စတုတ္ထမြောက်နတ်ဘုရားလား

သွေးပင်လယ်သည် ကောင်းကင်ယံတွင် ပြည့်နှက်နေသည်။

အဝေးမှကြည့်လျှင် ကမ္ဘာပျက်ကပ်ဘေးက ဆင်းသက်လာနေဟန် ရ၏။

သွေးပင်လယ်က တအိအိလှုပ်ရှားသွားလေရာ အထဲမှ ဝတ်ရုံနက်ပုံရိပ်သည် အစွမ်းကြီးမားပြီး မြင့်မြတ်ထည်ဝါစွာ ထွက်ပေါ်လာသည်။ သူက အလွန်အစွမ်းထက်သော အရှိန်အဝါကို ထုတ်လွှတ်လိုက်သည်။

သူနှင့်နှိုင်းယှဉ်လျှင် ရွှီချင်း၏ အရှိန်အဝါသည် အလွန်အားနည်းသည်။ တစ်ချိန်တည်းမှာ ကြီးမားသော ဖိအားသည် ရွှီချင်း၏ စိတ်ထဲသို့ ချက်ချင်း ဆင်းသက်လာသည်။

သူ၏ ခန္ဓာကိုယ်ထဲမှ အစိတ်အပိုင်းအားလုံးသည် တုန်ယင်သွားသည်။ ပြင်းထန်သော သေခြင်းရှင်ခြင်းသတိပေးမှုသည် ကောင်းကင်ဘုံတာအိုမိုဆာဆောထံမှ ထွက်ပေါ်လာသည်။

ထိုသတိပေးမှုသည် အလွန်အမင်း အားကောင်းသည်။

ဤသည်မှာ ရွှီချင်းရင်ဆိုင်ခဲ့ဖူးသမျှထဲမှာ အသန်မာဆုံး ကောင်းကင်အရွေးချယ်ခံဖြစ်သည်။

ထုန်ရှီရှန်ဖြစ်စေ ဖန်းရှီရွှမ်းဖြစ်စေ သူတို့ဆီမှာ ထိုသို့ပြိုင်ဘက်ကင်းသော အရှိန်အဝါမျိုး မရှိပေ။ သူက ပထမလူကို အနိုင်ယူနိုင်ပြီး ဒုတိယလူကို သရေကျအောင် တိုက်ခိုက်နိုင်သော်လည်း ဂျိဒုန်းဇီ၏ ပြိုင်ဘက်မဟုတ်ကြောင်းကိုတော့ ရှင်းလင်းစွာ သိထားသည်။

ထို့ကြောင့် သူက အနောက်ဆုတ်သွားနေရင်း ကျင့်ကြံခြင်းအခြေခံကို ထုတ်လွှတ်လိုက်သည်။ မရေမတွက်နိုင်သော ဝိညာဉ်ချည်မျှင်များသည် သူ၏ ခန္ဓာကိုယ်ထဲမှ ထွက်ပေါ်လာပြီး စတုတ္ထနတ်ဘုရားအသွင်သဏ္ဍာန်ကို ချက်ချင်း ဖွဲ့စည်းလိုက်သည်။

စတုတ္ထနတ်ဘုရားအသွင်သဏ္ဍာန်ကို ဖွဲ့စည်းပြီးသည်နှင့်ချက်ချင်း သူက အနောက်ဆုတ်သွားသည်။

“ မင်းက ဉာဏ်ကောင်းသားပဲ… ဒါပေမဲ့ ငါ့ကို မြင်လိုက်တာနဲ့ မင်းမလွတ်မြောက်နိုင်တော့ဘူး ”

ကောင်းကင်ပေါ်တွင် ဂျိဒုန်းဇီက တည်ငြိမ်စွာ ပြောသည်။ သူက ညာလက်ကို မြှောက်လိုက်ပြီး ရွှီချင်းပေါ်သို့ ဖိချလိုက်သည်။

သူ၏ လက်ဝါးဖိချက်နှင့်အတူ ကောင်းကင်ကို ဖုံးလွှမ်းထားသော သွေးပင်လယ်သည် ချက်ချင်း ပရမ်းပတာ လှုပ်ခတ်လာပြီး ကီလိုမီတာ(၅၀၀)အထိ ကျယ်ပြန့်သွားသည်။ ယင်းက တကယ့် သွေးပင်လယ်သဖွယ် အောက်မေ့ရပြီး ရွှီချင်းဆီသို့ တန်းမတ်စွာ ဦးတည်သွားသည်။

