စင်ပေါ်တတ်ဖို့ သိပ်နောက်မကျသေးဘူး

ခေါင်းဆောင်၏ စကားက ရွှီချင်း၏ စိတ်ထဲသို့ ပဲ့တင်ထပ်သွားသည်။

ရွှီချင်းက ပြုံးလိုက်သည်။

သူက အလွန်နောက်မကျသေးကြောင်း သိလိုက်သည်။

ခေါင်းဆောင်နှင့် ရွှမ်မီးလျှံကို ဤနေရာမှာ မြင်တွေ့ခြင်းသည် သူ၏ မျှော်လင့်ထားမှုအတွင်းမှာ ရှိသည်။ သို့သော်လည်း ထျန်းမိုဇီ၊ ထုန်ရှီရှန်းနှင့် ဖန်းရှီရွှမ်းကို ဤနေရာမှာ မြင်တွေ့လိုက်ခြင်းသည် သူ့ကို အနည်းငယ် အံ့ဩသွားစေသည်။

သို့သော်လည်း သူက အနည်းငယ်မျှသာ အံ့ဩသွားခြင်း ဖြစ်သည်။

မည်သို့ဖြစ်ပါစေ မီးလျှံလရွှမ်ကောင်းကင်မျိုးနွယ်က ဤနတ်ဘုရားနယ်မြေကို တစ်ကြိမ်ထက်မနည်း ဖွင့်လှစ်ခဲ့သည် မဟုတ်ပါလော။ မီးလျှံလရွှမ်ကောင်းကင်မျိုးနွယ်၏ ထိပ်ဆုံးငါးယောက် ကောင်းကင်အရွေးချယ်ခံများအနေဖြင့် သူတို့၏ အနောက်မှ အင်အားစုများနှင့် မိသားစုများသည် ထုံးစံအားဖြင့် ဤအတွက် နှစ်ပေါင်းများစွာကြာအောင် ကြိုတင်ပြင်ဆင်ထားမှုများ ပြုလုပ်ထားနိုင်ပေသည်။

အမှန်မှာ ထိုလူများ၏ ရောက်ရှိလာမှုက ဤနေရာသည် နတ်ဘုရားနယ်မြေထဲမှာ အကြီးမားဆုံး အခွင့်အလမ်းများရှိသော နေရာဖြစ်ကြောင်း ဖော်ပြလိုက်သည်။

တစ်ချိန်တည်းမှာ ယင်းက ခေါင်းဆောင်၏ အာရုံခံစားမှုနှင့် သူစီစဉ်ထားသော ကိစ္စကြီးကို သယ်ဝိုက်သောနည်းဖြင့် သက်သေပြုပေးနေသည်။

သို့ဖြစ်၍ ရွှီချင်းက ခေါင်းဆောင်ကို ခေါင်းညိတ်၍ တုံ့ပြန်ပြီးနောက် တခြားလူများကို ကြည့်လိုက်သည်။ ရွှမ်မီးလျှံသည် အေးစက်စွာ နှာခေါင်းရှုံ့လိုက်သည်။ ထျန်းမိုဇီက အံ့ဩသော အမူအရာကို ထုတ်ဖော်ထားပြီး ထုန်ရှီရှန်းက မျက်နှာချိုသွေးသော အကြည့်ကို ဖော်ပြထားသည်။ ဖန်းရှီရွှမ်းသည်တော့ ခေါင်းငုံ့ထားလိုက်ပြီး ရွှီချင်း၏ အကြည့်ကို ရှောင်ဖယ်လိုက်သည်။

သူတို့က မည်သည့်စကားမှ မပြောပေ။ ရွှီချင်း၏ ထွက်ပေါ်လာမှုကိုလည်း မအံ့ဩပေ။

ရှင်းလင်းစွာပင် သူတို့က ဤနေရာမှာ ရွှီချင်းထွက်ပေါ်လာလိမ့်မည်ဟု တွေးထားကြောင်း ရှင်းလင်းပေသည်။ ရွှီချင်းက ထွက်ပေါ်မလာမှသာ သူတို့အတွက် ထူးဆန်းနေလိမ့်မည်။

သူ၏ အကြည့်ကို တခြားဦးတည်ရာဆီသို့ ရွှေ့ပြောင်းလိုက်သည့်အခါ အလွန်ကြီးမားသော အင်ပါယာနန်းတော်က သူ၏ စိတ်ထဲမှာ ပုံရိပ်ပြန်လာသည်။ ရွှီချင်းသည် သူရှိနေသော ကြယ်အကြောင်းကို ပိုပြီးနားလည်လာသည်။

