ရွှီချင်းကို အမဲလိုက်ခြင်း

ရွှီချင်းသည် ဂျိဒုန်းဇီကို တစ်ခါမှ မတွေ့ဆုံဖူးသော်လည်း မင်းသားကြီး၏ မိတ်ဆက်ပေးမှုအရ တစ်ဖက်လူအကြောင်းကို အနည်းငယ် သိထားသည်။

“ မီးလျှံလရွှမ်ကောင်းကင်မျိုးနွယ်ရဲ့ အဆင့်နှစ်ကောင်းကင်အရွေးချယ်ခံ ”

ရွှီချင်း၏ အမူအရာသည် တည်ကြည်လေးနက်သွားသည်။ အကယ်၍ သူက အစွမ်းကုန် ထုတ်သုံးပြီး တိုက်ခိုက်မည်ဆိုလျှင် အဆင့်သုံးဖြစ်သော ဖန်းရှီရွှမ်းနှင့် သရေသာ ကျလိမ့်မည်ဟု ခံစားမိသည်။

သို့သော်လည်း ထိုသို့တိုက်ပွဲသည် သူ့ကို စွမ်းအင်အများကြီး ကုန်ဆုံးစေလိမ့်မည်။ သူက အနာဂတ်တွင် ပြန်လည်အားပြည့်လာရန် အချိန်အများကြီး လိုအပ်လိမ့်မည်။ ယင်းက ဒုတိယပြိုင်ပွဲမှာ သူ့အား အကျိုးယုတ်စေလိမ့်မည်။

ခရမ်းသလင်းကျောက်ဖြင့် သူ၏ ဒဏ်ရာများကို ကုသမည်ဆိုလျှင်ပင် နတ်ဘုရားအရင်းအမြစ်များနှင့် ဝိညာဉ်ချည်မျှင်များကို ပြန်လည်အားဖြည့်ရန် အချိန်အတော်ကြာ စောင့်ဆိုင်းရလိမ့်မည်။

ဂျိဒုန်းဇီသည် ဖန်းရှီရွှမ်းနှင့် သုံးကြိမ်တိုက်ခိုက်ခဲ့ပြီး အကြိမ်တိုင်းမှာ အလွယ်လေး အနိုင်ရခဲ့သည်။ မင်းသားကြီးပေးခဲ့သော ကျောက်စိမ်းပြားထဲမှ ဖော်ပြမှုအရ နောက်ဆုံးအကြိမ်တွင် အကယ်၍ ရွှမ်မီးလျှံသာ ဝင်မစွက်ဖက်ခဲ့ဘူးဆိုလျှင် ဂျိဒုန်းဇီသည် ဖန်းရှီရွှမ်းကို သတ်ပစ်လိမ့်မည်။

သူက ထိုသို့လူ၏ ပြိုင်ဘက်မဟုတ်ကြောင်း ရွှီချင်း သိသည်။

မည်သို့ဖြစ်ပါစေ သူ၏ ကျင့်ကြံခြင်းအခြေခံသည် မလုံလောက်သေးပေ။

တစ်ဖက်လူက သတင်းဖြန့်ပြီး သူ့ကို လိုက်ရှာဖွေနေသည့် နောက်ကွယ်မှ အကြောင်းအရင်းသည်တော့ အရေးမကြီးပေ။ အမှန်မှာ သူခန့်မှန်းနိုင်သော အကြောင်းအရင်းများစွာ ရှိပေသည်။

ထို့ကြောင့် ရွှီချင်းသည် တစ်ခဏ စဉ်းစားပြီးနောက် ပိုပြီးသတိကြီးစွာထား၍ ရွေ့လျားလိုက်သည်။ သူက ဖုံးကွယ်ခြင်းကို ပိုပြီးအာရုံစိုက်လိုက်သည်။

သန္ဓေပြောင်းသားရဲတစ်ကောင်ကို မရခင်အထိ ထိုသို့သော လူနှင့် သူမတွေ့ဆုံချင်ပေ။ သေခြင်းရှင်ခြင်းတိုက်ပွဲကို ရင်ဆိုင်ခြင်းသည် ကိစ္စတစ်ခုဖြစ်ပြီး သူ၏ အစီအစဉ်က နှောင့်ယှက်ခံရခြင်းသည် တခြားကိစ္စတစ်ခု ဖြစ်သည်။ ထိုနှစ်ခုသည် မတူညီပေ။