သွေးပင်လယ်ဖြတ်သန်းသွားသည့် မည်သည့်နေရာတွင်မဆို ဟင်းလင်းပြင်သည် အက်ကွဲသွားပြီး လောကသည် ဝုန်းခနဲ မြည်ဟိန်းသွားလိမ့်မည်။ ရွှီချင်းကို ဗဟိုပြု၍ အချင်းဝက် ကီလိုမီတာ(၅၀၀)ကျယ်ဝန်းသော တောအုပ်ကြီးသည် တုန်ယင်သွားသည်။ သစ်ပင်ပန်းပင်အားလုံးသည် သွေးရောင်ဖြင့် စွန်းထင်ခံလိုက်ရပြီး မြေပြင်သည် သွေးရွှံ့မြေအဖြစ် ပြောင်းလဲသွားသည်။

ထိုကီလိုမီတာ(၅၀၀)အတွင်းမှာရှိသော သက်ရှိအားလုံးသည် အော်ဟစ်ညည်းညူလိုက်ကြသည်။ ၎င်းတို့၏ အသွင်သဏ္ဍာန်က မည်သို့ဖြစ်ပါစေ၊ ရက်စက်ကြမ်းကြုတ်သော သားရဲများသော်လည်းကောင်း ထူးထူးဆန်းဆန်း သက်ရှိများသော်လည်းကောင်း ၎င်းတို့အားလုံးက သွေးအဖြစ်သို့ ပြောင်းလဲသွားကြသည်။ သွေးအမျှင်တန်းများသည် လေထဲသို့ မြှောက်တတ်သွားကြပြီး သွေးပင်လယ်နှင့် ဆက်သွယ်သွားသည်။

အဝေးမှကြည့်လျှင် မရေမတွက်နိုင်သော သွေးအမျှင်တန်းများက လေထဲသို့ မြှောက်တတ်သွားနေပြီး ဤနေရာကို သွေးလှောင်ချိုင့်အဖြစ် ပြောင်းလဲပစ်နေဟန် ရ၏။

ထိုသွေးပင်လယ်ထဲတွင် မရေမတွက်နိုင်သော သွေးပုံရိပ်များက ပုန်းအောင်းနေကြသည်။ သူတို့က ရွှီချင်းကို လောဘတကြီး စိုက်ကြည့်နေကြပြီး စူးရှသော အော်မြည်သံကို ထုတ်ဖော်လျက် ခုန်အုပ်လိုက်ကြသည်။

ဂျိဒုန်းဇီ၏ တိုက်ခိုက်မှုသည် ရွှီချင်းအတွက် လွတ်မြောက်နိုင်သော လမ်းကြောင်းအားလုံးကို ပိတ်ဆို့ထားပုံပေါ်သည်။

သေခြင်းရှင်ခြင်းကပ်ဘေး၏ ပြင်းထန်သော သတိပေးမှုသည် ဤအခိုက်အတန့်မှာ ရွှီချင်း၏ စိတ်ထဲတွင် ထွက်ပေါ်လာသည်။ သူ၏ အမူအရာသည် မည်းမှောင်သွားသည်။ သူ့အတွက် လွတ်မြောက်နိုင်သော လမ်းကြောင်းအားလုံးက ပိတ်ဆို့ခံထားရကြောင်း သူအာရုံခံနိုင်သည်။ ထို့ကြောင့် သူက ဆက်ပြီး အနောက်မဆုတ်တော့ပေ။ စတုတ္ထနတ်ဘုရားအသွင်သဏ္ဍာန်၏ နတ်ဘုရားအရင်းအမြစ်က ပျံ့နှံ့ထွက်လာသည့်အခါ သူ၏ ဘေးပတ်ဝန်းကျင်သည် ဝေဝါးသွားသည်။

နတ်ဘုရား၏ ရေရွတ်သံနှင့်ဆင်တူသော အသံသည် ရွှီချင်း၏ ပါးစပ်ထဲမှ ထွက်ပေါ်လာသည်။

“ သွေး ”

ထိုစကားသံက လောကကြီးထဲမှာ ပဲ့တင်ထပ်သွားသည်နှင့် သူ့ကို အပေါ်မှ ဖိနှိပ်ထားသော သွေးပင်လယ်သည် ရုတ်တရက် တုန်ယင်သွားသည်။ တစ်ချိန်တည်းမှာ လေထဲသို့ မြှောက်တတ်နေသော တောအုပ်ထဲမှ သွေးအမျှင်တန်းများသည်လည်း ရပ်တန့်သွားကြပြီး စတင်ပုံပျက်လာကြသည်။

ရွှီချင်းက သွေးအခွင့်အာဏာကို ထုတ်လွှတ်လိုက်သည့်အခါ ကြီးမားသော ဆွဲငင်အားသည် လေထဲမှာ ထွက်ပေါ်လာသည်။ ယင်းက သွေးပင်လယ်ကို ဝဲကတော့တစ်ခုအဖြစ် ပြောင်းလဲသွားစေပြီး ရွှီချင်းအပိုင်ဖြစ်လာစေသည်။

