ဂုဏ်သိက္ခာက ငြိမ်းချမ်းရေးကို မလဲလှယ်နိုင်ဘူး

‘ မျှော်လင့်ထားသလိုပဲ ’

အနက်ရောင်အလင်းသည် ရွှီချင်း၏ မျက်လုံးထဲမှာ ထွက်ပေါ်လာသည်။ မင်းသားမင်နန်က ထပ်ခါတလဲလဲ အသက်ပြန်ရှင်လာနေသည်ကို မြင်သောအခါ သူက ခေါင်းကြီး၊ ကျောက်တုံးခြင်္သေ့နှင့် တခြားလူများကို စဉ်းစားမိသွားသည်။

သို့ဖြစ်၍ သူက ဆက်တိုက် ဖိအားပေးနေပြီး သူ၏ ရန်သူကို ဘေးကျပ်နံကျပ်အခြေအနေသို့ရောက်အောင် တွန်းပို့ခဲ့သည်။ သို့မှသာလျှင် သူက ကောင်းချီးအားလုံးကို တစ်ကြိမ်တည်း ထုတ်လွှတ်လိမ့်မည်။

အဘယ့်ကြောင့်ဆိုသော် နတ်ဘုရား၏ ကောင်းချီးကြောင့် မင်းသားမင်နန်က ထပ်ခါထပ်ခါ အသက်ပြန်ရှင်လာနေခြင်း ဖြစ်သည်။

အတိုင်းအတာတစ်ခုထိဆိုရလျှင် သူက (ဃ၁၃၂)ထဲမှ အကျဉ်းသားများနှင့် တူညီသည်။ နတ်ဘုရား၏ ကောင်းချီးပေးမှုကြောင့် သူက မသေမျိုးတစ်ယောက် ဖြစ်လာသည်။

အကယ်၍ သူက မင်းသားမင်နန်ကို သတ်ဖြတ်ချင်သည်ဆိုလျှင် ထိုကောင်းချီးကို ချိုးဖြတ်ရလိမ့်မည်။

အဆင့်မြင့်နတ်ဘုရားမီးလျှံနေ…

(ဃ၁၃၂)၏ အပြင်ဘက်မှ မင်းသားကြီးနှင့် တခြားလူများ၏ အမူအရာသည် ပြောင်းလဲသွားကြသည်။ သူတို့၏ အသက်ရှူသံသည် မြန်ဆန်လာသည်။

ရွံရှာမှုနှင့် မုန်တီးမှုသည် ခေါင်းဆောင်၏ မျက်လုံးထဲမှာ ထွက်ပေါ်လာသည်။ သူက မျက်မှောင်ကြုတ်လိုက်ပြီး ကောင်းကင်ပေါ်မှ ဧရာမမျက်လုံးကို စိုက်ကြည့်လိုက်သည်။

ဧရာမအက်ကွဲကြောင်းတစ်ခုသည် ကောင်းကင်ပေါ်မှာ ထွက်ပေါ်လာသည်။ အဆုံးမဲ့သော ရွှေရောင်အလင်းတန်းသည် ထိုအက်ကွဲကြောင်းထဲမှ ဖြာဆင်းကျလာပြီး မြေပြင်ပေါ်တွင် ပြန့်ကျဲသွားသည်။

ဤဧရိယာတစ်ဝိုက်မှာရှိသော တိမ်တိုက်များနှင့် မြူခိုးသည် ပြိုကွဲပျက်စီးသွားကြပြီး ဆက်လက် မတည်ရှိကြတော့ပေ။

မြေပြင်ပေါ်မှ ချော်ရည်သည် ချက်ချင်း အေးခဲသွားပြီး မလှုပ်ရှားဝံ့ချေ။

ဤနေရာမှ နိယာမအားလုံးသည် တိုက်ရိုက် ပယ်ဖျက်ခံလိုက်ရသည်။ ဤနေရာမှ ဥပဒေသအားလုံးသည်လည်း ဝေဝါးလာကြသည်။

နတ်ဘုရားများ၏ အရှေ့တွင် နိယာမများမရှိပေ။

ကောင်းကင်ပေါ်မှ အက်ကွဲကြောင်းက ပွင့်ဟသွားသည့်အခါ ရွှေရောင်အလင်းတန်းကြားထဲတွင် အေးစက်စက် မျက်လုံးတစ်လုံး ထွက်ပေါ်လာသည်။ မျက်လုံးမှာ မည်သည့်စိတ်ခံစားချက်မှ မရှိသလို မည်သူမှ ထိုမျက်လုံးကို တိုက်ရိုက် မကြည့်နိုင်ကြပေ။ မျက်လုံးသည် ကောင်းကင်ပေါ်တွင် အထွတ်အမြတ်တည်ရှိမှုတစ်ခုသဖွယ် တည်ရှိနေသည်။