“ ငါ့ရဲ့ ဦးတည်ရာဆီ ရောက်ဖို့ ဆယ်ရက်လိုသေးတယ်… ”

တောအုပ်ထဲတွင် ရွှီချင်းသည် အရှေ့သို့ ရွေ့လျားသွားနေရင်း စိတ်ထဲမှာ တီးတိုးရေရွတ်လိုက်သည်။

ထိုသို့ဖြင့် အချိန်သည် တရွေ့ရွေ့ စီးဆင်းသွားပြီး နောက်ထပ်ငါးရက် ကုန်ဆုံးသွားပြန်သည်။

ထိုငါးရက်အတွင်းမှာ ရွှီချင်းသည် သူ၏ ခြေရာလက်ရာများကို ဖုံးကွယ်ရန် အကောင်းဆုံး ကြိုးစားခဲ့သည်။ မီးလျှံလရွှမ်ကောင်းကင်မျိုးနွယ်ဝင်များနှင့် တွေ့ဆုံလျှင် သူက အဝေးမှာသာ နေပြီး အနားသို့ မချဉ်းကပ်သွားခဲ့ပေ။ သူက ပုန်းအောင်းနေပြီး တစ်ဖက်လူ ထွက်သွားမည့်အချိန်ကို စောင့်ဆိုင်းခဲ့သည်။

သို့သော်လည်း တစ်ခါတစ်ရံ အရာအားလုံးသည် တစ်စုံတစ်ယောက်၏ စိတ်ဆန္ဒအတိုင်း ဖြစ်မလာနိုင်ပေ။ တောင်တန်းပင်လယ်ဒေသကြီးထဲတွင် ကျင့်ကြံသူများသာမက ကြောက်မက်ဖွယ်ကောင်းသော သားရဲများနှင့် ထူးထူးဆန်းဆန်း သက်ရှိများက အများအပြား ရှိသည်။

ထူးထူးဆန်းဆန်း သက်ရှိများကို အရိပ်လေး၏ အကူအညီဖြင့် ခြိမ်းခြောက်နိုင်သော်လည်း ကြောက်မက်ဖွယ်သားရဲများအတွက်တော့ ကံတရားပေါ်မှာ မူတည်သည်။

တစ်စုံတစ်ယောက်က အမြဲတမ်း ကံကောင်းနေရန် မဖြစ်နိုင်ပေ။ ပဉ္စမမြောက်နေ့တွင် အပေါ်ပိုင်းစက်ဝန်းနှင့် အောက်ပိုင်းစက်ဝန်းကြားမှ အလယ်ပိုင်းဧရိယာထဲ၌ ကျူးလီတားမြစ်ဇုန်နှင့် အနီးနားတစ်နေရာတွင် ရွှီချင်းသည် ကောင်းကင်ပေါ်တွင် ပျံသန်းနေသော တောင်စာကလေးအုပ်စုနှင့် တွေ့ဆုံသွားသည်။

တောင်စာကလေးအုပ်စုကို မြင်သွားပြီးနောက် ရွှီချင်းသည် ၎င်းတို့ကို ရှောင်ရှားရန် တွန့်ဆုတ်မနေခဲ့ပေ။

၎င်းတို့ကို တောင်စာကလေးဟု ခေါ်ဆိုရခြင်းမှာ ၎င်းတို့၏ ကျောပေါ်တွင် တောင်များကို သယ်ဆောင်ထားသောကြောင့်ဖြစ်သည်။

၎င်းတို့က အရွယ်အစား အလွန်ကြီးမားပြီး ကျောပေါ်တွင် တောင်ကို သယ်ဆောင်ထားလျက် ပျံသန်းနေကြသည်။ ထို့ကြောင့် ကျင့်ကြံသူများသည် ရံဖန်ရံခါ တောင်များက ကောင်းကင်ပေါ်မှာ ပျံသန်းနေသည်ဟု အထင်မှားလေ့ရှိသည်။ ယင်းက ပထမပြိုင်ပွဲတွင် ကျင်းပခဲ့သော တောင်ရွှေ့ခြင်းနှင့် အနည်းငယ် ဆင်တူသည်။

ထို့ပြင် တောင်စာကလေးများသည် အုပ်စုလိုက်နေထိုင်လေ့ရှိပြီး အရေအတွက်အများအပြားဖြင့် အမဲလိုက်လေ့ရှိသော သားရဲအမျိုးအစားဖြစ်သည်။