ဥပမာ ကြယ်တာရာကောင်းကင်ထဲမှ ကြယ်(၁၀၈)လုံး၏ အပြင်ဘက်အလွှာမှာ မမြင်နိုင်သော သဏ္ဍာန်မဲ့အကာအကွယ်တစ်ခု ရှိသည်။

ထိုအကာအကွယ်ကို သာမန်မျက်စိဖြင့် မမြင်နိုင်ပေ။ နတ်ဘုရားစိတ်အာရုံဖြင့်သာ ယင်းကို အာရုံခံနိုင်ပေသည်။ ယင်းက ချိပ်တံဆိပ်တစ်ခုနှင့် ဆင်တူပြီး လူတိုင်းကို ဤကြယ်ထဲမှ ထွက်မသွားနိုင်အောင် တားဆီးထားသည်။

သို့သော်လည်း နတ်ဘုရားအစွမ်းကို ပိုင်ဆိုင်ထားသော ဤအကာအကွယ်သည် ထျန်းမိုဇီနှင့် တခြားလူများကို ပိတ်ဆို့ထားနိုင်လောက်သည်။ သို့သော်လည်း ခေါင်းဆောင်နှင့် ရွှမ်မီးလျှံအတွက်တော့ ဤအကာအကွယ်ကို ချိုးဖောက်ရန် သူတို့အတွက် မခက်ခဲကြောင်း ရွှီချင်း ခံစားမိသည်။

သို့သော်လည်း သူတို့နှစ်ယောက်သည် ကြယ်၏ အကာအကွယ်ထဲမှာသာ ရှိနေကြသည်။

“ သူတို့က ထွက်သွားဖို့ ဆန္ဒမရှိတာလား… ဒါမှမဟုတ် အချိန်မကျသေးလို့လား ”

ရွှီချင်း၏ အကြည့်က ဘေးပတ်ဝန်းကျင်သို့ လှည့်ပတ်သွားပြီး အခြေအနေကို စဉ်းစားသုံးသပ်လိုက်သည်။

မကြာမီ သူက အဖြေကို ရှာတွေ့သွားသည်။

ကြယ်များ၏ အောက်တွင် နေနှင့်လက ၎င်းတို့၏ ဂြိုလ်ပတ်လမ်းကြောင်းအတိုင်း လှည့်ပတ်နေကြသည်။

နေလုံးသည် ကောင်းကင်ကို ဖြတ်သန်း၍ ရွေ့လျားနေသည်။

ပြိုင်ဘက်ကင်းသော လွှမ်းမိုးဖိနှိပ်မှုနှင့် ကြမ်းကြုတ်သော အရှိန်အဝါပါရှိသည့် အပူဓာတ်သည် နေလုံးထံမှ ထွက်ပေါ်နေသည်။ ဤသည်မှာ အရွယ်အစား အလွန်ကြီးမားသော ဧရာမမီးဘောလုံးတစ်လုံးက ကောင်းကင်တစ်ခုလုံးကို အလင်းရောင်ပေးနေသည့်အလားပင်။

နေလုံးက နီးကပ်လာသည်နှင့်အမျှ ၎င်းထံမှ စွမ်းအားသည် ပိုပြီးအားကောင်းလာသည်။ ၎င်းက တခြားကြယ်များဆီသို့ ချဉ်းကပ်ရောက်ရှိသွားသည့်အခါ အပူဓာတ်သည် ကြယ်များ၏ အပြင်ဘက်အလွှာမှ အကာအကွယ်များပေါ်သို့ ကျရောက်သွားသည်။ ထိုအကာအကွယ်များသည် ကြမ်းကြုတ်သော အပူဓာတ်ကို စုပ်ယူပြီး သန့်စင်သော စွမ်းအင်အဖြစ် ပြောင်းလဲပေးလိုက်သည်။

ထျန်းမိုဇီ၊ ထုန်ရှီရှန်းနှင့် ရွှမ်မီးလျှံ၏ ခန္ဓာကိုယ်သည် တုန်ယင်သွားသည်။ သူတို့က နေလုံးထံမှ သန့်စင်သော စွမ်းအားကို စုပ်ယူလိုက်ပြီး သူတို့၏ ခန္ဓာကိုယ်နှင့် ဝိညာဉ်ကို ထုဆစ်ပုံသွင်းလိုက်ကြသည်။

သူတို့က နေလုံး၏ အစွမ်းကို စုပ်ယူနေသည်နှင့်အမျှ သူတို့၏ ခန္ဓာကိုယ်ပေါ်မှ အရှိန်အဝါသည် သိသာစွာ ပိုပြီးအားကောင်းလာသည်။

