နောက်တစ်ကြိမ် တိုက်ခိုက်ခြင်း

ဤအခိုက်အတန့်မှာ ကျင့်ကြံသူတစ်ရာနီးပါးသည် တစ္ဆေရထားလုံးအမှောင်တောအုပ်ထဲမှာ ပြန့်ကျဲနေကြသည်။ သူတို့တစ်ယောက်စီမှာ ကိုယ်ပိုင်ကျွမ်းကျင်မှုများ ရှိကြသည်။ တချို့သည် ကျင့်ကြံခြင်းအတတ်ပညာများအပေါ် မှီခိုအားထားပြီး တချို့သည် ပြင်ပပစ္စည်းများအပေါ် မှီခိုအားထားကြသည်။

သူတို့အားလုံးက ထူးချွန်ထက်မြက်သော ပါရမီရှင်များ ဖြစ်ကြသည်။

ထို့ကြောင့် သူတို့က ဤနေရာမှာ ပုန်းအောင်းနေပြီး စစ်ရထားလုံးသားပေါက်တစ်ကောင်ကို ထိန်းကျောင်းနိုင်ရန်အတွက် အခွင့်ကောင်းကို စောင့်ဆိုင်းနေကြခြင်း ဖြစ်သည်။

အကယ်၍ ရွှီချင်းသာ ထွက်ပေါ်မလာလျှင် သူတို့ကြားမှာ သေကြေပျက်စီးမှုအများအပြား ဖြစ်ပေါ်လာလိမ့်မည် မဟုတ်ချေ။ အမှန်မှာ သူတို့ထဲမှ တစ်ယောက်ယောက်ပင် သေချာပေါက် အောင်မြင်သွားနိုင်လိမ့်မည်။

ယခု ရွှီချင်း၏ ရောက်ရှိလာမှုကြောင့် သူတို့လိုချင်သော တစ္ဆေရထားလုံးအားလုံးသည် အပေါ်သို့ ပျံသန်းသွားကြသည်။ ရွှီချင်းက လက်တစ်ဖက် ဝှေ့ယမ်းလိုက်ရုံဖြင့် အမှောင်ခန်းထဲမှ ကန့်လန့်ကာက ရုတ်တရက် ဆွဲပွင့်သွားသည့်အလား ပုန်းအောင်းနေသော လူတိုင်းက ထွက်ပေါ်လာကြသည်။

ထိုဖော်ပြချက်သည် မပြည့်စုံသေးပေ။ အတိအကျဆိုရလျှင် ရွှီချင်းက လက်ဝှေ့ယမ်းလိုက်သည့်အခါ ကန့်လန့်ကာက ဆွဲပွင့်သွားရုံသာမက အခန်းသည်လည်း ပြိုကွဲသွားပြီး အဝေးသို့ ရွေ့လျားသွားသည်။

ထိတ်လန့်ဖွယ်ရာ ထိုမြင်ကွင်းသည် မီးလျှံလကျင့်ကြံသူအားလုံးကို နှလုံးတုန်သွားစေခဲ့သည်။ သူတို့အားလုံးသည် ဆွံ့အသွားကြသည်။

ချက်ချင်းဆိုသလို သူတို့က အမှောင်ထဲမှ အလင်းဆီသို့ ရောက်ရှိသွားကြသည်။ ထို့ကြောင့် သူတို့၏ အသက်ရှူသံက မြန်ဆန်လာသည်။

ထိုထဲမှာ ဂျိဒုန်းဇီ၏ ထိတ်လန့်မှုသည် အပြင်းထန်ဆုံးဖြစ်သည်။ လွန်ခဲ့သော လတုန်းက ကျူးလီတားမြစ်ဇုန်ထဲမှ အားလှိုင်းအတတ်အကျများကို သူအာရုံခံမိစဉ် ရွှီချင်းနှင့်ပတ်သက်ပြီး တွေးတောခဲ့သည်။

ရွှီချင်းက မသေဆုံးသေးဘဲ အနာဂတ်မှာ သူတို့က ပြန်တွေ့ဆုံနိုင်လောက်သည်ဟု သူတွေးခဲ့သည်။ သို့သော်လည်း သူတို့၏ တွေ့ဆုံမှုက ထိုမျှမယုံကြည်နိုင်စရာကောင်းလိမ့်မည်ဟု သူမမျှော်လင့်ထားခဲ့ပေ။

တစ္ဆေရထားလုံးတစ်ရာသည် ဘုရင်ကို မြင်တွေ့သွားသည့်အလား ရွှီချင်းကို အရိုအသေပေးနေကြသည်။ ထို့ပြင် ဝိညာဉ်စုစည်းခြင်းအဆင့် အားလှိုင်းအတတ်အကျများကို ထုတ်လွှတ်နေသော ဘိုးဘေးတစ္ဆေရထားလုံးသုံးကောင်လည်း ရှိသေးသည်။ ယင်းက ဂျိဒုန်းဇီကို နှလုံးတုန်သွားစေသည်။

