ရှင်သန်ခြင်းလမ်းကြောင်း

မျက်လုံးသည် အပိုင်းပိုင်းအစစ ဖြတ်တောက်ခံလိုက်ရပြီး ကြယ်တာရာကောင်းကင်အောက်မှာ ပြန့်ကျဲသွားသည်။

ရွှီချင်း၏ အေးတိအေးစက် အသံသည် ဤကြယ်တာရာကောင်းကင်ထဲမှာ ပဲ့တင်ထပ်သွားသည်။

အစမှအဆုံးထိ သူ၏ အမူအရာသည် ကြီးကြီးမားမား ပြောင်းလဲသွားခြင်းမရှိပေ။ သူက မျက်လုံးမရှိတော့သော မင်ဖေး၏ အလောင်းကို တည်ငြိမ်စွာ ကြည့်လိုက်သည်။ မင်ဖေး၏ ခန္ဓာကိုယ်သည် သစ်ပင်အကိုင်းအခတ်များဖြင့် ရစ်ပတ်တုတ်နှောင်ခံထားရသည်။ ၎င်း၏ အရှေ့တွင် ယိုယွင်းပျက်စီးခြင်းအငွေ့အသက်ကို ထုတ်လွှတ်နေသော ဧရာမကြယ်တာရာသစ်ပင် ရှိသည်။ ၎င်းက သေခါနီးအခြေအနေမှာ ရှိသည်။

“ မိတ်ဆွေလေး… မင်းဘာကို ဆိုလိုတာလဲ ”

အားနည်းပြီး စိတ်ရှုပ်ထွေးသော အသံသည် သစ်စိမ်းဘိုးဘေးထံမှ ထွက်ပေါ်လာသည်။

၎င်းကို ပြန်တုံ့ပြန်လိုက်သည်မှာ မီးတောက်ပင်လယ်ဖြင့် လွှမ်းခြုံခံထားရသော အနက်ရောင်လှံဖြစ်သည်။ လှံသည် ကြယ်တာရာကောင်းကင်အောက်မှာ မီးတောက်အလင်းတန်းတစ်ခုအဖြစ် အသွင်ပြောင်းလဲသွားပြီး ဧရာမသစ်ပင်ကို ထိုးဖောက်သွားသည်။

ကျယ်လောင်သော ဝုန်းခနဲ မြည်သံ ထွက်ပေါ်လာသည်။ သစ်စိမ်းဘိုးဘေးနှင့် မင်ဖေး၏ စစ်မြေပြင်သည် ထပ်ဆင့်ပုံရိပ်များဖြင့် ဖုံးလွှမ်းခံလိုက်ရသည်။ ဤသည်မှာ ယင်းက ပုံရိပ်ယောင်များဖြင့် စုဖွဲ့ထားသော ပူဖောင်းတစ်လုံးဖြစ်သည့်အလားပင်။

လှံ၏ ထိုးဖောက်မှုအောက်မှာ ပူဖောင်းသည် စတင်အက်ကွဲလာသည်။

ပူဖောင်းက ပေါက်ကွဲသွားသည်နှင့်ချက်ချင်း ယိုယွင်းပျက်စီးခြင်းနှင့် သေခြင်းအရှိန်အဝါသည် ကြယ်တာရာကောင်းကင်တစ်လျှောက် ပျံ့နှံ့သွားသည်။

တစ်ချိန်တည်းမှာ ရွှီချင်း၏ ဆေဘာဓားချက်အောက်မှာ ပြိုကွဲသွားသော မျက်လုံးအပိုင်းအစများထံတွင် အပြောင်းအလဲတစ်ခု ဖြစ်ပေါ်လာသည်။ အနက်ရောင်မြူခိုးသည် မျက်လုံးအပိုင်းအစများထံမှ ပျံ့နှံ့ထွက်လာသည်။ ထို့အတူ ဖေးအဆိပ်နှင့် ညစ်ညမ်းမှုသည် ဟင်းလင်းပြင်ထဲမှာ ပြည့်နှက်သွားသည်။ နောက်ဆုံးမှာတော့ ယင်းတို့အားလုံးက အတူတကွ စုဝေးသွားပြီး ဝေဝါးသော ပုံရိပ်တစ်ခုအဖြစ် ဖွဲ့စည်းသွားသည်။

၎င်းက ရွှီချင်းကို စူးစိုက်ကြည့်နေသည်။

“ မင်း ဘယ်လိုရှာတွေ့သွားတာလဲ ”

