ရှေးဦးနတ်ဘုရားနယ်မြေ

နတ်ဘုရားတောင်တန်းပေါ်မှ ကောင်းကင်ပေါ်တွင် နေ၊ လ၊ ကြယ် နတ်ဘုရားသုံးပါး၏ နတ်ဘုရားအရှိန်အဝါသည် ကောင်းကင်တစ်ခွင် ပြည့်နှက်နေသည်။ ရာသီဥတုသည် ပြောင်းလဲသွားပြီး ကောင်းကင်သည် ဆက်လက် မတည်တံ့နိုင်တော့သည့်အလား ပြိုကွဲပျက်စီးတော့မည့် အရိပ်အယောင် ပြလာသည်။ ယင်းက ပြင်းထန်သော လေဖိအားကို ဖြစ်ပေါ်စေသည်။

နတ်ဘုရားသုံးပါးသည် လူတိုင်း၏ အာရုံစိုက်မှုအလယ်မှာ ရှိသည်။

အလယ်တွင် မတ်တတ်ရပ်နေသော မီးလျှံနေနတ်ဘုရား၏ ပုံရိပ်သည် အံ့ဩမင်သက်ဖွယ်ကောင်းသည်။ ၎င်းက ရွှေရောင်ဝတ်ရုံကို ခြုံထားသည်။ ၎င်း၏ လိင်အမျိုးအစားသည်တော့ ခန့်မှန်းရခက်ခဲသည်။ ၎င်းက မိန်းမဖြစ်ဟန်ရသော်လည်း ခန္ဓာကိုယ်ပေါ်တွင် ကြွက်သားများဖြင့် ပြည့်နှက်နေသည်။ ၎င်း၏ အနောက်တွင် မြင့်တတ်နေသော နေလုံးတစ်လုံး ရှိသည်။ နေလုံး၏ အလင်းရောင်သည် ကမ္ဘာမြေတစ်ခွင်ကို ဖြန့်ကြက်ထားပြီး အံ့ဖွယ်ကောင်းသော နတ်ဘုရားအစွမ်းကို ထုတ်လွှတ်နေသည်။

မီးလျှံနေနတ်ဘုရား၏ ညာဘက်တွင် ငွေရောင်ဂါဝန်ကို ဝတ်ဆင်ထားသော မီးလျှံလနတ်ဘုရားရှိသည်။ ၎င်း၏ ဂါဝန်က ရေတံခွန်ပမာ ကျဆင်းနေလေရာ ကောင်းကင်ကို ဖုံးလွှမ်းနိုင်စွမ်းရှိပုံပေါ်သည်။ ၎င်း၏ မျက်နှာသည် ပြီးပြည့်စုံပြီး ဤလောကထဲမှ အလှအပအားလုံးကို ပေါင်းစုစည်းထားဟန် ရသည်။

၎င်း၏ အသွင်အပြင်က အံ့အားသင့်ဖွယ်ကောင်းစွာ လှပသော်လည်း ၎င်း၏ မျက်နှာအမူအရာသည် ရေခဲတုံးပမာ အေးစက်နေသည်။ ၎င်းက လက်ဟန်တစ်ခုကို ထုတ်ဖော်လိုက်လေရာ အေးစက်စက် လရောင်ခြည်သည် ၎င်း၏ ဘေးပတ်ဝန်းကျင်မှာ ထွက်ပေါ်လာပြီး ၎င်း၏ နတ်ဘုရားအသွင်သဏ္ဍာန်ကို လွှမ်းခြုံပစ်လိုက်သည်။

မီးလျှံနေနတ်ဘုရား၏ ဘယ်ဘက်တွင် ရပ်နေသော မီးလျှံကြယ်နတ်ဘုရားဆီမှာ မီးလျှံနေကဲ့သို့ ကြီးမြတ်သော အရှိန်အဝါမရှိသလို မီးလျှံလကဲ့သို့ ပြစ်ချက်မဲ့သော အလှလည်း မရှိပေ။ ၎င်းက သာမန်ရွှံ့မြေခွေးတစ်ကောင်နှင့် ဆင်တူသည်။

သို့သော်လည်း ကျင့်ကြံသူများ၏ အကြည့်က မီးလျှံကြယ်နတ်ဘုရားပေါ်သို့ ကျရောက်သွားသည့်အခိုက် လူတိုင်း၏ စိတ်ထဲတွင် လှိုင်းဂယက်များ ထွက်ပေါ်လာလိမ့်မည်။ ထို့နောက် ထိုလှိုင်းဂယက်များသည် အပူဓာတ်အဖြစ် ပြောင်းလဲသွားပြီး သူတို့၏ ခန္ဓာကိုယ်တစ်လျှောက်သို့ ပျံ့နှံ့သွားကာ သူတို့၏ အသိစိတ်နှင့် အသက်ဓာတ်အပေါ် သက်ရောက်သွားလိမ့်မည်။

သူ၏ အနောက်တွင် တလက်လက် တောက်ပနေသော ကြယ်များရှိပြီး ယင်းတို့က ကြယ်ပင်လယ်ပန်းချီကားတစ်ချပ်ပမာ စုစည်းနေသည်။

