ့သို့ အကျိုးသက်ရောက်မှုရှိအောင် ပြုလုပ်နိုင်သည့် နည်းလမ်းတစ်ခုရှိသည်။

“ ကိုယ်ပွား ”

ရွှီချင်းသည် မြေပြင်ပေါ်တွင် သတိမေ့နေသော လူကို ကြည့်လိုက်သည်။ အေးစက်စက် အလင်းသည် သူ၏ မျက်လုံးထဲမှာ ထွက်ပေါ်လာသည်။

အကယ်၍ ဝိညာဉ်မျိုးစေ့ဖြင့် ပေါင်းစပ်ထားသူက အစကတည်းက ကိုယ်ပွားဖြစ်ပြီး မူလခန္ဓာကိုယ်က ကိုယ်ပွားနောက်မှ လိုက်ပါနေမည်ဆိုလျှင် ဤကဲ့သို့ ပြီးပြည့်စုံသော အခြေအနေကို ဖန်တီးနိုင်ပေသည်။

ဤကိစ္စ၏ ပြစ်ချက်သည်တော့ ရွှီချင်းကို ထိုသို့ခန့်မှန်းမိစေသည့် အဓိကအကြောင်းအရင်း ဖြစ်သည်။ အကြောင်းအရင်းမှာ ဤနေရာကို သူ့ထက် ပိုပြီးမြန်ဆန်စွာ ရှာတွေ့နိုင်သောလူ တစ်ယောက်မှမရှိခြင်း ဖြစ်သည်။

ထို့ကြောင့် ထိုလူ၏ အစီအစဉ်အရဆိုလျှင် တစ်စုံတစ်ယောက်က ဤနေရာကို ရှာတွေ့သွားသည့်အခါ သူ၏ ကိုယ်ပွားက သေဆုံးပြီးသွားလောက်ပြီ ဖြစ်သည်။ သို့ဆိုလျှင် စည်းချအစီအရင်သည်လည်း အားလုံးကို ရှင်းပြနိုင်လိမ့်မည်။ ထို့ပြင် စုံစမ်းစစ်ဆေးသူက အချိန်နောက်ပြန်ဆုတ်သည့် နည်းလမ်းကို အသုံးပြုလျှင်ပင် မည်သည့်ပြစ်ချက်ကိုမှ ရှာတွေ့လိမ့်မည်မဟုတ်ပေ။

ထိုလူက ကိုယ်ပွားပေါ်မှာ ဝိညာဉ်ရှာဖွေခြင်းကို အမှန်တကယ် အသုံးပြုခဲ့ပြီး စည်းချအစီအရင်ဖြင့် ဝိညာဉ်မပြိုကွဲသွားအောင် ထိန်းသိမ်းပေးခဲ့သည်။ ကိုယ်ပွားသည် အချိန်တစ်ခဏကြာ အသက်ရှင်ခဲ့သည်။

သို့သော်လည်း ထိုအစီအစဉ်အရဆိုလျှင် စုံစမ်းစစ်ဆေးသူက အလွန်နောက်ကျမှ ရောက်ရှိလာရမည်။

ရွှီချင်းသည် နှုတ်ဆိတ်သွားသည်။ အကယ်၍ သူ၏ ခန့်မှန်းမှုသာ မှန်ကန်မည်ဆိုလျှင် သူ၏ မြန်ဆန်စွာ ရောက်ရှိလာမှုက ထိုလူ၏ ခန့်မှန်းထားမှုထက် ကျော်လွန်သွားသော ကိစ္စဖြစ်ရမည်။

ဤနေရာမှ ခြေရာလက်ရာများအရ ထိုလူက ယင်းကို သိပ်မကြာသေးမီကမှ စီစဉ်ခဲ့ခြင်း ဖြစ်သည်။

“ ခဏနေရင် ငါနားလည်သွားလိမ့်မယ် ”

ရွှီချင်း၏ ခန္ဓာကိုယ်ထဲမှ ဝိညာဉ်ချည်မျှင်များက ပေါ်လျှိုးထွက်လာကြပြီး သူ၏ အနောက်တွင် ရက်လုပ်သွားသည်။ သူက တတိယနတ်ဘုရားအသွင်သဏ္ဍာန်ကို ဖွဲ့စည်းလိုက်သည်။

ပေါက်ကွဲသံများကြားမှာ ကောင်းကင်၏ အရောင်သည် ပြောင်းလဲသွားပြီး လေတဟူးဟူး တိုက်ခတ်လာသည်။

ကြောက်မက်ဖွယ်ကောင်းသော ပုံရိပ်သည် ရွှီချင်း၏ အနောက်မှာ ထွက်ပေါ်လာပြီး သူနှင့်ပေါင်းစပ်သွားကာ တစ်သားတည်း ဖြစ်လာသည်။