၎င်း၏ အသံထဲမှာ မကျေမချမ်းစိတ်ဖြင့် ပြည့်နှက်နေသည်။

ရွှီချင်း၏ အတွေးသည် မှန်ကန်သည်။ ယင်းက မင်ဖေး၏ လှည့်ကွက်တစ်ခုသာ ဖြစ်သည်။

သို့သော်လည်း ၎င်းက အလွန်အားနည်းသည်။ နတ်ဘုရားကပ်ဘေးကာလအတွင်း အင်မော်တယ်နယ်မြေ၏ မကျေမချမ်းစိတ်မှ မွေးဖွားလာသော သက်ရှိတစ်ကောင်အနေဖြင့် မင်ဖေးသည် အရေးကြီးအခိုက်အတန့်မှာ ဆက်ပြီး အသက်ရှင်နိုင်ရေးအတွက် ပေဖန်းခေတ်ကောင်းကင်ကို ထိန်းချုပ်ပြီး သစ်စိမ်းဘိုးဘေး၏ ကောင်းကင်ဘုံတာအိုကို ဝါးမျိုရန် ကြိုးစားခဲ့သည်။

သို့သော်လည်း မင်ဖေးပြောပြသည့် သမိုင်းကြောင်းနှင့် ခြားနားသည်မှာ မင်ဖေးနှင့် သစ်စိမ်းဘိုးဘေးကြားမှ တိုက်ပွဲသည် လွန်ခဲ့သော နှစ်ပေါင်းမြောက်များစွာကတည်းက ပြီးဆုံးသွားခဲ့ပြီ ဖြစ်သည်။

သစ်စိမ်းဘိုးဘေးသည် အပြန်အလှန်ဖျက်ဆီးခြင်းဟူသော ၎င်း၏ ဝှက်ဖဲကတ်ကို အသုံးပြု၍ မင်ဖေးကို အပြင်းအထန် ဒဏ်ရာရရှိစေခဲ့သည်။

ပေဖန်းခေတ်ကောင်းကင်၏ အစောင့်အကြပ်ဖြစ်ပြီး အင်မော်တယ်အင်ပါယာထံမှ ရာထူးခန့်အပ်ခြင်းခံထားရသူအနေဖြင့် သစ်စိမ်းဘိုးဘေးသည် အားမနည်းပေ။ ထို့ကြောင့် ၎င်း၏ ဝှက်ဖဲကတ်သည် အလွန်အားကောင်းသည်။ မင်ဖေးသည် မသေဆုံးခဲ့သော်လည်း ဒဏ်ရာအပြင်းအထန် ရရှိသွားပြီး ချိပ်ပိတ်ခံလိုက်ရသည်။

၎င်း၏ ဒဏ်ရာများကို ပြန်မကုသနိုင်ပေ။ သို့ဖြစ်၍ ဒဏ်ရာများသည် ပိုပြီးဆိုးဝါးပြင်းထန်လာသည်။

ချိပ်ပိတ်မှုသည် အရာအားလုံးကို သီးခြားခွဲထုတ်ထားသည်။ ထို့ကြောင့် မင်ဖေးသည် လှောင်ချိုင့်ထဲမှာ ရှိနေသည့်အလား ဘယ်တော့မှ မလွတ်မြောက်နိုင်ပေ။

ထို့နောက် အပြင်လောကသည် နတ်ဘုရားနယ်မြေဖြစ်လာသည်။ ယင်းက နောက်ထပ် လှောင်ချိုင့်တစ်ခုဖြစ်လာပြီး ပေဖန်ခေတ်လှောင်ချိုင်ကို အပေါ်မှ ဖုံးအုပ်သွားကာ မင်ဖေး၏ မျှော်လင့်ချက်အားလုံးကို ဖျက်ဆီးပစ်လိုက်သည်။

အသက်မဲ့နေပြီး သုဿန်တစပြင်အလား တိတ်ဆိတ်နေသော ဤလောကထဲတွင် အပြင်လူများက ဝင်ရောက်မလာနိုင်သလို အားပြန်ဖြည့်စရာ မည်သည့်အရာမှလည်း မရှိပေ။ ထို့ကြောင့် မင်ဖေးသည် တဖြည်းဖြည်း အားနည်းလာပြီး သေဆုံးမည့်အချိန်ကိုသာ စောင့်ဆိုင်းနေရသည်။

သို့သော်လည်း ၎င်းက ဆန္ဒမရှိပေ။ ၎င်းက ဤနေရာမှ ထွက်သွားချင်ပြီး အထွတ်အထိပ်သို့ ပြန်ရောက်ချင်သည်။ သို့သော်လည်း နှစ်ပေါင်းမရေမတွက်နိုင်အောင် ကြာပြီးနောက် အားနည်းမှုသည် ၎င်း၏ ခန္ဓာကိုယ်တစ်ခုလုံးသို့ ပျံ့နှံ့သွားသည်။ ၎င်း၏ အသက်ဓာတ်သည်လည်း ညှိုးခြောက်လာသည်။

၎င်း၏ တစ်ခုတည်းကျန်ရှိသော အသိစိတ်က ဝေဝါးလာပြီး ပျောက်ကွယ်သွားတော့မည့်အချိန် ရွှီချင်းက ရောက်ရှိလာသည်။

ရွှီချင်း၏ ရောက်ရှိလာမှုက ၎င်းကို မျှော်လင့်ချက်အလင်းရောင်အား ပြန်မြင်နိုင်စေသည်။ ၎င်းက ရွှီချင်း၏ ခန္ဓာကိုယ်ကို မျက်စိကျသွားသည်။ သို့သော်လည်း ၎င်းက အလွန်အားနည်းနေသောကြောင့် ရွှီချင်း၏ ခန္ဓာကိုယ်ကို အတင်းအဓမ္မ မလုယက်နိုင်ပေ။