၎င်းတို့က အံ့ဖွယ်ခွန်အားကို ပိုင်ဆိုင်ထားကြသည်။ အမဲလိုက်ထွက်သည့် တောင်စာကလေးအားလုံးသည် အရွယ်ရောက်ပြီးသား ဖြစ်ကြသည်။ ၎င်းတို့၏ တိုက်ပွဲစွမ်းအားသည် ဗလာနတ္ထိပထမအဆင့်မှ ပြီးပြည့်စုံသော ဗလာနတ္ထိအဆင့်ထိ အသီးသီး ရှိကြသည်။

၎င်းတို့က အရေအတွက် အလွန်များပြားသည်။ ထို့ကြောင့် ဒုတိယပြိုင်ပွဲမှ ပြိုင်ဝင်သူအားလုံးအတွက် ၎င်းတို့က ခေါင်းကိုက်စရာ ဖြစ်သည်။

အဘယ့်ကြောင့်ဆိုသော် တောင်စာကလေး၏ အစာအုပ်စုသည် အလွန်ကျယ်ပြောပေသည်။ ၎င်းတို့က သားရဲများကို စားသောက်သည့်အပြင် ကျင့်ကြံသူများအား ဝါးမျိုရခြင်းကို ပိုပြီးသဘောကျကြသည်။

ယခု ရွှီချင်းတွေ့ကြုံနေရသည်မှာ အမဲလိုက်ရန် အပြင်ထွက်လာသော တောင်စာကလေးအုပ်စုဖြစ်သည်။ ၎င်းတို့၏ မွေးရာပါစွမ်းရည်ကြောင့် ၎င်းတို့က ရွှီချင်း၏ ခြေရာလက်ရာများကို ချက်ချင်း အာရုံခံမိသွားကြသည်။ ၎င်းတို့က ရုတ်တရက် လေထဲမှာ လမ်းကြောင်းပြောင်းလိုက်ပြီး ရွှီချင်းဆီသို့ တန်းတန်းမတ်မတ် ထိုးဆင်းလာကြသည်။

ရွှီချင်းသည် မျက်မှောင်ကြုတ်လိုက်သည်။ တောင်စာကလေးအုပ်စုသည် အနည်းဆုံး အကောင်တစ်ရာကျော်သည်။ သူက တစ်ခဏကြာ နှုတ်ဆိတ်နေပြီးနောက် အလျင်ကုန်သုံး၍ ထွက်ပြေးသည်။

လောကကြီးသည် တုန်ယင်သွားသည်။ တောင်စာကလေးအုပ်စု၏ အမဲလိုက်မှုမှ ထွက်ပေါ်လာသော စွမ်းအင်လှိုင်းအတတ်အကျများသည် အရပ်မျက်နှာအဘက်ဘက်သို့ ပျံ့နှံ့သွားသည်။ ၎င်းတို့က စူးရှသော အော်မြည်သံကို ထုတ်လွှတ်လိုက်သည်။ ဤသည်မှာ ၎င်းတို့က နောက်ထပ် အပေါင်းအဖော်များကို ဆင့်ခေါ်နေသည့်အလားပင်။

အေးစက်စက် အလင်းသည် ရွှီချင်း၏ မျက်လုံးထဲမှာ ထွက်ပေါ်လာသည်။ သူ၏ မျက်လုံးသည် ချက်ချင်း မည်းနက်သွားသည်။ ခရမ်းလက အပေါ်သို့ မြှောက်တတ်သွားပြီး ခြိမ်းခြောက်သည့် စွမ်းအားကို ထုတ်လွှတ်လိုက်သည်။ ထိုအခါ သူ့နောက်သို့ လိုက်ဖမ်းနေကြသော တောင်စာကလေးအုပ်စုသည် ရပ်တန့်သွားသည်။

ရွှီချင်းသည် ထိုအချိန်ကို အခွင့်ကောင်းယူ၍ ပိုပြီးမြန်ဆန်စွာ ထွက်ပြေးသည်။ သို့သော်လည်း ကောင်းကင်ပေါ်မှ တောင်စာကလေးအုပ်စု ထုတ်လွှတ်နေသော စွမ်းအင်လှိုင်းအတတ်အကျများသည် အနီးနားမှာ ဖြတ်သန်းသွားနေသော ကျင့်ကြံသူများ၏ စိတ်အာရုံကို ဆွဲဆောင်သွားသည်။

