လကြိုဆိုတဲ့ ကောင်းကင်ဘုံတေးသံ(က)

ဒုန်းယိုအရှင်သခင်၏ အသံက စည်းချအစီအရင်စင်မြင့်ပေါ်မှာ ပဲ့တင်ထပ်သွားသည်။

ယင်းက ရွှီချင်း၏ နားထဲသို့ ဝင်ရောက်သွားသည့်အခါ တစ်ဖက်လူ၏ တမူထူးခြားသော အက်ရှရှအသံက ဇရာအိုမင်းသော အရိပ်အမြွက်ကို သယ်ဆောင်လျက် တစ္ဆေတစ်ရာ၏ အမှောင်ညလှည့်ပတ်ခြင်းအကြောင်းကို အသေးစိတ် ရှင်းပြပေးသည်။

ဒုန်းယိုအရှင်သခင်၏ ပြောကြားမှုနှင့် သူ၏ နတ်ဘုရားစိတ်အာရုံထဲမှ မြင်ကွင်းအရ ထိုသေးသွယ်သော လက်က ဒဏ္ဍာရီလာရွှေကျီးကန်းဘုရားကျောင်းထဲတွင် လကြိုဆိုကောင်းကင်ဘုံတေးသွားကို တီးခတ်ခဲ့သော တေးသံပညာရှင်၏ လက်ဖြစ်နိုင်ကြောင်း ရွှီချင်း သေချာသွားသည်။

ယင်းက ရွှေကျီးကန်းနဂါးရထားလုံးကို ရှာဖွေနိုင်မည့် အခွင့်အရေးတစ်ခုလည်း ဖြစ်သည်။

‘ ဒါပေမဲ့ တစ်ဖက်လူက ဘာလို့ ယန်ယန်ကို စိုက်ကြည့်နေပြီး သူ့အပေါ်မှာ အမှတ်အသားလုပ်ထားတာလဲ… ’

ရွှီချင်းက နက်နဲစွာ တွေးတောလိုက်ပြီး ယန်ယန်ကို ကြည့်လိုက်သည်။

ယန်ယန်၏ ထူးခြားမှုသည် သူ၏ ဆန်းကြယ်သော ရုပ်ခန္ဓာကိုယ်ဖြစ်သည်။ သူ၏ ရုပ်ခန္ဓာကိုယ်က ဒြပ်နှောများ၏ ကျူးကျော်ဝင်ရောက်ခြင်းကို တားဆီးပေးသည်။ ရွှီချင်းသည်ပင် ထိုရုပ်ခန္ဓာကိုယ်၏ ဇစ်မြစ်ကို မရှာဖွေနိုင်ပေ။

“ ဆရာ တံခါးပိတ်ကျင့်ကြံတာကနေ ပြန်ထွက်လာတဲ့အခါ ဆရာ့ကို ငါမေးနိုင်တယ်… ဆရာက ယန်ယန်ရဲ့ ထူးခြားတဲ့ ရုပ်ခန္ဓာကိုယ်အကြောင်းကို သိထားလောက်တယ် ”

ရွှီချင်းက တိတ်တဆိတ် စဉ်းစားလိုက်သည့်အခါ သူ၏ မျက်လုံးထဲမှာ ဆုံးဖြတ်ချက်ပြတ်သားသော အရိပ်အယောင် ထွက်ပေါ်လာသည်။

မည်သို့ဖြစ်ပါစေ ယခုအချိန်မှာ အရေးကြီးဆုံးသည် တစ်ဖက်လူ၏ စိုက်ကြည့်ခံရမှုကြောင့် ဖြစ်ပေါ်လာသော ယန်ယန်၏ ခန္ဓာကိုယ်ပေါ်မှ ကမ္မဆက်သွယ်မှုကို ဖြတ်တောက်ပစ်ရန် ဖြစ်သည်။