ထို့ကြောင့် ၎င်းက ဤပြဇာတ်ကို ဖန်တီးလိုက်ခြင်း ဖြစ်သည်။

ရွှီချင်းထွက်ပေါ်လာသည်နှင့်ချက်ချင်း ၎င်းက ပုံရိပ်ယောင်တစ်ခုကို ဖန်တီးလိုက်ပြီး သစ်စိမ်းဘိုးဘေးနှင့် မင်ဖေးကြားမှ တိုက်ပွဲကို မြင်တွေ့စေသည်။ ထို့နောက် ၎င်းက ရွှီချင်းကို အပျက်အစီးလောကထဲသို့ ခေါ်ဆောင်သွားသည်။

ထိုနေရာတွင် ၎င်းက သစ်စိမ်းဘိုးဘေးအဖြစ် ဟန်ဆောင်ပြီး ရွှီချင်းဖြင့် ဆက်သွယ်ကာ အတိတ်တုန်းက အဖြစ်အပျက်များကို အမှန်တစ်ဝက် အမှားတစ်ဝက်ရော၍ ပြောပြသည်။

၎င်း၏ ရည်ရွယ်ချက်က ရွှီချင်းအား ဤပြဇာတ်ကို တကယ်ယုံကြည်သွားစေရန် ဖြစ်သည်။

ရွှီချင်းက မကြာခဏ သတ်ဖြတ်ခဲ့သော မင်ဖေး၏ တာအိုအရိပ်သည်တော့ ပုံရိပ်ယောင်တစ်ခုမျှသာ ဖြစ်သော်လည်း ၎င်း၏ အဆိပ်သည် အစစ်အမှန်ဖြစ်သည်။

၎င်းက တာအိုအရိပ်ကို အသုံးပြု၍ ရွှီချင်းကို တဖြည်းဖြည်း အဆိပ်သင့်စေရန် ကြိုးစားလိုခြင်း ဖြစ်သည်။

အကယ်၍ ၎င်း၏ အစီအစဉ်သာ အောင်မြင်သွားလျှင် ၎င်းက အဆိပ်ကို အသုံးပြု၍ ရွှီချင်း၏ ခန္ဓာကိုယ်ကို သိမ်းပိုက်နိုင်လိမ့်မည်။ ထို့နောက် ၎င်းက ဤနေရာမှ ထွက်သွားပြီး လွတ်လပ်မှုကို ပြန်ရသွားလိမ့်မည်။

သို့သော်လည်း ၎င်းမမျှော်လင့်ထားခဲ့သည်မှာ ၎င်း၏ အဆိပ်ကို တစ်ဖက်လူက ပယ်ဖျက်နိုင်ခြင်းဖြစ်သည်။ ၎င်းကို ပိုပြီးထိတ်လန့်သွားစေသည်မှာ တစ်ဖက်လူက ၎င်း၏ အဆိပ်ကို သုတေသနပြုလုပ်နေခြင်း ဖြစ်သည်။

သူက ၎င်း၏ ဝိညာဉ်ကိုပင် သုတေသနပြုလုပ်ရန် ကြိုးစားချင်သေးသည်။

၎င်း၏ အစီအစဉ်က ထုတ်ဖော်ခံရလိမ့်မည်ကို စိုးရိမ်သည်။ ထို့ကြောင့် ၎င်းက နတ်ဘုရား၏ ညစ်ညမ်းမှုငါးမျိုးကို အသုံးပြု၍ ရွှီချင်း၏ ခန္ဓာကိုယ်ကို သိမ်းပိုက်ရန် ကြိုးစားလိုက်သည်။ သို့သော်လည်း ၎င်းက ထပ်ပြီး တွက်ချက်မှုမှားသွားခဲ့သည်။

နတ်ဘုရား၏ ညစ်ညမ်းမှုငါးမျိုးသည်လည်း တစ်ဖက်လူအပေါ် သက်ရောက်မှုမရှိပေ။

သို့သော်လည်း ယင်းက လှည့်ကွက်တစ်ခုမျှသာ မဟုတ်ပေ။ ပြီးပြည့်စုံသော အစီအစဉ်တစ်ခု ဖြစ်သည်။ ယင်းက ရွှီချင်းကို ၎င်း၏ မူလအစီအစဉ်အတိုင်း အောင်မြင်သွားပြီဟု ထင်မှတ်စေလိမ့်မည်။ ထိုနည်းဖြင့် ၎င်းက ကျေးဇူးတင်မှုကို ဖော်ပြရန် ၎င်း၏ မျက်လုံးကို ပေးနိုင်လိမ့်မည်။

ရွှီချင်းက မျက်လုံးကို စုပ်ယူလိုက်သည်နှင့် ၎င်းက ရွှီချင်း၏ ခန္ဓာကိုယ်ကို သိမ်းပိုက်နိုင်လိမ့်မည်။

