အထီးကျန်သိုင်းသခင်၏ ပင်မခန္ဓာ

တစ်ပိုင်းမျိုးနွယ်စုဘိုးဘေးတစ်ယောက်၏ တိုက်ခိုက်မှုများက ကြောက်စရာကောင်းလေသည်။

သို့သော်လည်း သိုင်းတာအိုပင်မခန္ဓာ၏ အမူအရာက လုံးဝ ပြောင်းလဲသွားခြင်း မရှိဘဲ ကြောက်စရာကောင်းလောက်အောင် တည်ငြိမ်နေ၏။

တစ်ပိုင်းမျိုးနွယ်စုဘိုးဘေးတစ်ယောက်သည် သူ ဓမ္မဝိသေသအဆင့်မှာ ရှိနေစဉ်က ပူးပေါင်းတိုက်ခိုက်လာမည်ဆိုလျှင် သူတို့က သူ့ကို တကယ်ပဲ အခက်တွေ့စေပေလိမ့်မည်။

သို့သော်လည်း.. ယခု သူသည် ပေါင်းစည်းခန္ဓာအဆင့်သို့ ဝင်ရောက်လာခဲ့ပြီဖြစ်ပြီး သီဖန်းနှင့် အခြားသုံးယောက်၏ တိုက်ခိုက်မှုများက သူ၏ မျက်လုံးထဲမှာ ဘာမှဟုတ်မနေတော့ပေ။

ဘုန်း… ဘုန်း… ဘုန်း…

သိုင်းတာအိုပင်မခန္ဓာသည် သူ၏ မျိုးဆက်သွေးကို လှည့်ပတ်ပြီး ဆူနာမီသွေးအဆင့်သို့ ချက်ချင်းပင်​ ရောက်ရှိလာစေ၏။

အဲဒါသည် တူညီသော ဆူနာမီသွေးသာဖြစ်သော်လည်း သိုင်းတာအိုပင်မခန္ဓာ၏ သွေးချီက တလိပ်လိပ်ထိုးတက်လာ၏။ ၎င်းက ခံ့ညားထည်ဝါပြီး ချစ်ချစ်တောက်အပူလှိုင်းတစ်ခုကို ဖြာထုတ်ပေးနေ၏။

သိုင်းတာအိုပင်မခန္ဓာ၏ ခန္ဓာကိုယ်အတွင်းကနေ ဧရာမ မီးတောင်တစ်လုံး ထိုးထွက်လာသည့်အလား ဖြစ်၏။ ​ကြောက်စရာကောင်းသော ချော်ရည်များက တစ်ပိုင်းမျိုးနွယ်စုဘိုးဘေး ချန်ယွီကို နစ်မြုပ်လုနီးပါး ဖြစ်စေ၏။

တစ်ပိုင်းမျိုးနွယ်စုဘိုးဘေး ချန်ယွီ၏ သွေးချီက သိုင်းတာအိုပင်မခန္ဓာ၏ အပြတ်အသတ် ဖိနှိမ်ခြင်းကို ခံလိုက်ရ၏။

တစ်ပိုင်းမျိုးနွယ်စုဘိုးဘေးလေးယောက်၏ တိုက်ခိုက်မှုများနှင့် ရင်ဆိုင်ရချိန်တွင် သိုင်းတာအိုပင်မခန္ဓာသည် အလောတကြီး ရှိမနေပေ။ သူသည် လေထဲကနေ ဆင်းသက်လာသော ကြယ်တာရာတူများကို လက်ပြန်လွှဲကာ ပစ်ထိုးလိုက်၏။

“အထီးကျန်သိုင်းသခင်.. မင်းက တော်တော်မောက်မာတာပဲ.. မင်းက ငါ့ရဲ့ တစ်ပိုင်းမျိုးနွယ်စုဘိုးဘေး ဓမ္မလက်နက်ကို လက်ဗလာနဲ့တောင် ခံယူရဲတယ်ဆိုတော့.. အဲဒါက ကျောက်တုံးတစ်တုံးကို…”

တစ်ပိုင်းမျိုးနွယ်စုဘိုးဘေး ချန်ယွီသည် သူ၏စကားကို ဆုံးအောင် မပြောရသေးခင်မှာပင်.. တိုက်ပွဲနယ်မြေကနေ ကျယ်လောင်သော မြည်သံက ထွက်ပေါ်လာ၏။