သူက လုံးဝတုံ့ဆိုင်းမနေပေ။ ထိုလက်ပြတ်၏ ဇစ်မြစ်ကို သိရှိပြီးနောက် သူ့နတ်ဘုရားစိတ်အာရုံ၏ နယ်နိမိတ်အတွင်းမှာရှိသော ပင်လယ်ကြမ်းပြင်အောက်မှ အပျက်အစီးကြားထဲတွင် တစ္ဆေသရဲအားလုံးက တိတ်ဆိတ်ငြိမ်သက်သွားကြသည်။

၎င်းတို့ထံမှ စူးရှသော အော်ဟစ်ညည်းညူသံများက ရပ်တန့်သွားသည်။

ဤသည်မှာ ထိုတစ္ဆေသရဲများက အော်ဟစ်နေခြင်းကို ရပ်တန့်လိုက်ခြင်းမဟုတ်ပေ။ ယင်းအစား ၎င်းတို့၏ အသံများက ဤအခိုက်အတန့်မှာ ရွှီချင်းကြောင့် ဖယ်ရှားခံလိုက်ရခြင်းသာ ဖြစ်သည်။

ဖယ်ရှားခံလိုက်ရသော အသံများက ရွှီချင်း၏ စွမ်းအားဖြစ်လာပြီး သူ၏ သတ်ဖြတ်ခြင်းလက်နက်တစ်ခု ဖြစ်လာသည်။

ယင်းက အန္တရာယ်ရှိသော တိုက်ခိုက်မှုတစ်ခုသို့ အသွင်ပြောင်းလဲသွားပြီး သေးသွယ်သော လက်ပေါ်သို့ ကျဆင်းသွားသည်။

ချက်ချင်းဆိုသလို ပင်လယ်ကြမ်းပြင်သည် တိတ်ဆိတ်စွာ လှုပ်ခတ်သွားပြီး မုန်တိုင်းတစ်ခု ဖြစ်ပေါ်လာသည်။ ကြောက်မက်ဖွယ်ကောင်းသော ဖိအားနှင့် အရှိန်အဝါက ပင်လယ်ကြမ်းပြင်ဆီမှ ထွက်ပေါ်လာပြီး ပင်လယ်ရေမျက်နှာပြင်ပေါ်သို့ မြှောက်တတ်သွားသည်။ ယင်းက ပင်လယ်ရေမျက်နှာပြင်ပေါ်တွင် ဧရာမရေလှိုင်းလုံးများကို ထွက်ပေါ်လာစေသည်။

သို့သော်လည်း အဖြစ်အပျက်အားလုံးသည် လုံးဝအသံတိတ်နေသည်။

ဤအခိုက်အတန့်မှာ ဤဧရိယာတစ်ဝိုက်မှ အသံအားလုံးက ဆရာသခင်တစ်ဦး၏ ထိန်းချုပ်မှုအောက်သို့ ကျရောက်နေသည့်အလားပင်။

အသံနတ်ဘုရားအခွင့်အာဏာ၏ စွမ်းအားက အပြည့်အဝ ပေါ်လျှိုးလာသည်။

သို့သော်လည်း အန္တရာယ်ကျရောက်လာသည့်အခိုက် သေးသွယ်သော လက်ပေါ်မှ မျက်လုံးက ရုတ်တရက် ပွင့်သွားသည်။

မျက်လုံးထဲတွင် အနီရောင်သူငယ်အိမ်က ထွက်ပေါ်လာပြီး အဆုံးမဲ့သော ရက်စက်ကြမ်းကြုတ်မှုကို ထုတ်လွှတ်လိုက်သည်။ ၎င်း၏ လက်ချောင်းများက မြန်ဆန်စွာ လှုပ်ရှားသွားကြသည်။ ဤသည်မှာ လက်ချောင်းများက ကုချင်းကြိုးများကို တီးခတ်လိုက်သည့်အလားပင်။

