လောကရဲ့အထွတ်အထိပ်မှာ အင်မော်တယ်တွေကို ငါမေးမယ်(ခ)

နှလုံးသားကို သက်သေပြုပေးခြင်းမှလွဲလျှင် ထိုခေါင်းလောင်းမှာ တခြားအသုံးဝင်ပုံများ မရှိဟန် ရသည်။

တဖြည်းဖြည်း ယင်းက လူသားအများစု၏ လျစ်လျုရှုခြင်း ခံလာရပြီး ရှေးခေတ်ပစ္စည်းတစ်ခုအဖြစ်သာ ဆက်ဆံခံခဲ့ရသည်။

ယင်းက ယနေ့မတိုင်ခင်အထိ ဖြစ်သည်။

လူသားမျိုးနွယ်၏ ကောင်းကင်ဘုံတာအိုသည် နိုးထလာပြီး အင်မော်တယ်အမှန်တရားခေါင်းလောင်းဆီသို့ တန်းမတ်စွာ ပျံသန်းသွားသည်။

ခေါင်းလောင်းသည် ရုတ်တရက် တုန်ခါသွားသည်။

ဤသည်မှာ ယင်းက နှစ်ပေါင်းများစွာကြာအောင် အိပ်ပျော်နေခဲ့သည့်အလား ယခု နောက်ဆုံးမှာတော့ တဖန်နိုးထလာသည်။

ခေါင်းလောင်း၏ မျက်နှာပြင်ပေါ်မှာ ရေးထွင်းထားသော တောင်တန်းများ၊ မြစ်ချောင်းများနှင့် သက်ရှိများသည် ကိုယ့်ဘာသာ အသက်ဝင်လာကြဟန် ရ၏။ ၎င်းတို့က ခေါင်းလောင်းကို လှည့်ပတ်သွားကြပြီး ထွန်းလင်းတောက်ပလာသည်။ တစ်ချိန်တည်းမှာ အလွန်သိပ်သည်းသော ရှေးဟောင်းအရှိန်အဝါသည် အင်မော်တယ်အမှန်တရားခေါင်းလောင်းထဲမှ ပေါ်လျှိုးလာသည်။

ကောင်းကင်သည် တုန်လှုပ်သွားပြီး အသက်ဓာတ်သည် ပေါက်ကွဲသွားသည်။ ကောင်းကင်နှင့်မြေပြင်သည် ကမောက်ကမာဖြစ်သွားသည်။

ထိုအရှိန်အဝါ၏ အနောက်တွင် ထိတ်လန့်ဖွယ်ကောင်းသော အင်ပါယာအရှိန်အဝါတစ်ခု လိုက်ပါလာသည်။ ယင်းက အလွန်ကျယ်ပြောသော အသိစိတ်တစ်ခုမှ ဖြစ်ပေါ်လာခြင်း ဖြစ်သည်။ ထို့နောက် ယင်းက ခေတ်အဆက်ဆက်ကို ဖိနှိပ်ထားသော လွှမ်းမိုးချုပ်ချယ်ခြင်းစိတ်ဆန္ဒကို ဖွဲ့စည်းလိုက်သည်။ ယင်းကို ဝမ်ကူးကုန်းမြေ၏ တာအိုမှ ကိုယ်တိုင်အပ်နှင်းပေးထားခြင်း ဖြစ်သည်။

ယင်းက ရှေးဘုရင်တစ်ပါး၏ အရှိန်အဝါဖြစ်သည်။

သို့သော်လည်း လူအများစု တွေးထားကြသကဲ့သို့ ၎င်းက ရှေးဘုရင်ရွှမ်ယုံမဟုတ်ပေ။

ထိုအရှိန်အဝါသည် ပိုပြီးရှေးကျသည်။

ရှေးဘုရင်ရွှမ်ယုံသည် ဝမ်ကူးကုန်းမြေ၏ ပထမဆုံးရှေးဘုရင်မဟုတ်ပေ။

သူ့အရှေ့တွင် ဝမ်ကူးကုန်းမြေမှ အသင်္ချေမျိုးနွယ်စုများထဲမှာ ရှေးဘုရင်အများကြီး ပေါ်ထွန်းခဲ့ကြသည်။ ဥပမာ ရှေးဟောင်းဝိညာဉ်အင်ပါယာ ဖြစ်သည်။

