အရင်းအမြစ်ကို ပစ်မှတ်ထားခြင်း

အချိန်သည် တဖြည်းဖြည်း ကုန်ဆုံးသွားသည်။ နတ်ဘုရားပေါင်းစပ်ခြင်းကျောင်းတော်နှင့် မူကွဲအင်မော်တယ်ကျောင်းတော်ကြားမှ ယှဉ်ပြိုင်မှုစတင်ရန် တစ်ရက်သာ လိုတော့သည်။

နန်းမြို့တော်သည် ဤအတောအတွင်း အေးဆေးငြိမ်သက်နေဟန် ရ၏။ သို့သော်လည်း အမှန်မှာ ထျန်းဇောင်ဒေသအကြီးအကဲက သက်သေအဖြစ် တာအိုမျိုးစေ့ကို ပို့ဆောင်ပြီးနောက် မကြာခင် မုန်တိုင်းတစ်ခု ဆင်းသက်လာတော့မည် ဖြစ်သည်။

ထို့ကြောင့် မုန်တိုင်းမလာခင် လေပြေဝင်နေစဉ် နန်းမြို့တော်ထဲမှ လေထုသည် ခန့်မှန်းရခက်ခဲသည်။

လူတိုင်းက စောင့်ကြည့်နေကြသည်။

သူတို့က လူသားဧကရာဇ်နှင့် မူကွဲအင်မော်တယ်ကျောင်းတော်ကို စောင့်ကြည့်နေခြင်း ဖြစ်သည်။

အင်ပါယာအကယ်ဒမီထဲမှာဖြစ်စေ အကယ်ဒမီ၏ ပြင်ပမှာဖြစ်စေ မူကွဲအင်မော်တယ်ကျောင်းတော်သည် မုန်တိုင်းထဲသို့ ကျရောက်နေသည်။ ထို့ပြင် မျှော်စင်က ချိပ်ပိတ်ခံထားရသောကြောင့် သက်ဝင်လှုပ်ရှားမှုကို ဆုံးရှုံးသွားပြီး ယခင်က တိတ်ဆိတ်ခြောက်ကပ်သော အခြေအနေသို့ ပြန်ရောက်ရှိသွားသည်။

မူကွဲအင်မော်တယ်ကျင့်ကြံခြင်းအတတ်ကို ကျင့်ကြံထားကြသော လူများသည်လည်း သက်ရောက်ခံခဲ့ကြရသည်။ သူတို့က အပြင်လောကမှာ သူတို့၏ သရုပ်ကို မထုတ်ဖော်ဝံ့ကြချေ။

အပေါ်ယံတွင် အင်အားစုအမျိုးမျိုးက လူသားဧကရာဇ်၏ အမိန့်တော်ကို စောင့်ဆိုင်းနေဟန် ရသည်။

ဤအခိုက်အတန့်မှာ အမိန့်တော်ကျလာသည်နှင့် မူကွဲအင်မော်တယ်ကျောင်းတော်က ကြီးကြီးမားမား နိမ့်ကျသွားရန် ဖြစ်နိုင်ခြေအလွန်များကြောင်း မည်သူမဆို စိတ်ကူးကြည့်နိုင်ပေသည်။ ၎င်း၏ ပြန်နာလန်ထူမှုက ပျက်စီးသွားမည်ဆိုလျှင် ယခင်က နိမ့်ကျသွားခဲ့သော အခြေအနေထက်ပင် ပိုပြီးဆိုးဝါးသွားနိုင်သည်။

မည်သို့ဖြစ်ပါစေ အတိတ်မှာ နိမ့်ကျမှုသည် အချိန်ကာလဖြင့် ပယ်ဖျက်ခံရနိုင်သည်။ သို့သော်လည်း ယခု ကိစ္စသည် ကျင့်ကြံခြင်းအတွက် လူသားမျိုးနွယ်၏ ဝိညာဉ်သန်းပေါင်းများစွာ ဆွဲထုတ်ခံရခြင်းနှင့် ဆက်စပ်နေသည်ဟု သံသယဝင်ခံနေရခြင်း ဖြစ်သည်။ ယင်းက ကြီးမားသော ရာဇဝတ်မှုဖြစ်ပြီး ဤကိစ္စကို လူသားမျိုးနွယ်တစ်ခုလုံးက အာရုံစိုက်နေကြသည်။

အကယ်၍ သူတို့က ဤကိစ္စမှာ အမှန်တကယ် ပါဝင်ပတ်သက်နေမည်ဆိုလျှင် ယင်းက လူသားမျိုးနွယ်၏ အကြီးမားဆုံး အပြစ်တော်ဖြစ်လာလိမ့်မည်။