တူညီသော အသံနတ်ဘုရားအခွင့်အာဏာက ထိုလက်ထံမှ ထွက်ပေါ်လာသည်။

၎င်းက အတိတ်တွင် ရွှီချင်းမြင်တွေ့ခဲ့သော နတ်ဘုရားသက်ရှိများနှင့် လုံးဝခြားနားသည်။

ယေဘုယျအားဖြင့်ဆိုရသော် နတ်ဘုရားသက်ရှိများ၏ တိုက်ပွဲစွမ်းအားသည် ၎င်းတို့၏ နတ်ဘုရားအစွမ်းနှင့် နတ်ဘုရားအရင်းအမြစ်ပေါ်မှာ မူတည်သည်။ ထုံးစံအားဖြင့် နတ်ဘုရားသက်ရှိများဆီမှာ နတ်ဘုရားအခွင့်အာဏာ မရှိပေ။ အနည်းဆုံးတော့ ဤနှစ်ဝက်အတွင်းမှာ ရွှီချင်းသတ်ဖြတ်ခဲ့သော မည်သည့်နတ်ဘုရားသက်ရှိထံမှာမှ နတ်ဘုရားအခွင့်အာဏာ မရှိပေ။

သို့သော်လည်း ထိုလက်ပြတ်က နတ်ဘုရားအခွင့်အာဏာကို အမှန်တကယ် ထုတ်ဖော်လိုက်သည်။

နောက်အခိုက်အတန့်မှာ ရွှီချင်းကြောင့် အသံခိုးယူခံလိုက်ရသော တစ္ဆေသရဲများသည် ခန္ဓာကိုယ်တုန်ယင်သွားကြသည်။ ၎င်းတို့က အံ့အားသင့်ဖွယ်ကောင်းစွာ တိတ်ဆိတ်နေခြင်းမှ ပြန်ကောင်းမွန်လာကြသည်။ လျှပ်တစ်ပြက်အတွင်းမှာ တိတ်ဆိတ်နေသော ပင်လယ်ကြမ်းပြင်သည် စူးရှသော အော်ဟစ်ညည်းညူသံများဖြင့် ထပ်မံ ပြည့်နှက်သွားသည်။

၎င်းတို့ထံမှ စွမ်းအားသည် ရွှီချင်းထံမှ ဖိနှိပ်ခြင်းနှင့် သတ်ဖြတ်ခြင်းစွမ်းအားကို ခုခံလိုက်သည်။

ကျယ်လောင်သော မိုးခြိမ်းသံသည် ပင်လယ်ကြမ်းပြင်မှာ ပဲ့တင်ထပ်သွားသည်။ မိုးခြိမ်းသံက တစ်ခဏကြာအောင် ပဲ့တင်ထပ်သွားပြီးနောက် ဘေးပတ်ဝန်းကျင်က ရုတ်ချည်း တိတ်ဆိတ်ငြိမ်သက်သွားသည်။

ပင်လယ်ကြမ်းပြင်အတွင်းမှ အသံများသည်လည်း ထိုအတိုင်းပင်။ အသံသည် ပျောက်သွားလိုက် ပြန်ပေါ်လာလိုက်ဖြင့် တစ်လှည့်စီပြောင်းလဲနေသည်။ အသံများက လက်ချောင်းများ၏ ထိန်းချုပ်ခံလိုက်ရသော်လည်း နောက်အခိုက်အတန့်မှာ ယင်းတို့က ရွှီချင်းကြောင့် ဖယ်ရှားခံလိုက်ရသည်။

တစ္ဆေသရဲများ၏ အော်သံများသည်လည်း ထိုအတိုင်း သက်ရောက်ခံလိုက်ရသည်။ ၎င်းတို့၏ အော်ဟစ်ညည်းညူသံများက ပြတ်တောင်းပြတ်တောင်း ဖြစ်လာသည်။

ဤသည်မှာ တူညီသော နတ်ဘုရားအခွင့်အာဏာကြားမှ တိုက်ပွဲဖြစ်သည်။

ထိုသို့တိုက်ပွဲသည် နတ်ဘုရားများကြားတွင် အလွန်ရှားပါးသည်။ သို့သော်လည်း ရံဖန်ရံခါ ထိုသို့တိုက်ပွဲဖြစ်သည့်အခါတိုင်း ယင်းက သေခြင်းရှင်ခြင်းတိုက်ပွဲ ဖြစ်လိမ့်မည်။