ဒဏ္ဍာရီအရ အတိတ်မှာ နွေဦးအင်မော်တယ်များ ထွက်ခွာသွားကြပြီးနောက် ကျင့်ကြံသူတစ်ယောက်သည် ဝမ်ကူးကုန်းမြေ၏ ပထမဆုံး ရှေးဘုရင်ဖြစ်လာရန် ရွေးချယ်ခံခဲ့ရသည်။

ထိုရှေးဘုရင်သည် လူသားတစ်ဦး ဖြစ်သည်။

ဤခေါင်းလောင်းသည် ထိုရှေးဘုရင်ထံမှ ဆင်းသက်လာခြင်း ဖြစ်သည်။

သို့ဖြစ်၍ ထိုအရှိန်အဝါ ထွက်ပေါ်လာသည့်အခါ လောကသည် တုန်ယင်သွားပြီး ဝမ်ကူးကုန်းမြေသည် လှုပ်ခါသွားသည်။

ယုလျှိုချန်း၏ အမူအရာသည် ပြောင်းလဲသွားပြီး မြှောက်ထားသော ၎င်း၏ ခြေထောက်သည် ရပ်တန့်သွားသည်။

နောက်အခိုက်အတန့်မှာ လေထဲမှ အင်မော်တယ်အမှန်တရားခေါင်းလောင်းသည် တုန်ခါသွားသည်။ ရှေးဟောင်းခေါင်းလောင်းသံသည် မြည်ထွက်လာပြီး ခေတ်အဆက်ဆက်ကို ပဲ့တင်ထပ်သွားကာ လက်ရှိပစ္စုပ္ပန်ဆီသို့ ဆင်းသက်လာသည်။

ခေါင်းလောင်းမြည်သံသည် အလွန်ရှေးကျပြီး ဝမ်းနည်းမှုတစ်စွန်းတစ်စ ကိန်းအောင်းနေသည်။ ဤသည်မှာ ယင်းက ထွက်ခွာသွားကြသော အင်မော်တယ်များကို မည်သည့်အချိန် ပြန်ရောက်လာမလဲဟု မေးမြန်းနေသည့်အလားပင်။

‘ ခေါင်းလောင်းမြည်သံထွက်ပေါ်လာတဲ့အခါ လောကကြီးက အထီးကျန်မှုကို ခံစားရလိုက်တယ်… သေမျိုးလောကထဲမှာ ငါရပ်နေပြီး မေးလိုက်တယ်… အင်မော်တယ်တွေ မင်းတို့ဘယ်တော့ ပြန်လာမှာလဲ ’

ယုလျှိုချန်း၏ အမူအရာသည် သိသာစွာ ပျက်ယွင်းသွားသည်။ ၎င်း၏ တစ်ကိုယ်လုံးက တုန်ယင်သွားပြီး ကမ္ဘာမြေကို ဖုံးလွှမ်းထားသော ၎င်း၏ သွေးနီရောင်ဝတ်ရုံပေါ်မှာ ဆုတ်ပြဲရာထောင်ပေါင်းများစွာ ထွက်ပေါ်လာကြသည်။

၎င်းက ခြေလှမ်းရပ်တန့်လိုက်ပြီး ပေတစ်ရာခန့် အနောက်ဆုတ်သွားသည်။

“ အဲ့ဒါက ဘာကြီးလဲ ”

နတ်ဘုရားယဇ်ပလ္လင်အဆင့်၏ အနန္တအသိဉာဏ်သည်ပင် အင်မော်တယ်အမှန်တရားခေါင်းလောင်းကို မလွှမ်းမိုးနိုင်ပေ။