အလွန်အားကောင်းသော အန္တရာယ်ခံစားမှုသည် သူ၏ စိတ်ထဲမှာ ထွက်ပေါ်လာသည်။ သူနှင့် ပေတစ်သောင်းအကွာမှ ဖန်းရှီရွှမ်းသည်လည်း ထိုသို့ခံစားမိနေသည်။ အစောနက သူသည် ဂျိဒုန်းဇီနှင့် အပြင်းအထန် တိုက်ခိုက်နေခဲ့သည်။ သို့သော်လည်း ယခု ထိုအဖြစ်အပျက်ကို သူ၏ မျက်စိဖြင့် ကိုယ်တိုင်မြင်တွေ့သွားသည့်အခါ သူ၏ အသိစိတ်သည် ပရမ်းပတာ လှုပ်ခတ်သွားသည်။

ဤအခိုက်အတန့်မှာ လူတိုင်းက ထိုမြင်ကွင်းကြောင့် အံ့ဩထိတ်လန့်နေကြပြီး မဆင်မခြင် မလှုပ်ရှားဝံ့ကြချေ။

ရွှီချင်းတစ်ယောက်တည်းသာ ပြန့်ကျဲနေသော တောအုပ်၏ အပြင်ဘက်တွင် ရပ်နေသည်။ သူ၏ အကြည့်က ဂျိဒုန်းဇီထံသို့ ချက်ချင်း မကျရောက်သွားခဲ့ပေ။ ယင်းအစား သူက ကောင်းကင်ပေါ်မှ ဘိုးဘေးတစ္ဆေရထားလုံးသုံးကောင်ကို ကြည့်လိုက်သည်။

၎င်းတို့သုံးကောင်သည် တခြားသားရဲများနှင့်မတူညီဘဲ ငိုကြွေးခြင်းမပြုသလို ရွှီချင်းကိုလည်း အရိုအသေမပေးကြချေ။ ယင်းအစား ၎င်းတို့က ရွှီချင်းကို ကောင်းကင်ပေါ်မှနေ၍ စိုက်ကြည့်နေကြသည်။

၎င်းတို့၏ အကြည့်ထဲမှာ စူးစမ်းလေ့လာခြင်းနှင့် သံသယအရိပ်အယောင် ရှိသည်။

" ကြည့်ရတာ တောင်တန်းပင်လယ်ဒေသကြီးထဲက သားရဲတွေက ဝိညာဉ်စုစည်းခြင်းအဆင့်ကို ရောက်ရှိသွားတဲ့အခါ သူတို့ရဲ့ သွေးမျိုးဆက်ထဲမှာ ဖုံးကွယ်ခံထားရတဲ့ မှတ်ဉာဏ်တချို့က ပြန်နိုးထလာတဲ့ပုံပဲ "

ရွှီချင်းက တွေးတောလိုက်သည်။ ထိုအဖြေသည် ဘိုးဘေးတစ္ဆေရထားလုံးသုံးကောင်၏ အကြည့်ကို ရှင်းပြပေးနိုင်သည်။

ထိုအကြည့်က သူ့အား ကျူးလီအရှိန်အဝါ၏ အကန့်အသတ်ကို နားလည်သွားစေသည်။

" အစစ်အမှန်ဘုရင်ပုံစံကို ငါမထုတ်ဖော်နိုင်သေးသရွေ့ ဒီက သားရဲအားလုံးကို ငါမထိန်းချုပ်နိုင်ဘူး "

ရွှီချင်းက သူ၏ စိတ်ထဲမှာ တွေးတောလိုက်သည်။ ထို့နောက် သူက အကြည့်ပြန်ရုပ်လိုက်ပြီး အဝေးမှ ဂျိဒုန်းဇီကို ကြည့်လိုက်သည်။

သူတို့ကြားမှ အကွာအဝေးက အလွန်ကျယ်ပြောသောကြောင့် သေမျိုးများသည် တစ်ယောက်နှင့်တစ်ယောက် မမြင်နိုင်ကြချေ။

သို့သော်လည်း ကျင့်ကြံသူတစ်ယောက်၏ တိုက်ပွဲစွမ်းအားက အလုံအလောက် မြင့်မားသွားလျှင် သူတို့ကြားမှ အကွာအဝေးက အလွန်မကျယ်ပြောသရွေ့ နတ်ဘုရားစိတ်အာရုံကို အသုံးပြုပြီး တစ်ယောက်နှင့်တစ်ယောက် မြင်နိုင်ပေသည်။

ရွှီချင်း၏ အကြည့်အောက်မှာ ဂျိဒုန်းဇီသည် အန္တရာယ်ကို ထပ်မံ ခံစားမိသွားသည်။ ရွှီချင်းသည် အရှေ့သို့ ခြေတစ်လှမ်း လှမ်းလိုက်သည်။