နှစ်ဖက်စလုံးက တူညီသော နတ်ဘုရားအခွင့်အာဏာကို ပိုင်ဆိုင်ထားသည့်အခါ ယင်းက ထိုနတ်ဘုရားအခွင့်အာဏာပေါ် မည်သူက ပိုပြီးလွှမ်းမိုးခြယ်လှယ်နိုင်ကြောင်း အဆုံးအဖြတ်ပေးမည့် တိုက်ပွဲဖြစ်လိမ့်မည်။

ဤနတ်ဘုရားအခွင့်အာဏာတိုက်ပွဲတွင် အော်ဟစ်ညည်းညူနေကြသော တစ္ဆေသရဲများက အဓိကအချက်အချာ ဖြစ်သည်။

နတ်ဘုရားအခွင့်အာဏာချင်း အားပြိုင်မှုတွင် တစ္ဆေသရဲအများစုက ယင်းကို မတောင့်ခံနိုင်ကြချေ။ ထို့ကြောင့် ၎င်းတို့က စတင်ယိုယွင်းပျက်စီးလာကြသည်။ တစ်ချိန်တည်းမှာ ရွှီချင်း၏ အသံဖယ်ရှားမှုစွမ်းရည်ကြောင့် တိတ်ဆိတ်မှုက ပိုပြီးကြာမြင့်လာပြီး ယင်းက စက်ဝိုင်းသဏ္ဍာန် ဘေးပတ်ဝန်းကျင်ကို လွှမ်းခြုံသွားသည်။

ရွှီချင်း၏ နတ်ဘုရားအခွင့်အာဏာသည် ပိုပြီးပြည့်စုံသည်။ အဘယ့်ကြောင့်ဆိုသော် ယင်းက သူ၏ ဆင်ခြင်နားလည်မှုကြောင့် ဖြစ်သည်။ တခြားအကြောင်းမှာ သူက ဗလာနတ္ထိကုန်းမြေထဲတွင် အသံနတ်ဘုရားအမှတ်အသားကို ဖွဲ့စည်းထားပြီးပြီ ဖြစ်သည်။ ထို့ကြောင့် အဆင့်အတန်းအရဆိုလျှင် သူ၏ နတ်ဘုရားအခွင့်အာဏာက အထွတ်အထိပ်မှာ ရှိသည်။

သို့ဖြစ်၍ ဤနတ်ဘုရားအခွင့်အာဏာတိုက်ပွဲတွင် ရွှီချင်းက အသာစီးရရှိထားသည်။

သို့သော်လည်း ရွှီချင်း၏ လွှမ်းမိုးခြယ်လှယ်မှုက ပိုပြီးအားကောင်းလာနေစဉ် သေးသွယ်သော လက်ဖဝါးပေါ်မှ မျက်လုံးက ခြိမ်းခြောက်မှုကို အာရုံခံမိသွားဟန် ရသည်။ မျက်လုံးက ပိုပြီးပြူးကျယ်လာပြီး သွေးနီရောင်သူငယ်အိမ်၏ ဘေးပတ်ပတ်လည်မှ သွေးကြောများက အနီရောင်မျက်ရည်တစ်စက်ကို ညှစ်ထုတ်ပေးလိုက်သည်။

မျက်ရည်ကျလာသည်နှင့်ချက်ချင်း ယိုယွင်းပျက်စီးနေသော တစ္ဆေသရဲများက အပြင်းအထန် တုန်ယင်သွားကြသည်။ ၎င်းတို့အားလုံးက တစ်ပြိုင်နက် ခေါင်းလှည့်လိုက်ကြပြီး ရွှီချင်းထံသို့ စိုက်ကြည့်လိုက်ကြသည်။

ရူးသွပ်သွားသော ထိုအခြေအနေတွင် ၎င်းတို့က ကိုယ့်ကိုယ်ကိုယ် ဖောက်ခွဲလိုက်ကြပြီး မာန်ဖီဟိန်းဟောက်လိုက်ကြသည်။ စူးရှသော အော်ဟစ်သံများက ဘေးပတ်ဝန်းကျင်မှ တိတ်ဆိတ်ငြိမ်သက်မှုကို ချိုးဖောက်သွားသည်။