ဤသည်မှာ ၎င်း၏ အကြည့်အောက်မှာ အရာအားလုံးက ဖုန်မှုန့်သာဖြစ်ဟန် ရသည်။

ဒြပ်နှောများ၏ အစွမ်းသည် လောကထဲမှာ ချက်ချင်း ပြည့်နှက်သွားသည်။ အချိန်နှင့် လေဟာနယ်သည် ပေါင်းစပ်သွားပြီး မရေမတွက်နိုင်သော သက်ရှိများက မှေးမှိန်သွားကြသည်။ ဖြစ်နိုင်ခြေအားလုံးသည် ပေါ်ထွက်လာပြီး ပျက်စီးသွားသည်။

ဤသည်မှာ အစမဟုတ်သလို အဆုံးသတ်မဟုတ်ပေ။ ယင်းက မြင့်တတ်ခြင်း မဟုတ်သလို နိမ့်ကျခြင်း မဟုတ်ပေ။

ထိုအကြည့်အောက်မှာ တားမြစ်ဇုန်တစ်ခု စတင်ထွက်ပေါ်လာသည်။

မရေမတွက်နိုင်သော မီးတောက်နွယ်ပင်များသည် အေးခဲနေသော ချော်ရည်ပင်လယ်ထဲမှ ကြီးထွားလာကြသည်။ နွယ်ပင်များက လှုပ်ယမ်းသွားသည့်အခါ သက်ရှိအားလုံး၏ မျက်နှာများသည် ယင်းတို့ပေါ်မှာ ထွက်ပေါ်လာကြသည်။ သူတို့အားလုံးက နာကျင်သော အော်ဟစ်သံကို ထုတ်ဖော်နေကြသည်။ နွယ်ပင်များ၏ နယ်နိမိတ်သည် ဆက်လက် ကျယ်ပြန့်သွားသည်။

ထို့အတူ တောင်တန်းများနှင့် မြစ်ချောင်းများသည်လည်း တအိအိ လှုပ်ခါသွားကြသည်။

အတိုင်းအတာတစ်ခုထိဆိုရလျှင် ယင်းက နတ်ဘုရားမျက်နှာပျက်ကြီး၏ စွမ်းအားနှင့် ဆင်တူသည်။ သို့သော်လည်း နတ်ဘုရားမျက်နှာပျက်ကြီး၏ အကြည့်သည် အစစ်အမှန် တားမြစ်ဇုန်တစ်ခုကို ဖန်တီးနိုင်ပေသည်။ ယင်းက မပြောင်းလဲနိုင်သော သဘာဝအလျောက် ဖြစ်ရပ်တစ်ခုလည်း မှန်သည်။

ယခု မီးလျှံနေနတ်ဘုရား၏ အကြည့်အောက်မှာ တားမြစ်ဇုန်၏ သန္ဓေသားလောင်းပုံစံက ထွက်ပေါ်လာသော်လည်း ယင်းထဲမှာ တားမြစ်ဇုန်၏ အခြေခံအုတ်မြစ်မရှိပေ။ ဤသည်မှာ နတ်ဘုရား၏ အကြည့်က ပျောက်ကွယ်သွားသည်နှင့် ၎င်းသည်လည်း လွင့်ပြယ်သွားမည့်သဘော ရှိသည်။

သို့သော်လည်း မည်သို့ဖြစ်ပါစေ ထိုအကြည့်က အရာအားလုံးကို တုန်လှုပ်စေနိုင်စွမ်း ရှိသည်။

မင်းသားကြီးနှင့် တခြားလူများသည် စတင်သန္ဓေပြောင်းလဲသွားကြသည်။ ဖော်မပြနိုင်သော နာကျင်မှုက သူတို့၏ ခန္ဓာကိုယ်တစ်လျှောက်သို့ ပျံ့နှံ့သွားသည့်အခါ သူတို့က နာကျင်စွာ အော်ဟစ်ညည်းညူလိုက်ကြသည်။

ခေါင်းဆောင်သည် သန္ဓေပြောင်းလဲခြင်းကို တားဆီးရန် အကောင်းဆုံး ကြိုးစားလိုက်သည်။ သို့သော်လည်း အရည်ပျော်နေသော လက္ခဏာရပ်များက သူ၏ ခန္ဓာကိုယ်ပေါ်မှာ ထွက်ပေါ်လာကြသည်။

နတ်ဘုရား၏ အကြည့်အောက်မှာ ရွှီချင်း၏ ခန္ဓာကိုယ်သည်လည်း သက်ရောက်ခံလိုက်ရပြီး ဝေဝါးလာသည်။ သူ၏ ခန္ဓာကိုယ်ထဲမှ အသွေးအသားများသည် ဤအခိုက်အတန့်မှာ သီးခြားလွတ်လပ်သော တည်ရှိမှုများ ဖြစ်လာကြသည်။ ဤသည်မှာ ၎င်းတို့က သူ၏ ခန္ဓာကိုယ်ထဲမှ ခွဲထွက်ချင်နေသည့်အလားပင်။

အရေအတွက်များပြားသော အသားအဖုများသည် သူ၏ နတ်ဘုရားအသွင်သဏ္ဍာန် ခန္ဓာကိုယ်ပေါ်မှာ ထွက်ပေါ်လာကြပြီး ပျံ့ပွားသွားကြသည်။