ဤသည်မှာ ယင်းက အချိန်မြစ်ထဲမှာ ပျောက်ကွယ်နေသည့်အလား သို့မဟုတ် ပုံရိပ်ယောင်ကြားထဲမှာ ပုန်းအောင်းနေသည့်အလားပင်။ လကွယ်သွားပြီး နေထွက်လာသည့်အခါမှသာ ယင်းက ဤလောကထဲမှာ ထွက်ပေါ်လာလိမ့်မည်။

ယုလျှိုချန်းတစ်ယောက်တည်း နှလုံးတုန်သွားခြင်း မဟုတ်ပေ။ မီးတောက်နတ်ဘုရား၊ အမှောင်နတ်ဘုရား၊ နေနတ်ဘုရား၊ လနတ်ဘုရားနှင့် ကြယ်နတ်ဘုရားသည်လည်း တုန်လှုပ်သွားကြသည်။

လူသားမျိုးနွယ်ထဲမှာ မည်သည့်အခြေခံအုတ်မြစ်မှ မကျန်ရစ်ခဲ့ခြင်း မဟုတ်ပေ။

ယင်းက ဓားကိုင်ဧကရာဇ်ထက်ပင် ပိုပြီးရှေးကျသည်။ ယင်းက ရှေးဘုရင်ရွှမ်ယုံခေတ်မတိုင်ခင်မှာ ကိုယ့်ဘာသာ ပုန်းကွယ်နေခဲ့သည်။

ယနေ့မှာတော့ ယင်းက အကြောင်းအမျိုးမျိုးကြောင့် ပြန်နိုးထလာသည်။

ဧကရီသည် အေးဆေးတည်ငြိမ်သည်။

မဟာဧကရာဇ်သည် မည်သည့်စကားမှ မပြောချေ။

ယုလျှိုချန်းက နှလုံးတုန်သွားသည်နှင့်တစ်ပြိုင်နက် နန်းတော်ထဲမှာ လွင့်မျောနေသော အင်မော်တယ်အမှန်တရားခေါင်းလောင်းသည် နောက်တစ်ကြိမ် တုန်ခါသွားပြီး ဒုတိယခေါင်းလောင်းမြည်သံကို ထုတ်ဖော်လိုက်သည်။

ကျယ်လောင်သော မြည်သံက လောကထဲမှာ ပဲ့တင်ထပ်သွားသည်။

‘ အချိန်က ကုန်လွန်သွားတယ်… လူတိုင်းက ခရီးနှင်သွားကြတယ်… ဇာတိမြေပေါ်မှာ ငါရပ်နေပြီး အင်မော်တယ်တွေကို မေးလိုက်တယ်… ဘာလို့ အထီးကျန်မှုကို ငါခံစားရတာလဲ ’

ယုလျှိုချန်းသည် အပြင်းအထန် တုန်ယင်သွားပြီး ၎င်း၏ အမူအရာသည် ပိုပြီးမည်းမှောင်သွားသည်။ ဒုတိယအကြိမ် ခေါင်းလောင်းမြည်သံအောက်မှာ ၎င်း၏ ရင်ဘက်ပေါ်မှ ဒဏ်ရာဟောင်းက ရုတ်တရက် ပွင့်ထွက်သွားသည်။

၎င်းက ရွေးချယ်စရာမရှိသည့်အဆုံး ပေတစ်ထောင်အကွာအဝေးသို့ အနောက်ဆုတ်သွားရသည်။

အင်မော်တယ်အမှန်တရားခေါင်းလောင်းသည် အဆုံးမဲ့သော အလင်းရောင်နှင့်အတူ ထွန်းလင်းတောက်ပလာသည်။ ယင်းက ရောင်ဝါတောက်ပနေစဉ် ဝမ်းနည်းကြေကွဲသော စိတ်ဆန္ဒနှင့်အတူ တတိယအကြိမ် မြည်ဟိန်းသွားသည်။