ထိုကျင့်ကြံသူများ၏ အမူအရာသည် ပြောင်းလဲသွားပြီး သူတို့က မြန်ဆန်စွာ အနောက်ဆုတ်သွားကြသည်။ သူတို့က ထိုဧရိယာနားသို့ မချဉ်းကပ်ဝံ့ကြချေ။ သူတို့ထဲမှာ စီအဲမျိုးနွယ်ဝင်နှစ်ယောက်လည်း ပါဝင်ကြသည်။ အဝေးမှ တောင်စာကလေးအုပ်စုကို မြင်သွားသောအခါ သူတို့က ထိတ်လန့်သွားကြသည်။ ထို့နောက် သူတို့၏ အမူအရာက ချက်ချင်း ပြောင်းလဲသွားပြီး အသံပို့လွှတ်ကျောက်စိမ်းပြားကို တစ်ပြိုင်နက်တည်း ထုတ်လိုက်ကြသည်။

ယင်းက အထူးကျောက်စိမ်းပြားဖြစ်သည်။ ကျောက်စိမ်းပြားသည် ခရမ်းရောင်ဖြစ်ပြီး ယခု ထွန်းလင်းတောက်ပနေသည်။

သူတို့က ဘေးပတ်ဝန်းကျင်ကို စစ်ဆေးကြည့်ပြီးနောက် အနောက်ဆုတ်သွားသည်။ တစ်ချိန်တည်းမှာ သူတို့က အံကြိတ်လိုက်ပြီး အသံပို့လွှတ်ရန် ပြင်လိုက်သည်။

သို့သော်လည်း နောက်အခိုက်အတန့်မှာ လေခွင်းသံက ထွက်ပေါ်လာပြီး သူတို့၏ အနောက်မှာ အနက်ရောင်မြူခိုးတစ်ခု ဖြစ်ပေါ်လာသည်။ မြူခိုးက သူတို့ကို လွှမ်းခြုံသွားသည့်အခါ တားမြစ်အဆိပ်သည် ပေါက်ကွဲထွက်လာသည်။ အော်ဟစ်ညည်းညူသံများသည် မြူခိုးထဲမှ ပဲ့တင်ထပ်လာသည်။ မကြာမီ မြူခိုးက လွင့်ပြယ်သွားသည့်အခါ မြေပြင်ပေါ်တွင် အနက်ရောင်သွေးအိုင်များနှင့် ပြန့်ကျဲနေသော သိုလှောင်အိတ်များသာ ကျန်ရှိတော့သည်။

မြေပြင်ပေါ်တွင် ရွှီချင်း၏ ပုံရိပ်က ထွက်ပေါ်လာသည်။ သူက သိုလှောင်အိတ်နှစ်လုံးနှင့် အထူးကျောက်စိမ်းပြားနှစ်ခုကို ကောက်ယူလိုက်သည်။ ထို့နောက် သူက နောက်လှည့်မကြည့်ဘဲ အရှိန်မြှင့်တင်လိုက်သည်။

သို့သော်လည်း သူက မျက်မှောင်ကြုတ်နေသည်။

သူက စီအဲမျိုးနွယ်ဝင်နှစ်ယောက် အသံမပို့လွှတ်နိုင်ခင်မှာ သူတို့ကို အချိန်ကိုက် သတ်ဖြတ်နိုင်ခဲ့သော်လည်း ထိုခရမ်းရောင်ကျောက်စိမ်းပြားနှစ်ခုက သူ့အား ဆိုးဝါးသော ခံစားမှုကို ပေးသည်။

“ ဒီဟာက ခရမ်းလယုံကြည်ကိုးကွယ်သူတွေရဲ့ သွေးတွေနဲ့ ကျိန်စာအတတ်ပညာတွေကို ပေါင်းစည်းပြီး ဖန်တီးထားတာပဲ… ”

ရွှီချင်းသည် ကျောက်စိမ်းပြားနှစ်ခုကို တစ်ချက်ကြည့်လိုက်ရုံဖြင့် ယင်း၏ နောက်ကွယ်မှ ကုန်ကြမ်းပစ္စည်းများကို ပြောနိုင်သည်။

သူက ကျောက်စိမ်းပြားများကို ချေမွလိုက်သည်။ သူ့အကြောင်းကို သတင်းဖြန့်ပေးရန် နောက်ထပ် မလိုအပ်တော့ကြောင်း ဝေဝေဝါးဝါး သူခံစားမိနေသည်။

သူ့အား ခြေရာခံရန် အထူးဖန်တီးထားသော ထိုကျောက်စိမ်းပြားထဲမှာ သူ့ဘာသာ သတင်းပို့နိုင်သော အကျိုးသက်ရောက်မှုမရှိကြောင်း ရွှီချင်း မယုံကြည်ပေ။