(ဃ၁၃၂)သည်လည်း ထိုနတ်ဘုရားအကြည့်အောက်နှင့် အနီရောင်နွယ်ပင်များ၏ ရစ်ပတ်မှုအောက်မှာ အစိတ်စိတ်အမွှာမွှာ အက်ကွဲသွားသည်။

နတ်ဘုရားလက်ချောင်းသည် တုန်ယင်သွားသည်။ အကျဉ်းထောင်တစ်ခုလုံးသည် သာမန်မျက်စိဖြင့် မြင်နိုင်သော အလျင်နှင့်အတူ ဝေဝါးလာနေသည်။ ဤသည်မှာ အချိန်သည် မင်းသားမင်နန်အတွက် ရပ်တန့်သွားဟန် ရ၏။ ထို့အတူ ဘေးပတ်ဝန်းကျင်တွင် ရွှီချင်းက စည်းချထားသော အစီအရင်များသည်လည်း အသက်မဝင်လာကြတော့ချေ။

သူ၏ ခန္ဓာကိုယ်သည် နောက်ဆုံးမှာတော့ ပြန်ဖွဲ့စည်းသွားသည်။

သို့သော်လည်း ဤတစ်ကြိမ်တွင် သူက အကောင်းတိုင်း ပြန်ဖြစ်သွားသော်လည်း သူ့မှာ မသေမျိုးစွမ်းရည်မရှိတော့ပေ။ သူ၏ အမူအရာသည် ယခင်ကဲ့သို့ မောက်မာထောင်လွှားခြင်း မရှိတော့ပေ။ သူ၏ မျက်နှာသည် မည်းမှောင်နေသည်။ သူ၏ မျက်လုံးထဲမှာ ကပ်ဘေးမှ လွတ်မြောက်ခဲ့ခြင်းကြောင်း ဝမ်းသာသော အရိပ်အယောင် တစ်စွန်းတစ်စ ရှိသည်။ သူက သန္ဓေပြောင်းလဲနေသော ရွှီချင်းကို ကြည့်လိုက်သည့်အခါ သူ၏ မျက်လုံးထဲတွင် ရူးသွပ်မှုအရိပ်အယောင် ထွက်ပေါ်လာသည်။

“ ငါ့မှာ အဆင့်မြင့်နတ်ဘုရားမီးလျှံနေရဲ့ ကောင်းချီးရှိတယ်… လူသား… နတ်ဘုရားရဲ့ အကြည့်အောက်မှာ မင်းက ပုရွက်ဆိတ်တစ်ကောင်ထက် မပိုဘူး ”

ရွှီချင်းသည် မင်းသားမင်နန်ကို ဂရုမစိုက်သလို သူ၏ ခန္ဓာကိုယ်ပေါ်မှာ ထွက်ပေါ်လာနေသော အသားအဖုများကိုလည်း ဂရုမစိုက်ပေ။ ထို့အတူ သီးခြားခွဲထွက်ချင်နေသော သူ၏ အသွေးအသားများကိုလည်း လျစ်လျူရှုထားသည်။

သန္ဓေပြောင်းလဲခြင်းကို တွေ့ကြုံရသည်မှာ ဤတစ်ကြိမ်သည် သူ့အတွက် ပထမဆုံး မဟုတ်ပေ။ သူက ယင်းကို ကျင့်သားမရသေးသော်လည်း အကယ်၍ အရင်းအမြစ်သာ ပျောက်ကွယ်သွားမည်ဆိုလျှင် သူက အများဆုံး အသက်ဓာတ်တချို့ကိုသာ ဆုံးရှုံးလိမ့်မည်ဖြစ်ကြောင်း သိထားသည်။

ထို့ကြောင့် သူက ခေါင်းမော့လိုက်ပြီး ကောင်းကင်ပေါ်မှ ဧရာမမျက်လုံးကို ကြည့်လိုက်သည်။

နတ်ဘုရားများကို တိုက်ရိုက် မကြည့်နိုင်သော်လည်း ရွှီချင်း၏ မျက်လုံးသည် မည်းနက်နေသည်။

တားမြစ်အဆိပ်၏ အားဖြည့်ပေးမှုကြောင့် သူက နတ်ဘုရားမျက်လုံးကို အတိုင်းအတာတစ်ခုထိ ကြည့်နိုင်သွားသည်။

ရွှီချင်းသည် နတ်ဘုရားမျက်လုံးကို စိုက်ကြည့်ပြီးနောက် အသက်ပြင်းပြင်းရှူသွင်းလိုက်သည်။ သူ၏ နတ်ဘုရားအသွင်သဏ္ဍာန်သည် ချက်ချင်း လွင့်ပြယ်သွားသည်။ သန်းပေါင်းများစွာသော ဝိညာဉ်ချည်မျှင်များသည် မြန်ဆန်စွာ လှည့်ပတ်သွားကြပြီး သူ၏ ခန္ဓာကိုယ်အပြင်ဘက်တွင် ထပ်မံ စုဝေးသွားကြသည်။ ယင်းတို့က ခန္ဓာကိုယ်တစ်ခုကို မြန်ဆန်စွာ ရက်လုပ်လိုက်ကြသည်။