ဘုန်း…

သိုင်းတာအိုပင်မခန္ဓာ၏ လက်သီးသည် ချန်ယွီ၏ တစ်ပိုင်းမျိုးနွယ်စုဘိုးဘေး ဓမ္မလက်နက်ဖြစ်သော ကြယ်တာရာတူနှင့် ပြင်းထန်စွာ ထိတွေ့ရိုက်ခတ်သွား၏။ ထိုမြင်ကွင်းက အနည်းငယ်တော့ ရယ်စရာကောင်းလေသည်။

တစ်ပိုင်းမျိုးနွယ်စုဘိုးဘေး ချန်ယွီ ပြောခဲ့သလိုပင်.. အဲဒါက ကျောက်တုံးကို ကြက်ဥနှင့် ပစ်ပေါက်လိုက်ခြင်းနှင့် တူလေသည်။

သို့သော်လည်း.. သူတွေးထင်ထားသည်နှင့် ကွဲပြားခြားနားနေ၏။

သူ၏ ကြယ်တာရာတူများက ကျောက်တုံးမဟုတ်ပေ။

သိုင်းတာအိုပင်မခန္ဓာ၏ လက်သီးက ဖျက်ဆီး၍ မရနိုင်သော ကျောက်တုံးဖြစ်နေ၏။

ကျယ်လောင်သော မြည်သံအပြီး၌…

တစ်ပိုင်းမျိုးနွယ်စုဘိုးဘေး ချန်ယွီသည် ဆတ်ခနဲ တုန်ယင်သွား​ပြီး သူ၏မျက်လုံးက မယုံကြည်နိုင်မှုဖြင့် ပြူးကျယ်သွား၏။

ပင်လယ်ထဲကနေ တလိပ်လိပ် ထိုးတက်လာသော ဒီရေလှိုင်းများကဲ့သို့ ​ကြောက်စရာကောင်းသည့် စွမ်းအားတစ်ခုသည် ကြယ်တာရာတူများထဲသို့ တလိပ်လိပ် တိုးဝင်လာသည်ကို သူက ခံစားလိုက်ရ၏။

သူက ထိုစွမ်းအားကို လုံးဝ ခံနိုင်ရည်မရှိပေ။

တစ်ပိုင်းမျိုးနွယ်စုဘိုးဘေး ချန်ယွီ၏ လက်ဖဝါးက ချက်ချင်းပင် စုတ်ပြဲသွားပြီး လတ်ဆတ်သော သွေးများက စီးကျလာ၏။

သူ့လက်ဖဝါးကို မပြောနှင့်… သူ့လက်တစ်ဖက်လုံးပေါ်ရှိ အသားများက သွေးမြူအဖြစ် ချက်ချင်းပေါက်ကွဲထွက်သွား၏။

ကြယ်တာရာတူများကလည်း သူ့လက်ထဲကနေ လွင့်စင်ထွက်သွား၏။

တစ်ချိန်တည်းမှာပင်.. သိုင်းတာအိုပင်မခန္ဓာသည် သူ၏ အခြားလက်တစ်ဖက်ကို ဆန့်ထုတ်ပြီး လေထဲကနေ ခုတ်ပိုင်းကျဆင်းလာသည့် ကမ္ဘာမြေသတ်ဖြတ်ခြင်း ဓားချီကနေ ဖြစ်ပေါ်လာသော ဧရာမ ဓားကို ဖမ်းဆွဲလိုက်၏။

“မင်းကတော့ သေချင်နေပြီပဲ”

တစ်ပိုင်းမျိုးနွယ်စုဘိုးဘေး သီကြွယ်က အေးစက်စွာ ပြောလိုက်၏။

ဝုန်း…

သိုင်းတာအိုပင်မခန္ဓာသည် နတ်နဂါးတစ်ကောင်နှင့် ဆင်တူသော ဧရာမ ကမ္ဘာမြေသတ်ဖြတ်ခြင်း ဓားကို ဖမ်းဆွဲလိုက်၏။ သူသည် အဲဒါကို မြေပြင်ပေါ်သို့ ပစ်ပေါက်ချပြီး ဓားချီကို ပျက်ပြယ်သွားစေ၏။

တစ်ချိန်တည်းမှာပင်.. သိုင်းတာအိုပင်မခန္ဓာသည် နောက်ပြန်လှည့်ကြည့်ခြင်း မရှိဘဲ သူ၏ လက်ကို လက်ပြန်လွှဲယမ်းလိုက်၏။

ချွမ်း..