ယင်းက အင်မော်တယ်များကို နောက်ဆုံးအကြိမ် မေးမြန်းလိုက်ဟန် ရ၏။

‘ အင်မော်တယ်လမ်းစဉ်က ရှည်လျားပြီး ဘဝက အဆုံးမဲ့တယ်… လောကရဲ့ အထွတ်အထိပ်မှာ ငါရပ်နေပြီး အင်မော်တယ်တွေကို မေးလိုက်တယ်… တာအိုက ဘယ်မှာလဲ ’

ယုလျှိုချန်း၏ ဝိညာဉ်သည် တုန်ယင်သွားပြီး ၎င်း၏ ခန္ဓာကိုယ်သည် ခေါင်းလောင်းမြည်သံကြောင့် တိုက်ရိုက် အက်ကွဲသွားသည်။ ၎င်းက ချက်ချင်း ပြန်ကောင်းမွန်လာသော်လည်း ထပ်မံ အနောက်ဆုတ်သွားရပြန်သည်။

၎င်းက ပေတစ်သောင်းအကွာအဝေးသို့ အနောက်ဆုတ်ပြီးမှသာ ၎င်း၏ ခန္ဓာကိုယ်ကို ပြန်ထိန်းချုပ်နိုင်သွားသည်။ ထို့နောက် ၎င်းက ခေါင်းမော့လိုက်ပြီး ခေါင်းလောင်းကို စူးစိုက်ကြည့်လိုက်သည်။

ခေါင်းလောင်းထဲမှာ ကိန်းအောင်းနေသော စိတ်ဆန္ဒသည် အလွန်ကြောက်စရာကောင်းသည်။ ယင်းက တာအိုကို ရှာဖွေချင်သော စိတ်ဆန္ဒ၊ အင်မော်တယ်များကို ရှာဖွေချင်သော စိတ်ဆန္ဒဖြစ်သည်။

ဤသည်မှာ အတိတ်တွင် တစ်စုံတစ်ယောက်က ဝမ်ကူးကုန်းမြေ၏ အထွတ်အထိပ်သို့ ရောက်ရှိသွားပြီးနောက် သူ၏ ပြိုင်ဘက်ကင်းကျင့်ကြံခြင်းနှင့် တုနှိုင်းမဲ့သော အဆင့်အတန်းကို အသုံးပြု၍ ဤခေါင်းလောင်းကို တီးခတ်ကာ အင်မော်တယ်များကို မေးမြန်းခဲ့ဟန် ရသည်။

ခေါင်းလောင်းမြည်သံသုံးကြိမ်ကပင် ယုလျှိုချန်းကို ဤအခြေအနေသို့ ကျရောက်စေခဲ့သည်။ အကယ်၍ စတုတ္ထအကြိမ် ခေါင်းလောင်းမြည်သံသာ ထွက်ပေါ်လာမည်ဆိုလျှင် ဤနှစ်များမှာ ၎င်းက ကြိုးစားပမ်းစား ပြန်ကုသထားခဲ့သော ဒဏ်ရာဟောင်းများက သေချာပေါက် ပြန်ထကြွလာလိမ့်မည်။

သို့သော်လည်း ထိုသို့ခေါင်းလောင်းမြည်ရန် မည်သည့်တန်ဖိုးမှ မပေးဆပ်ရကြောင်း ၎င်းမယုံကြည်ပေ။

ထိုတန်ဖိုးသည် အလွန်ကြီးမားရမည်။

ထို့ကြောင့် ခေါင်းလောင်းက နောက်တစ်ကြိမ် ဆက်မြည်နိုင်သေးသလား ၎င်းမသေချာပေ။

သို့သော်လည်း ၎င်းက အလောင်းအစား မလုပ်ဝံ့ချေ။

အကယ်၍ ၎င်းက အလောင်းအစားမှာ အနိုင်ရသွားမည်ဆိုလျှင်ပင် ၎င်း၏ လက်ရှိအခြေအနေဖြင့် ဓားကိုင်ဧကရာဇ်ကို ရင်ဆိုင်ရန် ယုံကြည်ချက်မရှိပေ။