ကျင့်ကြံသူများသည် နှလုံးတုန်သွားကြသည်။ သူတို့က ကြောက်ရွံ့ရိုသေစွာ ဦးညွတ်လိုက်ကြသည်။ သူတို့၏ ကျင့်ကြံခြင်းအဆင့်နှင့် ရာထူးအဆင့်အတန်းက မည်သို့ဖြစ်ပါစေ နတ်ဘုရားသုံးပါး၏ ရှေ့တော်တွင် သူတို့အားလုံးက ဒူးထောက်လိုက်ကြသည်။ သူတို့၏ အမူအရာသည် ရိုသေကိုင်းရှိုင်းမှုဖြင့် ပြည့်နှက်နေသည်။

အမှန်မှာ အနည်းငယ် ဝေးကွာသော နေရာတွင် သူတော်စင်နတ်ဆရာသုံးပါး၏ မဟာရွက်ဖျင်တဲပုံရိပ်များသည် သူတို့နှင့်သက်ဆိုင်သော နတ်ဘုရားများ၏ အနောက်မှာ ထွက်ပေါ်လာကြသည်။ သူတော်စင်နတ်ဆရာများသည် ရွက်ဖျင်တဲများထဲမှ ထွက်လျှောက်လာကြပြီး သူတို့ကိုးကွယ်ပူဇော်သော နတ်ဘုရားထံသို့ အရိုအသေပေးလိုက်ကြသည်။

နေအိမ်၏ အပေါ်မှ လေထဲတွင် မတ်တတ်ရပ်နေသော ရွှီချင်းသည် အဝေးမှ အရာအားလုံးကို လှမ်းကြည့်လိုက်သည်။ ထိုအခါ လှိုင်းလုံးများက သူ၏ နှလုံးသားထဲမှာ ထွက်ပေါ်လာသည်။

ဤအခိုက်အတန့်မှာ မီးလျှံလရွှမ်ကောင်းကင်မျိုးနွယ်နှင့် လူသားမျိုးနွယ်ကြားမှ ခြားနားချက်ကို သူသတိထားမိသွားသည်။

မီးလျှံလရွှမ်ကောင်းကင်မျိုးနွယ်ကို နတ်ဘုရားများက အုပ်ချုပ်သည်။ နတ်ဘုရားများ၏ ရှေ့တော်တွင် သက်ရှိအားလုံးသည် ကျေးကျွန်များ ဖြစ်ကြသည်။

ရွှီချင်းသည် နှုတ်ဆိတ်သွားသည်။ သူက မီးလျှံလရွှမ်ကောင်းကင်မျိုးနွယ်ဝင် မဟုတ်ပေ။ သို့သော်လည်း သူက ဤနေရာသို့ ရောက်နေမှတော့ ခေါင်းငုံ့ပြီး အရိုအသေပေးရုံမှလွဲ၍ တခြားရွေးချယ်စရာမရှိပေ။

အချိန်အတော်ကြာပြီးနောက် အရာအားလုံးက တိတ်ဆိတ်ငြိမ်သက်နေစဉ် နတ်ဘုရားတောင်တန်းပေါ်မှ နတ်ဘုရားသုံးပါးသည် အရပ်မျက်နှာအဘက်ဘက်သို့ ဝေ့ဝိုက်ကြည့်လိုက်ကြသည်။ နောက်ဆုံးမှာတော့ ၎င်းတို့၏ အကြည့်က ရွှီချင်းပေါ်သို့ တစ်ပြိုင်နက် ကျရောက်သွားကြသည်။

မီးလျှံနေသည် မထူးမခြားနား အမူအရာဖြင့်ရှိနေပြီး မီးလျှံလသည် စိတ်ရှုပ်ထွေးနေပုံပေါ်သည်။ မီးလျှံကြယ်သည်တော့ ပြုံးထားသည်။

ထို့နောက် မီးလျှံနေ၏ အနောက်မှ နေလုံးသည် ရုတ်တရက် ရောင်ဝါထွန်းလင်းလာပြီး ကောင်းကင်ကို လောင်ကျွမ်းပစ်လိုက်သည်။ နေလုံးထံမှ ရွှေရောင်မီးတောက်များသည် ဘေးပတ်ဝန်းကျင်သို့ ပျံ့နှံ့သွားသည်။

ယင်းက နတ်ဘုရားမီးတောက်ဖြစ်သည်။

နတ်ဘုရားမီးတောက်၏ လောင်ကျွမ်းမှုအောက်မှာ ကောင်းကင်သည် တစ်လွှာပြီးတစ်လွှာ စတင်အရည်ပျော်လာသည်။ မကြာမီ ကောင်းကင်အထက်မှ ဟင်းလင်းပြင်က ထွက်ပေါ်လာသည်။ မရေမတွက်နိုင်သော ကောင်းကင်အလွှာပေါင်းများစွာကို တိုက်စားပြီးနောက် ယင်းက တွင်းနက်တစ်ခုအဖြစ် ပြောင်းလဲသွားသည်။