ဤသည်မှာ နတ်ဘုရားတစ်ပါး ဆင်းသက်လာသည့်အခါ ဘေးပတ်ဝန်းကျင်သည် ဝေဝါးလာပြီး ဒြပ်နှောများသည် ပေါက်ကွဲထွက်လာသည်။ လှိုင်ဂူ၏ ကျောက်တုံးနံရံများသည် ဒြပ်နှောများ၏ တိုက်စားမှုကို မတောင့်ခံနိုင်ဘဲ ယိုယွင်းပျက်စီးသွားကြသည်။ ဤအခိုက်အတန့်မှာ ဘေးပတ်ဝန်းကျင်တွင် မြင်ကွင်းအသစ်တစ်ခု ဖြစ်ပေါ်လာသည်။

တောင်တန်းများသည် သင်္ချိုင်းမြေပုံများအဖြစ်သို့ ပြောင်းလဲသွားသည်။ သစ်ပင်များသည် အရိုးစုများသို့ ပြောင်းလဲသွားပြီး လှိုင်ဂူသည် ဧရာမဦးခေါင်းခွံသို့ ပြောင်းလဲသွားသည်။

ထိုမြင်ကွင်းသည် ပုံရိပ်ယောင်နှင့် အစစ်အမှန်ကြားမှာ တည်ရှိသည်။ ယင်းက ဤနေရာမှ အစစ်အမှန် အသွင်အပြင်ကို မြင်နိုင်ရန် ခက်ခဲစေသည်။

ပုံရိပ်တစ်ခုသည် ထိုဝေဝါးသော မြင်ကွင်းထဲမှ ထွက်လျှောက်လာသည်။

သူ၏ ခရမ်းရောင်ဆံပင်ရှည်သည် မြေပြင်ပေါ်တွင် တရွတ်တိုက် ကျဆင်းနေသည်။ သူ၏ ပုံစံသည် ချောက်ချားဖွယ်ကောင်းသည်။ သူ၏ အပြင်ပန်းသည် ခရမ်းရောင် သလင်းကျောက်သဖွယ် ထွန်းလင်းတောက်ပပြီး အရိုးစုပုံသဏ္ဍာန်နှင့် ဆင်တူသည်။ သူ၏ အသွေးအသားများသည် မရေမတွက်နိုင်သော သွေးချည်မျှင်များမှ ဖြစ်ပေါ်လာခြင်းဖြစ်သည်။ ထိုသွေးချည်မျှင်များသည် ဝိညာဉ်မြွေများအလား အရပ်မျက်နှာအဘက်ဘက်သို့ ပျံ့နှံ့သွားကြသည်။

ခရမ်းရောင်ငှက်မွှေးများနှင့် အသွေးအသားများမှ ဖြစ်ပေါ်လာသော ဧရာမအတောင်ပံတစ်စုံလည်း ရှိသည်။ ခရမ်းလသည် သူ၏ အနောက်မှ မြှောက်တတ်လာသည်။

ထိုအရာအားလုံးက သူ၏ ဘဝအဆင့်အတန်းကို တစ်ဟုန်ထိုး မြင့်တတ်သွားစေသည်။

ထိုသူက ရွှီချင်းဖြစ်သည်။

ဤအခိုက်အတန့်မှာ သူက စည်းချအစီအရင်၏ အရှေ့သို့ လျှောက်သွားပြီး မြေပြင်ကို ဖမ်းဆုပ်လိုက်သည်။ သတိမေ့နေသော လူသည် ရုတ်တရက် အပေါ်သို့ မြှောက်တတ်လာပြီး သူ၏ ဦးခေါင်းက ရွှီချင်း၏ လက်ဖြင့် ဖမ်းဆုပ်ခံလိုက်ရသည်။

ဤတစ်ကြိမ်တွင် ဝိညာဉ်ရှာဖွေခြင်းကို မပြုလုပ်ပေ။ ရွှီချင်းက တတိယနတ်ဘုရားအသွင်သဏ္ဍာန်ကြောင့် မြင့်တတ်သွားသော သူ၏ ဘဝအဆင့်အတန်းကို အသုံးပြု၍ သတိမေ့နေသော လူ၏ ဘဝချည်မျှင်များကို စစ်ဆေးပြီး မူလခန္ဓာကိုယ်ကို ခြေရာခံချင်သည်။

အရိပ်လေးကို သူက အရင်ဆုံး ဖြန့်ကြက်ခိုင်းရခြင်းမှာ တစ်ဖက်လူက သတိထားမိသွားပြီး တည်နေရာပြောင်းရွှေ့သွားမည်ကို ကြိုတင်ကာကွယ်ရန် ဖြစ်သည်။

“ ဘဝခြေရာခံခြင်း အသက်ဝင်စေ ”

နတ်ဘုရားစကားသံသည် အလွန်အံ့ဖွယ်ကောင်းသည်။