ထိုခန္ဓာကိုယ်သည် ရွှံ့မြေခွေး၏ ခန္ဓာကိုယ်ဖြစ်သည်။

၎င်းက အလွန်ရှည်လျားပြီး သူ၏ မှတ်ဉာဏ်များထဲမှ ရွှံ့မြေခွေးနှင့် အတူတူဖြစ်သည်။

၎င်းသည် အဆင့်မြင့်နတ်ဘုရားမီးလျှံကြယ်ဖြစ်သည်။

ရွှံ့မြေခွေး၏ ခန္ဓာကိုယ်ကို ဖွဲ့စည်းပြီးသည်နှင့်ချက်ချင်း ရွှီချင်းသည် သူ၏ ညာလက်ကို မြှောက်တင်လိုက်သည်။ ထို့နောက် သူက ရွှံ့မြေခွေးပေးထားသော တုံကင်ကို ကောင်းကင်ပေါ်သို့ မြင့်မြင့်မြှောက်လိုက်သည်။

မီးလျှံနေ၏ အကြည့်အောက်မှာ တုံကင်သည် တုန်ယင်လာသည်။ နောက်အခိုက်အတန့်မှာ အဆုံးမဲ့သော ကြယ်အလင်းတန်းများသည် ဘေးပတ်ဝန်းကျင်မှာ ထွက်ပေါ်လာကြပြီး ရွှီချင်း၏ ခန္ဓာကိုယ်ပေါ်သို့ ကျဆင်းသွားကြသည်။

ယင်းက စီးဆင်းနေသော ကြယ်မြစ်ကြီးတစ်စင်းနှင့် ဆင်တူသည်။ ဘေးပတ်ဝန်းကျင်မှ ကြယ်အလင်းရောင်သည် ပန်းနုရောင်မီးတောက်များအဖြစ်သို့ ပြောင်းလဲသွားသည်။

မီးလျှံကြယ်၏ အစွမ်းသည် တစ်ဟုန်ထိုး ပေါ်လျှိုးလာသည်။

လောကကြီးသည် တုန်ယင်သွားသည်။ မြေပြင်ပေါ်မှ အနီရောင်နွယ်ပင်များသည် တစ်ပြိုင်နက် ရပ်တန့်သွားကြသည်။ ဤလောကကြီးကို လွှမ်းခြုံထားသော ဒြပ်နှောများသည် ပန်းနုရောင်မီးတောက်များကို ခုခံတားဆီးနေကြသည်။

မိုးခြိမ်းသံသည် ဟင်းလင်းပြင်ထဲမှာ ပဲ့တင်ထပ်သွားပြီး ပေါက်ကွဲထွက်သွားသည်။

ထိုမြင်ကွင်းသည် မင်းသားမင်နန်၏ အမူအရာကို ပျက်ယွင်းသွားစေသည်။

“ မီးလျှံကြယ်… နတ်တမန်တော်…”

ကြယ်အလင်းရောင်၏ လွှမ်းခြုံခံထားရသော ရွှီချင်းသည် ဤအခိုက်အတန့်မှာ မီးလျှံကြယ်၏ စစ်မှန်သော နတ်တမန်တော်တစ်ပါး ဖြစ်လာဟန် ရသည်။ ထို့ပြင် ယင်းက အမြင့်ဆုံးအဆင့် ဖြစ်သည်။

သူက နေရာမှာ ရပ်နေစဉ် ပန်းရောင်မီးတောက်များသည် ကောင်းချီးဖြစ်လာပြီး စက်ဝိုင်းသဏ္ဍာန် ဆက်လက် လှည့်ပတ်သွားသည်။ ယင်းက မြန်ဆန်စွာ လှည့်ပတ်သွားပြီး ဧရာမဝဲကတော့တစ်ခုသို့ ပြောင်းလဲသွားကာ ဟင်းလင်းပြင်ကို တုန်လှုပ်သွားစေသည်။

ရွှီချင်းက အလောင်းအစားလုပ်ခဲ့ခြင်း ဖြစ်သည်။

ကြီးမြတ်သော အဆင့်မြင့်နတ်ဘုရားတစ်ပါးက ဗလာနတ္ထိအဆင့် ကျင့်ကြံသူတစ်ယောက်အတွက် ၎င်း၏ နတ်ဘုရားမျက်လုံးကို အမှန်တကယ် ဖွင့်လှစ်လိမ့်မည်မဟုတ်ဟု သူက အလောင်းအစားလုပ်ခဲ့ခြင်း ဖြစ်သည်။ ဤတစ်ကြိမ် ကောင်းကင်ပေါ်မှာ ထွက်ပေါ်လာသော ဧရာမမျက်လုံးသည် ကောင်းချီးစွမ်းအား၏ သရုပ်ပြမှုတစ်ခုသာ ဖြစ်သည်။

ယင်းက ကောင်းချီးဖြစ်သော်လည်း နတ်ဘုရားများ၏ နားလည်မှုအရ ဗလာနတ္ထိအဆင့်ကျင့်ကြံသူသည် ၎င်းတို့အတွက် သေမျိုးများနှင့် မခြားနားပေ။