တိုက်ပွဲနယ်မြေကနေ သတ္တုချင်း ထိခတ်သံက မကောင်းဆိုးရွားဆန်ဆန် ထွက်ပေါ်လာ၏။

နောက်ထပ် ဓားချီတစ်ခု ပျက်ပြယ်သွားပြန်၏။

နောက်ဆုံးမှာတော့… တစ်ပိုင်းမျိုးနွယ်စုဘိုးဘေး သီကြွယ်၏ အမူအရာက ပြောင်းလဲသွားရ၏။

ကမ္ဘာမြေ၏ သတ်ဖြတ်ခြင်း စိတ်ဆန္ဒကို ထုတ်ဖော်သည့်အခါ နဂါးမြွေတို့က ထွက်ပေါ်လာပေလိမ့်မည်။

သူ ထုတ်ဖော်ခဲ့သော ကမ္ဘာမြေသတ်ဖြတ်ခြင်း ဓားချီမှာ တကယ်တမ်း လှုပ်ရှားကွက်နှစ်ကွက် ပါဝင်လေသည်။

လှုပ်ရှားကွက်တစ်ကွက်သည် ခုတ်ပိုင်းကျဆင်းလာသည့် နတ်နဂါးတစ်ကောင်နှင့် ဆင်တူသော ဧရာမ ဓားဖြစ်လေသည်။

အခြား လှုပ်ရှားကွက်က သိုင်းတာအိုပင်မခန္ဓာထံ မြွေတစ်ကောင်ကဲ့သို့ တိတ်တဆိတ် တိုးဝင်လာသော ဓားချီတစ်ခု ဖြစ်လေသည်။

အဲဒါကမှ ကမ္ဘာမြေသတ်ဖြတ်ခြင်း ဓားပညာရပ်၏ အစစ်အမှန် သတ်ဖြတ်ကွက် ဖြစ်လေသည်။

ဤနှစ်များအတွင်း ဧရာမ နတ်နဂါးဓားကို ခုခံနိုင်သည့် ကျင့်ကြံသူ အနည်းအကျဉ်းမျှသာ ရှိခဲ့၏။

သူတို့သည် ဧရာမ နတ်နဂါးဓားကို ခုခံနိုင်သည်ဆိုလျှင်တောင် မည်သူကမှ မြွေဓားချီ၏ သတ်ဖြတ်ခြင်း စွမ်းအားကို မခုခံနိုင်ကြပေ။

သို့သော်လည်း ယခုအခါ သိုင်းတာအိုပင်မခန္ဓာသည် ကမ္ဘာမြေသတ်ဖြတ်ခြင်း ဓားကွက်ကို သာမန်ကာလျှံကာ ထိုးချက်တစ်ချက်နှင့် လက်ပြန်တစ်ချက်နှင့်အတူ ဖျက်ဆီးပစ်လိုက်၏။

“ကမ္ဘာမြေသတ်ဖြတ်ခြင်း ဓားပညာရပ်က မင်းရဲ့လက်ထဲမှာ တကယ့်ကို သုံးစားမရ ဖြစ်နေတာပဲ”

သိုင်းတာအိုပင်မခန္ဓာက လှောင်ရယ်လိုက်၏။

သူသည် တစ်ပိုင်းမျိုးနွယ်စုဘိုးဘေး သီကြွယ်၏ ကမ္ဘာမြေသတ်ဖြတ်ခြင်း ဓားချီကို အလွယ်တကူ ဖျက်ဆီးပစ်နိုင်ခဲ့သည့် အကြောင်းရင်းမှာ သူ၏ ခန္ဓာကိုယ်သည် အစကတည်းက မနှိုင်းယှဉ်သာအောင် သန်မာနေသောကြောင့် ဖြစ်၏။

အဲဒါသည် တစ်ပိုင်းမျိုးနွယ်စုဘိုးဘေး သီကြွယ်က ကမ္ဘာမြေသတ်ဖြတ်ခြင်း ဓားပညာရပ်၏ အနှစ်သာရကို အပြည့်အဝ နားလည်ဆင်ခြင်နိုင်ခြင်း မရှိသေးသောကြောင့်လည်း ဖြစ်၏။