သို့သော်လည်း ရွှီချင်း၏ ကောင်းကင်ဘုံဆေဘာဓားက သူ၏ အစီအစဉ်အားလုံးကို ဖျက်ဆီးပစ်လိုက်သည်။

“ ဘယ်တုန်းကတည်းက မင်းရှာတွေ့သွားတာလဲ ”

ဇွဲကောင်းမှုဖြင့် ပြည့်နှက်နေသော မင်ဖေး၏ အသံက ထပ်မံ ပဲ့တင်ထပ်လာသည်။

ရွှီချင်းသည် မည်သည့်စကားမှ မပြောပေ။ သူက ညာလက်ကို မြှောက်လိုက်ပြီး သူ့အရှေ့မှာ ဝှေ့ယမ်းလိုက်သည်။ ချက်ချင်းဆိုသလို အနက်ရောင်လှံသည် စူးရှသော ဟစ်ကြွေးသံကို ထုတ်ဖော်လိုက်သည်။ လှံထဲမှာ ကိန်းအောင်းနေသော မီးတောက်များသည် တစ်ဟုန်ထိုး ပေါ်လျှိုးလာပြီး ကြယ်တာရာကောင်းကင်ကို လောင်ကျွမ်းပစ်လိုက်သည်။

နောက်အခိုက်အတန့်မှာ ပူဖောင်းသဖွယ် ပုံရိပ်ယောင်လောကသည် လုံးဝပျက်စီးသွားသည်။

ထိုအခါ ဤနေရာမှ အစစ်အမှန်မြင်ကွင်းက ထွက်ပေါ်လာသည်။

ယင်းက ကြယ်တာရာကောင်းကင်မဟုတ်ပေ။ ဟင်းလင်းပြင်ဖြစ်သည်။

ကြယ်နှင့်တူသော စက်လုံးတစ်လုံးသည် ဟင်းလင်းပြင်ထဲမှာ လွင့်မျောနေသည်။ စက်လုံးသည် အရွယ်အစား အလွန်ကြီးမားသည်။ ထိုဧရာမစက်လုံးကို ညှိုးခြောက်နေသော သစ်ပင်အကိုင်းအခတ်များဖြင့် ဖန်တီးထားခြင်းဖြစ်သည်။

မရေမတွက်နိုင်သော သစ်ကိုင်းခြောက်များက အတူတကွ ယှက်ထွေနေကြလေရာ ယင်းက သစ်သားလှောင်ချိုင့်တစ်ခုနှင့် ဆင်တူသည်။

သစ်သားလှောင်ချိုင့်အတွင်းမှာ မင်ဖေး၏ အစစ်အမှန်ခန္ဓာကိုယ်ရှိသည်။

၎င်း၏ ခန္ဓာကိုယ်သည် မရေမတွက်နိုင်သော သစ်ကိုင်းခြောက်များဖြင့် ထိုးဖောက်ခံထားရသည်။ ၎င်း၏ ခန္ဓာကိုယ်က ပိန်ချုံးပြီး ခြောက်ကပ်နေလေရာ အလောင်းခြောက်တစ်ခုနှင့် ဆင်တူသည်။ ၎င်း၏ ဦးခေါင်းသည်ပင် ထိုအတိုင်းဖြစ်သည်။

၎င်း၏ ခန္ဓာကိုယ်ပေါ်မှ အလောင်းကောင်စစ်ချပ်ဝတ်သည်တော့ မရေမတွက်နိုင်သော မကျေမချမ်းစိတ်ဝိညာဉ်များအဖြစ် ပြောင်းလဲသွားကြသည်။ ၎င်းတို့က မင်ဖေး၏ ခန္ဓာကိုယ်အတွင်းနှင့် အပြင်မှာ လှည့်ပတ်နေကြပြီး မရပ်မနား ကိုက်စားနေကြသည်။

မင်ဖေး၏ ခန္ဓာကိုယ်တစ်ခုလုံးတွင် ၎င်း၏ မျက်လုံးသည်သာ အကောင်းတိုင်း ရှိသည်။

၎င်းက ရွှီချင်းကို ခါးသီးမှု၊ စိတ်ပျက်မှုဖြင့် စိုက်ကြည့်နေသည်။ ၎င်း၏ မျက်လုံးသည် သက်ဝင်လှုပ်ရှားမှု မရှိပေ။

“ မင်း ဘယ်လိုရှာတွေ့သွားတာလဲ… ”

ယင်း၏ ၎င်း၏ အစွဲအလမ်းဖြစ်လာသည်။

“ ငါမင်းကို ဘယ်တုန်းကမှ မယုံကြည်ခဲ့ဘူး ”

ရွှီချင်းသည် မင်ဖေး၏ မျက်လုံးကို စိုက်ကြည့်လိုက်သည်။ သူက နက်ရှိုင်းသော အသံဖြင့် ပြောပြီးနောက် အရှေ့သို့ လျှောက်လိုက်သည်။