ထိုအကြောင်းအရင်းကြောင့် ရွှမ်မီးလျှံက အကာအကွယ်ကို မချိုးဖောက်ခဲ့ခြင်း ဖြစ်သည်။

ထို့ကြောင့် လူတိုင်းက ကြယ်ပေါ်မှာ တင်ပျဉ်ခွေထိုင်နေကြခြင်း ဖြစ်သည်။

ကြယ်များပေါ်မှ အကာအကွယ်သည် ချိပ်တံဆိပ်တစ်ခုမျှသာမဟုတ်ဘဲ သူတို့အတွက် ကာကွယ်ပေးမှုပုံစံတစ်မျိုးလည်း ဟုတ်သည်။ ထိုကြယ်များသည် တာအိုစင်မြင့်များနှင့် ဆင်တူပြီး စွမ်းအားကို စုပ်ယူရန် အလုံခြုံဆုံးနေရာ ဖြစ်သည်။

“ အဲ့ဒါက နေစွမ်းအားပဲ ”

ခေါင်းဆောင်၏ နတ်ဘုရားစိတ်အာရုံသည် ရွှီချင်း၏ စိတ်ထဲသို့ ဝင်ရောက်လာသည်။

“ ခဏနေ လရောက်လာတဲ့အခါ အဲ့ဒါက အစွန်းရောက်ယင်စွမ်းအားကို ထုတ်လွှတ်လိမ့်မယ်… ဂျူနီယာညီလေး… အင်ပါယာသင်္ချိုင်းက မင်းအတွက် ရတနာကြီးလို့ ငါမပြောခဲ့ဘူးလား… ဒါပေမဲ့ မင်းက ငါ့စကားကို နားမထောင်ဘဲ အပြင်ဘက်က ရုပ်တုတွေနဲ့ တိုက်ခိုက်ခဲ့တယ် ”

“ ကြည့်စမ်း… ဒီမှာ အစွန်းရောက်ယင်စွမ်းအားက ဘယ်လောက်တောင်မှ များလိုက်လဲ ”

ခေါင်းဆောင်သည် ခေါင်းခါလိုက်သည်။ သူက စိတ်ခံစားချက်နှင့်အတူ ပါးစပ်မှ တကျွတ်ကျွတ် လုပ်လိုက်သည်။ ဤသည်မှာ ရွှီချင်း၏ အပြုအမူက ဇာတ်ပို့တစ်ယောက်နှင့် ဆင်တူနေသည့်အလားပင်။

ရွှီချင်းသည် နှုတ်ဆိတ်သွားသည်။ သူ၏ အကြည့်က အင်ပါယာနန်းတော်ထဲမှ လအပေါ်သို့ ကျရောက်သွားသည်။ ယခု နေရောက်လာပြီဖြစ်လေရာ လ၏ စွမ်းအားကို သူအာရုံမခံနိုင်ပေ။ သို့သော်လည်း နေလုံးမှ ထုတ်လွှတ်နေသည့် အလွန်သိပ်သည်းသော စွမ်းအားကို ကြည့်ခြင်းအားဖြင့် ခေါင်းဆောင်၏ ပြောစကားက မှန်ကန်ကြောင်း သူသိလိုက်သည်။

ဤသည်မှာ သင်္ချိုင်းအပြင်ဘက်မှ တိုက်ပွဲက အဓိပ္ပာယ်မဲ့သွားပုံပေါ်သည်။

ရွှီချင်း၏ အမူအရာကို မြင်သောအခါ ခေါင်းဆောင်သည် ပိုပြီးဘဝင်မြင့်သွားသည်။ သူက ရွှီချင်းဆီသို့ ဆက်ပြီး အသံပို့လွှတ်ရန် ပြင်လိုက်သည်။

သို့သော်လည်း ထိုအခိုက်အတန့်မှာ နေစွမ်းအားကို စုပ်ယူနေသော ထုန်ရှီရှန်းသည် ရုတ်တရက် တုန်ယင်သွားသည်။ တောက်ပသော အလင်းသည် သူ၏ ဒန်တျန်အတွင်းမှာ ထွက်ပေါ်လာသည်။ ဤသည်မှာ ကြယ်တစ်လုံးက သူ၏ ခန္ဓာကိုယ်ထဲမှာ တောက်ပနေသည့်အလားပင်။

ကြယ်ထွက်ပေါ်လာပြီးနောက် တာအိုအမှတ်အသားများသည် လေထဲမှာ ထွက်ပေါ်လာကြသည်။

ထိုတာအိုအမှတ်အသားများသည် ပူဖောင်းများအဖြစ်သို့ ပြောင်းလဲသွားကြပြီး အရေအတွက် ပိုမိုများပြားလာကြသည်။ ထို့နောက် ယင်းတို့က အတူတကွ စုဝေးသွားပြီး ပုံရိပ်ယောင်မဟာလောကတစ်ခုကို ဖွဲ့စည်းသွားသည်။