အတိုင်းအတာတစ်ခုထိဆိုရလျှင် ယင်းက အမှန်တကယ် အလောင်းအစားပြုလုပ်ခြင်း မဟုတ်ပေ။ နတ်ဘုရားများအပေါ် ရွှီချင်း၏ နားလည်ထားမှုက ကျင့်ကြံသူအများအပြားထက် သာလွန်နေခြင်းသာ ဖြစ်သည်။

ထို့ကြောင့် သူက ဝိညာဉ်ချည်မျှင်များဖြင့် ရွှံ့မြေခွေးကို ဖွဲ့စည်းလိုက်ပြီး ၎င်းကို သူ၏ လက်ထဲမှ တုံကင်ဖြင့် ပေါင်းစပ်လိုက်လေရာ မီးလျှံကြယ်၏ အရှိန်အဝါသည် အကာအကွယ်အတတ်ပညာတစ်ခုအဖြစ် ပြောင်းလဲသွားသည်။

တစ်ဖက်လူ၏ မျက်လုံးက အစစ်အမှန် ဟုတ်သည်ဖြစ်စေ မဟုတ်သည်ဖြစ်စေ ရွှီချင်းသည် မှန်ကန်သော ဘက်မှာ အလောင်းအစားပြုလုပ်နိုင်ခဲ့သည်။

ကောင်းကင်ပေါ်မှ ဧရာမရွှေရောင်မျက်လုံးသည် ရွှီချင်းကို အေးစက်စွာ စိုက်ကြည့်လိုက်သည်။ ထို့နောက် ၎င်းက တုံကင်ကို ကြည့်လိုက်သည်။

ထို့နောက် မျက်လုံးသည် ဖြည်းညင်းစွာ မှိတ်သွားသည်။ နောက်ဆုံးမှာတော့ ကောင်းကင်ပေါ်မှ အက်ကွဲကြောင်းသည် စတင်လွင့်ပြယ်သွားသည်။ တစ်ခဏကြာပြီးနောက် အက်ကွဲကြောင်းသည် လုံးဝပျောက်ကွယ်သွားသည်။

ဧရာမမျက်လုံးသည် ထွက်ခွာသွားပြီ ဖြစ်သည်။

ရွှီချင်းသည် သူ၏ သရုပ်ကို သက်သေပြပြီးပြီ ဖြစ်သည်။ မည်သို့ဖြစ်ပါစေ နတ်ဘုရားတစ်ပါး၏ အဆင့်မြင့်ဆုံး နတ်တမန်တော်နှင့် နှိုင်းယှဉ်လျှင် အရေးမကြီးသော အစေခံတစ်ယောက်သည် ထုံးစံအားဖြင့် စွန့်ပစ်ခံရလိမ့်မည်။

ထိုမြင်ကွင်းသည် မင်းသားမင်နန်၏ မျက်နှာကို ချက်ချင်း ဖြူဖျော့သွားစေသည်။ သူက ပျောက်ကွယ်သွားသော ဧရာမမျက်လုံးကို ကြည့်လိုက်သည်။ ထို့နောက် သူက ရွှီချင်းကို ကြည့်လိုက်သည်။ ဆန္ဒမရှိခြင်း၊ စိတ်ပျက်ခြင်းနှင့် ခံပြင်းဒေါသထွက်ခြင်း အစရှိသော ခံစားချက်မျိုးစုံသည် သူ၏ နှလုံးသားထဲမှာ ထွက်ပေါ်လာကြသည်။ ယင်းက သူ၏ အသိစိတ်ကို ပရမ်းပတာ ဖြစ်သွားစေသည်။

သူ၏ အကြီးမားဆုံး ဝှက်ဖဲသည် တစ်ဖက်လူ၏ အရှေ့မှာ အသုံးမဝင်ခဲ့ပေ။

သူ၏ နောက်ခံသည် ဤအခိုက်အတန့်မှာ လုံးဝအဓိပ္ပာယ်မဲ့သွားသည်။

ဤသည်မှာ သူမမျှော်လင့်ထားသော ရလဒ်ဖြစ်သည်။ မည်သို့ဖြစ်ပါစေ ရွှီချင်းက အဆင့်မြင့်နတ်ဘုရားမီးလျှံကြယ်၏ နတ်တမန်တော်ဖြစ်နေလိမ့်မည်ဟု သူလုံးဝမမျှော်လင့်ထားခဲ့ပေ။

‘ ဒီကိစ္စက… ’

မင်းသားမင်နန်သည် မင်းသားကြီးနှင့် တခြားလူများကို အေးစက်စွာ စိုက်ကြည့်လိုက်သည်။

သူ၏ အမြင်မှာ ထိုလူများက ဤကိစ္စကို သိထားသော်လည်း တမင်မသိချင်ယောင် ဟန်ဆောင်ခဲ့ကြခြင်းဖြစ်သည်။ ထို့ကြောင့် သူက မှားယွင်းသော ဆုံးဖြတ်ချက်ကို ချမှတ်ခဲ့ခြင်းဖြစ်သည်။