လောင်ကျွမ်းမှုသည် ဆက်လက် ဖြစ်ပွားနေသည်။

အနက်ရောင်တွင်းနက်သည် နတ်ဘုရားမီးတောက်ကြောင့် ပျက်စီးသွားသည်။ ထို့နောက် တွင်းနက်အသစ်တစ်ခု ဖြစ်ပေါ်လာသည်။ ထိုဖြစ်စဉ်သည် သံသရာစက်ဝန်းတစ်ခုပမာ ထပ်ခါတလဲလဲ ဖြစ်ပျက်နေပြီး ဟင်းလင်းပြင်သည် ပိုပြီးနက်ရှိုင်းလာသည်။

ထိုအတောအတွင်းမှာ ဒေသကြီးတစ်ခုလုံး တုန်ယင်သွားသည်။ ကောင်းကင်ဘုံတာအိုများ၏ အော်ဟစ်ညည်းညူသံများကိုပင် မည်သူမဆို ဝေဝေဝါးဝါး ကြားနိုင်လိမ့်မည်။ ၎င်းတို့က မီးလျှံနေ၏ လုပ်ရပ်ကို တားဆီးချင်နေဟန် ရ၏။ သို့သော်လည်း ၎င်းတို့က ထိုသို့မစွမ်းဆောင်နိုင်ပေ။

နောက်ဆုံးမှာတော့ ရွှေရောင်ဝဲကတော့တစ်ခုသည် ဟင်းလင်းပြင်၏ အနက်ရှိုင်းဆုံးအပိုင်းထဲမှ ထွက်ပေါ်လာသည်။

ဝဲကတော့ထဲတွင် ညစ်ညမ်းသော လေထုအလွှာတစ်ခု ရှိသည်။ ထိုလေထုအလွှာမှတဆင့် အထဲမှ တခြားလောကအသစ်တစ်ခုကို မသဲမကွဲ မြင်နိုင်သည်။

ရွှေရောင်ဝဲကတော့ ထွက်ပေါ်လာသည်နှင့်ချက်ချင်း မီးလျှံလသည် လက်မြှောက်လိုက်သည်။ ထိုအခါ လရောင်ခြည်သည် မြစ်ရှည်တစ်စင်းပမာ အသွင်ပြောင်းလဲသွားပြီး ဝဲကတော့ဆီသို့ စီးဆင်းသွားကာ ညစ်ညမ်းသော လေထုနှင့် ပေါင်းစပ်သွားသည်။

မကြာမီ ကောင်းကင်ဘုံတာအို၏ ဟိန်းသံနှင့်မတူညီသော ဟိန်းသံတစ်သံသည် ဝဲကတော့၏ အနက်ပိုင်းထဲမှ ပဲ့တင်ထပ်လာသည်။ ဤသည်မှာ ထိုဟိန်းသံက လရောင်ခြည်မြစ်ကို တားဆီးချင်နေဟန် ရ၏။ သို့သော်လည်း မီးလျှံလက နှာခေါင်းရှုံ့လိုက်လေရာ နီလာနတ်သမီး၏ အရှိန်အဝါသည် သူ၏ ခန္ဓာကိုယ်ထဲမှ ထွက်ပေါ်လာသည်။

ရွှီချင်းသည် နှလုံးတုန်သွားသည်။ နောက်အခိုက်အတန့်မှာ လရောင်ခြည်မြစ်နှင့် ပေါင်းစပ်သွားသော လေထုအလွှာသည် မူလက ညစ်ညမ်းနေရာမှ ယခု တဖြည်းဖြည်း ကြည်လင်လာသည်။ လေထုအလွှာထဲမှ လောကသည်လည်း ပိုပြီးထင်ရှားလာသည်။

ယင်းက အဖြူရောင်လောကဖြစ်ကြောင်း မြင်နိုင်လိမ့်မည်။

လူတိုင်းက ခေါင်းမော့ပြီး အနီးကပ် မကြည့်နိုင်ခင်မှာ ရွှံ့မြေခွေးသည် ပြုံးလိုက်သည်။ ကြယ်အလင်းရောင်သည် သူ၏ ခန္ဓာကိုယ်ထဲမှ ပေါ်လျှိုးလာပြီး ဧရာမရွှံ့မြေခွေးလက်နှစ်ဖက်အဖြစ် ပြောင်းလဲသွားသည်။ ထိုဧရာမလက်နှစ်ဖက်သည် ဝဲကတော့ထဲသို့ ဆန့်တန်းသွားပြီး ကြည်လင်နေသော လေထုအလွှာကို ရက်စက်ကြမ်းကြုတ်စွာ ဆုတ်ဖြဲပစ်လိုက်သည်။

ကမ္ဘာတုန်ဟီးသွားစေမည့် ကျယ်လောင်သော ဆုတ်ဖြဲသံသည် ဤအခိုက်အတန့်မှာ ထွက်ပေါ်လာသည်။ ထိုအသံက အလွန်ကျယ်လောင်လေရာ ကျင့်ကြံသူအားလုံး၏ အသိစိတ်ထဲတွင် တဝီဝီမြည်သွားသည်။