“ရောင်ဝါဝင်းပြောင် နေရောင်တဲ့လား.. သုံးစားမရဘူး”

ရုတ်တရက်.. သိုင်းတာအိုပင်မခန္ဓာက ဟိန်းဟောက်လိုက်၏။

“ငြိမ်းသေစမ်း”

သူ၏ ခန္ဓာကိုယ်က သိုင်းတာအိုမီးဖိုတစ်ခုကဲ့သို့ ဖြစ်လာပြီး သိုင်းစိတ်ဝိညာဉ်မီးက အဆက်မပြတ် လောင်ကျွမ်းလာ၏။ ထွက်ပေါ်လာသော ရုတ်တရက် ဟိန်းဟောက်သံကပင် မည်သည့် အသံပိုင်း လျှို့ဝှက်အတတ်ထက်မဆို ပို၍ ကြောက်စရာကောင်းနေ၏။

ဖျောက်.. ဖျောက်.. ဖျောက်…

တစ်ပိုင်းမျိုးနွယ်စုဘိုးဘေး မီးပဒေသာ၏ လက်ထဲကနေ ယခုတင် ဆင့်ခေါ်ထားသော အလျှံညီးညီး နေမင်းသည် စတင်အက်ကွဲလာပြီး ၎င်း၏ ဓမ္မစွမ်းအားများက ဆုတ်ယုတ်ကာ တစ်ခဏချင်းမှာပင် လုံးဝ ပျက်ပြယ်သွား၏။

သိုင်းတာအိုပင်မခန္ဓာထံမှ ဟိန်းဟောက်သံတစ်သံကပင် တစ်ပိုင်းမျိုးနွယ်စုဘိုးဘေး မီးပဒေသာ၏ ဓမ္မပညာရပ်ကို​ ဖျက်ဆီးပစ်လိုက်၏။

ထိုအခါမှသာ.. သိုင်းတာအိုပင်မခန္ဓာက ကျဆင်းလာသော မဟာကစဉ့်ကလျား အမြုတေလက်ဝါးဘက်ကို လှည့်ကြည့်လိုက်၏။

“မဟာကစဉ့်ကလျား အမြုတေလက်ဝါးလား”

သိုင်းတာအိုပင်မခန္ဓာက အနည်းငယ် ခေါင်းညိတ်လိုက်၏။

“ဒီလျှို့ဝှက်အတတ်ကတော့ သိပ်မဆိုးဘူး”

သိုင်းတာအိုပင်မခန္ဓာသည် မည်သည့် ရွေ့လျားခြင်းမှ မပြုလုပ်ဘဲ ပစ်ထိုးချလိုက်၏။

ဘုန်း.. ဘုန်း…

လေထဲရှိ ကြိတ်ဆုံကျောက်ကဲ့သို့ လက်ဝါးသည် ပေါက်ကွဲထွက်သွားပြီး ၎င်း၏ ဓမ္မစွမ်းအားများက ပျက်ပြယ်သွား၏။

တစ်ပိုင်းမျိုးနွယ်စုဘိုးဘေး လေးယောက်သည် ဖြူဖပ်ဖြူလျော် အမူအရာများ ရှိလာကြ၏။

သိုင်းတာအိုပင်မခန္ဓာ၏ ခွန်အားက သူတို့ တွေးထင်ထားသည်ထက် များစွာကျော်လွန်နေ၏။

တကယ်ဆို.. ထိုသူသည် သူတို့ ထင်မြင်ယူဆခဲ့သော ပဟေဠိနန်းတော်တိုက်ပွဲမှ အထီးကျန်သိုင်းသခင်ထက်ပင် များစွာပိုမိုသန်မာနေ၏။

ခရမ်းရောင်ဝတ် အထီးကျန်သိုင်းသခင်သည် မည်သည့် ဓမ္မလက်နက်ကိုမှ အသုံးပြုခြင်း မရှိဘဲ သူ၏ အမူအရာက တည်ငြိမ်နေ၏။ သူသည် သူတို့၏ ဓမ္မလက်နက်များ၊ ဓမ္မပညာရပ်များနှင့် လျှို့ဝှက်အတတ်များကို လက်ဗလာဖြင့် ဖျက်ဆီးပစ်လိုက်၏။

“တစ်ခုခုတော့ လွဲနေပြီ”