ထို့ပြင် သက်သေအားလုံးက မူကွဲအင်မော်တယ်ကျောင်းတော်ကို ညွှန်ပြနေသည်။

နတ်ဘုရားပေါင်းစပ်ခြင်းကျောင်းတော်နှင့် မူကွဲအင်မော်တယ်ကျောင်းတော်ကြားမှ ယှဉ်ပြိုင်ပွဲနေ့သို့ ရောက်တော့မည့်အခါမှသာ လူတိုင်းစောင့်မျှော်နေကြသော လူသားဧကရာဇ်၏ အမိန့်တော်သည် နန်းတော်ထဲမှ ထွက်ပေါ်လာသည်။

“ မူကွဲအင်မော်တယ်ကျောင်းတော်ရဲ့ ချိပ်ပိတ်မှုကို ယာယီဖြေလျော့စေမယ်… နတ်ဘုရားပေါင်းစပ်ခြင်းကျောင်းတော်နဲ့ တာအိုဆွေးနွေးပြီး ကိုယ့်ကိုယ်ကို သက်သေပြနိုင်ဖို့ ခွင့်ပြုတယ် ”

ထိုအမိန့်တော်သည် လူအများအပြားကို အံ့ဩသွားစေသည်။ သို့သော်လည်း တစ်ချိန်တည်းမှာ ယင်းက သူတို့၏ မျှော်လင့်ထားမှုအတွင်းမှာ ရှိနေဆဲပင်။

မူကွဲအင်မော်တယ်ကျောင်းတော်သည် အင်ပါယာအကယ်ဒမီကို စတည်ထောင်ခဲ့ကတည်းက တည်ရှိနေခဲ့သည့် ကျောင်းတော်တစ်ခု ဖြစ်သည်။ သမိုင်းတစ်လျှောက်တွင် မရေမတွက်နိုင်သော လူသားကျင့်ကြံသူများသည် မူကွဲအင်မော်တယ်ကျင့်ကြံခြင်းအတတ်ကို ကျင့်ကြံခဲ့ကြသည်။

ယင်းက နောက်ပိုင်းတွင် နိမ့်ကျသွားခဲ့သော်လည်း နှစ်ပေါင်းများစွာကြာပြီးနောက် ကျောင်းတော်သည် လူသားမျိုးနွယ်အင်အားစုများဖြင့် အဆက်အသွယ်ပြုလုပ်နိုင်ခဲ့သည်။ သို့ဖြစ်၍ ယင်းတို့ကြားမှာ အပြင်လူများမသိနိုင်သော သဘောတူညီမှုများ ရှိနေနိုင်သည်။

ထိုအမိန့်တော်၏ နောက်ကွယ်မှာ နန်းမြို့တော်၏ အင်အားစုများကြားမှ ကစားပွဲတစ်ခုပါဝင်ကြောင်း မည်သူမဆို စိတ်ကူးကြည့်နိုင်သည်။ ယင်းမှာ အပြင်လူများ နားမလည်နိုင်သောအရာ ဖြစ်သည်။

အတိုချုပ်ဆိုရသော် မူကွဲအင်မော်တယ်ကျောင်းတော်သည် သူတို့အနှစ်နှစ်အလလ တည်ဆောက်ခဲ့သော အခြေခံအုတ်မြစ်ကို ပေးဆပ်ပြီး ဤအခွင့်အရေးအတွက် လဲလှယ်ခဲ့ခြင်းဖြစ်သည်။

ယင်းက သူတို့အပြစ်မရှိကြောင်း သက်သေပြနိုင်မည့် အခွင့်အရေးတစ်ခုဖြစ်သည်။

ထို့ကြောင့် တာအိုဆွေးနွေးပွဲမစတင်ခင် တစ်ရက်အလိုမှာ ညနေခင်းအချိန်၌ မူကွဲအင်မော်တယ်ကျောင်းတော်၏ အဖြူရောင်မျှော်စင်၏ ဂိတ်တံခါးသည် ဖြည်းညင်းစွာ ပွင့်သွားသည်။ အဖြူရောင်မျှော်စင်ထဲမှာ အကျယ်ချုပ်ချခံထားရသော မူကွဲအင်မော်တယ်ကျောင်းအုပ်ကြီးသည် ပြန်ထွက်ပေါ်လာသည်။

ဤလဝက်အတွင်းမှာ သူ၏ အကြည့်သည် ပိုပြီးအိုမင်းသွားကြောင်း ထင်ရှားသည်။ ဤအခိုက်အတန့်မှာ သူက ကျောင်းတော်၏ အရှေ့မှာ ရပ်နေလျက် အင်ပါယာအကယ်ဒမီ၏ လမ်းများကို တိတ်တဆိတ် ကြည့်နေသည်။