လေထုအလွှာသည် တိုက်ရိုက် ဆုတ်ဖြဲခံလိုက်ရပြီး သက်ရောက်ခံနေရသော ဧရိယာသည် ပိုပြီးကျယ်ပြောလာသည်။ မြေပြင်ပေါ်မှ မော့ကြည့်မည်ဆိုလျှင် ထိုအက်ကွဲကြောင်းက ကောင်းကင်ကို ထက်ခြမ်းခွဲထားကြောင်း မည်သူမဆို မြင်နိုင်လိမ့်မည်။

ဤသည်မှာ လျှိုမြောင်တစ်ခုက ကောင်းကင်ပေါ်မှာ ထွက်ပေါ်လာဟန် ရ၏။

ယိုယွင်းပျက်စီးခြင်းအငွေ့အသက်၊ ရှေးဟောင်းအရှိန်အဝါနှင့် မရင်းနှီးသော ခံစားမှုသည် အလွန်သိပ်သည်းသော ဒြပ်နှောများနှင့်အတူ ပေါ်ထွက်လာသည်။ ထို့အတူ ဟိန်းသံများသည် ပိုပြီးကျယ်လောင်လာသည်။ ယင်းတို့က ကောင်းကင်ပေါ်မှ အက်ကွဲကြောင်းကို ဖြတ်သန်း၍ အပြင်ဘက်သို့ ပျံ့နှံ့သွားသည်။

အက်ကွဲကြောင်းက အလွန်ကြီးမားသောကြောင့် အထဲမှ လောကကို ပိုပြီးရှင်းလင်းစွာ မြင်နိုင်လာသည်။

ရွှီချင်းသည် ခေါင်းမော့လိုက်သည်။ ယင်းကို ရှင်းလင်းစွာ မြင်သွားပြီးနောက် မရေမတွက်နိုင်သော အတွေးများက သူ၏ စိတ်ထဲမှာ ထွက်ပေါ်လာသည်။

အက်ကွဲကြောင်းထဲမှ လောကနှင့် သူ့ကြားမှာ ဆက်နွယ်မှုများစွာ ရှိပုံပေါ်သည်။ ယင်းထံမှ ထုတ်လွှတ်နေသော အရှိန်အဝါသည် သူ့အား ရင်းနှီးကျွမ်းဝင်သော ခံစားမှုကို ပေးသည်။

အက်ကွဲကြောင်းထဲတွင် မရင်းနှီးသော ကြယ်တာရာကောင်းကင်တစ်ခုရှိသည်။ ကောင်းကင်ပေါ်မှ ကြယ်များကြားတွင် အလွန်ကြီးမားသော ဧရာမပင့်ကူအိမ်တစ်ခု ရှိသည်။

ထိုပင့်ကူအိမ်သည် ကြယ်တာရာကောင်းကင်နှင့် မရေမတွက်နိုင်သော ကြယ်များကို ဖုံးလွှမ်းထားသည်။

ပင့်ကူအမျှင်တစ်ခုစီသည် အလွန်ထူထဲသည်။ ယင်းက ကြယ်ဂြိုလ်တစ်လုံး၏ အရွယ်အစားခန့် မကြီးမားသော်လည်း ကြယ်ဂြိုလ်၏ ဆယ်ပုံတစ်ပုံခန့် အရွယ်အစားရှိသည်။

ယင်းက မီးလျှံလရွှမ်ကောင်းကင်မျိုးနွယ် ဖွင့်လှစ်သည့် နတ်ဘုရားနယ်မြေဖြစ်သည်။

“ ပိုင်ရှင်မဲ့နတ်ဘုရားနယ်မြေ… ”

“ အဲ့ဒါကို အရင်က သုံးကြိမ်ဖွင့်လှစ်ခဲ့တယ်… ”

“ ရှေးဦးနတ်ဘုရားနယ်မြေလို့ ခေါ်တယ်… ”

ထျန်းမိုဇီ၏ စကားသံသည် ဤအခိုက်အတန့်မှာ ရွှီချင်း၏ စိတ်ထဲတွင် ပဲ့တင်ထပ်သွားသည်။ တစ်ဖက်လူပေးခဲ့သော ကျောက်စိမ်းပြားထဲမှ အချက်အလက်များအရ သေချာသော အဖြေတစ်ခုသည် ရွှီချင်း၏ စိတ်ထဲမှာ ထွက်ပေါ်လာသည်။

“ အဲ့ဒါက ကျူးလီရဲ့ အဓိကနယ်မြေထဲက ပင့်ကူနတ်ဘုရားရဲ့ နတ်ဘုရားနယ်မြေပဲ ”

ထိုအချက်ကို နားလည်သွားသောအခါ ရွှီချင်း၏ မျက်လုံးထဲတွင် ထူးဆန်းသော အလင်းရောင် ထွက်ပေါ်လာသည်။