သွေးဝဲကတော့က အပြည့်အဝ ဖွဲ့စည်းသွားသည်နှင့် ဤသွေးပင်လယ်သည် ရွှီချင်း၏ ထိန်းချုပ်ခံရလိမ့်မည်။

“ မင်းရဲ့ အခွင့်အာဏာက မဆိုးဘူး… ဒါဆိုရင် မင်းရဲ့ အကန့်အသတ်ကရော ဘယ်လိုလဲ ”

ဂျိဒုန်းဇီက တည်ငြိမ်စွာ ပြောသည်။ ထို့နောက် သူက နောက်တစ်ကြိမ် လက်ဝှေ့ယမ်းလိုက်သည်။ ချက်ချင်းပင် သွေးပင်လယ်က ပရမ်းပတာ လှုပ်ရှားထကြွလာသည်။ သွေးပင်လယ်ထဲမှ သွေးပုံရိပ်အားလုံးသည် တစ်ပြိုင်နက် ဟိန်းဟောက်လိုက်ကြပြီး အရည်ပျော်သွားကြသည်။

ထိုအခါ ကြောက်မက်ဖွယ်ကောင်းသော မြင်ကွင်းတစ်ခုသည် ရွှီချင်း၏ မျက်လုံးထဲမှာ ထွက်ပေါ်လာသည်။ ယင်းက သူ့ကို နှလုံးတုန်သွားစေသည်။

သွေးပင်လယ်ထဲတွင် သွေးပုံရိပ်ရာထောင်ချီရှိသည်။ သွေးပုံရိပ်တစ်ခုက အရည်ပျော်သွားတိုင်း ၎င်းက ပမာဏများပြားသော သွေးကို ဖြစ်ပေါ်စေပြီး သွေးပင်လယ်နှင့် ပေါင်းစပ်သွားသည်။ ထိုအခါ သွေးပင်လယ်သည် ပိုပြီးအံ့ဖွယ်ကောင်းလာသည်။

မျက်စိတစ်မှိတ်အတွင်းမှာ သွေးပုံရိပ်တစ်ရာကျော်က အရည်ပျော်သွားပြီးနောက် သွေးပင်လယ်၏ အကျယ်အဝန်းသည် ကီလိုမီတာ(၃၀၀၀)အထိ မြင့်တတ်သွားသည်။ ယင်းက ဆက်လက် မြင့်တတ်နေဆဲပင်။

၃၅၀၀… ၄၀၀၀… ၄၅၀၀…

နောက်ဆုံးမှာတော့ ကီလိုမီတာ(၅၀၀၀)အထိ ရောက်ရှိသွားသည်။

ကီလိုမီတာ(၅၀၀၀)ကျယ်ပြောသော သွေးပင်လယ်သည် ကြောက်မက်ဖွယ်ကောင်းသော စွမ်းအားကို ထုတ်လွှတ်လိုက်သည်။ ၎င်းထံမှ ထုတ်လွှတ်နေသော အရှိန်အဝါသည် အမြစ်ဖြတ်သုတ်သင်ခြင်းအရှိန်အဝါ ဖြစ်သည်။ ရွှီချင်းမှာ သွေးအခွင့်အာဏာရှိသော်လည်း ကီလိုမီတာ(၅၀၀၀)ကျယ်ဝန်းသော သွေးပင်လယ်က သူ့ကို ဖိအားဖြစ်စေသည်။

ထို့ပြင် ကီလိုမီတာ(၅၀၀၀)သည် အဆုံးသတ်မဟုတ်သေးပေ။

သွေးပုံရိပ်များက ဆက်လက် အရည်ပျော်နေပြီး သွေးပင်လယ်နှင့် ပေါင်းစပ်သွားနေသည်နှင့်အမျှ သွေးပင်လယ်၏ အကျယ်အဝန်းသည် ကီလိုမီတာ(၁၀၀၀၀)ထိ ကျယ်ပြောသွားသည်။

၁၅၀၀၀…၂၀၀၀၀…

နောက်ဆုံးမှာတော့ သွေးပုံရိပ်ရာထောင်ချီက အရည်ပျော်သွားသည့်အခါ သွေးပင်လယ်သည် ကြောက်မက်ဖွယ်ကောင်းစွာ ကီလိုမီတာ(၅၀၀၀၀)အထိ ကျယ်ပြောသွားသည်။