သူက ခြေလှမ်း လှမ်းလိုက်သည့်အခါ မိုးခြိမ်းသံသည် သူ၏ ခန္ဓာကိုယ်ထဲမှ ပေါက်ကွဲထွက်လာသည်။ ပမာဏအလွန်များပြားသော အနီရောင်ဝိညာဉ်ချည်မျှင်များက သူ၏ ခန္ဓာကိုယ်အပြင်ဘက်သို့ ပျံ့နှံ့ထွက်လာကြသည်။ ယင်းက သူ၏ ဘေးပတ်ဝန်းကျင်တွင် အံ့ဖွယ်ကောင်းသော သွေးနီရောင်မုန်တိုင်းတစ်ခုကို လှုံ့ဆော်လိုက်သည်။ သွေးနီရောင်မုန်တိုင်းသည် ရွှီချင်း၏ ခန္ဓာကိုယ်နှင့် ပေါင်းစပ်သွားပြီး စတုတ္ထနတ်ဘုရားအသွင်သဏ္ဍာန်ကို ဖွဲ့စည်းလိုက်သည်။ ယင်းက နီလာနတ်သမီး၏ အသွင်သဏ္ဍာန်ဖြစ်ပြီး ၎င်းကို ခရမ်းအရှင်သခင်ဟု ခေါ်သည်။

၎င်းက ပေတစ်ထောင်ခန့် ရှည်လျားပြီး ၎င်း၏ တစ်ကိုယ်လုံးကို ခရမ်းရောင်အသွေးအသားနှင့် ငှက်မွှေးများဖြင့် ဖွဲ့စည်းထားသည်။ ၎င်း၏ နောက်ကျောတွင် ဧရာမအတောင်ပံနှစ်ခုပင် ရှိသည်။ တီးတိုးရေရွတ်သံများက ၎င်း၏ ခန္ဓာကိုယ်ထဲမှ ပဲ့တင်ထပ်လာပြီး အရပ်မျက်နှာအဘက်ဘက်သို့ ပျံ့လွင့်သွားသည်။

၎င်း၏ အနောက်တွင် တဖြည်းဖြည်း မြှောက်တတ်လာနေသော ခရမ်းလတစ်စင်း ရှိသည်။ လဂြိုလ်ပေါ်တွင် မရေမတွက်နိုင်သော ပုံရိပ်များက ဝတ်ပြုဆုတောင်းနေကြသည်။

၎င်း၏ အရှေ့တွင် ဧရာမနေနာရီနှစ်ခုရှိပြီး နေနာရီလက်တံများက မြန်ဆန်စွာ လှည့်ပတ်နေကြသည်။ အချိန်စွမ်းအားသည် နေနာရီများထံမှ ပေါ်လျှိုးထွက်လာပြီး ဟင်းလင်းပြင်ကို ပုံပျက်တွန့်လိမ်စေကာ အရာအားလုံးကို ဝေဝါးစေသည်။

၎င်း၏ ခြေထောက်အောက်တွင် ကြာပလ္လင်တစ်ခုရှိသည်။ ကြာပလ္လင်ပေါ်မှ ကြာရွက်တစ်ခုစီသည် ရွှီချင်း၏ နတ်ဘုရားစွမ်းရည်တစ်မျိုးစီကို ကိုယ်စားပြုသည်။ ခရမ်းရောင်ရေဘဝဲလက်တံများသည် ၎င်း၏ ဘေးပတ်ပတ်လည်မှာ ထွက်ပေါ်လာကြပြီး ခရမ်းရောင်နှင်းပန်းပွင့်ပမာ အရပ်မျက်နှာပေါင်းစုံသို့ ပျံ့နှံ့သွားကြသည်။ ယင်းက ထိတ်လန့်ဖွယ်ရာ မြင်ကွင်းတစ်ခု ဖြစ်သည်။

နတ်ဘုရားအသွင်သဏ္ဍာန်၏ စိတ်ဆန္ဒသည် ကျင့်ကြံသူအများစု၏ ဝိညာဉ်ကို တုန်လှုပ်သွားစေသည်။ တစ္ဆေရထားလုံးများသည်ပင် ဂနာမငြိမ်ဖြစ်လာကြသည်။ ကောင်းကင်ပေါ်မှ ဘိုးဘေးတစ္ဆေရထားလုံးသုံးကောင်သည် ၎င်းတို့ထံမှ ဖိအားကို ထုတ်လွှတ်လိုက်ကြသည်။

သို့သော်လည်း ရွှီချင်းသည် ဂရုမစိုက်ပေ။ သူက နတ်ဘုရားအသွင်သဏ္ဍာန်နှင့်အတူ ဒုတိယခြေလှမ်းကို လှမ်းလိုက်သည်။

နောက်အခိုက်အတန့်မှာ အသွေးအသားမီးအိမ်ကိုးခုသည် သူ၏ ခန္ဓာကိုယ်ထဲမှ ပျံသန်းထွက်လာကြပြီး သူ့ကို ဝန်းရံလိုက်ကြသည်။ ၎င်းတို့က ကျူးလီ၏ ဦးခေါင်းခွံကိုးခုကို ဖွဲ့စည်းသွားကြပြီး ထိတ်လန့်ဖွယ်ကောင်းသော အရှိန်အဝါကို ထုတ်လွှတ်လိုက်ကြသည်။ ၎င်းတို့က မာန်ဖီဟိန်းဟောက်လိုက်ကြပြီး ရွှီချင်းဆီသို့ တစ်ဟုန်ထိုး ပျံသန်းသွားကြသည်။