သို့မဟုတ်လျှင် အဘယ့်ကြောင့် သူက ရွှီချင်းကို တမင်စောင့်ဆိုင်းနေမည်နည်း။

သို့သော်လည်း ယခု နောင်တရရန် အလွန်နောက်ကျသွားချေ၏။ သူက မသေမျိုးစွမ်းရည်နှင့် ဝှက်ဖဲကတ်ကို ဆုံးရှုံးသွားပြီ ဖြစ်သည်။ အစောနက ရွှီချင်း၏ ရက်စက်ကြမ်းကြုတ်မှုနှင့် အကြင်နာမဲ့မှုကို စဉ်းစားမိသွားသောအခါ သူက နှလုံးတုန်သွားသည်။

ထို့ကြောင့် သူက လုံးဝတုံ့ဆိုင်းမနေဘဲ ခေါင်းလှည့်လိုက်သည်။ သူက အဝေးသို့ ထွက်ပြေးသွားစဉ် သူ၏ ခန္ဓာကိုယ်ထဲမှ ချီနှင့် သွေးသည် လောင်ကျွမ်းသွားသည်။

ယခုအချိန်မှာ တစ်ဖက်လူ၏ အကျဉ်းထောင်က လွင့်ပြယ်နေခြင်းကို သူက အခွင့်ကောင်းယူပြီး ဤနေရာမှ ထွက်ပြေးချင်သည်။

တည်နေရာပြောင်းရွှေ့ခြင်းသည် ချက်ချင်း အသက်ဝင်လာသည်။

သို့သော်လည်း ရွှီချင်းက မည်သို့ကြောင့် သူ့ကို ထွက်ပြေးခွင့်ပေးနိုင်မည်နည်း။ သတ်ဖြတ်ခြင်းစိတ်ဆန္ဒသည် သူ၏ မျက်လုံးထဲမှာ ဖြတ်ပြေးသွားသည်။

စီနီယာအကိုကြီး…

သူက ခေါင်းဆောင်ကို အော်ခေါ်လိုက်ပြီးနောက် လက်ဝှေ့ယမ်းလိုက်သည်။ ထိုအခါ တားမြစ်လက်နက်လေးခုသည် မင်းသားမင်နန်၏ အနောက်သို့ ပျံသန်းသွားကြသည်။

ကျင်းကန်းဂိုဏ်းဘိုးဘေးသည်လည်း ဟင်းလင်းပြင်ထဲမှာ ပုန်းအောင်းနေရာမှ ထွက်ပေါ်လာပြီး အရှိန်မြှင့်တင်လိုက်သည်။ သူက ချောက်ချားဖွယ်ကောင်းစွာ ရယ်မောလိုက်သေးသည်။ ယင်းက သူ့ကိုယ်သူ စိတ်ဓာတ်မြှင့်တင်ခြင်းလော သို့မဟုတ် မင်းသားမင်နန်ကို ခြိမ်းခြောက်လိုခြင်းလော မသိရပေ။

ကြယ်လက်ချောင်းလေးချောင်းသည် ကောင်းကင်ပေါ်မှာ ဖြစ်ပေါ်လာကြပြီး မင်းသားမင်နန်ကို ဖိနှိပ်လိုက်သည်။

ခေါင်းဆောင်သည် ရယ်မောလိုက်သည်။ မျက်စိတစ်မှိတ်အတွင်းမှာ အပြာရောင်အလင်းသည် သူ၏ ခန္ဓာကိုယ်ထဲမှ ပေါက်ကွဲထွက်လာသည်။ ယင်းက ကောင်းကင်ပေါ်သို့ တစ်ဟုန်ထိုး ပျံတတ်သွားသည့်အခါ ကောင်းကင်ဘုံခွေး၏ ချောက်ချားဖွယ်ကောင်းသော ပါးစပ်ပေါက်အဖြစ် ပြောင်းလဲသွားသည်။ ကြီးမားသော ပါးစပ်သည် မင်းသားမင်နန်ဆီသို့ တန်းမတ်စွာ ဦးတည်သွားသည်။

အပြာရောင်အလင်းသည် ဘေးပတ်ဝန်းကျင်ကို လွှမ်းခြုံသွားသည်။ မင်းသားမင်နန်၏ တည်နေရာပြောင်းရွှေ့ခြင်းက အသက်ဝင်လာတော့မည့်အချိန် ရွှီချင်း၏ နတ်ဘုရားအတတ်ပညာနှင့် တားမြစ်လက်နက်များက သူ့ကို တားဆီးရန် ရောက်ရှိလာကြသည်။

ရွှီချင်းနှင့် ခေါင်းဆောင်သည်လည်း တစ်ချိန်တည်းမှာ ရောက်ရှိလာကြသည်။ သူတို့နှစ်ယောက်သည် နည်းလမ်းအသီးသီးဖြင့် တိုက်ခိုက်လိုက်ကြသည်။

တစ်ယောက်က ဓားမြှောင်ဖြင့် လှီးဖြတ်လိုက်ပြီး တခြားတစ်ယောက်က အကြင်နာမဲ့စွာ ကိုက်စားလိုက်သည်။

သူတို့သည် စကားများဖြင့် ဆက်သွယ်ရန် မလိုအပ်ပေ။ သူတို့ကြားမှာ စိတ်ချင်းဆက်သွယ်မှု ရှိသည်။