ခြေတစ်လှမ်းဖြင့် သူက သစ်သားလှောင်ချိုင့်၏ အရှေ့သို့ ရောက်ရှိသွားသည်။ တစ်ချိန်တည်းမှာ သူ၏ ခန္ဓာကိုယ်ထဲမှ တားမြစ်အဆိပ်နတ်ဘုရားရတနာသိုက်သည် ဝုန်းခနဲ မြည်ဟိန်းသွားပြီး ပြင်းပြသော လိုအင်ဆန္ဒကို ထုတ်လွှတ်လာသည်။

ရွှီချင်းသည် ညာလက်ကို မြှောက်လိုက်ပြီး မျက်လုံးဆီသို့ ဖိချလိုက်သည်။

ထိုလှုပ်ရှားမှုနှင့်အတူ သူ၏ ခန္ဓာကိုယ်ထဲမှ တားမြစ်အဆိပ်သည် အပြည့်အဝ ပေါ်လျှိုးလာသည်။ ယင်းက မင်ဖေး၏ မျက်လုံးထဲမှ အကြွင်းအကျန်အသိစိတ်ကို လုံးဝဖျက်ဆီးပစ်လိုက်သည်။

မျက်လုံးသည် မီးခိုးဖြူရောင်အဖြစ် ပြောင်းလဲသွားပြီး မင်ဖေး၏ အလောင်းထဲမှ မြှောက်တတ်လာသည်။ ထို့နောက် ယင်းက မီးခိုးရောင်မြူခိုးအဖြစ် ပြောင်းလဲသွားပြီး တားမြစ်အဆိပ်နတ်ဘုရားရတနာသိုက်ထဲသို့ ဝင်ရောက်သွားသည်။

တားမြစ်အဆိပ်နတ်ဘုရားရတနာသိုက်သည် ဆက်ပြီး မလှုပ်ခါတော့ပေ။ တစ်ခဏကြာ ငြိမ်သက်နေပြီးနောက် ကောင်းကင်ဘုံတာအို၏ အရှိန်အဝါသည် ဒုတိယနတ်ဘုရားရတနာသိုက်ထဲမှ ထွက်ပေါ်လာသည်။ ဒုတိယနတ်ဘုရားရတနာသိုက်၏ ဂိတ်တံခါးသည် ရုတ်တရက် ပွင့်သွားသည်။

ကြောက်မက်ဖွယ်ကောင်းသော စွမ်းအားသည် ဂိတ်တံခါးထဲမှ ပေါက်ကွဲထွက်လာသည်။

ဂိတ်တံခါးထဲ၌ ဧရာမမျက်လုံးတစ်လုံးက တားမြစ်အဆိပ်မြူခိုးအတွင်းမှာ မြှောက်တတ်နေကြောင်း မြင်နိုင်လိမ့်မည်။

ရှေးဟောင်းချိပ်တံဆိပ်ခြောက်ခုသည် မျက်လုံးထဲမှာ လှည့်ပတ်နေကြပြီး ထူးခြားဆန်းကြယ်သော ခံစားမှုကို ပေးသည်။ ယင်းတို့ထဲမှာ နတ်ဘုရားအစွမ်းပါရှိသည်။

ထိုမျက်လုံးသည် ကောင်းကင်ဘုံတာအိုဖြစ်သည်။

ချိပ်တံဆိပ်များသည်တော့ နတ်ဘုရား၏ ညစ်ညမ်းမှုခြောက်မျိုးဖြစ်သည်။

မျက်လုံးမရှိတော့သည့်အခါ မင်ဖေး၏ အလောင်းသည် ပြာအဖြစ် ပြောင်းလဲသွားသည်။ ကြယ်တာရာသစ်သားလှောင်ချိုင့်သည်လည်း ပြိုကွဲပျက်စီးသွားပြီး ဟင်းလင်းပြင်ထဲမှာ ပျောက်ကွယ်သွားသည်။ ထို့နောက် ဝဲကတော့တစ်ခုသည် ထိုနေရာမှာ ထွက်ပေါ်လာသည်။

ယင်းက ဤလောကထဲမှ ထွက်ပေါက်ဖြစ်သည်။

ထိုသို့ဖြင့် သစ်စိမ်းဘိုးဘေးနှင့် မင်ဖေး၏ တွေ့ဆုံမှုသည် အဆုံးသတ်သွားပြီး သူတို့၏ ကမ္မသည် ပြီးဆုံးသွားသည်။ သူတို့နှစ်ယောက်စလုံး၏ ခန္ဓာကိုယ်နှင့် ဝိညာဉ်သည် ဖျက်ဆီးခံလိုက်ရသည်။

ဟင်းလင်းပြင်ထဲတွင် မင်ဖေး၏ အစွဲအလမ်းကြီးသော အသံသည်သာ ဆက်လက် ပဲ့တင်ထပ်နေသည်။

“ မင်း ဘယ်လိုရှာတွေ့သွားတာလဲ… ”