အချက်အလက်အားလုံးသည် သဟဇာတဖြစ်သည်။ ပင့်ကူနတ်ဘုရားနှင့်ပတ်သက်ပြီး ပြဿနာတစ်စုံတစ်ရာ ရှိခဲ့သောကြောင့် ၎င်းက နတ်ဘုရားသုံးပါး၏ ဖိနှိပ်ခံခဲ့ရသည်။ ထို့ကြောင့် ပင့်ကူနတ်ဘုရား၏ နတ်ဘုရားနယ်မြေသည် ပိုင်ရှင်မဲ့ဖြစ်လာသည်။

နတ်ဘုရားသုံးပါးက ထိုနတ်ဘုရားနယ်မြေကို အကြိမ်တိုင်း စူးစမ်းလေ့လာနေရသည့် အကြောင်းအရင်းသည်လည်း ထင်ရှားသည်။

ရွှီချင်း၏ နှလုံးက ပရမ်းပတာ လှိုင်းထနေစဉ် ကြီးမြတ်သော ဂုဏ်အရှိန်အဝါကို သယ်ဆောင်ထားသည့် နတ်ဘုရားအသံသည် ကုန်းမြေတစ်လျှောက် ပဲ့တင်ထပ်သွားသည်။

“ ကလေးတွေ… အမဲလိုက်ခြင်း စတင်နိုင်ပြီ ”

ထိုစကားလုံးလေးလုံး ထွက်ပေါ်လာသည့်အခိုက် ကမ္ဘာတုန်ဟီးစေမည့် အင်အားသည် ကောင်းကင်ပေါ်ရှိ အက်ကွဲကြောင်းထဲမှ ထွက်ပေါ်လာသည်။ နတ်ဘုရားသုံးပါး၏ လမ်းညွှန်မှုအောက်မှာ ထိုစွမ်းအင်သည် အမျှင်တန်းထောင်သောင်းချီအဖြစ် ကွဲထွက်သွားပြီး ဒုတိယပြိုင်ပွဲကို ကျော်လွှားနိုင်ခဲ့သော ကျင့်ကြံသူများပေါ်သို့ ကျဆင်းသွားသည်။

စွမ်းအင်အမျှင်တန်းများသည် ရွှီချင်းအပါအဝင် ပြိုင်ပွဲဝင်သူအားလုံးကို တစ်ပြိုင်နက် လွှမ်းခြုံသွားသည်။ ထို့နောက် သူတို့၏ ခန္ဓာကိုယ်သည် ကိုယ်ပိုင်ထိန်းချုပ်မှုအောက်မှ ကင်းလွတ်သွားပြီး လေထဲသို့ မြှောက်တတ်သွားကြသည်။ နောက်ဆုံးမှာတော့ သူတို့က သက်တံ့အသွင် ပြောင်းလဲသွားပြီး အက်ကွဲကြောင်း၏ စုပ်ယူခံလိုက်ရသည်။

သူတို့က မရင်းနှီးသော နတ်ဘုရားနယ်မြေနှင့် ကြယ်တာရာကောင်းကင်ရှိသည့် ဟင်းလင်းပြင်ထဲသို့ ဝင်ရောက်သွားကြသည်။

ကျယ်ပြောလှသော နတ်ဘုရားနယ်မြေနှင့် နှိုင်းယှဉ်မည်ဆိုလျှင် ကျင့်ကြံသူထောင်သောင်းချီ၏ ပုံရိပ်များသည် အလွန်အမင်း သေးငယ်သည်။ သို့သော်လည်း အန္တရာယ်သည် အလွန်မြင့်မားသည်။

ဤအခိုက်အတန့်မှာ လူတိုင်းနီးပါးက ကြယ်တာရာကောင်းကင်ထဲသို့ စုပ်ယူခံလိုက်ရသည့်အခိုက် တစ်စုံတစ်ယောက်၏ ခန္ဓာကိုယ်သည် တုန်ယင်သွားပြီး သူက နာကျင်စွာ အော်ဟစ်လိုက်သည်။ သူ၏ ခန္ဓာကိုယ်သည် အပိုင်းပိုင်းအစစ ပြိုကွဲသွားပြီး အရပ်ရှစ်မျက်နှာသို့ ပြန့်ကျဲသွားသည်။ သူ၏ အသွေးအသားတစ်ခုစီမှာ အသိစိတ်ရှိနေသေးသော်လည်း ခန္ဓာကိုယ်နှင့် ဝိညာဉ်က အမြစ်ဖြတ်သုတ်သင်ခံလိုက်ရသည်အထိ ယင်းတို့က ဆက်လက် ပြိုကွဲသွားသည်။

ထိုလူကို သတ်ခဲ့သည့်အရာမှာ သူ့ဘေးမှ ဟင်းလင်းပြင်ထဲတွင် ရုတ်တရက် ထွက်ပေါ်လာသော အနက်ရောင်အမွှေးတစ်ချောင်း ဖြစ်သည်။

ထိုအမွှေးဖြတ်သန်းသွားသည့်နေရာတိုင်း ယင်းနှင့် ထိတွေ့သွားသော မည်သူမဆို မသေဆုံးလျှင်ပင် ဒဏ်ရာအပြင်းအထန် ရရှိသွားလိမ့်မည်။