သူ၏ ဒန်တျန်ထဲရှိ ကြယ်အလင်းရောင်အောက်မှာ ပုံရိပ်ယောင်မဟာလောကသည် အစစ်အမှန်ဖြစ်တည်နေသော လက္ခဏာများ ပြလာသည်။ ဤသည်မှာ သက်ရှိများက ထိုလောကထဲမှာ မွေးဖွားလာနေသည့်အလားပင်။

ကြောက်စရာကောင်းသော အရှိန်အဝါသည် ဘေးပတ်ဝန်းကျင်သို့ ရိုက်ခတ်သွားသည်။ ယင်းက အလွန်ကျယ်ပြောပြီး အံ့ဖွယ်ကောင်းသည်။ ထိုအရှိန်အဝါသည် ဗလာနတ္ထိအဆင့်ထက် ကျော်လွန်နေသည်။ မဟာလောကက ပုံရိပ်ယောင်မှ အစစ်အမှန်အဖြစ်သို့ ပြောင်းလဲသွားနေသည်နှင့်အမျှ အရှိန်အဝါသည် ပိုပြီးအားကောင်းလာသည်။

ယင်းက ဝိညာဉ်စုစည်းခြင်းအဆင့် အရှိန်အဝါဖြစ်သည်။

ထုန်ရှီရှန်းသည် သူ၏ တာအိုကို ပြီးပြည့်စုံအောင် ဆောင်ရွက်ရန် ဤနေရာမှ နေစွမ်းအားကို ငှားယူ၍ သူ့ကိုယ်ပိုင်လမ်းစဉ်ကို ဖွင့်လှစ်ပြီး မဟာလောကကို ဒြပ်ထည်ဖွဲ့စည်းလိုက်သည်။

သူ၏ မဟာလောကက အပြည့်အဝ ဒြပ်ထည်ဖွဲ့စည်းသွားသည်နှင့် သူက ဝိညာဉ်စုစည်းခြင်းအဆင့်သို့ ရောက်ရှိသွားလိမ့်မည်။

ဤသည်မှာ နတ်ဘုရားနယ်မြေသို့ ဝင်ရောက်လာသည့် သူ၏ အန္တိမရည်ရွယ်ချက်ဖြစ်သည်။ မီးလျှံလရွှမ်ကောင်းကင်မျိုးနွယ်၏ ထိပ်ဆုံးငါးယောက် ကောင်းကင်အရွေးချယ်ခံများထဲမှ တစ်ယောက်အနေဖြင့် သူ့နယ်ပယ်၏ အဆုံးသတ်သို့ မရောက်ရှိသေးသော်လည်း သူ၏ စွမ်းအားကို အဆုံးစွန်ထိ တွန်းပို့ခဲ့သည်။

သူနှင့် တခြားလူများကြားမှ ခြားနားမှုကိုလည်း သူသိသည်။ ထို့ကြောင့် သူက ပြီးပြည့်စုံမှုကို မတောင်းဆိုပေ။ သူ့ကိုယ်ပိုင်အားသာချက်ကိုသာ လိုက်လံရှာဖွေချင်သည်။

ယခု သူက အကန့်အသတ်ကို ရောက်ရှိသွားပြီဖြစ်လေရာ အဆင့်ချိုးဖြတ်ရန် တုံ့ဆိုင်းမနေပေ။

သူ၏ မဟာလောကကို ထွန်းညှိရန် ဤနေရာထက် ပိုပြီးသင့်တော်သောနေရာ မရှိပေ။ အဘယ့်ကြောင့်ဆိုသော် နေစွမ်းအားသည် အသက်ဓာတ်ကို ကိုယ်စားပြုပြီး အဆုံးမဲ့သော ဖြစ်နိုင်ခြေများကို ပံ့ပိုးပေးနိုင်သည်။ အထူးသဖြင့် နတ်ဘုရားနယ်မြေ၏ အင်ပါယာသင်္ချိုင်းထဲမှ ထိုနေလုံးအကြောင်းကို သူသိထားသည့်အခါ ဖြစ်သည်။

ယင်းက ဤလောက၏ ပထမဆုံး နေလုံးဖြစ်သည်။ ထို့ပြင် ၎င်းက တစ်ခုတည်းသော နေလုံးလည်း ဟုတ်သည်။ သို့ဖြစ်၍ ၎င်း၏ အဆင့်အတန်းသည် ဝမ်ကူးကုန်းမြေမှ ဘိုးဘေးနေလုံးနှင့် နှိုင်းယှဉ်နိုင်သည်။