မင်းသားမင်နန်သည် အတတ်နိုင်ဆုံး ခုခံတားဆီးလိုက်သည်။ သို့သော်လည်း သူက မည်သို့ပင် ခုခံတားဆီးပါစေ အချည်းနှီးသာ ဖြစ်၏။

နောက်ဆုံးမှာတော့ သူ၏ ခန္ဓာကိုယ်က တားမြစ်လက်နက်လေးခုဖြင့် ထိုးဖောက်ခံလိုက်ရသည့်အခါ သူက နှလုံးကွဲကြေစွာ အော်မြည်လိုက်သည်။ သူ၏ ခန္ဓာကိုယ်တစ်ဝက်သည် အပြာရောင်အလင်းဖြင့် ကိုက်စားခံလိုက်ရပြီး သူ၏ လည်ပင်းသည် ထက်ရှသော ဓားမြှောင်ဖြင့် ပိုင်းဖြတ်ခံလိုက်ရသည်။

ဦးခေါင်းပြတ်သည် လေထဲသို့ မြှောက်တတ်သွားသည်။

ကျင်းကန်းဂိုဏ်းဘိုးဘေးသည် သူ၏ နဖူးကို ထိုးဖောက်သွားသည်။

ဤသည်မှာ အမြစ်ဖြတ်သုတ်သင်ခြင်း ဖြစ်သည်။

သို့သော်လည်း မင်းသားမင်နန်သည် အတော်လေး အံ့ဖွယ်ကောင်းသည်။ သူက ထိုသို့သတ်ဖြတ်ခြင်းနှင့် တွေ့ကြုံနေရသော်လည်း သူ၏ ခန္ဓာကိုယ်သာ ယိုယွင်းပျက်စီးသွားခဲ့သည်။ သူ၏ ဝိညာဉ်သည် ထိုအခွင့်အရေးကို အသုံးချပြီး ထွက်ပြေးသွားသည်။

တည်နေရာပြောင်းရွှေ့ခြင်းက အသက်ဝင်လာသည့်အခါ သူ၏ ဝိညာဉ်သည် ပျောက်ကွယ်သွားသည်။

ရွှီချင်းသည် ချိပ်တံဆိပ်လက်ဟန်များကို ဆက်တိုက် ဖွဲ့စည်းလိုက်ပြီး လက်ညှိုးညွှန်လိုက်သည်။ တားမြစ်လက်နက်လေးခုသည် ထိတ်လန့်ဖွယ်ကောင်းသော သတ်ဖြတ်ခြင်းစိတ်ဆန္ဒကို ထုတ်လွှတ်လိုက်ကြပြီး ဝိညာဉ်ပျောက်ကွယ်သွားသော နေရာဆီသို့ တန်းမတ်စွာ ပျံသန်းသွားကြသည်။ ဤသည်မှာ ဝိညာဉ်က ထိုနေရာမှာ သေချာပေါက် ပြန်ပေါ်လာလိမ့်မည်ဟု ၎င်းတို့က တွက်ချက်ထားဟန် ရသည်။

ခေါင်းဆောင်သည် ပြုံးလိုက်သည်။ သူက အသားအပိုင်းအစငါးခုကို ထုတ်လိုက်ပြီး မန္တန်တစ်ခုကို ထုတ်ဖော်လိုက်သည်။

နောက်အခိုက်အတန့်မှာ တည်နေရာပြောင်းရွှေ့သွားသော မင်းသားမင်နန်၏ ဝိညာဉ်သည် ဝဲကတော့ထဲမှ တိုက်ရိုက် ဆွဲထုတ်ခံလိုက်ရသည်။ သူ၏ အမူအရာမှာ မယုံကြည်နိုင်ခြင်း၊ စိတ်ပျက်အားငယ်ခြင်းဖြင့် ပြည့်နှက်နေပြီး သူက စကားပြောရန် ပါးစပ်ဟလိုက်သည်။

သို့သော်လည်း အလွန်နောက်ကျသွားချေ၏။

သူထွက်ပေါ်လာသည်နှင့်ချက်ချင်း ရွှီချင်း၏ တားမြစ်လက်နက်လေးခုသည် မင်းသားမင်နန်၏ အရှေ့မှာ ထွက်ပေါ်လာကြပြီး သူ၏ ဝိညာဉ်ကို အကြမ်းပတမ်း ထိုးဖောက်သွားကြသည်။

ဆေဘာဓားရှည်သည် ဖြတ်တောက်လိုက်ပြီး တိုက်ပွဲပုဆိန်သည် ဖျက်ဆီးလိုက်သည်။ သုံးခွခက်ရင်းသည် ၎င်း၏ အနာဂတ်ကို အမြစ်ဖြတ်သုတ်သင်ပစ်လိုက်ပြီး လှံသည် ၎င်း၏ အတိတ်ကို လောင်ကျွမ်းပစ်လိုက်သည်။