တစ်စုံတစ်ရာကို နားလည်သွားသည့်အလား.. သီဖန်းက ရုတ်တရက် အော်ပြောလိုက်၏။

“မင်းက အထီးကျန်သိုင်းသခင် မဟုတ်ဘူး.. မင်းရဲ့ ဒီခန္ဓာကိုယ်က သေချာပေါက် အစိမ်းရောက်ကြာပန်း အစစ်အမှန်ခန္ဓာ မဟုတ်ဘူး.. မင်းက နဂါးဖီးနစ်လည်း မဟုတ်ဘူး… မင်း.. မင်း ဘယ်သူလဲ.. အဆင့် ၇ ဖန်တီးခြင်းကြာပဒုမ္မာကတောင် အဲ့လောက်ထိ စွမ်းအားမကြီးနိုင်ဘူး”

သိုင်းတာအိုပင်မခန္ဓာက ပြုံးပြလိုက်၏။

“မင်းပြောတာ မှန်တယ်.. ပဟေဠိနန်းတော်ရှေ့မှာ တိုက်ခိုက်ခဲ့တဲ့ အထီးကျန်သိုင်းသခင်နဲ့ နဂါးမျိုးနွယ်က အထီးကျန်သိုင်းသခင်က ငါကျင့်ကြံထားတဲ့ အစစ်အမှန်ခန္ဓာတွေပဲ”

“အခု မင်းတို့ မြင်နေရတာကတော့.. ငါ့ရဲ့ အစစ်အမှန် ပင်မခန္ဓာ.. အထီးကျန်သိုင်းသခင်ရဲ့ ပင်မခန္ဓာပဲ”

အထီးကျန်သိုင်းသခင်၏ ပင်မခန္ဓာ ဟူသော စကားလုံးသည် တစ်ပိုင်းမျိုးနွယ်စုဘိုးဘေး လေးယောက်၏ ယုံကြည်မှုကို လုံးဝ ပျက်စီးသွားစေ၏။

အစစ်အမှန်ခန္ဓာ သုံးခု…

အထီးကျန်သိုင်းသခင်မှာ အစစ်အမှန်ခန္ဓာ သုံးခု ရှိနေ၏။

အရင်တုန်းက ကျင့်ကြံရေးလောကတွင် ပေါ်ထွက်လာခဲ့သော အစစ်အမှန်ခန္ဓာ နှစ်ခုသည် အထီးကျန်သိုင်းသခင်၏ အသန်မာဆုံး တိုက်ခိုက်ရည်ခွန်အား မဟုတ်သေးပေ။

အဲဒါကို တွေးကြည့်ရင်း.. သီဖန်းနှင့် အခြားသုံးယောက်သည် ကျောရိုးတစ်လျှောက် ချမ်းစိမ့်၍ ကြက်သီးမွေးညင်းများ ထလာကြ၏။

အစိမ်းရောင်ကြာပန်း အစစ်အမှန်ခန္ဓာနှင့် နဂါးဖီးနစ်ခန္ဓာသည် ထျန်ဟွမ်ကုန်းမြေတိုက်ကြီး တစ်ခုလုံးကို ကျွမ်းထိုးမှောက်ခုံဖြစ်စေလုနီးပါးပင်။

အထီးကျန်သိုင်းသခင်၏ ဤပင်မခန္ဓာက ပေါ်ထွက်လာမည်ဆိုလျှင် ဘာ​တွေဖြစ်ကုန်မလဲ။

သီဖန်းနှင့် အခြားသူများသည် အဲဒါကို ဆက်၍ စဉ်းစားကြည့်ရဲခြင်း မရှိတော့ပေ။

“ပြေးကြ”

သူတို့လေးယောက်သည် တကူးတက ဆက်သွယ်နေစရာမလိုဘဲ အလိုအလျောက် နားလည်မှုနှင့်အတူ လှည့်ထွက်ပြေးလိုက်ကြ၏။

သူတို့ကြားတွင် သီဖန်းသည် သူ၏ သို​လှောင်အိတ်ထဲကနေ တည်နေရာရွှေ့ပြောင်းအဆောင်အကြီး တစ်ခုကိုပါ ထုတ်ယူကာ ချိုးချေလိုက်၏။ သူက ဤနေရာကနေ လေဟာနယ်ခုန်ကူးချင်လေသည်။