ယင်းက သူတစ်ယောက်တည်း၏ ရွေးချယ်မှုသာ မဟုတ်ပေ။ ထျန်းမိုဇီသည်လည်း သူ့နည်းတူ ရွေးချယ်ခဲ့သည်။

ထုန်ရှီရှန်း၏ ခန္ဓာကိုယ်ထဲမှ ဒုတိယကြယ်အလင်းရောင်က ထွန်းလင်းတောက်ပလာသည့်အခါ ထျန်းမိုဇီတည်ရှိသော ကြယ်သည် အလင်းရောင်တောက်ပလာသည်။ ထို့နောက် ကြောက်မက်ဖွယ်ကောင်းသော အရှိန်အဝါနှင့် ဖိအားသည် ထျန်းမိုဇီထံမှ ထွက်ပေါ်လာသည်။

သူသည်လည်း အဆင့်ချိုးဖြတ်သွားသည်။

ချက်ချင်းဆိုသလို သူတို့နှစ်ယောက်အောက်မှ ကြယ်နှစ်လုံးသည် တစ်ပြိုင်နက် တုန်လှုပ်သွားကြသည်။

ထိုမြင်ကွင်းကို ရွှီချင်းမြင်သွားသည်။ သူက အရာအားလုံးကို နားလည်သွားသည့်အခါ ရွှမ်မီးလျှံ၏ ဦးတည်ရာဆီသို့ ရုတ်တရက် ကြည့်လိုက်သည်။

ဝိညာဉ်စုစည်းခြင်းအဆင့်ကို မတတ်လှမ်းသေးသော ရွှမ်မီးလျှံက မည်မျှအစွမ်းထက်ကြောင်း လေးနက်စွာ သူနားလည်သည်။ ထျန်းမိုဇီနှင့် ထုန်ရှီရှန်းက သူတို့၏ တာအိုကို ပြီးပြည့်စုံအောင် အရင်ဦးစွာ စွမ်းဆောင်နိုင်ခဲ့သော်လည်း သူတို့က အသန်မာဆုံး မဖြစ်လာပေ။ အဘယ့်ကြောင့်ဆိုသော် သူတို့မှာ အကန့်အသတ်ရှိသည်။

မီးလျှံလရွှမ်ကောင်းကင်မျိုးနွယ်၏ ကောင်းကင်အရွေးချယ်ခံများထဲတွင် ရွှမ်မီးလျှံတစ်ယောက်တည်းသာ အကန့်အသတ်မရှိလုနီးပါး အလွန်သန်မာသည်။

သို့ဖြစ်၍ သူက နေစွမ်းအားကို ပိုမိုများပြားစွာ လိုအပ်သည်။

ဤအခိုက်အတန့်မှာ ရွှီချင်းက လှမ်းကြည့်လိုက်သည့်အခိုက် ကြယ်ပေါ်မှာ တင်ပျဉ်ခွေထိုင်နေသော ရွှမ်မီးလျှံသည် တုန်ယင်သွားသည်။ ရှေးကျပြီး အလွန်ကြီးမားသော ရတနာသိုက်ဂိတ်တံခါးငါးခုသည် သူ၏ အနောက်မှာ ခမ်းနားထည်ဝါစွာ ထွက်ပေါ်လာကြသည်။

ဂိတ်တံခါးငါးခုသည် ပွင့်သွားကြပြီး အားကောင်းသော စုပ်ယူအားကို ထုတ်လွှတ်လိုက်သည်။

ပမာဏ အလွန်များပြားသော နေစွမ်းအားသည် ရွှမ်မီးလျှံဆီသို့ ချက်ချင်း ဦးတည်သွားသည်။ ယင်းက ဂိတ်တံခါးငါးခုထဲသို့ ဝင်ရောက်သွားသည့်အခိုက် တာအိုအမှတ်အသားများ၊ ပူဖောင်းများနှင့် ဗလာနတ္ထိနယ်မြေသည် ဂိတ်တံခါးသုံးခု၏ အနောက်မှာ ထွက်ပေါ်လာကြသည်။

တာအိုအမှတ်အသားများသည် ဆက်လက် ကျယ်ပြန့်သွားပြီး ပူဖောင်းများသည် အဆုံးမဲ့စွာ လွင့်မျောသွားကြသည်။ ထို့နောက် ယင်းတို့က ဗလာနတ္ထိကုန်းမြေထဲမှာ စုဝေးသွားကြသည်။ ထိုအခါ ဗလာနတ္ထိကုန်းမြေသည် ဆက်လက် ကျယ်ပြန့်သွားပြီး မဟာလောက၏ အရွယ်အစားထက် ကျော်လွန်သွားသည်။ ယင်းက တစ်ခါမှမဖြစ်ပေါ်ဖူးသော အထူးလောကတစ်ခုကို ဖွဲ့စည်းသွားသည်။