နှလုံးကွဲကြေသော အော်သံက ပျံ့လွင့်လာသည့်အခါ ဝိညာဉ်သည် ချက်ချင်း လွင့်ပြယ်သွားသည်။

မင်းသားမင်နန်၏ ဝိညာဉ်သည် အမြစ်ဖြတ်သုတ်သင်ခံလိုက်ရသည်။

ခေါင်းဆောင်၏ ပုံရိပ်သည် အပြာရောင်အလင်းထဲမှာ ထွက်ပေါ်လာသည်။ သူက နှုတ်ခမ်းသပ်လိုက်ပြီး အဝေးမှ မင်းသားကြီးနှင့် တခြားလူများကို ပြုံးပြလိုက်သည်။

ရွှီချင်းသည်တော့ မင်းသားမင်နန်သေဆုံးသွားသော နေရာဆီသို့ ရောက်ရှိသွားသည်။ သူက ညာလက်ကို မြှောက်လိုက်ပြီး ဟင်းလင်းပြင်ကို ဖမ်းဆုပ်လိုက်သည်။ ချက်ချင်းဆိုသလို လေထဲမှ တားမြစ်တောင်များသည် အမြန်ပျံသန်းရောက်ရှိလာကြပြီး သူ၏ ဦးခေါင်းပေါ်မှာ စုဝေးသွားကြသည်။

မင်းသားမင်နန်ထံမှာ တားမြစ်တောင်(၄၀၀)နီးပါး ရှိသည်။

ယင်းတို့က ရွှီချင်း၏ တားမြစ်တောင်(၃၀၀)ကျော်ဖြင့် ပေါင်းစပ်သွားသည့်အခါ ယခု သူ့မှာ တားမြစ်တောင်(၇၀၀)ကျော်ခန့် ရှိသွားသည်။ သူ၏ ဦးခေါင်းပေါ်မှ တားမြစ်တောင်များသည် တအိအိလှုပ်ခါသွားကြပြီး ကြောက်မက်ဖွယ်ကောင်းသော ဖိအားတစ်ခုကို ထုတ်လွှတ်လိုက်သည်။

ယင်းတို့ထံမှ အဖျက်အဆီးဆန္ဒသည် ပိုပြီးထင်ရှားလာသည်။

ထိုမြင်ကွင်းကို အဝေးမှ လူသားကျင့်ကြံသူများက မြင်သွားသောအခါ ပရမ်းပတာ နှလုံးတုန်သွားကြသည်။ သူတို့အားလုံးသည် ရွှီချင်းကို ချက်ချင်း အရိုအသေပေးလိုက်ကြသည်။ သို့သော်လည်း လူတချို့သည် စိုးရိမ်ကြောင့်ကြသော အမူအရာဖြင့် မင်းသားမင်နန်သေဆုံးသွားသော နေရာကို ကြည့်နေကြသည်။

သူတို့က ပါးစပ်မှ ထုတ်မပြောသော်လည်း လူတိုင်းသည် သူတို့၏ အတွေးများကို နားလည်ကြသည်။

မည်သို့ဖြစ်ပါစေ မင်းသားမင်နန်၏ ခမည်းတော်သည် မီးလျှံလမျိုးနွယ်ထဲမှာ မြင့်မားသော ရာထူးကို ပိုင်ဆိုင်ထားသည်။ ယခု သူ၏ သားက အသတ်ခံလိုက်ရပြီဖြစ်သောကြောင့် သူ၏ ဒေါသက လူသားမျိုးနွယ်ပေါ်သို့ ကျရောက်သွားနိုင်သည်။

ရွှီချင်းသည် ထိုအချင်းအရာကို မြင်သောကြောင့် မင်းသားကြီးကို ကြည့်လိုက်သည်။

မင်းသားကြီးသည် နှုတ်ဆိတ်သွားသည်။ အသက်ရှူချိန်အနည်းငယ် ကြာပြီးနောက် သူက လူတိုင်း၏ ခန္ဓာကိုယ်ပေါ်မှ ကြာပွတ်ရာများကို ကြည့်လိုက်ပြီး လမ်းတစ်လျှောက်တွင် သူတို့တွေ့ကြုံခဲ့ရသော အစော်ကားခံရမှုကို ပြန်တွေးတောလိုက်သည်။ သူက တိုးညင်းစွာ ပြောသည်။

“ ဒါက ငါ့အမှားပါ… ငြိမ်းချမ်းရေးကို ဂုဏ်သိက္ခာနဲ့ လဲလှယ်လို့ မရဘူး ”

ဤသည်ကို ခေါင်းဆောင်ကြားသောအခါ သူ၏ အကြည့်သည် လေးနက်သွားပြီး သူက တည်ငြိမ်စွာ ပြောသည်။

“ သွေးမထွက်ဘဲနဲ့ ငြိမ်းချမ်းရေးရတယ်ဆိုတာ ဒီလောကကြီးမှာ မရှိဘူး… ရန်သူ့ဘက်ကပဲဖြစ်ဖြစ် ငါတို့ဘက်ကပဲဖြစ်ဖြစ် အလုံအလောက် သွေးမထွက်ဘဲနဲ့တော့ ငြိမ်းချမ်းရေးက ဘယ်တော့မှ ရောက်လာမှာမဟုတ်ဘူး ”