အကယ်ဒမီအတွင်းမှ ကျောင်းတော်သားများသည် ထိုမြင်ကွင်းကို မြင်သွားသောအခါ အဝေးသို့ ရှောင်ဖယ်သွားကြသည်။ သူတို့အားလုံး၏ စိတ်ခံစားချက်များသည် တစ်ယောက်နှင့်တစ်ယောက် မတူညီကြချေ။ တချို့သည် စိတ်ရှုပ်ထွေးနေပြီး တချို့သည် စက်ဆုပ်ရွံရှာမှုကို ထုတ်ဖော်ပြနေသည်။ တချို့သည် ဒေါသထွက်နေပြီး တချို့သည် တုံ့ဆိုင်းနေသည်။

တစ်ခဏကြာပြီးနောက် ကျောင်းအုပ်ကြီးသည် အနောက်လှည့်လိုက်ပြီး အဖြူရောင်မျှော်စင်၏ အဓိကခန်းမထဲမှာ ဝင်ထိုင်လိုက်သည်။ သူက တိတ်တဆိတ် စောင့်ဆိုင်းသည်။

အချိန်သည် တရွေ့ရွေ့ ကုန်ဆုံးသွားသည်။ သို့သော်လည်း မည်သည့်ကျောင်းတော်သားမှ မူကွဲအင်မော်တယ်ကျောင်းတော်သို့ ရောက်မလာကြပေ။

ကျောင်းအုပ်ကြီး၏ အကြည့်သည် တဖြည်းဖြည်း ညှိုးငယ်သွားသည်။ သို့သော်လည်း သူ့မျက်လုံး၏ အနက်ပိုင်းထဲမှာ ဆန္ဒမရှိသော မီးတောက်က လောင်မြိုက်နေသည်။

တစ်ချိန်တည်းမှာ အင်ပါယာအကယ်ဒမီ၏ အပြင်ဘက်တွင် ညနေခင်းအချိန် ကုန်လွန်သွားပြီး ညအမှောင်ထုက ကျရောက်လာသည်။ အေးစက်စက် လေပြေသည် ကုန်းမြေကို ဖြတ်သန်း၍ တိုက်ခတ်လာသည်။

ယင်းက အဝေးမှ ရှေးဟောင်းမြို့တံတိုင်းများပေါ်သို့ ရိုက်ခတ်သွားလေရာ နှင်းပွင့်ချပ်များကို အပေါ်သို့ မြှောက်တတ်သွားစေသည်။ သို့သော်လည်း ထိုအအေးဓာတ်သည် ကြာရှည်မခံပေ။ ယင်းက မြို့တော်ထဲမှ လူများ၏ အတွေးများထဲမှာ လွင့်ပြယ်သွားသည်။

ဤသည်မှာ ရှေးခေတ်ကဗျာဆရာတစ်ယောက်က ကောင်းကင်နှင့်မြေပြင်၏ သမိုင်းကြောင်းကို လွမ်းဆွေးဖွယ်ကောင်းစွာ ဖွဲ့နွဲ့ပြောနေသည့်အလား သို့မဟုတ် လောက၏ အနိမ့်အမြင့်အတတ်အကျကို အကြင်နာမဲ့သော တစ်စုံတစ်ယောက်က ဘေးမှ ရပ်ကြည့်နေပြီး တိတ်တဆိတ် မှတ်တမ်းတင်နေသည့်အလားပင်။

ထို့ပြင် ဤအခိုက်အတန့်မှာ ညအမှောင်ထုနှင့် အေးစက်စက် လေပြေတိုက်ခတ်မှုကြားမှာ ပုံရိပ်တစ်ခုသည် အရှေ့သို့ လျှောက်သွားနေသည်။ အမှောင်ထုက သူ၏ အရိပ်ကို ဖုံးကွယ်ပေးပြီး လေပြေက သူ၏ အသက်ရှူသံကို ဖုံးကွယ်ပေးထားသည်။ ထိုလူက မင်းသားကြီး၏ စံအိမ်နားမှာရှိသော နေအိမ်တစ်ခုဆီသို့ တိတ်တဆိတ် ချဉ်းကပ်သွားနေသည်။

ထိုလူသည် ရွှီချင်းဖြစ်ပြီး သူက နန်းမြို့တော်သို့ အမြန်ပြန်လာခဲ့ခြင်း ဖြစ်သည်။

သူက နေရာမှာ ရပ်ပြီးနောက် ဘေးပတ်ဝန်းကျင်ကို အာရုံခံလိုက်သည်။

ရွှီချင်းက သူ၏ နတ်ဘုရားအတတ်ပညာကို အသုံးပြုခဲ့သော်လည်း ဝတ်ရုံနက်အမျိုးသား၏ ဘဝတစ်စိတ်တစ်ပိုင်းကိုသာ မြင်တွေ့ခဲ့သည်။ ထိုထဲမှာ တစ်ဖက်လူက ကောင်းကင်ပေါ်မှ ယဇ်ပလ္လင်နှင့် နတ်ဘုရားမျက်နှာပျက်ကြီးအား အရိုအသေပေးနေပုံသာ ပါဝင်သည်။