ယင်းက သစ်တောတစ်ခုလုံးကို လွှမ်းခြုံသွားသည်။

ကီလိုမီတာ(၅၀၀၀၀)မှာ အလွန်ကျယ်ပြောသော ဧရိယာဖြစ်သည်။ ဤသည်မှာ ကောင်းကင်တစ်ခုလုံးက သွေးပင်လယ်အဖြစ် အသွင်ပြောင်းလဲသွားသည့်အလား ရွှီချင်းဆီသို့ ကျဆင်းလာနေသည်။ ထို့ပြင် ၎င်းက ဆက်လက် ကျယ်ပြန့်နေဆဲပင်။

ရွှီချင်းသည် သူ၏ အကန့်အသတ်ကို ခံစားမိသောကြောင့် တုန်ယင်လာသည်။ သူ၏ ခန္ဓာကိုယ်က မတည်မငြိမ်ဖြစ်လာပြီး သူ၏ ဝိညာဉ်က ဆုတ်ဖြဲခံနေရသည်။

ထိုသို့အရေးကြီးအခိုက်အတန့်မှာ ရွှီချင်း၏ တိုက်ပွဲအတွေ့အကြုံသည် အရေးကြီးသော သော့ချက်ဖြစ်လာသည်။ ဆုံးဖြတ်ချက်ပြတ်သားမှုက သူ၏ မျက်လုံးထဲမှာ ထွက်ပေါ်လာသည်။ သူက ပြိုကွဲနေသော သွေးအခွင့်အာဏာကို သူ၏ ခန္ဓာကိုယ်အပြင်ဘက်မှာ စုစည်းလိုက်သည်။ ယင်းက သွေးနီရောင်အလင်းကို ဖွဲ့စည်းလိုက်ပြီး ဝဲကတော့တစ်ခုအသွင် ပြောင်းလဲသွားသည်။

ထိုဝဲကတော့ထဲတွင် သူ၏ ခန္ဓာကိုယ်က သွေးအဖြစ်သို့ ပြောင်းလဲသွားပြီး ပြန့်ကျဲသွားသည်။

သူက သွေးပင်လယ်ကို မခုခံနိုင်မှတော့ ယင်းနှင့် ပေါင်းစပ်ရန် ဆုံးဖြတ်လိုက်သည်။

တစ်ချိန်တည်းမှာ ကီလိုမီတာ(၅၀၀၀၀)ကျယ်ဝန်းသော ကောင်းကင်ပေါ်မှ သွေးပင်လယ်သည် မြေပြင်ပေါ်သို့ ကျဆင်းလာသည်။

ပေါက်ကွဲသံများသည် ကီလိုမီတာ(၅၀၀၀၀)ထက် ကျော်လွန်သော နယ်နိမိတ်ထဲမှာပင် ပဲ့တင်ထပ်သွားသည်။ ထိုဧရိယာထဲမှာရှိသော ကျင့်ကြံသူများသည် ယင်းကို အာရုံခံမိသွားသောအခါ နှလုံးတုန်သွားကြသည်။ သူတို့က ခေါင်းလှည့်လိုက်ပြီး အဝေးသို့ ကြည့်လိုက်ကြသည်။

သူတို့အားလုံး ထိတ်လန့်သွားကြသည်။

အဆုံးမရှိဟန်ရသော တောအုပ်သည် သွေးပင်လယ်၏ ကျဆင်းမှုအောက်မှာ လုံးဝဖျက်ဆီးခံလိုက်ရသည်။ အပင်များ၊ သားရဲများနှင့် ထူးထူးဆန်းဆန်း သက်ရှိအားလုံးသည် တစ်ပြိုင်နက် သေဆုံးသွားကြသည်။ မြေပြင်သည် အထဲသို့ နက်ရှိုင်းစွာ ကျွံဝင်သွားပြီး သွေးပင်လယ်ဖြင့် ဖြည့်သွင်းခြင်းခံလိုက်ရသည်။

ကီလိုမီတာ(၅၀၀၀၀)ကျယ်ဝန်းသော ဧရိယာသည် သွေးပင်လယ်အဖြစ် ပြောင်းလဲသွားသည်။ သွေးပင်လယ်က တအိအိလှုပ်ခတ်နေစဉ် သွေးစက်များသည် လေထဲသို့ မြန်ဆန်စွာ မြှောက်တတ်သွားကြပြီး ရွှီချင်း၏ ခန္ဓာကိုယ်ကို ပြန်လည်ဖွဲ့စည်းသွားသည်။

ရွှီချင်းသည် ထွက်ပေါ်လာသည်နှင့်ချက်ချင်း သွေးတစ်ပွက် အန်လိုက်ရသည်။ သူ၏ မျက်နှာသည် ဖြူဖျော့နေပြီး သူ၏ နတ်ဘုရားအသွင်သဏ္ဍာန်သည် မြန်ဆန်စွာ ယိုယွင်းပျက်စီးနေသည်။ သူက အမြန်အနောက်ဆုတ်သွားသည်။