မျက်စိတစ်မှိတ်အတွင်းမှာ ၎င်းတို့က ရွှီချင်း၏ နတ်ဘုရားအသွင်သဏ္ဍာန်နှင့် ပေါင်းစပ်သွားပြီး ၎င်း၏ ခန္ဓာကိုယ်ပေါ်မှာ ဂမ္ဘီရမှော်ဝင်စစ်ချပ်ဝတ်အဖြစ် ဖွဲ့စည်းသွားသည်။ ထိုစစ်ချပ်ဝတ်တစ်ခုလုံး၌ ရှေးဟောင်းအငွေ့အသက်ဖြင့် ပြည့်နှက်နေသည်။

ကျူးလီ၏ ဦးခေါင်းခွံကိုးခုက တစ်ချိန်တည်းမှာ ထွက်ပေါ်လာသည့်အခါ ရွှီချင်း၏ တိုက်ပွဲစွမ်းအားသည် ကြီးကြီးမားမား တိုးမြှင့်သွားသည်။ ရာဇီမျက်နှာဖုံးက ရွှီချင်း၏ မျက်နှာပေါ်သို့ တင်ဆင်သွားသည့်အခိုက် လောက၏ အရောင်သည် ပြောင်းလဲသွားပြီး တိမ်တိုက်များသည် လှုပ်ရှားထကြွသွားသည်။

ဤသည်မှာ သမိုင်းထဲတွင် တစ်ခါမှ မရှိခဲ့ဖူးသော သက်ရှိတစ်ကောင်၏ ထွက်ပေါ်လာမှု ဖြစ်သည်။

နတ်ဘုရားအသွင်သဏ္ဍာန်နှင့် ဂမ္ဘီရမှော်အသွင်သဏ္ဍာန်သည် လူတစ်ယောက်တည်းဆီမှာ တစ်ချိန်တည်း ထွက်ပေါ်လာသည်။ ထို့အတူ ဖော်မပြနိုင်အောင် ကြီးမားသော စွမ်းအင်အရှိန်အဝါသည် ရွှီချင်း၏ ခန္ဓာကိုယ်ထဲမှ ပေါ်လျှိုးထွက်လာသည်။

တစ္ဆေရထားလုံးများသည် တုန်ယင်သွားကြသည်။ ကောင်းကင်ပေါ်မှ ဘိုးဘေးတစ္ဆေရထားလုံးသုံးကောင်သည်ပင် ခေါင်းငုံ့လိုက်ကြသည်။ အမှောင်တောအုပ်ထဲမှ သစ်ပင်များအားလုံးသည် ကွေးညွတ်သွားကြပြီး ကောင်းကင်ပေါ်မှ အနီရောင်မိုးကြိုးသွားများသည် ပေါက်ကွဲသွားကြသည်။ မီးလျှံလရွှမ်ကောင်းကင်မျိုးနွယ်မှ ကျင့်ကြံသူများသည် ထိုအရှိန်အဝါကို ခံနိုင်ရည်မရှိသောကြောင့် သွေးအန်လိုက်ရပြီး အတင်းအကျပ် အနောက်ဆုတ်သွားကြသည်။ သူတို့၏ နှလုံးသားထဲမှာ ကြောက်လန့်မှုနှင့် မယုံကြည်နိုင်မှုက တစ်ပြိုင်နက် ထွက်ပေါ်လာသည်။

ဖန်းရှီရွှမ်းနှင့် ဂျိဒုန်းဇီ၏ အသိစိတ်သည်ပင် ပရမ်းပတာ လှုပ်ခတ်သွားသည်။

သူတို့က ရွှီချင်း၏ တိုက်ခိုက်မှုကို မတွေ့ကြုံရသေးသော်လည်း ဤအခိုက်အတန့်မှာ ရွှီချင်းက မည်မျှသန်မာကြောင်း ရှင်းလင်းစွာ အာရုံခံနိုင်ကြသည်။

အဝေးမှ ထျန်းမိုဇီသည်လည်း အသက်ရှူမြန်လာသည်။ တခြားလူများကဲ့သို့ပင် သူက ရွှီချင်း၏ ဤတိုက်ပွဲအသွင်သဏ္ဍာန်ကို ပထမဆုံးအကြိမ် မြင်ဖူးခြင်းဖြစ်သည်။ သူ၏ သွေးမျိုးဆက်မှ တုံ့ပြန်မှုကြောင့် သူ၏ စိတ်ထဲမှာ ရွှီချင်းကို အရိုအသေပေးချင်စိတ်ပင် ဖြစ်ပေါ်လာသည်။

လူတိုင်းက ရွှီချင်း၏ တိုက်ပွဲစွမ်းအားကြောင့် အံ့ဩထိတ်လန့်နေကြစဉ် သူ၏ နတ်ဘုရားအသွင်သဏ္ဍာန်သည် တတိယခြေလှမ်းကို လှမ်းလိုက်သည်။ ထိုအခါ သူက ဟင်းလင်းပြင်ကို တိုက်ရိုက် ဖြတ်သန်းသွားပြီး ဂျိဒုန်းဇီနှင့် ပေတစ်သောင်းအကွာမှာ ပြန်ပေါ်လာသည်။