ထိုလူ၏ မျက်နှာအသွင်အပြင်ကိုတော့ သူမမြင်နိုင်ခဲ့ပေ။

ထိုလူက အစစ်အမှန်ကမ္ဘာ၏ အဖွဲ့ဝင်တစ်ယောက်ဖြစ်ကြောင်းကိုသာ သူသိသည်။ ထို့ပြင် တရားခံနှစ်ယောက်အပေါ် သူ၏ ဝိညာဉ်ရှာဖွေမှုအရ ဤကိစ္စတွင် အလုပ်အပ်သူတစ်ယောက် ရှိနေသေးကြောင်း သူရှာတွေ့ခဲ့သည်။

မှန်ပေသည်။ အလုပ်ရှင်ဟူသော စကားလုံးက ကိစ္စများကို ပိုပြီးရှုပ်ထွေးအောင် တစ်ဖက်လူက တမင်အသုံးပြုခဲ့ခြင်းလည်း ဖြစ်နိုင်ပေသည်။

“ ပြီးတော့ ငါ့ဝိညာဉ်ချည်မျှင်တွေရဲ့ သွယ်ဝိုက်စုံစမ်းမှုအရ အဲ့ဒီဝတ်ရုံနက်အမျိုးသားရဲ့ ပုံရိပ်ထဲက လျှို့ဝှက်နတ်ဘုရားစိတ်အာရုံ ထုတ်လွှတ်လိုက်တဲ့ ဒြပ်နှောတွေက ငါ့ကို ရင်းနှီးတဲ့ ခံစားမှုပေးတယ်… ပြီးတော့ အဲ့ဒီအေးစက်စက် နှာခေါင်းရှုံ့သံကတောင် ငါနဲ့ ရင်းနှီးနေတယ်လို့ ခံစားရတယ်… ”

ရွှီချင်းသည် မျက်လုံးမှေးကျဉ်းလိုက်သည်။ ထို့နောက် သူက အိမ်တံခါးကို တွန်းဖွင့်လိုက်ပြီး အထဲသို့ လျှောက်သွားသည်။

အိမ်သည် မည်းမှောင်နေသည်။

သို့သော်လည်း သူ၏ မျက်လုံးထဲမှာ အရာအားလုံးက ကြည်လင်ရှင်းလင်းသည်။

အိမ်၏ အတွင်းပိုင်းအပြင်အဆင်သည် အလွန်ရိုးစင်းသည်။ အိမ်ထဲမှာ သစ်သားခုတင်တစ်လုံး၊ စားပွဲခုံတစ်လုံးနှင့် ထိုင်ခုံတစ်လုံးသာ ရှိသည်။

စားပွဲခုံပေါ်တွင် ငြိမ်းသတ်နေသော ရေနံဆီမီးအိမ်ရှိသည်။

ရွှီချင်းက မျက်လုံးမှိတ်လိုက်သည်။ ဝိညာဉ်ရှာဖွေခြင်းနှင့် နတ်ဘုရားအတတ်ပညာထဲမှာ ရွှီချင်းက ဤအိမ်ကို ရှာတွေ့ခဲ့ခြင်း ဖြစ်သည်။ သူက မျက်လုံးမှိတ်လိုက်သည့်အခါ လွန်ခဲ့သော လဝက်တုန်းက အချိန်အခါဆီသို့ ပြန်ရောက်သွားသည့်အလား ခံစားမိသွားသည်။

ဝတ်ရုံနက်အမျိုးသားသည် ဤနေရာမှာ ထိုင်ခဲ့ပြီး မူကွဲအင်မော်တယ်ကျောင်းတော်သား သုံးယောက်သည် သူနှင့်မျက်နှာချင်းဆိုင်မှာ ရပ်နေခဲ့ကြသည်။

သူက ရေနံဆီမီးအိမ်ထဲမှ မီးတောက်ကို ကစားနေစဉ် သူ၏ အသံသာ ပဲ့တင်ထပ်လာသည်။

မည်သူမှ သူ၏ အသွင်အပြင်ကို မမြင်ခဲ့ကြချေ။

အချိန်အတော်ကြာပြီးနောက် ရွှီချင်းသည် မျက်လုံးပြန်ဖွင့်လိုက်ပြီး ဝတ်ရုံနက်အမျိုးသား ထိုင်ခဲ့သော နေရာသို့ လျှောက်သွားသည်။ ထို့နောက် သူက လက်မြှောက်လိုက်ပြီး ဝှေ့ယမ်းလိုက်လေရာ သူ့အရှေ့မှ ရေနံဆီမီးအိမ်သည် တဖန်မီးတောက်လာသည်။