အကယ်၍ ၎င်းက အလောင်းအစားမှာ ရှုံးနိမ့်သွားမည်ဆိုလျှင် ထိုထက်ပိုပြီး အခြေအနေဆိုးဝါးသွားလိမ့်မည်။

သို့ဖြစ်၍ ၎င်းက နှုတ်ဆိတ်သွားသည်။

ခေါင်းလောင်းသည် လေထဲမှာ နောက်တစ်ကြိမ် တုန်ယင်သွားသည်။ ဤသည်မှာ ယင်းက စတုတ္ထအကြိမ်မြောက် ခေါင်းလောင်းမြည်သံကို ထုတ်လွှတ်တော့မည့်အလားပင်။

ယင်းကို ယုလျှိုချန်းမြင်သောအခါ ၎င်းက ရုတ်တရက် ပြောသည်။

“ ဒီနေ့ ငါက ပွဲကြည့်ရုံသက်သက် ရောက်လာတာပါ ”

၎င်း၏ စကားသံ ထွက်ပေါ်လာသည်နှင့်ချက်ချင်း အင်မော်တယ်အမှန်တရားခေါင်းလောင်းက ရပ်တန့်သွားသည်။

နောက်အခိုက်အတန့်မှာ အေးစက်စက် စကားသံက ဓားကိုင်နန်းတော်ထဲမှ မြည်ဟိန်းထွက်လာသည်။

“ ထွက်သွားစမ်း ”

ထိုစကားသံ ထွက်ပေါ်လာသည်နှင့်ချက်ချင်း လောကကြီးက ပျက်စီးသွားတော့မည့်ဟန် ရသည်။

ယင်းက ယုလျှိုချန်းတစ်ယောက်တည်းကို ပစ်မှတ်ထားခြင်း မဟုတ်ပေ။ ယင်းအစား အသံသည် ကောင်းကင်နှင့်မြေပြင်ကြားမှာ အရပ်ရှစ်မျက်နှာဆီသို့ ပဲ့တင်ထပ်သွားပြီး ကောင်းကင်ဘုံမိုးခြိမ်းသံပမာ ပေါက်ကွဲသွားသည်။

ရုတ်တရက်ဆိုသလို ဧကရီ၏ နတ်ဘုရားအဖြစ်တတ်လှမ်းခြင်း ရိုးရာဓလေ့ကို နည်းလမ်းအမျိုးမျိုးဖြင့် စောင့်ကြည့်နေကြသော နတ်ဘုရားစိတ်အာရုံအသီးသီးသည် ချက်ချင်း ပျောက်ကွယ်သွားကြသည်။

၎င်းတို့က ထွက်သွားရန် ရွေးချယ်ခဲ့ကြသည်။

ဓားကိုင်ဧကရာဇ်ဆီမှာ နောက်ဆုံးဓားချက်ထုတ်လွှတ်ရန် ခွန်အားကျန်နေသေးသလော ၎င်းတို့မသိသော်လည်း မည်သူမှ အလောင်းအစား မလုပ်ဝံ့ကြချေ။

ထို့ပြင် နန်းတော်ထဲမှ အံ့ဖွယ်ကောင်းသော ခေါင်းလောင်းသည် လူတိုင်းကို နှလုံးတုန်သွားစေခဲ့သည်။

ယုလျှိုချန်းသည် ဓားကိုင်နန်းတော်ကို ကြည့်လိုက်သည်။ အသက်ရှူချိန်အနည်းငယ် ကြာပြီးနောက် ၎င်း၏ ခန္ဓာကိုယ်က ဝေဝါးသွားသည်။ ၎င်းက ထွက်သွားရန် ရွေးချယ်လိုက်သည်။

ရှေးဘုရင်ဂြိုလ်ပေါ်တွင် နတ်ဘုရားမီးတောက်သည် ပိုပြီးအားကောင်းစွာ တောက်လောင်လာသည်။