သူထွက်ပေါ်လာသည့်အခိုက် မြေကြီးသည် တုန်ယင်သွားပြီး ကောင်းကင်သည် အက်ကွဲသွားသည်။ ရာဇီမှ ထုတ်လွှတ်နေသော ပြိုင်ဘက်ကင်း သတ်ဖြတ်ခြင်းစိတ်ဆန္ဒနှင့် ကြမ်းကြုတ်သော အရှိန်အဝါကြောင့် ခရမ်းရောင်နှင်းပွင့်များသည် ကောင်းကင်ပေါ်မှ ဆင်းသက်လာကြသည်။

ဖန်းရှီရွှမ်းသည် ရုတ်တရက် အနောက်ဆုတ်သွားသည်။ ရွှီချင်း၏ အေးစက်စက် အကြည့်နှင့် ဂျိဒုန်းဇီက ရွှီချင်းကို သတ်ဖြတ်ခဲ့သည်ဟူသော သတင်းကို သူပြန်အမှတ်ရသွားသောအခါ ရွှီချင်းက ဂျိဒုန်းဇီအတွက် ဤနေရာကို ရောက်လာခြင်းဖြစ်ပြီး ယင်းက သူနှင့်ဘာမှမသက်ဆိုင်ကြောင်း ဖန်းရှီရွှမ်းက ချက်ချင်း ဆုံးဖြတ်လိုက်သည်။

ဖန်းရှီရွှမ်းက အနောက်ဆုတ်သွားစဉ် ဝုန်းခနဲ မြည်သံသည် ဂျိဒုန်းဇီ၏ ခန္ဓာကိုယ်ထဲမှ ပေါက်ကွဲထွက်လာပြီး သူသည်လည်း အနောက်ဆုတ်သွားသည်။

သူက အနောက်ဆုတ်သွားနေရင်း ချိပ်တံဆိပ်လက်ဟန်များကို မြန်ဆန်စွာ ဖွဲ့စည်းလိုက်သည်။ ပြီးပြည့်စုံသော ဗလာနတ္ထိအဆင့်၏ တိုက်ပွဲစွမ်းအားသည် သူ၏ ခန္ဓာကိုယ်ထဲမှ ပေါ်လျှိုးထွက်လာသည်။

မီးလျှံလရွှမ်ကောင်းကင်မျိုးနွယ်၏ နံပါတ်နှစ်ကောင်းကင်အရွေးချယ်ခံအနေဖြင့် ဂျိဒုန်းဇီသည် ရွှီချင်းထံမှ ကြီးမားသော ဖိအားကို ခံစားမိသော်လည်း မတိုက်ခိုက်ဘဲ လက်မလျော့နိုင်ပေ။

သို့သော်လည်း ရွှီချင်းက ဤနေရာကို ရောက်လာမှတော့ ဤတိုက်ပွဲက သေခြင်းရှင်ခြင်းတိုက်ပွဲ ဖြစ်လာလိမ့်မည်ဖြစ်ကြောင်း ကောင်းမွန်စွာ သူသိသည်။

သို့ဖြစ်၍ ချက်ချင်းဆိုသလို ကောင်းကင်သည် အက်ကွဲသွားပြီး ဧရာမလက်ချောင်းတစ်ချောင်းက ဆင်းသက်လာသည်။ ထိုဧရာမလက်ချောင်းသည် ရွှီချင်းထံသို့ မြန်ဆန်စွာ ချဉ်းကပ်သွားသည်။

ထိုလက်ချောင်း၏ အရှိန်အဝါက အလွန်ကျယ်ပြောလေရာ ယင်းက ကောင်းကင်နှင့်မြေပြင်ကို ဖျက်ဆီးပစ်နိုင်ဟန် ရသည်။ ယင်းထဲမှာ ဂျိဒုန်းဇီ၏ တိုက်ပွဲစွမ်းအားသာမက မရေမတွက်နိုင်သော အသေးစား ဥပဒေသများနှင့် တာအိုအမှတ်အသားများလည်း ပါဝင်သေးသည်။

ယင်းက ဟင်းလင်းပြင်ကို ပုံပျက်တွန့်လိမ်စေပြီး ရွှီချင်းထံသို့ ကမ္ဘာဖျက်ဆီးနိုင်သော အရှိန်အဟုန်နှင့်အတူ ဦးတည်သွားသည်။

ရွှီချင်း၏ အမူအရာသည် အေးအေးတည်ငြိမ်သည်။ သူက ညာလက်ကို မြှောက်လိုက်ပြီး သူ့ဆီသို့ ဆင်းသက်လာနေသော လက်ချောင်းဆီသို့ ညင်သာစွာ ဖိချလိုက်သည်။

ဗုန်းဟူသော မြည်သံနှင့်အတူ သူ့အရှေ့မှ ဧရာမလက်ချောင်းသည် အမှန်တကယ် ရပ်တန့်သွားသည်။

သူက ထိုလက်ချောင်းကိုပင် မမြှောက်လိုက်သေးသည်။ ထိုအခါ မိုးခြိမ်းသံထက် ပိုပြီးကျယ်လောင်သော အက်ကွဲသံများက ပဲ့တင်ထပ်လာသည်။