မီးအလင်းရောင်အောက်မှာ ရွှီချင်းသည် သူ၏ လက်ကို မြှောက်လိုက်ပြီး မီးတောက်ကို ညင်သာစွာ ထိတွေ့လိုက်သည်။ သူ၏ ခန္ဓာကိုယ်ထဲမှ ခရမ်းလစွမ်းအားသည် ပေါ်လျှိုးထွက်လာပြီး သူ့ကိုယ်ပိုင် ဒြပ်နှောကို ထုတ်လွှတ်လိုက်သည်။ ဒြပ်နှောသည် သူ၏ လက်ချောင်းနောက်သို့ လိုက်သွား၍ ရေနံဆီမီးအိမ်ထဲသို့ ပေါင်းစပ်သွားသည်။

တဖြည်းဖြည်း ရေနံဆီမီးအိမ်ထဲမှ မီးတောက်သည် အကြမ်းပတမ်း လှုပ်ယမ်းလာသည်။ ၎င်း၏ ရုပ်ဝတ္ထုပစ္စည်းက ဒြပ်နှော၏ လွှမ်းမိုးခံလိုက်ရပြီး နောက်ဆုံးမှာ အသက်ဓာတ်အရှိန်အဝါကို ထုတ်လွှတ်လာသည်။

ဤသည်မှာ နတ်ဘုရားအစွမ်းတစ်မျိုး ဖြစ်သည်။

ဒြပ်နှောသည် သက်ရှိအားလုံးထံသို့ ကျူးကျော်ဝင်ရောက်နိုင်သကဲ့သို့ အသက်ဓာတ်ကိုလည်း မွေးဖွားပေးနိုင်သည်။ ထိုအကြောင်းအရင်းကြောင့် နတ်ဘုရားမျက်နှာပျက်ကြီး ရောက်ရှိလာပြီးနောက်ပိုင်း ဝမ်ကူးကုန်းမြေထဲမှာ မျိုးနွယ်စုအသစ် အများအပြား ထွက်ပေါ်လာခဲ့ခြင်း ဖြစ်သည်။

ယင်းက တားမြစ်ဇုန်များ ဖြစ်ပေါ်လာရသည့် အဓိက အကြောင်းအရင်းလည်း ဖြစ်သည်။

ဥပမာ အတိတ်တွင် ရတနာမုဆိုးစခန်းထဲမှ တားမြစ်ဇုန်သည် ဇီသာတစ်လက်၏ အသက်ဝင်မှုကြောင့် ဖြစ်ပေါ်လာခြင်း ဖြစ်သည်။

ယခု ရွှီချင်းက ထိုနည်းလမ်းကို အသုံးပြုနေခြင်း ဖြစ်သည်။ သူက ဤရေနံဆီမီးအိမ်ကို အသက်ရှိလာအောင် လုပ်ဆောင်ချင်သည်။

ဤအိမ်ထဲ၌ ဝတ်ရုံနက်အမျိုးသား၏ မျက်နှာကို မည်သူမှ မမြင်တွေ့ခဲ့သော်လည်း ဤရေနံဆီမီးအိမ်က သူ့ကို မြင်ခဲ့သည်။

ဤအတတ်ပညာသည် သာမန်ကျင့်ကြံသူတစ်ယောက် စွမ်းဆောင်နိုင်သော အရာမဟုတ်ပေ။ အချိန်ကာလကို ထိန်းချုပ်ခြင်းဖြစ်စေ သို့မဟုတ် အစွမ်းထက်ပညာရှင်ကျင့်ကြံသူများ၏ အထူးစွမ်းရည်များဖြစ်စေ ယင်းတို့က ဤကဲ့သို့အခြေအနေမျိုးကို တုပလုပ်ဆောင်နိုင်ပေသည်။ သို့သော်လည်း နတ်ဘုရားများသည်သာ ယခု ရွှီချင်းလုပ်ဆောင်နေသော အရာကို အပြည့်အဝ ဆောင်ရွက်နိုင်ကြသည်။