သူက နောက်ဆုံးအခိုက်အတန့်မှာ အန္တရာယ်ကို ရှောင်ရှားရန် သွေးပင်လယ်ထဲသို့ ပေါင်းစပ်သွားခဲ့သော်လည်း သူတို့ကြားမှ ကြီးမားသော စွမ်းအားကွာခြားမှုကြောင့် ဒဏ်ရာအပြင်းအထန် ရရှိသွားဆဲပင်။

“ မင်းက ဒီလောက်ပဲ ထိန်းချုပ်နိုင်တာလား ”

အေးစက်စက် စကားသံသည် ရွှီချင်း၏ အရှေ့မှ ဟင်းလင်းပြင်ထဲမှာ ထွက်ပေါ်လာသည်။

ထို့နောက် ရွှီချင်း၏ မျက်လုံးထဲတွင် ပုံရိပ်ပြန်လာသည်မှာ ဟင်းလင်းပြင်ထဲမှ ထွက်ပေါ်လာသော လက်ချောင်းတစ်ချောင်းဖြစ်သည်။ လက်ချောင်းသည် အမြစ်ဖြတ်သုတ်သင်ခြင်းစွမ်းအားကို သယ်ဆောင်လျက် သူ့အပေါ်သို့ ဖိချလာသည်။

ရွှီချင်းသည် လုံးဝဖိနှိပ်ခံနေရသော်လည်း တည်ငြိမ်နေဆဲပင်။ သူ၏ လှုပ်ရှားမှုတိုင်းမှာ ရည်ရွယ်ချက်ရှိရမည်ဖြစ်ကြောင်း ကောင်းကောင်း သူသိသည်။ အကယ်၍ သူက အနည်းငယ် ကြောက်လန့်နေမည်ဆိုလျှင် နောက်ဆက်တွဲအကျိုးဆက်က သေခြင်းတရားသာ ဖြစ်လိမ့်မည်။

သူ၏ မျက်လုံးသည် မည်းနက်သွားသည်။ တားမြစ်အဆိပ်စွမ်းအားသည် အရပ်မျက်နှာအဘက်ဘက်တွင် ပေါ်လျှိုးလာသည်။ ထို့နောက် ယင်းက အဆုံးမဲ့သော အနက်ရောင်မြူခိုးအဖြစ် ဖွဲ့စည်းသွားပြီး သူ့ဆီသို့ ချဉ်းကပ်လာနေသော လက်ချောင်းကို တိုက်စားလိုက်သည်။

အနက်ရောင်အစက်အပြောက်များသည် လက်ချောင်းပေါ်မှာ ချက်ချင်း ထွက်ပေါ်လာကြသည်။ ၎င်းက ယိုယွင်းပျက်စီးနေသော လက္ခဏာများကို ဖော်ပြလာသည်။

သို့သော်လည်း နောက်အခိုက်အတန့်မှာ ဒုတိယလက်ချောင်းသည် တခြားဦးတည်ရာထံမှ ရွှီချင်းဆီသို့ ပျံသန်းလာသည်။

ငရဲမီးအိမ်(၇)ခုသည် ရွှီချင်း၏ ခန္ဓာကိုယ်ပေါ်မှာ ထွက်ပေါ်လာကြပြီး တစ်ခုပြီးတစ်ခု ငြိမ်းသတ်သွားကြသည်။ ယင်းက ငရဲမီးအိမ်(၇)ခုကျိန်စာအတတ်ပညာမှလွဲ၍ တခြားမဟုတ်ပေ။

မီးအိမ်အားလုံးက ငြိမ်းသတ်သွားသည့်အခါ ဒုတိယလက်ချောင်းသည် စတင်ယိုယွင်းပျက်စီးသွားသည်။

ရွှီချင်းသည် ပိုပြီးမြန်ဆန်စွာ အနောက်ဆုတ်သွားသည်။

အံ့ဩသော အသံသည် ထိုအခိုက်အတန့်မှာ ပဲ့တင်ထပ်လာသည်။ ရွှီချင်း၏ တိုက်ခိုက်မှုများက ဂျိဒုန်းဇီကို အံ့ဩသွားစေခဲ့သည်မှာ ရှင်းလင်းသည်။

“ စိတ်ဝင်စားစရာပဲ ”

နူးညံ့သော အာမေဋိတ်အသံကို ထုတ်လွှတ်ပြီးနောက် သူက ရယ်မောလိုက်သည်။ ထို့နောက် ရွှီချင်း၏ အရှေ့တွင် ထွက်ပေါ်လာသည်မှာ လက်ညှိုးမဟုတ်တော့ပေ။ ယင်းအစား သွေးနီရောင်လက်ဝါး ဖြစ်သည်။