“ ငါအတွေးများနေတာလည်း ဖြစ်နိုင်တယ်… ငါ့ရဲ့ ဦးတည်ရာဆီရောက်ဖို့ ငါးရက်လိုသေးတယ် ”

ရွှီချင်းသည် မျက်လုံးမှေးကျဉ်းလိုက်ပြီး ခေါင်းမော့လိုက်ကာ ကျူးလီတားမြစ်ဇုန်၏ ဦးတည်ရာဆီသို့ လှမ်းကြည့်လိုက်သည်။

သူက ကျူးလီတားမြစ်ဇုန်၏ အစွန်းနှင့် သိပ်မဝေးတော့ချေ။

ကျူးလီတားမြစ်ဇုန်တစ်ခုလုံးမှာ အလွန်ထူထဲသော မီးခိုးရောင်မြူခိုးဖြင့် ပြည့်နှက်နေသည်။ နေရောင်ခြည်သည်ပင် ယင်းကို မထိုးဖောက်နိုင်ပေ။ မီးခိုးရောင်မြူခိုးက ဖြည်းညင်းစွာ တအိအိလှုပ်ရှားနေလေရာ ယင်းက သေခါနီးအဖိုးအိုတစ်ယောက်၏ နောက်ဆုံးနေဝင်ချိန်ဟူသော ခံစားမှုကို ပေးသည်။

ရံဖန်ရံခါ မြူခိုးသည် နာကျင်ခံစားနေရသော မျက်နှာများအဖြစ်သို့ ပြောင်းလဲသွားပြီး အသံမထွက်ဘဲ ငိုကြွေးလိမ့်မည်။ ယင်းက ဘေးပတ်ဝန်းကျင်မှ ဟင်းလင်းပြင်ကို တအိအိလှိုင်းထသွားစေသည်။

ဝေဝေဝါးဝါး ပုံရိပ်များသည်လည်း မြူခိုးထဲမှာ ထွက်ပေါ်လာဟန် ရသည်။ သို့သော်လည်း ၎င်းတို့ကို ရှင်းလင်းစွာ မမြင်နိုင်သလို မမှတ်မိနိုင်ပေ။

ဝမ်းနည်းခြင်းနှင့် ရူးသွပ်ခြင်းကိန်းဝပ်နေသော ဟိန်းသံများသည် မြူခိုး၏ အနက်ပိုင်းထဲမှ ပဲ့တင်ထပ်နေသည်။

ထိုဟိန်းသံများက တစ်စုံတစ်ယောက်၏ စိတ်ထဲသို့ ဝင်ရောက်သွားသည့်အခါ ဝိညာဉ်ကို လှုပ်ခတ်သွားစေလိမ့်မည်။ ထို့နောက် တဖြည်းဖြည်း ကြောက်ရွံ့ခြင်းနှင့် စိတ်မသက်မသာဖြစ်ခြင်းကို ခံစားရလာလိမ့်မည်။

အထူးသဖြင့် ရွှီချင်း၏ နတ်ဘုရားအရင်းအမြစ်ဖြစ်သည်။ သူ၏ နတ်ဘုရားအရင်းအမြစ်များက အမှန်တကယ် ဖိနှိပ်ခံနေရသည်။ ဤသည်မှာ နတ်ဘုရားစွမ်းရည်များက ထိုနေရာနှင့် သဟဇာတမဖြစ်ဟန် ရသည်။

မြူခိုးထဲမှ အခြေအနေသည်တော့ လျှို့ဝှက်ဆန်းကြယ်မှုများဖြင့် ပြည့်နှက်နေသည်။

“ ကျူးလီတားမြစ်ဇုန်… ”

ရွှီချင်းက တီးတိုးရေရွတ်လိုက်သည်။

သူက မြူခိုးထဲမှ ပထဝီအနေအထားနှင့် အခြေအနေကို ရှင်းလင်းစွာ မမြင်နိုင်သော်လည်း ပြင်းထန်သော ဖိနှိပ်စွမ်းအားကို အာရုံခံနိုင်သည်။ ကျူးလီတားမြစ်ဇုန်မှ တိုက်ခတ်နေသော အပျက်အစီးလေသည် ရွှီချင်း၏ နှလုံးသားထဲသို့ ရှင်းလင်းစွာ ရောက်ရှိလာသည်။