မဟာလောကထဲမှ ကုန်းမြေက အတိုင်းအဆမဲ့အောင် ကြီးမားသော်လည်း ကောင်းကင်အတွက်တော့ ကုန်းမြေကို ဖုံးလွှမ်းရန် စိန်ခေါ်မှုတစ်ရပ်ဖြစ်နေသည်။

သို့သော်လည်း အကယ်၍ ထိုလောကအတွက် သင့်တော်သော ကောင်းကင်သာ ထွက်ပေါ်လာမည်ဆိုလျှင် ရွှမ်မီးလျှံအဆင့်ချိုးဖြတ်သည့်အခါ သူက ဝိညာဉ်စုစည်းခြင်းပထမအဆင့်၏ အထွတ်အထိပ်ကို တိုက်ရိုက် တတ်လှမ်းသွားလိမ့်မည်။

အဘယ့်ကြောင့်ဆိုသော် သူ၏ မဟာလောကက အလွန်ကျယ်ပြောပြီး အရာအားလုံးထက် သာလွန်သောကြောင့် ဖြစ်သည်။ ရှေးခေတ်ကာလကတည်းက ဤအတိုင်းအတာထိ ရောက်ရှိဖူးသော မဟာလောကများသည် အနည်းငယ်မျှသာ ရှိသည်။

ဤသည်ကို ကြည့်ခြင်းအားဖြင့် ရွှမ်မီးလျှံ၏ ပါရမီနှင့် စိတ်ဆုံးဖြတ်မှုကို မြင်နိုင်ပေသည်။

ကောင်းကင်အရွေးချယ်ခံသုံးယောက်၏ အစွမ်းတိုးမြှင့်သွားသော ထိုမြင်ကွင်းကို မြင်သွားသောအခါ အကြောင်းအရင်းတချို့ကြောင့် ရွှီချင်းသည် ချီယွဲ့ထုံဂိုဏ်းမှာ သူရှိနေခဲ့စဉ်က တစ်စုံတစ်ယောက်၏ ပြောစကားကို ပြန်အမှတ်ရသွားသည်။

“ ဒီခေတ်က ယှဉ်ပြိုင်မှုအပြင်းထန်ဆုံးခေတ်ဖြစ်သလို ဒီခေတ်မှာ ကောင်းကင်အရွေးချယ်ခံတွေ အများကြီး ပေါ်ထွန်းလာလိမ့်မယ်… ဒီဟာက ဝမ်ကူးကောင်းကင်ဘုံတာအိုတွေရဲ့ သူတို့ကိုယ်သူတို့ ကယ်တင်ဖို့ နောက်ဆုံးကြိုးစားခြင်း ဖြစ်နိုင်တယ် ”

ရွှီချင်းသည် မျက်လုံးဝင်းလက်သွားသည်။

နောက်အခိုက်အတန့်မှာ နေဝင်သွားပြီး လက အဝေးမှ ချဉ်းကပ်လာသည်။

နေရောင်ခြည်ပျောက်ကွယ်သွားသည်နှင့်ချက်ချင်း အစွန်းရောက်ယင်စွမ်းအားက ပေါ်လျှိုးလာသည်။

ထိုအခါ ခေါင်းငုံ့ထားသော ဖန်းရှီရွှမ်းသည် ရုတ်တရက် ခေါင်းမော့လိုက်သည်။ သူ၏ မျက်လုံးထဲမှာ ဇွဲကောင်းမှုဖြင့် ပြည့်နှက်နေပြီး သူ၏ နှလုံးသားသည် တည်ကြည်ခိုင်မြဲသည်။ အတိတ်တွင် ရွှီချင်းက ဂျိဒုန်းဇီအား သတ်ဖြတ်နေခြင်းကို သူက အကူအညီမဲ့စွာ ရပ်ကြည့်နေခဲ့ရသည်။ သူက ရွှီချင်းထက်ပင် အားနည်းလေရာ ရွှမ်မီးလျှံကို ထည့်ပြောနေရန် မလိုအပ်ပေ။ သို့သော်လည်း သူ၏ အားနည်းမှုက အတိတ်မှာသာ ဖြစ်သည်။