ထို့နောက် ကြောက်စရာကောင်းသော ဧရာမလက်ချောင်းသည် အပြင်းအထန် တုန်ခါသွားပြီး ရွှီချင်း၏ လက်ဝါးရိုက်ချက်‌အောက်မှာ ပြိုကွဲပျက်စီးသွားသည်။

နောက်အခိုက်အတန့်မှာ ဒုတိယ၊ တတိယ၊ စတုတ္ထနှင့် ပဉ္စမလက်ချောင်းသည် ကောင်းကင်တစ်ခွင် ပြည့်နှက်သွားပြီး တစ်ချောင်းပြီးတစ်ချောင်း ဆင်းသက်လာကြသည်။

ဂျိဒုန်းဇီသည် ယခင်က ထိုတိုက်ကွက်ကို ရွှီချင်းပေါ်မှာ အသုံးပြုခဲ့ဖူးသည်။ ထိုအချိန်တုန်းက ရွှီချင်းသည် သူ၏ နတ်ဘုရားစွမ်းရည်အားလုံးကို အသုံးပြုပြီး ကြီးမားသော တန်ဖိုးတစ်ခုကို ပေးချေခဲ့သည့်တိုင် ယင်းကို ခုခံကာကွယ်နိုင်ရုံမျှသာ တတ်စွမ်းခဲ့သည်။ သူက ဒဏ်ရာအပြင်းအထန် ရရှိသွားခဲ့ပြီး ရေတွင်းထဲမှ လကို မျှားခြင်းကို စောစီးစွာ အသုံးပြုခဲ့ရသည်။

သို့သော်လည်း ယခုတော့ ခြားနားသွားသည်။

ယင်းက တူညီသော နတ်ဘုရားစွမ်းရည်ဖြစ်သော်လည်း ဖြေရှင်းပုံသည် ခြားနားသွားသည်။ ရွှီချင်းသည် စတုတ္ထခြေလှမ်းကို လှမ်းလိုက်သည်။

အက်ကွဲသံများက ပဲ့တင်ထပ်လာသည့်အခါ ကောင်းကင်ပေါ်မှ ကျဆင်းလာနေသော လက်ချောင်းလေးချောင်းသည် ရွှီချင်းကို နည်းနည်းလေးမှ မရပ်တန့်ပစ်နိုင်ခဲ့ပေ။

သူက လက်တစ်ဖက်မြှောက်ရုံဖြင့် လက်ချောင်းအားလုံးကို ဖျက်ဆီးပစ်နိုင်ခဲ့သည်။

ထိုမြင်ကွင်းကို မြင်သွားသောအခါ ဂျိဒုန်းဇီ၏ အမူအရာသည် တည်ကြည်လေးနက်သွားသည်။ သူက အနောက်ဆုတ်သွားနေရင်း ချိပ်တံဆိပ်လက်ဟန်များကို ထပ်မံ ဖွဲ့စည်းလိုက်သည်။ လက်ချောင်းငါးချောင်း ပျက်စီးသွားပြီးနောက် ကောင်းကင်သည် မည်းမှောင်သွားပြီး ဧရာမလက်ဝါးတစ်ခုက မြေပြင်ပေါ်သို့ တိုက်ရိုက် ဆင်းသက်လာသည်။

ရွှီချင်းသည် ခေါင်းမော့လိုက်ပြီး ဧရာမလက်ဝါးကို ကြည့်လိုက်သည်။ မီးခိုးရောင်မြူခိုးက သူ၏ မျက်လုံးထဲမှာ ထွက်ပေါ်လာသည်။

မြူခိုးသည် မြန်ဆန်စွာ ပိုပြီးသိပ်သည်းလာသည်။ ထို့နောက် ယင်းက ရွှီချင်း၏ ခန္ဓာကိုယ်အပြင်ဘက်သို့ တိုးထွက်လာပြီး လက်ဝါးဆီသို့ ဦးတည်သွားသည်။

လက်ဝါးနှင့် မြူခိုးတို့ ထိပ်တိုက်တွေ့ဆုံသွားသည့်အခိုက် ဝုန်းခနဲ မြည်သံများ ပဲ့တင်ထပ်သွားသည်။ လက်ဝါးသည် အောက်သို့ ဆက်ပြီး မကျဆင်းနိုင်တော့ပေ။ တန်ပြန်အားကြောင့် လက်ဝါးက အနောက်သို့ တွန်းထုတ်ခံလိုက်ရသည်။ တစ်ခဏကြာပြီးနောက် မြူခိုးသည် မီးခိုးရောင်သံချောင်းတစ်ချောင်းအဖြစ် အတူတကွ စုဝေးသွားပြီး လက်ဝါးကို တိုက်ရိုက် ထိုးဖောက်သွားကာ မြေပြင်ပေါ်သို့ တရွတ်တိုက် ဆွဲခေါ်သွားသည်။

မြေပြင်သည် အကြမ်းပတမ်း တုန်ယင်သွားသည်။ ဧရာမလက်ဝါးသည် မြေပြင်ပေါ်တွင် မီးခိုးရောင်သံချောင်းကြောင့် တံစို့ထိုးစိုက်ခံထားရသည်။