သွေးနီရောင်လက်ဝါး၏ အရှိန်အဝါသည် အစောနက လက်ချောင်းထက် ပိုပြီးကြမ်းတမ်းပြီး ပိုပြီးအားကောင်းသည်။ ထို့ပြင် ၎င်းထံမှ မခုခံနိုင်သော ခံစားမှုကို ထုတ်လွှတ်နေသည်။ ယင်းက ဝိညာဉ်ကိုပင် ဖိနှိပ်နိုင်စွမ်းရှိသည်။

အမှန်မှာ ထိုလက်ဝါးထဲတွင် ဝိညာဉ်စုစည်းခြင်းအဆင့်၏ စွမ်းအင်တစ်စွန်းတစ်စ ကိန်းအောင်းနေသည်။

လက်ဝါးသည် တားမြစ်အဆိပ်နှင့် ငရဲမီးအိမ်(၇)ခုကျိန်စာ၏ သက်ရောက်မှုကို လျစ်လျူရှု၍ ရွှီချင်း၏ အရှေ့သို့ ကျဆင်းလာသည်။ ယင်းက သူ၏ အမြင်အာရုံတစ်ခုလုံးကို အစားထိုးသွားသည်။

သေခြင်းရှင်ခြင်းကပ်ဘေးသည် အလွန်အားကောင်းစွာ ထွက်ပေါ်လာသည်။

ရွှီချင်းသည် လက်ဝါးကို ခုခံချင်သည်။ သို့သော်လည်း ထိုသို့လုပ်ဆောင်ရန် သူ့အတွက် အလွန်ခက်ခဲသည်။ သူ၏ ခန္ဓာကိုယ်က တုန်ယင်လာပြီး သူ၏ နတ်ဘုရားအသွင်သဏ္ဍာန်က တိုက်ရိုက် ပြိုကွဲပျက်စီးသွားကာ မရေမတွက်နိုင်သော ဝိညာဉ်ချည်မျှင်များအဖြစ်သို့ ပြန်ပြောင်းလဲသွားကြသည်။ ယင်းတို့က အနောက်သို့ ဆုတ်သွားပြီး နတ်ဘုရားအသွင်သဏ္ဍာန်ကို ပြန်ဖွဲ့စည်းလိုက်သည်။ သို့သော်လည်း ၎င်းက ထပ်မံ ပြိုကွဲပျက်စီးသွားပြန်သည်။

ထို့နောက် ၎င်းက ထပ်ခါ ထပ်ခါ ပြိုကွဲပျက်စီးသွားသည်။

ဝိညာဉ်ချည်မျှင်များက ဆက်ပြီး မစုဝေးနိုင်တော့ဘဲ အရပ်မျက်နှာအဘက်ဘက်သို့ ပျံ့နှံ့သွားသည့်အခါ ရွှီချင်း၏ မူလခန္ဓာကိုယ်က ထွက်ပေါ်လာသည်။ ထိုအခိုက်အတန့်မှာ ရွှီချင်းက မျက်လုံးမှိတ်ထားသည်။

ဂျိဒုန်းဇီ၏ လက်ဝါးက ဝိညာဉ်ချည်မျှင်များကို ဖြတ်သန်းသွားပြီး ရွှီချင်း၏ မူလခန္ဓာကိုယ်ပေါ်သို့ ကျဆင်းသွားတော့မည် ဖြစ်သည်။

ထိုစဉ် ရွှီချင်း၏ မျက်လုံးက ရုတ်တရက် ပွင့်သွားသည်။ သူ၏ မျက်လုံးထဲမှ သူငယ်အိမ်သည် ခရမ်းရောင်သို့ ပြောင်းလဲနေသည်။

သူက ဤအခိုက်အတန့်ကို စောင့်ဆိုင်းနေခြင်း ဖြစ်သည်။ အစောနက သူ၏ လုပ်ဆောင်မှုအားလုံးသည် ရန်သူကို အတိုင်းအတာတစ်ခုထိ အားနည်းသွားစေရန် ဖြစ်သည်။

ခရမ်းလဂြိုလ်သည် ပုံပျက်တွန့်လိမ်နေပြီး ရွှီချင်းနှင့် ဂျိဒုန်းဇီ၏ လက်ဝါးကြားမှာ ထွက်ပေါ်လာသည်။