သူ၏ အနာဂတ်က ထိုထက် ပိုပြီးလှပလိမ့်မည်ဟု မြဲမြံစွာ သူယုံကြည်ထားသည်။

အနာဂတ်တွင် မည်သူက မည်သူထက် ပိုပြီးသန်မာလိမ့်မည်မှာ မသေချာသေးပေ။

ထိုယုံကြည်မှုက သူ့ကို ထောက်ပံ့ပေးထားသည်။ သို့ဖြစ်၍ အစွန်းရောက်ယင်စွမ်းအားက ပေါ်လျှိုးလာသည့်အခါ သူက ယင်းကို အရူးအမူး စုပ်ယူလိုက်သည်။ လရောင်ခြည်က သူ၏ နဖူးပေါ်မှာ စုဝေးသွားပြီး ကြယ်တစ်လုံးအသွင် ဖွဲ့စည်းသွားကာ ဘေးပတ်ဝန်းကျင်ကို ထွန်းလင်းသွားစေသည်။

သူသည်လည်း အဆင့်ချိုးဖြတ်ရန် စတင်ကြိုးစားလိုက်သည်။

တူညီစွာပင် အားညိုသည်လည်း အစွန်းရောက်ယင်စွမ်းအားကို စုပ်ယူလိုက်သည်။

ထို့ပြင် ဖန်းရှီရွှမ်းနှင့် နှိုင်းယှဉ်လျှင် အားညို၏ စွမ်းအင်စုပ်ယူသော နည်းလမ်းသည် ပိုပြီးလွှမ်းမိုးဖိနှိပ်သည်။ ယင်းက ရွှမ်မီးလျှံ၏ စွမ်းအင်စုပ်ယူသော နည်းလမ်းထက်ပင် ပိုပြီးသာလွန်ပုံပေါ်သည်။ အားညို၏ ဦးခေါင်းက လှုပ်ယမ်းသွားသည့်အခါ တိမ်တိုက်များက သူ၏ ဦးခေါင်းပေါ်မှာ အမှန်တကယ် ထွက်ပေါ်လာကြသည်။

တိမ်တိုက်များက ရွေ့လျားသွားသည့်အခါ ဧရာမခွေးဦးခေါင်းက ပေါ်ထွက်လာပြီး အစွန်းရောက်ယင်စွမ်းအားကို အရူးအမူး စုပ်ယူလိုက်သည်။

ယင်းက အင်မော်တယ်အတတ်ပညာဖြစ်သည်။

၎င်းမှာ အရာအားလုံးကို ဝါးမျိုနိုင်သော စွမ်းအားရှိသည်။

မျက်စိတစ်မှိတ်အတွင်းမှာ အစွန်းရောင်ယင်စွမ်းအားက ခေါင်းဆောင်ဆီသို့ ဦးတည်သွားပြီး အရူးအမူး ဝါးမျိုခံလိုက်ရသည်။

ဖန်းရှီရွှမ်း၏ ခန္ဓာကိုယ်သည် တုန်ယင်သွားပြီး သူက အကူအညီမဲ့မှုကို ခံစားမိသွားသည်။ သူ၏ အမူအရာက ချက်ချင်း မည်းမှောင်သွားသည်။

အားညိုသည်တော့ မောက်မာထောင်လွှားသော ဟန်ပန်အမူအရာကို ထုတ်ဖော်လိုက်သည်။ သူက ရွှမ်မီးလျှံကို အထင်သေးရှုံ့ချစွာ ကြည့်လိုက်ပြီး ရွှီချင်းထံသို့ ဘဝင်မြင့်စွာ အသံပို့လွှတ်လိုက်သည်။

“ ဂျူနီယာညီလေး… မင်းက စီနီယာအကိုကြီးကို အသနားခံပြီး ချီးကျူးစကားအခွန်းတစ်ရာနဲ့ အကြွေးစာချုပ်တစ်ထောင်ကို လက်မှတ်ရေးထိုးပေးမယ်ဆိုရင် ငါမင်းကို နှစ်ဆယ်ရာခိုင်နှုန်း ခွဲဝေပေးမယ် ”

ခေါင်းဆောင်၏ ယုတ္တိမရှိသော စကားကို ကြားသောအခါ ရွှီချင်းက သူ့ကို လျစ်လျူရှုထားလိုက်သည်။ သူက အဝေးမှ ချဉ်းကပ်လာနေသော လကို ကြည့်လိုက်လေရာ မကြာသေးခင်ကမှ လပူဇော်ရုပ်တုကို စုပ်ယူထားခဲ့သော သူ၏ ခန္ဓာကိုယ်ထဲမှ တတိယနတ်ဘုရားရတနာသိုက်၏ ဂိတ်တံခါးက ပွင့်သွားသည်။