ထိုအစွဲအလမ်းသည် ရွှီချင်း၏ နှလုံးသားထဲသို့ ဝင်ရောက်လာပြီး သူ၏ တားမြစ်အဆိပ်နတ်ဘုရားရတနာသိုက်ထဲမှာ ပဲ့တင်ထပ်သွားသည်။ သူက ထွက်ပေါက်ဝဲကတော့ထဲသို့ လျှောက်သွားနေရင်း တည်ငြိမ်စွာ ပြောသည်။

“ နတ်ဘုရားယဇ်ပူဇော်အကကို ငါမြင်ဖူးတယ် ”

တစ်စုံတစ်ယောက်၏ အသိအမြင်ကို လှည့်စားနိုင်သော နတ်ဘုရားယဇ်ပူဇော်အကနှင့် နှိုင်းယှဉ်လျှင် မင်ဖေး၏ ပုံရိပ်ယောင်သည် ဘာမှမဟုတ်ပေ။

ရွှီချင်းသည် ဝဲကတော့ထဲသို့ ခြေချလိုက်ပြီး ပျောက်ကွယ်သွားသည်။

သတ္တမမြောက်ဝဲကတော့သည် သေခြင်းလမ်းကြောင်းမဟုတ်ပေ။ ရှင်သန်ခြင်းလမ်းကြောင်း ဖြစ်သည်။

ဘိုးဘေးအင်ပါယာ၏ သင်္ချိုင်း သို့မဟုတ် အင်မော်တယ်အင်ပါယာ၏ သင်္ချိုင်းထဲတွင် အခြေခံအားဖြင့် သင်္ချိုင်း၏ ဖွဲ့စည်းတည်ဆောက်ပုံသည် မရှုပ်ထွေးပေ။

သင်္ချိုင်း၏ အပြင်ဘက်အလွှာသည် ရှုပ်ထွေးသော ဝင်္ကပါဖြစ်သည်။ ထို့နောက် သေခြင်းရှင်ခြင်းဝဲကတော့ကိုးခုအနက် လမ်းကြောင်းတစ်ခုကို ရွေးချယ်ရလိမ့်မည်။ လမ်းကြောင်း၏ အဆုံးသတ်သည် အင်ပါယာနန်းတော်ဆီသို့ ခေါ်ဆောင်သွားလိမ့်မည်။

ယင်းက အင်မော်တယ်အင်ပါယာအလောင်း၏ အနားယူနေသော နေရာဖြစ်သည်။

အင်ပါယာနန်းတော်သည် အလွန်ကြီးမားကျယ်ပြောသည်။ နန်းတော်ထဲမှာ ကိုယ်ပိုင်နယ်မြေတစ်ခု ရှိသည်။ ယင်းက ကြီးမားလှသော မဟာလောကတစ်ခုနှင့် မခြားပေ။

ထိုနေရာတွင် ကောင်းကင်နှင့်မြေပြင် ရှိသည်။

ကောင်းကင်ပေါ်တွင် အကျဉ်းချခံထားရသော ကြယ်(၁၀၈)လုံး ရှိသည်။

ယင်းတို့က အင်ပါယာနန်းတော်၏ ကြယ်တာရာကောင်းကင်အဖြစ် ဖြစ်တည်နေသည်။

ကြယ်(၁၀၈)လုံးသည် ချောက်ချားဖွယ်ကောင်းသည်။ ယင်းတို့က မြေပြင်ကို မျက်နှာမူ၍ ကြယ်အလင်းရောင်ကို ထုတ်လွှတ်နေကြသည်။ သို့သော်လည်း ယင်းတို့၏ နောက်ကျောဘက်တွင် ချောက်ချားစရာကောင်းသော ဧရာမမျက်နှာကြီးများ ရှိကြသည်။

ဝမ်းနည်းပူဆွေးပြီး ကြေကွဲဖွယ်ကောင်းသော အသံများသည် အင်ပါယာနန်းတော်၏ ကောင်းကင်ပေါ်မှာ ပျံ့နှံ့နေသည်။ ယင်းတို့က ဈာပနအခမ်းအနားအတွက် လွမ်းချင်းတေးသွားကို သီဆိုပေးနေဟန် ရသည်။

လွမ်းချင်းတေးသံက ပဲ့တင်ထပ်နေစဉ် အကယ်၍ တစ်စုံတစ်ယောက်က အနီးကပ်ကြည့်မည်ဆိုလျှင် ထိုကြယ်(၁၀၈)လုံး၏ ကြယ်အလင်းရောင်အတွင်းမှာ ပုံရိပ်တချို့ရှိကြောင်း မြင်နိုင်လိမ့်မည်။

ရွှမ်မီးလျှံ၊ ထုန်ရှီရှန်း၊ ထျန်းမိုဇီ၊ ဖန်းရှီရွှမ်း…

သူတို့သည် မတူညီသော ကြယ်များပေါ်မှာ တင်ပျဉ်ခွေထိုင်နေကြသည်။ သူတို့က ခေါင်းမော့ထားပြီး အင်ပါယာနန်းတော်ကို စိုက်ကြည့်နေကြစဉ် သတိထားမှုက သူတို့၏ မျက်လုံးထဲမှာ ပြည့်နှက်နေသည်။ ဤသည်မှာ သူတို့က အခွင့်အရေးရောက်လာမည်ကို စောင့်ဆိုင်းနေသည့်အလားပင်။