ထိုအမွှေး၏ အနောက်တွင် ပုပ်သိုးဆွေးမြေ့နေသော ဧရာမငါးတစ်ကောင်ရှိကြောင်း ရွှီချင်း မြင်လိုက်သည်။ ၎င်းက ပေတစ်ထောင်အရွယ်အစားရှိပြီး ဟင်းလင်းပြင်ထဲမှာ ရွေ့လျားကူးခတ်နေသည်။ စောစောက အမွှေးသည် ထိုဧရာမငါး၏ နှုတ်ခမ်းမွှေးဖြစ်သည်။

၎င်းထံမှာ အလျားအမျိုးမျိုးရှိသော နှုတ်ခမ်းမွှေးများ ရှိသည်။ နှုတ်ခမ်းမွှေးတချို့သည် အောက်သို့ တွဲလောင်းကျနေပြီး တချို့သည် အရပ်ရှစ်မျက်နှာဆီသို့ လွင့်မျောနေကြသည်။ ၎င်းက အလွန်ချောက်ချားဖွယ်ကောင်းသည်။

ဧရာမငါးထံမှ ထုတ်လွှတ်နေသော ပုပ်သိုးဆွေးမြေ့သည့် အရှိန်အဝါနှင့် ကြောက်မက်ဖွယ်ကောင်းသော စွမ်းအင်လှိုင်းများသည် ဤအမဲလိုက်ပြိုင်ပွဲမှာ ပါဝင်ယှဉ်ပြိုင်ကြမည့် မီးလျှံလကျင့်ကြံသူများကို နှလုံးတုန်သွားစေသည်။

သို့သော်လည်း သူတို့က နှလုံးတုန်ခြင်းကို မြန်ဆန်စွာ ဖိနှိပ်လိုက်ကြသည်။ အမဲလိုက်ပြိုင်ပွဲမှာ ပါဝင်ယှဉ်ပြိုင်ကြသည့် လူတိုင်းသည် ဤနေရာသို့ မဝင်ရောက်ခင်ကတည်းက ကြိုပြင်ဆင်ထားကြပြီးသား ဖြစ်သည်။

မည်သို့ဖြစ်ပါစေ ယင်းက နတ်ဘုရားနယ်မြေမဟုတ်ပါလော။

သို့ဖြစ်၍ ထူးဆန်းသော ဧရာမငါးတစ်ကောင်က ထွက်ပေါ်လာသည်နှင့် လူတိုင်းက မြန်ဆန်စွာ လှုပ်ရှားလိုက်ကြသည်။ သူတို့က အရပ်မျက်နှာအဘက်ဘက်သို့ ပြန့်ကျဲသွားကြပြီး ပင့်ကူအိမ်နတ်ဘုရားနယ်မြေဆီသို့ မတူညီသော နည်းလမ်းကိုယ်စီဖြင့် အရှိန်မြှင့်တင်လိုက်ကြသည်။

မီးလျှံလရွှမ်ကောင်းကင်မျိုးနွယ်၏ လက်အောက်ခံမျိုးနွယ်စုများထဲမှ ကျင့်ကြံသူတစ်ယောက်က ငါးနှုတ်ခမ်းမွှေးဖြင့် ထိတွေ့သွားပြီး သေဆုံးသွားကြောင်း ရွှီချင်း မြင်တွေ့ခဲ့သည်။ ထို့ကြောင့် သူက မျက်မှောင်ကြုတ်လိုက်ပြီး သူ့အား ထျန်းမိုဇီပေးခဲ့သော ကျောက်စိမ်းပြားထဲမှ နှုတ်ခမ်းမွှေးငါးနှင့်ပတ်သက်သော အချက်အလက်များကို ပြန်တွေးလိုက်သည်။

“ နတ်ဘုရားနယ်မြေရဲ့ ဟင်းလင်းပြင်စိတ်ဝိညာဉ်က ပုပ်သိုးဆွေးမြေ့နေတဲ့ ငါးပုံသဏ္ဍာန်ရှိတယ်… သူ့ရဲ့ နှုတ်ခမ်းမွှေးတွေက သက်ရှိအားလုံးကို ဖျက်ဆီးပစ်နိုင်ပြီး ပြင်ပအရာဝတ္ထုအားလုံးကို ဝါးမျိုနိုင်တယ်… ပြီးတော့ သူ့ရဲ့ အရွယ်အစားက ထူးခြားတယ်… အဲ့ဒါက မတူညီတဲ့ လူတွေရဲ့ အမြင်ပေါ်မူတည်ပြီး ကွဲပြားခြားနားတယ် ”

“ တစ်ယောက်ယောက်က သူ့ကို ပေတစ်ထောင်အရွယ်အစားရှိတယ်လို့ မြင်ရပေမဲ့ တခြားလူတွေကတော့ သူ့ကို ပေတစ်ရာအရွယ်အစားလောက်ပဲ မြင်ရနိုင်တယ်… ”

“ ဒါ့အပြင် သူတို့က အရေအတွက် အရမ်းများပြီး မသေနိုင်တဲ့ ခန္ဓာကိုယ်ကို ပိုင်ဆိုင်ထားကြတယ် ”