ယင်းက ပုံရိပ်ယောင်လဂြိုလ် မဟုတ်ပေ။ တကယ့်အစစ်အမှန် လဂြိုလ်ဖြစ်သည်။ အစတွင် ခရမ်းလဂြိုလ်သည် အလွန်သေးငယ်သည်။ သို့သော်လည်း ၎င်းက မြန်ဆန်စွာ ကြီးမားလာနေသည်။ ခရမ်းလဂြိုလ်ပေါ်တွင် ဧရာမကျောက်တိုင်တစ်ခုရှိပြီး ထိုကျောက်တိုင်၏ မျက်နှာပြင်ပေါ်တွင် ခရမ်းလကိုးကွယ်ယုံကြည်သူများ၏ နာမည်အများအပြားကို ရေးသားထားသည်။

ဤအခိုက်အတန့်မှာ ဝိညာဉ်နက်ဒေသကြီးထဲတွင် မရေမတွက်နိုင်သော ခရမ်းအရှင်သခင်ဘုရားကျောင်းများက တုန်ယင်နေကြသည်။ မရေမတွက်နိုင်သော ခရမ်းလကိုးကွယ်ယုံကြည်သူများက ဝတ်ပြုဆုတောင်းနေကြသည်။ သူတို့၏ ယုံကြည်မှုစွမ်းအားသည် တောင်တန်းပင်လယ်ဒေသကြီးထဲမှ ဂျိဒုန်းဇိ၏ အရှေ့တွင် ခရမ်းရောင်အလင်းအဖြစ် ပြောင်းလဲသွားသည်။

ဂျိဒုန်းဇီ၏ လက်သည် ခရမ်းရောင်အဖြစ်သို့ တိုက်ရိုက် ပြောင်းလဲသွားပြီး တစ်ခဏမျှ ရပ်တန့်သွားသည်။ သူက လက်ကို ပြန်ရုပ်သိမ်းချင်သည်။ သို့သော်လည်း ယင်းက အလွန်နောက်ကျသွားချေ၏။ မြန်ဆန်စွာ ကြီးမားလာနေသော ခရမ်းလဂြိုလ်သည် ရုတ်တရက် အရှေ့သို့ ပျံသန်းသွားပြီး ဂျိဒုန်းဇီ၏ လက်ဝါးဖြင့် အကြမ်းပတမ်း တွေ့ဆုံသွားသည်။

ခရမ်းလဂြိုလ်ဖြင့် ဆောင့်မိသွားသည့်အခါ လက်ဝါးသည် အနောက်သို့ တွန်းထုတ်ခံလိုက်ရသည်။

ပြင်းထန်သော စွမ်းအင်လှိုင်းဂယက်များက ဘေးပတ်ဝန်းကျင်သို့ ပျံ့နှံ့သွားသည့်အခါ လက်ဝါးအနောက်မှ ဟင်းလင်းပြင်ထဲတွင် ပုန်းအောင်းနေသော ဂျိဒုန်းဇီ၏ ပုံရိပ်က ထွက်ပေါ်လာသည်။

သူက မြန်ဆန်စွာ ဒြပ်ထည်ဖွဲ့စည်းနေပြီး အံ့ဩသော အမူအရာကို ထုတ်ဖော်ထားသည်။ သူက ဆက်လက် တိုက်ခိုက်တော့မည့်အချိန် နောက်အခိုက်အတန့်မှာ ခရမ်းလရောင်ခြည်က ပျံ့နှံ့ထွက်လာပြီး သူ၏ တစ်ကိုယ်လုံးကို ခရမ်းရောင်သို့ ပြောင်းလဲသွားစေသည်။

တစ်ချိန်တည်းမှာ အစောနက ဘေးပတ်ဝန်းကျင်သို့ ပျံ့နှံ့သွားသော ဝိညာဉ်ချည်မျှင်များသည် ပြန်စုဝေးသွားကြသည်။ ယင်းတို့၏ ပစ်မှတ်က ရွှီချင်းမဟုတ်ပေ။ ဂျိဒုန်းဇီသာ ဖြစ်သည်။

သန်းပေါင်းများစွာသော ဝိညာဉ်ချည်မျှင်များက ဂျိဒုန်းဇီကို ဝန်းရံလိုက်ပြီး ချုပ်နှောင်သော စွမ်းအားကို ဖွဲ့စည်းလိုက်သည်။

ထိုအရာအားလုံးကို ဖော်ပြရန် အချိန်ကြာသော်လည်း အမှန်မှာ ယင်းတို့က မျက်စိတစ်မှိတ်အတွင်းမှာ ဖြစ်ပျက်သွားခဲ့ခြင်း ဖြစ်သည်။ ခရမ်းလဂြိုလ်ကြောင့် အနောက်သို့ တွန်းထုတ်ခံလိုက်ရသော ဂျိဒုန်းဇီသည် ဝိညာဉ်ချည်မျှင်များဖြင့် ချုပ်နှောင်ခံလိုက်ရသည်။ တစ်ချိန်တည်းမှာ ပြင်းထန်သော သတ်ဖြတ်ခြင်းစိတ်ဆန္ဒက ရွှီချင်း၏ မျက်လုံးထဲမှာ ထွက်ပေါ်လာသည်။ သူက ညာလက်ကို မြှောက်တင်လိုက်ပြီး ဂျိဒုန်းဇီကို ဖမ်းဆုပ်လိုက်သည်။