အချိန်အတော်ကြာပြီးနောက် လှုပ်ယမ်းနေသော မီးတောက်သည် ပိုပြီးသိပ်သည်းလာသည်။ မီးအိမ်သည်တော့ စတင်အရည်ပျော်သွားပြီး ပြိုကွဲထွက်သွားသည်။ လက်တံများသည် မီးအိမ်ထဲမှ ကြီးထွားလာပြီး ဖြည်းညင်းစွာ လှုပ်ရှားလိုက်သည်။ အမှန်မှာ မျက်နှာအစိတ်အပိုင်းများသည်ပင် ၎င်းပေါ်မှာ ဖြည်းညင်းစွာ ထွက်ပေါ်လာကြသည်။ ဤသည်မှာ ၎င်းက မျက်နှာတစ်ခု ပိုင်ဆိုင်လာသည့်အလားပင်။

သို့သော်လည်း ၎င်းက အလွန်မတည်မငြိမ်ဖြစ်နေသည်။ ဤအခိုက်အတန့်မှာ ၎င်းက တုန်ယင်နေသည့်အပြင် အက်ကွဲရာများက ၎င်းပေါ်မှာ ထွက်ပေါ်လာကြသည်။

ရွှီချင်း၏ လက်ချောင်းသည် ရပ်တန့်သွားပြီး သူက တည်ငြိမ်စွာ ပြောသည်။

“ လွန်ခဲ့တဲ့ လဝက်တုန်းက မင်းမြင်ခဲ့တဲ့ ဝတ်ရုံနက်အမျိုးသားရဲ့ အသွင်အပြင်ကို ဖော်ပြစမ်း ”

ရွှီချင်း၏ စကားဆုံးသွားသည်နှင့်ချက်ချင်း ရေနံဆီမီးအိမ်သည် အပြင်းအထန် တုန်ယင်လာသည်။ ဤသည်မှာ ရွှီချင်း၏ စကားက ၎င်းအတွက် အမြင့်ဆုံး အမိန့်တော်ဖြစ်သည့်အလားပင်။ ထို့ကြောင့် ၎င်းက အရာအားလုံးကို လျစ်လျူရှုလိုက်ပြီး ၎င်း၏ စွမ်းအားကို ထုတ်လွှတ်လိုက်သည်။

နောက်အခိုက်အတန့်မှာ ရေနံဆီမီးအိမ်သည် မြန်ဆန်စွာ အရည်ပျော်သွားပြီး မီးတောက်များက အပေါ်သို့ မြှောက်တတ်သွားသည်။ ရေနံဆီမီးအိမ်က လုံးဝပျောက်ကွယ်သွားပြီး မီးတောက်များသာ ကျန်နေခဲ့သည်။ ထို့နောက် မျက်နှာတစ်ခုသည် မီးတောက်ထဲမှာ ထွက်ပေါ်လာသည်။

ထိုမျက်နှာသည် ဖြူဖျော့ပြီး သာမန်ဖြစ်သည်။ ထို့ပြင် မျက်နှာသည် အရွယ်အိုမင်းနေသည်။

ရွှီချင်းသည် ထိုသို့မျက်နှာကို ယခင်က တစ်ခါမှ မမြင်ဖူးပေ။

ဤအခိုက်အတန့်မှာ မီးတောက်က တလက်လက် တောက်ပလာသည့်အခါ မျက်နှာသည် ပိုပြီးထင်ရှားလာသည်။ မျက်နှာက အပြည့်အဝ ထွက်ပေါ်လာပြီးနောက် မီးတောက်သည် တဖြည်းဖြည်း မှေးမှိန်သွားသည်။ ဤသည်မှာ ၎င်းက အစွမ်းကုန် အသုံးပြုခဲ့သည့်အလားပင်။ နတ်ဘုရားအစွမ်းဖြင့် အသက်ဝင်လာခဲ့သော ၎င်း၏ ဘဝက အဆုံးသတ်သို့ ရောက်ရှိသွားပြီး နောက်ဆုံးအကြိမ် မီးပွားစများကို ထုတ်လွှတ်လိုက်သည်။

၎င်းက စတင်ပြိုကွဲသွားသည်။

သို့သော်လည်း ၎င်း၏ အဓိပ္ပာယ်သည် ရွှီချင်းအတွက် အလွန်အရေးကြီးသည်။ ရွှီချင်းသည် အရှေ့သို့ အနည်းငယ် ခါးကိုင်းလိုက်ပြီး မီးတောက်ကြားထဲမှာ ထွက်ပေါ်နေသော မျက်နှာကို သေချာစူးစိုက်ကြည့်လိုက်သည်။