ဂျိဒုန်းဇီက မည်မျှကြိုးစားပါစေ မီးခိုးရောင်သံချောင်းအောက်မှ လက်ဝါးက ရုန်းမထွက်နိုင်ခဲ့ပေ။

ရွှီချင်းသည် အကြည့်ပြန်ရုပ်လိုက်ပြီး မျက်နှာမည်းမှောင်နေသော ဂျိဒုန်းဇီကို ကြည့်လိုက်သည်။ သူက မည်သည့်စကားတစ်ခွန်းမှ မပြောဘဲ ပဉ္စမခြေလှမ်းကို လှမ်းလိုက်သည်။

သူက ပြန်ပေါ်လာသည့်အခါ ဂျိဒုန်းဇီနှင့် ပေတစ်ထောင်အကွာသို့ ရောက်ရှိသွားသည်။

ဂျိဒုန်းဇီ၏ အသက်ရှူသံသည် မြန်ဆန်လာပြီး သူ၏ ခန္ဓာကိုယ်သည် သွေးနီရောင်သို့ ချက်ချင်း ပြောင်းလဲသွားသည်။ သွေးပုံရိပ်များသည် သူ၏ ခန္ဓာကိုယ်ထဲမှ ပျံသန်းထွက်လာကြပြီး သူ၏ ဘေးပတ်ပတ်လည်တွင် လှည့်ပတ်လိုက်ကြသည်။ ၎င်းတို့က သွေးပင်လယ်တစ်ခုကို မြန်ဆန်စွာ ဖွဲ့စည်းလိုက်ကြသည်။ သွေးပုံရိပ်များက အရည်ပျော်သွားသည့်အခါ သွေးပင်လယ်၏ အရွယ်အစားသည် ကြီးမားကျယ်ပြောသွားပြီး ရွှီချင်းဆီသို့ တန်းမတ်စွာ ဦးတည်သွားသည်။

တစ်ချိန်တည်းမှာ ဂျိဒုန်းဇီသည် လေထဲသို့ မြန်ဆန်စွာ ပျံတတ်သွားသည်။ သူ၏ အမူအရာသည် မည်းမှောင်နေပြီး သူ၏ မျက်လုံးထဲမှာ သတ်ဖြတ်ခြင်းစိတ်ဆန္ဒဖြင့် ပြည့်နှက်နေသည်။ သူက လက်နှစ်ဖက်စလုံးကို မြှောက်တင်လိုက်သည်။

ချက်ချင်းဆိုသလို ပိုမိုများပြားသော သွေးနှင့် သွေးပုံရိပ်များက သူ၏ ခန္ဓာကိုယ်ထဲမှ ပေါ်လျှိုးထွက်လာကြသည်။

ထို့ကြောင့် သူ၏ ဘေးပတ်ပတ်လည်မှ သွေးပင်လယ်၏ အရွယ်အစားသည် တစ်ဟုန်ထိုး မြင့်တတ်သွားသည်။ အဆုံးသတ်ကိုပင် မမြင်နိုင်တော့သည်အထိ သွေးပင်လယ်က အလွန်ကျယ်ပြောသွားသည်။ ယင်းက ကောင်းကင်နှင့်မြေပြင်ကို ဖုံးလွှမ်းသွားပြီး သွေးရောင်စွန်းထင်သွားစေသည်။

" ဖိနှိပ်စမ်း "

သွေးပင်လယ်၏ အလယ်ဗဟိုမှ ဂျိဒုန်းဇီသည် ပြိုင်ဘက်ကင်းလုနီးပါး ဖြစ်လာသည်။ သူက အော်ပြောလိုက်ပြီး လက်နှစ်ဖက်ကို အောက်ပြန်ချလိုက်သည်။ ထိုအခါ သူ၏ ဘေးပတ်ပတ်လည်မှ ကြောက်မက်ဖွယ်ကောင်းသော သွေးပင်လယ်သည် အောက်သို့ ဆင်းသက်လာပြီး မြေပြင်ကို ဖိနှိပ်လိုက်သည်။

အတိတ်တွင် ရွှီချင်းသည် ပမာဏများပြားသော သွေးကို မထိန်းချုပ်နိုင်သောကြောင့် ထိုတိုက်ကွက်အောက်မှာ ရှုံးနိမ့်သွားခဲ့သည်။ သူက အသက်ဘေးမှ လွတ်မြောက်သွားခဲ့သော်လည်း ယင်းကြောင့် ဒဏ်ရာအပြင်းအထန် ရရှိသွားခဲ့သည်။

ဤအခိုက်အတန့်မှာ ရွှီချင်းက ခေါင်းမော့လိုက်ပြီး ကောင်းကင်ပေါ်မှ နောက်တစ်ကြိမ် ကျဆင်းလာနေသော ဧရာမသွေးပင်လယ်ကို ကြည့်လိုက်သည်။ သူက ညာလက်ကို မြှောက်လိုက်ပြီး သွေးပင်လယ်ကို ဖမ်းဆုပ်လိုက်သည်။