ဘေးပတ်ဝန်းကျင်သည် တုန်ယင်သွားပြီး အားလှိုင်းဂယက်များက ဤလောကထဲမှာ ပျံ့နှံ့သွားသည်။ ဤသည်မှာ လောကကြီးက ကျယ်ပြောသော ရေတွင်းတစ်ခုအဖြစ် ပြောင်းလဲသွားသည့်အလားပင်။

ရေတွင်းရေသည် တအိအိလှုပ်ခတ်သွားပြီး ဂျိဒုန်းဇီ၏ မန္တန်အားလုံးက ရေမျက်နှာပြင်ပေါ်မှာ ပုံရိပ်ပြန်လာသည်။ ထိုထဲမှာ သူ၏ အတိတ်နှင့် အနာဂတ်မှ အစိတ်အပိုင်းများလည်း ပါဝင်သည်။ ထို့ပြင် ဂျိဒုန်းဇီ၏ ဝိညာဉ်လည်း ပါဝင်သည်။

ထိုထဲမှာ ဂျိဒုန်းဇီ၏ အပြင်လူမသိသော လျှို့ဝှက်ချက်များလည်း ပါဝင်သည်။

ဥပမာ သူ၏ ဝိညာဉ်ဖြစ်သည်။ ဂျိဒုန်းဇိ၏ ဝိညာဉ်ကို ရွှီချင်းမြင်သွားသောအခါ သူက မျက်မှောင်ကြုတ်သွားသည်။

ဂျိဒုန်းဇီ၏ ဝိညာဉ်သည် အမျှင်တန်းတစ်ခုတည်း မဟုတ်ပေ။ ယင်းအစား အမျှင်တန်း(၉၇)ခု ဖြစ်သည်။

ဝိညာဉ်အမျှင်တန်းတစ်ခုစီမှာ ရွှေရောင်နတ်ဘုရားကျောက်တိုင်တစ်ခု ရှိသည်။

ထိုနတ်ဘုရားကျောက်တိုင်(၉၇)ခုထဲတွင် ထူးဆန်းသော ပုံရိပ်(၉၇)ခုကို ရေးထွင်းထားသည်။ ၎င်းတို့၏ အသွင်အပြင်သည် တစ်ယောက်နှင့်တစ်ယောက် မတူညီကြသော်လည်း ၎င်းတို့အားလုံးသည် နတ်ဘုရားအရှိန်အဝါကို ထုတ်လွှတ်နေကြသည်။

ထိုမြင်ကွင်းက ရွှီချင်းကို နှလုံးတုန်သွားစေသည်။

အဘယ့်ကြောင့်ဆိုသော် ထိုနတ်ဘုရားကျောက်တိုင်များပေါ်တွင် နတ်ဘုရား(၉၇)ပါး၏ ပုံရိပ်ကို ရေးထွင်းထားသောကြောင့် ဖြစ်သည်။

ထိုထဲမှ ပုံရိပ်တစ်ခုသည် တောအုပ်ထဲတွင် ယခင်က ရွှီချင်းမြင်တွေ့ခဲ့သော အရိုးခြောက်ရုပ်တုဖြစ်သည်။

ဂျိဒုန်းဇီက နတ်ဘုရားကျောက်တိုင်များကို ထိန်းသိမ်းထားသော လက်ခံကောင်ဖြစ်သည်ဟု ရွှီချင်း ခံစားမိသည်။

ယင်းက ရိုးရာဓလေ့တစ်ခုလော သူမသိသော်လည်း လူသားဧကရာဇ်၏ ခန်းမထဲတွင် ပဉ္စမမင်းသားပြောကြားခဲ့ဖူးသော သတင်းတစ်ခုကို ပြန်အမှတ်ရသွားသည်။

“ ဒီနှစ်တွေမှာ ဒြပ်နှောတွေက မီးလျှံလဒေသကြီးထဲမှာ အရင်နှစ်တွေကထက် ဆယ်ဆပိုပြီးတိုးမြှင့်သွားပါတယ်… ဘုရင်းကျန်းယန်က အဲ့ဒီကိစ္စကို အာရုံစိုက်ပြီးတဲ့အခါမှာ မီးလျှံလက စတုတ္ထမြောက် နတ်ဘုရားကို ကြိုဆိုဖို့ ပြင်ဆင်နေတာဖြစ်မယ်လို့ သူသံသယရှိတယ်လို့ ပြောပါတယ် ”