လေက ပိုပြီးပြင်းထန်လာသည့်အခါ ရွှီချင်း၏ ဆံပင်သည် တဖျပ်ဖျပ် လွင့်မျောသွားသည်။

လေထဲတွင် သူ၏ ဆံပင်က ညှိုးခြောက်နေသည့် လက္ခဏာများ ပြလာသည်။ ဤသည်မှာ လေက သူ၏ အသက်ဓာတ်တချို့ကို လုယူသွားသည့်အလားပင်။

ထိုမြင်ကွင်းကြောင့် ရွှီချင်းသည် ကျူးလီတားမြစ်ဇုန်ကို ပိုပြီးစိုးရိမ်လာသည်။

သူသည် ယခင်က တားမြစ်ဇုန်အများအပြားကို မြင်ခဲ့ဖူးပြီး တားမြစ်ဒေသကြီးတချို့ဆီကိုပင် အလည်အပတ်သွားခဲ့ဖူးသည်။

သို့သော်လည်း ဤနေရာသည် ယခင်က သူရောက်ခဲ့ဖူးသော နေရာများနှင့် လုံးဝခြားနားသည်။

“ ဒီနေရာက သင်္ချိုင်းတစ်ခုနဲ့ ပိုပြီးဆင်တူတယ် ”

ရွှီချင်းက အနီးကပ်ကြည့်လိုက်သည့်အခါ သူ၏ အကြည့်က လေးနက်သွားသည်။ ထို့နောက် သူက အကြည့်ပြန်ရုပ်လိုက်ပြီး ရှန်းချီခြင်္သေ့နယ်မြေ၏ ဦးတည်ရာဆီသို့ တိုးသက်စွာ ရွေ့လျားသွားသည်။

တစ်ချိန်တည်းမှာ သူက စီနီယာအကိုကြီးဆီ အသံပို့လွှတ်လိုက်သည်။

ဤအတောအတွင်းမှာ သူက နေ့တိုင်း ထိုသို့လုပ်ဆောင်ခဲ့သည်။ သို့သော်လည်း အကွာအဝေးက အလွန်ဝေးကွာသဖြင့် သူ၏ အသံပို့လွှတ်မှုက တစ်ဖက်လူဆီသို့ မရောက်ရှိဟန် ရ၏။ မည်သည့်တုံ့ပြန်မှုကိုမှ ပြန်မရချေ။

ရွှီချင်းသည် ခေါင်းခါလိုက်ပြီး အသံပို့လွှတ်ကျောက်စိမ်းပြားကို ပြန်သိမ်းဆည်းလိုက်သည်။ ထို့နောက် သူက အဝေးသို့ ဆက်လက် ပျံသန်းသွားသည်။

တစ်ရက်ကြာပြီးနောက် အောက်ပိုင်းစက်ဝန်း၏ အစွန်းဘက်ဧရိယာတွင် ပေါက်ကွဲသံများက တရစပ် ပဲ့တင်ထပ်လာပြီး မြူခိုးက လေထဲမှာ ရစ်ဝဲနေသည်။ မကြာမီ စီအဲမျိုးနွယ်ဝင်များ၏ ပုံရိပ်များသည် မြူခိုးထဲမှ ပြေးထွက်လာကြသည်။ သို့သော်လည်း အဆုံးမှာ သူတို့က သွေးအိုင်အဖြစ်သို့ ပြောင်းလဲသွားကြသည်။

မြူခိုးလွင့်ပြယ်သွားပြီးနောက် ရွှီချင်းက အထဲမှ ထွက်လျှောက်လာသည်။

သူ၏ အနောက်တွင် စီအဲမျိုးနွယ်ဝင်ဒါဇင်ကျော်ရှိသည်။

ရွှီချင်းသည် ခေါင်းလှည့်လိုက်ပြီး သူ့အနောက်မှ ပုပ်သိုးဆွေးမြေ့နေသော အလောင်းများကို သုန်မှုန်သော အမူအရာဖြင့် ကြည့်လိုက်သည်။

အစောနက ဤနေရာကို သူဖြတ်သန်းသွားစဉ် ချုံခိုတိုက်ခိုက်ခံခဲ့ရသည်။

တစ်ဖက်လူသည် သူ၏ တည်နေရာကို အတိအကျ ခန့်မှန်းနိုင်ဟန် ရ၏။ ထို့ပြင် သူတို့က သူတို့၏ အသက်ကို လုံးဝဂရုမစိုက်ကြပေ။ သူ့ကို မြင်သည်နှင့် သူတို့က ဖောက်ခွဲသည့် နည်းလမ်းမျိုးစုံကို ချက်ချင်း အသုံးပြုလိုက်ကြသည်။