သူကြည့်နေသည်မှာ ထိုမျက်နှာထဲမှ မျက်လုံးများ ဖြစ်သည်။

ထိုမျက်လုံးများထဲမှာ ပုံရိပ်လေးခု ထွက်ပေါ်နေသည်။

ဤသည်မှာ လွန်ခဲ့သော လဝက်တုန်းက ရေနံဆီမီးအိမ် မြင်တွေ့ခဲ့သော မြင်ကွင်းဖြစ်သည်။ ထိုပုံရိပ်လေးခုသည် ဝိညာဉ်ရှာဖွေခြင်းကို ရွှီချင်းအသုံးပြုခဲ့စဉ်က မြင်တွေ့ခဲ့ရသော အရာနှင့် ခြားနားနေသည်။

သူ၏ ဝိညာဉ်ရှာဖွေမှုအရ ဤနေရာတွင် မူကွဲအင်မော်တယ်ကျောင်းတော်သား သုံးယောက်တည်းသာ ရှိနေခဲ့ကြောင်း ထင်ရှားသည်။

သို့သော်လည်း ဝတ်ရုံနက်အမျိုးသားကို ထည့်ပေါင်းလိုက်မည်ဆိုလျှင် ထိုနေ့တုန်းက ဤနေရာမှာ စုစုပေါင်း ရှိနေခဲ့သူသည် ငါးယောက်ဖြစ်သည်။ လေးယောက်မဟုတ်ပေ။

တခြားတစ်ယောက်က ဤနေရာမှာ ရှိနေခဲ့သည်။

သို့သော်လည်း မူကွဲအင်မော်တယ်ကျောင်းတော်သား သုံးယောက်သည် ထိုလူ၏ တည်ရှိမှုကို မမြင်နိုင်ကြပေ။ ဝတ်ရုံနက်အမျိုးသားတစ်ယောက်တည်းသာ ထိုလူကို မြင်နိုင်သည်။

အကယ်၍ ရွှီချင်းသာ နတ်ဘုရားအစွမ်းဖြင့် မစုံစမ်းဘူးဆိုလျှင် နောက်ထပ်လူတစ်ယောက် ရှိနေသေးကြောင်း သတိပြုမိလိမ့်မည် မဟုတ်ပေ။

ထိုလူသည် အဖြူရောင်ဝတ်ရုံနှင့် အင်ပါယာအကယ်ဒမီ၏ မျက်နှာဖုံးကို တပ်ဆင်ထားသည်။ ပထမဆုံး ကြည့်လိုက်သည့်အခါ ထိုလူက သူနှင့် မရင်းနှီးဟန် ရ၏။ သို့သော်လည်း ထိုလူ၏ မျက်လုံးမှ ထုတ်လွှတ်နေသော အရှိန်အဝါသည် ရွှီချင်း၏ နှလုံးသားထဲမှာ ရုတ်တရက် သတ်ဖြတ်ချင်စိတ် ပေါ်ထွက်လာစေသည်။

ထိုအကြည့်သည် အင်ပါယာအကယ်ဒမီသို့ ပထမဆုံး သူဝင်ရောက်ခဲ့စဉ် နတ်ဘုရားပေါင်းစပ်ခြင်းကျောင်းအုပ်ကြီးကို သူမြင်တွေ့ခဲ့သော အချိန်ကို ပြန်အမှတ်ရသွားစေခဲ့သည်။

ထိုအချိန်တုန်းက သူ၏ ခန့်မှန်းမှုသည် မသေချာခဲ့ပေ။

ယခု သူက ရင်းနှီးသော နှာခေါင်းရှုံ့သံနှင့် ထိုလူ၏ မျက်လုံးမှ ထုတ်လွှတ်နေသော အရှိန်အဝါကို ဆက်စပ်ကြည့်လိုက်သည့်အခါ အဖြေတစ်ခုသည် သူ၏ စိတ်ထဲမှာ ထွက်ပေါ်လာသည်။

“ နတ်ဘုရားပေါင်းစပ်ခြင်းကျောင်းအုပ်ကြီးက… ပိုင်ရှောင်ကျိုးပဲ ”

ရွှီချင်းသည် တီးတိုးရေရွတ်လိုက်ပြီး သူ၏ လက်ကို ညင်သာစွာ ဝှေ့ယမ်းလိုက်သည်။ သူ့အရှေ့မှ မီးတောက်က လွင့်ပြယ်သွားသည်။ ထို့နောက် နေအိမ်တစ်ခုလုံး အမှောင်ကျသွားစဉ် ရွှီချင်းက တည်ငြိမ်စွာ ပြောသည်။

“ မင်းကြည့်နေတာ အတော်ကြာပြီ… ဘာလို့ ထွက်မလာသေးတာလဲ ”

ရွှီချင်း၏ စကားသံက တိတ်ဆိတ်နေသော အိမ်ထဲမှာ ပဲ့တင်ထပ်သွားသည်။ အသက်ရှူချိန်အနည်းငယ် ကြာပြီးနောက် အိမ်၏ ထောင့်တစ်နေရာမှ အက်ရှရှအသံ ထွက်ပေါ်လာသည်။