သူ၏ ကျင့်ကြံခြင်းအခြေခံသည် ဤအခိုက်အတန့်မှာ ပေါ်လျှိုးထွက်လာသည်။ သူ၏ နတ်ဘုရားအရင်းအမြစ်သည် ဘေးပတ်ဝန်းကျင်သို့ ပျံ့နှံ့သွားသည်။ ကျူးလီ၏ ဦးခေါင်းခွံကိုးခုသည်လည်း သူ၏ ခန္ဓာကိုယ်ထဲမှ ထွက်ခွာသွားကြပြီး ဟိန်းဟောက်လိုက်ကြသည်။

ထိုအခါ ရွှီချင်း၏ သွေးအခွင့်အာဏာသည် မူလအကန့်အသတ်ကို ကျော်လွန်သွားပြီး ပိုပြီးမြင့်မားသော အဆင့်သို့ ရောက်ရှိသွားသည်။ ကောင်းကင်တစ်ခုလုံးကို ဖုံးလွှမ်းထားသော သွေးပင်လယ်သည် မတည်မငြိမ်ဖြစ်လာပြီး ဝဲကတော့တစ်ခုအဖြစ် လှည့်ပတ်သွားသည်။ ထိုဝဲကတော့၏ ဇစ်မြစ်သည် ရွှီချင်း၏ မြှောက်ထားသော ညာလက်မှလွဲ၍ တခြားမဟုတ်ပေ။

သွေးဝဲကတော့သည် ရွှီချင်း၏ လက်ဖဝါးထဲ၌ စုဝေးသွားသည်။ ယင်းက တဖြည်းဖြည်း သေးသထက် ပိုပြီးသေးလာသည်။

အဝေးမှ ကြည်လျှင် ထိုမြင်ကွင်းသည် အလွန်ထိတ်လန့်ဖွယ်ကောင်းသည်။ ယင်းက ဤနေရာမှာရှိသော ကျင့်ကြံသူအားလုံးကို နှလုံးတုန်သွားစေသည်။

နောက်ဆုံးမှာတော့ လူတိုင်း၏ အကြည့်အောက်မှာ အစက ကောင်းကင်တစ်ခုလုံးကို လွှမ်းခြုံထားခဲ့သော အဆုံးမဲ့သွေးပင်လယ်သည် ရွှီချင်း၏ လက်ဖဝါးအလယ်တွင် သေးငယ်သော သွေးဝဲတော့တစ်ခုအဖြစ် အမှန်တကယ်‌ ပြောင်းလဲသွားသည်။

ယင်းထံမှ ထုတ်လွှတ်နေသော အလင်းရောင်သည် ကောင်းကင်နှင့်မြေပြင်ကို အနီရောင်စွန်းထင်သွားစေသည်။ ယင်းကို တစ်ချက်ကြည့်ရုံဖြင့် တစ်စုံတစ်ယောက်၏ ဝိညာဉ်သည် စူးရှသော နာကျင်မှုကို ခံစားသွားရလိမ့်မည်။ ယင်းထံမှ မရေမတွက်နိုင်သော အော်ဟစ်ညည်းညူသံများကို မည်သူမဆို ကြားနိုင်ပေသည်။

ပိုပြီးကြောက်စရာကောင်းသည့် အချက်မှာ ရွှီချင်း၏ လက်ဖဝါးထဲရှိ သွေးဝဲကတော့က မတည်မငြိမ်ဖြစ်နေခြင်း ဖြစ်သည်။ ဤသည်မှာ ယင်းက အချိန်မရွေး ပေါက်ကွဲသွားနိုင်ပြီး ကမ္ဘာတုန်ဟီးစေမည့် အဖျက်စွမ်းအားကို ဖြစ်ပေါ်စေနိုင်ဟန် ရ၏။

ထိုမြင်ကွင်းသည် ဂျိဒုန်းဇီ၏ အသိစိတ်ကို ပရမ်းပတာ ပေါက်ကွဲသွားစေသည်။ သူ၏ ခန္ဓာကိုယ်က အပြင်းအထန် တုန်ယင်လာပြီး သူ၏ နှလုံးသားထဲမှ ထိတ်လန့်မှုကို ဆက်ပြီး မဖိနှိပ်နိုင်တော့ပေ။ အကြောက်တရားက သူ၏ မျက်လုံးထဲမှာ ထင်ရှားစွာ ထွက်ပေါ်လာသည်နှင့်ချက်ချင်း ရွှီချင်းက သူ၏ ညာလက်ကို ဝှေ့ယမ်းလိုက်သည်။

ချက်ချင်းဆိုသလို ကမ္ဘာဖျက်ဆီးနိုင်သော သွေးဝဲကတော့သည် အရှေ့သို့ ပျံသန်းထွက်သွားသည်။ သွေးဝဲကတော့ ဖြတ်သန်းသွားသည့်နေရာတိုင်း ယင်းက ယိုယွင်းပျက်စီးစေမည့် အနီရောင်သွေးအမှတ်အသားများကို ချန်ထားခဲ့လိမ့်မည်။ ဤသည်မှာ ကောင်းကင်က ဖျက်ဆီးခံနေရသည့်အလားပင်။ ထိုမျှကြောက်စရာကောင်းသော သွေးဝဲကတော့သည် ဂျိဒုန်းဇီဆီသို့ တန်းမတ်စွာ ဦးတည်သွားနေသည်။