ကိုယ့်ကိုယ်ကို အသေခံဖောက်ခွဲသည့် လူတချို့ပင် ရှိသည်။

ရွှီချင်း၏ အမြင်မှာ သူတို့၏ ရည်ရွယ်ချက်သည် သူ့ကို သတ်ရန် မဟုတ်ပေ။ ယင်းအစား အချိန်ဆွဲရန် ဖြစ်သည်။

အရေးကြီးဆုံးမှာ သူတို့တစ်ယောက်စီတွင် ခရမ်းရောင်အထူးကျောက်စိမ်းပြားတစ်ခု ရှိကြသည်။

“ ငါ့ရဲ့ ခန့်မှန်းမှုက မမှားဘူး… ”

ရွှီချင်းသည် နှုတ်ဆိတ်သွားသည်။ သူက ခေါင်းမော့လိုက်ပြီး သူ့အရှေ့ကို ကြည့်လိုက်သည်။

သူ၏ ဦးတည်ရာသို့ရောက်ရန် လေးရက်လိုသေးသည်။

“ ဒီလူတွေက ငါ့ကို အချိန်ကြန့်ကြာအောင် လုပ်နေတာပဲ… ဒါဆိုရင် ဂျိဒုန်းဇီက ငါနဲ့ သိပ်မဝေးလောက်တော့ဘူး ”

“ နောက်လာမယ့်ရက်တွေမှာ အဆင်ပြေချောမွေ့ဖို့ အရမ်းခက်ခဲသွားပြီ… ဒါ့အပြင် ငါ့ရဲ့ တည်နေရာက ပစ်မှတ်ထားခံနေရတယ်… တကယ်လို့ ငါက ရှန်းချီခြင်္သေ့နယ်မြေထဲကို အောင်အောင်မြင်မြင် ရောက်သွားမယ်ဆိုရင်တောင် အနာဂတ်မှာ အန္တရာယ်တွေနဲ့ ရင်ဆိုင်ရဦးလိမ့်မယ်… အဲ့ဒါက အဓိပ္ပာယ်မရှိဘူး ”

“ ဂျိဒုန်းဇီကို ရင်ဆိုင်ဖို့အတွက် နည်းလမ်းတစ်ခု ငါစဉ်းစားရမယ်… ပြီးတော့ ငါ့တည်နေရာက ဖော်ထုတ်ခံနေရတာကိုလည်း ဖြေရှင်းရမယ် ”

“ အဲ့လိုမဟုတ်ဘဲ ဒီအတိုင်း ဆက်သွားနေမယ်ဆိုရင် ပြဿနာတွေက အဆုံးသတ်တော့မှာ မဟုတ်ဘူး ”

ရွှီချင်းသည် နှုတ်ဆိတ်သွားသည်။ တချို့အရာများကို ကြိုပြင်ဆင်ထားသင့်ကြောင်း သူသိသည်။ သို့မှသာလျှင် သူက သေခြင်းရှင်ခြင်းအခြေအနေကို ပြောင်းပြန်လှန်ပစ်နိုင်မည့် အခွင့်အရေးကို ဖမ်းဆုပ်နိုင်လိမ့်မည်။

ထို့ကြောင့် တစ်ခဏကြာ စဉ်းစားပြီးနောက် သူ၏ အကြည့်က ရှန်းချီခြင်္သေ့နယ်မြေထံမှ ရွှေ့ပြောင်းသွားပြီး သူကျော်ဖြတ်ခဲ့သော ကျူးလီတားမြစ်ဇုန်ဆီ ရောက်ရှိသွားသည်။

ထိုနေရာသည် တောင်တန်းပင်လယ်ဒေသကြီးထဲမှ တစ်ခုတည်းသော တားမြစ်ဧရိယာဖြစ်သည်။ ယခု သူရှိနေသော တည်နေရာမှဆိုလျှင် ထိုနေရာသို့ ရောက်ရန် တစ်ရက်ကြာ ခရီးနှင်ရလိမ့်မည်။

ရွှီချင်းသည် ကျူးလီတားမြစ်ဇုန်ကို ကြည့်နေရင်း တစ်ခဏကြာ နှုတ်ဆိတ်သွားသည်။ မကြာမီ စိတ်ဓာတ်ပြတ်သားသော အရိပ်အယောင်က သူ၏ မျက်လုံးထဲမှာ ထွက်ပေါ်လာသည်။