ရတနာသိုက်ဂိတ်တံခါးသည် လနှင့်ဇစ်မြစ်တူညီသော စွမ်းအားကို ထုတ်လွှတ်လိုက်သည်။ ယင်းက အစွန်းရောက်ယင်ဖြစ်ပြီး ဘိုးဘေးလစန္ဒာထံမှ စွမ်းအားဖြစ်သည်။

ပြင်းပြသော လိုအင်ဆန္ဒက သူ၏ စိတ်ထဲမှာ ထွက်ပေါ်လာသည်။

သင်္ချိုင်းအပြင်ဘက်မှ တိုက်ပွဲက အသုံးမဝင်ဘူးဟု မည်သူက ပြောသနည်း။ ထိုတိုက်ပွဲမှာ သူရရှိခဲ့သော အကျိုးအမြတ်သည် မျိုးစေ့ဖြစ်သည်။

ရွှီချင်းသည် နားလည်သွားသည်။ သူက လကို ကြည့်လိုက်ပြီး မတ်တတ်ရပ်လိုက်သည်။ သူက အရှေ့သို့ ခြေတစ်လှမ်း လှမ်းလိုက်လေရာ သူ၏ ခန္ဓာကိုယ်ထဲမှ ဒုတိယနတ်ဘုရားရတနာသိုက်သည် ဝုန်းခနဲ မြည်ဟိန်းသွားသည်။

ရတနာသိုက်ထဲမှ မင်ဖေး၏ မျက်လုံးသည် ပွင့်သွားသည်။ ချက်ချင်းဆိုသလို နတ်ဘုရား၏ ညစ်ညမ်းမှုခြောက်မျိုးသည် ရွှီချင်း၏ မျက်လုံးထဲမှာ ထွက်ပေါ်လာသည်။ ယင်းက သူ့အရှေ့မှ သဏ္ဍာန်မဲ့အကာအကွယ်ပေါ်သို့ ကျရောက်သွားသည်။

နတ်ဘုရား၏ ညစ်ညမ်းမှုခြောက်မျိုးသည် နတ်ဘုရားအစွမ်းကို ညစ်ထေးစေနိုင်သည်။

နောက်အခိုက်အတန့်မှာ ညစ်ညမ်းမှုခြောက်မျိုး၏ ယိုယွင်းတိုက်စားမှုကြောင့် အကာအကွယ်သည် ဒြပ်မဲ့အဖြစ်မှ ဒြပ်ထည်ရှိလာသည်။ ထို့နောက် ယင်းက ပူဖောင်းတစ်လုံးနှယ် ပေါက်ကွဲသွားပြီး တိုက်ရိုက် လွင့်ပြယ်သွားသည်။

ရွှီချင်းက ခြေချလိုက်သည့်အခါ သူက ကြယ်ပေါ်မှ ပျောက်ကွယ်သွားပြီး အပြင်ဘက်မှာ ပြန်ပေါ်လာသည်။

အင်ပါယာနန်းတော်ထံမှ စွမ်းအားသည် အရပ်မျက်နှာပေါင်းစုံမှ ရောက်ရှိလာပြီး ရွှီချင်း၏ ခန္ဓာကိုယ်ကို ပြင်းထန်စွာ ဖိချလိုက်သည်။ သို့သော်လည်း ရွှီချင်း၏ အမူအရာသည် လုံးဝပြောင်းလဲမသွားပေ။ ထို့နောက် ကျူးလီ၏ ဦးခေါင်းကိုးလုံးနှင့် သူ၏ နတ်ဘုရားအသွင်သဏ္ဍာန်က ထွက်ပေါ်လာသည်။ ထိုအခါ နတ်ဘုရား၏ ညစ်ညမ်းမှုခြောက်မျိုးသည် ပိုပြီးသိပ်သည်းလာသည်။

လူတိုင်းက အံ့ဩထိတ်လန့်နေကြစဉ် သူက အဝေးမှ ချဉ်းကပ်လာနေသော လဆီသို့ တန်းမတ်စွာ ဦးတည်လျှောက်သွားသည်။

ထို့နောက် သူက လပေါ်သို့ တိုက်ရိုက် ခြေချလိုက်ပြီး တင်ပျဉ်ခွေထိုင်လိုက်သည်။

သူ၏ ခန္ဓာကိုယ်ထဲမှ ခရမ်းလနတ်ဘုရားရတနာသိုက်သည် ရုတ်တရက် တုန်ယင်သွားပြီး လစွမ်းအားကို အရူးအမူး စုပ်ယူလိုက်သည်။

ဤသည်မှာ ယင်းက ချီးမြှောက်အားပေးနေသည့်အလားပင်။