“ သူတို့က ဖျက်ဆီးခံလိုက်ရရင်တောင် ဟင်းလင်းပြင်ထဲမှာ ပြန်ရှင်သန်လာလိမ့်မယ် ”

ထိုသတင်းအချက်အလက်များက ရွှီချင်း၏ စိတ်ထဲမှာ ထွက်ပေါ်လာသည်နှင့် သူက သတိကြီးစွာထားလိုက်ပြီး ဤဧရိယာထဲမှ မြန်ဆန်စွာ ထွက်သွားသည်။

လမ်းတစ်လျှောက်တွင် သူက ပိုမိုများပြားသော ဟင်းလင်းပြင်စိတ်ဝိညာဉ်များဖြင့် တွေ့ဆုံခဲ့သည်။ သူက ၎င်းတို့ကို တစ်ကောင်ပြီးတစ်ကောင် ရှောင်ကွေ့သွားခဲ့သည်။

သူက အရှေ့သို့ ရွေ့လျားနေစဉ် ပင့်ကူအိမ်သည် သူ၏ မျက်လုံးထဲမှာ ပိုပိုပြီး ကြီးမားလာသည်။ သူက ကြယ်တာရာကောင်းကင်ထဲမှ ကြီးမားသော ကြယ်ဂြိုလ်တချို့ကို ဖြတ်သန်းသွားခဲ့သည်။ ရွှီချင်းသည် အဝေးမှနေပင် ထိုကြယ်ဂြိုလ်များက သေခြင်းအငွေ့အသက်ဖြင့် ပြည့်နှက်နေကြောင်း အာရုံခံနိုင်သည်။

ယင်းတို့က သေဆုံးနေသော ကြယ်ဂြိုလ်များ ဖြစ်သည်။

ထိုကြယ်ဂြိုလ်များပေါ်တွင် မည်သည့်သက်ရှိမှ မရှိပေ။ အဆုံးမရှိသော ပင့်ကူအိမ်များနှင့် အပျက်အစီးများသာ ရှိသည်။

တစ်ချိန်တည်းမှာ အနားသို့ သူချဉ်းကပ်သွားသည်နှင့် ပင့်ကူအိမ်သည် သူ၏ မျက်လုံးထဲမှာ အတိုင်းအဆမဲ့အောင် ကြီးမားလာသည်။ နောက်ဆုံးမှာတော့ ယင်းက ကြယ်တာရာကောင်းကင်ကို ဖောက်ထွင်းထားသော အဖြူရောင်လမ်းကြောင်းများအဖြစ် ပြောင်းလဲသွားသည်။

ပင့်ကူအမျှင်တစ်မျှင်နှင့် နှိုင်းယှဉ်မည်ဆိုလျှင် ရွှီချင်းသည် ဖုန်မှုန့်တစ်ခုထက် မပိုပေ။

ရွှီချင်းသည် ထိုဧရာမပင့်ကူအမျှင်ပေါ်တွင် အရွယ်အစားစုံလင်သော ပိုးအိမ်အများအပြားကိုလည်း မြင်တွေ့သွားသည်။ ပင့်ကူအိမ်များသည် ထိုပိုးအိမ်များကို အပေါ်မှ လွှမ်းခြုံထားကြသည်။ ပိုးအိမ်များထဲတွင်တော့ နှစ်ပေါင်းမရေမတွက်နိုင်အောင် သေဆုံးနေခဲ့သော အရိုးစုများ ရှိသည်။

ယင်းက ရွှီချင်း၏ အန္တရာယ်ခံစားမှုကို မြင့်တတ်သွားစေသည်။

အထူးသဖြင့် စူးစမ်းလေ့လာကြည့်ပြီးနောက် ထိုပင့်ကူအိမ်များက အလွန်စေးကပ်ကြောင်း သူရှာတွေ့သွားသည်။ သူက စမ်းသပ်ကြည့်ရန်အတွက် ပစ္စည်းတစ်ခုကို ပင့်ကူအမျှင်ဖြင့် ဖွဲ့စည်းထားသော လမ်းကြောင်းတစ်ခုပေါ်သို့ ပစ်လွှတ်လိုက်လေရာ ထိုပစ္စည်းသည် ပင့်ကူအမျှင်ဖြင့် ခွာမရအောင် စေးကပ်သွားသည်။ ထို့နောက် ပင့်ကူအိမ်များက ယင်းပေါ်မှာ သူ့ဘာသာ ဖြစ်ပေါ်လာပြီး ပစ္စည်းကို လွှမ်းခြုံပစ်လိုက်သည်။

ထိုမြင်ကွင်းကို မြင်တွေ့သွားသောအခါ ရွှီချင်းသည် အရိုးစုများ၏ ဇစ်မြစ်ကို နားလည်သွားသည်။

“ ဒီက ပင့်ကူအိမ်တွေကို ငါထိလို့ မဖြစ်ဘူး ”