သို့သော်လည်း.. သိုင်းတာအိုပင်မခန္ဓာသည် တိုက်ပွဲမစခင်ကတည်းက လေဟာနယ်ကို ချိပ်ပိတ်ပြီးသွားခဲ့လေပြီ။

တစ်ပိုင်းမျိုးနွယ်စုဘိုးဘေး သီကြွယ်နှင့် အခြားသူများသည် အချိန်တိုအတွင်းမှာ အကာအရံအလွှာကို ချေဖျက်ဖို့က မဖြစ်နိုင်ပေ။

တည်နေရာရွှေ့ပြောင်းအဆောင်အကြီးပင်လျှင် သုံးစားမရနိုင်ပေ။

သိုင်းတာအိုပင်မခန္ဓာသည် ရှေ့သို့ တက်လှမ်းပြီး တစ်ပိုင်းမျိုးနွယ်စုဘိုးဘေး ချန်ယွီ၏ နောက်သို့ ချက်ချင်းပင် ရောက်ရှိလာ၏။ သူသည် သူ၏လက်သီးကို မြှောက်ပြီး ရက်ရက်စက်စက် ပစ်ထိုးချလိုက်၏။

“အား..”

အန္တရာယ်ကို အာရုံခံမိသွားပြီး တစ်ပိုင်းမျိုးနွယ်စုဘိုးဘေး ချန်ယွီက ဟိန်းဟောက်၍ သူ၏မျက်နှာက ခရမ်းရောင်သန်းလာ၏။

တစ်ပိုင်းမျိုးနွယ်စုဘိုးဘေး ချန်ယွီ၏ မျက်လုံးထဲတွင် ရက်စက်ကြမ်းကြုတ်သည့် အလင်းရောင်တစ်ခုက ဖျတ်ခနဲလက်သွားပြီး သူ၏ လက်ကို လွှဲကာ သူ၏ အခြားသော ကြယ်တာရာတူကို လွှဲယမ်းလိုက်လေသည်။ သူသည် သိုင်းတာအိုပင်မခန္ဓာ၏ ဝင်ရောက်လာသော လက်သီးကို လျစ်လျူရှု​ပြီး ထိုသူ၏ ဦးခေါင်းကို ပစ်ရိုက်ချလိုက်၏။

အဲဒါသည် နှစ်ဦးနှစ်ဖက် သေကြေပျက်စီးစေမည့် စတေးကွက် ဖြစ်လေသည်။

သိုင်းတာအိုပင်မခန္ဓာသည် တစ်ပိုင်းမျိုးနွယ်စုဘိုးဘေး ချန်ယွီ၏ ကြယ်တာရာတူကို လျစ်လျူရှုပြီး ရှေ့သို့ ဆက်လက်ပစ်ထိုးလိုက်၏။

သူ၏ ထိုးချက်က တစ်ပိုင်းမျိုးနွယ်စုဘိုးဘေး ချန်ယွီ၏ ဦးခေါင်းပေါ်သို့ တည့်တည့်ကျဆင်းလာ၏။

တစ်ချိန်တည်းမှာပင်.. ကြယ်တာရာတူက သိုင်းတာအိုပင်မခန္ဓာ၏ ဦးခေါင်းပေါ်သို့ ကျဆင်းလာခဲ့၏။

တစ်ပိုင်းမျိုးနွယ်စုဘိုးဘေး ချန်ယွီ၏ ဦးခေါင်းက အထီးကျန်သိုင်းသခင်ထံမှ ထိုးချက်ဖြင့် ကြေမွပျက်စီးသွားပြီး သူ၏ အမြုတေစိတ်ဝိညာဉ်ကပါ နေရာမှာပင် ဖျက်ဆီးခံလိုက်ရ၏။

သို့သော်လည်း သိုင်းတာအိုပင်မခန္ဓာကတော့ လုံးဝ ထိခိုက်ခြင်း မရှိပေ။

ကြယ်တာရာတူသည် သူ၏ ခန္ဓာကိုယ်ကို​ ထိခိုက်စေနိုင်ခြင်း မရှိပေ။

သိုင်းတာအိုပင်မခန္ဓာသည် မည်သည့် ဓမ္မလက်နက်ကိုမှ မလိုအပ်ပေ။ သူ၏ ခန္ဓာကိုယ်ကပင်လျှင် သူ၏ အသန်မာဆုံး ဓမ္မလက်နက် ဖြစ်လေသည်။