“ ဒေသအရှင်သခင်ရွှီလို့ မျှော်လင့်ထားသလိုပါပဲ… မင်းက ဒီနေရာကို ရှာတွေ့ရုံတင်မကဘူး ဒီလိုအံ့ဖွယ်ကောင်းတဲ့ စွမ်းရည်တွေကို ပိုင်ဆိုင်ထားတယ်… ချီးကျူးလောက်ပါပေတယ် ”

သူ၏ စကားဆုံးသွားသည့်အခါ မီးတောက်ထဲတွင် ရွှီချင်းမြင်တွေ့ခဲ့သော မျက်နှာနှင့် တစ်ပုံစံတည်းတူညီသည့် ဝတ်ရုံနက်အမျိုးသားတစ်ဦးသည် အခန်းထဲမှာ ဘွားခနဲ ထွက်ပေါ်လာသည်။

ရွှီချင်းသည် ခေါင်းလှည့်လိုက်သည်။

“ မင်းက အဲ့ဒီလူမဟုတ်ဘူး ”

ရွှီချင်းက တည်ငြိမ်စွာ ပြောသည်။ သူ့အရှေ့မှ လူ၏ အရှိန်အဝါနှင့် ထိုလူပေးသော ခံစားမှုသည် ဝတ်ရုံနက်အမျိုးသားနှင့် လုံးဝခြားနားသည်။

“ အင်း… ငါက တကယ်ပဲ သူမဟုတ်ဘူး… ဒါပေမဲ့ အနာဂတ်မှာ ငါဖြစ်လာနိုင်တယ် ”

ဝတ်ရုံနက်အမျိုးသားသည် နေရာမှာ ရပ်နေလျက် ရွှီချင်းကို ဂရုတစိုက် အကဲခတ်လိုက်သည်။ သူ၏ မျက်နှာသည်တော့ ဝေဝါးနေသည်။

သူက ရွှီချင်းကို အလေးအနက်ထား၍ စိုက်ကြည့်နေစဉ် ရွှီချင်းကလည်း သူ့ကို လေ့လာကြည့်နေသည်။

တစ်ခဏကြာပြီးနောက် ဝတ်ရုံနက်အမျိုးသားသည် သူ၏ ညာလက်ကို‌ မြှောက်လိုက်ပြီး ကျောက်စိမ်းတုံကင်တစ်ခုကို ရွှီချင်းဆီသို့ ပစ်ပေးလိုက်သည်။

“ အလုပ်အပ်သူက သတ္တမမင်းသားပဲ… သက်သေအားလုံးက အဲ့ဒီထဲမှာ ရှိတယ်… သက်သေစုဆောင်းဖို့အတွက် ငါမင်းကို ကူညီပေးပြီးသွားပြီ… အဲ့ဒါကို ဘယ်လိုကိုင်တွယ်မလဲဆိုတာ မင်းဆုံးဖြတ်ရမယ့်အရာပဲ ”

ထိုသို့ပြောပြီးနောက် သူက အနောက်လှည့်လိုက်ပြီး အိမ်အပြင်သို့ လျှောက်သွားသည်။ သူ၏ ပုံရိပ်သည် တဖြည်းဖြည်း ဝေဝါးလာသည်။

ဤသည်ကို ရွှီချင်းကြားသောအခါ သတ်ဖြတ်ချင်သော စိတ်ဆန္ဒက သူ၏ နှလုံးသားထဲမှာ ထွက်ပေါ်လာသည်။ သို့သော်လည်း သူက ကျောက်စိမ်းတုံကင်ကို မကြည့်ပေ။ ယင်းအစား သူက ပျောက်ကွယ်သွားတော့မည့် ဝတ်ရုံနက်အမျိုးသား၏ နောက်ကျောကို ကြည့်လိုက်သည်။ သူက တစ်ဖက်လူ၏ သရုပ်ကို ခန့်မှန်းကြည့်နေရင်း ရုတ်တရက် ပြောသည်။

“ တကယ်လို့ မင်းမှာ အချိန်ရှိတယ်ဆိုရင် နင်ယန်ကို သွားတွေ့လိုက်ဦး ”

ရွှီချင်းက စကားပြောလိုက်သည်နှင့်ချက်ချင်း ဝေဝါးနေသော ဝတ်ရုံနက်အမျိုးသား၏ ခန္ဓာကိုယ်သည် မသိမသာ တုန်ယင်သွားသည်။ သူက မပျောက်ကွယ်သွားခင် ခေါင်းလှည့်လိုက်ပြီး ရွှီချင်းကို ကြည့်လိုက်သည်။