ရွှီချင်းသည် မျက်လုံးမှေးကျဉ်းလိုက်ပြီး ထူးဆန်းသော နတ်ဘုရားနယ်မြေထဲမှာ ဂရုတစိုက် ပျံသန်းလိုက်သည်။ သူက ပျံသန်းနေရင်း သတင်းအချက်အလက်များကို စုဆောင်းလိုက်သည်။ တစ်ချိန်တည်းမှာ သူက ခေါင်းဆောင်ရှိသော ပုလင်းကို သိုလှောင်အိတ်ထဲမှ ထုတ်လိုက်ပြီး ဖွင့်ရန် ပြင်လိုက်သည်။

သို့သော်လည်း နောက်အခိုက်အတန့်မှာ သူ၏ အမူအရာက ရုတ်ချည်း ပြောင်းလဲသွားသည်။ သူ၏ ခန္ဓာကိုယ်က ပေတစ်ရာအကွာသို့ ရုတ်တရက် အနောက်ဆုတ်သွားသည်။ တစ်ချိန်တည်းမှာ ဝိညာဉ်ချည်မျှင်သန်းပေါင်းများစွာသည် သူ၏ ခန္ဓာကိုယ်ထဲမှ ပေါ်လျှိုးထွက်လာပြီး စတုတ္ထနတ်ဘုရားအသွင်သဏ္ဍာန်ကို ချက်ချင်း ဖွဲ့စည်းလိုက်သည်။

သူ၏ အရှိန်အဝါသည် မုန်တိုင်းတစ်ခုသဖွယ် ပျံ့လွင့်ထွက်လာသည်။

သူက အနောက်ဆုတ်သွားသည်နှင့်ချက်ချင်း အနက်ရောင်ပုံရိပ်တစ်ခုသည် စောစောက သူရှိနေခဲ့သော နေရာပေါ်သို့ အရှိန်အဟုန်ပြင်းပြင်း ကျဆင်းလာသည်။

ကြီးမားသော အင်အားကြောင့် ဟင်းလင်းပြင်သည် ပေါက်ကွဲသွားသည်။ အလစ်တိုက်ခိုက်မှုက လွဲချော်သွားပြီးနောက် ထိုပုံရိပ်သည် အနီးနားမှ ပင့်ကူအမျှင်တစ်ခုပေါ်သို့ ခုန်တတ်သွားသည်။

ထို့နောက် ၎င်း၏ အသွင်အပြင်က ရှင်းလင်းစွာ ထွက်ပေါ်လာသည်။

၎င်းက ပင့်ကူတစ်ကောင်ဖြစ်သည်။

၎င်း၏ ခန္ဓာကိုယ်သည် ပေတစ်ထောင်ရှည်လျားပြီး ၎င်း၏ တစ်ကိုယ်လုံးကို မဟူရာရွှေရောင်အစက်အပြောက်များဖြင့် ဖုံးလွှမ်းထားသည်။ သို့သော်လည်း ၎င်း၏ ဦးခေါင်းသည် လူသားအဖိုးအိုတစ်ယောက်၏ ဦးခေါင်းဖြစ်သည်။

ဤအခိုက်အတန့်မှာ ၎င်းက မျက်လုံးဖွင့်ထားသည်။ ၎င်း၏ သူငယ်အိမ်သည် နီရဲနေပြီး ရွှီချင်းကို စိန်းစိန်းဝါးဝါး စိုက်ကြည့်နေသည်။

၎င်းက ကျယ်လောင်စွာ ပါးစပ်ဟထားလေရာ တြိဂံပုံသဏ္ဍာန် ချွန်ထက်သော သွားများကို အထင်အရှား မြင်နိုင်ပေသည်။

ထိုသားရဲကို မြင်သွားသည့်အခိုက် ရွှီချင်းသည် ကျူးလီ၏ မှတ်ဉာဏ်များထဲမှ ပင့်ကူနတ်ဘုရားကို ချက်ချင်း စဉ်းစားမိသွားသည်။

၎င်းတို့၏ အသွင်ပုံစံကို နှိုင်းယှဉ်မည်ဆိုလျှင် အရွယ်အစားနှင့် ဦးခေါင်းမှလွဲ၍ ကျန်သည့်အရာအားလုံး တူညီသည်။

သို့သော်လည်း ၎င်းမှာ ပင့်ကူနတ်ဘုရားကဲ့သို့ အရှိန်အဝါမရှိသည်မှာ ထင်ရှားသည်။

ရွှီချင်းက ပင့်ကူကို စစ်ဆေးလေ့လာနေစဉ် ပင့်ကူကလည်း ရွှီချင်းကို စစ်ဆေးလေ့လာနေသည်။ တဖြည်းဖြည်း ၎င်း၏ မျက်လုံးထဲမှ အနီရောင်အလင်းက ပိုပြီးသိပ်သည်းလာပြီး ၎င်းက နက်ရှိုင်းစွာ ဟိန်းဟောက်လိုက်သည်။ ထို့နောက် ၎င်းက ခန္ဓာကိုယ်ကို တစ်ချက်ရွေ့လျားလိုက်ပြီး နောက်တစ်ကြိမ် ခုန်အုပ်လိုက်သည်။