ရှင်းလင်းစွာပင် သူတို့၏ အနောက်မှ အင်အားစုများသည် ဤနေရာသို့ သူတို့ဝင်ရောက်နိုင်စေရန် အထောက်အပံ့များ ပေးခဲ့ကြသည်။

ခေါင်းဆောင်သည်လည်း သူတို့ထဲမှာ ရှိသည်။ သို့သော်လည်း တခြားလူများနှင့် နှိုင်းယှဉ်လျှင် ခေါင်းဆောင်သည် အနည်းငယ် စိုးရိမ်ကြောင့်ကြနေသည်။ ရံဖန်ရံခါ သူက အင်ပါယာနန်းတော်ထံမှ အကြည့်ပြန်ရုပ်လိုက်ပြီး သူ၏ ဘေးပတ်ဝန်းကျင်မှ လူမရှိသော ကြယ်များကို လှည့်ပတ်ကြည့်လေ့ ရှိသည်။

မရေမတွက်နိုင်သော ကြယ်အလင်းရောင်များက ဖြာဆင်းကျလာပြီး အတူစုဝေးသွားသည်။ ထို့နောက် နဂါးကိုးကောင်သည် ထိုကြယ်အလင်းရောင်ထဲမှာ ဒြပ်ထည်ဖွဲ့စည်းသွားကြသည်။ ၎င်းတို့က အသက်ရှိနေသည့်အလား ရွေ့လျားကူးခတ်နေကြသည်။

ကြယ်(၁၀၈)လုံးအပြင် ကြယ်များထက် ပိုပြီးထွန်းလင်းတောက်ပသော ကြယ်ဂြိုလ်နှစ်လုံးလည်း ရှိသည်။ ယင်းတို့က ဤနေရာမှာ အကျဉ်းချခံထားရသော နေနှင့်လ ဖြစ်သည်။ နေနှင့်လသည် သတ်မှတ်ထားသော ဂြိုလ်ပတ်လမ်းကြောင်းအတိုင်း လှည့်ပတ်နေကြသည်။

နေအလှည့်သို့ရောက်သည့်အခါ ယင်းက ရွှေရောင်အလင်းနှင့် တုနှိုင်းမဲ့သော အပူကို ထုတ်လွှတ်လိမ့်မည်။

လအလှည့်သို့ရောက်သည့်အခါ ယင်းက အစွန်းရောက်ယင်နှင့် အဆုံးမဲ့သော အအေးဓာတ်ကို ထုတ်လွှတ်လိမ့်မည်။

နေနှင့်လ၏ အောက်၊ ကမ္ဘာမြေ၏ အပေါ်တွင် လှည့်ပတ်နေသော သက်တံ့ရောင်ခြည်စက်ဝန်းတစ်ခုရှိပြီး ယင်းက ကုန်းမြေ၏ တစ်ဝက်နီးပါးကို ဖုံးလွှမ်းထားသည်။

ထိုရောင်ခြည်စက်ဝန်းကို မရေမတွက်နိုင်သော သလင်းကျောက်ခေါင်းလောင်းများဖြင့် အလှဆင်ထားသည်။ ရောင်ခြည်စက်ဝန်းက လှည့်ပတ်သွားသည့်အခါတိုင်း ကြည်လင်သော ခေါင်းလောင်းသံက ပျံ့လွင့်လာလိမ့်မည်။ ယင်းက ကောင်းကင်ဘုံတေးသံနှင့် ဆင်တူသည်။ ယင်းက ကြယ်များ၏ အလင်းရောင်နှင့် လိုက်လျောညီထွေရှိသည်။ သို့ဖြစ်၍ ဤနေရာသည် ချောက်ချားဖွယ်ကောင်းသော်လည်း မြင့်မြတ်ထည်ဝါသော အငွေ့အသက်ကို ပေးသည်။

ရောင်ခြည်စက်ဝန်း၏ ဘေးပတ်ပတ်လည်တွင် အရေအတွက်များပြားသော အလံတိုင်များ၊ အိုးစည်များ၊ ဗုံများ ရှိကြသည်။

ယင်းတို့က အရွယ်အစား အလွန်ကြီးမားပြီး လေထဲမှာ‌ မျောလွင့်နေကြသည်။

ယင်းတို့က ဈာပနပွဲအခမ်းအနားတွင် အသုံးပြုသော ပစ္စည်းများ ဖြစ်ကြသည်။

ကြယ်နဂါးကိုးကောင်သည် ဈာပနပစ္စည်းများ၏ ဘေးတွင် လှည့်ပတ်နေပြီး ဟိန်းဟောက်နေကြသည်။ ဤသည်မှာ ၎င်းတို့က ထိုပစ္စည်းများကို စောင့်ကြပ်ပေးနေသည့်အလားပင်။