“ တိုက်ပွဲစွမ်းအားအရဆိုရင် ငါက ဂျိဒုန်းဇီထက် နိမ့်နိုင်တယ်… ဒါပေမဲ့ အသက်ရှင်သန်တဲ့ နေရာမှာတော့… ”

ရွှီချင်းက ခရမ်းသလင်းကျောက်ကို အာရုံခံလိုက်ရသည့်အခါ အနည်းငယ် စိတ်အေးသွားသည်။ သူက ခန္ဓာကိုယ်ကို ရွေ့လျားလိုက်ပြီး ဦးတည်ရာကို ပြောင်းလဲလိုက်ကာ ကျူးလီတားမြစ်ဇုန်ဆီသို့ အရှိန်မြှင့်တင်လိုက်သည်။

ရွှီချင်း၏ ခန့်မှန်းမှုသည် မမှားယွင်းပေ။ သူထွက်သွားပြီး လေးနာရီကြာပြီးနောက် သက်တံ့တစ်စင်းသည် လောကကို အထင်သေးရှုံ့ချသော အရှိန်အဝါနှင့်အတူ အဝေးမှ ပျံသန်းလာသည်။

ယင်းက အစောနက ရွှီချင်းရှိနေခဲ့သော နေရာသို့ ချက်ချင်း ရောက်ရှိလာသည်။ သက်တံ့က လွင့်ပြယ်သွားသည့်အခါ ပုံရိပ်တစ်ခုအဖြစ် အသွင်ပြောင်းလဲသွားသည်။

ထိုလူသည် ဂျိဒုန်းဇီဖြစ်သည်။

သူက မြေပြင်ပေါ်မှာ ရပ်နေလျက် စီအဲမျိုးနွယ်ဝင်များ သေဆုံးသွားခဲ့သော နေရာကို ကြည့်လိုက်သည်။ ထို့နောက် သူက မျက်လုံးမှိတ်လိုက်ပြီး အာရုံခံလိုက်သည်။

“ ကျူးလီတားမြစ်ဇုန်ဆီလား ”

ဂျိဒုန်းဇီက တည်ငြိမ်စွာ ပြောသည်။

“ သူက ငတုံးမဟုတ်ဘူးပဲ… ဒါပေမဲ့ ငါ့လက်ထဲကနေ လွတ်မြောက်ဖို့ဆိုတာ မဖြစ်နိုင်တဲ့အရာပဲ ”

ဂျိဒုန်းဇီ၏ အမူအရာသည် အေးစက်သွားသည်။ သူက အရှေ့သို့ ခြေတစ်လှမ်း လှမ်းလိုက်လေရာ ဘေးပတ်ဝန်းကျင်မှ လေသည် ပြိုကွဲသွားသည်။ သူက ရွှီချင်း၏ တည်နေရာကို ပစ်မှတ်ထားလိုက်ပြီး အရှေ့သို့ တစ်ဟုန်ထိုး ပျံသန်းသွားသည်။

ထိုသို့ဖြင့် တစ်ယောက်သည် အရှေ့မှ ပြေးနေပြီး တခြားတစ်ယောက်သည် အနောက်မှ လိုက်ဖမ်းနေသည်။ ခြောက်နာရီကြာပြီးနောက် ရွှီချင်း၏ အမူအရာသည် ပျက်ယွင်းသွားပြီး ရုတ်တရက် ခေါင်းလှည့်ကြည့်လိုက်သည်။

သူက မိုးကုပ်စက်ဝိုင်းကို ကြည့်လိုက်သည့်အခိုက် တိမ်တိုက်များနှင့် မြူခိုးသည် ပေါက်ကွဲထွက်သွားသည်။ ဟင်းလင်းပြင်သည်လည်း ပရမ်းပတာ တွန့်လိမ်သွားသည်။ အနီရောင်အလင်းတန်းတစ်ခုသည် အရပ်မျက်နှာအဘက်ဘက်သို့ ပျံ့နှံ့သွားနေပြီး လောကကြီးနှင့် ဆက်သွယ်သွားကာ သူ့ဆီသို့ ဥက္ကာပျံတစ်စင်းနှယ် ပျံသန်းလာနေသည်။

သွေးပင်လယ်ထဲတွင် အနက်ရောင်ပုံရိပ်တစ်ခုက ရွှီချင်းကို အေးစက်စွာ စိုက်ကြည့်နေသည်။