သွေးနီရောင်မျက်ရည်သည် အသစ်ထွက်ပေါ်လာသော အသံများကို စုဆောင်းလိုက်ပြီး ဆူညံမှုကို ဖန်တီးလိုက်သည်။ ထိုအသံလှိုင်းသည် သွေးနီရောင်မျက်ရည်ကို သယ်ဆောင်လျက် ပင်လယ်အနက်ပိုင်းထဲမှ မြှောက်တတ်လာပြီး ပင်လယ်ရေမျက်နှာပြင်ကို ထိုးဖောက်သွားသည်။ ထို့နောက် ယင်းက ရွှီချင်းတည်ရှိနေသော ဒုန်းယိုကျွန်းဆီသို့ ထက်ရှသော ဓားသွားတစ်စင်းနှယ် ပျံသန်းသွားသည်။

ဒုန်းယိုကျွန်းတစ်ခုလုံး တုန်လှုပ်သွားသည်။

ထိုသို့လုပ်ဆောင်ပြီးနောက် သေးသွယ်သော လက်ဖဝါးပေါ်မှ မျက်လုံးက သိသာစွာ အားနည်းသွားသည်။ ၎င်းက တစ်ခဏကြာ မျက်လုံးမှိတ်ချည်ဖွင့်ချည် ပြုလုပ်လိုက်သည့်အခါ အကောင်းတိုင်း ကျန်ရစ်ခဲ့ကြသော တစ္ဆေသရဲများက ၎င်း၏ ဘေးပတ်ပတ်လည်မှာ မြန်ဆန်စွာ စုဝေးသွားကြသည်။ ထို့နောက် ၎င်းတို့အားလုံးက တားမြစ်ပင်လယ်၏ အနက်ပိုင်းထဲသို့ အတူတကွ ထွက်ပြေးသွားကြကာ လွတ်မြောက်ရန် ကြိုးစားလိုက်ကြသည်။

ပင်လယ်အောက်ခြေမှ မြန်ဆန်စွာ ချဉ်းကပ်လာနေသော သွေးနီရောင်ဥက္ကာပျံကို မြင်တွေ့သွားသောအခါ ဒုန်းယိုကျွန်းပေါ်မှ ကျင့်ကြံသူအားလုံး၏ ခန္ဓာကိုယ်များနှင့် ဝိညာဉ်များက တုန်ယင်သွားကြသည်။

ရွှယ်လျန်ဇီနှင့် ဒုန်းယိုအရှင်သခင်သည်သာ ပိုပြီးအခြေအနေကောင်းကြသည်။ သို့သော်လည်း သူတို့သည်ပင် နှလုံးတုန်သွားကြသည်။

ရွှီချင်းသည် ခေါင်းမော့လိုက်ပြီး သွေးနီရောင်ဥက္ကာပျံကို ကြည့်လိုက်သည်။

တစ်ဖက်လူ၏ တန်ပြန်တိုက်ခိုက်မှုက သူ့ကို မအံ့ဩစေပေ။ သူက ထိုလက်ပြတ်၏ သရုပ်ကို သိထားမှတော့ တစ်ဖက်လူဆီမှာ အသံစွမ်းရည်ရှိနိုင်ကြောင်း ကြိုတင်ခန့်မှန်းထားခဲ့သည်။

မည်သို့ဖြစ်ပါစေ ၎င်းက နေနန်းတော်မှ တေးသံပညာရှင်၏ လက်ဖြစ်သည်။

နတ်ဘုရားမျက်နှာပျက်ကြီး၏ အကြည့်အောက်မှာ ထိုတေးသံပညာရှင်၏ လက်တစ်ဖက်က မည်သို့ကြောင့် မပျက်စီးသွားဘဲ အကောင်းတိုင်း ကျန်ရှိနေသေးကြောင်း သူမသိပေ။ ထို့အတူ ထိုလက်ပြတ်ကို ထိန်းချုပ်ထားသူက တေးသံပညာရှင်၏ မူလအသိစိတ်လော သို့မဟုတ် အသစ်ထွက်ပေါ်လာသည့် အကြွင်းအကျန်စိတ်ဆန္ဒလော သူမသေချာပေ။