ထိုနေရာ၏ အောက်တွင် ကုန်းမြေရှိသည်။

ထိုကုန်းမြေကို မြေကြီးဖြင့် ဖွဲ့စည်းထားခြင်း မဟုတ်ပေ။ ယင်းအစား မရေမတွက်နိုင်သော အရေပြားအပိုင်းအစများကို အတူတကွ စုစည်းထားခြင်း ဖြစ်သည်။ ယင်းတို့ထဲမှာ လူသားအရေပြားများ၊ မျိုးနွယ်ခြားများ၏ အရေပြားများနှင့် မရေမတွက်နိုင်သော မျိုးနွယ်စုများ၏ အရေပြားများ ရှိသည်။ ယင်းတို့ကို အင်ပါယာနန်းတော်၏ ကုန်းမြေအဖြစ် ခင်းကျင်းထားခြင်း ဖြစ်သည်။ ကုန်းမြေထဲတွင် တောင်တန်းများနှင့် မြစ်ချောင်းများလည်း ရှိသည်။

တောင်တန်းများကို အရိုးများဖြင့် ဖွဲ့စည်းထားခြင်းဖြစ်ပြီး မြစ်ချောင်းများထဲတွင် သွေးက တသွင်သွင် စီးဆင်းနေသည်။

ကြောက်စရာကောင်းသော အရှိန်အဝါကို ထုတ်လွှတ်နေသည့် သံချပ်ကာဝတ်စစ်သည်တော်များလည်း ရှိသည်။

၎င်းတို့၏ အရေအတွက်သည် အဆုံးမဲ့ဟန် ရ၏။

ကြောက်စရာကောင်းသော ထိုကုန်းမြေ၏ အလယ်ဗဟို၌ ရောင်ခြည်စက်ဝန်း၏ အလည်တည့်တည့်အောက်တွင် မိုးထိမြှောက်တတ်နေသော ယဇ်ပလ္လင်တစ်ခု ရှိသည်။

ဧရာမယဇ်ပလ္လင်၏ အပေါ်တွင် ခရမ်းရွှေရောင်ခေါင်းတလားတစ်လုံး ရှိသည်။

ခေါင်းတလား၏ မျက်နှာပြင်ပေါ်တွင် တောင်တန်းများနှင့် မြစ်ချောင်းများ၏ ပန်းချီများကို ရေးဆွဲထားသည်။ ယင်းက အလွန်မြင့်မြတ်ထည်ဝါသည်။

ထိုခေါင်းတလားသည် အင်မော်တယ်အင်ပါယာ၏ ခေါင်းတလားမှလွဲ၍ တခြားမဟုတ်ပေ။

ထိုအခိုက်အတန့်မှာ အင်ပါယာနန်းတော်၏ အပေါ်မှ ကြယ်(၁၀၈)လုံးထဲတွင် လူမရှိသေးသော ကြယ်တစ်လုံးသည် ရုတ်တရက် တုန်လှုပ်လာသည်။ နောက်အခိုက်အတန့်မှာ ဝေဝါးသော ပုံရိပ်တစ်ခုသည် ဗလာနတ္ထိမှ ဖြစ်တည်လာသည့်အလား ကြယ်ပေါ်မှာ ထွက်ပေါ်လာသည်။ ထို့နောက် ပုံရိပ်သည် ချက်ချင်း ကြည်လင်လာသည်။

သူက ရွှီချင်းဖြစ်သည်။

ရွှီချင်းသည် ထွက်ပေါ်လာသည်နှင့်ချက်ချင်း အင်ပါယာနန်းတော်နှင့် ဘေးပတ်ဝန်းကျင်ရှိ ကြယ်များပေါ်မှ ရင်းနှီးကျွမ်းဝင်သော ပုံရိပ်များကို ကြည့်လိုက်သည်။ ထို့ကြောင့် သူက နောက်ကျမှ ရောက်လာကြောင်း ရွှီချင်း နားလည်သွားသည်။

တစ်ချိန်တည်းမှာ အကြည့်များစွာက ရွှီချင်းပေါ်မှာ စုဝေးသွားသည်။ လူတိုင်းထံမှာ မတူညီသော အမူအရာများ ရှိသည်။

ခေါင်းဆောင်သည် ရွှီချင်း၏ ထွက်ပေါ်လာမှုကို ချက်ချင်း သတိပြုမိသွားသည်။ သူ၏ မျက်နှာပေါ်မှ စိုးရိမ်ကြောင့်ကြသော အမူအရာသည် ချက်ချင်း ပျောက်ကွယ်သွားပြီး ဝမ်းသာပျော်ရွှင်သော အရိပ်အယောင်က အစားထိုးသွားသည်။

“ ဂျူနီယာညီလေး… နောက်ဆုံးတော့ မင်းရောက်လာပြီ… တကယ်လို့ အခု မင်းထွက်ပေါ်မလာဘူးဆိုရင် မင်းတကယ်သေသွားပြီလို့ ငါထင်သွားမှာ… ”